Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 5.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 1-й де́нь.
Слу́жба свято́му пра́ведному Филаре́ту Ми́лостивому.

НА ВЕЛИЦѢЙ ВЕЧЕРНИ,
По предначина́тельномъ псалмѣ́: Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 4:

Пріиди́те, веселя́щеся, и, я́ко на ве́чери духо́внѣй ликовству́юще, возгласи́мъ пѣ́сни досто́йныя: о́тче Филаре́те, ты́ вои́стинну, по и́мени своему́, вся́кую добродѣ́тель возлюби́лъ еси́, и́мени бо твоему́ согла́сная показа́лъ еси́ дѣя́нія, въ ни́хже обрѣ́лъ еси́ лѣ́ствицу восхожде́нія на не́бо. [Два́жды.]

Да́лъ еси́ убо́гимъ, расточа́я бога́тство твое́, ми́лостиве Филаре́те, сего́ ра́ди пребыва́етъ пра́вда твоя́, я́коже Дави́дъ глаго́летъ, и въ па́мять вѣ́чную вѣ́рнымъ бу́детъ, всехва́льне. Дне́сь у́бо всечестну́ю па́мять твою́ любо́вію пра́зднующе, досто́йно чти́мъ тя́, я́ко изря́дна бога́тства раздая́теля.

Ника́коже земля́ изно́ситъ тебѣ́ въ дѣ́лѣхъ твои́хъ по зако́ну кля́твы те́рнія и волчцы́ въ наказа́ніе, я́коже дре́вле пра́отцу Ада́му, но благослове́нія ороше́ніемъ кла́съ возраща́етъ ти́ многопло́дный. Сего́ ра́ди умно́жился еси́ ми́лостынею ко убо́гимъ, отъ нея́же но́сиши проименова́ніе, ми́лостиве Филаре́те.

Якоже Авель пра́ведный избра́нная отъ ста́да принесе́ Го́споду, та́кожде и ты́, я́ко благíй земледѣ́латель, въ житіи́ твое́мъ не то́чію нача́тки плодо́въ, но и вся́, я́же пріима́лъ еси́, блаже́нне, подава́лъ еси́ нужда́ющимся, въ нищетѣ́ же и са́мъ жи́тельствовалъ еси́, нападе́ніемъ де́монскимъ не измѣ́ненъ бы́въ во твое́мъ произволе́ніи.

Воспрія́лъ еси́ крилѣ́, и́хже дре́вле вожделѣ́ Дави́дъ, любо́вь къ Бо́гу и бли́жнему и подража́ніе Христу́, богому́дре, и́миже возлетѣ́лъ еси́, о́тче, на го́ры мы́сленныя соверше́нства и та́мо почи́лъ еси́, веселя́ся со всѣ́ми пра́ведными и преподо́бными, блаже́нне Филаре́те.

Сла́ва, гла́съ 6:

Дая́ніе человѣ́ка распространя́етъ его́, глаго́летъ при́тча, и съ си́льными посажда́етъ его́. Вои́стинну и ты́, распространя́емь, жи́тельствовалъ еси́, всесла́вне Филаре́те: зане́ отверза́я, отверза́лъ еси́ ру́цѣ твои́ бра́ту твоему́ ни́щему. Послѣди́ же и изъ про́ста въ сла́вна возведе́нъ бы́лъ еси́, при́снымъ бы́въ христоимени́таго царя́, Бо́гу тя́ въ ско́рби распространя́ющу, я́ко возлюби́вшу твое́ благосострада́тельное произволе́ніе: Бо́гу бо возлю́блена е́сть ми́лостыня.

И ны́нѣ, гла́съ то́йже:

Сіо́не, торжеству́й, Іерусали́ме, весели́ся, гра́де Христа́ Бо́га, пріими́ Зижди́теля, въ верте́пѣ и я́слехъ полага́емаго; отве́рзите ми́ врата́, вше́дъ въ ня́, узрю́ я́ко Младе́нца повива́емаго, дла́нію же содержа́щаго тва́рь. Его́же пою́тъ а́нгели непреста́ннымъ гла́сомъ, Жизнода́вца Го́спода, спаса́ющаго ро́дъ на́шъ.

Вхо́дъ. Свѣ́те ти́хій... Проки́менъ дне́.

Бытія́ чте́ніе. [Глава́ 18.]

Яви́ся Авраа́му Бо́гъ у ду́ба Мамврíйска, сѣдя́щу ему́ предъ две́рьми сѣ́ни своея́ въ полу́дни. Воззрѣ́въ же очи́ма свои́ма, ви́дѣ, и се́ Тріе́ Му́жи стоя́ху надъ ни́мъ, и, ви́дѣвъ, притече́ въ срѣ́теніе Имъ отъ двере́й сѣ́ни своея́, и поклони́ся до земли́, и рече́: Го́споди, а́ще у́бо обрѣто́хъ благода́ть предъ Тобо́ю, не мини́ раба́ Твоего́. Да принесе́тся вода́, и омы́ются но́ги Ва́ша, и прохладите́ся подъ дре́вомъ. И принесу́ хлѣ́бъ, да я́сте, и посе́мъ по́йдете въ пу́ть Сво́й, его́же ра́ди уклони́стеся къ рабу́ Ва́шему. И реко́ша: та́ко сотвори́, я́коже глаго́лалъ еси́. И потща́ся Авраа́мъ въ сѣ́нь къ Са́ррѣ и рече́ е́й: ускори́, и смѣси́ три́ мѣ́ры муки́ чи́сты, и сотвори́ потре́бники. И тече́ Авраа́мъ ко кра́вамъ, и взя́ тельца́ мла́да и добра́, и даде́ рабу́, и ускори́ пригото́вити е́. И взя́ ма́сло, и млеко́, и тельца́, его́же пригото́ва, и предложи́ и́мъ, и ядо́ша, са́мъ же стоя́ше предъ Ни́ми подъ дре́вомъ. Госпо́дь же рече́: еда́ утаю́ Азъ отъ Авраа́ма, раба́ Моего́, я́же Азъ творю́? Авраа́мъ же, быва́я, бу́детъ въ язы́къ вели́къ и мно́гъ, и благословя́тся о не́мъ вси́ язы́цы земнíи. Вѣ́мъ бо, я́ко заповѣ́сть сыно́мъ свои́мъ и до́му своему́ по себѣ́, и сохраня́тъ пути́ Госпо́дни, твори́ти пра́вду и су́дъ.

Іова чте́ніе. [Глава́ 1.]

Человѣ́къ нѣ́кій бя́ше во странѣ́ Авситидíйстѣй, ему́же и́мя Іовъ. И бѣ́ человѣ́къ о́нъ и́стиненъ, непоро́ченъ, пра́веденъ, благочести́въ, удаля́яйся отъ вся́кія лука́выя ве́щи. Бы́ша же ему́ сы́нове се́дмь и дще́ри три́. И бя́ху ско́ти его́: ове́цъ се́дмь ты́сящъ, велблю́довъ три́ ты́сящи, супру́гъ воло́въ пя́ть со́тъ, и осли́цъ пасо́мыхъ пя́ть со́тъ, и слу́гъ мно́го зѣло́, и дѣла́ ве́лія бя́ху ему́ на земли́, и бѣ́ человѣ́къ о́ный благоро́днѣйшій су́щихъ отъ восто́къ со́лнца. И бы́сть я́ко де́нь се́й, сы́нове Іовлевы и дще́ри его́ пія́ху вино́ въ дому́ бра́та своего́ старѣ́йшаго. И се́ вѣ́стникъ пріи́де ко Іову, и рече́ ему́: супру́ги воло́въ оря́ху, и осли́цы пася́хуся бли́зъ и́хъ. И, прише́дше, плѣни́тели плѣни́ша и́хъ и о́троки изби́ша мече́мъ, и спасо́хся а́зъ еди́нъ, и пріидо́хъ возвѣсти́ти тебѣ́. Еще́ сему́ глаго́лющу, пріи́де и́нъ вѣ́стникъ, и рече́ ко Іову: о́гнь спаде́ съ небесе́, и пожже́ о́вцы, и па́стыри пояде́ подо́бнѣ, спасо́хся же а́зъ еди́нъ и пріидо́хъ возвѣсти́ти тебѣ́. Еще́ сему́ глаго́лющу, пріи́де и́нъ вѣ́стникъ, и рече́ ко Іову: ко́нницы сотвори́ша нача́льства три́, и окружи́ша велблю́ды, и плѣни́ша и́хъ, и о́троки изби́ша мечми́, спасо́хся же а́зъ еди́нъ и пріидо́хъ возвѣсти́ти тебѣ́. Еще́ сему́ глаго́лющу, и́нъ вѣ́стникъ пріи́де, глаго́ля Іову: сыно́мъ твои́мъ и дще́ремъ твои́мъ яду́щимъ и пію́щимъ у бра́та своего́ старѣ́йшаго, внеза́пу вѣ́тръ вели́къ на́йде отъ пусты́ни и косне́ся четы́ремъ угло́мъ хра́мины, и паде́ хра́мина на дѣ́ти твоя́, и сконча́шася, спасо́хся же а́зъ еди́нъ и пріидо́хъ возвѣсти́ти тебѣ́. Та́ко (услы́шавъ) Іовъ, воста́въ, растерза́ ри́зы своя́, и остриже́ власы́ главы́ своея́, (и посы́па пе́рстію главу́ свою́), и, па́дъ на зе́млю, поклони́ся (Го́сподеви), и рече́: са́мъ на́гъ изыдо́хъ отъ чре́ва ма́тере моея́, на́гъ и отыду́ та́мо. Госпо́дь даде́, Госпо́дь отъя́тъ, я́ко Го́сподеви изво́лися, та́ко бы́сть. Бу́ди и́мя Госпо́дне благослове́но во вѣ́ки. Во всѣ́хъ си́хъ, приключи́вшихся ему́, ничто́же согрѣши́ Іовъ предъ Го́сподемъ, (ниже́ устна́ма свои́ма), и не даде́ безу́мія Бо́гу. Госпо́дь же благослови́ послѣ́дняя Іовля, не́же пре́жняя.

Прему́дрости Соломо́новы чте́ніе. [Глава́ 5.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ры, гла́съ 1:

О, крѣ́пкія и адама́нтовыя души́ твоея́, достоублажа́еме Филаре́те! Ты́ бо, небе́сныхъ всѣ́мъ жела́ніемъ взыску́я, су́щая на земли́ нивочто́же вмѣня́лъ еси́. Сего́ ра́ди ни десна́я, ни шу́яя возмого́ша сокруши́ти крѣ́пость предложе́нія твоего́, благоизво́льнѣ же ско́рби прія́лъ еси́, подража́я Христу́. Яко у́бо сла́вно улучи́вый жела́ніе твое́, помина́й на́съ, чту́щихъ тя́, о́тче пресла́вный.

Гла́съ 2:

Да́лъ еси́ отъ души́ а́лчущимъ хлѣ́бъ тво́й и ду́ши смире́нныя насы́тилъ еси́, христоподража́тельне Филаре́те, сего́ ра́ди возсія́, по проро́ку, во тьмѣ́ свѣ́тъ тво́й, и тьма́ твоя́ бы́сть, я́ко полу́дне. Бо́гъ бѣ́ съ тобо́ю при́сно. Испо́лнися душа́ твоя́, и ко́сти твоя́ утучнѣ́ша, я́ко вертогра́дъ напое́нный, ему́же не оскудѣ́ вода́: сѣ́яй бо во благослове́ніи, во благослове́ніи и по́жнетъ.

Око бы́лъ еси́ слѣпы́мъ, нога́ хромы́мъ и оте́цъ немощны́мъ, всему́дре Филаре́те, вѣ́дый, я́ко слѣпе́цъ ми́луемый благíй во́ждь е́сть въ Ца́рствіе небе́сное, и стѣна́мъ приража́яйся и па́даяй въ ро́въ отъ не́мощи, руко́ю же милосе́рдія подъе́млемый уготовля́етъ пу́ть восхожде́нію на не́бо. Си́це у́бо и ты́, возше́дъ къ Сѣдя́щему на высо́кихъ, вы́ну предстои́ши Ему́, моля́ спасти́ся отъ вся́каго зла́ соверша́ющимъ и любо́вію чту́щимъ святу́ю па́мять твою́.

Сла́ва, гла́съ 5:

Ве́лія ми́лостыни си́ла: съ ве́ліимъ бо дерзнове́ніемъ вво́дитъ въ Ца́рствіе небе́сное, зна́ема су́щи храня́щимъ две́ри черто́га небе́снаго, и а́ще кíихъ позна́етъ, чту́щихъ ю́, съ ве́ліимъ вво́дитъ дерзнове́ніемъ. Сіе́ начерта́ тро́сть богосло́вская, твоя́ же щедрода́тельная рука́ дѣ́ломъ утверди́, Филаре́те: благодерзнове́нно бо восходи́лъ еси́ и невозбра́нно вше́лъ еси́ въ Ца́рствіе небе́сное, я́ко ми́лостивый, всеблаже́нне.

И ны́нѣ, гла́съ то́йже:

Ублажа́емъ Тя́, Богоро́дице Дѣ́во, и сла́вимъ Тя́, вѣ́рніи, по до́лгу, гра́дъ су́щую непоколеби́мый, и стѣ́ну необори́мую, и предста́тельство и прибѣ́жище ду́шъ на́шихъ.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Возсіява́етъ на тве́рди церко́внѣй свѣтоно́сная, о́тче, па́мять твоя́, я́ко заря́ Со́лнца непристу́пнаго, изъ о́блака свѣ́тла возсіява́ющаго въ Виѳлее́мѣ и ле́сть мра́чную многобо́жія потребля́ющаго.

Сти́хъ: Пра́ведникъ, я́ко фи́никсъ, процвѣте́тъ, я́ко ке́дръ, и́же въ Лива́нѣ, умно́жится.

Па́че со́лнца возсія́вшее мíру житіе́ твое́ лучи́ милосе́рдія испусти́, разгоня́ющія нищеты́ мра́чный о́блакъ и мра́зомъ скорбе́й одержи́мымъ жи́зненную теплоту́ подаю́щія, всеблаже́нне Филаре́те.

Сти́хъ: Ве́сь де́нь ми́луетъ и взаи́мъ дае́тъ пра́ведный, и сѣ́мя его́ во благослове́ніе бу́детъ.

Соверша́ющимъ на́мъ вѣ́рою всесвѣ́тлую па́мять твою́, моли́, о́тче, по мно́гому твоему́ къ Бо́гу дерзнове́нію, изба́вится мра́ка страсте́й и вся́кихъ напа́стей житія́ и улучи́ти съ тобо́ю ра́дости несконча́емыя.

Сла́ва, гла́съ 8:

Бога́тствомъ изоби́луяй и ста́ды, я́ко но́вый Іовъ, во благода́ти показу́ешися, не то́чію во оби́ліи пра́веденъ, но и въ терпѣ́ніи непоро́ченъ: внеза́пу бо, я́коже о́нъ, всего́ стяжа́нія лиши́вся, ниже́ усты́ проти́ву Го́спода согрѣши́лъ еси́, ниже́ да́лъ еси́ безу́мія Бо́гу, терпѣли́вѣйшій. Сего́ ра́ди еще́ и въ се́мъ животѣ́ бо́льшими, па́че пре́жнихъ, бла́гами воздаде́ пра́вдѣ твое́й Госпо́дь правосу́дный, послѣди́ же, къ Нему́ отше́дша, вѣнце́мъ терпѣ́нія увѣнча́ннаго, Себѣ́ предста́ви. Дерзнове́ніе у́бо стяжа́въ къ Нему́, моли́ся прилѣ́жно спасти́ся на́мъ, Филаре́те пресла́вне.

И ны́нѣ, гла́съ то́йже:

Виѳлее́ме, угото́вися, украси́теся, я́сли, верте́пе, пріими́ Гряду́щаго съ небесе́: Бо́гъ изъ Дѣ́вы яви́ся человѣ́комъ, воспріи́мъ на́шъ о́бразъ и обожи́въ воспрія́тіе. Сего́ ра́ди обновля́ется Ада́мъ со Евою, взыва́я: на земли́ яви́ся благоволе́ніе, во е́же спасти́ ро́дъ на́шъ.

Тропа́рь свято́му, гла́съ 4:

Авраа́му въ вѣ́рѣ подража́я, Іову же въ терпѣ́ніи послѣ́дуя, о́тче Филаре́те, блага́я земли́ раздѣля́лъ еси́ неиму́щимъ и лише́ніе си́хъ терпѣ́лъ еси́ му́жественнѣ. Сего́ ра́ди свѣ́тлымъ тя́ вѣнце́мъ увѣнча́ Подвигополо́жникъ, Христо́съ Бо́гъ на́шъ, Его́же моли́ спасти́ся душа́мъ на́шимъ.

Сла́ва, и ны́нѣ, богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.


НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 1:

Зе́млю, я́ко земледѣ́латель, плу́гомъ разсѣка́я и съ упова́ніемъ сѣ́мена поверга́я, плоды́ изря́дны собра́лъ еси́, я́же, серпо́мъ благотворе́нія пожа́вши, въ жи́тницы небе́сныя положи́лъ еси́, прему́дре: ни́щимъ бо раздая́лъ еси́ ще́дро, а́лчущія пита́я и тре́бующимъ подава́я съ любо́вію, ми́лостиве Филаре́те. [Два́жды.]

Сла́ва, и ны́нѣ, богоро́диченъ:

Преклони́вый небеса́ и всели́выйся во утро́бу Дѣ́вы гряде́тъ пло́тію роди́тися въ верте́пѣ Виѳлее́мстѣмъ, я́коже пи́сано е́сть: да у́зрится я́ко Младе́нецъ, младе́нцы животворя́й во чре́вѣ. Сему́, ра́дующеся, изы́демъ ны́нѣ во срѣ́теніе вси́ сердца́ми пра́выми.

По 2-мъ стихосло́віи сѣда́ленъ, гла́съ 5:

Боже́ственнаго Па́вла словесе́мъ вы́ну повину́яся и дѣ́ломъ тыя исполня́я, раздая́лъ еси́ вся́ въ простотѣ́, Филаре́те ми́лостиве, и милосе́рдовалъ еси́ на кíйждо де́нь со ще́дростію и весе́ліемъ, а не отъ ско́рби, ни отъ ну́жды, ниже́ съ пощадѣ́ніемъ, я́коже о́нъ повелѣва́етъ. [Два́жды.]

Сла́ва, и ны́нѣ, богоро́диченъ:

Виѳлее́ме, угото́ви я́же къ срѣ́тенію Марíи Дѣ́вы и Богома́тере: се́ бо гряде́тъ къ тебѣ́ нося́щая во утро́бѣ Свое́й Младе́нца Христа́, Отцу́ и Свято́му Ду́ху Собезнача́льна, Его́же роди́тъ въ верте́пѣ и по рождествѣ́ па́ки Дѣ́ва пребу́детъ.

По поліеле́и сѣда́ленъ, гла́съ 8:

Се́ терпя́щій лише́ніе во все́мъ и уничиже́ніе, просте́цъ и ни́щъ, въ ца́рстѣмъ до́мѣ быва́етъ, я́ко кня́зь, бога́тъ же, и при́сный царе́мъ, и сла́венъ предъ всѣ́ми явля́ется, яко́въ же бѣ́ и пре́жде, нра́ва ра́ди и житія́ непоро́чнаго. [Два́жды.]

Сла́ва, и ны́нѣ, богоро́диченъ:

Дѣ́вы, предначни́те ра́дованіе Дѣ́вы; ма́тери, хвала́ми Ма́терь Христа́ Бо́га сря́щите; волсви́, со звѣздо́ю предыди́те, па́стыріе со а́нгелы, воспо́йте: гряде́тъ бо Дѣ́ва во гра́дѣ Виѳлее́мѣ роди́ти Сы́на. Ея́же моли́твами, Бо́же, спаси́ на́съ.

Степе́нна, 1-й антифо́нъ 4-го гла́са. Проки́менъ, гла́съ 4: Ве́сь де́нь ми́луетъ и взаи́мъ дае́тъ пра́ведный,* и сѣ́мя его́ во благослове́ніе бу́детъ. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе Матѳе́я, зача́ло 16.

По 50-мъ псалмѣ́ стихи́ра, гла́съ 2:

Благотворя́й отъ Бо́га е́сть, глаго́летъ Богосло́въ, и ты́ у́бо отъ Бо́га еси́, ми́лостиве Филаре́те. Якоже бо Бо́жіе е́сть, та́ко и твое́ бы́сть дѣ́ло, е́же благодѣ́яти, Того́ у́бо по естеству́, твое́ же по прича́стію.

Кано́нъ [Богоро́дицы со ирмосо́мъ на 6 и] свята́го на 8, гла́съ 1.

Пѣ́снь 1.

Ирмо́съ: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Недоумѣ́ннымъ язы́комъ и устна́ми хвалу́ кра́ткую принося́ твоему́, Филаре́те, богоподража́тельному житію́, молю́ тя: я́ко ми́лостивый, Спа́са и Бо́га ми́лость испроси́ ми твои́ми моли́твами.

Укрѣпля́ема тя́ си́лою Ду́ха, ничто́же отъ до́льнихъ преклони́ти тя́ возмо́же, горѣ́ взира́юща при́сно умо́мъ и вожделѣва́юща непрестаю́щее улучи́ти блаже́нство.

Благода́ть Ду́ха, обрѣ́тши се́рдце твое́ таково́, яково́ же уго́дно е́сть е́й, всели́ся въ не́ и обита́етъ въ не́мъ, неоску́дный вои́стинну въ не́мъ явля́я ми́лости исто́чникъ, добродѣ́тели же вся́кія вмѣсти́лище, досточу́дне.

Богоро́диченъ: Безсѣ́меннѣ во чрѣ́ве прія́ла еси́ Сло́во, еди́наго отъ Тро́ицы, Всенепоро́чная, и Сего́ по пло́ти родила́ еси́, пребы́вши по рождествѣ́, я́коже пре́жде рождества́, Дѣ́ва. Сего́, я́ко Сы́на Твоего́ и Бо́га, о на́съ при́сно моли́.

Пѣ́снь 3.

Ирмо́съ: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Пре́жде вѣ́къ отъ Отца́ неизрече́нно рожде́ннаго Сы́на и въ послѣ́дняя отъ Дѣ́вы воплоще́ннаго безсѣ́меннѣ Христа́ подража́тель бы́въ, по достоя́нію христоподража́тельный глаго́лешися, Филаре́те.

Ве́ліе твое́, блаже́нне, милосе́рдіе Го́спода возвесели́: напита́лъ бо еси́ а́лчуща, одѣ́ялъ еси́ на́га, стра́нна вве́лъ еси́ въ до́мъ тво́й и не́мощна радѣ́тельнѣ посѣти́лъ еси́, свя́те.

Вся́ страна́ Пафлаго́нская весели́тся дне́сь, чту́щи твою́ па́мять всечестну́ю, А́мнія же пелена́ми твои́ми хва́лится, вопію́щи: возвели́чихся и а́зъ тобо́ю, свя́те Филаре́те.

Богоро́диченъ: Святѣ́йшая а́нгелъ и всея́ тва́ри вели́каго Отчаго совѣ́та Ангела дне́сь ражда́етъ пло́тію во спасе́ніе всѣ́хъ, пою́щихъ Ему́ непреста́нно: Свя́тъ еси́, Го́споди.

Сѣда́ленъ, гла́съ 8:

Милостинолю́бный по́мыслъ воспрія́въ, благосострада́теленъ яви́лся еси́ ни́щимъ и нужда́ющимся, всеблаже́нне, сего́ ра́ди зва́ніе, дѣя́нію сро́дное, у всѣ́хъ но́сиши, вѣ́рно чту́щихъ тя́. Тѣ́мже и Пода́тель бла́гъ ве́ліею ми́лостію поми́лова и сла́вно просла́ви тя́, ми́лостиве Филаре́те. Христа́ у́бо моли́ грѣхо́въ оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Рождества́ Христо́ва предпра́зднственная соверша́юще, вѣ́рніи, торжеству́емъ и досто́йнѣ вси́ предусря́щимъ, я́коже волсви́, даронося́ще добродѣ́тели и пою́ще а́нгеловъ пѣ́снь но́вую отъ Дѣ́вы Богоотрокови́цы въ Виѳлее́мѣ безъ сѣ́мене ражда́ющемуся Бо́гу на́шему, Его́же сла́вятъ вся́ческая.

Пѣ́снь 4.

Ирмо́съ: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Храни́тель за́повѣдей Христо́выхъ бы́лъ еси́ тща́тельнѣйшій и испо́лнитель непосты́дный: Бо́га бо отъ се́рдца и бра́та, я́ко себе́ сама́го, возлюби́лъ еси́, обои́мъ воздава́я, всесла́вне, подоба́ющая.

Отъ Бо́га изрече́нное за преслуша́ніе Ада́му осужде́ніе: въ по́тѣ лица́ твоего́ снѣ́си хлѣ́бъ тво́й, — обнося́ въ по́мыслѣ, смире́ннѣ зе́млю воздѣ́ловалъ еси́, я́же и подава́ше тебѣ́ потре́бная къ житію́ оби́льнѣ.

Избавле́ніе души́ му́жа — свое́ ему́ бога́тство, глаго́летъ при́тча. Но, о, му́жества! ты́ отда́лъ еси́ послѣ́дняго отъ двою́ вола́ бли́жнему твоему́ и сего́ ра́ди поноси́мый отъ супру́ги твоея́, я́ко неразу́мный и неключи́мый, благослове́ніями то́й возда́лъ еси́.

Богоро́диченъ: Ты́ вои́стинну вы́сшая человѣ́ковъ и а́нгелъ честнѣ́йшая, Богоро́дице Дѣ́во, яви́лася еси́: вся́ческихъ бо Творца́ во чре́вѣ прія́ла и родила́ еси́ безъ сѣ́мене, благоволи́вшаго вочеловѣ́читися отъ Тебе́ во спасе́ніе ду́шъ на́шихъ.

Пѣ́снь 5.

Ирмо́съ: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Ско́ръ сы́й въ раздая́ніи и ми́лованіи, отдава́лъ еси́ и послѣ́дняя твоя́ тре́бующимъ, тѣ́мже Ева́нгелію Христо́ву вои́стинну послѣ́довалъ еси́, подража́я въ милосе́рдіи Отцу́ Небе́сному.

Слы́ша стропти́вая словеса́ жены́ и ча́дъ твои́хъ, укоря́ющихъ тя́ за милосе́рдіе, благоду́шнѣ терпѣ́лъ еси́, всеблаже́нне, я́коже Іовъ, оба́че и предре́клъ еси́ и́мъ, я́ко прови́дѣцъ, отъ Бо́га воздая́ніе благотворе́нія твоего́, сла́вне.

Объе́млется печа́лію и го́рестію мно́гою со ча́ды супру́жница твоя́, слы́шащи гла́съ дои́лицы, ю́ницу свою́ зову́щія, ты́ же, безпеча́ленъ пребыва́я въ лише́ніяхъ, о прося́щихъ тя́ сле́зно па́че болѣ́зновалъ еси́.

Богоро́диченъ: Спаси́тельный кро́въ и всѣ́хъ ра́дованіе, предваря́ющая ско́ро и спаса́ющая, умилосе́рдися и ны́нѣ, взыва́емъ къ Тебѣ́, Чи́стая, о на́съ, призыва́ющихъ Тя́ всегда́ во обстоя́ніи: предста́тельства бо у Бо́га ина́го равномо́щнаго не и́мамы.

Пѣ́снь 6.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Благонамѣ́ренія твоего́ неизмѣ́нность ве́ліе е́сть вои́стинну соверше́нство: ше́ствуя бо въ житіи́ путе́мъ ца́рскимъ, вше́лъ еси́ со дерзнове́ніемъ въ Ца́рствіе непрестаю́щее, идѣ́же соца́рствуеши вѣ́чному Царю́ Сла́вы, ми́лостиве Филаре́те.

Ино́го Авраа́ма показа́ тя́ мíрови вѣ́ра вку́пѣ и человѣколю́біе твое́: боголю́бнѣ бо ко всѣ́мъ благо́е расположе́ніе явля́лъ еси́, доброхо́тнѣ же всѣ́мъ тре́бующимъ подава́лъ еси́. Сего́ ра́ди бога́тнѣ воздая́ше тебѣ́ Бо́гъ въ дѣ́лѣхъ твои́хъ.

Что́ ми зла́то, что́ ми бога́тство, сла́ва же и вся́ земна́я мимотеку́щая? Ничто́же су́ть вся́ко, поне́же въ ничто́ обраща́ются, многолюбе́зно же ми́ еди́но бога́тство небе́сное, всегда́ пребыва́ющее, — Филаре́та язы́къ провѣщава́ше.

Богоро́диченъ: Нѣ́дръ не отлучи́вся Безнача́льнаго Роди́теля, Сы́нъ безма́терній во утро́бу Чи́стыя Дѣ́вы вселя́ется, безъ отца́ воплоща́емь, Ца́рь пра́вды, Бо́гъ. Того́ ро́дъ стра́шенъ, неисповѣди́мь и неизслѣ́димь.

Конда́къ, гла́съ 3. Подо́бенъ: Дѣ́ва дне́сь.

Истинно всеизря́дная твоя́ ку́пля зри́тся и му́дрою бы́ти су́дится всѣ́ми благому́дрствующими: отда́лъ бо еси́ до́льняя и кратковре́менная, взыску́я го́рнихъ и вѣ́чныхъ. Тѣ́мже и досто́йно стяжа́лъ еси́ вѣ́чную сла́ву, ми́лостиве Филаре́те.

Икосъ:

Го́спода услы́шалъ еси́, во Ева́нгеліи законополага́юща: продади́те имѣ́нія ва́ша и дади́те ми́лостыню, сотвори́те себѣ́ влага́лища неветша́юща, сокро́вище неоскудѣва́ющее на небесѣ́хъ, идѣ́же ни та́ть кра́детъ, ни мо́ль истлѣва́етъ. Сего́ боже́ственнаго и къ соверше́нству возводя́щаго законоположе́нія ре́вностный исполни́тель бы́лъ еси́: прода́лъ бо еси́ вся́ и да́лъ еси́ ми́лостыню, сотвори́лъ еси́ себѣ́ влага́лища нетлѣ́нна и сокро́виществовалъ еси́ сокро́вище на небесѣ́хъ некра́домое. Сего́ ра́ди и блаже́нствуеши со благослове́нными Отца́ Небе́снаго, я́ко наслѣ́дникъ отъ сложе́нія мíра угото́ваннаго Ца́рствія, ми́лостиве Филаре́те.

Пѣ́снь 7.

Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Въ тебѣ́, не то́чію не измѣ́ншемся отъ діа́воля нападе́нія, но па́че въ добродѣ́тели укрѣ́пльшемся, Филаре́те, вои́стинну Христо́съ просла́вися, вра́гъ же, искуша́яй тя́, постыдѣ́ся. Сего́ ра́ди взыва́лъ еси́: Бо́же, благослове́нъ еси́.

На предложе́ніе твое́, блаже́нне, призира́етъ Христо́съ и воздае́тъ ти́ мно́гими благи́ми пе́рвѣе, по искуше́ніи же и бо́льшими. Сего́ ра́ди и взыва́лъ еси́: Бо́же, благослове́нъ еси́.

Нра́въ тво́й страннолюби́вому нра́ву Авраа́мову подо́бится, блаже́нне Филаре́те: ты́ бо, я́коже то́й, пу́тники не оставля́лъ еси́ мимоити́, но са́мъ во срѣ́теніе и́мъ те́клъ еси́, взыва́я: Бо́же, благослове́нъ еси́.

Богоро́диченъ: Отъ всѣ́хъ пріе́млющи проше́нія, Богоро́дице, моли́ся Сы́ну Твоему́ и Бо́гу отъ всѣ́хъ зо́лъ изба́витися на́мъ, чту́щимъ Тя́ и ко Го́споду взыва́ющимъ: отце́въ Бо́же, благослове́нъ еси́.

Пѣ́снь 8.

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Гостепріи́мство твое́, ми́лостиве, чу́да бы́сть вои́стинну вино́вно, егда́ благопрія́тенъ показа́ся невѣстоводи́телемъ царя́ и самому́ царю́ христоиме́нному вну́ки твоея́ о́бразъ. Сего́ ра́ди и жре́бій благíй устро́ися е́й ку́пно съ тобо́ю Бо́жіимъ смотре́ніемъ, вся́ пра́вящимъ.

Глаго́лы му́дрости, о́тче, прія́лъ еси́ во глубину́ души́ твоея́, сего́ ра́ди отъ блага́го сокро́вища се́рдца твоего́ благíя плоды́ изне́слъ еси́. Тѣ́мже воспрія́лъ еси́ блага́я и въ животѣ́ твое́мъ, бы́въ сро́дникъ царе́въ сла́вный и бога́тый, по успе́ніи же твое́мъ Ца́рствіе небе́сное наслѣ́довалъ еси́.

Вели́ка и́стинно показа́ тя ра́зума твоего́ и́стина, блаже́нне, а не отъ человѣ́къ сла́ва и свѣ́тлость привре́меннаго досто́инства, я́ко при́сно пребыва́ющихъ взыску́я, къ тѣ́мъ вся́чески стреми́лся еси́. Тѣ́мже тя́ восхваля́емъ, Филаре́те богому́дре.

Богоро́диченъ: Стра́ннаго собы́тія о́бразъ показа́ купина́, неопа́льно горя́щая дре́вле на горѣ́ Сина́и, та́инство рождества́ Твоего́ прообразу́ющи, Пренепоро́чная Дѣ́во: о́гнь бо въ Тебѣ́ Божества́ все́льшійся неврежде́нну Тя́ сохрани́. Сего́ ра́ди Тя́ пое́мъ во вся́ вѣ́ки.

Пѣ́снь 9.

Ирмо́съ: Та́инство стра́нное ви́жу и пресла́вное: не́бо — верте́пъ; престо́лъ херуви́мскій — Дѣ́ву; я́сли — вмѣсти́лище, въ ни́хже возлеже́ Невмѣсти́мый — Христо́съ Бо́гъ, Его́же, воспѣва́юще, велича́емъ.

Чудесы́ Бо́гъ прославля́етъ и кончи́ну твою́, Филаре́те: прикоснове́ніемъ бо ко гро́бу твоему́ прогоня́ется де́монъ, стужа́яй отъ рожде́нія ни́щему, всегда́ тобо́ю ми́луемому, сострада́тельне.

Предрека́еши, я́ко ины́й Іа́ковъ, ча́домъ твои́мъ иму́щая бы́ти, ку́пно же и законополага́еши и́мъ ми́лостивымъ бы́ти, я́коже ты́; и́хже и благословя́, пре́далъ еси́ въ ру́цѣ Бо́жіи святу́ю твою́ ду́шу, блаже́нне.

Пріими́ отъ на́съ, Филаре́те, я́ко досто́йную, сію́ пѣ́снь малобдѣ́нную, я́коже и Христо́съ прія́тъ вдови́цы двѣ́ ле́птѣ, и испроси́ на́мъ, всеблаже́нне, у Христа́ Бо́га на́шего ве́лію и бога́тую ми́лость.

Богоро́диченъ: Спасе́ся вся́ тва́рь Рождество́мъ Твои́мъ, и отъя́ Госпо́дь пла́чь и рыда́ніе, и вся́ку сле́зу отъ вся́каго лица́, Чи́стая Богоро́дице, Всенепоро́чная, тѣ́мже досто́йно ублажа́емъ Тя́, а́нгеловъ и человѣ́ковъ Ра́досте.

Ексапостила́рій:

Филаре́та па́мять ми́лостиваго, вѣ́рніи, почти́мъ досто́йно, я́ко долго́въ оставле́ніе и разрѣше́ніе согрѣше́ній того́ моли́твами улуча́емъ вси́. [Два́жды.]

[Сла́ва, и ны́нѣ, богоро́диченъ.]

На хвали́техъ стихи́ры [на 4], гла́съ 8:

Отче ми́лостиве преподо́бне, ты́, Бо́га отъ души́ возлюби́въ, бы́лъ еси́ испо́лнитель за́повѣди, ю́же пе́рвою и бо́льшею Госпо́дь нарече́: вои́стинну бо пе́рвѣе и па́че всего́ подоба́етъ люби́ти Бо́га, вся́ ви́димая и неви́димая изъ ничего́ прему́дро сотво́ршаго.

Отче всехва́льне, ты́, я́ко себе́ самого́, бли́жняго возлюби́лъ еси́, сего́ ра́ди испо́лнилъ еси́ за́повѣдь, я́же втора́я, но подо́бная пе́рвѣй, полага́ется, я́ко отъ сея́ исходя́щая и къ се́й обраща́ющаяся. Любя́й бо Бо́га, глаго́летъ Богосло́въ, да лю́битъ и бра́та, е́же ты́ дѣ́ломъ показа́лъ еси́.

Дѣ́лы вся́ческими показа́лъ еси́, я́ко и́стинную къ Бо́гу и бли́жнему, Филаре́те, любо́вь стяжа́лъ еси́ въ се́рдцѣ, и теплоту́, наипа́че же яви́лъ еси́ сіе́ гото́вностію подая́ти ни́щимъ, въ не́йже познава́ется и начертава́ется любы́ къ Бо́гу и бли́жнему.

Вои́стинну досто́йно и́мени твоего́ пожи́лъ еси́ на земли́, Филаре́те, начерта́въ въ се́рдцѣ твое́мъ, блаже́нне, добродѣ́тели: му́жество, и пра́вду, и му́дрость, и воздержа́ніе. Сего́ ра́ди досто́йнымъ ны́нѣ на небеси́ наслажда́ешися воздая́ніемъ житія́ твоего́, сла́вне.

Сла́ва, гла́съ 8:

Пріиди́те, добродѣ́тели люби́теліе вси́, духо́вный ли́къ соста́вльше, Филаре́та ми́лостиваго ублажи́мъ, сокро́вище убо́гихъ, пита́теля а́лчущихъ и помо́щника неоску́днаго нужда́ющихся. Се́й бо, я́ко живописа́тель нѣ́кій изря́дный, взира́я при́сно на пе́рвое и госпо́дственное бла́го, е́же е́сть Бо́гъ, и въ себѣ́ само́мъ я́ко нѣ́кое начерта́ніе и подо́біе бла́гости живописа́въ, всѣ́хъ благотворя́, ми́луетъ. Сего́ ра́ди и и́мя досто́йно прія́, и Боже́ственнаго блаже́нства пра́ведно сподо́бися: блаже́ни бо ми́лостивіи, я́ко тíи поми́ловани бу́дутъ, глаго́летъ ми́лостивый Изба́витель и Спа́съ ду́шъ на́шихъ.

И ны́нѣ, гла́съ то́йже:

Свѣти́ся, Виѳлее́ме, гра́де Бо́жій, Свѣ́тъ бо незаходи́мый въ тебѣ́ роди́тися гряде́тъ. Ангели, удиви́теся на небеси́, человѣ́цы, просла́вите на земли́, волсви́, отъ Перси́ды тро́ичный да́ръ принеси́те, па́стыріе, свиря́юще, трисвяту́ю пѣ́снь сла́дцѣ воспо́йте. Вся́кое дыха́ніе да хва́литъ Го́спода Вседѣ́теля.

Славосло́віе вели́кое. [Ектеніи́ и отпу́стъ.]



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 4: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ. Апо́столъ къ Колосса́емъ, зача́ло 258. [Аллилу́ія, гла́съ 4: Ве́сь де́нь ми́луетъ и взаи́мъ дае́тъ пра́ведный, и сѣ́мя его́ во благослове́ніе бу́детъ. Сти́хъ: Что́ возда́мъ Го́сподеви о всѣ́хъ, я́же воздаде́ ми?] Ева́нгеліе Луки́, зача́ло 26. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Слу́жба на па́мять свята́го пра́веднаго Филаре́та Ми́лостиваго, соверша́емую мѣ́сяца Деке́мврія въ 1-й де́нь. Съ присовокупле́ніемъ житія́ его́, заи́мствованнаго изъ Мине́и-Че́тіи. — Изда́ніе второ́е. — М.: Въ Сѵнода́льной Тѵпогра́фіи, 1856. — Л. 1 – 11 об.

/ Къ оглавленію раздѣла /


Наверхъ / Къ титульной страницѣ

0