Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Служба составлена Валеріей Хекке (одобрена РПЦЗ 16/29 декабря 1956 г.).

Мѣ́сяца Деке́мврія въ 1-й де́нь.
Слу́жба свято́му пра́ведному Филаре́ту Ми́лостивому.

ВЕЧЕРЪ,
На Го́споди воззва́хъ, стихи́ры, гла́съ 8:

Якоже со́лнце богокра́сное* любо́вію твое́ю на злы́я и благíя,* возсія́лъ еси́, Филаре́те Ми́лостиве,* лучи́ благотворе́нія твоего́ вселе́нную просвѣща́я,* сердца́ же вѣ́рныхъ возгрева́я и на хвалу́ тебѣ́ подвиза́я,* тѣ́мже ны́нѣ въ па́мяти твое́й боголѣ́пно весели́мся* и уми́льно тебѣ́ зове́мъ:* ми́лость твою́ излива́й на ны́ при́сно,* чту́щія любо́вію твое́ лѣ́тнее торжество́.

Бо́га соверше́ннѣйшаго подража́я,* ми́лость твою́ излива́лъ еси́ на вся́ку пло́ть,* тѣ́мже и любве́ Христо́вы ра́ди обнища́въ,* па́ки отъ Него́ стори́чное воздая́ніе прія́лъ еси́,* и въ кончи́нѣ твое́й я́ко со́лнце просія́лъ еси́,* Филаре́те добролюби́ве,* не преста́й у́бо помина́ти на́съ,* чту́щихъ любо́вію твое́ лѣ́тнее торжество́.

Вои́стину добро́ возлюби́лъ еси́,* Филаре́те любому́дре,* добродѣ́ланія и́стиннаго рачи́тель бы́въ* и ми́лостію богоподража́тельною всѣ́хъ осіява́я,* имѣ́ніе твое́ Бо́гу взаи́мъ дава́лъ еси́,* небе́сная бла́га сокро́виществуя.* Сего́ ра́ди тя́ велегла́сно ны́нѣ сла́вимъ* и любо́вію тебѣ́ зове́мъ:* ра́дуйся, Филаре́те, Бо́гу возлю́бленне.

Сла́ва, гла́съ 2. Подо́бенъ: Егда́ отъ дре́ва.

Егда́ заше́лъ еси́* отъ о́чію лю́бящихъ тя́, Филаре́те,* въ преставле́ніи твое́мъ я́коже со́лнце просія́въ,* Ца́рскій ве́сь гра́дъ потрясе́ся* неисче́тнымъ мно́жествомъ* ко одру́ твоему́ стека́ющимся,* и пла́чь благосе́рдный вся́ сто́гны огласи́,* си́рымъ и убо́гимъ къ тебѣ́ те́пле взыва́ющимъ:* на кого́ оставля́еши на́съ,* о́тче ми́лостиве?* ко́ему ли попече́нію на́съ вруча́еши?* оба́че и во странѣ́ земна́го прише́льствія твоего́* не преста́й пещи́ся о душа́хъ на́шихъ.

На стихо́внѣ окто́иха. Сла́ва, пра́веднаго, гла́съ 3:

Филаре́те, Бо́га ми́лостиваго подража́телю,* во дни́ земна́го житія́ твоего́,* всѣ́мъ, къ тебѣ́ приходя́щимъ, благотвори́лъ еси́,* коего́ждо ну́жду ду́хомъ прозрѣва́я* и по потре́бѣ его́ зла́то, сребро́ или́ гри́вны мѣ́дяны раздая́.* Тѣ́мже у́бо и мене́ къ тебѣ́ ны́нѣ приходя́щаго пріими́* и мое́ обнища́вшее се́рдце не пре́зри,* но твои́ми да́ры, ели́ко разсу́диши обогати́,* я́ко да ти́ благода́рнѣ воззову́:* ра́дуйся, о́тче премилосе́рднѣйшій Филаре́те.

Тропа́рь, гла́съ 4:

Авраа́му въ вѣ́рѣ подража́я,* Іову же въ терпѣ́ніи послѣ́дуя,* о́тче Филаре́те,* блага́я земли́ раздѣля́лъ еси́ неиму́щимъ,* и лише́ніе си́хъ терпѣ́лъ еси́ му́жественнѣ,* сего́ ра́ди свѣ́тлымъ тя́ вѣнце́мъ увѣнча́ Подвигополо́жникъ Христо́съ Бо́гъ на́шъ,* Его́же моли́ спасти́ся душа́мъ на́шимъ.


НА УТРЕНИ,
Кано́нъ, гла́съ 2, его́же краегране́сіе: Филаре́та солнцеобра́зную па́мять хвалю́.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты Еги́петскія, я́ко просла́вися.

Филаре́та пріиди́те, дне́сь па́мять да пра́зднуемъ, веселя́щеся свѣ́тло и ли́къ согла́сный составля́юще, того́ бо Христо́съ Бо́гъ ди́вно просла́ви.

Имѣ́ніе твое́, Филаре́те, Бо́гу взаи́мъ дава́лъ еси́, вре́меннымъ вѣ́чная, му́дрѣ, купу́я, тѣ́мже и сугу́бое воздая́ніе сподо́бился еси́ прія́ти, на земли́ че́стію и на небеси́ сла́вою вѣнча́вся.

Любве́ Христо́вы свѣти́льникъ и́стинный бы́въ, никíими же вѣ́тры скорбе́й и искуше́ній угаси́мый, любо́вію Боже́ственною сердца́ вѣ́рныхъ разже́глъ еси́, во е́же зва́ти ти́: Филаре́те боголюбе́зне, ра́дуйся!

Богоро́диченъ: Арха́нгельское цѣлова́ніе припѣва́юще, ра́дуйся, немо́лчно вопіе́мъ Ти́, ра́дости бо вся́кія Ты́ еси́ вина́, Влады́чице, мíру Спасе́ніе ро́ждши.

Пѣ́снь 3.

Ирмо́съ: Лу́къ сокруши́ся си́льныхъ держа́вою Твое́ю, Христе́, и си́лою немощству́ющіи препоя́сашася.

Ру́цѣ твои́ ни́щимъ и убо́гимъ, устнѣ́ же на похвалу́ Творцу́ и Бо́гу отверза́лъ еси́, пра́ведниче, тѣ́мже тебѣ́ Ра́йская врата́ ра́достію отверзо́шася.

Егда́ обнища́лъ еси́ привре́меннѣ, Филаре́те, Бо́гу любо́вь твою́ испыту́ющу, ника́коже уныва́я, упова́ніе твое́ на Бо́га, Иже смиря́етъ и возно́ситъ и богати́тъ, возлага́лъ еси́.

Теку́щему бога́тству се́рдца твоего́ не прилага́лъ еси́, но въ Бо́зѣ сіе́ утвержда́лъ еси́, Филаре́те му́дре, добролю́бче и́стинный.

Богоро́диченъ: Анна пра́ведная, весели́ся со Іоаки́момъ свѣ́тло, не по мно́зѣхъ бо дне́хъ вопи́ти и́маши ра́достно: се́ во мнѣ́ насѣ́яся Дре́ва Живо́тнаго Ко́рень пресла́вный.

Сѣда́ленъ, гла́съ 2:

Пріиди́те, сотвори́мъ учрежде́ніе ве́ліе и пи́ръ че́стенъ пріугото́вимъ, — къ дома́шнимъ твои́мъ глаго́лалъ еси́, Филаре́те, прише́ствіе самаго́ Царя́ со слуги́ Его́ въ до́мъ тво́й возвѣща́я. Егда́ же пріи́де вре́мя, изше́лъ еси́ во срѣ́теніе зва́ннымъ ни́щимъ и убо́гимъ Царя́-гра́да, чудя́щимся же всѣ́мъ зря́щимъ сія́ вопія́лъ еси́: сія́ су́ть слуги́ Ца́рскія, гряде́тъ же по си́хъ и Са́мъ Ца́рь. — Вои́стину у́бо Ца́рь царе́й Христо́съ на ве́черю твою́ пріи́де, Ему́же ны́нѣ во свѣ́тѣ невече́рнѣмъ любо́вію слу́жиши, за Ве́черію Его́ со святы́ми возлежа́ и воспѣва́я пѣ́снь стра́шную, Серафи́мы трегу́бо пѣсносло́вимую.

Пѣ́снь 4.

Ирмо́съ: Услы́шахъ, Го́споди, сла́вное Твое́ смотре́ніе и просла́вихъ, Человѣколю́бче, непостижи́мую Твою́ си́лу.

Сребро́ и зла́то и гри́вны мѣ́дяны лю́демъ, прося́щимъ у тебе́, раздая́, коего́ждо потре́бу ду́хомъ прозира́лъ еси́, ми́лостиве, Вседержа́внаго Влады́ки Христа́ имѣ́ніемъ му́дрѣ управля́я.

Оте́цъ си́рымъ и убо́гимъ показа́ся Филаре́тъ добролюби́вый и богому́дрый, и положи́ любо́вь держа́вну крѣ́пости свое́й.

Любо́вію досажде́нія и укоре́нія снося́, бога́тства же по подо́бію Іовлеву лиши́вся: Госпо́дь Бо́гъ мо́й — си́ла моя́, и То́й учини́тъ но́зѣ мои́ на соверше́ніе, — вопія́лъ еси́.

Богоро́диченъ: На спасе́ніе люде́й Твои́хъ исше́лъ еси́, Спа́се, отъ Дѣ́вы предъизбра́нныя вопло́щся во́лею, Юже непреста́нно блажи́мъ.

Пѣ́снь 5.

Ирмо́съ: Угль Иса́іи проявле́йся, Со́лнце изъ дѣ́вственныя утро́бы возсія́, во тьмѣ́ заблу́ждшимъ, Богоразу́мія просвѣще́ніе да́руя.

Царе́въ ю́жикъ бы́въ, Филаре́те, не превозне́слся еси́, Царя́ царе́й во о́бразѣ си́рыхъ и убо́гихъ почита́я, любо́вію же я́ко цари́цею добродѣ́телей украша́яся.

Ева́нгельски пожи́въ, Филаре́те, стори́чный пло́дъ Тому́ прине́съ, до́брая земля́ и ту́чная показа́лся еси́ Сѣ́ятелю Безнача́льному.

Образъ ми́лости богоподо́бныя показа́лъ еси́ на́мъ, свѣ́тъ тво́й предъ человѣ́ки по сло́ву Госпо́дню просіява́я, ко прославле́нію же Отца́ Небе́снаго вся́ подвиза́я.

Богоро́диченъ: Богоро́дицу и Ма́терь Емману́илеву, немо́лчными пѣ́сньми велича́юще, отъ Нея́ Рожде́ннаго ви́дѣвше, возопіе́мъ: съ на́ми Бо́гъ!

Пѣ́снь 6.

Ирмо́съ: Гла́съ глаго́лъ моле́бныхъ отъ болѣ́зненныя, Влады́ко, души́ услы́шавъ, отъ лю́тыхъ мя́ изба́ви: Еди́нъ бо еси́ на́шего спасе́нія вино́венъ.

Ру́цѣ твои́ дая́ніи благи́ми освяти́лъ еси́ и се́рдце ми́лостію разже́глъ еси́, ско́рби утоля́я и озло́бленныя утѣша́я, ра́дость же печа́ли вмѣ́сто принося́ всѣ́мъ.

Авраа́ма страннопріи́мнаго подража́я, Тро́ицу Живонача́льную почти́лъ еси́, Филаре́те, не во о́бразѣ тріе́хъ стра́нникъ Явля́емую, но во о́бразѣ мно́жества убо́гихъ отъ тебе́ усе́рдно Служи́му.

Зла́я, я́коже блага́я, отъ руки́ Госпо́дни пріе́мля, Іовлево терпѣ́ніе показа́лъ еси́, скорбьми́ же и лише́ньми обурева́емь, Бо́га благослови́лъ еси́, благослове́ніе всѣ́хъ пра́ведныхъ наслѣ́дуя.

Богоро́диченъ: Не и́мамы упова́нія, нѣ́сть на́мъ наде́жды, а́ще не Ты́, Богоро́дице, засту́пиши ны́ и отъ бѣ́дъ изба́виши всеси́льнымъ предста́тельствомъ Твои́мъ, его́же Сы́нъ Тво́й держа́вный не пре́зритъ.

Конда́къ гла́съ 3:

Истинно всеизря́дная твоя́ ку́пля зри́тся,* и му́дрою бы́ти су́дится* всѣ́ми благому́дрствующими:* отда́лъ бо еси́ до́льняя и краковре́менная,* взыску́я го́рнихъ и вѣ́чныхъ,* тѣ́мже и досто́йно стяжа́лъ еси́* вѣ́чную сла́ву, ми́лостиве Филаре́те.

Икосъ:

Красна́ и любе́зна вся́ка добродѣ́тель Христа́ ра́ди стяжава́ема: че́стенъ по́стъ и боголюбе́зно воздержа́ніе, зе́млю наслѣ́дуетъ кро́тость и на небеса́ возво́дитъ смиренному́дріе, вся́кій грѣ́хъ побѣжда́етъ покая́ніе и богозрѣ́ніе да́руется чи́стымъ сердца́мъ. Оба́че ми́лость и любы́ надъ всѣ́ми си́ми превозно́сится и на Стра́шнѣмъ Суди́щи Христо́вомъ отъ Судіи́ Пра́веднаго пе́рвѣе отъ всѣ́хъ истяжава́ется. Отъ Него́ же въ то́й де́нь ты услы́шиши, пра́ведниче: пріиди́, благослове́нне, Отца́ Небе́снаго наслѣ́дуй Ца́рство, отъ вѣ́ка угото́ванное и вѣ́чную сла́ву, ми́лостиве Филаре́те.

Пѣ́снь 7.

Ирмо́съ: Вѣтíи яви́шася о́троцы любому́дрѣйшіи дре́вле, отъ богопрія́тныя бо души́, богосло́вяще устна́ми, поя́ху: Пребоже́ственный отце́въ и на́шъ Бо́же, благослове́нъ еси́.

Учрежде́ніе ве́ліе пріугото́вивъ, Царя́ прихо́дъ и слу́гъ Его́ дома́шнимъ твои́мъ возвѣсти́лъ еси́, ни́щимъ же и убо́гимъ до́мъ тво́й испо́лнившимъ возопи́лъ еси́: се́ слуги́ Царе́вы, посредѣ́ же и́хъ пріи́де ко мнѣ́ неви́димо и Пребоже́ственный Ца́рь, благослове́нный Бо́гъ оте́цъ на́шихъ.

Юніи и ста́рцы, си́ры и вдови́цы ще́друю десни́цу твою́, Филаре́те, благословля́ху, о тебѣ́ благодаря́ще Христа́ Бо́га и уми́льно вопія́ху: Пребоже́ственный отце́въ Бо́же, благослове́нъ еси́.

Пріиди́те благослове́нніи Отца́ Моего́, наслѣ́дуйте Ца́рство, я́ко алка́хъ и жа́ждахъ и болѣ́зновахъ и послужи́сте Ми́, — возопіе́тъ Судія́ Христо́съ ко ми́лостивымъ на Стра́шнѣмъ суди́щи Свое́мъ; ты́ же тогда́, о́тче, неизрече́нно возвесели́шися.

Богоро́диченъ: Агнца Бо́жія грѣхи́ мíра подъе́мшаго и кро́вію Свое́ю христіа́ны омы́вшаго, моли́ Дѣви́це Богоро́дице, грѣхи́ на́ша отъя́ти, се́ бо сокруше́ннымъ се́рдцемъ и́щемъ лица́ Его́, Благослове́ннаго отъ всея́ тва́ри.

Пѣ́снь 8.

Ирмо́съ: О подо́біи зла́тѣ небре́гше треблаже́нніи ю́ноши, неизмѣ́нный и живы́й Бо́жій о́бразъ ви́дѣвше, среди́ огня́ воспѣва́ху: осуществова́нная да пое́тъ Го́спода вся́ тва́рь и превозно́ситъ во вся́ вѣ́ки.

Милосе́рднаго самаряни́на подража́я, не мимои́ди мя́ въ разбо́йники впа́дшаго грѣхи́ мно́гими, Филаре́те, оба́че еле́й моли́твъ твои́хъ на ду́шу мою́ лю́тѣ уя́звленную возле́й, ми́лостиве, я́ко да исцѣлѣ́въ благода́рнѣ Бо́гу воззову́: да пое́тъ Го́спода, ди́внаго во святы́хъ Свои́хъ, вся́ческая тва́рь.

Явля́ешися на́мъ му́дрый сокро́вищъ собира́тель и́хже тля́ не тли́тъ и ржа́ не снѣда́етъ, и́хже и въ небе́сныхъ храни́лищѣхъ соблюда́еши, тѣ́мже и се́рдце твое́ та́мо пребыва́етъ, уста́ же Го́спода, сы́тости не зна́ющи, воспѣва́ютъ во вѣ́ки.

Тельца́ злата́го дре́влѣ безу́мніи почита́вшіи осужда́ются, и тѣ́лу злато́му отъ царя́ въ Вавило́нѣ поста́вленному, прему́дріи о́троцы не поклони́вшіися ублажа́ются, ты́ же, Филаре́те, вторы́я, а не пе́рвыя подража́лъ еси́, истука́нъ бога́тства сокруша́я ра́достнѣ и воспѣва́я: да пое́тъ Го́спода вся́кая тва́рь во вѣ́ки.

Богоро́диченъ: Херуви́ми Ти́ кла́няются со стра́хомъ, Богоро́дице, и Серафи́ми Тя́ воспѣва́ютъ непреста́нно, вои́стину бо Небе́сный Ца́рь добро́ты Твоея́ возжела́, Ма́терію Свое́ю Тебе́ наре́къ, сего́ ра́ди лю́діе исповѣ́дятся Тебѣ́ во вѣ́ки и въ вѣ́къ вѣ́ка.

Пѣ́снь 9.

Ирмо́съ: Ве́сь еси́ жела́ніе, ве́сь сла́дость, Сло́ве Бо́жій, Дѣ́вы Сы́не, Бо́же бого́въ, Го́споди, святы́хъ Пресвяты́й, тѣ́мъ Тя́ вси́ съ Ро́ждшею велича́емъ.

Вѣ́рою бога́тство истощи́въ, вся́ отъ Бо́га па́ки прія́лъ еси́, вѣ́рою убо́гія пріе́мля и учрежда́я, Самаго́ Бо́га пріима́лъ еси́, вѣ́рою пожи́лъ еси́ и вѣ́рою пресели́лся еси́ во оби́тели вѣ́чныя, идѣ́же Бо́га со пра́ведныхъ ли́ки велича́еши.

Авраа́мовъ подража́телю и Тро́ицы Безнача́льныя учреди́телю, Влады́чній слуго́ и дру́же преи́скреннѣйшій, ми́ловалъ еси́ вся́ку тва́рь, ми́лость Бо́жію тѣ́мъ къ себѣ́ преклоня́я, тѣ́мже ми́лостію твое́ю и на́съ посѣти́, вседу́шно тя́ велича́ющихъ.

Любо́вію твое́ю возсія́ на́мъ, Филаре́те, я́ко со́лнце просія́вый въ пра́веднѣй кончи́нѣ твое́й, я́ко да свѣ́тло о тебѣ́ веселя́щеся, Бо́га во святы́хъ Свои́хъ Ди́внаго велича́емъ.

Богоро́диченъ: Юніи и ста́рцы, бога́тіи и убо́зіи, мона́си и мірстíи, пра́ведницы и грѣ́шницы ка́ющіися, пріиди́те припаде́мъ къ Бо́жіей Ма́тери, вопію́ще къ Не́й: подъ кро́вомъ Твои́мъ соблюда́й на́съ при́сно, Влады́чице, Тя́ велича́ющихъ.

Свѣти́ленъ дне́.
Сла́ва, пра́ведному. Подо́бенъ: До́ме Евфра́ѳовъ.

Со́лнцу спросія́вый добродѣ́ланіемъ, добролю́бче и́стинный, Со́лнце Пра́вды ны́нѣ я́вственно зри́ши, Его́же моли́ непреста́нно, ми́лостиве, отъ бѣ́дъ изба́вити на́съ.

На стихо́внѣ окто́иха.

/ Къ оглавленію раздѣла /


Наверхъ / Къ титульной страницѣ

0