Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 16 декабря 2017 г. Сейчасъ на порталѣ посѣтителей - 5.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія во 2-й де́нь.
Па́мять преподо́бнаго отца́ на́шего Іоанни́кія Дѣви́ческаго.

НА МАЛѢЙ ВЕЧЕРНИ,
[На Го́споди воззва́хъ:] стихи́ры, гла́съ 4. Подо́бенъ: Да́лъ еси́ зна́меніе.

Мíръ возненави́дѣвъ, преподо́бне,* посто́мъ и моли́твами* къ небе́сной высотѣ́ возлетѣ́лъ еси́,* свѣти́ломъ свои́мъ человѣ́ки на земли́ просіява́еши,* со а́нгелы на небеси́ лику́я.* Тѣ́мъ тя́ мо́лимъ, преподо́бне,* съ вѣ́рою приходя́щіи къ твои́мъ моще́мъ:* Христа́ умоли́ грѣхо́въ оставле́ніе на́мъ пода́ти.

Стра́сти тѣле́сныя* воздержа́ніемъ умертви́лъ еси́* и прилѣ́жными моли́твами* и сле́зными то́ки* удави́лъ еси́ льсти́ваго змíя, о́тче,* Бо́гу же угоди́лъ еси́ па́че мно́гихъ,* досточу́дне Іоанни́кіе преподо́бне.* Тѣ́мже тя́ Свое́ю благода́тію украси́* Творе́цъ мíра и Спа́съ ду́шъ на́шихъ.

Сла́ва, гла́съ 8:

Преподо́бне и блаже́нне о́тче Іоанни́кіе, во дни́ и въ нощи́ поуча́лся еси́ за́повѣдемъ Боже́ственнымъ, и́хже соблю́дъ, яви́лся еси́ до́мъ Святы́я Тро́ицы, Юже моли́ непреста́нно, преподо́бне о́тче, спасти́ся душа́мъ на́шимъ.

И ны́нѣ, богоро́диченъ:

Влады́чице, пріими́ мольбы́ рабо́въ Твои́хъ и изба́ви на́съ отъ вся́кія ско́рби и печа́ли.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Яви́лся еси́* отъ ма́тернихъ пеле́нъ* освяще́нъ, богоно́се Іоанни́кіе,* и бы́лъ еси́ сосу́дъ* Пресвята́го Ду́ха.

Сти́хъ: Честна́ предъ Го́сподемъ* сме́рть преподо́бныхъ Его́.

Ле́сть лука́выхъ бѣсо́въ* посрами́лъ еси́,* о́тче Іоанни́кіе,* кре́стною си́лою* уясни́лъ еси́* сла́ву Христо́ву.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Нося́ въ ру́цѣ свое́й* Кре́стъ Госпо́день,* бѣсо́вская мечта́нія* съ ни́мъ погуби́лъ еси́,* сего́ ра́ди и мы́* согла́сно вопіе́мъ ти́:* ра́дуйся, о́тче на́шъ Іоанни́кіе.

Сла́ва, и ны́нѣ, гла́съ то́йже:

Влады́чице Блага́я,* Преблагослове́нная и Пренепоро́чная,* Чи́стая Дѣви́це,* Защи́тнице ро́да христіа́нскаго,* прилѣ́жно вси́ къ Тебѣ́ зове́мъ:* ру́ки Твоя́ святы́я распростри́* ми́лостивно къ Сы́ну Своему́* и всегда́ моли́ Его́* спасти́ ду́ши на́ша.

Тропа́рь свята́го, гла́съ 1:

Поще́ніемъ, моли́твами и благода́тію Боже́ственною просвѣти́вся, земны́я концы́ свѣ́тло озаря́еши благоче́стно, чуде́съ благода́ть отъ Бо́га пріе́мъ, исцѣля́еши неду́ги, ду́хи же лука́выя отъ человѣ́ковъ отгоня́еши, и́же съ вѣ́рою прите́каютъ къ ра́цѣ моще́й твои́хъ святы́хъ, преподо́бне о́тче на́шъ Іоанни́кіе. Сла́ва Да́вшему ти́ благода́ть, сла́ва Укрѣпи́вшему тя́, сла́ва Дѣ́йствующему тобо́ю всѣ́мъ исцѣле́нія.

Сла́ва, и ны́нѣ, богоро́диченъ.

[Гавріи́лу вѣща́вшу Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ.]


НА ВЕЛИЦѢЙ ВЕЧЕРНИ,
Блаже́нъ му́жъ, 1-й антифо́нъ. На Го́споди воззва́хъ: поста́вимъ стихо́въ 8, гла́съ 8. Подо́бенъ: О, пресла́внаго чудесе́!

Отче Іоанни́кіе, преподо́бне,* вои́стинну вы́ну носи́лъ еси́* въ горта́ни Бо́жія возноше́нія,* поуча́яся, всему́дре,* дѣ́тельнѣйшимъ словесе́мъ богодухнове́ннымъ,* и отту́ду, обогаще́нъ бы́въ* истека́ющею благода́тію, блаже́нне,* всѣ́хъ нечести́выхъ* совѣ́тованія низвраща́еши.

Отче Іоанни́кіе пресла́вне,* исто́чниками сле́зъ ду́шу свою́ очи́стивъ* и всено́щными стоя́ніи Бо́га уми́лостививъ,* воспери́лся еси́ къ любле́нію и красотѣ́ Сего́, блаже́нне,* ея́же ны́нѣ досто́йно наслажда́яся,* ра́дуешися непреста́нно* со страда́льцы твои́ми,* богому́дре преподо́бне.

Отче Іоанни́кіе преподо́бне,* воспери́въ у́мъ къ Бо́гу вѣ́рою,* омерзи́лъ еси́ непостоя́нное мірска́го смѣше́нія* и, кре́стъ сво́й воспріи́мъ,* Всеви́дцу послѣ́довалъ еси́,* порабо́тивъ по́мыслу* необузда́нное тѣ́ло по́двигами обуче́нія,* крѣ́постію Боже́ственнаго Ду́ха.

Отче Іоанни́кіе,* твое́ непрело́жное житіе́ —* вѣ́ра вои́стинну Правосла́вная,* и́бо отъ дѣя́нія къ зѣло́ вели́кому видѣ́нію дости́глъ еси́,* Прему́дрости бы́въ жили́ще,* во двою́ естеству́ чты́й отъ Тро́ицы Христа́,* Его́же моли́ о душа́хъ на́шихъ.

Подо́бенъ: [Ра́дуйся.] Гла́съ 5.

Ра́дуйся, преподо́бне по́стниче,* святы́й о́тче на́шъ,* святи́телю богому́дре, Бо́гомъ возлю́бленне!* Въ мíрѣ жи́знь свою́ свя́то устро́ивъ,* Ду́хомъ Боже́ственнымъ оживи́лъ еси́,* е́же облагоуха́ти на́ша чу́вства и ду́ши,* и́миже восхо́димъ на небеса́* и земны́я стра́сти прогоня́емъ,* Христа́ зря́ще, Имже спаса́емся.

Ра́дуйся, о́тче, мірска́я возненави́дѣвъ* и и́ноческое житіе́ возлюби́въ,* а́нгеломъ собесѣ́дникъ показа́лся еси́* и явля́ешися свои́ми чудеса́ми,* а́ки звѣзда́, сія́ющая на небеси́.* Моли́ся Го́споду о всѣ́хъ на́съ,* соверша́ющихъ святу́ю па́мять твою́.

Ра́дуйся, святи́телю сла́вный,* отступи́въ отъ мірскíя и мяте́жныя молвы́,* прите́клъ еси́ ко Христо́вой тишинѣ́, богому́дре,* и видѣ́ніемъ Боже́ственныхъ дѣя́ній,* я́ко всебога́тыми свѣтлостьми́, обогати́вся вои́стинну,* и́миже вѣ́рныя назира́еши,* благолѣ́пнымъ сія́я житіе́мъ.

Чу́вственныя стра́сти побѣди́лъ еси́* брозда́ми воздержа́нія, чудодѣ́йственниче,* и, ре́вности безпло́тныхъ на земли́ показа́въ,* вся́ жела́нія плотска́я ду́хови покори́лъ еси́.* Тѣ́мъ ны́нѣ въ небе́сныхъ селе́ніихъ водворя́яся,* моли́ о душа́хъ на́шихъ.

Сла́ва, гла́съ 5:

Преподо́бне о́тче, гла́са Ева́нгелія Госпо́дня послу́шавъ, мíръ оста́вилъ еси́, ни во что́ же вмѣни́въ бога́тство и сла́ву, и, живы́й въ уедине́ніи, всѣ́мъ взыва́лъ еси́ отту́ду: возлюби́те Бо́га, и обря́щете благода́ть, и ничто́ же предпочти́те любви́ Его́, да егда́ пріи́детъ во сла́вѣ Свое́й, обря́щете упокое́ніе со всѣ́ми святы́ми. Ихже моли́твами, Христе́, сохрани́ и спаси́ ду́ши на́ша.

И ны́нѣ, богоро́диченъ, гла́съ 5:

Въ Чермнѣ́мъ мо́ри [Неискусобра́чныя Невѣ́сты о́бразъ написа́ся иногда́: та́мо Моисе́й, раздѣли́тель воды́, здѣ́ же Гавріи́лъ, служи́тель чудесе́; тогда́ глубину́ ше́ствова немо́кренно Изра́иль, ны́нѣ же Христа́ роди́ безсѣ́менно Дѣ́ва; мо́ре по проше́ствіи Изра́илевѣ пребы́сть непрохо́дно, Непоро́чная по рождествѣ́ Емману́илевѣ пребы́сть нетлѣ́нна. Сы́й и пре́жде Сы́й, явле́йся я́ко Человѣ́къ, Бо́же, поми́луй на́съ].

Вхо́дъ. Проки́менъ дне́ и чте́нія.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́, или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры свята́го, гла́съ 2:

Кíими похва́льными пѣ́сньми ублажи́мъ святи́теля Іоанни́кія? по́стниковъ украси́теля, преподо́бныхъ побо́рника, свѣти́ло свяще́нникомъ и похвала́ и́нокомъ, це́ркви свое́й утвержде́ніе непоколеби́мое, неду́гомъ врача́. Его́же моли́твами, Го́споди, спаси́ ду́ши на́ша.

Кíими слове́сными вѣнцы́ венча́емъ Іоанни́кія? свяще́ннаго тече́нія жела́теля, небе́снаго ученика́, боже́ственныма крило́ма превзя́таго богови́дца, сто́лпъ смире́нія необори́мый, стѣ́ну разсужде́нія непоколеби́мую, нра́вомъ украше́ніе, честно́е благолѣ́піе, моли́твенника Христу́, непреста́нно моля́щагося о ча́дѣхъ свои́хъ.

Кíими пѣ́сненными пѣ́ніи воспои́мъ Іоанни́кія? преиспещре́нна дѣя́ньми и изоби́льна благода́тію, равноа́нгельна житіе́мъ, вѣ́ры утвержде́ніе, неду́говъ цѣли́теля, бѣсо́въ прогони́теля и всѣ́мъ правовѣ́рнымъ ско́раго помо́щника.

Сла́ва, гла́съ 4:

Пріиди́те, вси́ празднолю́бцы, ублажи́мъ па́мять святи́теля Христо́ва Іоанни́кія: а́ще бо и возлетѣ́ отъ на́съ, но неви́димо съ на́ми стои́тъ и преподо́бныя ру́ки своя́ простира́етъ о на́съ ко Го́споду. Притеце́мъ у́бо, и припаде́мъ къ ра́цѣ святы́хъ моще́й его́, и поклони́мся, прося́ще, я́ко да святы́ми свои́ми моли́твами испро́ситъ ча́домъ свои́мъ ми́ръ и душа́мъ и́хъ ве́лію ми́лость.

И ны́нѣ, богоро́диченъ:

Яко Всенепоро́чная Невѣ́ста Творцу́, я́ко Неискусому́жная Ма́ти, прія́телище Изба́вителя и Утѣ́шителя, потщи́ся изба́вити мя́ бѣсо́вскаго злодѣ́йства, преложи́вши скве́рное тѣ́ло мое́ въ свѣ́тлое жили́ще добродѣ́телей, разжени́ о́блакъ страсте́й мои́хъ Твои́ми моли́твами и сподо́би мя́ вы́шняго прича́стія въ Невече́рнѣмъ Свѣ́тѣ.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Небе́сныя кру́ги превозлетѣ́въ боже́ственною добродѣ́телію, преблаже́нне о́тче, заше́лъ еси́ во мра́къ, идѣ́же, осія́ніе пріи́мъ отъ благода́ти Бо́жія, вои́стинну свѣтлѣ́ешися, преподо́бне.

Сти́хъ: Честна́ предъ Го́сподемъ сме́рть преподо́бныхъ Его́.

Добродѣ́тельми просвѣти́въ ду́шу и у́мъ, къ небеси́ преста́вился еси́ въ Ца́рствіи Христо́вѣ, Іоанни́кіе блаже́нне, принося́ Ему́ рукоя́тія трудо́въ свои́хъ, въ по́стницѣхъ бо ты́ яви́ся свѣти́льникъ, наслажда́яся нестарѣ́емыя пи́щи.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Преподо́бне о́тче, не да́лъ еси́ сна́ очи́ма свои́ма, ниже́ вѣ́ждома свои́ма дрема́нія, до́ндеже ду́шу и тѣ́ло отъ страсте́й свободи́лъ еси́, угото́вавъ себе́ въ жили́ще Ду́хови. Прише́дъ бо, Христо́съ со Отце́мъ оби́тель сотвори́ у тебе́, тѣ́мже Единосу́щныя Тро́ицы служи́тель бы́лъ еси́, великопроповѣ́дниче Іоанни́кіе, моли́ся о душа́хъ на́шихъ.

Сла́ва, гла́съ 2:

На земли́ а́нгела и на небесѣ́хъ человѣ́ка Бо́жія, благоукраше́ніе мíра, наслажде́ніе благи́хъ, добродѣ́телей по́стническихъ похвалу́, Іоанни́кія почти́мъ: насажде́нъ бо въ дому́ Бо́жіи, процвѣте́ пра́ведно и, я́ко ке́дръ въ пусты́ни, умно́жи ста́до Христо́во слове́сными овца́ми въ преподо́біи и пра́вдѣ.

И ны́нѣ, богоро́диченъ:

[О, чудесе́ но́ваго, всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша.]

На благослове́ніи хлѣ́бовъ: Тропа́рь свято́му, два́жды [пи́санъ на ма́лѣй вече́рни], и Богоро́дице Дѣ́во.., еди́ножды. Про́чая до конца́ по ря́ду.



НА УТРЕНИ,
[На Бо́гъ Госпо́дь: Тропа́рь свято́му, два́жды. Сла́ва, и ны́нѣ, богоро́диченъ.]

По 1-мъ стихосло́віи сѣда́ленъ, гла́съ 8. Подо́бенъ: Прему́дрости.

Многосвѣ́тлая звѣзда́ и́ночествующимъ показа́ся, и степе́нь извѣ́стенъ, и предѣ́лъ воздержа́нія, пресвѣ́тлое зерца́ло разсужде́нія, преподо́бне, Бо́гови предстоя́, проси́ проще́нія прегрѣше́ніямъ ра́достно соверша́ющихъ твою́ па́мять, преблаже́нне. [Два́жды.]

Сла́ва, и ны́нѣ:

Наста́ви на́съ на пу́ть покая́нія, уклоня́ющіяся при́сно къ злы́мъ безпу́тіямъ и преблага́го прогнѣ́вающія Го́спода, и моли́, Неискусобра́чная Благослове́нная Марíе, спасти́ся всѣ́мъ, ча́ющимъ утѣше́нія.

По 2-мъ стихосло́віи сѣда́ленъ, гла́съ 8. Подо́бенъ: Прему́дрости.

Боже́ственнымъ жела́ніемъ безсме́ртія одержи́мъ, о́тче Іоанни́кіе, и кре́стъ на ра́мо взе́мъ, въ пусты́няхъ всели́лся еси́, идѣ́же Го́сподеви усе́рдно порабо́та, тѣ́мже тя́ и стяжа́хомъ те́пла моли́твенника ко Го́споду. [Два́жды.]

Сла́ва, и ны́нѣ:

Боже́ственное селе́ніе была́ еси́ Сло́ву, еди́на Всечи́стая Дѣ́во, чистото́ю а́нгелы превозше́дшая, очи́сти мя́, оскверне́нна плотски́ми прегрѣше́ньми, моли́твами Твои́ми.

По Хвали́те и́мя Госпо́дне...

Припѣ́въ: Велича́емъ тя́, преподо́бне о́тче Іоанни́кіе, и чте́мъ святу́ю па́мять твою́, наста́вниче мона́ховъ, и собесѣ́дниче а́нгеловъ.

Псало́мъ избра́нный: Терпя́, потерпѣ́хъ Го́спода...

По поліеле́и, сѣда́ленъ, гла́съ 4. Подо́бенъ: Удиви́ся Іо́сифъ.

На земли́ а́нгела и на небесѣ́хъ человѣ́ка Бо́жія, мíра благоукраше́ніе, наслажде́ніе благи́хъ, по́стническихъ добродѣ́телей похвалу́, Іоанни́кія вси́ почти́мъ: насажде́нъ бо въ дому́ Бо́жіи, процвѣте́ пра́ведно и, я́ко ке́дръ въ пусты́ни, умно́жи ста́до слове́сное Христо́выхъ ове́цъ въ преподо́біи и пра́вдѣ, ему́же вси́ воскли́кнемъ: ми́лостиве, помина́й на́съ, преподо́бне, любо́вію творя́щихъ святу́ю па́мять твою́. [Два́жды.]

Сла́ва, и ны́нѣ, богоро́диченъ:

Удиви́ся Іо́сифъ, е́же па́че естества́ зря́ и внима́ше мы́слію, и́же на руно́ до́ждь, въ безсѣ́менномъ зача́тіи Твое́мъ, Богоро́дице, купину́, огне́мъ неопали́мую, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по рождествѣ́ па́ки Дѣ́вою пребыва́етъ.

Та́же антифо́нъ 1-й, 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра самогла́сна, гла́съ 6:

Гора́ небеси́ подо́бяшеся, пріе́млющи свѣти́льникъ, въ пусты́ни горя́щь — отца́ Іоанни́кія. Ты́ же, преподо́бне о́тче, Святы́мъ Ду́хомъ, я́ко оре́лъ, прелетѣ́въ го́ры и верте́пы Дѣви́ческія, о красноду́шне, просвѣща́еши вѣ́рныя, притека́ющія къ ра́цѣ моще́й твои́хъ и съ весе́ліемъ взыва́ющія ти́: моли́ся съ Богоро́дицею о спасе́ніи ду́шъ на́шихъ.

Кано́нъ Богоро́дицѣ со ирмосо́мъ на 6, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Прему́дрости вѣ́мы Тя́ сокро́вище, Пречи́стая, и точа́щій исто́чникъ благода́ти, и ра́зума приснотеку́щаго, прошу́, ка́плею одожди́ти мя́ при́сно.

Пріиди́те, востеце́мъ къ Богоро́дицѣ, свѣ́тъ благода́ти показа́вшей, и научи́мся украси́ти пресвѣ́тло Ея́ торжество́ совоку́пными пѣ́сньми.

Пречи́стая, вы́шши небе́съ бы́вши, хра́мъ и пала́та, въ це́ркви Бо́жіей возложи́лася еси́, Тому́ угото́ватися въ Боже́ственное жили́ще прише́ствія Его́.

Две́рь сла́вная, мы́слемъ недосту́пная, две́ри Бо́жія хра́ма отве́рзши, ны́нѣ повелѣва́етъ на́мъ, совозше́дшимъ, наслади́тися Боже́ственныхъ чуде́съ Ея́.

Кано́нъ преподо́бному отцу́ Іоанни́кію на 8, гла́съ 2.
Пѣ́снь 1.

Ирмо́съ: Во глубинѣ́ потопи́ дре́вле фараони́тское всево́инство преоруже́нная си́ла, вопло́щееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Присносу́щнымъ Свѣ́томъ Тріѵпоста́снаго ны́нѣ озаря́емь, предстои́ши ве́сь свѣ́телъ, я́коже а́нгели, но молю́ тя, о́тче Іоанни́кіе: отжени́ отъ се́рдца моего́ омраче́ніе, преподая́ свѣ́тъ житія́ твоего́.

Жела́ніе Христо́вы красоты́ стяжа́въ, затвори́лъ еси́ чу́вства своя́ отъ всего́ тлѣ́ннаго и мимотеку́щаго и по́двигами души́ своея́ возше́лъ еси́ на высоту́, блаже́нне.

Вели́кое смотре́ніе Бо́жіе освяти́ тя́ отъ утро́бы и показа́ тя́ сосу́дъ прія́тенъ Свято́му Ду́ху, тѣ́мже яви́лся еси́ отъ ю́ности огражда́емь стра́хомъ Бо́жіимъ.

Отъ небе́съ пріе́мъ оби́льно дарова́ніе Ду́ха Пресвята́го, о́тче Іоанни́кіе, да́руй ми́ сло́во во отверзе́ніе у́стъ мои́хъ, да воспою́ равноа́нгельское житіе́ твое.

Любо́вію Влады́чнею разже́гся, оста́вилъ еси́ вся́ земна́я и, воспрія́въ кре́стъ сво́й на ра́мо, Тому́ послѣ́довалъ еси́, просла́влься зна́меньми и чудесы́, преподо́бне.

Богоро́диченъ: Словеса́ Гавріи́ла архистрати́га слы́шавши, Непоро́чная, и, наше́дшу на Тя́ Ду́ху Свято́му, заче́нши, родила́ еси́ Сы́на, Отцу́ Собезнача́льна.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Невѣстокраси́тель дне́сь показа́ся кра́сный Дѣ́вы хра́мъ и черто́гъ, пріе́мь одушевле́нный черто́гъ Бо́жій, Чи́стую и Непоро́чную, и свѣтлѣ́йшую всея́ тва́ри.

Дави́дъ преднача́льствуя ликова́нію, игра́етъ и ликовству́етъ съ на́ми, и Цари́цу зове́тъ Тя́ преиспещере́нну, Пренепоро́чная, предстоя́щую, Всечи́стая, въ це́ркви Царю́ и Бо́гу.

Изъ нея́ же произы́де преступле́ніе дре́вле ро́ду человѣ́ческому, изъ Тоя́ исправле́ніе и нетлѣ́ніе процвѣте́. Богоро́дица дне́сь приводи́ма въ до́мъ Бо́жій.

Игра́ютъ а́нгельская во́инства, и всѣ́хъ человѣ́къ мно́жество, и предъ лице́мъ, Всечи́стая, предтеку́тъ Ти́, свѣщи́ нося́ще, и Твоя́ вели́чія прославля́юще въ дому́ Бо́жіи.

Инъ.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Ты́, Го́споди Бо́же на́шъ, и нѣ́сть пра́веденъ, па́че Тебе́, Го́споди.

Ви́дѣвши бо́дренная душа́ твоя́ разу́мныма очи́ма, я́ко вся́ су́етна су́ть, отве́рглъ еси́ всю́ мірску́ю красоту́ и, разда́въ имѣ́ніе свое́ ни́щимъ, стяжа́лъ еси́ некра́домое.

Боже́ственныхъ послу́шавъ за́повѣдей, въ молча́ніи пребы́лъ еси́ чрезъ все́ житіе́ свое́ и, бы́въ въ поноше́ніе во оте́чествіи свое́мъ, пита́лся еси́ жела́ніемъ и́стинныя сла́вы.

Отврати́лъ еси́ плещи́ своя́ отъ мірскíя красоты́ и возве́лъ еси́ о́чи свои́ на го́ру, ча́я отту́ду боже́ственныя по́мощи. Тѣ́мже отъ горы́ святы́я услы́ша тебе́ Госпо́дь и Свои́ми просла́ви чудесы́.

Крѣ́пкую съ высоты́ по́мощь и озаре́ніе ра́зума получи́въ, пожи́лъ еси́ на земли́ равноа́нгельски, тѣ́мже бы́лъ еси́ исто́чникъ чуде́съ, о́тче Іоанни́кіе.

Яко дре́во, о́тче, насажде́нное при исхо́дящихъ во́дъ, процвѣ́лъ еси́ Боже́ственными добродѣ́тельми, я́ко ке́дръ въ Лива́нѣ, тѣ́мже осѣня́еши неду́жныя.

Сѣда́ленъ, гла́съ 8. Подо́бенъ: Прему́дрости.

Мона́ховъ све́рстникъ яви́лся еси́, му́дре, подо́бникъ бы́въ Анто́нію въ послѣ́докъ лѣ́тъ, блаже́нне, просвѣща́я вѣ́рныя свѣ́тлостію чуде́съ, преподо́бне. Тѣ́мже, собра́вшеся въ па́мять твою́, вси́ вѣ́рніи, про́симъ благода́ти ко исцѣле́нію страсте́й на́шихъ и вопіе́мъ ти́: моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ.

Ра́дуйся, я́же а́нгеломъ ра́дость ми́ра пріе́мшая; ра́дуйся, ро́ждшая Творца́ Твоего́ и Го́спода; ра́дуйся, сподо́бльшаяся бы́ти Ма́ти Бо́жія.

Пѣ́снь 4.

Ирмо́съ: Сѣдя́й во сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Две́рь непроходи́мую до́мъ Бо́жій пріе́мля дне́сь, преста́ти сотвори́ вся́кой слу́жбѣ зако́нной: я́ко вои́стинну яви́ся, зовы́й, су́щимъ на земли́ Истина.

Гора́ присѣ́нная, ю́же прови́дѣ вмѣща́ющуюся вну́трь незаходи́мыхъ хра́ма, я́ко вои́стину яви́ся и покрыва́етъ концы́.

Ви́дѣвши пресла́вная вся́ земля́, стра́нныя же и ди́вныя ве́щи, ка́ко Дѣ́ва отъ а́нгела пи́щу пріе́млющи, о́бразы строе́нія пріе́млетъ.

Це́рковь и пала́та Царе́ва, не́бо одушевле́нное я́вльшися, Богоневѣ́сто, въ це́рковь зако́нную, въ освяще́ніе приводи́ма еси́ дне́сь, Тому́ соблюда́ема Пречи́стая.

Инъ.

Ирмо́съ: Прише́лъ еси́ отъ Дѣ́вы, не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя человѣ́ка. Тѣ́мъ зову́ Ти́: сла́ва си́лѣ Твое́й, Го́споди.

Воззва́лъ тя́ е́сть Госпо́дь отъ Сіо́на, я́коже дре́вле пра́отца Авраа́ма, повелѣ́въ ти́ изы́ти отъ земли́ оте́чествія. Ты́ же послѣ́довалъ еси́ Того́ словеси́, о́тче Іоанни́кіе, со усе́рдіемъ.

Свѣти́льникъ нога́ма твои́ма зако́нъ благода́ти, и, сего́ зако́на придержа́вся, ве́лъ еси́ твоя́ исправле́нія, тѣ́мже и просія́лъ еси́, о́тче, я́ко въ полу́дни.

Оде́жда пло́ти твоея́ ри́за ко́жна, въ ню́ же обле́кся, умертви́лъ еси́, о́тче, страстна́я взыгра́нія, тѣ́мже и истни́лъ еси́ дебельство́ ко́жное.

Умертви́лъ еси́ по́хоть плотску́ю, бы́въ ча́до Бо́га на́шего, не роди́вся отъ по́хоти плотскíя, но сы́нъ бы́въ благода́тію. Тѣ́мже и прія́лъ еси́ жре́бій оте́ческій въ вѣ́чномъ Ца́рствѣ.

Ра́зумъ и у́мъ сво́й украси́лъ еси́ отъ ю́ности, стяжа́въ ста́рость Соломо́нову; оба́че всю́ сладостра́стную пи́щу отмета́лъ еси́, потща́вся стяжа́ти нестарѣ́ющую пи́щу трудо́мъ и болѣ́зньми свои́хъ подвиго́въ, блаже́нне.

Богоро́диченъ: Написа́ся пе́рстомъ Бо́жіе Сло́во въ Тебѣ́, Препѣ́тая, Безнача́льное, я́коже въ глави́знѣ кни́жнѣ. Тѣ́мже, припа́дая Ти́, молю́ Тя́: до́лгое рукописа́ніе мно́гихъ мои́хъ страсте́й изгла́ди изъ кни́ги живо́тныя.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Свяще́ніе сла́вное, и свяще́нное возложе́ніе, дне́сь Пречи́стая Дѣ́ва возложи́вшися въ хра́мъ Бо́жій, Всецарю́ на́шему Бо́гу еди́ному въ жили́ще соблюда́ется, я́ко вѣ́сть Са́мъ.

Добро́ту, Пречи́стая, души́ Твоея́ зря́ нѣ́когда, вѣ́рою Заха́рія возопи́: Ты́ еси́ избавле́ніе, Ты́ еси́ всѣ́хъ ра́дость, Ты́ еси́ воззва́ніе на́ше, Еюже Невмѣсти́мый вмѣще́нъ мнѣ́ яви́тся.

О, па́че ума́ чуде́съ Твои́хъ Всечи́стая! Стра́нное Твое́ рождество́ е́сть, стра́ненъ о́бразъ возраще́нія Твоего́, стра́нна и пресла́вна Твоя́ Богоневѣ́сто вся́, и человѣ́ки неска́занна.

Свѣ́щникъ многосвѣ́тлый су́щи, Богоневѣ́сто, дне́сь возсія́ла еси́ въ дому́ Госпо́дни, и озаря́еши ны́ честны́ми дарова́ніи Чи́стая, чуде́съ Твои́хъ Богоро́дице Всепѣ́тая.

Свято́му.

Ирмо́съ: Хода́тай Бо́га и человѣ́къ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.

Собла́знъ готовля́етъ тебѣ́ діа́волъ, полага́я претыка́нія души́ твое́й, и посла́ разбо́йники отгна́ти тя́ отъ ма́лыя хра́мины. Ты́ же, преблаже́нне о́тче, я́ко за Христа́ гони́мъ, ра́довашеся.

Завѣща́лъ еси́ души́ свое́й по гора́мъ превита́ти, я́ко птене́цъ го́рличищь, о́тче Іоанни́кіе, и ту́ научи́лся еси́ ви́дѣти Бо́га.

Науче́нъ зако́номъ Христо́вымъ не пещи́ся о пи́щи и о оде́жди, испо́лнилъ еси́ дѣ́ланіе пти́цъ небе́сныхъ, тѣ́мже, всели́вся въ ду́пленно дре́во, въ мно́гія дни́ пребы́лъ еси́ безъ кро́ва и пи́щи.

Напои́лъ еси́ зе́млю души́ твоея́ слеза́ми, блаже́нне, тѣ́мже и ненасѣ́янная земля́ препита́ тя, даю́щи тѣ́лу твоему́ ма́лое утѣше́ніе.

Не да́лъ еси́ сна́ свои́ма очи́ма, преподо́бне, ниже́ вѣ́ждома свои́ма дрема́нія, до́ндеже плотска́я уста́вилъ еси́ стремле́нія, и къ Свѣ́ту за́йде незаходи́мому, Влады́ку всѣ́хъ воспѣва́я.

Богоро́диченъ: Ру́чку злату́ю, и свѣ́щникъ, Дѣви́це, и трапе́зу дре́вле прообразова́ху нело́жно проро́ческая прорече́нія, быва́ющая по Бо́жію смотре́нію, во е́же бы Ты́ была́ Богороди́тельница Рождество́мъ Свои́мъ.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Вся́ческая нося́й глаго́ломъ, моли́тву пра́ведныхъ услы́ша, тѣ́мже непло́дныя разрѣши́лъ еси́ неду́гъ, я́ко Благоутро́бенъ, ра́дости Вино́вную си́мъ дарова́.

Сказа́ти хотя́ Госпо́дь язы́комъ Свое́ спасе́ніе, Неискусобра́чную ны́нѣ отъ человѣ́къ прія́тъ, примире́нія зна́меніе и обновле́нія.

Яко до́мъ су́щи благода́ти, въ не́мже сокро́вища лежа́тъ неизрече́ннаго Бо́жія строе́нія Всечи́стая, въ хра́мѣ причасти́лася еси́ нетлѣ́нныя сла́дости.

Вѣне́цъ Тя́ ца́рскій пріе́мъ хра́мъ Богоневѣ́сто, просвѣща́шеся, и подступа́ше лу́чшимъ, предрече́нныхъ зря́ на Тебѣ́ сбытіе́.

Инъ.

Ирмо́съ, [гла́съ 8]: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Пути́ мы́сленнаго лука́вства избѣ́глъ еси́ воздержа́ніемъ и моли́твою, любо́вію же и и́стиною. Тѣ́мже крѣ́плимъ жела́ніемъ и и́стиннымъ смире́ніемъ восхо́дъ ко Христу́ стяжа́лъ еси́, о́тче.

Не да́лъ еси́ сна́ свои́мъ очесе́мъ, до́ндеже показа́ся до́мъ Святы́я Тро́ицы и Прему́дрости сокро́вище.

Мíръ обогаща́я боже́ственными исцѣле́ньми, благоговѣ́ніемъ же къ Творцу́ я́вственнѣ прибли́жився къ вели́кому Свѣ́ту, содѣ́лался еси́ земны́й а́нгелъ и небе́сный человѣ́къ.

Богоро́диченъ: Марíе Пресвята́я, чи́стое дѣ́вства сокро́вище, очи́сти у́мъ мо́й, стра́стію омраче́нный, и испо́лни се́рдце мое́ Боже́ственною благода́тію, Всенепоро́чная.

Конда́къ, гла́съ 8. Подо́бенъ: Взбра́нной Воево́де.

Отъ ю́ности, богому́дре, возлюби́въ а́нгельское житіе́, вся́ кра́сная оста́вилъ еси́, за́йде бо, я́коже звѣзда́ отъ мíра, восте́къ къ разу́мному и пра́ведному со́лнцу, Христу́, отъ Него́ же пріе́мь благода́ть исцѣле́нія, разли́чныя неду́ги врачу́еши притека́ющихъ къ свяще́ннѣй ра́цѣ твое́й. Тѣ́мже и мы́, соверша́юще любо́вію всечестну́ю твою́ па́мять, вопіе́мъ ти́: ра́дуйся, о́тче Іоанни́кіе.

Икосъ:

Христо́въ услы́шавъ гла́съ, преподо́бне, ше́ствовалъ еси́ вслѣ́дъ за́повѣдей Его́, на́гъ жи́тель бы́въ, зане́ отрече́ся попече́нія о стяжа́ніи, па́че же отве́ржеся при́сныхъ и сро́дныхъ свои́хъ, еди́нъ въ пусты́ни бесѣ́дуя съ Бо́гомъ, съ Ни́мже соединя́яся бдѣ́ніемъ, посто́мъ и моли́твами, ра́зума дарова́ніе воспрія́лъ еси́. То́й же да́ръ и на́мъ ниспосли́, пою́щимъ ти́ си́це: ра́дуйся, о́тче Іоанни́кіе.

Синакса́рь преподо́бному отцу́ на́шему Іоанни́кію Дѣви́ческому.

Се́й святы́й и преподо́бный оте́цъ и пустынножи́тель на́шъ Іоанни́кій бы́лъ рожде́нъ въ Діокли́тіи, въ предѣ́лѣ Фости́нскомъ, въ помо́ріи Адріати́ческомъ. Роди́телей его́ имена́ невѣ́дома, оба́че вся́каго сомнѣ́нія кромѣ́ мо́гутъ счита́тися они́ къ ста́ду благочести́выхъ и правосла́вныхъ отъ се́рбскаго пле́мене. Еще́ ю́нъ сы́й Іоанни́кій, возлюби́ Бо́га и оса́мленная мѣ́ста и, оста́вивъ свое́ оте́чество, пріи́де на рѣ́ку Ибаръ и посели́ся въ пусто́мъ мѣ́стѣ, реко́момъ Че́рная Рѣка́, и ту́ подвиза́шеся я́ко стро́гій по́стникъ. Нѣ́цыи мона́си, слы́шавше о не́мъ, пріидо́ша къ нему́ въ пусты́ню и, прія́ти бы́вше, оста́ша ту́ ра́ди своего́ созида́нія, и увѣ́рившеся о свято́мъ и богоуго́дномъ житіи́ преподо́бнаго Іоанни́кія, зѣло́ прилѣжа́ша о свое́мъ духо́вномъ созрѣ́ніи, покаря́ющеся преподо́бному отъ всея́ души́ я́ко духо́вному отцу́ и нача́льнику своему́. Си́це проба́вившимъ и́мъ нѣ́кое вре́мя, пригласи́ преподо́бный Іоанни́кій бра́тію свою́ къ строе́нію хра́ма и монастыря́, е́же споспѣ́штвующу Бо́гу и Го́споду Іису́су Христу́, и доконча́ша. Егда́ же промче́ся слу́хъ о по́двизѣхъ благочести́выхъ и свято́мъ житіи́ преподо́бнаго Іоанни́кія, собира́хуся къ нему́ мно́зи бра́тства ра́ди и по́двига духо́внаго, и поели́ку нѣ́цыи отъ приходя́щихъ вельми́ превозноша́ху добро́ту житія́ его́, ра́внѣ же и попече́ніе его́ о все́мъ строе́ніи, о́нъ же я́ко ра́бъ и уго́дникъ Христо́въ негодова́ше зѣло́ о се́мъ. Того́ ра́ди до́брѣ наказа́въ духо́вная своя́ ча́да, и пре́давъ и́хъ благода́ти Бо́жіей, оста́ви свою́ оби́тель и пресели́ся въ Дѣви́ческую пусты́ню, идѣ́же обрѣ́тъ верте́пъ и исто́чникъ воды́ студены́, па́ки я́тся пе́рваго по́двига. И се́ ви́димъ па́ки въ дѣ́лѣ сло́во ева́нгельское: не мо́жетъ гра́дъ укры́тися верху́ горы́ стоя́, ниже́ поставля́ется свѣти́льникъ подъ спу́домъ, — зане́ слы́ша о не́мъ вели́кій Де́спотъ Гео́ргій, и́же Смедере́вѣ, и потща́ся къ нему́ со свои́ми домоча́дцы, прося́ чрезъ него́ отъ Бо́га исцѣле́нія дще́ри свое́й, отъ мно́гихъ лѣ́тъ неду́говавшей. И егда́ призрѣ́ Госпо́дь на рабы́ Своя́, и моли́твами преподо́бнаго здра́ву предста́ви дще́рь Де́спотову, се́й испо́лнь благодаре́нія и хвалы́ къ Бо́гу, созда́ ту́ це́рковь во и́мя Введе́нія [во хра́мъ] Пресвяты́я Богоро́дицы, украси́въ ю́ благолѣ́пно, и прида́въ еще́ влады́чественною гра́мматою мно́гія ве́си на содержа́ніе.

Преподо́бный стяжа́въ це́рковь, устро́и оби́тель, созва́ бла́тію къ себѣ́, попече́ся о благочи́ніи и́хъ, предходя́ о́бразомъ житія́ своего́. И та́ко испо́лнивъ лѣ́та дово́льна, и доше́дъ до глубо́кія ста́рости, оты́де къ Го́споду. Мо́щи его́ положе́ны въ це́ркви того́жде монастыря́, тре́хъ лакте́й во глубину́, чрезъ кото́рыя милосе́рдый Госпо́дь творя́ше мно́гія цѣльбы́ надъ приходя́щими съ вѣ́рою. Къ Нему́же припа́дающе, мо́лимся, да те́плыми моли́твами Своего́ уго́дника, поми́луетъ и сподо́битъ на́съ Ца́рствія во свѣ́тѣ святы́хъ Свои́хъ. Ами́нь.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Се́ дне́сь возсія́ конце́мъ весна́ ра́достная, просвѣща́ющи на́шу ду́шу и помышле́ніе и у́мъ благода́тію, торжество́мъ Богоро́дицы дне́сь та́инственно да учреди́мся.

Да дароно́сятъ дне́сь вся́ческая Цари́цѣ Ма́тери Бо́жіи, не́бо и земля́, и а́нгеловъ чи́ни, и человѣ́ковъ мно́жество, и да вопію́тъ: во хра́мъ вво́дится Ра́дость и Избавле́ніе.

Писа́ніе мимотече́, и оскудѣ́ зако́нъ я́коже сѣ́нь, и благода́ти лучи́ возсія́ша, въ хра́мъ Бо́жій вше́дшей Тебѣ́, Дѣ́во Ма́ти Чи́стая, въ не́мъ Благослове́нная.

Повину́ся Рождеству́ Твоему́, Всечи́стая, я́ко Творцу́ и Бо́гу, не́бо, и земля́ и преиспо́дняя, и вся́къ язы́къ земны́хъ исповѣ́даетъ, я́ко Госпо́дь яви́ся, Спа́съ ду́шъ на́шихъ.

Инъ.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Взя́лся еси́ къ высотѣ́ безстра́стія, уподо́бився а́нгеломъ, въ пло́ти сы́й, и, бы́въ прича́стникъ присносу́щнѣй пи́щи, взыва́лъ еси́, блаже́нне: благослове́нъ еси́, Бо́же оте́цъ на́шихъ.

Сія́я луча́ми богови́дными, разгна́лъ еси́ бѣсо́вскія нахо́ды и вѣ́рныя отъ озлобле́ній мно́гихъ изба́вилъ еси́, вопію́щихъ, преподо́бне: благослове́нъ еси́, Бо́же оте́цъ на́шихъ.

Святы́я свѣ́тлости, и жи́зни безконе́чныя, и ра́дости неизрече́нныя, и Ца́рствія небе́снаго сподо́бився, всеблаже́нне, посыла́еши освяще́ніе и избавле́ніе всѣ́мъ, вѣ́рою взыва́ющимъ: благослове́нъ еси́, Го́споди, Бо́же оте́цъ на́шихъ.

Богоро́диченъ: Се́ Дѣ́ва, Юже Ду́хомъ прови́де Иса́ія, заче́нши, роди́ Спа́са и Изба́вителя на́мъ, пою́щимъ: благослове́нъ еси́, Го́споди, Бо́же оте́цъ на́шихъ.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дично спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Пречи́стый хра́мъ въ до́мъ Бо́жій приводя́щи Анна иногда́, вопію́щи съ вѣ́рою, рече́ свяще́ннику: Ча́до отъ Бо́га да́нное мнѣ́, пріи́мъ ны́нѣ, введи́ во хра́мъ Зижди́теля твоего́ и, ра́дуяся, по́й Ему́: благослови́те вся́ дѣла́ Госпо́дня Го́спода.

Заха́рія, иногда́ Ду́хомъ ви́дѣвъ, рече́ Аннѣ: Жи́зни Ма́терь вво́диши Истинную, Юже свѣ́тло проро́цы Бо́жіи Богоро́дицу проповѣ́даша, и ка́ко хра́мъ вмѣсти́тъ Ю? Тѣ́мъ, чудя́ся, вопію́: благослови́те вся́ дѣла́ Госпо́дня Го́спода.

Зако́нное вои́стинну дѣ́ло е́сть, свяще́нникъ рече́ е́й, стра́нну же весьма́ ве́щь поразумѣва́ю, зря́ Приводи́мую въ до́мъ Бо́жій, пресла́вную превосходя́щую свята́я благода́тію, Тѣ́мъ и ра́дуяся вопію́: благослови́те вся́ дѣла́ Госпо́дня Го́спода.

Инъ.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Недрема́нну душе́вную свѣщу́ ма́сломъ подвиго́въ твои́хъ сохрани́въ, ра́достно вше́лъ еси́ къ нетлѣ́нному Жениху́, идѣ́же вѣ́чно живе́ши, вопія́: вся́ дѣла́, благослови́те, по́йте Го́спода.

Окормле́ніемъ Свята́го Ду́ха преплы́въ мо́ре искуше́ній немо́кренно, преподо́бне, дости́глъ еси́ тишину́ Ца́рствія небе́снаго, потопи́въ неви́димыя враги́ сле́зными струя́ми, отону́дуже источа́еши цѣльбы́ приходя́щимъ и вопію́щимъ: благослови́те, вся́ дѣла́ Госпо́дня, Го́спода.

Ны́нѣ дерзнове́ніе имѣ́я, я́ко Бо́гу предстоя́ и злоко́зненныя бѣ́сы побѣди́въ, сотвори́ моли́тву о на́съ ко Го́споду, я́ко да изба́вимся собла́зновъ діа́вольскихъ и вѣ́чныхъ избу́демъ му́къ, вѣ́рою зову́ще: благослови́те, вся́ дѣла́ Госпо́дня, Го́спода.

Богоро́диченъ: Умерщвле́нную ду́шу мою́ оживи́, па́дшую возста́ви, уя́звленную исцѣли́, у́мъ мо́й умири́, волне́нія искуше́ній, Дѣ́во, укроти́ и спаси́ вопію́щія: благослови́те, дѣла́ Госпо́дня, Го́спода.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Свѣтоно́сный о́блакъ, въ о́нь же всѣ́хъ Влады́ка, я́ко до́ждь съ небесе́ на руно́ сни́де, и воплоти́ся на́съ ра́ди, бы́въ Человѣ́къ безнача́льный, велича́емъ вси́, я́ко Ма́терь Бо́га на́шего Чи́стую.

Изъ пра́ведныхъ произы́де Іоаки́ма и Анны, обѣща́нія пло́дъ — Богоотрокови́ца Марíя, и, я́ко кади́ло прія́тное, пло́тію младе́нствующи, приво́дится во святи́лище свято́е, я́ко во свята́я святы́хъ обита́ти.

Младе́нствующи естество́мъ, и па́че естества́ я́вльшуся Ма́терь Бо́жію, восхва́лимъ пѣ́сньми: въ хра́мъ бо зако́нный Го́споду дне́сь приво́дится въ воню́ благово́нія пра́ведныхъ, я́ко пло́дъ духо́вный.

Инъ.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Христо́ви соца́рствовати вы́ну сподо́бился еси́ на небесѣ́хъ, равноа́нгельное житіе́ на земли́ пожи́въ, моли́ся Творцу́ и Влады́цѣ со дерзнове́ніемъ о всѣ́хъ, вѣ́рою соверша́ющихъ всечестну́ю па́мять твою́.

Въ земли́ положе́нныя твоя́ свяще́нныя мо́щи освяща́ются, стяжа́вши Боже́ственную благода́ть, е́юже то́чатъ исцѣле́нія, стра́сти душе́вныя исцѣля́ютъ и отъ вредоно́сныхъ я́звъ бѣсо́вскихъ свобожда́ютъ.

Боже́ственными добро́тами, о́тче, обложе́нъ, святы́мъ житіе́мъ обожи́лся еси́ и, просвѣще́нъ, предстоя́ вели́кому Свѣ́ту, помина́й приближа́ющихся тебѣ́, чту́щихъ тя́ вѣ́рно и па́мять твою́ вѣ́рно соверша́ющихъ.

Богоро́диченъ: Пречи́стая Богоро́дице, я́же Бо́га несказа́нно заче́нши и ро́ждши пло́тію на спасе́ніе всему́ мíру, Того́ моли́, Преблага́я, умири́ти мíръ и спасти́ ду́ши на́ша.

Свѣти́ленъ:

Добродѣ́тели крило́ма на небеса́ возлетѣ́въ, прибли́жився же Трисо́лнечному Свѣ́ту, со а́нгелы воспѣва́еши Трисвяту́ю пѣ́снь, съ ни́миже всѣ́хъ на́съ помина́й, почита́ющихъ па́мять твою́. [Два́жды.]

[Сла́ва, и ны́нѣ,] богоро́диченъ:

Юже дре́вле проповѣ́даша проро́чески ли́цы, апо́столи научи́ша, Дѣ́ву по рождествѣ́, му́ченицы исповѣ́даша и́стинную Богоро́дицу, Ту́южде и мы́ согла́сно воспои́мъ и велича́емъ я́ко Ма́терь Бо́жію и съ Гавріи́ломъ зове́мъ къ Не́й: ра́дуйся, Ма́ти Госпо́дня, христіа́номъ Засту́пнице.

На хвали́техъ стихи́ры на 4, гла́съ 1. Подо́бенъ: Небе́сныхъ чино́въ.

Презира́тель до́льнихъ и пресе́льникъ, рачи́тель вы́шнихъ и пусты́нный граждани́нъ, Іоанни́кій богому́дрый всѣ́мъ на́мъ пра́здновати повелѣва́етъ е́же къ Бо́гу отше́ствіе его́, тѣ́мже и твори́мъ сіе́, науча́еміи отъ Ду́ха Свята́го. [Два́жды.]

Мíръ добродѣ́телей бы́въ во пло́ти, о́тче богому́дре, житіе́мъ свои́мъ на земли́ просла́вилъ еси́ Го́спода сла́вы, Иже тя́ по достоя́нію просла́ви, еси́ бо исто́чникъ цѣле́бный си́лою Его́, Іоанни́кіе преподо́бне.

Вѣ́дяще тя́ смире́нна, незло́бива, кро́тка, про́ста, молчали́ва, прославля́емъ я́ко вои́стинну па́че человѣ́ка, о́тче, я́ко невеще́ственна, я́ко хра́мъ Бо́жій, отъ Него́же прибы́вшая ти́ дарова́нія ми́лостивно подава́й на́мъ.

Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мже на небеси́ обрѣ́лъ еси́ полки́ и а́нгельскія дости́глъ еси́ чи́ны, и́хже житію́ непоро́чно поревнова́въ, и́маши дерзнове́ніе моли́тися Влады́цѣ, ми́ръ испроси́ душа́мъ на́шимъ.

И ны́нѣ, богоро́диченъ:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловатися душа́мъ на́шимъ.

Та́же славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна отъ кано́на свято́му, пѣ́снь 3-я и 6-я. Проки́менъ, гла́съ 7: Восхва́лятся преподо́бніи во сла́вѣ* и возра́дуются на ло́жахъ свои́хъ. [Сти́хъ: Воспо́йте Го́сподеви пѣ́снь но́ву, я́ко ди́вна сотвори́ Госпо́дь]. Апо́столъ ко Евре́емъ, зача́ло 335. Аллилу́ія, гла́съ 2: Свяще́нницы Твои́, Го́споди, облеку́тся въ пра́вду, и преподо́бніи Твои́ возра́дуются. [Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ]. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Кни́га Се́рблякъ, содержа́щая въ себѣ́ богослуже́бная моле́бная пра́вила святы́мъ се́рбскаго ро́да. — Бѣ́лградъ, 1861. — Л. 77 об. – 84.

/ Къ оглавленію раздѣла /


Наверхъ / Къ титульной страницѣ

0