Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія во 2-й де́нь.
Свята́го проро́ка Авваку́ма.

[ВЕЧЕРЪ,]
На Го́споди воззва́хъ: стихи́ры проро́ка, гла́съ 4. Подо́бенъ: Яко до́бля.

Авваку́мъ чу́дный,* зарю́ Ду́ха пріе́мъ,* бы́сть ве́сь боже́ственъ;* и суде́й нече́стіе,* и су́дъ непра́ведный* зря́, негоду́етъ,* нра́ва показу́я пра́вость Христа́ и Влады́ки,* боголюбе́зно и те́плою мы́слію,* я́ко утѣсня́емь, разгара́ется.

На боже́ственнѣй стоя́ стра́жи,* честны́й Авваку́мъ* слы́шаше та́инство* къ на́мъ Твоего́ прише́ствія, Христе́, неизрече́нное* и проповѣ́даніе Твое́* проро́чествуетъ я́вственнѣйше,* прови́дя и прему́дрыя апо́столы, я́коже ко́ни,* язы́къ многоплеме́нныхъ,* возмуща́ющія мо́ре.

Въ Го́сподѣ ра́дуяся, Бо́зѣ Спа́сѣ твое́мъ,* богоглаго́ливе сла́вне, веселя́ся,* и та́мо су́щаго сія́нія зарю́ пріе́мъ* и свѣ́томъ богодѣ́льнымъ мы́сленно просвѣща́емь,* па́мять твою́ всепра́зднственную вѣ́рою соверша́ющія* напа́стей же и бѣ́дъ* твои́ми моли́твами изба́ви.

Ины стихи́ры Богоро́дицы, гла́съ и подо́бенъ то́йже.
[Аще Аллилу́ія, сíи стихи́ры пою́тся пре́жде:]

Ту́чами Ду́ха Свята́го, Пречи́стая,* мою́ мы́сль ороси́,* Ка́плю ро́ждшая — Христа́ — безмѣ́рную,* беззако́нія земны́хъ* щедро́тами омы́вшую,* изсуши́ исто́чникъ страсте́й мои́хъ* и пото́ка сподо́би мя́ сла́дости* присноживо́тною Твое́ю моли́твою.

Подъ зе́млю низве́рженъ бы́хъ,* грѣхи́ умертви́вся,* душе́вными страстьми́ и тѣле́сными,* тѣ́мже тмо́ю покрыва́юся отча́янія,* но воздви́гни мя́ ны́нѣ* къ жи́зни нетлѣ́ннѣй, путеводя́щи мя́* къ вы́шнему оте́честву,* идѣ́же гла́съ чи́стъ пра́зднующихъ* и идѣ́же свѣ́тъ лица́ Твоего́, Христе́.

Яже Бо́га невмѣсти́маго* во чре́во Твое́ вмѣсти́вшая,* человѣко́любно Человѣ́ка бы́вша,* и на́ше смѣше́ніе изъ Тебе́ пріи́мша,* и обожи́вшаго я́вѣ,* не пре́зри мене́, Пречи́стая,* ны́нѣ скорбя́ща, но уще́дри вско́рѣ* и вся́кія вражды́ и вре́да лука́ваго свободи́.

Сла́ва, и ны́нѣ, гла́съ и подо́бенъ то́йже:

Тма́ми, Пречи́стая, обѣща́хся* покая́ніе о мои́хъ сотвори́ти согрѣше́ніихъ,* но не оставля́етъ мя́* неподо́бный мо́й злы́й обы́чай,* сего́ ра́ди вопію́ Ти* и, припа́дая, молю́ся:* Ты́ мя́, Влады́чице, изми́ такова́го томле́нія,* путеводя́щи къ лу́чшимъ* и спасе́нія бли́зъ су́щимъ.

Крестобогоро́диченъ. Подо́бенъ то́йже:

Агнца и Па́стыря, Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Тебѣ́ вѣща́ше:* Сы́не Возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* ка́ко ру́ки и но́ги Твоя́, Сло́ве,* пригвозди́шася отъ беззако́нныхъ* и Кро́вь Твою́ излія́лъ еси́, Влады́ко?

Тропа́рь, гла́съ 2:

Проро́ка Твоего́ Авваку́ма па́мять, Го́споди, пра́зднующе, тѣ́мъ Тя́ мо́лимъ: спаси́ ду́ши на́ша.


НА УТРЕНИ,
Кано́нъ проро́ка, его́же краегране́сіе: Тя́, проро́че Авваку́ме, пою́, блаже́нне. Ѳеофа́ново. Гла́съ 4.

Пѣ́снь 1.

Ирмо́съ: Воспою́ Тебѣ́, Го́споди Бо́же мо́й, я́ко изве́лъ еси́ лю́ди изъ рабо́ты еги́петскія, покры́лъ же еси́ колесни́цы фарао́новы и си́лу.

Умудри́ мя, Го́споди Бо́же мо́й, Твоего́ проро́ка Авваку́ма пѣ́ти боже́ственнаго и благода́тію Твое́ю просвѣ́ти, Бла́же, се́рдце мое́.

Доко́лѣ, Го́споди, — проро́къ глаго́летъ, — возопію́ къ Тебѣ́, и не услы́шиши? Вску́ю же ми́ показа́лъ еси́ суде́й нече́стіе?

Честну́ю па́мять твою́, проро́че, соверша́ющія благоче́стно твои́ми мольба́ми отъ бѣ́дъ изба́ви и лю́тыхъ обстоя́ній.

Богоро́диченъ: Бо́гъ Святы́й яви́ся, внегда́ прибли́житися вре́мени, изъ Тебе́, Богоро́дице, бы́въ Человѣ́къ, да спасе́тъ человѣ́ка.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Воззрѣ́ніемъ къ Бо́гу возвыша́емь и свѣтодая́ніи отъ Него́ просвѣща́емь, бу́дущихъ предзрѣ́лъ еси́, богоявле́нне, проображе́ніе.

Вся́ку добродѣ́тель содержа́лъ еси́, вся́ку же зло́бу отъ ума́ возненави́дѣлъ еси́ и пра́ведно беззако́ннующихъ возгнуша́лся еси́, всеблаже́нне.

Рече́ніемъ Свята́го Ду́ха ты́, я́ко чи́стъ, ввѣ́рился еси́, яснѣ́йше проро́чествуя бу́дущихъ сбытія́, досточу́дне.

Богоро́диченъ: Гора́, добродѣ́тельми пріосѣне́нная, изъ нея́же Влады́ка раболѣ́пно пріи́де рабо́ты свободи́ти человѣ́ки, яви́лася еси́, Всечи́стая.

Сѣда́ленъ, гла́съ 4. Подо́бенъ: Вознесы́йся.

На боже́ственнѣй стра́жи ста́лъ еси́, блаже́нне, и уразумѣ́лъ еси́ Бо́жіе прише́ствіе проро́ческими очесы́, богодохнове́нне; тѣ́мже и возопи́лъ еси́, Авваку́ме, со стра́хомъ: Го́споди, услы́шахъ стра́шное прише́ствіе Твое́ и воспѣва́ю Тя́, пло́ть бре́нную отъ Дѣ́вы понести́ восхотѣ́вшаго.

Сла́ва, и ны́нѣ, богоро́диченъ:

По Бо́зѣ въ Тво́й, Богоро́дице, прибѣга́ю, смире́нный, покро́въ боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ грѣси́, и бою́ся, Влады́чице, му́ки, и трепе́щу, моле́ніе сотвори́, Чи́стая, къ Сы́ну Твоему́ отъ си́хъ изба́вити мя́.

Крестобогоро́диченъ:

Иже изъ Безнача́льнаго Отца́ рожде́ннаго, напослѣ́докъ Тя́ пло́тію Ро́ждшая, на Крестѣ́ ви́сяща зря́щи, Христе́, — увы́ мнѣ́, любе́знѣйшій Іису́се, — вопія́ше, — ка́ко сла́вимый, я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́, распина́ешися? Пою́ Тя, Долготерпѣли́ве.

Пѣ́снь 4.

Ирмо́съ: Твоего́ на земли́ явле́нія, Христе́ Бо́же, проповѣ́дуя проро́къ прише́ствіе, съ весе́ліемъ вопія́ше: сла́ва си́лѣ Твое́й, Го́споди.

Свѣтови́дѣнъ добродѣ́телію яви́лся, богодохнове́нне, и Свѣ́тъ Невече́рній возвѣсти́лъ еси́, Ему́же ны́нѣ вѣ́рою зове́мъ: сла́ва си́лѣ Твое́й, Го́споди.

Всесвѣ́тлая благода́ть Ду́ха, оби́льно все́льшися въ тя́, всему́дре, проро́ка соверши́, всѣ́мъ Спа́са возвѣща́юща.

Слу́хомъ огласи́вся Вседержи́теля, благоговѣ́йно убоя́лся еси́, о чу́дне! Разумѣ́въ же дѣла́ Сего́, во у́жасѣ бы́лъ еси́.

Богоро́диченъ: Киво́тъ свидѣ́нія Тя́, Дѣ́во, пи́шетъ, Хлѣ́бъ и́стинно жи́зни пріе́мшую, Чи́стая, Сло́во, Отцу́ Соприсносу́щное.

Пѣ́снь 5.

Ирмо́съ: Возсія́вый Свѣ́тъ, и просвѣти́вый у́тро, и показа́вый де́нь, сла́ва Тебѣ́, сла́ва Тебѣ́, Іису́се, Сы́не Бо́жій.

Ны́нѣ воздви́жена ви́дитъ честна́я Це́рковь Со́лнца на дре́вѣ, я́коже проре́клъ еси́, Авваку́ме свяще́ннѣйше.

Впери́въ у́мъ, на стра́жи твое́й ста́лъ еси́, пребога́те, и усмотри́лъ еси́ Госпо́дне прише́ствіе.

Велегла́сно, му́дре, о Бо́зѣ Спа́сѣ возра́дуюся, — возопи́лъ еси́, — и возвеселю́ся, — Авваку́ме всеблаже́нне.

Богоро́диченъ: Отягче́нъ плени́цами мно́гихъ мои́хъ прегрѣше́ній, къ Тебѣ́ прибѣга́ю, спаси́ мя, Влады́чице Богоро́дице, вѣ́рныхъ похвало́.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Отъ ю́га Бо́гъ, вопло́щся, пріи́де, я́ко проре́клъ еси́, отъ Него́ свѣ́тло просвѣща́емь, Авваку́ме треблаже́нне, и мíръ свѣ́томъ уясни́.

Озари́, Бо́же, ду́ши пою́щихъ Тя́ моли́твами Авваку́ма честна́го и богому́драго, и́же вдохнове́ніемъ боже́ственнымъ просвѣще́й того́ помышле́ніе.

Вѣща́ніе Твое́ и глаго́лъ боже́ственныхъ си́ла, богоглаго́ливе, про́йде вся́ концы́, Сло́ва Боже́ственное прише́ствіе на́мъ проро́чествуя.

Богоро́диченъ: Су́щаго Отцу́ Сы́на Единосу́щна и безнача́льно ро́ждшему я́вѣ сразумѣва́емаго, въ послѣ́докъ пло́ть бы́вша, Дѣ́во, родила́ еси́.

Конда́къ гла́съ 8. Подо́бенъ: Взбра́нной.

Возгласи́вый вселе́ннѣй отъ ю́га прише́ствіе Бо́жіе отъ Дѣ́вы, Авваку́ме богоглаго́ливе, и на боже́ственнѣй стра́жи предстоя́ніемъ слы́шанія отъ свѣтоно́сна а́нгела Христо́во Воскресе́ніе возвѣсти́лъ еси́ мíру, сего́ ра́ди ве́село зове́мъ ти́: ра́дуйся, проро́ковъ свѣ́тлая добро́то.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Науча́емь, блаже́нне, па́че сло́ва зна́нію и проро́чествуя многосвѣ́тлую Свѣщу́, взыва́еши ны́нѣ: оте́цъ на́шихъ Бо́же, благослове́нъ еси́.

Сія́нія Трисвѣ́тлаго и Невече́рнія Сла́вы прича́стія тебѣ́ даде́ Христо́съ, Его́же просла́вилъ еси́, вопія́: оте́цъ на́шихъ Бо́же, благослове́нъ еси́.

Богоро́диченъ: Въ ро́дѣхъ родо́въ Ма́ти Дѣ́ва яви́лася еси́, Благослове́нная, па́че ума́ Сло́во ро́ждши воплоще́нное, тѣ́мже, Чи́стая, воспѣва́емъ Тя́.

Пѣ́снь 8.

Ирмо́съ: Вся́ дѣла́ Бо́жія и вся́ тва́рь, благослови́те Го́спода, я́ко человѣ́комъ отъ земли́ возсія́ Свѣ́тъ, и вселе́нную всю́ просвѣти́, и жи́знь вѣ́чную мíру дарова́, по́йте, лю́діе, и превозноси́те Его́ во вѣ́ки.

Просвѣще́нъ Свѣ́томъ Трисо́лнечнымъ, сподо́бился еси́, всеизря́дне, боже́ственныхъ и преесте́ственныхъ видѣ́ній, зовы́й: превозноси́те Бо́га во вѣ́ки вся́.

Пія́ отъ пото́ка сла́дости и невеще́ственнаго видѣ́нія исполня́емь, сла́вы же проро́ческія и предсѣда́тельства причаща́яся, ра́дуяся, воспѣва́еши Бо́га во вѣ́ки.

О, боже́ственныя и честны́я проро́ка Авваку́ма красоты́! се́й бо, со а́нгельскими лику́я си́лами, ра́дуяся, Христа́ воспѣва́етъ во вѣ́ки.

Богоро́диченъ: Ма́ти яви́лася еси́ истинно пре́жде вѣ́къ изъ Отца́ Возсія́вшаго, еди́на бо святѣ́йши всѣ́хъ была́ еси́, Тя́ превозно́симъ, Чи́стую, во вѣ́ки.

Пѣ́снь 9.

Ирмо́съ: Рождество́ Твое́ нетлѣ́нно яви́ся: Бо́гъ изъ боку́ Твое́ю про́йде, я́ко Плотоно́сецъ яви́ся на земли́ и съ человѣ́ки поживе́. Тя́, Богоро́дице, тѣ́мъ вси́ велича́емъ.

Блиста́етъ па́мять твоя́, проро́че, свѣ́тлу испуща́ющи зарю́ твоего́ богоглаго́ланія и твоего́ тайноуче́нія и проро́чества тя́ чту́щимъ, Авваку́ме блаже́ннѣйше.

Проповѣ́давъ Го́спода Сла́вы и Сего́ проре́къ прише́ствіе, отъ Святы́я Дѣ́вы проявле́нно бы́вшее, и показа́нное ви́дя, весели́ся, Авваку́ме богоблаже́нне.

Ра́дуются вси́ проро́цы, въ ра́достный тво́й де́нь веселя́щеся, богому́дре, ра́дости твоея́ причаща́ющеся и боже́ственныя сла́вы, съ ни́миже моля́ся, пою́щія тя́ спаса́й.

Богоро́диченъ: Кропле́ніемъ, Чи́стая, щедро́тъ Твои́хъ души́ моея́ омы́й скве́рну и то́ки сле́зъ источа́ти мнѣ́ непреста́нно сотвори́, Отрокови́це, страсте́й мои́хъ пото́ки уставля́ющи.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 5 – 8.

/ Къ оглавленію раздѣла /


Наверхъ / Къ титульной страницѣ

0