Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 22 октября 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 4-й де́нь.
Святы́я великому́ченицы Варва́ры и преподо́бнаго отца́ на́шего Іоа́нна Дамаскина́.

Аще изво́литъ настоя́тель пѣ́ти съ поліеле́емъ:

ВЕЧЕРЪ,
Блаже́нъ му́жъ, 1-й антифо́нъ. На Го́споди воззва́хъ: стихи́ры святы́я, гла́съ 2. Подо́бенъ: Егда́ отъ дре́ва.

Егда́ на суди́щи стра́шнѣмъ* Іуліанíя зря́щи всеблаже́нная* му́ченицу сла́вную Варва́ру,* ра́нами стра́ждущу,* му́ками же разли́чными* тѣ́ло все́ ссѣца́емо,* те́плыми слеза́ми вопія́ше:* Сло́ве Бо́жій,* сея́ о́бщницу мя́ бы́ти ны́нѣ сподо́би,* Человѣколю́бче. [Два́жды.]

Еди́нъ Варва́ра и́стинно* и Іуліанíя нра́въ* ко благоче́стію иму́ще святы́я,* подвиза́шася на врага́* и побѣди́вше того́ крѣ́пко,* сла́вы сподо́бишася отъ Христа́ Бо́га.* Тѣ́мже губи́тельныхъ страсте́й* вре́дъ потреби́вше,* всѣ́мъ вѣ́рнымъ подаю́тъ врачева́нія.

Егда́ изрече́ся на тя́,* му́ченице честнѣ́йшая Варва́ро,* сла́дкая сме́рть,* ра́дующися и спѣша́щи,* тече́ніе соверши́ла еси́;* нечести́ваго же роди́теля* рука́ми пребеззако́нными поже́рлася* и пло́дъ Бо́гу принесла́ся еси́.* Тѣ́мже, съ му́дрыми дѣ́вами* и́стинно лику́ющи,* зри́ши Христа́, Жениха́ Твоего́,* осія́ніе.

Ины стихи́ры преподо́бнаго, гла́съ 8. Подо́бенъ: О, пресла́внаго чудесе́!

Отче Іоа́нне всему́дре,* Це́рковь Христо́ву* уясни́лъ еси́ пѣ́сньми,* Боже́ственнѣйшая сладкопоя́, всесла́вне,* дѣ́йствомъ, о́тче, Ду́ха,* твою́ цѣвни́цу ударя́я,* всесли́чнѣй Дави́довѣ подо́бяся,* е́юже возглаша́я,* Боже́ственными пѣ́сньми вся́ привле́клъ еси́. [Два́жды.]

Отче Іоа́нне сла́вне,* мірскíя отсту́пль мяте́жныя молвы́,* ко Христо́вѣ прите́клъ еси́ тишинѣ́, преподо́бне,* и видѣ́ніи Боже́ственными и дѣя́ніи,* всебога́тыми я́вѣ свѣтлостьми́* и́стинно обогати́лся еси́,* и вѣ́рнымъ препо́далъ еси́,* боголѣ́пнымъ сія́я житіе́мъ, блаже́ннѣйше.

Пріиди́те, земноро́дніи,* пѣ́сньми свяще́нное и честно́е* преподо́бнаго торжество́ Іоа́нна* дне́сь благоче́стно воспои́мъ:* се́й бо и́стинно Боже́ственнаго осія́нія* сподо́бися Свѣ́тъ прія́ти.* О, неизрече́ннаго Твоего́ благоутро́бія, Го́споди,* и́мже мы́ позна́хомъ сла́вити Тя́, Преблага́го!

Сла́ва, гла́съ 6:

Оте́чество, ро́дъ, имѣ́ніе оста́вивши, Варва́ро, и нечести́ваго отца́ возненави́дѣвши, Бо́га возлюби́ла еси́, и Тому́ уневѣ́стилася еси́ и была́ еси́ великоку́пница наречена́, Того́ моли́ спасти́ся душа́мъ на́шимъ.

И ны́нѣ, богоро́диченъ догма́тикъ: [Кто́ Тебе́ не ублажи́тъ...]
Или́ крестобогоро́диченъ. Подо́бенъ: Тридне́венъ.

Лю́ди беззако́ннѣйшія, безъ пра́вды пригвожда́ющія Тя́ на дре́вѣ, Дѣ́ва и Чи́стая Ма́ти Твоя́ зря́щи, я́коже Симео́нъ прорече́, утро́бою, Спа́се, уязвля́шеся.

[И а́ще бу́детъ поліеле́й:]
Вхо́дъ, проки́менъ дне́ и чте́нія три́.

Прему́дрости Соломо́новы чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ, стихи́ры святы́я, гла́съ 1. Подо́бенъ: Небе́сныхъ чино́въ.

Отца́ нечести́ваго и ма́терь, Варва́ро, преоби́дѣвши,* Бо́га и Вы́шній Іерусали́мъ возлюби́ла еси́,* въ не́мже живу́щи ны́нѣ,* и на́мъ спребыва́ти тебѣ́,* умоли́ Влады́ку Христа́.

Сти́хъ: Ди́венъ Бо́гъ во святы́хъ Свои́хъ,* Бо́гъ Изра́илевъ.

Ни пристра́стіе роди́телей, ни сла́сти,* ни добро́та тѣле́сная, ни бога́тство,* ни му́ки отторго́ша тя́ отъ любве́ Зижди́теля,* Его́же, великому́ченице, на́мъ ми́лостива сотвори́.

Сти́хъ: Святы́мъ, и́же су́ть на земли́ Его́,* удиви́ Госпо́дь вся́ хотѣ́нія Своя́ въ ни́хъ.

Въ Тро́ицѣ Еди́наго Бо́га исповѣ́дующи дерзнове́нно, Варва́ро,* во главу́ усѣче́на,* вѣне́цъ побѣ́ды свы́ше отъ Христа́ прія́ла еси́,* съ Ни́мже ны́нѣ ца́рствующи,* ми́ръ всѣ́мъ испроси́.

Сла́ва, свята́го, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ непоро́чно поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, богоро́диченъ: [Творе́цъ и Изба́витель мо́й...]
Или́ крестобогоро́диченъ:

Ви́дящи Тя́ распина́ема, Христе́, Тебе́ ро́ждшая вопія́ше: что́ стра́нное е́же ви́жу та́инство, Сы́не Мо́й? Ка́ко на дре́вѣ умира́еши, пло́тію повѣ́шенъ, жи́зни Пода́телю?

Тропа́рь святы́я, гла́съ 8:

Варва́ру святу́ю почти́мъ: вра́жія бо сѣ́ти сокруши́, и я́ко пти́ца, изба́вися отъ ни́хъ по́мощію и ору́жіемъ Креста́, всечестна́я.

Инъ тропа́рь святы́я, гла́съ 4:

Агнице всеблаже́нная Варва́ро, Боже́ственнѣ озари́вшися свѣ́томъ Святы́я Тро́ицы трисо́лнечнымъ, и въ купѣ́ли утверди́вшися, въ побѣжде́ніе ле́сти оте́ческія, вѣ́ру исповѣ́дала еси́ Христо́ву. Тѣ́мъ, всечестна́я, свы́ше благода́ть тебѣ́ дарова́ Бо́гъ, исцѣля́ти неду́ги и болѣ́зни вся́. Его́же моли́, великому́ченице, да спасе́тъ ду́ши на́ша.

Сла́ва, тропа́рь преподо́бнаго, гла́съ 8:

Правосла́вія наста́вниче, благоче́стія учи́телю и чистоты́, вселе́нныя свѣти́льниче, мона́шествующихъ богодохнове́нное удобре́ніе, Іоа́нне прему́дре, уче́ньми твои́ми вся́ просвѣти́лъ еси́, цѣвни́це духо́вная, моли́ Христа́ Бо́га спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ.



НА УТРЕНИ,
На Бо́гъ Госпо́дь: Тропа́рь святы́я два́жды. Сла́ва, преподо́бнаго. И ны́нѣ, богоро́диченъ или́ крестобогоро́диченъ.

По 1-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.

Святы́хъ па́мятію совокупля́ющеся вѣ́рно, страстоно́сицы па́мять торжеству́емъ, я́ко умертви́ моли́твою началозло́бнаго врага́, дре́вле ле́стію Еву въ нетлѣ́ніи прельсти́вшаго, и Го́сподеви мо́лится, поми́ловати ду́ши на́ша.

Сла́ва, преподо́бнаго, гла́съ и подо́бенъ то́йже:

Житія́ нече́стіе отве́ргъ, Кре́стъ Госпо́день воспріе́мь, по́стнически лука́ваго попра́лъ еси́, пусты́нный граждани́нъ, свѣти́льникъ мíра мы́сленный, показа́лся еси́ богоно́сне Іоа́нне, тѣ́мъ моли́ся Спа́су, поми́ловати ду́ши на́ша.

И ны́нѣ, богоро́диченъ:

Ра́дуйся, свята́я горо́ и богопрохо́дная; ра́дуйся одушевле́нная купино́ и неопали́мая; ра́дуйся еди́на къ Бо́гу мíрови мо́сте, преводя́й ме́ртвыя къ вѣ́чному животу́; ра́дуйся нетлѣ́нная Отрокови́це, неискусому́жно ро́ждшая Спасе́ніе ду́шъ на́шихъ.

По 2-мъ стихосло́віи сѣда́ленъ святы́я, гла́съ 4. Подо́бенъ: Вознесы́йся.

Жениха́ твоего́ Христа́ возлюби́вши, свѣщу́ твою́ свѣ́тло угото́вавши, добродѣ́тельми просія́ла еси́, всехва́льная, тѣ́мъ возшла́ еси́ съ Ни́мъ на бра́ки, вѣне́цъ страда́нія отъ Него́ пріи́мши. Отъ бѣ́дъ исхити́ на́съ, соверша́ющихъ, Варва́ро, па́мять твою́.

Сла́ва, преподо́бнаго, гла́съ 1. Подо́бенъ: Гро́бъ Тво́й, Спа́се.

Сладкогла́сная пища́ль, велегла́сная труда́, цѣвни́ца пѣ́сненная, свирѣ́ль Боже́ственная, гу́сли и сопѣ́ль всеподо́бна, мусикíйскій орга́нъ вдохнове́нный, Пара́клитова заря́, показа́лся еси́, о Іоа́нне, и утоля́еши на́ша помышле́нія.

И ны́нѣ, богоро́диченъ:

Ма́терь Тя́ Бо́жію свѣ́мы вси́, Дѣ́ву вои́стинну, и по рождествѣ́ я́вльшуюся, и́же любо́вію прибѣга́ющіи къ Твое́й бла́гости: Тебе́ бо и́мамы грѣ́шніи предста́тельство, Тебе́ стяжа́хомъ въ напа́стехъ спасе́ніе, еди́ну Всенепоро́чную.

По поліеле́и сѣда́ленъ, гла́съ 6. Подо́бенъ: Рукопи́саннаго о́браза.

Благода́ть чуде́съ получи́вши, подае́ши исцѣле́нія въ ну́ждахъ, и избавля́еши вся́ человѣ́ки па́губныхъ неду́говъ вся́ческихъ, тѣ́мже къ твоему́ хра́му притека́юще, воспѣва́емъ твою́ па́мять, зову́ще: исхи́ти рабы́ твоя́, отъ па́губныхъ неможе́ній, дѣ́во му́ченице Варва́ро, къ Бо́гу моли́твами твои́ми.

Сла́ва, гла́съ 1:

Пое́мъ честны́я и святы́я по́двиги, я́же подъя́лъ еси́ вои́стинну по Це́ркви, почита́юще въ пѣ́снехъ, честна́я сладкогла́сія, я́же расположи́лъ еси́ на пѣ́ніе Го́сподеви, досточу́дне, и вѣ́рныхъ въ весе́ліе, Іоа́нне всеблаже́нне.

И ны́нѣ, богоро́диченъ:

Марíе, честно́е Влады́ки прія́телище, воскреси́ ны па́дшія въ про́пасть лю́таго отча́янія, и прегрѣше́ній и скорбе́й, Ты́ бо еси́ грѣ́шнымъ спасе́ніе и по́мощь, и крѣ́пкое предста́тельство, и спаса́еши рабы́ Твоя́.

Степе́нна, 1-й антифо́нъ 4-го гла́са. Проки́менъ, [гла́съ 4]: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Вся́кое дыха́ніе... Ева́нгеліе Матѳе́я, зача́ло 104.

По 50-мъ псалмѣ́, стихи́ра, гла́съ 6:
Оте́чество, ро́дъ, имѣ́ніе [оста́вивши, Варва́ро, и нечести́ваго отца́ возненави́дѣвши, Бо́га возлюби́ла еси́, и Тому́ уневѣ́стилася еси́ и была́ еси́ великоку́пница наречена́, Того́ моли́ спасти́ся душа́мъ на́шимъ].

Кано́нъ окто́иха еди́нъ [аще же поеши поліелей: канонъ Богородицы со ирмосомъ] на 6, и святы́хъ два́ кано́на на 8.

Кано́нъ святы́я на 4, гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

О, Тро́ице Пребоже́ственная Честна́я! Яже па́че ума́ дарова́ніе Твои́мъ рабо́мъ подаю́щи, свѣтоно́сную вдохни́ мра́чному моему́ уму́ лучу́, Твою́ похвали́ти му́ченицу Варва́ру приснопа́мятную. [Два́жды.]

Похвале́ній вся́къ предѣ́лъ вои́стинну превзы́де Твои́хъ му́ченикъ сла́ва, Человѣколю́бче; но́, е́же отъ вѣ́ры по си́лѣ пріе́мъ хвале́ніе, возниспосли́, Влады́ко, бога́тно воздая́ніе.

Отъ терно́внаго ко́рене израсте́ шипо́къ краснѣ́йшій, Це́рковь Христо́ву облагово́нстви, и червле́ніемъ страда́нія обагри́вшися кро́вію сла́вная Варва́ра, ю́же досто́йно воспое́мъ.

Инъ кано́нъ преподо́бнаго на 4, гла́съ и ирмо́съ то́йже.

Твоя́ похвалы́ нача́ти хотя́щу ми́, пода́ждь тво́й ны́нѣ гла́съ медото́чный, преподо́бне, и́мже правосла́вную уясни́лъ еси́ Це́рковь пѣ́сньми, о́тче Іоа́нне, я́же твою́ почита́етъ па́мять. [Два́жды.]

Яко му́дръ и остроу́менъ судія́, изря́днѣйше су́щихъ естество́ смотря́я, нестоя́щихъ предразсуди́лъ еси́ вѣ́чнующая: привре́менными бо измѣни́лъ еси́ пребыва́ющая, о́тче Іоа́нне, идѣ́же тя́ и ны́нѣ Христо́съ просла́ви.

Богоро́диченъ: Превы́шши яви́лася еси́, Чи́стая, вся́кія тва́ри, ви́димыя же и неви́димыя, Приснодѣ́во: Зижди́теля бо родила́ еси́, я́коже благоволи́ воплоти́тися во утро́бѣ Твое́й, Его́же со дерзнове́ніемъ моли́ спасти́ пою́щія Тя́.

Катава́сія: Христо́съ ражда́ется...

Пѣ́снь 3.

Ирмо́съ: Процвѣла́ е́сть пусты́ня я́ко кри́нъ Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Уязвля́ема любо́вію Твое́ю, я́ко женихо́вою, Влады́ко, неоде́ржнымъ стремле́ніемъ страстоте́рпица Варва́ра все́ оте́ческое безбо́жіе возненави́дѣ. [Два́жды.]

Ни сла́дости красота́, ни цвѣ́тъ добро́ты, ни бога́тство же, ни сла́дости ю́ностныя услади́ша тя́, Варва́ро сла́вная, Христу́ уневѣ́стившуюся, до́брая дѣ́во.

Къ соверше́ннымъ подвиго́мъ ничто́же яви́ся возбране́ніе не́мощи же́нстѣй, ни ю́ность во́зраста, Христе́: неви́димою бо Твое́ю си́лою укрѣпля́ема.

Преподо́бнаго:

Расточи́лъ еси́ бога́тство, Бо́гу взаи́мъ дая́, тѣ́мже тебѣ́ на небесѣ́хъ угото́вася Ца́рство; но и ны́нѣ воздая́ніе, Іоа́нне, прія́лъ еси́ многокра́тное. [Два́жды.]

Прему́дрости тала́нтъ пріе́мъ, дѣя́ньми украша́я, уясни́лъ еси́, Іоа́нне, Це́рковь Христо́ву, его́же многоусугубля́еши, и житіе́ оста́вивъ.

Богоро́диченъ: Чи́ни удиви́шася а́нгельстіи, Пречи́стая, и человѣ́ческая устраши́шася сердца́ о Рождествѣ́ Твое́мъ. Тѣ́мже Тя́, Богоро́дицу, вѣ́рою чти́мъ.

Конда́къ преподо́бнаго, гла́съ 4. Подо́бенъ: Вознесы́йся на Кре́стъ.

Пѣснопи́сца и честна́го богоглаго́льника, Це́ркве наказа́теля и учи́теля, и враго́въ сопротивоборца́ Іоа́нна воспои́мъ: ору́жіе бо взе́мь — Кре́стъ Госпо́день, всю́ отрази́ ересе́й пре́лесть и я́ко те́плый предста́тель къ Бо́гу, всѣ́мъ подае́тъ прегрѣше́ній проще́ніе.

Икосъ:

Церко́вному наста́внику и учи́телю, и жерцу́, я́ко таи́ннику неизглаго́ланныхъ, возопіе́мъ согла́сно: я́же къ Бо́гу твои́ми моли́твами отве́рзи уста́ на́ша и сподо́би глаго́лати словеса́ уче́ній твои́хъ, ты́ бо Тро́ицѣ яви́лся еси́ соприча́стникъ, я́ко друго́е со́лнце облиста́я въ мíрѣ, чудесы́ и уче́ніи просія́въ, я́ко Моисе́й, въ зако́нѣ Госпо́дни поуча́яся всегда́, сло́вомъ и дѣ́ломъ бы́лъ еси́ свѣти́льникъ, моля́ непреста́нно всѣ́мъ пода́ти прегрѣше́ній проще́ніе.

Сѣда́ленъ святы́я, гла́съ 3. Подо́бенъ: Красотѣ́ дѣ́вства.

Въ страда́ніи твое́мъ вся́ удиви́ла еси́, я́ко претерпѣ́вши мучи́телей ра́ны, вяза́нія, му́ки и темни́цы, Варва́ро прехва́льная. Тѣ́мже и вѣне́цъ съ небесе́ тебѣ́ даде́ Христо́съ, къ Нему́же, возжелѣ́вши усе́рдно, притекла́ еси́; То́й благода́ть подаде́ тебѣ́, му́ченице, врачева́нія источа́ти человѣ́комъ.

Сла́ва, преподо́бнаго, гла́съ то́йже:

Труба́ благогла́сна освяще́на, свяще́ннѣйше, на́мъ яви́лся еси́, пѣснопою́щи обра́зно уче́нія Го́спода и Спа́са конце́мъ, и твои́ми словесы́ мíръ просвѣти́лъ еси́, Іоа́нне преподо́бне, Христа́ Бо́га моли́ дарова́ти на́мъ ве́лію ми́лость.

И ны́нѣ, богоро́диченъ:

Боже́ственная ски́нія была́ еси́, Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая; па́че всѣ́хъ мене́, пе́рсть бы́вша, оскверне́на плотьски́ми прегрѣше́ньми, очи́сти моли́твъ Твои́хъ Боже́ственными вода́ми, подаю́щи, Чи́стая, ве́лію ми́лость.

Или́ крестобогоро́диченъ:

Нескве́рная Агница Сло́ва, нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею? Хотя́ изба́вити отъ страсте́й безче́стія человѣ́ка.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Изъ Дѣ́вы ро́ждься, дарова́лъ еси́ отрокови́цамъ дѣ́вамъ киче́ніе низложи́ти льсти́ваго: тѣ́мже добропобѣ́дная Варва́ра сего́ горды́ни поруга́ся. [Два́жды.]

Прама́ти, хитростьми́ льсти́ваго прельсти́вшися пе́рвѣе, пи́щи изгна́на бы́сть ра́йскія: Варва́ра же, сему́ поруга́вшися, въ небе́снѣмъ черто́зѣ ны́нѣ водворя́ется.

Кресто́мъ Твои́мъ сме́рти си́лу разори́лъ еси́, тѣ́мже, тѣлесе́ отрокови́ца, Христе́, не пощадѣ́вши, терпи́тъ до́блественнѣйше ра́ны, Варва́ра, тве́рдымъ умо́мъ.

Преподо́бнаго:

Повелѣ́нію Христо́ву повину́вся, оста́вилъ еси́ мірску́ю красоту́, бога́тство, сла́дость, свѣ́тлость, Его́же ра́ди, взе́мъ тво́й кре́стъ, послѣ́довалъ еси́, Іоа́нне му́дре. [Два́жды.]

Сообнища́въ обнища́вшему Христу́, человѣ́ческаго ра́ди спасе́нія, спросла́вился еси́, я́коже То́й обѣща́ся, и сца́рствуеши же присноца́рствующему, Іоа́нне.

Богоро́диченъ: Тя́, приста́нище спасе́нія и стѣ́ну необори́му, Богоро́дице Влады́чице, вси́ вѣ́рніи вѣ́мы: Ты́ бо моли́твами Твои́ми отъ бѣ́дъ избавля́еши ду́ши на́ша.

Пѣ́снь 5.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.

Око́нцы треми́ ба́ни просвѣща́тися повелѣ́вши, та́инственно написа́ла еси́ креще́ніе, Варва́ро, Тро́ичнымъ свѣ́томъ души́ свѣтоно́сное су́щее очище́ніе. [Два́жды.]

Су́щаго Бо́га разже́гшися ре́вностію, лжеиме́нныхъ бого́въ скверна́вая оплева́ ли́ца, Варва́ра всехва́льная, руга́ющися отрокови́ца внѣ́шнему міроде́ржцу.

Неи́стовства лю́таго о́тча укло́ншуюся Варва́ру, разсту́пльшися, а́біе гора́ прія́тъ, я́коже дре́вле приснопа́мятную первому́ченицу Ѳе́клу, Христу́ чудодѣ́йствовавшу.

Преподо́бнаго:

Стра́хомъ Христо́вымъ, о́тче, утвержда́емь къ Боже́ственнѣй жи́зни, плотско́е мудрова́ніе все́ покори́лъ еси́ ду́ху, твоя́, Іоа́нне, чу́вства очища́я. [Два́жды.]

Очи́стивъ отъ вся́кія скве́рны тѣ́ло, и у́мъ, и ду́шу тщали́во, богому́дре, зарю́ прія́лъ еси́ трисо́лнечную, Іоа́нне, свѣ́тлыми тя́ богатя́щую дарова́ніи.

Богоро́диченъ: Моли́ Твоего́ Сы́на и Го́спода, Дѣ́во Чи́стая, плѣне́ннымъ избавле́ніе отъ проти́внаго обстоя́нія, на Тя́ надѣ́ющимся, ми́рное дарова́ти.

Пѣ́снь 6.

Ирмо́съ: Во глубинѣ́ грѣхо́внѣй содержи́мь е́смь, Спа́се, и въ пучи́нѣ жите́йстѣй обурева́емь, но, я́коже Іо́ну отъ звѣ́ря, и мене́ отъ страсте́й возведи́ и спаси́ мя.

Якоже обѣща́лся еси́ му́дрость дарова́ти, Спа́се, богонауче́ну, Тебе́ ра́ди стоя́щимъ предъ суди́щемъ мучи́телей, ея́же му́ченица Варва́ра испо́лнися. [Два́жды.]

Безбо́жныхъ ле́сть изобличи́ла еси́ сло́вомъ богому́дрымъ, Варва́ро сла́вная, терпѣ́ніемъ же дѣ́лъ мучи́телей мудрова́нія удиви́ла еси́.

Ра́намъ неща́дно строга́тися, ру́бы же власяны́ми тве́рдо востира́тися Христа́ ра́ди непоро́чная страстоте́рпица тѣ́ло предаде́.

Преподо́бнаго:

Просвѣти́вся Ду́ха благода́тію, Боже́ственныхъ и человѣ́ческихъ зна́ніемъ веще́й я́сно обогати́вся, тре́бующимъ, Іоа́нне, незави́стно препо́далъ еси́. [Два́жды.]

Подо́бнѣ лико́мъ небе́снымъ, му́дре, Це́рковь правосла́вно украси́лъ еси́, ликостоя́нныя пѣ́сни приглаша́я Тро́ицѣ Боговѣща́нныя.

Богоро́диченъ: Неискусому́жно, Дѣ́во, родила́ еси́ и вѣ́чнуеши Дѣ́ва, явля́ющи и́стиннаго Божества́, Сы́на и Бо́га Твоего́, о́бразы.

Конда́къ, гла́съ 4. Подо́бенъ: Вознесы́йся на Кре́стъ.

Въ Тро́ицѣ благоче́стно пѣва́емому, послѣ́довавши Бо́гу, страстоте́рпице, и́дольская притупи́ла еси́ чти́лища; посредѣ́ же по́двига страда́льчествующи, Варва́ро, мучи́телей преще́нія не устраши́лася еси́, мужему́дренная, велегла́сно пою́щи при́сно: Тро́ицу чту́, еди́но Божество́.

Икосъ:

Уневѣ́стившуюся Христу́ муче́ніемъ Варва́ру, соше́дшеся, почти́мъ досто́йно: я́ко да, тоя́ моли́твами па́губы душетлѣ́нныя изба́вльшеся и губи́тельства, тру́са и паде́жа, житіе́ въ ми́рѣ препрово́димъ, сподо́бившеся со всѣ́ми святы́ми, отъ вѣ́ка Бо́гу благоугоди́вшими, ходи́ти во свѣ́тѣ и пѣ́ти съ ни́ми: удиви́лъ еси́, Спа́се, твоя́ ми́лости всѣ́мъ человѣ́комъ, вѣ́рою исповѣ́дающимъ: Тро́ицу чти́мъ, еди́но Божество́.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Иже зе́млю погуби́ти и потреби́ти мо́ре мучи́тель, су́етно свирѣ́пствуя, я́ко игра́лище, лежи́тъ Варва́ры отрокови́цы подъ нога́ми: сего́ бо попра́въ, Христо́съ, я́коже пти́цу ху́ду, связа́. [Два́жды.]

Ра́нами нестерпи́мыми твоему́ стру́жему тѣ́лу всему́, обагре́ну же крове́й ка́плями, свѣща́ми, претерпѣ́ла еси́, пали́ма по ре́бромъ, му́ченице всехва́льная, Христа́ благодаря́щи, Варва́ро сла́вная.

О, безчеловѣ́чнаго и немилосе́рдаго мучи́телей суровства́ и мно́жайшаго безбо́жества! Сосцы́ бо му́ченицы, я́коже въ мясосѣ́чницѣ, лю́тѣ мечи́ отсѣца́ху, у́мъ утвержда́ющія Подвигополо́жнику Христу́.

Преподо́бнаго:

Ре́вностію разжига́емь, богобо́рныхъ ересе́й вся́кое злоу́міе возрази́лъ еси́ свѣ́тлыми писа́ніи, убѣли́въ всѣ́мъ я́сно дре́вле сѣ́янная, му́дрыми, о Іоа́нне, напи́санныя то́нко. [Два́жды.]

Те́плѣ обличи́лъ еси́ злоиме́нныхъ ученико́въ Ма́нента ху́льное нече́стіе, разврати́ти покуси́вшееся Це́рковь Христо́ву, словесы́ и догма́ты твои́ми, о Іоа́нне, я́же счини́лъ еси́.

Богоро́диченъ: Святы́хъ святѣ́йшую поразумѣва́емъ Тя́, я́ко еди́ну ро́ждшую Бо́га непремѣ́ннаго, Дѣ́во нескве́рная, Ма́ти безневѣ́стная: всѣ́мъ бо источи́ла еси́ вѣ́рнымъ нетлѣ́ніе, Боже́ственнымъ Рождество́мъ Твои́мъ.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Яви́ся тебѣ́ Христо́съ во Свѣ́тѣ непристу́пнѣмъ, заключе́ннѣй, о Варва́ро, въ темни́цѣ, дерза́ти повелѣва́я, и ра́ны врачу́я, и ра́дость да́руя: тѣ́мже впери́лася еси́ твоего́ Жениха́ раче́ніемъ. [Два́жды.]

Яви́ся, Христе́, явле́нно прорече́ніе Твое́ испо́лнено: оте́цъ бо ча́до на сме́рть предае́тъ, самодѣ́латель же закла́нія бы́въ окая́нный роди́тель Твоея́ му́ченицы. Тѣ́мже съ небесе́ огне́мъ истреби́ся.

Ангелъ свѣ́телъ оде́ждею свѣтови́дною тя́, Христа́ ра́ди обнаже́нную, честна́я Варва́ро, одѣ́яше, я́коже невѣ́сту, обходя́щу стра́сти: оде́жди бо, му́ченице, совлекла́ся еси́, боже́ственное пріе́мши измѣне́ніе.

Преподо́бнаго:

Обличи́лъ еси́ я́вѣ, треблаже́нне Іоа́нне, Несто́ріево раздѣле́ніе, Севи́рово слія́ніе, единово́льное пребезу́міе; вѣ́ру же единодѣ́йственну, сія́ніе Правосла́вія всѣ́мъ облиста́въ конце́мъ. [Два́жды.]

Всѣ́я вра́гъ пле́велы обы́чно ерети́ческія въ Це́ркви Христо́вѣ, сего́ поклоне́нія отмета́тися во ико́нахъ честны́хъ, но обрѣ́те недре́млюща тя́, всеблаже́нне Іоа́нне, вся́кое сѣ́мя зло́е искореня́юща.

Богоро́диченъ: Ты́ отъ Отца́ неразлу́чнаго, во чре́вѣ, богому́жно пожи́вшаго, безсѣ́менно зачала́ еси́ и несказа́нно родила́ еси́, Богороди́тельнице Пречи́стая: тѣ́мже Тя́, спасе́ніе всѣ́хъ на́съ, исповѣ́даемъ.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Сла́вную иму́щи прія́ти кончи́ну мече́мъ, Варва́ро, муче́нія твоего́, со Іуліанíею вѣнце́въ му́ченическихъ сподо́бльшися, гла́съ Боже́ственный услы́шала еси́, исполня́ющій моле́нія твоя́. [Два́жды.]

Твоему́ сочета́вшися ны́нѣ Всецарю́, Жениху́ Христу́, облиста́ющися сла́вою, Варва́ро, Боже́ственнаго свѣ́та въ небе́сныхъ черто́зѣхъ, пѣвцы́ твоя́ назира́й, страсте́й измѣня́ющи и приводя́щи живу́щему Бо́гу.

Исполня́я твое́ проше́ніе, Варва́ро страстоте́рпице, Христо́съ врачева́нія подае́тъ соверша́ющимъ твою́ вѣ́рою лѣ́тнюю па́мять, я́ко и́стинно морскíй песо́къ, твоя́ превзыдо́ша благосла́вная чудодѣ́йства.

Преподо́бнаго:

Научи́лъ еси́ вся́ церко́вныя пѣ́ти сы́ны правосла́вно еди́ницу въ Тро́ицѣ честну́ю, воплоще́ніе же Сло́ва Боже́ственное богосло́вити я́вѣ, Іоа́нне, уясня́я неудобопости́жная мно́гимъ во Свяще́нныхъ Писа́ніихъ. [Два́жды.]

Святы́хъ чи́ны пѣсносло́вивъ, преподо́бне, чи́стую Богоро́дицу, Христо́ва Предте́чу, та́же апо́столы, проро́ки съ по́стники и му́дрыя учи́тели, пра́ведники и му́ченики, въ тѣ́хъ ны́нѣ водворя́ешися ски́ніихъ.

Богоро́диченъ: Черто́гъ была́ еси́ и́же па́че ума́ воплоще́нія Сло́ва, Дѣ́во Богороди́тельнице, одѣ́яна сла́вою добродѣ́телей и испещре́на. Тѣ́мъ Тя́, Всенепоро́чная, Богоро́дицу возвѣща́емъ.

Свѣти́ленъ окто́иха.
Аще же поліеле́й, святы́я. Подо́бенъ: Ду́хомъ въ це́ркви.

Благода́ть исцѣле́ній отъ Бо́га пріе́мши, Варва́ро прехва́льная, исцѣля́еши неду́ги, вѣ́рою приходя́щихъ къ тебѣ́ и Бо́га сла́вящихъ, вся́ческихъ Влады́ку, и избавля́еши отъ вся́кихъ бѣ́дъ, па́губныхъ неможе́ній, и душе́вныхъ неду́гъ.

Другíй свѣти́ленъ святы́я. Подо́бенъ: Жены́, услы́шите.

Яко шипо́къ краснѣ́йшій, изъ терно́внаго израсла́ еси́ ко́рене, дѣ́во Варва́ро, же́ртвою, му́ченице, свяще́ннаго страда́нія обагри́вшися кро́вію. И ны́нѣ боже́ственную твою́ па́мять соверша́ющія любо́вію, спаса́й отъ бѣ́дъ.

Сла́ва, преподо́бнаго:

Яко Боже́ственъ свѣ́тъ, о́тче на́шъ, Це́ркви возсія́лъ еси́, пѣ́ній твои́хъ сію́ свѣ́тлостію облиста́въ и свѣ́томъ нра́ва твоего́, и́мже Христо́вы догма́ты явля́еши украше́ны, къ Нему́же не преста́й о на́съ моля́ся, Іоа́нне.

И ны́нѣ, богоро́диченъ:

Вои́стинну Тя́ Богоро́дицу исповѣ́дуемъ, Влады́чице, Тобо́ю спаса́еміи: и́бо Бо́га неизрече́нно родила́ еси́, разори́вшаго Кресто́мъ сме́рть и къ Себѣ́ привле́кшаго преподо́бныхъ собо́ры, съ ни́ми же восхваля́емъ Тя́, Дѣ́во.

На хвали́техъ стихи́ры святы́я, на 4, гла́съ 1. Самогла́сны. Анато́ліево:

Земны́я пи́щи наслажде́ніе презрѣ́вши* и о́тчее бога́тство,* ку́пно же и сла́ву возненави́дѣвши,* Небе́снаго Жениха́ возлюби́ла еси́,* Варва́ро всесла́вная;* мече́мъ бо во главу́ отсѣ́кшися,* съ му́дрыми вошла́ еси́ дѣ́вами* къ Жениху́ Христу́.* Тѣ́мже и губи́тельный неду́гъ отгоня́ющи,* вѣ́рныя врачу́еши* дѣ́йствомъ Свята́го Ду́ха,* и мо́лишися непреста́нно* о душа́хъ на́шихъ.

Гла́съ 2. Византíево:

Посрами́ся лука́вый вра́гъ,* отъ жены́ побѣжде́нъ,* я́ко прама́терь имя́ше дѣ́йство ко грѣху́:* отъ Дѣ́вы бо вопло́щшееся* Сло́во Отчее непрело́жно и несмѣ́сно,* я́ко вѣ́сть еди́нъ Са́мъ,* кля́тву разруши́ Евину и Ада́мову Христо́съ,* вѣнча́вый досто́йно Варва́ру му́ченицу,* и тоя́ ра́ди да́руя мíру очище́ніе* и ве́лію ми́лость.

Богозва́нная му́ченица Варва́ра,* на суди́щи стра́ждущи, глаго́лаше:* лю́ты у́бо ны́нѣшнія му́ки, о мучи́теліе,* но ра́достно вѣ́чныя жи́зни воспрія́тіе;* не предпочту́ же отню́дъ земны́хъ па́че небе́сныхъ.* Сего́ ра́ди сѣцы́те, стружи́те пло́ти* и огню́ преда́йте мя́,* ра́дующися, отъиду́ къ Жениху́ моему́ Христу́.* Ея́же моли́твами, Христе́ Бо́же,* ми́лости Твоя́ низпосли́* и спаси́ ны,* тоя́ страда́нія соверша́ющія вѣ́рно.

Торжество́ дне́сь страстоте́рпицы Варва́ры,* пріиди́те, лю́діе, воспои́мъ:* тоя́ бо ниже́ ме́чь, ниже́ о́гнь,* ниже́ ина́я му́ка,* ниже́ многоплете́нная веліа́ра ловле́нія побѣди́ша.* И къ не́й вѣ́рою возопіе́мъ:* Христа́ моли́, доброму́ченице всесла́вная,* дарова́ти на́мъ ве́лію ми́лость.

Сла́ва, гла́съ 6: Іоа́нна мона́ха.

Страда́льческимъ ше́ствовавши путе́мъ, прароди́тельнаго избѣжа́ла еси́ совѣ́та, Варва́ро всечестна́я, и, я́ко у́бо дѣ́ва мудра́, свѣщу́ нося́щи, вошла́ еси́ во дворы́ Го́спода твоего́, и, я́ко му́ченица му́жественна, благода́ть прія́ла еси́ цѣли́ти плотскíя стра́сти. Но и на́съ, воспѣва́ющихъ тя́, душе́вныхъ болѣ́зней изба́ви, къ Бо́гу моли́твами твои́ми.

И ны́нѣ, богоро́диченъ: [Богоро́дице, Ты́ еси́ лоза́ и́стинная...]
Славосло́віе вели́кое [ектеніи́ и отпу́стъ].

Аще же славосло́вію не бы́ти, крестобогоро́диченъ. Подо́бенъ: Тридне́венъ.

Всечи́стая, я́ко ви́дѣ Тебе́, на Крестѣ́ повѣ́шена, пла́чущи, вопія́ше ма́терски: Сы́не Мо́й и Бо́же Мо́й, сладча́йшее Мое́ Ча́до, ка́ко терпи́ши стра́сть поно́сную?

На стихо́внѣ окто́иха. Сла́ва, преподо́бнаго, гла́съ 8:

Мона́ховъ мно́жества наста́вника тя́ почита́емъ, о́тче на́шъ Іоа́нне. Твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ; съ ни́миже моли́ся Го́сподеви, поми́ловатися душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Не терплю́, Ча́до, ви́дящи Тя́,* на дре́вѣ усну́вша,* бо́дрость всѣ́мъ подаю́щаго,* я́ко да и́же дре́вле преступле́нія плодо́мъ,* сно́мъ поги́бельнымъ усну́вшимъ,* Боже́ственную и спаси́тельную* бо́дрость пода́си,* Дѣ́ва глаго́лаше, пла́чущи,* Юже велича́емъ.


НА ЛИТУРГІИ,

Блаже́нна отъ кано́на му́ченицы, пѣ́снь 3-я, и преподо́бнаго пѣ́снь 6-я. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Гала́томъ, зача́ло 208. Аллилу́ія, гла́съ 1: Терпя́ потерпѣ́хъ Го́спода, и вня́тъ ми́ [и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́]. Ева́нгеліе Ма́рка, зача́ло 21.

Преподо́бнаго же проки́менъ, Апо́столъ и Ева́нгеліе о́бще. [Проки́менъ, гла́съ 7: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Луки́, зача́ло 24.]

Прича́стенъ: Ра́дуйтеся пра́ведніи [о Го́сподѣ, пра́вымъ подоба́етъ похвала́.]

Источникъ: Анѳоло́гіонъ, сíесть Цвѣтосло́віе, или́ Трефоло́гіонъ, сíесть Словопита́ніе. — Кíевъ: Въ Тѵпогра́фіи Кіевопече́рской Ла́ѵры, 1745. — Л. 202 об. – 207 об.

/ Къ оглавленію раздѣла /


Наверхъ / Къ титульной страницѣ

0