Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія во 2-й де́нь.
Слу́жба преподо́бному Аѳана́сію, затво́рнику Пече́рскому.

ВЕЧЕРЪ,
На Го́споди, воззва́хъ: стихи́ры на 6, гла́съ 4. Подо́бенъ: Яко до́бля.

Вѣ́руяй въ Мя́, — я́коже рече́ Писа́ніе, —* а́ще и умре́тъ, жи́въ бу́детъ во вѣ́ки, —* на тебѣ́ сло́во дѣ́ломъ испо́лнися,* Аѳана́сіе преподо́бне:* у́мѣрлъ бо еси́ мíру и пло́ти,* но вѣ́ра, споспѣшеству́ема благи́ми дѣ́лы,* воздви́же тя́ на живо́тъ лу́чшій,* и бы́лъ еси́ во удивле́ніе всѣ́мъ ужа́сно,* па́че же въ поле́зное исправле́ніе,* е́же и на́мъ пода́ждь моли́твами твои́ми, мо́лимтися,* па́мять твою́ соверша́юще. [Два́жды.]

Сказа́вый пути́ вѣ́чныя жи́зни,* не да́лъ еси́ ви́дѣти преподо́бному Твоему́ истлѣ́нія,* по двою́ дню́ того́ воздви́гнувый,* я́коже Ла́заря четверодне́внаго,* разруши́въ у́зы сме́ртныя* Боже́ственнаго гла́са воззва́ніемъ.* Си́мъ и на́съ воззови́, Христе́ Царю́,* и отъ ме́ртвыхъ дѣ́лъ воскреси́, мо́лимтися,* Жизнода́вче и Спа́се ду́шъ на́шихъ. [Два́жды.]

Сла́ва, гла́съ 3:

По воста́ніи Твое́мъ, Христе́ Спа́се, сме́рти вереи́ сотро́шася, и вѣ́рніи лю́діе то́ю не су́ть облада́еми, я́коже показа́ на́мъ чу́дный въ преподо́бныхъ Аѳана́сій, увѣря́я свои́мъ воста́ніемъ и поле́зное подая́ треми́ дѣ́тели и́ночествующимъ исправле́ніе. Сіе́ и въ на́шихъ сердца́хъ утверди́, Спа́се, мо́лимтися, лѣ́тнюю па́мять преподо́бнаго Твоего́ почита́юще.

И ны́нѣ, богоро́диченъ или́ крестобогоро́диченъ.

На стихо́внѣ во окто́ихѣ. Сла́ва, гла́съ 2:

Сле́зными ту́чами, преподо́бне, облада́ющую во удесѣ́хъ сме́рть потопи́лъ еси́, тридне́вновавшему же во гро́бѣ Животу́ всѣ́хъ уподо́бився, отъ ме́ртвыхъ по двою́ дню́ воскре́съ, тѣснѣ́йшую стезю́ къ вѣ́чной жи́зни избра́лъ еси́, е́юже дости́гъ въ безсме́ртную страну́, отту́ду да при́зриши на ны́ незакосне́нно, умерщвля́ющія ны́ стра́сти да прожене́ши и прича́стники безсме́ртію твоему́ на́съ сотвори́ши, во дне́шній де́нь па́мять твою́ соверша́ющихъ, о́тче Аѳана́сіе преблаже́нне.

И ны́нѣ, богоро́диченъ или́ крестобогоро́диченъ.

Тропа́рь, гла́съ 3:

Блаже́нство пла́чущихъ получи́ти жела́я, де́нь и но́щь непреста́нно пла́калъ еси́, имѣ́я во умѣ́ ча́съ Су́дный, тѣ́мъ по кончи́нѣ твое́й обрѣ́лъ еси́ утѣше́ніе на небеси́, преподо́бне Аѳана́сіе. Пода́ждь и на́мъ пла́катися здѣ́ грѣхо́въ на́шихъ вы́ну, я́ко да пла́ча безконе́чнаго избы́вше, та́мо пріи́мемъ вѣ́чное утѣше́ніе.


[НА УТРЕНИ,]
Кано́нъ, гла́съ 1.

Пѣ́снь 1.

Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Бре́нными усты́ пѣ́ти сугу́бое твое́ успе́ніе хотя́ща мя ны́нѣ, о́тче, не пре́зри, но уще́дри, молю́тися, зовы́й ны́нѣ въ де́нь торжества́ твоего́, въ о́ньже па́мять твоя́ просла́вися.

Сме́ртною сѣки́рою посѣка́емь, въ мíрѣ се́мъ живо́тъ человѣ́ческій разумѣ́въ, преподо́бне, да сокруши́ши ту́ собо́ю, къ тве́рдому Ка́мени прите́клъ еси́, и притупи́въ добродѣ́тельми сме́ртныя прило́ги, пое́ши Бо́гу, я́ко просла́вися.

Умеръ пе́рвѣе мíру отверже́ніемъ того́ многостра́стныхъ ловле́ній, стопы́ ше́ствій твои́хъ упра́вилъ еси́, свя́те, къ Животу́ непозы́блемому: тѣ́мже ны́нѣ, сы́нъ Живота́ су́щи, при́зри на ны́, пою́щія въ па́мяти твое́й Бо́гу, я́ко просла́вися.

Богоро́диченъ: Умерщвле́нную мою́ ду́шу самохо́тными страстьми́, оживотвори́ти потщи́ся, Чи́стая Дѣ́во: Ты́ бо еси́ Ма́ти Живота́ и подае́ши уме́ршимъ воста́ніе.

Пѣ́снь 3.

Ирмо́съ: Ка́мень, его́же небрего́ша зи́ждущіи, се́й бы́сть во главу́ у́гла: то́й е́сть Ка́мень, на не́мже утверди́ Це́рковь Христо́съ, ю́же отъ язы́къ искупи́.

Связа́лся еси́, преблаже́нне, богоуго́днаго житія́ ве́рвію, сме́рть у́бо плѣни́ся, не иму́щи на тебѣ́ вла́сти: а́ще бо и похи́ти тя́, но па́ки возврати́ти повелѣ́лъ е́сть мно́гимъ въ по́льзу, Иже сме́ртію Свое́ю всѣ́хъ отъ сме́рти искупи́.

Ме́ртвъ свя́занъ лежа́лъ еси́, о́тче, ма́нтіи укро́емъ на одрѣ́, и Вы́шняго про́мыслъ чудотвори́ти тща́шеся тобо́ю: по двою́ бо дню́ возврати́ ду́шу твою́, и жи́въ обрѣ́лся еси́ во удивле́ніе всѣ́мъ зря́щимъ, и́же ви́дяху твое́ успе́ніе.

Болѣ́знь твоя́ не бя́ше, преподо́бне, къ сме́рти, но къ сла́вѣ Бо́жіей: у́мерлъ бо, сме́рть, а́ки со́нъ, прія́лъ еси́ во отра́ду болѣ́зни твоея́, и по двою́ дню́, а́ки отъ сна́, воспря́нувъ, лице́ твое́ умыва́лъ еси́ струя́ми сле́зными.

Богоро́диченъ: Болѣ́знь сме́ртную пресѣ́кшая Святы́мъ Рождество́мъ Твои́мъ и Живо́тъ да́вшая всему́ мíру, а́зъ еди́нъ оста́хъ, умерщвле́нъ скве́рными дѣ́лы, Ма́ти Бо́жія, возложи́ на мя́ ру́ку, и живо́тъ лу́чшій обря́щу.

Сѣда́ленъ, гла́съ 8:

На безсме́ртіе взира́я, да сме́рти вѣ́чныя избѣ́гнеши, живо́тъ тѣ́сный избра́лъ еси́, Аѳана́сіе преблаже́нне, во умерщвле́нномъ ти́ тѣлеси́. Сего́ ра́ди, удивля́ющеся ди́вному на тебѣ́ смотре́нію, сла́вимъ Еди́наго Человѣколю́бца, Иже даде́ всѣ́мъ живо́тъ и нетлѣ́ніе.

Сла́ва, и ны́нѣ, богоро́диченъ:

Сме́ртной повину́вшихся рабо́тѣ свободи́ла еси́ Рождество́мъ Твои́мъ, Богоневѣ́сто Дѣ́во, тѣ́мъ Тя́ пѣ́сньми сла́вятъ христіа́нстіи ро́ди, я́ко дала́ еси́ и́мъ живо́тъ и нетлѣ́ніе.

Пѣ́снь 4.

Ирмо́съ: Взя́тся со́лнце, и луна́ ста́ въ чи́нѣ свое́мъ, возне́слся еси́, Долготерпѣли́ве, на дре́во и водрузи́лъ еси́ на не́мъ Це́рковь Твою́.

Лежа́ безду́шенъ, воздви́глся еси́, и дыха́ніе пріе́мь, па́ки на бытіе́ прише́лъ еси́, о́тче, е́же ви́дѣвше, предстоя́щіи со стра́хомъ славосло́виша Бо́жію си́лу.

Ко́ль стра́шенъ ча́съ сме́рти и Суда́, ви́дѣвъ, блаже́нне, го́рцѣ рыда́я, молча́ніемъ и воздыха́ніемъ изъяви́лъ еси́, и бы́ша сле́зы твоя́ мно́гимъ написа́ніе Суда́ стра́шнаго.

При́сно исхо́дъ сво́й помина́я, свя́те, пла́калъ еси́ въ жи́зни се́й болѣ́зненной, и бо́льшая прибыва́ху ти́ рыда́нія, чу́вственнѣ ви́дѣвшу, како́въ отходя́щіи и́мутъ стра́хъ и тре́петъ, его́же да убѣжи́мъ и мы́, моли́ся, о́тче преподо́бне.

Богоро́диченъ: Суда́ стра́шнаго не бою́ся, ни страшу́ся го́рькія гее́нны, я́ко отъ мно́гихъ страсте́й окаменѣ́ мое́ се́рдце. Сѣ́чивомъ благоутро́бія Твоего́, Чи́стая Дѣ́во Ма́ти, порази́ е́, да очувстви́тся па́мятію му́къ стра́шныхъ.

Пѣ́снь 5.

Ирмо́съ: Тво́й ми́ръ да́ждь на́мъ, Сы́не Бо́жій: ино́го бо, ра́звѣ Тебе́, Бо́га не зна́емъ, и́мя Твое́ имену́емъ, я́ко Бо́гъ живы́хъ и ме́ртвыхъ еси́.

Тво́й пла́чь и неутѣ́шное рыда́ніе предстоя́щіи ви́дѣвше, ужа́сни прося́ху, да ска́жеши и́мъ сло́во на по́льзу. Ты́ же три́ поле́зная сказа́лъ еси́ и́мъ: да храня́тъ послуша́ніе, покая́ніе и моли́тву, я́ко бо́льшія добродѣ́телей инѣ́хъ, въ ни́хже и мы́ да утверди́мся, моли́ся, о́тче Аѳана́сіе.

Са́мъ послушли́въ сы́й за́повѣдемъ Христо́вымъ, послуша́ніе вы́ше всѣ́хъ добродѣ́телей бы́ти бра́тіи сказа́лъ еси́, преподо́бне, то́ бо и по сме́рти не умира́етъ, но снабдѣва́етъ живо́тъ съ Бо́гомъ, Иже е́сть стра́шенъ Судія́ живы́мъ и ме́ртвымъ.

Покая́ніе и моли́тва — двѣ́ крилѣ́ о́гненнѣ, и си́ми прехо́дъ неудержи́мь отъ мыта́рствъ возду́шныхъ извѣсти́лъ еси́, блаже́нне, молча́нія яви́лъ еси́ пути́, и́миже поте́клъ еси́ на бо́льшая, наказа́ніе оста́вль вопроси́вшимъ. И на́мъ да́ждь исправле́ніе, де́нь весе́лія твоего́ соверша́ющимъ.

Богоро́диченъ: Моли́твеннице ско́рая о христіа́нстѣмъ ро́дѣ, Марíе Дѣ́во, моли́твы пѣве́цъ Твои́хъ пріе́мши въ пречи́стыя дла́ни, принеси́ къ Твоему́ Сы́ну и испроси́ на́мъ грѣхо́въ проще́ніе и тишину́ да́ждь су́щимъ въ страсте́хъ.

Пѣ́снь 6.

Ирмо́съ: Отве́рглъ мя́ еси́ во глубины́ се́рдца морска́го, и спа́слъ еси́ мя́, Спа́се, отъ рабо́ты сме́ртныя, и разрѣши́лъ еси́ у́зы беззако́ній мои́хъ.

Отве́ргся коне́чнѣе живота́ и чу́вственнаго свѣ́та ви́дѣти, въ те́менъ затво́ръ вше́лъ еси́, премѣня́я чу́вственное на мы́сленнаго Свѣ́та зрѣ́ніе, его́же и мы́ да улу́чимъ моли́твами твои́ми, о́тче, отве́ргшеся беззако́ній на́шихъ.

Умерщвле́нную пло́ть по́стническими труды́ да оживи́ши, свя́те, струя́ми сле́зъ твои́хъ напая́лъ еси́ вы́ну, двана́десять лѣ́тъ пребы́въ въ пеще́рѣ, жи́въ погребе́нъ, наде́ждою живота́ безсме́ртнаго оживля́емь.

Дре́во жи́зненное пло́ть твоя́, Аѳана́сіе преподо́бне, израсти́ покая́нія всѣ́мъ плоды́, отъ ни́хже вкуси́ти да́ждь и мнѣ́ любо́вію твое́ю, да укрѣплю́ся разрѣши́ти у́зы беззако́ній мои́хъ.

Богоро́диченъ: Дре́во присноцвѣту́щее Ты́ еси́, Пречи́стая Дѣ́во, пали́мыхъ зно́емъ беззако́ній покрыва́ющее сѣ́нію Твое́ю. Се́ю и на́съ покры́й, страстьми́ жего́мыхъ, и воспое́мъ: ра́дуйся, Дре́во благосѣнноли́ственное, и́мже покрыва́ются мно́зи.

Конда́къ, гла́съ 5:

Яко безсме́ртія тезоимени́тъ, по уме́ртвіи свое́мъ воста́лъ еси́ жи́въ; показу́я же, я́ко зѣло́ люта́ е́сть сме́рть, пла́кался еси́ го́рько. Ны́нѣ, обрѣ́тши неконча́емую ра́дость, моли́ся о на́съ, я́ко да пла́ча вѣ́чнаго избу́демъ.

Пѣ́снь 7.

Ирмо́съ: Су́щимъ въ пещи́ отроко́мъ Твои́мъ, Спа́се, не прикосну́ся, ниже́ стужи́, о́гнь. Тогда́ тріе́, я́ко еди́нѣми усты́, поя́ху и благословля́ху, глаго́люще: благослове́нъ Бо́гъ оте́цъ на́шихъ.

Жи́знь твою́ въ пла́чѣ и воздыха́ніи проводи́въ и струя́ми сле́зъ твои́хъ убѣли́въ а́нгельскаго о́браза ри́зу, отше́лъ еси́ въ безплаче́вныя страны́, ра́дующися и пою́щи: благослове́нъ Бо́гъ оте́цъ на́шихъ.

Чи́ни а́нгельстіи въ де́нь успе́нія твоего́ приспѣ́ша, и ду́хъ тво́й ми́рно пріе́мше, проводи́ша въ ра́йскія оби́тели, идѣ́же живы́й, помяни́ на́съ, о́тче преподо́бне, пою́щихъ: благослове́нъ Бо́гъ оте́цъ на́шихъ.

Мертве́цъ два́жды въ жи́зни се́й бы́лъ еси́, свя́те, и пе́рвѣе у́бо возвраща́ющася вси́ ви́дѣша тя́ па́ки въ плотски́хъ соста́вахъ, отъ ни́хже втори́цею разрѣ́шся, ны́нѣ живе́ши со а́нгельскими чи́нми, идѣ́же и на́съ не забу́ди, пою́щихъ: благослове́нъ Бо́гъ оте́цъ на́шихъ.

Богоро́диченъ: Уме́ршаго мя́ злы́ми дѣя́ніи оживотвори́ти потщи́ся, Влады́чице: на Тя́ бо упова́ніе возложи́хъ несумнѣ́нно, я́ко ро́ждшую Безсме́ртнаго Царя́, и мíру всему́ Животда́вца.

Пѣ́снь 8.

Ирмо́съ: Небеса́ небе́съ и вода́, я́же превы́ше небе́съ, благослови́те, по́йте Го́спода и превозноси́те Его́ во вѣ́ки.

Небеса́ ра́дуются, пріе́мше ду́хъ тво́й въ нѣ́дра своя́, и мы́ весели́мся, кла́няющеся моще́мъ твои́мъ, преподо́бне, отъ ни́хже пода́ждь тре́бующимъ благода́ть и сподо́би пѣ́ти Го́спода во вѣ́ки.

Ангели торжеству́ютъ, сожи́теля тя́ иму́ще, весели́тся и гора́ Пече́рская, содержа́щи ра́ку моще́й твои́хъ, а́ки би́серъ многосвѣ́тлый, си́мъ просвѣти́ на́съ, мра́комъ страсте́й одержи́мыхъ, и да́ждь пѣ́ти Го́спода во вѣ́ки.

Благоугоди́лъ еси́, о́тче, въ жи́зни се́й Влады́цѣ своему́ и прія́лъ еси́ да́ръ неду́ги исцѣля́ти. На́съ, страстьми́ одержи́мыхъ, посѣти́, я́коже ля́двіями боля́ща Вави́лу, и сподо́би Го́спода пѣ́ти во вѣ́ки.

Богоро́диченъ: Въ печа́ли и тузѣ́ е́смь, скве́рное мое́ житіе́ помышля́я, и не и́мамъ наде́жды. Къ Тебѣ́ еди́ной прибѣга́ю, ра́дости всемíрной, Чи́стая Дѣ́во, и молю́, да ра́дость возсія́етъ души́ мое́й во вѣ́ки.

Пѣ́снь 9.

Ирмо́съ: Сотвори́ держа́ву мы́шцею Свое́ю, низложи́ бо си́льныя со престо́лъ и вознесе́ смире́нныя Бо́гъ Изра́илевъ, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ренъ.

Сотвори́ любо́вь моля́щимся тебѣ́, о́тче, и моли́твою твое́ю да́ждь цѣльбу́ стра́ждущимъ неду́ги душе́вными, па́че же ра́туемыхъ вра́жіими навѣ́ты напра́ви на пу́ть ми́ренъ.

Пое́тъ вели́кая Ла́вра труды́ и по́двиги твоя́, преподо́бне, сла́витъ вы́ну пеще́ра, храня́щая чудотво́рныя мо́щи твоя́, и́мже и мы́ покланя́ющеся, мо́лимъ тя́: напра́ви стопы́ на́ша на пу́ть ми́ренъ.

Воста́ни ско́ро и пріиди́, а́зъ исцѣлю́ тя, — рцы́, Аѳана́сіе преблаже́нне; се́ бо отъ мно́гія болѣ́зни душе́вныя вопію́ ти, не имы́й отра́ды, па́че же молю́: наста́ви мя́ на спасе́нія пу́ть ми́ренъ.

Сла́влю Тя́, Тро́ице Пресвята́я, Отче Безнача́льне съ Сы́номъ Безлѣ́тнымъ, и пою́ Ду́ха Твоего́ Свята́го, Его́же да́ждь се́рдцу моему́ хода́тайствомъ уго́дника Твоего́, да обря́щу пу́ть ми́ренъ.

Богоро́диченъ: Аще кто́ не сла́витъ чи́стаго зача́тія и не пое́тъ несказа́ннаго Рождества́ Твоего́, Марíе Богоневѣ́сто, да отпаде́тъ вѣ́чныя сла́вы и не бу́детъ соо́бщникъ свѣ́та и сы́нъ присносу́щнаго ми́ра.

Свѣти́ленъ:

Въ преподо́бныхъ ди́внаго Аѳана́сія пѣ́сньми, лю́діе, восхва́лимъ: то́й бо жи́въ у́мре, и по двою́ дню́ воскре́се, и па́ки преста́вися, живе́тъ, не ктому́ сме́ртію облада́емь, но присносу́щную нача́ жи́знь, я́ко сы́нъ су́щи живота́, и воскресе́нія пра́ведныхъ наслѣ́дникъ.

Сла́ва, и ны́нѣ, богоро́диченъ:

Ди́вны Твоя́ та́йны, Чи́стая, кто́ исповѣ́сть? Или́ кто́ возвѣсти́тъ на Тебѣ́ сбытіе́ неизрече́нныхъ? Родила́ бо еси́ въ лѣ́то Сы́на, пре́жде вѣ́къ отъ Отца́ рожде́нна, живота́ и воскресе́нія Пе́рвенца, моли́ у́бо Его́, да и а́зъ воскресе́нія бу́ду и живота́ наслѣ́дникъ.

На хвали́техъ стихи́ры, гла́съ 2. Подо́бенъ: Егда́ отъ дре́ва.

Пріиди́те, лю́діе,* воспое́мъ на небеси́ отъ а́нгелъ пое́маго* ди́внаго Аѳана́сія,* по́стниковъ красоту́ и преподо́бныхъ сія́ніе,* и́хже житію́ поревнова́въ,* тѣ́сный пу́ть нелѣ́ностно про́йде,* вся́кія стра́сти увяди́въ воздержа́ніемъ,* неудержи́мое жела́ніе имѣ́я къ Бо́гу,* Ему́же предстои́тъ ны́нѣ со а́нгелы* и мо́лится о душа́хъ на́шихъ. [Два́жды.]

Пріиди́те, бра́тіе* и празднолю́бныхъ собо́ри,* вся́кое сосло́віе богоно́сныхъ усте́нъ,* принесе́мъ вѣнцы́ пѣсносло́вныхъ цвѣ́товъ,* ко гро́бу ше́ствуимъ преблаже́ннаго отца́* и припаде́мъ, глаго́люще:* преподо́бне преблаже́нне,* а́нгеломъ сожи́телю,* не забу́ди, хода́тайствуя* ко Влады́цѣ всѣ́хъ Бо́гу,* да улучи́мъ вѣ́чный живо́тъ* и ми́лость въ де́нь Су́дный.

Пріиди́те, и́ночествующихъ ли́ки,* къ ра́цѣ многочуде́сныхъ моще́й* преподо́бнаго Аѳана́сія,* и почти́мъ богоглаго́ливая уста́,* наказу́ющая на́съ послуша́нію,* всегда́шнему же покая́нію и моли́твѣ,* и си́ми добродѣ́тельми,* а́ки о́гненными крилѣ́,* къ Бо́гу восходя́ще,* обря́щемъ благода́ть и ве́лію ми́лость.

Сла́ва, гла́съ 8:

Преподо́бне, преблаже́нне, свя́те во святы́хъ Аѳана́сіе, твое́ наказа́ніе мно́гимъ бы́сть исправле́ніе и отъ паде́нія возставле́ніе па́мятію бу́дущаго Суда́, его́же и са́мъ ожида́я по твое́мъ воскресе́ніи, неутоли́мыя сле́зы отъ о́чію изводи́лъ еси́. Со весе́ліемъ ны́нѣ Христу́ предстоя́, моли́ся пою́щимъ честно́е твое́ преставле́ніе, прія́ти грѣхо́въ оставле́ніе и ве́лію ми́лость въ де́нь Су́дный.

И ны́нѣ, богоро́диченъ:

Влады́чице, пріими́ моли́твы ра́бъ Твои́хъ, и изба́ви на́съ отъ вся́кія ну́жды и печа́ли.

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 32 об. – 36.

/ Къ оглавленію раздѣла /


Наверхъ / Къ титульной страницѣ

0