Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 31-й де́нь.
Положе́ніе честна́го по́яса Пресвяты́я Богоро́дицы.

ВЕЧЕРЪ,
Обы́чная каѳи́сма. На Го́споди воззва́хъ: стихи́ры на 6, гла́съ 4. Подо́бенъ: Яко до́бля.

Ра́ка, содержа́щая, Богоро́дице, по́ясъ Тво́й,* киво́тъ освяще́нія рабо́мъ Твои́мъ,* и свяще́нное огражде́ніе,* и сла́ва, и похвала́,* и исцѣле́ній исто́чникъ* всегда́ познава́ется.* Идѣ́же дне́сь свяще́нно собра́вшеся,* воспѣва́емъ мно́гая Твоя́ вели́чія* и чуде́съ пучи́ну. [Два́жды.]

Се́ мѣ́сто пресла́вно,* се́ хра́мъ присносвѣ́телъ,* въ не́мже сокро́вище положи́ся,* Богоотрокови́цы по́ясъ честны́й, благода́тію.* Приступи́те, человѣ́цы,* просвѣще́ніе и очище́ніе проявле́нно почерпи́те,* и возопíйте благода́рнымъ се́рдцемъ:* Пресвята́я, благослови́мъ Тя́, Дѣ́во,* спаса́еміи Рождество́мъ Твои́мъ. [Два́жды.]

Свято́е положе́ніе, Богоро́дице,* по́яса Твоего́,* пра́здникъ стяжа́хомъ, веселя́щеся,* я́ко гра́ду Твоему́ дне́сь да́ти благоизво́ли* свяще́нное препоя́саніе,* храни́лище некра́домо,* да́ръ че́стенъ,* неотъе́млемо бога́тство,* исцѣле́ній рѣку́,* испо́лнену дарова́ній духо́вныхъ. [Два́жды.]

Сла́ва, и ны́нѣ, гла́съ 2:

Яко вѣнце́мъ пресвѣ́тлымъ, Пречи́стая Богоро́дице, по́ясомъ Твои́мъ святы́мъ Це́рковь Бо́жія обложи́ся, и свѣ́тится, ра́дующися дне́сь, и та́йно ликовству́етъ, Влады́чице, вопію́щи Тебѣ́: ра́дуйся, діади́мо честна́я и вѣ́нче боже́ственныя сла́вы; ра́дуйся, еди́на сла́вы исполне́ніе и вѣ́чное весе́ліе; ра́дуйся, къ Тебѣ́ притека́ющимъ приста́нище, и предста́тельнице, и спасе́ніе на́ше.

На стихо́внѣ стихи́ры, гла́съ 4. Подо́бенъ: Да́лъ еси́ зна́меніе.

Подала́ еси́ гра́ду Твоему́ по́ясъ Тво́й, Пресла́вная,* тве́рдое огражде́ніе,* сего́ объе́млющь отъ вся́кія бѣды́* Боже́ственными дѣ́йствы* и непобори́мь отъ враго́въ соблюда́ющь,* любо́вію зову́щу:* крѣ́пость моя́, и держа́ва, и благолѣ́пно ра́дованіе,* Сы́нъ Тво́й и Госпо́дь,* еди́нъ е́сть Благоутро́бный.

Сти́хъ: Воскресни́, Го́споди, въ поко́й Тво́й,* Ты́ и Киво́тъ святы́ни Твоея́.

Честны́мъ вѣнце́мъ благоче́стно ца́рствующіи,* Твои́мъ по́ясомъ, Пречи́стая,* свѣ́тло обложе́нніи,* Твои́ми хва́лятся Боже́ственными вели́чествы,* и стра́шни враго́мъ борю́щимъ при́сно познава́ются,* хва́ляще Тя́ и зову́ще* па́че сло́ва рожде́нному изъ Тебе́:* Іису́се Пресла́вне,* спаси́ всѣ́хъ, я́ко Благоутро́бенъ.

Сти́хъ: Лицу́ Твоему́* помо́лятся бога́тіи лю́дстіи.

Препоя́ши си́лою на́съ, Дѣ́во, по́яса Твоего́,* на враги́ укрѣпля́ющи,* стра́сти покаря́ющи,* при́сно му́чащія и борю́щія,* и побѣди́тельное на́мъ безстра́стіе при́сно подаю́щи* чи́сто сла́вити Тя́* и Сы́ну Твоему́ вопи́ти прилѣ́жно:* Іису́се Всеси́льне,* спаси́ всѣ́хъ, я́ко Благоутро́бенъ.

Сла́ва, и ны́нѣ, гла́съ 2:

Смы́слъ очи́стивше и у́мъ, со а́нгелы и мы́ торжеству́емъ, свѣ́тло начина́юще Дави́дскую пѣ́снь Отрокови́це, Невѣ́стѣ всѣ́хъ Царя́, Христа́ Бо́га на́шего: воскресни́, Го́споди, — глаго́люще, — въ поко́й Тво́й, Ты́ и Киво́тъ святы́ни Твоея́; я́ко бо пала́ту красну́, Сію́ украси́въ и причте́ Ю гра́ду Твоему́, Влады́ко, стро́ити и покрыва́ти отъ супоста́тныхъ пога́нъ держа́вною си́лою Твое́ю, моли́твами Ея́.

Тропа́рь, гла́съ 8:

Богоро́дице Приснодѣ́во, человѣ́ковъ покро́ве, ри́зу и по́ясъ пречи́стаго Твоего́ тѣлесе́, держа́вное гра́ду Твоему́ обложе́ніе дарова́ла еси́, безсѣ́меннымъ рождество́мъ Твои́мъ, нетлѣ́нна пребыва́ющи, о Тебѣ́ бо и естество́ обновля́ется и вре́мя. Тѣ́мже мо́лимъ Тя́ ми́ръ гра́ду Твоему́ дарова́ти, и душа́мъ на́шимъ ве́лію ми́лость.


НА УТРЕНИ,
На Бо́гъ Госпо́дь: тропа́рь Богоро́дицы, три́жды.

По 1-й каѳи́смѣ сѣда́ленъ, гла́съ 3. Подо́бенъ: Красотѣ́ дѣ́вства.

Красото́ю дѣ́вства Твоего́ Прекра́сное Сло́во ро́ждши и Сего́ по́ясомъ Твои́мъ, Чи́стая, я́ко Младе́нца обвила́ еси́. Сего́ у́бо дарова́ла еси́ рабо́мъ Твои́мъ, Влады́чице, покро́въ, по́мощь и исто́чникъ свяще́нія. Его́же честно́е положе́ніе, Пресвята́я Дѣ́во, вси́ вѣ́рно пра́зднуемъ.

Сла́ва, и ны́нѣ, то́йже.

По 2-й каѳи́смѣ сѣда́ленъ, гла́съ и подо́бенъ то́йже:

Рождество́ нетлѣ́нно и дѣ́вство еди́на имѣ́ла еси́, Благослове́нная, одѣя́ніе же человѣ́комъ спаси́тельно, Тво́й святы́й по́ясъ дарова́ла еси́, да́же до ны́нѣ нетлѣ́нно пребыва́ющій, Богоневѣ́сто, его́же ра́ди отъ Бо́га пріе́млемъ, раби́ Твои́, Чи́стая, ве́лію ми́лость.

Сла́ва, и ны́нѣ, то́йже.

Кано́на два́: пе́рвый со ирмосо́мъ на 8, его́же краегране́сіе: Крѣ́постію мя́ Твое́ю опоя́ши, Чи́стая Дѣ́во. Творе́ніе Іо́сифово, ирмо́съ по два́жды, тропари́ на 6, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Крѣ́постію мя́ Боже́ственною благоче́стно препоя́ши, пѣсносло́вяща Тво́й свяще́нный по́ясъ, боже́ственно су́щи гра́ду Твоему́ опоя́саніе, и держа́ва, Отрокови́це, и незы́блемо остѣне́ніе, Чи́стая Дѣ́во Препѣ́тая.

Ты́ Бо́га си́льнаго родила́ еси́, препоясу́ющаго благочести́выя вся́ си́лою, Всенепоро́чная. Тѣ́мже Тя́ блажи́мъ и боже́ственный Тво́й по́ясъ, ра́достно облобыза́юще, благода́ть почерпа́емъ и ми́лость.

Ра́достно положе́нію дне́сь о́крестъ лику́емъ свяще́ннаго по́яса честны́я Богоотрокови́цы, отъ Нея́же на́мъ препоя́саніе нетлѣ́нія истка́ся, и нераздира́ема оде́жда, и ри́за свяще́нія.

Подъ Твою́ Твои́ лю́діе, Всенепоро́чная, притека́ютъ си́лу, подъ Тво́й покро́въ прибѣга́ютъ всегда́, всѣ́мъ бу́ди по́мощь и я́же ко спасе́нію всѣ́мъ пода́ждь проше́нія, спаса́ющи отъ бѣ́дъ ду́ши на́ша.

Другíй кано́нъ на 4, гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Свѣщу́ свѣтоявле́нную и незаходи́мую Дѣ́вы хра́мъ, я́ко не́бо, обрѣ́тъ свѣ́тло, Тоя́ пресвѣ́тлый по́ясъ, вселе́нную дне́сь чуде́съ облиста́етъ заря́ми.

Крѣ́пость же и утвержде́нія сою́зъ, Твои́мъ, Пречи́стая, Боже́ственнымъ я́ко вои́стинну по́ясомъ, мы́сленнѣ опоя́санъ гра́дъ Тво́й, держа́ву нераздра́нну и́мать, тѣ́мже и о Тебѣ́ хва́лится.

Дре́вле я́ко вои́стинну пречестна́го киво́та Твоя́ ра́ка, Богороди́тельнице, яви́ся су́щимъ на земли́, не скрижа́ли нося́щая, но вѣ́рно соблюда́юща и́стины позна́нія.

Арома́ты та́йныя пролива́ются во хра́мѣ Чи́стыя отъ честны́я дне́сь ра́ки и исполня́ютъ духо́внаго благово́нія всѣ́хъ, любо́вію къ то́й притека́ющихъ.

Катава́сія: Кре́стъ начерта́въ...

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Обновля́ется се́рдце, вѣ́рою те́плою прикаса́ющеся по́ясу свяще́нному Дѣ́вы, и препоясу́ется си́лою непобѣди́мою на стра́сти нечи́стыя и вра́гъ безпло́тныхъ, невреди́мо пребыва́юще.

Пребыва́етъ нетлѣ́ненъ еще́ свяще́нный по́ясъ Тво́й, и́же Твое́ нетлѣ́нное тѣ́ло, Отрокови́це, опоя́са, освяща́ющъ благоче́стно приступа́ющіи, и тли́ изыма́ющъ неду́гъ и скорбе́й.

Была́ еси́ до́мъ преудо́бренъ, Чи́стая, Сло́ва, изъ Тебе́ воплоще́ннаго, и во святѣ́мъ хра́мѣ Твое́мъ благоволи́ла еси́ по́ясъ Тво́й положи́ти: его́же облобыза́юще, освяща́емся.

Честны́й Тво́й по́ясъ че́стно вси́ ра́достнымъ се́рдцемъ облобыза́емъ, че́сть су́щую всѣ́хъ вѣ́рныхъ, Богоро́дице, я́ко пречестно́му Твоему́ прикосну́вшуся тѣлеси́.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Да почти́мъ, вѣ́рніи, я́ко совокупле́нія къ Бо́гу сою́зъ, Чи́стыя дне́сь по́ясъ, и вѣ́рно да поклони́мся.

Всегда́шніи то́ки благода́тей, Чи́стая, отъ пречи́стыя Твоея́ ра́ки теку́щіи, всѣ́хъ вѣ́рныхъ напоя́ютъ.

Исцѣле́нія вѣ́рнымъ многопѣ́тый на́мъ дне́сь Пречестны́я честны́й по́ясъ источа́етъ благода́тію.

Яко роса́ у́тренняя, весе́ліе Твое́, Чи́стая, точа́щи, страсте́й пе́щь Тя́ при́сно воспѣва́ющимъ угаша́етъ.

Конда́къ, гла́съ 2. Подо́бенъ: Въ моли́твахъ.

Богопрія́тное Твое́ чре́во, Богоро́дице, объе́мшій по́ясъ Тво́й честны́й, держа́ва гра́ду Твоему́ необори́ма и сокро́вище е́сть, благи́хъ неоску́дно, еди́на ро́ждшая Приснодѣ́во.

Та́же сѣда́ленъ, гла́съ 4. Подо́бенъ: Ско́ро предвари́.

Яко боже́ственное возложе́ніе, во хра́мѣ Бо́жіи, Чи́стая, освяти́ся по́ясъ всечестны́й, и́мже препоя́сала еси́ ложесна́ непоро́чная, Бо́га заче́ншая. Тѣ́мже, сему́ вѣ́рою прикаса́ющеся и стра́хомъ че́стно облобыза́юще, освяща́емся.

Сла́ва, и ны́нѣ, другíй, гла́съ то́йже. Подо́бенъ: Вознесы́йся:

Положе́ніе Твоего́ честна́го по́яса Це́рковь Твоя́ свѣ́тло пра́зднуетъ и прилѣ́жно зове́тъ Ти́, Дѣ́во Чи́стая: вся́ опоя́ши на си́лу вра́жію, низложи́ шата́ніе безбо́жныхъ ва́рваръ, и на́шъ упра́ви живо́тъ, дѣ́лати Госпо́дня Боже́ственная хотѣ́нія.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Взя́тся къ Свѣ́ту незаходи́мому, преста́вльшися, оста́вила еси́ Тя́ блажа́щимъ, вмѣ́сто тѣлесе́ Твоего́, Чи́стая, честны́й по́ясъ, исто́чникъ чуде́съ су́щи, и мѣ́сто спасе́нія, и огражде́ніе сему́, чту́щему Тя́ гра́ду, Пречи́стая.

Яко въ но́во не́бо, мы́ вхо́димъ въ Тво́й хра́мъ, идѣ́же сокро́вище положи́ся, я́коже со́лнце свѣтоза́рно, Тво́й Боже́ственный по́ясъ, лучи́ чуде́съ испуща́ющь, и всѣ́хъ сердца́ озаря́ющъ, Отрокови́це, и страсте́й мглу́ отгоня́ющъ.

Ты́ киво́тъ мы́сленнаго свяще́нія еси́, Чи́стая Всепѣ́тая, и честну́ю сію́ ра́ку, иму́щую по́ясъ, его́же на Себѣ́ носи́ла еси́, подае́ши лю́демъ Твои́мъ прибѣ́жище ве́ліе, и исто́чникъ исцѣле́ній неистоща́емый.

Принесе́ся Твоему́ гра́ду многобога́тный да́ръ — честны́й по́ясъ Тво́й, Всенепоро́чная, и положи́ся свѣ́тло въ се́й де́нь въ се́мъ Боже́ственнѣмъ хра́мѣ Твое́мъ, и бы́сть ве́лія пра́здника, Богоро́дице, те́плѣ лю́бящимъ Тя́ вина́.

Зако́на сѣ́ни и проро́къ гада́нія предсказа́ху: бы́ти Тебе́, Пречи́стая, Бо́гу Ма́терь всеи́стинную, Еюже кля́тва исчезе́ и процвѣте́ соверше́нное благослове́ніе, и спаси́тельная благода́ть, вѣ́рою и любо́вію пою́щимъ Тя́.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Яко пречестно́е утвержде́ніе, Богоро́дице, Творе́цъ и Созда́тель Тя́ водрузи́въ, я́коже звѣзда́ми, украси́лъ Тя́ е́сть, Боже́ственными сія́ніи, и́миже просвѣща́еши концы́.

Тя́ держа́ву гра́дъ Тво́й, Богоро́дице, и тве́рдое основа́ніе имѣ́я, боже́ственнымъ по́ясомъ Твои́мъ содержи́тся: сою́зъ неразори́мь се́й, въ бра́нехъ протяза́ющъ.

Отъ земли́ на́съ возвлачи́тъ, Богороди́тельнице, къ небеси́ боже́ственный по́ясъ Тво́й, любо́вію Твое́ю и того́ возводи́мыхъ. Тѣ́мъ Тя́ сла́вимъ, я́ко вину́ сла́вы лу́чшія.

Се́ благода́ть неисчерпа́емая, пріиди́те вси́ усе́рднымъ се́рдцемъ, почерпи́те рѣ́ки, точа́щія незави́стно, празднолю́бцы, отъ честны́я ра́ки Пречи́стыя Ма́тере.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

По́ясу боже́ственному, положе́ну дне́сь во хра́мѣ Твое́мъ, Богора́дованная, съ ни́мъ положи́ся благи́хъ вся́ко дая́ніе тре́бующимъ, и наполня́ется вся́къ, кто́ свяще́нія приходя́й, проше́нія вѣ́рно пріе́мля.

Украси́ся, Дѣ́во, Сло́ва Прекра́снаго поро́ждши, и во Твое́мъ кра́снѣмъ благоволи́ла еси́ дому́ положи́тися кра́сному по́ясу, и́же Твое́ кра́сное тѣ́ло, Богоро́дице, красно́ опоя́са.

Тво́й святы́й хра́мъ, я́коже другíй ра́й, всѣ́мъ познава́ется: посредѣ́ стяжа́, я́коже благово́ненъ шипо́къ, по́ясъ Тво́й, благово́нія Боже́ственнаго исполня́ющь сердца́, вѣ́рно приступа́ющимъ, Всенепоро́чная.

Ту́чи Боже́ственныя о́блакъ была́ еси́, Пренепоро́чная, иска́пающій спасе́нія во́ду, и зе́млю, оляденѣ́вшую грѣхми́, къ плодоно́сію преводя́щи благоче́стія. Сего́ ра́ди вѣ́рно Тя́ сла́вимъ.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Ты́, Го́споди, Твою́ Ма́терь возвели́чилъ еси́, Ты́ возвы́силъ еси́ надъ вся́ мы́сленныя вла́сти, безъ сравне́нія сла́вы Тоя́.

Благода́ть Бо́жія ны́нѣ незави́стно подае́тся, Пречи́стая Богоро́дице, отъ честны́я ра́ки Твоея́, вѣ́рою покланя́ющимся Тебѣ́.

Твое́ю си́лою вѣ́рніи ца́ріе опоясу́ются, Тя́ сою́зъ, Богоро́дице, Тво́й гра́дъ хва́лящи, по́ясомъ Твои́мъ честву́ется.

Вѣ́дома Твоя́ вои́стинну благода́ть пока́зася, Пречи́стая, пресла́вно дѣ́йствующая си́лы и зна́менія по все́й земли́.

Пѣ́снь 6.

Ирмо́съ: Бе́здна грѣхо́въ и прегрѣше́ній бу́ря мя́ смуща́етъ и во глубину́ ну́жднаго рѣ́етъ мя́ отча́янія, но Твою́ крѣ́пкую ру́ку мнѣ́ простри́, я́ко Петро́ви, о Упра́вителю! и спаси́.

Но́во родила́ еси́ на́мъ я́ко Отроча́, пре́жде вѣ́къ су́щаго, и обновля́еши сердца́, грѣхми́ обетша́вшая, пріе́мшая обновле́ніе, положе́ніемъ честна́го по́яса Твоего́, Отрокови́це Приснодѣ́во.

Свята́я Твоя́ це́рковь ди́вна въ пра́вду е́сть, и́же чу́дный Тво́й по́ясъ, точа́щій чудеса́, стяжа́вши, бѣ́днымъ пучи́на явля́ется исцѣле́ній, Богороди́тельнице Ма́ти Дѣ́во.

Возвесели́ся вся́ка душа́, совоку́пльшися во святѣ́мъ хра́мѣ Твое́мъ и въ не́мъ зря́щи, Богоро́дице, по́ясъ Тво́й, я́коже со́лнце свѣ́тло, свѣ́тъ облиста́ющъ дарова́ній Вседѣ́теля и Боже́ственнаго Ду́ха.

Укрѣпи́ на́ша, Чи́стая, сердца́, презрѣ́вши вся́ согрѣше́нія, и препоя́ши си́лою, по́ясъ Тво́й вѣ́рно я́коже многоцѣ́нно стяжа́вшихъ, и неотъе́млемо сокро́вище.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Всю́ Тя́ преесте́ственнѣ просла́ви Госпо́дь, всю́ возвы́сивъ Тя́ еди́ну, всю́ Тя́ почте́ па́че сло́ва, Богоро́дице, хра́мъ съ по́ясомъ и боже́ственною ра́кою.

Истека́ютъ, я́ко изъ пучи́ны, струи́ благода́ти, отъ ра́ки Пречи́стыя и тва́рь всю́ окружа́ютъ напая́юще, вѣ́рно покланя́ющіяся Рождеству́ Твоему́.

Крѣ́пость Тя́, вѣ́рніи, стяжа́вше и похвалу́, опоясу́ются сла́вою, честны́й Тво́й по́ясъ, Богороди́тельнице, иму́ще, я́ко пресвѣ́тлую у́тварь и честну́ю.

Конда́къ, гла́съ 4. Подо́бенъ: Яви́лся еси́ дне́сь.

Честна́го по́яса Твоего́ положе́ніе пра́зднуетъ дне́сь Тво́й, Препѣ́тая, хра́мъ и прилѣ́жно взыва́етъ Ти́: ра́дуйся, Дѣ́во, христіа́нъ похвало́.

Икосъ:

Твои́мъ мя́ просвѣти́ свѣ́томъ, Дѣ́во Богоро́дице, и разруши́ мою́ тму́, во умѣ́ лежа́щую лю́тѣ, я́ко да чи́сто Тебѣ́ приступлю́, Чи́стѣй, земны́я обожи́вшей, воспою́ Тво́й, Всенескве́рная и Непоро́чная, боже́ственный по́ясъ, свѣтлѣ́йшій со́лнца, его́же мíръ се́й и́мать я́ко тве́рдъ покро́въ и наде́жду, побѣжда́ющъ совѣ́ты враго́въ беззако́нныхъ, и си́хъ кова́рства разоря́ющъ, и всегда́ сохраня́ющъ Твоя́ рабы́. Ра́дуйся, Дѣ́во, христіа́нъ похвало́.

Пѣ́снь 7.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Всѣ́хъ Цари́ца, къ небе́снымъ се́ломъ отше́дши, оста́ви бога́тство царю́ всѣ́хъ градо́въ — Сво́й по́ясъ, и́мже спаса́ются отъ наше́ствія ви́димыхъ и неви́димыхъ вра́гъ.

Ко исто́чнику ны́нѣ присту́пимъ, иска́пающему благода́ть и ми́лость, ра́цѣ честнѣ́й, иму́щей по́ясъ всечестны́й поче́тшія человѣ́ческое смѣше́ніе честны́мъ Рождество́мъ Свои́мъ, Дѣ́вы же и Ма́тере.

Хвали́те Го́спода, си́лы вся́ небе́сныя, и Сего́ Ро́ждшую, человѣ́честіи язы́цы вси́, просла́вите: я́ко по́ясъ Сво́й дарова́, прибѣ́жище и́стинно и спасе́ніе вѣ́рнымъ.

Да кропя́тъ свы́ше пра́вду о́блацы дне́сь, положе́ніемъ по́яса Твоего́, Облаче богора́дованный, и да сладкопое́тъ душа́ вся́ка, ра́дующися: благослове́нъ Бо́гъ оте́цъ на́шихъ.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Ты́, я́ко Со́лнце пра́вды, Еди́не сы́й Свѣтода́вче, Боже́ственнѣ хра́мъ Чи́стыя просвѣти́лъ еси́ разли́чными Твои́ми дарова́ніи: въ не́мже сія́ющи, лучи́ изъясня́етъ по́ясъ Тоя́.

Яко злату́ю ста́мну, Тво́й по́ясъ окружа́юще, еди́на Чи́стая, Боже́ственнѣй вои́стинну причаща́емся ны́нѣ сла́дости благода́тей, Всеблагослове́нная, и скрижа́лей вы́шшую Ти́, я́ко су́щую, почита́емъ сію́.

Источа́ютъ вои́стинну чуде́съ, Отрокови́це Чи́стая, ча́ши, Твоя́ благода́ть вѣ́рнымъ, и незави́стно отъ Твоея́ ра́ки происхо́дятъ, я́ко отъ ина́го Еде́ма рѣ́ки.

Ны́нѣ приступи́те съ весе́ліемъ вси́, и́же на земли́, пріиди́те, — ра́ка прорица́етъ та́йно Госпожи́ — объе́млите Пресла́вную, во мнѣ́ сокро́виществовавшую по́ясъ Сво́й.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Якоже престо́лъ свя́тъ, ковче́гъ положи́ся, вну́трь невходи́мыхъ свяще́нныхъ свѣ́тло, еди́ныя Богоотрокови́цы и Цари́цы всѣ́хъ Чи́стыя по́ясъ иму́щій поко́йный: отъ него́же тружда́ющимся во мно́гихъ болѣ́знехъ поко́й соверше́нъ прихо́дитъ незави́стно.

На земли́ Го́спода свяще́нно воплоти́ла еси́ и рука́ми святы́ми вои́стинну опоя́сала еси́, препоясу́ющаго благочести́выя си́лою; ны́нѣ же возше́дши небе́съ превы́ше, оста́вила еси́ человѣ́комъ честны́й Тво́й по́ясъ, Дѣ́во Богоро́дице, держа́ву и покро́въ.

Неду́гующихъ исцѣле́ніе, поползну́вшихся утвержде́ніе и уныва́ющихъ благоду́шіе боже́ственно, корми́ло пла́вающихъ, заблу́ждшихъ обраще́ніе, послѣ́дующая честно́му Твоему́ по́ясу, Чи́стая Дѣ́во, Боже́ственная благода́ть вои́стинну е́сть, ему́же вѣ́рою покланя́емся во вся́ вѣ́ки.

Соверша́юще дне́сь свято́е положе́ніе по́яса Твоего́ боже́ственнаго, свяще́нное торжество́, раби́ Твои́, чти́мъ и ра́достію вопіе́мъ Ти́: ра́дуйся, Богоро́дице, ра́досте а́нгеловъ и всѣ́хъ человѣ́ковъ, вѣ́рою пою́щихъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Скрижа́ли боже́ственныя дре́вле киво́тъ, руко́ю напи́санныя Бо́жіею, содержа́ше, Пречи́стая: Твоя́ же, Чи́стая Влады́чице, чествова́нная и честна́я ра́ка по́ясъ содержи́тъ, тѣ́хъ законополо́жника, содержа́щія въ себѣ́ стра́шное та́инство.

Ангели, Пречи́стая, Чи́стая, ны́нѣ въ честнѣ́мъ Твое́мъ хра́мѣ слику́ютъ и объе́млютъ, Влады́чице, честны́й и святы́й Тво́й по́ясъ, ему́же любо́вію, и ра́достію, и весе́ліемъ мно́гимъ покланя́емся, Тя́ воспѣва́юще, сла́ву ро́да на́шего.

Же́злъ, Яже Цвѣ́тъ жи́зни прозя́бшій, Ты́ еси́ всѣ́хъ ра́дость, многоцѣ́нная чи́стая мѵрополо́жница Ду́ха, сокро́вище благи́хъ, арома́тъ исто́чникъ, изъ нея́же мѵ́ро исцѣле́ній излива́етъ Боже́ственная ра́ка.

Воспѣва́ютъ, Пречи́стая, Чи́стая, вели́чія Твоя́, мы́сленная во́инства, проповѣ́дуютъ вси́ патріа́рси и проро́цы я́вственно, апо́столи со свяще́нными и му́чениковъ ли́кове, съ ни́миже покланя́емся Тебѣ́.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Се́ Боже́ственный о́дръ Соломо́новъ, его́же си́льніи окружа́ютъ шестьдеся́тъ, рече́нія писа́ній, я́коже на одрѣ́ ца́рстѣ, въ ковче́зѣ че́стнѣ дне́сь по́ясъ полага́етъ Сво́й, на воззва́ніе всѣ́мъ вѣ́рнымъ и благочести́вымъ въ снабдѣ́ніе.

О, Гра́де Царя́ небе́снаго, о не́мже возглаго́лашася пресла́вная! Положи́ Твоему́ гра́ду да́ръ че́стенъ и свя́тъ, всесвяты́й Тво́й по́ясъ, во утвержде́ніе всѣ́мъ вѣ́рнымъ, и́мже вѣнцено́сцы побѣжда́ютъ супоста́ты, Правосла́віемъ сія́юще.

Иска́пайте, го́ры, ны́нѣ сла́дость, и хо́лми, весе́ліе вѣ́чное, патріа́рхъ собо́ри и му́ченикъ ли́цы, проро́ковъ же сосло́віе, боже́ственныхъ апо́столовъ со́нмъ честны́й, весели́теся со всѣ́ми на́ми, въ положе́ніи боже́ственнаго по́яса Богоотрокови́цы.

Освяти́ла еси́ вся́ Твои́мъ, Пресвята́я Дѣ́во, рождество́мъ и ны́нѣ на́мъ подала́ еси́ премно́гое просвѣще́ніе — пресвяты́й по́ясъ Тво́й, его́же положе́ніемъ вся́ земля́ лику́етъ и почита́етъ Тя́, ра́дости неизглаго́ланныя испо́лнившую человѣ́чество.

Любве́ мя́ ле́стныя страсте́й, и врага́, всегда́ искуша́ющаго грѣхо́въ тягото́ю, уны́нія же лю́таго отведе́нія, Пречи́стая, и плѣне́нія, и грѣха́, къ Твое́й прибѣга́ющаго ми́лости, вско́рѣ, я́ко ми́лостива, Чи́стая, премѣни́.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Черто́гъ пречестны́й вои́стинну, Богороди́тельнице, ра́ка Твоя́ яви́ся, святы́й Тво́й по́ясъ, я́ко дѣ́вственную и невѣ́стническую оде́жду, досто́йнѣ содержа́щи и соблюда́ющи, я́ко живота́ сокро́вище.

Боже́ственною діади́мою красоты́ Це́рковь, Богоро́дице, одѣ́явшися, боже́ственнымъ и всесвяты́мъ Твои́мъ по́ясомъ дне́сь ца́рски весели́тся и красу́ется сла́вою Твое́ю.

Хра́мъ, по всему́ подо́бящійся небесе́мъ, благокра́сный дне́сь Дѣ́вы, вѣ́рніи, пріе́мше дарова́ній зари́, я́коже звѣ́здными красота́ми осія́еми, свѣтли́теся.

Имать святы́й Тво́й по́ясъ, Богороди́тельнице, гра́дъ Тво́й, сою́зъ ми́ра, и стѣ́ну, и догма́тъ боже́ственное еди́нство, и правосла́вныхъ похвалу́, и царе́й одолѣ́тельная.

Воспѣва́емъ неизглаго́ланную сла́ву и неизче́тную Твою́ благода́ть: Ты́ бо еси́ исто́чникъ прему́дрости, изъ нея́же сло́во всѣ́мъ происхо́дитъ, чту́щимъ Тя́, Пречи́стая, и велича́ющимъ Рождество́ Твое́.

Свѣти́ленъ. Подо́бенъ: Жены́, услы́шите.

По́ясъ честны́й Тво́й, и́мже свяще́нное Твое́ препоя́сала еси́ тѣ́ло, Богоотрокови́це Дѣ́во, чту́ще, пра́зднуемъ сего́ ны́нѣ положе́ніе, и́мже тли́ избавля́емся, и бѣ́дъ, и напа́стей, Ма́ти Бо́га Вы́шняго.

Сла́ва, и ны́нѣ, то́йже.

На хвали́техъ стихи́ры на 4, гла́съ 4. Подо́бенъ: Яко до́бля.

Яко пресвѣ́тлымъ вѣнце́мъ, Богоро́дице Пречи́стая,* святы́мъ по́ясомъ Твои́мъ обложи́ся Це́рковь,* и ра́дующися, свѣтлѣ́ется дне́сь,* и лику́етъ та́йно,* вопію́щи Тебѣ́, Влады́чице:* ра́дуйся, вѣ́нче* и діади́мо боже́ственная;* ра́дуйся, еди́на исполне́нія моего́ сла́ва* и весе́ліе ве́чное. [Два́жды.]

Ты́, Пречи́стая Влады́чице,* держа́вное огражде́ніе,* незы́блемо же утвержде́ніе и спасе́ніе* Твои́мъ лю́демъ и гра́ду Твоему́ су́щи,* дала́ еси́, я́ко свѣ́тло одѣя́ніе,* пречестны́й по́ясъ Тво́й,* спаса́ющь отъ вся́кихъ злоключе́ній* вѣ́рою и те́плымъ усе́рдіемъ* сего́ чту́щихъ, Богоневѣ́сто.

Хра́мъ Тво́й, Пречи́стая,* я́ко исто́чникъ неисчерпа́емый* чуде́съ дне́сь показа́ся:* рѣ́ки бо благода́ти незави́стно пролива́ются* отъ святы́я Твоея́ ра́ки* и вѣ́рныхъ помышле́ніе увеселя́ютъ,* вѣ́рою и любо́вію Тебѣ́ вопію́щихъ:* ра́дость, и весе́ліе,* и жи́знь на́ша Ты́ еси́.

Сла́ва, и ны́нѣ, гла́съ 2:

Смы́слъ очи́стивше и у́мъ, [со а́нгелы и мы́ торжеству́емъ, свѣ́тло начина́юще Дави́дскую пѣ́снь Отрокови́це, Невѣ́стѣ всѣ́хъ Царя́, Христа́ Бо́га на́шего: воскресни́, Го́споди, — глаго́люще, — въ поко́й Тво́й, Ты́ и Киво́тъ святы́ни Твоея́; я́ко бо пала́ту красну́, Сію́ украси́въ и причте́ Ю гра́ду Твоему́, Влады́ко, стро́ити и покрыва́ти отъ супоста́тныхъ пога́нъ держа́вною си́лою Твое́ю, моли́твами Ея́].

Славосло́віе вели́кое. Ектеніи́ и отпу́стъ.



НА ЛИТУРГІИ,

Блаже́нна отъ кано́новъ, пѣ́снь 3-я и 6-я. Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, [се́ бо отъ ны́нѣ ублажа́тъ Мя́ вси́ ро́ди]. Апо́столъ къ Евре́емъ, зача́ло 320. Аллилу́ія, гла́съ 2: Воскресни́, Го́споди, въ поко́й Тво́й, [Ты́ и Киво́тъ святы́ни Твоея́. Сти́хъ: Кля́тся Госпо́дь Дави́ду и́стиною, и не отве́ржется ея́]. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 306 об. – 313 об.

/ Къ оглавленію раздѣла /


Наверхъ / Къ титульной страницѣ

0