Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 29.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 3-й де́нь.
Свята́го проро́ка Софо́ніи.

[ВЕЧЕРЪ,]
На Го́споди воззва́хъ: стихи́ры проро́ка 3, гла́съ 4. Подо́бенъ: Зва́нный свы́ше.

Иже зарю́ богонача́льнѣйшаго сія́нія пріи́мъ* ума́ чистото́ю* и боже́ственныхъ слове́съ* провозвѣ́стникъ, и прозна́менатель,* и проро́къ боже́ственный бы́въ,* уста́ богодви́жимая яви́лся еси́ Ду́ха,* я́же отъ Него́ тебѣ́ показу́емая* проповѣ́дуя и сказу́я всѣ́мъ язы́комъ* дае́мое спасе́ніе* и Ца́рствіе Христо́во, всече́стне,* Его́же моли́* спасти́ и просвѣти́ти ду́ши на́ша.

Иже боговидѣ́ніемъ сія́я досто́йно,* и проро́ческимъ предсѣда́тельствомъ* и благода́тію почествова́нъ, богодохнове́нне,* и боже́ственнаго сподо́бленъ блаже́нства,* къ Преблаго́му ны́нѣ дерзнове́ніемъ твои́мъ* и ми́лованіемъ одержи́мь,* моля́ся не преста́й* о и́же вѣ́рою тя́ восхваля́ющихъ* и чту́щихъ я́ко богоглаго́лива* и че́стна, и богопрія́тна,* отъ бѣ́дъ изба́вити* и спасти́ ду́ши на́ша.

Твоего́ проро́ка,* я́ко одушевле́нна о́блака,* показа́лъ еси́, Безсме́ртне,* во́ду точа́ща въ жи́знь вои́стинну вѣ́чную,* посла́въ сего́ бога́тно* и дарова́въ Ду́ха Всесвята́го,* Единосу́щнаго Тебѣ́, Отцу́ Вседержи́телю,* и Сы́ну Твоему́,* изъ Твоего́ Существа́ возсія́вшему,* Имже прорече́ спаси́тельное прише́ствіе* Христа́ Бо́га на́шего* и язы́комъ всѣ́мъ спасе́ніе провозвѣсти́.

Ины стихи́ры Богоро́дицы, гла́съ и подо́бенъ то́йже.
[Аще Аллилу́ія, пою́тся сíи стихи́ры пре́жде, пото́мъ свята́го.]

Иже благоче́стно покланя́ющіяся* Твоему́ Рождеству́* отъ вся́каго спаса́й навѣ́та вра́жія,* Богороди́тельнице Всенепоро́чная,* я́ко Предста́тельница всего́ ро́да на́шего су́щи:* Тя́ бо ны́нѣ по́мощь вси́ стяжа́хомъ,* прибѣ́жище же и утвержде́ніе* и Хода́таицу ко Влады́цѣ Христу́ и Го́споду;* Его́же моли́* дарова́ти ми́ръ мíру, мо́лимся,* и грѣхо́въ разрѣше́ніе* притека́ющимъ въ кро́въ Тво́й.

Се́ гное́нія обнажа́ю Тебѣ́* души́ моея́* и показу́ю лю́тыя я́звы,* я́же разбо́йницы наложи́ша мнѣ́,* лука́вствія по́мыслы* де́монскими смуще́ніи,* Влады́чице Всенепоро́чная,* Цѣли́теля ду́шъ и тѣле́съ ро́ждшая,* исцѣле́ніе Ты́ ми́ пода́ждь си́мъ,* излива́ющи еле́й* милосе́рдія Твоего́ и бла́гости* къ благорастворе́нію спасе́нія и здра́вія.

Не скры́ю, окая́нный, лю́тыхъ мои́хъ,* я́ко вся́ стяжа́хъ, я́же ненави́дитъ Бо́гъ:* пло́ть оскверни́хъ и ду́хъ мо́й,* и у́мъ помышле́ніи нечи́стыми,* и дѣ́лы, и словесы́ скве́рными;* язы́комъ осужда́ю согрѣша́ющихъ,* са́мъ го́ршая содѣва́ю, Богороди́тельнице;* всѣ́хъ мнѣ́ си́хъ да́ждь исправле́ніе,* да, восклони́вся зла́го моего́ обы́чая,* припа́даю и пла́чуся,* о ни́хже злѣ́ содѣ́лахъ* въ жи́зни мое́й хожде́ніемъ.

Сла́ва, и ны́нѣ. Подо́бенъ то́йже:

Яко во глубину́ мно́гихъ* согрѣше́ній впадо́хъ* отъ лѣ́ности моея́* и уны́нія, окая́нный, и невѣ́дѣнія,* и отча́яніемъ ны́нѣ одержи́мь е́смь;* бу́ди ми́ по́мощь, и очище́ніе,* и спасе́ніе, Пречи́стая,* и утѣше́ніе благопремѣ́нно подающи́ ми,* Тя́ молю́,* и Тебѣ́ ми́лся дѣ́ю и припа́даю,* и вѣ́рою зову́ Ти,* да не явлю́ся до конца́* льсти́вому обра́дованіе.

Крестобогоро́диченъ, подо́бенъ то́йже:

Не рыда́й Мене́, Ма́ти,* зря́щи на дре́вѣ повѣ́шена Твоего́ Сы́на и Бо́га,* на вода́хъ повѣ́сившаго зе́млю неодержи́мо* и всю́ тва́рь созда́вшаго;* и́бо воста́ну и просла́влюся,* и а́дова ца́рствія сокрушу́ крѣ́постію,* и погублю́ того́ си́лу,* и свя́занныя изба́влю* отъ злодѣ́йства его́,* я́ко Благоутро́бенъ,* и Отцу́ Моему́ приведу́,* я́ко Человѣколю́бецъ.

На стихо́внѣ окто́иха.

Тропа́рь, гла́съ 2:

Проро́ка Твоего́ Софо́ніи па́мять, Го́споди, пра́зднующе, тѣ́мъ Тя́ мо́лимъ: спаси́ ду́ши на́ша.


НА УТРЕНИ,
Кано́нъ, его́же краегране́сіе: Софо́ніева мя́ сла́ва да уясни́тъ. Ѳеофа́ново. Гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Тя́ мо́лимъ, проро́че, Бо́жію престо́лу предстоя́ща, моли́ти прилѣ́жно просвѣще́ніе дарова́ти на́мъ, вѣ́рою честну́ю пою́щимъ па́мять твою́.

Орга́нъ боже́ственный яви́лся еси́, вмѣща́ющь Боже́ственнаго Ду́ха просвѣще́ній и даро́въ, Софо́ніе всему́дре: тѣ́мъ, ра́дующеся, вѣ́рніи, тя́ ублажа́емъ.

Богоро́диченъ: Свѣтлѣ́йшими заря́ми всю́ зе́млю возсія́вшее Со́лнце изъ свята́го чре́ва Твоего́ озаря́етъ, Влады́чице; и́миже просвѣ́щшеся, Тя́, Бо́жію Ма́терь, почита́емъ.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Вся́ ви́дяй, я́ко Бо́гъ, бу́дущихъ зна́ніе и хотя́щихъ бы́ти вѣ́дѣніе Тебѣ́ явле́нно проявля́етъ боголѣ́пно и показу́етъ, блаже́нне досточу́дне.

Вжили́въ, блаже́нне, тво́й у́мъ благоче́стнымъ дерзнове́ніемъ, Ду́ху Боже́ственному подклони́лъ еси́ тебе́ и бы́лъ еси́ прія́тенъ та́мо су́щихъ Боже́ственныхъ вдохнове́ній.

Богоро́диченъ: Се́, Тебе́ вси́ ро́ди блажа́тъ вѣ́рою, Безлѣ́тное Сло́во пло́тію въ лѣ́то ро́ждшую преесте́ственно и Дѣ́ву па́ки пребы́вшую.

Сѣда́ленъ, гла́съ 6. Подо́бенъ: Милосе́рдія две́ри.

Очи́стивъ отъ скве́рнъ у́мъ, всему́дре, зерца́ло боже́ственное содѣ́лалъ еси́, лу́чь прія́тно Боже́ственнаго Ду́ха; и ны́нѣ ко Исто́чнику, ра́дуяся, отше́лъ еси́ сія́ній, проро́че Софо́ніе.

Сла́ва, и ны́нѣ, богоро́диченъ:

Отъ се́рдца стена́ніе и отъ утро́бы приноша́ю Ти́, Пренепоро́чная, Твое́ прося́ благопребы́тное заступле́ніе: поми́луй всестра́стную мою́ ду́шу, уми́лостиви Многоми́лостиваго Бо́га изба́вити мя́ Суда́ и е́зера о́гненнаго, еди́на Благослове́нная.

Крестобогоро́диченъ:

Тя́ ро́ждшая, Христе́, Приснодѣ́ва Отрокови́ца, на Крестѣ́ зря́щи на́съ ра́ди вознесе́на, уязвля́ше свое́ печа́ли ору́жіемъ се́рдце и ду́шу и пла́каше, рыда́ющи ма́терски. Тоя́ моли́твами поми́луй ны́, Го́споди Ми́лостиве.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Всѣ́хъ Госпо́дь на́мъ яви́ся по проро́честву, блаже́нне, твоему́, вся́ призыва́я къ позна́нію Своему́, и рабо́ты свободи́.

Благода́тію озаря́емь, провозгласи́лъ еси́, глаго́ля, подъ и́го еди́но подкланя́ющимся рабо́тати, послѣ́дующимъ вѣ́рѣ и Го́споду служа́щимъ.

Богоро́диченъ: Марíе Всечи́стая, страсте́й смуще́ніе моего́ по́мысла и напа́стей бу́рю разори́, безстра́стія Исто́чникъ ро́ждши, Ма́ти Дѣ́во.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Отъ непра́вды къ добродѣ́тели и отъ страсте́й плѣне́нія мя, блаже́нне, обрати́ твои́ми мольба́ми, проро́че сла́вне, и къ свѣ́ту благоче́стія дѣ́лъ упра́ви.

Просвѣти́въ твою́ ду́шу добродѣ́телей благообра́зіями, уго́дну показа́лъ еси́ къ сія́ніемъ Боже́ственнаго Ду́ха, отъ Него́же и проро́чества благода́тію обогати́лся еси́.

Богоро́диченъ: Возглаша́ютъ проро́ческая рече́нія, Пречи́стая, мно́гими о́бразы Рождество́ Твое́, и́хже мы́ ны́нѣ сбытіе́ зря́ще, и́стинно Богоро́дицу Тя́ возвѣща́емъ.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Пріе́мъ, сла́вне, Ду́ха зари́ явле́ніемъ, я́ко зерца́ло проро́чествія Боже́ственнаго сія́нія, облиста́лъ еси́, я́ко су́щая, проро́чествуя бу́дущая.

Тво́й пріи́де Ца́рь, ра́дуйся, Сіо́не, и красу́йся, ви́дя, и мíръ просвѣти́ блиста́ньми Своего́ Божества́, и де́монскую ле́сть посрами́.

Богоро́диченъ: Пло́ти бре́ннѣй соедини́ся и́же изъ Отца́ Единоро́дный въ ложесна́хъ Твои́хъ, Еди́нъ изъ дву́хъ про́йде безъ тлѣ́нія, соблю́дъ неврежде́нно чи́стое дѣ́вство Твое́, Всепѣ́тая.

Конда́къ, гла́съ 4. Подо́бенъ: Яви́лся еси́.

Яви́лся еси́ свѣтоза́ренъ Боже́ственнымъ Ду́хомъ, проро́че Софо́ніе, Бо́жіе явле́ніе возгласи́въ: ра́дуйся зѣло́, дщи́ Сіо́ня Іерусали́мова, проповѣ́ждь: се́ Ца́рь Тво́й гряде́тъ, спаса́яй.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Возсія́ па́мять твоя́, проро́че, мíру, я́коже со́лнце, озаря́ющи проро́чества благода́тію твое́ю согла́сно пою́щія вѣ́рно: благослове́нъ еси́, Бо́же оте́цъ на́шихъ.

Ту́чнѣйшій о́блакъ ты́ яви́вся, ту́чу богоразу́мія на́мъ возсія́лъ еси́ отъ спаси́тельныхъ, блаже́нне, исто́чниковъ, и́миже просвѣща́емся вопи́ти: благослове́нъ еси́, Бо́же оте́цъ на́шихъ.

Богоро́диченъ: Сло́во, дре́вле Еже бы́ти подаю́щее всѣ́мъ Боже́ственнымъ хотѣ́ніемъ, воззва́ти восхотѣ́въ человѣ́ка, Чи́стая, въ Твою́ всели́ся утро́бу, Благослове́нная, Яже Бо́га пло́тію ро́ждши.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Возложе́нъ ве́сь Вседержи́телю, промышле́нія образо́мъ тайнонаучи́лся еси́, строи́тельно язы́ки наказу́я; тѣ́мъ тя́ пое́мъ, проро́че богоглаго́ливе.

Моле́бное пѣ́ніе Бо́гу принеси́ о пою́щихъ тя́, богоблаже́нне, и напа́стей разори́ смуще́ніе, да тя́ пое́мъ, проро́че богоглаго́ливе.

Богоро́диченъ: Жизнода́вца ро́ждши Бо́га и Го́спода, сме́ртное губи́тельство неуде́ржное уста́вила еси́, Пречи́стая, сіе́ умертви́вши; тѣ́мъ Тя́ пое́мъ во вся́ вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

На земли́ кро́ткихъ ты́ всели́лся еси́, идѣ́же по кончи́нѣ а́нгельскія зри́ши свѣ́тлости, Софо́ніе всему́дре, проро́че Бо́жій, кро́токъ бы́въ, сія́я благода́тію; тѣ́мже, ра́дующеся, вѣ́рніи, тя́ ублажа́емъ.

Твои́хъ прорече́ній, пресла́вне, свѣ́тло ви́дяще бы́вшее сбытіе́, да́ннѣй тебѣ́ благода́ти чуди́мся, и ума́ твоего́ чистотѣ́, и души́ богови́дному удивля́емся.

Богоро́диченъ: Яко Ты́, никогда́же и́на дарова́ся отъ родо́въ дре́внихъ, Богома́ти Всенепоро́чная: Ты́ бо еди́на всѣ́хъ несравне́нную имѣ́ла еси́ святы́ню и чистоту́, тѣ́мже прія́ла еси́ Бо́га, въ Тебѣ́ воплоща́ема.

Свѣти́ленъ дне́.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 8 – 11.

/ Къ оглавленію раздѣла /


Наверхъ / Къ титульной страницѣ

0