Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 19 ноября 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Печатается по матеріаламъ архива Свято-Троицкаго монастыря (Джорданвилль, США).

Мѣ́сяца Деке́мврія въ 4-й де́нь.
Иже во святы́хъ отца́ на́шего Генна́дія, архіепи́скопа Вели́каго Новáграда, во Святѣ́й Руси́ жидо́вскую пре́лесть попали́вшаго.

Зри́: Пое́мъ ку́пно съ великому́ченицею Варва́рою.

НА ВЕЧЕРНИ,
Блаже́нъ му́жъ, [1-й антифо́нъ]. На Го́споди, воззва́хъ: стихи́ры му́ченицы на 4 и святи́телю на 4, гла́съ 8.

Истиннымъ избра́ніемъ Бо́жіимъ* же́злъ свята́го служе́нія воспріи́мъ* до́брѣ лю́ди твоя́ упра́вилъ еси́,* и́хже свѣ́томъ Свяще́нныхъ Писа́ній просвѣти́въ,* благоче́стія ревни́тель яви́лся еси́,* тѣ́мже и вопіе́мъ ти́ похва́льная:* святи́телю Христо́въ блаже́нне Генна́діе,* моли́ Христа́ Бо́га о спасе́ніи ду́шъ на́шихъ.

Истиннымъ уче́ніемъ Христо́вымъ* ду́ши гла́дныя напита́лъ еси́* и во тму́ и сѣ́нь сме́ртную е́реси впа́дшія* къ свѣ́ту за́повѣдей Бо́жіихъ возврати́лъ еси́,* Це́ркви Ру́сскія кра́сная похвало́* и земли́ Новгоро́дскія сла́вное удобре́ніе,* Генна́діе, святи́телю блаже́нне,* моли́твенниче о душа́хъ на́шихъ.

Истинною любо́вію испо́лненъ,* святи́телю Бо́жій Генна́діе,* посредѣ́ лжебра́тій и отсту́пниковъ та́йныхъ,* я́ко ши́покъ благоуха́ненъ, въ те́рніи процвѣ́лъ еси́* и руга́телей нечести́выхъ посрами́лъ еси́,* пребы́лъ еси́ вѣ́ренъ да́же до сме́рти,* сего́ ра́ди пріе́млеши вѣне́цъ жи́зни* и мо́лишися о душа́хъ на́шихъ.

Сла́ва, гла́съ 6:

Вѣ́ру пра́вую во оболга́ніи зря́ще и святы́ню Госпо́дню въ поруга́ніи, ре́вностію Боже́ственною препоя́санъ, ста́лъ еси́ предъ нечести́выми въ дерзнове́ніи мно́зѣ, я́коже Илія́ на Карми́лъ и я́ко Влады́ка тво́й на Голго́ѳу, ты́ на го́рнее сѣда́лище возше́лъ еси́ и врага́ неви́димаго порази́лъ еси́, а́ще и торжества́ и́стины на земли́ не узрѣ́лъ еси́, но труды́ и страда́ніи твои́ми Це́рковь украси́ся, и не́й же и на́мъ пода́ждь неотпа́дно пребы́ти и съ тобо́ю просла́вити въ вы́шнихъ Го́спода.

На стихо́внѣ стихи́ры [или́ на литíи], гла́съ 3.

Па́ки сбира́ется нечести́вое собо́рище* на Го́спода, и на Христа́ Его́, и на Це́рковь Его́,* дре́внимъ богоотсту́пникомъ подража́юще,* сме́рти Безгрѣ́шнаго па́ки руга́ющеся,* но́, я́ко же та́етъ во́скъ отъ лица́ огня́,* та́ко исчеза́етъ отъ слы́шанія слове́съ твои́хъ,* богому́дре святи́телю Генна́діе,* воево́до Госпо́день изря́дный.

Па́ки со́нмище богопроти́вное,* храня́щее су́етная и ло́жная* совѣща́етъ зла́я на Невѣ́сту Госпо́дню* и прельща́етъ маловѣ́рныя воскресе́нію не вѣ́ровати,* и Святы́мъ Та́йнамъ руга́тися,* и уче́ніе Христо́во хули́ти,* но на ка́мени исповѣ́данія твоего́,* я́ко волна́ свирѣпѣ́ющая, разбива́ется,* пѣ́нящися всѣ́ми срамота́ми свои́ми,* и вели́чіе ду́ха твоего́ нево́лею показу́юще,* богому́дре святи́телю Генна́діе,* воево́до Госпо́день непобѣди́мый.

Па́ки учени́къ невѣ́рный* іуде́ямъ Христа́ предае́тъ* и мно́гое мно́жество та́йныхъ отсту́пникъ приво́дитъ.* Оле рыда́нія, о́ле посрамле́нія!* Оле безу́мія нечести́выхъ,* вѣ́дущихъ Христа́ и къ жидо́вству приложи́вшихся!* Но́ на стра́жѣ поста́вленъ Боже́ственнѣй* о ста́дѣ Госпо́днемъ слове́снѣмъ,* отъ ю́га прише́дшаго Бо́га* и спасе́ніе на́ше устро́ившаго проповѣ́далъ еси́,* богому́дре святи́телю Генна́діе* воево́до Госпо́день пресла́вный.

Сла́ва, гла́съ 4.

Посрамля́ется дне́сь со́нмище лука́внующихъ въ па́мяти твое́й досточу́дне, вѣ́рніи же лику́ютъ въ весе́ліи и игра́юще сла́вятъ Го́спода, такова́го предста́теля на́мъ дарова́вшаго, и учи́теля, и па́стыря и исповѣ́дника неколеби́маго, ду́хомъ вѣ́ка сего́ не прельще́ннаго, но за и́стину до́бльствовавшаго во́лею и вѣнце́мъ небе́снымъ отъ Влады́ки увязе́ннаго.

Тропа́рь, гла́съ 5:

Уподо́бился еси́ дре́внимъ отце́мъ, святи́телю о́тче Генна́діе, Свяще́нныя Кни́ги собра́въ и еретики́ посрами́въ, ре́вность по Бо́зѣ показу́я, па́ству огради́лъ еси́, моли́ и ны́нѣ Христа́ Бо́га ми́ръ Це́ркви дарова́ти и спасти́ся душа́мъ на́шимъ.


НА УТРЕНИ,
Сѣда́льны и поліеле́й му́ченицы.

Кано́нъ Богоро́дицы на 6, и му́ченицы на 4, и свято́му на 4, гла́съ 4.
Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Сло́во да́руй мнѣ́, Спа́се Всеси́льне, воспѣ́ти ди́внаго уго́дника Твоего́, до́брымъ по́двигомъ подвиза́вшагося и вѣнце́мъ побѣ́днымъ ны́нѣ свѣ́тло украше́ннаго.

Ополчи́шася вса́дники, и триста́ты, и все́ во́инство фарао́на мы́сленнаго на Невѣ́сту Христо́ву, гна́въ, пости́же и раздѣли́ достоя́ніе Госпо́дне, я́коже коры́сти, оба́че сло́вомъ твои́мъ, святи́телю Генна́діе, пучи́ною покры́лъ еси́ и́хъ, погрязо́ша во глубинѣ́, я́ко ка́мень.

Тобо́ю, святи́телю, я́ко десни́цею Свое́ю, сте́рлъ еси́ Госпо́дь сопроти́вныхъ, ты́ же ны́нѣ просла́вленъ еси́ въ крѣ́пости, и въ сла́вѣ небе́сной лику́еши, и су́щихъ во обстоя́ніихъ на земли́ призира́еши.

Богоро́диченъ: Иму́щи Тя́, Дѣ́во, ско́рую Засту́пницу и прибѣ́жище немощны́хъ, лука́ваго не устраши́мся, злочести́выхъ шата́нія да избѣ́гнемъ, и небе́сныхъ сокро́вищъ прія́ти вседу́шно упова́емъ.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Укрѣпи́шася отме́тницы нечести́віи зѣло́ у престо́ловъ церко́вныхъ и въ черто́зѣхъ ца́рскихъ, и въ горды́ни свое́й высо́кая и ху́льная глаго́лаша, ты́ же, святи́телю, сло́вомъ твои́мъ утвержде́ніе во Го́сподѣ вѣ́рнымъ подае́ши.

Изнемо́же лу́къ злонача́льнаго, и ту́лъ льсти́ваго истощи́ся въ коне́цъ, тебе́ же си́лою Госпо́дь препоя́са на врази́ Своя́, даде́ тебѣ́ моля́щуся моли́тву, а́ки о́гнь сопроти́вныя опаля́ющь, и благослови́ лѣ́та пра́веднаго уго́дника Своего́.

Снизше́дшаго съ небесе́ и возше́дшаго воспроповѣ́далъ еси́, о́тче Генна́діе, Иже и́мать суди́ти конце́мъ земны́мъ въ пра́вдѣ, а́ще и невѣ́домъ ча́съ прише́ствія Его́, тѣ́мже и лѣ́тъ на осьму́ю ты́сящу Пасха́лію исчисля́еши, святи́телю, я́ко да не преста́нетъ служе́ніе и́стины до прише́ствія Христо́ва.

Богоро́диченъ: Непло́дствіе духо́вное на́ше разрѣши́, Дѣ́во, и невѣ́дѣнія мра́къ отжени́ отъ серде́цъ страстьми́ обурева́емыхъ, я́ко да принесе́мъ благоче́стія пло́дъ неистлѣ́нный.

Инъ конда́къ, гла́съ 2:

Ве́лія исправле́нія о церко́внѣмъ благолѣ́піи явля́я, Правосла́вную вѣ́ру [утверди́лъ еси́, святи́телю о́тче Генна́діе, не преста́й моли́тися о на́съ, во Ца́рствіи небе́снѣмъ Безсме́ртныя трапе́зы наслажда́яся].

Сѣда́ленъ, гла́съ 4:

Въ не́мощи человѣ́честѣй держа́вствующему поползну́вшуся и ко́зньми льще́нія запя́тому, де́рзость вра́жію до́бльственнѣ отрази́лъ еси́ и царю́ наста́вникъ ко спасе́нію яви́лся еси́, Генна́діе му́дре, и та́ко спасе́ся Ру́сь Свята́я, ски́птромъ и жезло́мъ архіере́йскимъ укрѣпля́ема, тѣ́мже и ны́нѣ о на́съ моли́ся, святи́телю, оставле́ніе на́мъ грѣхо́въ дарова́ти, и мучи́тельства го́рькаго отъ беззако́нныхъ властехи́тителей находя́щаго лю́ди твоя́ ны́нѣ изба́вити.

Сла́ва, сѣда́ленъ му́ченицы. И ны́нѣ, богоро́диченъ его́.

Пѣ́снь 4.

Ирмо́съ: Любве́ ра́ди, Ще́дре, Твоего́ о́браза на Крестѣ́ Твое́мъ ста́лъ еси́, и раста́яшася язы́цы, Ты́ бо еси́, Человѣколю́бче, крѣ́пость моя́ и хвале́ніе.

Отъ ю́га прише́дшаго и отъ Святы́я Дѣ́вы вопло́щшагося Бо́га исповѣ́далъ еси́ предъ вѣ́рными и невѣ́рными, о́вѣхъ у́бо укрѣпля́юще, о́вѣхъ же мече́мъ сло́ва Бо́жія посѣка́юще я́ко къ сме́рти па́дшихъ и болѣ́знующихъ неисцѣ́льнѣ.

На Боже́ственнѣй стра́жи о ста́дѣ ове́цъ Христо́выхъ ста́лъ еси́, до́ндеже нечести́выхъ посрамле́ніе узрѣ́лъ еси́, святи́телю, па́ству твою́ призира́я, принося́ во бра́ни укрѣ́пльшему тя́ Бо́гу хвале́ніе.

Оле лука́вствія нечести́выхъ! Явѣ у́бо благоче́ствующе, та́йнѣ же жидо́вствующе, вся́ку святы́ню церко́вную руга́ніями укоря́юще, слуги́ сотво́ришася де́мономъ, но я́коже во́скъ отъ лица́ огня́, словесы́ твои́ми, о́тче, растаява́хуся.

Богоро́диченъ: Ускори́ на по́мощь лю́тѣ на́мъ и напа́стьми погружа́емымъ, Чи́стая Ма́ти Госпо́дня, нечести́выхъ шата́нія низложи́, пою́щія же Тя́ заступи́.

Пѣ́снь 5.

Ирмо́съ: Просвѣще́ніе Твое́, Го́споди, низпосли́ на́мъ и отъ мглы́ прегрѣше́ній разрѣши́ ны, Бла́же, Тво́й ми́ръ да́руяй.

Отъ но́щи у́тренева ду́хъ тво́й ко Го́споду о вѣ́рѣ поруга́емѣй богоху́льствомъ лю́тымъ, тѣ́мже и Писа́ній Боже́ственныхъ по́лный сво́дъ списа́лъ еси́, богому́дре, и́мже вся́ Ру́сь просвѣти́вшеся, благода́рственная тебѣ́ воспѣва́етъ.

Росо́ю слове́съ твои́хъ исцѣле́ніе неду́гующимъ е́ресію и у́мъ ижди́вшимъ подае́ши, святи́телю, земля́ же нечести́выхъ паде́ся, неисповѣ́дующихъ Трисія́тельнаго Богонача́льнаго Свѣ́та и отме́щущихся воплоще́нія Единоро́днаго.

Вои́стину, па́че ме́ртвыхъ воскресе́нія, ве́ліе и пресла́внѣйшее чу́до е́сть, е́же уме́ршему зловѣ́ріемъ ху́льнымъ, па́ки на благоче́стіе преити́ и къ благохвале́нію обрати́тися, о тебѣ́ же, о́тче, сотво́ршемъ пресла́вная возвесели́шася су́щіи на земли́.

Богоро́диченъ: Свѣ́та никто́же у́зритъ, отмета́яйся ико́ны Твоея́ поклоне́нія, че́сти же о́бразу не возда́вый, ка́ко отъ первообра́зныя свѣ́тлости осія́ніе прія́ти возмо́жетъ.

Пѣ́снь 6.

Ирмо́съ: Пріидо́хъ во глубины́ морскíя и потопи́ла мя́ е́сть бу́ря мно́гихъ грѣхо́въ: но́ я́ко Бо́гъ изъ глубины́ возведи́ живо́тъ мо́й, Многоми́лостиве.

Глубино́ю зло́бы и пучи́ною хуле́нія поглоще́ну зря́ще Це́рковь Ру́сскую, возопи́лъ еси́ всѣ́мъ се́рдцемъ твои́мъ ко Го́споду, и па́че наде́жды услы́шанъ бы́лъ еси́ о́тче, тѣ́мже и ны́нѣ прибѣга́емъ къ моли́твѣ твое́й.

Низше́лъ еси́ разумѣ́ніемъ твои́мъ до са́мыя бе́здны та́йныхъ начина́ній вра́жескихъ, да изъ истлѣ́нія возведе́ши ду́ши заблу́дшія. Оле неи́стовства богопроти́вныхъ!

Храня́щіи су́етная и ло́жная Ми́лостиваго и Пра́веднаго оста́виша Го́спода, и на чту́щія Того́ все́ю зло́бою язы́ка льсти́ваго вооружи́шася, ты́ же, святи́телю, во гла́сѣ хвале́нія и исповѣ́данія и́стинную же́ртву жря́ще, ко́зни тѣ́хъ до конца́ низложи́лъ еси́.

Богоро́диченъ: Не отврати́ лица́ Твоего́ отъ на́съ, Влады́чице, но при́зри ми́лостивно на согрѣ́шшія лю́ди Твоя́, а́ще бо и па́даемъ мно́жицею лю́тыми грѣхи́, но ми́лости Твоея́ при́сно взыску́емъ и Тебе́, я́ко Богоро́дицу и Засту́пницу те́плую сла́вимъ.

Конда́къ, гла́съ 4:

Яко незло́бивыхъ наста́вника кро́ткаго и лжи́выхъ обличи́теля дерзнове́ннаго Це́рковь почита́етъ тя́, святи́телю Генна́діе, тѣ́мже и вопіе́мъ къ тебѣ́ съ любо́вію: простоты́ на́мъ да́руй ду́хъ и умиле́нія и во исповѣ́даніи пра́вомъ соблюди́ неврежде́нны ду́ши на́ша.

Икосъ:

Пріиди́те пра́вды Бо́жія алка́теліе, и небе́сныхъ взыска́теліе, возвесели́мся въ па́мяти предста́теля на́шего крѣ́пкаго Генна́дія, и наказа́нію его́ вне́млемъ: я́ко львы́ рыка́ющи еретицы́, и́щущіе, кого́ поглоти́ти, пе́рвѣе къ неради́вымъ и лѣни́вымъ приража́ются и сокрове́нныя и сту́дныя дѣла́ нераска́янныхъ удо́бь отпуща́ютъ и разрѣша́ютъ, къ себѣ́ же самѣ́мъ тѣ́мъ привязу́юще у́зами грѣхо́вными, тѣ́мже и припаде́мъ къ па́стырю до́брому, я́ко да исхода́таитъ на́мъ отъ Го́спода се́рдце люботру́дное во взыска́ніе небе́сныхъ и во исповѣ́даніи пра́вомъ соблюда́етъ неврежде́нны ду́ши на́ша.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Христоубíйцъ прельще́ніе и неи́стовство во дни́ твоя́ пе́щи о́гненнѣй уподо́бися, ны́нѣ же седмери́цею на Це́рковь твою́ воспламени́ся, ускори́ на́мъ въ по́мощь, святи́телю, да взыва́емъ съ тобо́ю: оте́цъ на́шихъ Бо́же, благослове́нъ еси́.

Яко Даніи́лъ въ ро́вѣ льви́номъ посредѣ́ отсту́пникъ та́йныхъ ходя́ще, тѣ́хъ уста́ лука́выя загради́лъ еси́, о́тче Генна́діе, тѣ́мже ны́нѣ ко свѣ́ту изше́дъ невече́рнему воспѣва́еши: оте́цъ на́шихъ Бо́же, благослове́нъ еси́.

Пла́мень разже́нный безу́мія и буесло́вія человѣ́ча преложи́лъ еси́ на ро́су духо́вную Правосла́вія, и взыва́ти научи́лъ еси́: оте́цъ на́шихъ Бо́же, благослове́нъ еси́.

Богоро́диченъ: Тя́, Пречи́стую Влады́чицу, я́ко ча́яніе проро́къ дре́внихъ испо́лнившую, пѣ́сньми немо́лчными воспѣва́емъ: вои́стину Бо́га пло́тію одѣ́явшая и человѣ́комъ Того́ дарова́вшая, благослове́нна еси́.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Та́темъ и разбо́йникомъ приступи́вшимъ, на нетлѣ́нное бога́тство мы́сленное благоче́стія догма́товъ возбѣси́вшимся преще́ніемъ запрети́лъ еси́, святи́телю, вѣ́рныя же научи́лъ еси́ пѣ́ти: вся́ дѣла́ благослови́те, по́йте Го́спода.

Аще не у́ пріи́де Мессíя и́стинный, всу́е ожида́ете того, врази́ и престу́пницы, во грѣсѣ́хъ свои́хъ пребу́дете, до́ндеже прише́дъ во о́гнь ва́съ отсле́тъ несвѣти́мый, на́мъ же не возбрани́те взыва́ти при́сно: вся́ дѣла́ благослови́те, по́йте Го́спода.

Тро́иченъ: Трисія́етъ свѣ́тлость еди́на: Безнача́льный и Безвино́вный, со предвѣ́чно Рожде́ннымъ, и инообра́зно Исходя́щимъ и Животворя́щимъ вся́ческую тва́рь.

Богоро́диченъ: Принеси́ [моли́твы на́ша Бо́гу] [1], о Блага́я! смоле́бника пріими́ и уго́дника Твоего́ Генна́дія, и́же любо́вію Твое́ю подви́гся, науча́етъ и на́съ благослови́ти и пѣ́ти Тя́ во вся́ вѣ́ки.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Во грѣсѣ́хъ свои́хъ ника́коже да у́мремъ, кля́твы Евины наслѣ́дницы, а́ще вѣ́рою те́плою и усе́рдіемъ вся́ческимъ, Иже отъ тебе́, святи́телю, Проповѣ́даннаго пріи́мемъ, и Тому́ Еди́ному порабо́таимъ, я́ко Изба́вителю и Просвѣти́телю и Помо́щнику крѣ́пку, и Мздовоздая́телю пра́ведному, бе́здну щедро́тъ иму́щему.

Предста́тель те́плый бу́ди о на́съ, Генна́діе, ста́до твое́, отъ волко́въ гу́бящихъ е́, огради́, па́че же сло́вомъ Боже́ственнымъ напита́й ду́ши гла́дныя, да тя́ вси́ велича́емъ.

Тро́иченъ: Иже Божество́ Еди́но вѣ́дѣти мня́щій, Тро́ическаго же богоче́стія отверга́ющійся, не въ небе́сныхъ, но въ преиспо́днѣйшихъ земли́ отца́ себѣ́ обрѣто́ша, и́же ни еди́ну тва́рь сотвори́, ни роди́, то́чію вся́кую лжу́ отъ утро́бы изведе́ своея́ и всыновле́ніе свое́ дарова́ благоволи́вшимъ къ непра́вдѣ.

Богоро́диченъ: Свѣ́томъ Сы́на Твоего́ ду́ши на́ша просвѣти́ и по́мыслы осія́й, Блага́я Влады́чице, да чи́стымъ се́рдцемъ и мы́слію высо́кою Тя́ вси́ велича́емъ.

Свѣти́ленъ:

Дне́сь Вели́кій Но́вегра́де, просвѣти́ся, восплещи́ пѣ́сньми духо́вными въ па́мяти предсѣда́теля твоего́ Генна́дія въ ли́кѣ возсія́вша святи́телей твои́хъ, въ ни́хже тебѣ́ похвала́ и утвержде́ніе.

На хвали́техъ стихи́ры, гла́съ 4.

Хвали́те Го́спода на си́лахъ Его́,* хвали́те во уго́дникѣ Его́ чудеса́ Его́,* ка́ко проти́ву со́нма лука́внующихъ до́брѣ стоя́ше,* я́ко ка́мень морскíй проти́ву во́дъ мно́гихъ,* и на́мъ наслѣ́діе благо́е оста́вилъ е́сть* догма́товъ оте́ческихъ бога́тство многоцѣ́нное* въ просвѣще́ніе и спасе́ніе ду́шъ на́шихъ.

Хвали́те Го́спода во гла́сѣ тру́бнѣмъ,* восхвали́те въ пѣ́снехъ благода́рственныхъ* святи́теля Госпо́дня Генна́дія,* и́же по́лный сво́дъ Писа́ній Боже́ственныхъ* дарова́лъ е́сть въ назида́ніе лю́демъ свои́мъ,* во отгна́ніе клеве́тъ и злохуле́ній ерети́ческихъ,* въ просвѣще́ніе и спасе́ніе ду́шъ на́шихъ.

Хвали́те Го́спода въ тимпа́нѣ и ли́цѣ,* воспо́йте же ны́нѣ и уго́дника Его́,* святи́теля Генна́дія му́драго,* похвалу́ пресвѣ́тлую земли́ Новгоро́дскія* и всея́ Россíи наста́вника и предста́теля,* лю́ди своя́ во благоче́стіи укрѣпля́юща* и ко́зни вра́жескія прозрѣва́ти науча́юща* въ просвѣще́ніе и спасе́ніе ду́шъ на́шихъ.

Хвали́те Го́спода въ кимва́лехъ доброгла́сныхъ* и въ свѣ́тлыя дни́ Пасха́льныя,* егда́ вся́кое дыха́ніе хва́литъ Содѣ́теля,* и уго́дника Его́ Генна́дія помяни́те, лю́діе,* на осьмо́е тысящелѣ́тіе Пасха́лію на́мъ соста́вльшаго,* тѣ́мже и преда́нія о не́й держи́мся крѣ́пко,* и лѣтосчисле́нія церко́внаго,* времена́ и лѣ́та въ Свое́й, а не въ на́шей вла́сти положи́вшаго,* сла́вяще непреста́нно* въ просвѣще́ніе и спасе́ніе ду́шъ на́шихъ.

Примѣчаніе:
[1] Текстъ испорченъ.

Источникъ: О. А. Платоновъ. Терновый вѣнецъ Россіи. Томъ 5. — М.: Издательство: «Родникъ», 1998.

/ Къ оглавленію раздѣла /


Наверхъ / Къ титульной страницѣ

0