Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 1-й де́нь.
Свята́го проро́ка Нау́ма.

Аллилу́ія или́ тропа́рь.

[ВЕЧЕРЪ,
На Го́споди воззва́хъ:] стихи́ры, гла́съ 3. Подо́бенъ: Ве́лія Креста́ Твоего́.

Благода́ть Свята́го Ду́ха всели́ся въ тя́, Бо́жій проро́че, и свое́ю луче́ю содѣ́ла свѣщу́ пресвѣ́тлу и тобо́ю проповѣ́даетъ бу́дущая Ниневíи вели́кому.

Облакъ свѣтоза́ренъ яви́лся еси́, иска́пая, Нау́ме, Бо́жій проро́че, богозна́нія ту́чу, и напои́лъ еси́ пи́вомъ Бо́жія суда́ Ниневíю гра́дъ, нече́стіемъ болѣ́вшій а́біе.

Благосла́вія нетлѣ́ннаго прича́стникъ бы́въ, Нау́ме, Бо́жій проро́че, и неизрече́нныя сла́вы, и ра́дости несказа́нныя, и сла́дости боже́ственныя, о на́съ моли́, богодохнове́нне, всѣ́хъ Влады́ку.

Ины стихи́ры Богоро́дицы, гла́съ и подо́бенъ то́йже.
[Аще же Аллилу́ія, пою́тся стихи́ры пре́жде Богоро́дицы, пото́мъ свята́го.]

Ору́жіемъ уя́звлена мя́ су́ща зміи́нымъ, е́ле жи́ва, Отрокови́це, на одрѣ́ лежа́ща отча́янія, исцѣли́ вско́рѣ лѣчбо́ю Твоея́ моли́твы и раба́ сотвори́ Сы́на и Бо́га Твоего́.

Вѣ́дущи не́мощь мою́ тѣле́сную и душе́вную болѣ́знь, се́рдца же озлобле́ніе, посѣще́нія сподо́би мя́ Боже́ственнаго, Всенепоро́чная Дѣ́во, и спаси́, молю́ся, те́плою Твое́ю моли́твою.

Всѣ́хъ превзыдо́хъ, Влады́чице, согрѣше́ньми, но мно́жество, Дѣ́во, си́хъ очи́стивши, ми́лости Твоея́ ра́ди улучи́ти мнѣ́ проще́ніе въ бу́дущемъ Судѣ́, Чи́стая, сподо́би, Сы́на и Бо́га Твоего́ моля́щи.

Сла́ва, и ны́нѣ, богоро́диченъ:

Дѣ́во, изъ Тебе́ Ро́ждшагося моли́ ста́до Твое́ сохрани́ти невре́дно отъ вся́каго искуше́нія проти́вника діа́вола и испо́лнити всю́ во́лю Сы́на Твоего́ укрѣпи́, Отрокови́це.

Крестобогоро́диченъ:

Ору́жіе се́рдце Твое́ про́йде, Пречи́стая, егда́ Сы́на Твоего́ на Крестѣ́ ви́дѣла еси́ и вопія́ла еси́: не безча́дну Мя́ покажи́, Сы́не Мо́й и Бо́же Мо́й, соблюды́й Мя́ по рождествѣ́ Дѣ́ву.

На стихо́внѣ окто́иха.

Тропа́рь, гла́съ 2:

Проро́ка Твоего́ Нау́ма па́мять, Го́споди, пра́зднующе, тѣ́мъ Тя́ мо́лимъ: спаси́ ду́ши на́ша.


НА УТРЕНИ,
Кано́нъ, гла́съ 5. Творе́ніе Ѳеофа́ново.

Пѣ́снь 1.

Ирмо́съ: Коня́ и вса́дника въ мо́ре Чермно́е сокруша́яй бра́ни, мы́шцею высо́кою, Христо́съ истрясе́, Изра́иля же спасе́, побѣ́дную пѣ́снь пою́ща.

Нау́ме, Бо́жіимъ пома́зався, богопрія́тне, Ду́хомъ и Сего́ благода́тію просвѣ́щся, тѣ́мъ, Боже́ственное прозрѣ́ніе ума́ твоего́ чту́ще, ублажа́емъ тя́, всеизря́дне.

Свы́ше огласи́вши, проро́че, твою́ ду́шу, Ду́ха благода́ть проро́ческое дѣ́йство досто́йно вдохне́ и богодохнове́ненъ язы́къ тво́й устро́и, досточу́дне.

Орга́нъ яви́лся еси́, ударя́емь Ду́ха бряца́ломъ, ревни́теля Бо́га воспѣва́я и всѣ́мъ вѣща́я Боже́ственнаго суда́ нелицемѣ́ріе, достосла́вне.

Богоро́диченъ: Преблагослове́нная Дѣ́во Всечи́стая, вѣ́рою Тя́ и любо́вію, я́ко Бо́жію Ма́терь Честну́ю, пою́щія спаса́й отъ бѣ́дъ, рѣша́щи неукроти́мое свирѣ́пство.

Пѣ́снь 3.

Ирмо́съ: Водрузи́вый на ничесо́мже зе́млю повелѣ́ніемъ Твои́мъ, и повѣ́сивши неодержи́мо тяготѣ́ющую, на недви́жимѣмъ, Христе́, ка́мени за́повѣдей Твои́хъ, Це́рковь Твою́ утверди́, Еди́не Бла́же и Человѣколю́бче.

Прича́стіемъ Животворя́щаго и Боже́ственнаго Ду́ха душе́ю бы́лъ еси́ богови́днѣйшій: тѣ́мже и да́льная я́вѣ всѣ́мъ предвозвѣща́ти Боже́ственнымъ манове́ніемъ ты́ предочи́стился еси́, богодохнове́нне.

Су́дъ на враги́ отмще́нія предзрѣ́лъ еси́, блаже́нне богови́днѣйше, преоби́дящихъ нечести́выхъ Бо́жіе долготерпѣ́ніе, и ми́лость, и благосты́ню отъ неисцѣ́льныя зло́бы.

Богоро́диченъ: Иже дре́вле отъ небытія́ сотвори́вый вся́ческая, изъ Твоея́ святы́я утро́бы прохо́дитъ, Человѣ́къ бы́въ, Чи́стая, за человѣколю́біе превели́кое Человѣколю́бецъ, да человѣ́ки изба́витъ.

Сѣда́ленъ, гла́съ 5. Подо́бенъ: Собезнача́льное Сло́во.

Несмѣ́сенъ начерта́ніемъ до́льнымъ, сла́вне, ты́, у́мъ стяжа́въ, Боже́ственнаго Ду́ха чистѣ́йшее, Нау́ме, прія́телище бы́лъ еси́, осія́ніе Его́ пріе́мля свѣ́тло и всѣ́мъ облиста́я; тѣ́мъ тя́ мо́лимъ: о ми́рѣ мíра моли́ся.

Сла́ва, и ны́нѣ, богоро́диченъ:

Изъ Тебе́ вопло́щшагося Бо́га и Го́спода на́съ ра́ди, истлѣ́вшихъ прегрѣше́ньми, моли́ прилѣ́жно уще́дрити ны́ и отврати́ти я́рость и гнѣ́въ Сво́й, Чи́стая, отъ и́же вѣ́рою чту́щихъ и хва́лящихъ непреста́нно си́лу и держа́ву Его́.

Крестобогоро́диченъ:

На Крестѣ́ зря́щи Тя́, Христе́, Ма́ти Твоя́, во́лею посредѣ́ разбо́йниковъ ви́сяща, растерза́ющися утро́бою, ма́терски глаго́лаше: безгрѣ́шный Сы́не, ка́ко непра́ведно на Крестѣ́, я́коже злодѣ́й, пригвожде́нъ еси́, человѣ́ческій ро́дъ хотя́ оживи́ти, я́ко Благоутро́бенъ.

Пѣ́снь 4.

Ирмо́съ: Боже́ственное Твое́ разумѣ́въ истоща́ніе прозорли́во, Авваку́мъ, Христе́, со тре́петомъ вопія́ше Тебѣ́: во спасе́ніе люде́й Твои́хъ, спасти́ пома́занныя Твоя́ прише́лъ еси́.

Сія́я заре́ю Ду́ха, ниневи́тяномъ преще́ніе запустѣ́нія предвозвѣсти́лъ еси́, Бо́жія си́лы проявля́я, богоявле́нне, неизбѣ́жное.

Су́дъ пра́ведный Зижди́теля повѣ́даеши, лю́тое всегуби́тельство лю́демъ вражде́бнымъ, я́ко проро́чествуя, провѣща́лъ еси́, Нау́ме, Бо́жій проро́че всеблаже́нне.

Смиренному́дріемъ украша́ема, проро́ка Твоего́ душа́ къ боговидѣ́нію Твоему́, Бла́же, преесте́ственно взя́ся и Боже́ственнаго видѣ́нія свѣ́тлости.

Богоро́диченъ: Марíе, Госпоже́ тва́ри, Царя́ всѣ́хъ ро́ждши, еди́на Всепѣ́тая, страсте́й мучи́тельства свобо́дна мя́ покажи́ моли́твами Твои́ми.

Пѣ́снь 5.

Ирмо́съ: Одѣя́йся свѣ́томъ, я́ко ри́зою, къ Тебѣ́ у́тренюю и Тебѣ́ зову́: ду́шу мою́ просвѣти́ омраче́нную, Христе́, я́ко Еди́нъ Благоутро́бенъ.

Непоро́чно и чи́сто житіе́ стяжа́ти дѣ́йствомъ и просвѣще́ніемъ Свята́го Ду́ха, Нау́ме, сподоби́лся еси́, проро́че чу́дный.

Пло́ть покори́лъ еси́ самоде́ржцу уму́, усе́рдно восхожде́нія въ се́рдцѣ положи́въ: тѣ́мже явле́нія боголѣ́пнаго получи́лъ еси́.

Па́че ви́димыхъ по́честей су́ть, и́же проро́чествомъ почествова́нныхъ, тѣ́ми бо вѣща́етъ Святы́й Ду́хъ — Преблагíй Госпо́дь.

Богоро́диченъ: Ниже́ у́мъ небе́сный и́стинно возмо́жетъ Тя́, Богома́ти, пѣ́ти досто́йно: Зижди́теля бо родила́ еси́, небе́сными пѣва́емаго си́лами.

Пѣ́снь 6.

Ирмо́съ: Неи́стовствующееся бу́рею душетлѣ́нною, Влады́ко Христе́, страсте́й мо́ре укроти́ и отъ тли́ возведи́ мя, я́ко Благоутро́бенъ.

Боже́ственныя благода́ти я́вльшася хра́мъ, вѣ́рніи, и прія́телище пречи́стое бы́вша, па́че ума́ богоявле́нія воспои́мъ.

Боже́ственнаго Ду́ха пріе́мъ незаходи́мую зарю́ и у́мъ боже́ственъ стяжа́въ, благочести́выя къ пѣснопѣ́нію наказу́етъ.

Богоро́диченъ: Мы́сленныя си́лы Тя́ и человѣ́честіи вси́ ро́ди, я́ко Бо́га ро́ждшую, сла́вятъ всегда́, Благослове́нная Всенепоро́чная.

Конда́къ, гла́съ 4. Подо́бенъ: Яви́лся еси́.

Просвѣти́вшееся Ду́хомъ чи́стое твое́ се́рдце проро́чества бы́сть свѣтлѣ́йшаго прія́телище: зри́ши бо, я́ко настоя́щая, дале́че су́щая; сего́ ра́ди тя́ почита́емъ, проро́че блаже́нне Нау́ме сла́вне.

Пѣ́снь 7.

Ирмо́съ: Превозноси́мый отце́въ Госпо́дь, пла́мень угаси́, о́троки ороси́, согла́сно пою́щія: Бо́же, благослове́нъ еси́.

Яко богови́днѣйша проро́ка иму́ще, лико́въ нача́льника, че́стно пра́зднуемъ, боже́ственнѣ, пѣснопою́ще: Бо́же, благослове́нъ еси́.

Тя́, духодви́жимаго позна́вше орга́на и цѣвни́цу богодохнове́нну, призыва́емъ засту́пника, пѣ́сньми пою́ще: Бо́же, благослове́нъ еси́.

Вѣнча́ тя́ Госпо́дь проро́ка, чу́дне, и благода́ть тебѣ́ даде́ предглаго́лати бу́дущая, Ему́же вси́ пѣснопо́мъ: Бо́же, благослове́нъ еси́.

Богоро́диченъ: Две́рь непроходи́мую проро́къ ви́дѣ Тя́, Дѣ́во Пречи́стая, ю́же Еди́нъ про́йде; Ему́же вси́ пѣснопое́мъ: Бо́же, благослове́нъ еси́.

Пѣ́снь 8.

Ирмо́съ: Тебѣ́, Вседѣ́телю, въ пещи́ о́троцы, всемíрный ли́къ спле́тше, поя́ху: дѣла́ вся́кая, Го́спода по́йте и превозноси́те во вся́ вѣ́ки.

Невеще́ственною заре́ю Нача́льныя Тро́ицы, проро́че, обожа́емь, пое́ши, ра́дуяся: вся́ дѣла́, Го́спода по́йте и превозноси́те во вся́ вѣ́ки.

Священнолѣ́пно свяще́нную твою́ па́мять, проро́че чу́дный, чту́ще, пое́мъ: вся́ дѣла́, Го́спода по́йте и превозноси́те во вся́ вѣ́ки.

Богоро́диченъ: Укрѣпи́, Чи́стая, ду́шу мою́, разсла́бленную прегрѣше́ньми и страстьми́, я́ко да воспою́, Дѣ́во, Твое́ Рождество́, препросла́вленное во вся́ вѣ́ки.

Пѣ́снь 9.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

На земли́ равноа́нгельное житіе́ имѣ́лъ еси́ вои́стинну и ны́нѣ на небесѣ́хъ со а́нгельскими ли́ки всели́лся еси́ бли́зъ Свѣ́та Трисія́ннаго, Его́же насыща́яся, назира́й пою́щія тя́.

Тя́ Бо́гу приво́димъ о мíрѣ, блаже́нне, моли́твенника, моли́ прилѣ́жно, проро́че, я́ко дерзнове́ніе имѣ́я, да́ти вѣ́рнымъ благолѣ́пно пребыва́ющее вѣ́чное избавле́ніе.

Богоро́диченъ: Яко Бо́га ро́ждшую, сугу́ба же и соесте́ственна, имену́емъ Тя́, вѣ́рніи, богоглаго́ливо Богоро́дицу Пречи́стую всеи́стиннымъ зва́ніемъ, честно́е Рождество́ проповѣ́дающе, Всесвята́я Богоневѣ́сто.

Свѣти́ленъ дне́. На стихо́внѣ окто́иха.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 2 – 4 об.

/ Къ оглавленію раздѣла /


Наверхъ / Къ титульной страницѣ

0