Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія, во 2-й де́нь.
Па́мять и́же во святы́хъ, блаже́ннаго, млада́го царя́, Уроша и му́ченика.

НА МАЛѢЙ ВЕЧЕРНИ,
[На Господи воззвахъ:] стихи́ры [на 4], гла́съ 1. Подо́бенъ: Небе́сныхъ чино́въ.

Зако́нно вѣнча́нъ бы́лъ еси́, му́чениче,* стражда́ сего́ свѣ́та лише́ніе,* Уроше всече́стне и преблаже́нне,* не оскудѣ́й, моля́ся о на́съ ко Го́споду,* и сро́дство твое́ назира́й,* творя́щее святу́ю па́мять твою́.

Отъ ли́ка избра́нъ бы́лъ, му́чениче,* ра́дость подава́еши на́мъ дне́сь видѣ́ніемъ честны́хъ моще́й твои́хъ,* и веселя́щеся, торжеству́емъ:* страстоте́рпче, моли́ся о на́съ,* творя́щихъ святу́ю твою́ па́мять.

Мѵ́рныя во́ни и благоуха́нія пролива́еши,* вселе́нная же, да́ръ воспріе́мши мощми́ твои́ми,* Уроше всече́стне, и превожделѣ́нне,* возлетѣ́ къ любви́ Христо́вой, прехва́льне,* и ны́нѣ моли́ся о на́съ,* творя́щихъ па́мять твою́.

Основа́ніе боже́ственное* истка́но отъ вы́шнія Прему́дрости,* тве́рдости твоея́ у́мъ не поколеба́,* ни убіе́нія убíйственнаго убоя́ся,* еди́ну вѣ́ру къ Бо́гу имѣ́я,* и Тому́ предстои́ши во сла́вѣ.

Сла́ва, гла́съ 5:

Дне́сь весна́ благоуха́етъ явле́ніемъ моще́й твои́хъ, и но́ва тва́рь лику́етъ, и ра́дуется зря́щи дне́сь чу́до пресла́вное, ли́цы, пою́ще, удивля́хуся, весе́ліе неизрече́нное показу́юще, Уроше всече́стне и превожделѣ́нне. Си́лѣ Твое́й сла́ва, Человѣколю́бче.

И ны́нѣ, богоро́диченъ.

Обра́дованная, хода́тайствуй Твои́ми моли́твами, и испроси́ душа́мъ на́шимъ мно́жество щедро́тъ, и очище́ніе мно́гихъ прегрѣше́ній, мо́лимся.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Хвала́ми вѣнча́имъ,* му́ченика Уроша,* его́же вѣнча́, Бо́жія благода́ть,* боже́ственными моли́твами,* низложи́ враги́ на́ша.

Сти́хъ: Пра́ведникъ, я́ко фи́никсъ процвѣте́тъ,* [я́ко ке́дръ, и́же въ Лива́нѣ, умно́жится].

На столпѣ́хъ му́ченическихъ водворя́ешися,* я́ко до́бръ во́инъ,* обрѣ́тся на земли́,* и возлетѣ́лъ еси́* къ Вы́шнему престо́лу.

Сти́хъ: Насажде́ни въ дому́ Госпо́дни,* во дво́рѣхъ [Бо́га на́шего процвѣту́тъ].

До́ма земна́го* лиши́лся еси́,* до́мъ Небе́сный наслѣ́довалъ еси́,* му́чениче блаже́нне,* Уроше сла́вне.

Сла́ва, гла́съ и подо́бенъ то́йже:

Му́чениче Уроше,* многострада́льне,* моли́твами твои́хъ прароди́телей,* у́мъ на́шъ озари́,* воспѣ́ти сла́ву твою́.

И ны́нѣ, богоро́диченъ:

Две́ри небе́сныя* возми́теся,* зря́ще две́рь Вы́шняго,* свѣ́тлыми заря́ми* озаря́ющи Влады́чицу.

Тропа́рь свята́го, гла́съ 3:

Юношески процвѣ́лъ еси́ во оте́чествіи твое́мъ добро́тою украше́нъ, и непра́ведную и безвре́менную сме́рть подъя́лъ еси́, Уроше всече́стне; ца́рскаго ко́рене пло́дъ сла́докъ, а́ще и не во вре́мя созрѣ́въ, въ Госпо́дню жи́тницу всели́лся еси́, и жа́лость ве́лію сро́дству твоему́ оста́вилъ еси́. Моли́ся о на́съ, творя́щихъ святу́ю па́мять твою́.

Сла́ва, и ны́нѣ, богоро́диченъ.



НА ВЕЛИЦѢЙ ВЕЧЕРНИ,
Блаже́нъ му́жъ, 1-й антифо́нъ. На Го́споди воззва́хъ: стихи́ры, на 8, гла́съ 4. Подо́бенъ: Зва́нный свы́ше.

Свѣ́тлая дне́сь па́мять наста́,* Се́рбское украше́ніе,* объявле́ніемъ честны́хъ моще́й твои́хъ,* на просвѣще́ніе и похвалу́ сро́дства твоего́,* Уроше всеблаже́нне,* да́ры добродѣ́тельными обогати́лся еси́,* моли́ся о на́съ ко Го́споду,* творя́щихъ па́мять твою́. [Два́жды.]

Струю́ исцѣле́ній источа́еши* приходя́щимъ съ вѣ́рою,* и подае́ши дарова́нія прося́щимъ у тебе́,* хода́тайствомъ прароди́телей твои́хъ.* Не оскудѣ́й, моля́ся ко Го́споду,* о творя́щихъ святу́ю па́мять твою. [Два́жды.]

Аще и за́вистію убіе́нъ бы́лъ еси́* отъ твои́хъ при́сныхъ,* но при́сно въ раи́ водворя́ешися* съ прароди́тели твои́ми.* Аще и непра́ведную сме́рть подъя́лъ еси́,* но ликовству́еши со святы́ми,* убíйцы же твои́ вско́рѣ погибо́ша. [Два́жды.]

Еще́ не во вре́мя созрѣ́въ,* въ Госпо́дню жи́тницу всели́лся еси́,* и ско́рбь ве́лію оста́вивъ сро́дству твоему́,* невѣ́дущу о сме́рти твое́й;* на лови́тву исхо́диши* и та́мо убíйственну я́зву подъя́лъ еси́,* многострада́льне, Уроше. [Два́жды.]

Сла́ва, гла́съ 3:

Во свѣ́тлости святы́хъ добродѣ́телей просія́лъ еси́, свѣтлѣ́яся я́ко со́лнце, и осіява́я всѣ́хъ пра́веднымъ сія́ніемъ. Дне́сь ра́дуются вся́ оте́чествія язы́къ Се́рбскаго сро́дства, моще́й твои́хъ явле́ніемъ: всю́ду испо́лнилъ еси́ благоуха́нія и просвѣти́лъ еси́ твое́ оте́чество вся́кими добро́тами, манове́ніемъ Бо́жія Ду́ха, вся́ воспріе́мъ, многострада́льне Уроше. Моли́ся о на́съ, чту́щихъ святу́ю па́мять твою́.

И ны́нѣ, богоро́диченъ: Ка́ко не диви́мся...
Вхо́дъ, проки́менъ дне́, и чте́нія три́.

На литíи стихи́ра хра́ма и свята́го, гла́съ 1:

Ве́село дне́сь Це́рковь Бо́жія одѣва́ется, явле́ніемъ моще́й твои́хъ, Се́рбская земля́ красу́ется въ боже́ственнѣй па́мяти твое́й, убíйцы же твои́, студа́ испо́лнени, посрами́шася, ты́ же въ пи́щи ра́йстѣй водворя́ешися, Уроше всеблаже́нне.

Прароди́теліе твои́ мольбу́ творя́тъ ко Го́споду, напослѣ́докъ обнови́ти сро́дство свое́, въ похвалу́ и просвѣще́ніе, и на обличе́ніе убíйцамъ твои́мъ, тебѣ́ же на сла́ву и похвалу́, Уроше преблаже́нне, моли́ся спасти́ся душа́мъ на́шимъ.

Стезе́ю тѣ́сною ше́ствовавъ, рая́ широту́ дости́глъ еси́, и сро́дство твое́ просвѣти́лъ еси́, чуде́сными дѣ́лы осія́нъ, всю́ подсо́лнечную обогати́лъ еси́, да́ръ исцѣле́нія пріе́мъ, Уроше достоблаже́нне.

Аще и безвре́мену сме́рть подъя́лъ еси́, за́вистію ратобо́рца убива́емъ непови́нно. О, непра́веднаго убíйства! Но они́ у́бо су́ть во тмѣ́ и мра́цѣ, ты́ же съ прароди́тели во Ца́рствіи водворя́ешися, достоблаже́нне.

Ны́нѣ дне́сь свѣти́ло вели́кое яви́ся Се́рбскому ро́ду: Це́рковь бо, коне́чнѣ запустѣ́вшая, па́ки Бо́жіимъ манове́ніемъ, обновля́ется на похвалу́ твою́, преблаже́нне Уроше. Моли́ся о на́съ, творя́щихъ святу́ю па́мять твою́.

Сла́ва, гла́съ 5:

Красу́йся и лику́й ве́село, Це́ркви Бо́жія, въ да́ры бо тебѣ́ ца́рь Урошъ прино́сится, объявле́ніемъ честны́хъ моще́й свои́хъ. Ли́къ а́нгельскій весели́тся. Съ ни́миже моли́ся непреста́нно Христу́ за ны́, изба́вити отъ бѣ́дъ, творя́щія пречестно́е и свѣтоно́сное твое́ и́мя, многострада́льне Уроше преблаже́нне.

И ны́нѣ, богоро́диченъ:

Ра́дуйся Ма́ти Христа́ Бо́га, и Его́же родила́ еси́, моли́ согрѣше́ній оставле́ніе дарова́ти вѣ́рою воспѣва́ющимъ Тя́.

На стихо́внѣ стихи́ры, гла́съ 2. Подо́бенъ: Егда́ отъ дре́ва.

Съ премíрными чи́нми ны́нѣ водворя́яся,* съ небесе́ пріе́мъ богоразу́міе,* моле́бныя гла́сы тебѣ́ возсыла́емъ:* подви́гни сро́дство твое́,* и за ны́ моли́ся при́сно ко Го́споду,* сохрани́ти на́съ,* Уроше достоблаже́нне.

Сти́хъ: Пра́ведникъ, я́ко фи́никсъ процвѣте́тъ,* [я́ко ке́дръ, и́же въ Лива́нѣ, умно́жится].

Богоразу́мія свѣ́тлостію сія́я,* мíра красоту́ презрѣ́лъ еси́,* Авраа́ма въ ло́нѣ почива́еши.* Не пре́зри на́съ, моля́щихся тебѣ́,* многострада́льне и приснопа́мятне* Уроше всече́стне.

Сти́хъ: Насажде́ни въ дому́ Госпо́дни,* во дво́рѣхъ Бо́га на́шего [процвѣту́тъ].

Истиннымъ вѣнце́мъ, вѣнча́вшимъ тя́,* и ца́рскою діади́мою одѣва́яся,* вѣне́цъ добро́ты прія́лъ еси́, досточу́дне,* не пре́зри, блаже́нне,* пѣвцы́ твоя́, почита́ющія тя́,* предстоя́ со а́нгелы во сла́вѣ.

Сла́ва, гла́съ 6:

Мы́сленныма очи́ма зря́ чуде́снѣ, а́нгеломъ соприча́стникъ бы́лъ еси́; просвѣща́еши вся́, приходя́щія съ вѣ́рою къ ра́цѣ твое́й честнѣ́й, и ревну́еши прароди́телемъ твои́мъ; изря́денъ въ све́рстницѣхъ яви́вся, добродѣ́телію и ра́зумомъ всѣ́хъ удиви́лъ еси́, многострада́льне Уроше превожделѣ́нне, моли́ся спасти́ся душа́мъ на́шимъ.

И ны́нѣ, богоро́диченъ:

Ма́тернее дерзнове́ніе, е́же къ Сы́ну Твоему́ иму́щи Пречи́стая, къ рожде́нію по́мощи, на́ша мольбы́ не пре́зри мо́лимъ Тя́, я́ко Тебе́ еди́ну ко Влады́цѣ очище́ніе и́мамы.

На благослове́ніи хлѣ́бовъ: Тропа́рь, гла́съ 3:

Юношески процвѣ́лъ еси́ во оте́чествіи твое́мъ добро́тою украше́нъ, и непра́ведную и безвре́менную сме́рть подъя́лъ еси́, Уроше всече́стне; ца́рскаго ко́рене пло́дъ сла́докъ, а́ще и не во вре́мя созрѣ́въ, въ Госпо́дню жи́тницу всели́лся еси́, и жа́лость ве́лію сро́дству твоему́ оста́вилъ еси́. Моли́ся о на́съ, творя́щихъ святу́ю па́мять твою́. [Дважды.]

И Богоро́дице Дѣ́во... [Еди́ножды.]



НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ: Тя́ хода́тайствовавшую...

По 1-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.

Мы́сленныма очи́ма, прозрѣ́въ бу́дущая, совѣ́томъ ма́тернимъ пожи́лъ еси́, и це́ркви воздви́глъ еси́ въ похвалу́ прароди́телей твои́хъ и въ сла́ву Пречи́стыя Богома́тере, Ея́же моли́твами, Христе́, поми́луй на́съ. [Два́жды.]

Сла́ва, и ны́нѣ, богоро́диченъ:

Ту́чами Ду́ха Свята́го, Пречи́стая, мою́ мы́сль ороси́, я́же Ка́плю ро́ждши безмѣ́рную — Христа́; изсуши́ исто́чникъ страсте́й мои́хъ, и пото́ка пи́щи мя́ напо́й моли́твою Твое́ю.

По 2-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства.

Красе́нъ бы́въ во видѣ́ніи въ животѣ́ твое́мъ, краснѣ́йшій же показа́лся еси́ по сме́рти твое́й, объявле́ніемъ честны́хъ моще́й твои́хъ, и всѣ́хъ зря́щихъ удиви́лъ еси́, многострада́льне Уроше всеблаже́нне. [Два́жды.]

Сла́ва, и ны́нѣ, богоро́диченъ:

Подъ земле́ю низве́рженъ бы́хъ грѣхми́, умертви́хся душе́вными страстми́ и тѣле́сными, тѣ́мже тмо́ю покрыва́юся отча́янія. Но воздви́гни мя́ ны́нѣ къ покая́нію, и спаси́ мя: мо́жеши бо, ели́ка хо́щеши.

По поліеле́и сѣда́ленъ, гла́съ 8. Подо́бенъ: Прему́дрости.

Егда́ тя сего́ свѣ́та лише́нію преда́ша, отнесе́ну бы́вшу тѣ́лу твоему́ во хра́мъ, Успе́нія Пречи́стыя, испря́товаютъ та́йно въ гробни́цѣ вну́трь, идѣ́же Боже́ственная соверша́ются, и никому́ о се́мъ вѣ́домо бы́сть, то́чію оби́тели предста́телю, до́ндеже Бо́гу, объявле́нна тя́ сотво́ршу. Убíйцы же твои́, студа́ испо́лнени, вско́рѣ сконча́шася. Ты́ же въ ра́йстѣй пи́щи водворя́ешися, многострада́льне Уроше и всеблаже́нне, моли́ Христа́ Бо́га грѣхо́въ оставле́ніе пода́ти, чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко во глубину́ мно́гихъ согрѣше́ній впадо́хъ, отъ лѣ́ности моея́, и уны́нія, окая́нный, и невѣ́дѣнія, и отча́яніемъ ны́нѣ одержи́мъ е́смь. Бу́ди ми́ по́мощь, и очище́ніе, и спасе́ніе, Пречи́стая, и утѣше́ніе благопремѣ́нно подаю́щи ми́, Тя́ молю́, и Тебѣ́ ми́лся дѣ́ю, и припа́даю, и вѣ́рою зову́ Ти, да не явлю́ся до конца́ льсти́вому обра́дованіе.

Степе́нна, 1-й антифо́нъ, 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Луки́, зача́ло 106: Рече́ Госпо́дь Свои́мъ ученико́мъ: внемли́теся отъ человѣ́къ, возложа́тъ на вы́ ру́ки...

По 50-мъ псалмѣ́ стихи́ра, гла́съ 6:

Урошъ ди́вный, Боже́ственныя тишины́ жела́я, за́вистію лише́нъ свѣ́та сего́ быва́етъ, и безвре́менную сме́рть пріе́млетъ, вѣнце́мъ добродѣ́телей увязе́ся, и съ премíрными ли́ки ра́дуется, и дерзнове́нно предстои́тъ Влады́цѣ, со преподо́бнымъ Симео́номъ и Са́ввою преосвяще́ннымъ, я́ко хода́таи при́сніи и моли́твенницы о душа́хъ на́шихъ.

Кано́нъ Богоро́дицы со ирмосо́мъ на 6, и свята́го Уроша на 8.

Кано́нъ му́ченика, гла́съ 4, его́же краегране́сіе: Паи́сій недосто́йный, пою́ тя, блаже́нне Уроше.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Пе́рвѣе грѣхо́внымъ не приобщи́вся жела́ніемъ, зла́та честнѣ́йшій показа́лся еси́, я́ко отъ ко́рене благоро́дна изра́слъ еси́ блаже́нне.

Аще и гони́тель тво́й бы́сть Волкаши́нъ, но ра́венъ произше́лъ еси́ роди́телемъ твои́мъ, дѣ́лы и словесы́ подо́бяся, и я́коже звѣзда́, просія́лъ еси́, блаже́нне.

Иже зако́нную сѣ́нь премину́въ, Уроше, къ ше́ствію небе́сному возше́лъ еси́, ра́дуяся, и Тро́ицѣ предстои́ши, сего́ ра́ди блажи́мъ па́мять твою́.

Богоро́диченъ: Агницу Тя́ посредѣ́ те́рнія обрѣ́тъ, не вла́емое Приста́нище и къ Бо́гу Руководи́тельницу крѣ́пкую, Ма́ти Дѣ́во Влады́чице.

Катава́сія: Христо́съ ражда́ется, сла́вите...

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Сѣ́мене благоро́днаго цвѣ́тъ прекра́сенъ показа́лся еси́ напослѣ́докъ явле́ніемъ честны́хъ моще́й твои́хъ, въ похвалу́ сро́дству твоему́, всеблаже́нне Уроше.

Еще отъ рожде́нія блага́я о́трасль показа́лся еси́, всѣ́ми ви́ды добродѣ́телію, ревну́я прароди́телемъ твои́мъ, це́ркви воздвиза́я, и и́нны потвержда́я.

Изъ нача́ла о Бо́зѣ пѣва́емыя пѣ́сни, всю́ду прослу́ся и́мя твое́ явле́ніемъ честны́хъ моще́й твои́хъ, многострада́льне Уроше всему́дре, назира́й на́съ.

Богоро́диченъ: Ра́дуйся, Чи́стая Дѣ́во, и не забу́ди на́съ, моля́щихтися, въ ту́зѣ су́щихъ и ско́рбехъ, Твою́ ми́лость изле́й на на́съ, мо́лимтися, Влады́чице.

Сѣда́ленъ, гла́съ 8. Подо́бенъ: Прему́дрости.

Прему́дре, досто́инъ бы́лъ еси́ и́менемъ и дѣ́ломъ, роди́телемъ твои́мъ подо́бяся, и сро́дству твоему́ обновле́ніе твори́ши, Бо́гу просла́вльшу тя́ въ животѣ́, Иже и по сме́рти просла́вилъ тя́ е́сть въ похвалу́ сро́дству твоему́, многострада́льне и преблаже́не Уроше всече́стне, моли́ Христа́ Бо́га, грѣхо́въ оставле́ніе пода́ти, чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, всесвяту́ю го́ру, свѣтоза́рный о́блакъ воспои́мъ, небе́сную лѣ́ствицу, слове́сный ра́й, Евино избавле́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíрови и оставле́ніе дре́внихъ согрѣше́ній. Сего́ ра́ди вопіе́мъ Ти́: моли́ Сы́на Твоего́ и Бо́га прегрѣше́ній оставле́ніе дарова́ти, благоче́стно покланя́ющеся Пресвято́му Рождеству́ Твоему́.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Неизглаго́ланная твоя́ чудодѣ́йствія, я́же напослѣ́докъ показа́шася, Уроше всему́дре, не забу́ди сро́дства твоего́ и поми́луй на́съ, моля́щихтися.

Еже отъ нача́ла Безнача́льному Сло́ву вѣ́ровалъ еси́ и роди́телю единоро́денъ бы́лъ еси́, и ца́рскою діади́мою украша́ютъ тя́ въ сла́ву и похвалу́ сро́дству твоему́.

Добродѣ́тели твоя́ и красоту́ кто́ изрещи́ мо́жетъ? Удиви́лъ бо еси́ всѣ́хъ, приходя́щихъ къ ра́цѣ моще́й твои́хъ, ра́зумомъ превосходя́ мно́гія.

Богоро́диченъ: Хвалы́ моле́бныя къ Тебѣ́ воспуща́ю, Пречи́стая Влады́чице, не забу́ди на́съ, но моли́ся о на́съ къ Ро́ждшемуся изъ Тебе́, да спасе́тъ Тебе́ ра́ди ду́ши на́ша.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

О, непра́ведныя сме́рти и безвре́менныя, ю́же подъя́лъ еси́ Уроше всече́стне! Превы́шше бо въ ра́дости пребыва́еши съ ли́ки избра́нными.

Стезе́ю оте́ческою ше́ствовалъ еси́ всеизря́дною, чудесы́ удиви́лъ еси́ сро́дство твое́, ра́ка же твоя́ исцѣле́нія подава́етъ, Уроше блаже́нне.

Твоя́ па́мять дне́сь весе́лія всѣ́хъ исполня́етъ, и́же, удивля́ющеся, глаго́лютъ: сла́ва благоутро́бію Твоему́, Христе́ Царю́, да́вшему на́мъ сіе́ украше́ніе.

Богоро́диченъ: Ты́ еси́ всѣ́мъ Помо́щница, и и́стинная христіа́номъ Засту́пница, и Покрови́тельница, и спасе́ніе ду́шъ на́шихъ.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Отъ о́трасли благоро́дныя просія́лъ еси́, му́дростію и ра́зумомъ всѣ́хъ превозше́лъ еси́, и безвре́менную сме́рть подъе́мъ, вѣнце́мъ му́ченическимъ вѣнча́лся еси́, сла́вне.

Твои́мъ явле́ніемъ Се́рбская о́бласть ра́дуется, и сро́дство твое́ напослѣ́докъ твои́мъ явле́ніемъ просвѣти́лъ еси́, не забу́ди и на́съ, моля́щихся тебѣ́.

На спасе́нную стезю́ наста́ви на́съ ходи́ти при́сно, и почита́ти тя́, и па́мять твою́ соверша́ти, и богоуго́дно пожи́ти въ честнѣ́мъ хра́мѣ твое́мъ.

Богоро́диченъ: Пречи́стая Дѣ́во Ма́ти Іису́съ Христо́ва, поми́луй и спаси́ и́же вѣ́рою къ Тебѣ́ прибѣга́ющія, я́ко на Тя́ съ Бо́гомъ упова́ніе и́мамы.

Конда́къ, гла́съ 6. Подо́бенъ: Рукопи́саннаго.

Отрасли благоро́дныя цвѣ́тъ прекра́сный яви́лся еси́, Уроше всече́стне, за́вистію бо убіе́нъ бы́лъ еси́ отъ твои́хъ при́сныхъ, Бо́жіимъ же Ду́хомъ просвѣще́нъ, святоро́днаго пле́мене, свя́тъ бы́лъ еси́, и му́ченическимъ вѣнце́мъ увя́зся, въ черто́зѣ Небе́снѣмъ водворя́ешися. Моли́ся о на́съ, свя́те, творя́щихъ любо́вію па́мять твою́.

Икосъ:

Кто досто́инъ устнѣ́ отве́рзсти или́ язы́къ дви́гнути и похвали́ти, хвали́маго Бо́гомъ, оба́че въ толи́ко вре́мя въ тимѣ́ніи земно́мъ пребы́въ, отъ Христа́ Спа́са вѣне́цъ прія́лъ е́сть, и дарова́ньми исцѣле́ній обогати́вся, исцѣле́нія да́ръ прія́тъ, и че́стенъ страда́лецъ показа́ся, принося́ моле́ніе Благодѣ́телю, и пріе́мъ сла́ву съ небесе́ и вѣне́цъ добро́ты, и мо́лится о творя́щихъ любо́вію па́мять его́.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Твою́ оби́тель вску́ю забы́лъ еси́? Воспряни́ у́бо, си́лою прароди́тель твои́хъ и испроси́ отъ Го́спода по́мощь и заступле́ніе твое́й оби́тели, я́ко да пое́мъ: оте́цъ на́шихъ Бо́же, благослове́нъ еси́.

Почита́ю мо́щи твоя́, и покланя́юся: исцѣле́ніе бо подае́ши вѣ́рою приходя́щимъ. Пода́ждь и на́мъ ми́рное житіе́ во оби́тели твое́й, пою́щимъ: оте́цъ на́шихъ Бо́же благослове́нъ еси́.

Отрокъ бы́лъ еси́, небе́снаго жили́ща хода́тай, вся́кими бо добро́тами украше́нъ, убíйственною я́звою измѣни́лъ еси́ живо́тъ тво́й, они́ у́бо студа́ испо́лнишася, ты́ же вопіе́ши: оте́цъ на́шихъ Бо́же, благослове́нъ еси́.

Богоро́диченъ: Свѣ́тлыми заря́ми всю́ зе́млю, возсія́вшее Со́лнце отъ свята́го чре́ва твоего́ озаря́етъ, Влады́чице, и́мже и на́съ просвѣти́ Твое́ю ми́лостію, вопію́щихъ: препѣ́тый отце́въ Госпо́дь и Бо́гъ, благослове́нъ еси́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Юношески пожи́въ во оте́чествіи твое́мъ, и блажи́тъ тя́ сро́дство твое́, и весе́ліемъ ра́дуется твоему́ объявле́нію, дивя́ся, глаго́летъ: Го́спода по́йте, дѣла́, и превозноси́те Его́ во вся́ вѣ́ки.

Треплете́нный воспрія́лъ еси́ вѣне́цъ отъ Вы́шняго Дарода́теля, изря́денъ бы́въ твое́й оби́тели и це́рковь просвѣти́въ мощми́ твои́ми, вопія́: Го́спода по́йте дѣла́, и превозноси́те Его́ во вся́ вѣ́ки.

Естество́ премени́въ тлѣ́нное, въ вѣ́чныя оби́тели вше́лъ еси́, блаже́нне, и житію́ пресвято́му послѣ́довалъ еси́ прароди́телей твои́хъ, вопія́: Го́спода по́йте, дѣла́, и превозноси́те Его́ во вся́ вѣ́ки.

Богоро́диченъ: Коне́цъ благíй пода́ти ми́, Дѣ́во, Го́спода умоли́, да избу́ду ожида́ющихъ мя́ вѣ́чныхъ му́къ, я́ко да Тя́ пою́, Благослове́нная, во вся́ вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Боже́ственное селе́ніе ты́ бы́лъ еси́, пресвѣ́тло просвѣти́вся, Уроше всеблаже́нне, сро́дство твое́ назира́й и отъ неду́гъ и бѣ́дъ избавля́й, да тя́ непреста́нно велича́емъ.

Ле́сть искорени́лъ еси́ злу́ю, Правосла́вію ревну́я, прароди́телемъ твои́мъ чудесы́ подо́бяся, удиви́лъ еси́ зря́щія твоя́ пресла́вная чудеса́, блаже́нне.

Жела́я уподо́битися блаже́нному Симео́ну, и святи́телю Са́ввѣ, и ины́мъ сро́дствомъ, до́брѣ пожи́вшимъ, и не лиши́лъ тя́ е́сть Вели́кій Дарода́тель, Уроше всече́стне.

Богоро́диченъ: Пріими́ на́ше ма́лое сіе́ приноше́ніе, о Всенепоро́чная Госпоже́ Влады́чице! И е́же отъ недосто́йныхъ усте́нъ приноси́мое Ти́ моле́ніе пріими́ и не отри́ни, Всенепоро́чная Влады́чице.

Свѣти́ленъ. Подо́бенъ: Не́бо звѣзда́ми.

Ны́нѣшнюю сла́ву презрѣ́лъ еси́, Вы́шнюю сла́ву получи́лъ еси́, и земны́ми небе́сная наслѣ́довавъ, блаже́нне, Влады́цѣ я́ко предстоя́, о на́съ всегда́ моли́ся. [Два́жды.]

[Сла́ва, и ны́нѣ,] богоро́диченъ:

Еди́на Чи́стая и Нескве́рная, оскверне́на мя́ вся́кими паде́нми лю́тыми, изба́ви лю́тыя му́ки и тмы́ кромѣ́шнія.

На хвали́техъ стихи́ры на 4, гла́съ 4. Подо́бенъ: Яко до́бля.

Умудри́ тя Вы́шняя си́ла,* земна́я вся́ презрѣ́въ,* у́мъ впери́въ ко Го́споду,* Уроше всече́стне,* оте́чество твое́ назира́й,* и оби́тель твою́ не забу́ди,* просвѣще́ніе на́мъ подава́я,* творя́щимъ святу́ю па́мять твою́.

Ро́да свѣ́тла бы́лъ еси́ блаже́нне,* я́ко ши́покъ, процвѣ́лъ еси́ Це́ркви,* и я́ко фи́никсъ многора́сленный,* благоуха́нія испо́лнился еси́,* ле́сть ересе́й разруши́въ неви́димою си́лою,* и на́съ не забу́ди, моля́щихтися,* Уроше достоблаже́нне.

Ше́ствовалъ еси́ стезе́ю оте́ческою* и блаже́нную жи́знь пости́глъ еси́,* прароди́телемъ подо́бяся вся́кими добродѣ́тельми:* це́ркви воздвиза́я при животѣ́ твое́мъ* и инны́я подтвержда́я прароди́телей твои́хъ,* и по сме́рти твою́ це́рковь мощми́ облагоуха́лъ еси́,* и чудесы́ всѣ́хъ удиви́лъ еси́,* достоблаже́нне Уроше всече́стне.

Ума́ твоего́ не поколеба́ тве́рдость,* адама́нта твердѣ́йшій яви́вся,* а́ще и ю́нъ бы́лъ еси́* и не доспѣ́лъ еси́ соверше́ннаго во́зраста,* но Ду́ха Свята́го испо́лненъ бы́въ благода́ти.* Дивя́тся мно́зи,* зря́ще твоя́ мо́щи кра́сныя,* це́рковь бо твою́ просвѣти́лъ еси́* разли́чными благоуха́ньми,* всече́стне и преблаже́нне.

Сла́ва, гла́съ 4:

Свѣ́тлая дне́сь наста́ па́мять твоя́, Уроше блаже́нне, свѣтлѣ́йшій же е́сть приходя́й во Виѳлее́мѣ роди́тися Христо́съ, Иже все́й вселе́ннѣй ра́дость подае́тъ, твоя́ же убíйственная и безвре́менная сме́рть — Се́рбстѣй земли́ рыда́ніе неутѣши́мо и жа́лость ве́лію. И ны́нѣ, блаже́нне и досточу́дне, не преста́й о на́съ моля́ся, я́ко съ му́ченическими ли́ки водворя́ешися, и у престо́ла Святы́я Тро́ицы предстоя́ съ прароди́тели твои́ми, твое́ сро́дство помина́й, творя́щее любо́вію святу́ю па́мять твою́.

И ны́нѣ, богоро́диченъ:

Иму́ще Тя́, Богоро́дице, упова́ніе и предста́тельство, вра́жіихъ навѣ́тъ не убои́мся, я́ко спаса́еши ду́ши на́ша.

Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна отъ кано́на свята́го пѣ́снь 3-я и 2-го кано́на пѣ́снь 6-я. Проки́менъ, гла́съ [7]: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, [внегда́ моли́ти ми ся къ Тебѣ́]. Апо́столъ къ Тимоѳе́ю, зача́ло 295. Аллилу́ія, гла́съ 4. Пра́ведникъ, я́ко фи́никсъ процвѣте́тъ, [я́ко ке́дръ, и́же въ Лива́нѣ, умно́жится]. Сти́хъ: Насажде́ни въ дому́ Госпо́дни, [во дво́рѣхъ Бо́га на́шего процвѣту́тъ]. Ева́нгеліе отъ Луки́, зача́ло 63. Прича́стенъ: Въ па́мять вѣ́чную бу́детъ пра́ведникъ [отъ слу́ха зла́ не убои́тся].

Источникъ: Србљак. — Београд: Изданjе Свети Архиjереjски Синод Српске Православне Цркве, 1986. — С. 344-355.

/ Къ оглавленію раздѣла /


Наверхъ / Къ титульной страницѣ

0