Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 21 августа 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 30-й де́нь.
Слу́жба преподо́бному и благовѣ́рному вели́кому кня́зю Даніи́лу Алекса́ндровичу Моско́вскому.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 4. Подо́бенъ: Зва́нный свы́ше.

Зва́нный свы́ше отъ го́рняго жили́ща, свѣ́тлымъ ума́ о́комъ воззрѣ́лъ еси́, и, вре́менная сего́ мíра кра́сная отве́ргъ, предпоче́лъ же вѣ́чно бу́дущая, и, о́гнь Боже́ственныя любви́ въ се́рдце пріе́мъ, угото́вился еси́ къ житію́ а́нгельскому, у́мъ тво́й чи́стый ко Христу́ впери́въ; Ему́же дне́сь предстоя́, блаже́нне кня́же Даніи́ле, моли́ спасти́ся душа́мъ на́шимъ. [Два́жды.]

Ца́рства, сла́вы, и са́мъ себе́ отре́кшись, съ ра́достію Христу́ послѣ́довалъ еси́, и кре́стъ взя́лъ еси́ на ра́мена своя́, и по Не́мъ возше́лъ еси́ въ вѣчнонетлѣ́нную сла́ву Ца́рства Его́; Ему́же дне́сь предстоя́, уго́дниче Христо́въ Даніи́ле, моли́ спасти́ся душа́мъ на́шимъ.

Твое́ се́рдце разжже́ жела́ніе, тезоиме́нное твоему́ и́мени, къ пути́, веду́щему во гра́дъ небе́сный, и́мже ше́ствуя, веду́щей тя́ кро́тости и смире́нію, дости́глъ еси́ по жела́нію своему́ небе́сныхъ оби́телей; идѣ́же дне́сь со а́нгелы лику́я, преблаже́нне кня́же Даніи́ле, моли́ спасти́ся душа́мъ на́шимъ.

Сла́ва, гла́съ 6:

Отрасль благопло́днѣйшая Алекса́ндрова ко́рене бы́лъ еси́, пло́дъ принося́ добродѣ́телей: въ преподо́біи бо, и пра́вде, и смире́ніи, ми́лостыняхъ же и чистотѣ́ ре́вности подража́тель бы́лъ еси́ твоему́ роди́телю, и тѣ́ми свѣ́тло укра́шенъ, простра́нное селе́ніе Святы́я Тро́ицы бы́лъ еси́, Ейже ку́пно ны́нѣ съ роди́телемъ твои́мъ предстоя́, моли́ ми́рну бы́ти гра́ду и оби́тели твое́й и всѣ́мъ россíйскимъ сыново́мъ спасти́ся.

И ны́нѣ, богоро́диченъ:

Никто́же, притека́яй къ Тебѣ́, посра́мленъ отъ Тебе́ исхо́дитъ, Пречи́стая Богоро́дице Дѣ́во, но про́ситъ благода́ти и пріе́млетъ дарова́ніе къ поле́зному проше́нію.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ Святы́я Тро́ицы яви́лся еси́, Даніи́ле блаже́нне, тѣ́мже, воспѣва́я тя́, ра́дуйся, вси́ тебѣ́ зове́мъ.

Сти́хъ: Честна́ предъ Го́сподемъ сме́рть преподо́бныхъ Его́.

Ца́ріе и кня́зи, и свяще́нныхъ собо́ри, старѣ́йшины и вельмо́жи, свѣ́тло дне́сь взыгра́йте, и па́мять блаже́ннаго въ пѣ́снехъ возвели́чимъ.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Восхва́лимъ дне́сь вси́ князе́й Россíйскихъ похвалу́, блаже́ннаго кня́зя Даніи́ла, храня́ща оте́чество свое́ ненавѣ́тно моли́твами свои́ми.

Сла́ва, гла́съ 8:

Дне́сь весе́лія исполня́ется хра́мъ Бо́га на́шего, въ не́мже благовѣ́рный кня́зь Даніи́лъ, вели́кій на́шъ засту́пникъ, мощми́ свя́то почива́етъ, и всѣ́хъ, вѣ́рно притека́ющихъ къ честнѣ́й его́ ра́цѣ, освяща́етъ, и, исцѣле́ніе да́руя, мо́лится о душа́хъ на́шихъ.

И ны́нѣ, богоро́диченъ:

Влады́чице, пріими́ моли́твы рабо́въ Твои́хъ, и изба́ви на́съ отъ вся́кія ну́жды и печа́ли.

Тропа́рь, гла́съ 4:

Княже́нія твоего́ сла́ву отложи́въ, озаря́емый Боже́ственною благода́тію, богому́дре кня́же Даніи́ле, ве́сь ра́зумъ въ се́рдцѣ отъ су́етнаго мíра сего́ къ Зижди́телю неукло́нно возложи́лъ еси́, и, я́ко звѣзда́ на восто́цѣ Россíйскаго госуда́рства просія́лъ еси́, цѣлому́дріемъ же и равноа́нгельнымъ твои́мъ житіе́мъ тече́ніе до́брѣ соверша́я, вѣ́ру соблю́лъ еси́ непоро́чну, тѣ́мъ и по сме́рти просла́ви тя́ Бо́гъ въ чудесе́хъ, я́ко источа́еши исцѣле́нія вѣ́рно притека́ющимъ къ честнѣ́й ра́цѣ твое́й, сего́ ра́ди дне́сь пра́зднуемъ успе́ніе твое́, лю́діе твои́. Ты́ же, я́ко и́маши дерзнове́ніе ко Христу́, моли́ спасти́ оте́чество твое́, и ми́рнѣй бы́ти держа́вѣ наслѣ́дія твоего́.

Сла́ва и ны́нѣ, богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.


НА ВЕЛИЦѢЙ ВЕЧЕРНИ,
Блаже́нъ му́жъ, 1-й антифо́нъ. На Го́споди воззва́хъ: стихи́ры на 8, гла́съ 6. Подо́бенъ: Все́ отло́жше.

Всю́ отложи́въ вре́менную сла́ву міра, сія́ніемъ Ду́ха Свята́го просвѣ́щся, Даніи́ле богому́дре, стра́стная взыгра́нія воздержа́ніемъ изсуши́лъ еси́, и ле́гкое ева́нгельское бре́мя воспрія́лъ еси́ — кре́стъ тво́й, и, послѣ́дуя Влады́цѣ Христу́, обрѣ́лъ еси́ лѣ́ствицу небе́сную, по не́йже восше́дъ, дости́глъ еси́ Го́рняго Іерусали́ма, и Христо́ва Ца́рствія сонаслѣ́дникъ яви́лся еси́, и со а́нгелы, ра́дуяся, Боже́ственнаго лицезрѣ́нія Его́ наслажда́ешися, Его́же моли́ душа́мъ на́шимъ дарова́ти ми́ръ и ве́лію ми́лость.

Все́ отложи́въ нача́льство княже́нія держа́вы, кро́тостію нра́ва утвержда́яся и те́плѣйшимъ жела́ніемъ къ Бо́гу горя́, мона́шеское житіе́ воспрія́лъ еси́, богоподража́тельне кня́же Даніи́ле, вся́ плотска́я увяди́лъ еси́ мудрова́нія, и цѣлому́дрія сто́лпъ показа́лся еси́, и, смиренному́дрствуя, возвы́сился еси́ къ го́рнему жили́щу, идѣ́же вы́ну Христу́ Бо́гу предстоя́, моли́ душа́мъ на́шимъ дарова́ти ми́ръ и ве́лію ми́лость.

Все́ отложи́въ наслажде́ніе земны́хъ веще́й, вы́шняго ра́ди наслажде́нія, воздержа́нію поревнова́лъ еси́ и страсте́й пла́мень потща́лся еси́ угаси́ти сле́зными пото́ки моли́твъ твои́хъ, воздержа́ніемъ же и поще́ніемъ, я́ко благово́нною пи́щею, напита́лъ еси́ ду́шу твою́, тѣ́мже и, непоро́чное и пра́ведное житіе́ проходя́, дости́глъ еси́ Влады́чня престо́ла, отону́дуже свѣ́тлостьми озаря́яся, моли́ Царя́ Христа́ душа́мъ на́шимъ дарова́ти ми́ръ и ве́лію ми́лость.

Всю́ возложи́въ на Подвигополо́жника наде́жду, простра́нный мíра пу́ть оста́вивъ, у́зкимъ же и приско́рбнымъ мона́шескаго житія́ ше́ствовалъ еси́, богоблаже́нне кня́же Даніи́ле, порфи́ру, и ви́ссонъ, и ца́рскую багряни́цу, сла́ву же и бога́тство мимотеку́щее въ ничто́же вмѣни́въ, небе́сное бога́тство и сла́ву вíчную воспрія́ти удосто́ился еси́, и ны́нѣ въ нетлѣ́нной жи́зни пребыва́я, моли́, Ему́же предстои́ши, дарова́ти душа́мъ на́шимъ ми́ръ и ве́лію ми́лость.

Ины стихи́ры, гла́съ 2:

Кíими боже́ственными пѣ́сньми восхва́лимъ вели́каго кня́зя Даніи́ла, въ по́стницѣхъ воздержа́нія рачи́теля, въ княже́ніи милосе́рда нача́льника, вдо́въ и сиро́тъ предста́теля, ни́щихъ пита́теля, стра́нныхъ и ско́рбныхъ утѣ́шителя, правосла́вныхъ побо́рника, вражды́ прогони́теля, оби́димыхъ засту́пника, его́же ра́ди Христо́съ земли́ Россíйстѣй да́руетъ ми́ръ и ве́лію ми́лость.

Кíими всепра́зднственными хвала́ми ублажи́мъ Даніи́ла блаже́ннаго, трудолю́бнаго Христо́ва са́да дѣ́лателя, смиренному́дрія чи́стое зерца́ло, и́ноковъ удобре́ніе, преподо́бныхъ ра́дованіе, а́нгеловъ собесѣ́дника, небе́сныхъ жи́телей сонаслѣ́дника, сла́ву Россíйскія земли́, ви́димыхъ вра́гъ побѣди́теля, его́же ра́ди Христо́съ россíйскимъ лю́демъ да́руетъ ми́ръ и ве́лію ми́лость.

Кíими похва́льными вѣнцы́ вѣнча́емъ Даніи́ла прему́драго, князе́й россíйскихъ похвалу́, исто́чника Боже́ственныхъ исцѣле́ній неоску́днаго, чи́стое и нескве́рное Святы́я Тро́ицы жили́ще, рѣку́ чуде́съ неисчерпа́ему, добродѣ́телей пра́вило, безпло́тныхъ житія́ подража́теля, небе́снаго граждани́на, его́же ра́ди Христо́съ ва́рварскія по́лчища низложи́, имѣ́яй ве́лію ми́лость.

Кíими радостотво́рными устна́ми возвели́чимъ Даніи́ла, свѣ́тлую звѣзду́, на мы́сленнѣй тве́рди Россíйской просія́вшую, те́плаго засту́пника гра́ду на́шему, су́щимъ въ бѣда́хъ ско́раго поспѣ́шника и всѣ́хъ притека́ющихъ къ нему́ изба́вителя, въ бра́нѣхъ му́жа непобѣди́ма, его́же ра́ди Христо́съ, вра́жія шата́нія низложи́въ, лю́демъ Свои́мъ дарова́ ми́ръ и ве́лію ми́лость.

Сла́ва, гла́съ 6:

Пріиди́те, празднолю́бныхъ собо́ри, Бо́гомъ вѣнча́нные ца́ріе и кня́зи, святи́тели со іере́и, мона́хи со всѣ́мъ христолюби́вымъ мно́жествомъ, свѣ́тлый ли́къ соста́вльше, Дави́дскую воспое́мъ пѣ́снь добропло́дной о́трасли Алекса́ндровой, богоблаже́нному кня́зю Даніи́лу; се́й бо, насажде́нъ въ блаже́нномъ дому́ отца́ своего́, я́ко фи́никсъ высокове́рхій, въ добродѣ́телехъ процвѣ́лъ, и да́же до преставле́нія вѣ́ренъ бы́сть подража́тель всѣ́хъ дѣ́лъ роди́теля своего́, и ны́нѣ съ ни́мъ въ небесѣ́хъ ку́пно ликовству́я, мо́лится непреста́нно сохрани́тися оте́честву своему́ и держа́вѣ, Импера́тору на́шему [и́мярекъ] [1] побѣ́ду на супоста́ты да́руяй моли́твами свои́ми.

И ны́нѣ, богоро́диченъ:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Вхо́дъ. Проки́менъ дне́ и чте́нія три́.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе.

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 3, самогла́сны.

Богоизбра́нная степеннороссíйская о́трасль и наслѣ́дникъ держа́внаго престо́ла бы́лъ еси́, богому́дре кня́же Даніи́ле, на земли́ бо живя́, у́мная очеса́ твоя́ возводи́лъ еси́ къ живу́щему на небесѣ́хъ Бо́гу, и ны́нѣ все́льшися съ весе́ліемъ во дво́ръ небе́сный, блаже́нныя души́ твоея́ у́мную зе́ницу обраща́й на страну́ Россíйскую и призира́й на держа́ву наслѣ́дія твоего́, и на гра́дъ тво́й, и на оби́тель твою́ святу́ю, въ не́йже многоцѣле́бныя мо́щи твоя́ святы́я Христо́вою бла́гостію су́ть храни́мы.

Блаже́нныя души́ твоея́ богозда́нный хра́мъ многоцѣ́нными благолѣ́пныхъ добродѣ́телей би́серы украси́въ и покори́въ ху́ждшее тѣломудрова́ніе лу́чшей богообра́знѣй души́ твое́й, въ го́рній гра́дъ Іерусали́мъ всели́лся еси́, въ не́мже свѣтоза́рнаго вѣ́чнаго блаже́нства луче́й облиста́емый, со а́нгельскими торжеству́еши ли́ки; моли́, свя́те, Боже́ственную Тро́ицу спасти́ всѣ́хъ правовѣ́рныхъ, чту́щихъ святу́ю па́мять твою́, и селе́ній пра́ведныхъ сподо́бити.

Кро́ткаго и смире́ннаго се́рдцемъ возлюби́въ Христа́, киче́ніе возненави́дѣлъ еси́, и душеполе́знымъ смире́нія путе́мъ ше́ствовавъ, оста́вя кня́жескую вла́сть и многосу́етное мірско́е житіе́, всели́лся еси́ въ монасты́рь богоуго́днаго мона́шескаго по́двига, пресла́вне чудотво́рче, кня́же Даніи́ле, въ не́мже благíй послу́шникъ бы́въ, богопоспѣ́шно смиренному́дріемъ въ небе́сныя вше́лъ еси́ оби́тели, и́хже и на́мъ сподо́битися Христу́ Го́споду Іису́су помоли́ся.

Сла́ва, гла́съ 4:

Весели́ся и ра́дуйся, ца́рствующій гра́де Москво́, и да игра́ютъ сы́ны твоя́ въ тебѣ́, свѣ́тло торжеству́юще, въ па́мять благовѣ́рнаго кня́зя Даніи́ла, отъ ко́рене Алекса́ндрова произра́стша: вдо́въ, сиро́тъ и ни́щихъ пита́теля, скорбя́щихъ утѣ́шителя и прибѣга́ющихъ ско́ра помо́щника и засту́пника; его́же дне́сь честнѣ́й ра́цѣ предстоя́ще, благоговѣ́йно покланя́ющеся, возопіе́мъ: богоблаже́нне кня́же Даніи́ле, моли́твами твои́ми да́руй лю́демъ твои́мъ ми́ръ и ве́лію ми́лость.

И ны́нѣ, богоро́диченъ:

При́зри на моле́нія Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ.

На стихо́внѣ стихи́ры, гла́съ 4. Подо́бенъ: Яко до́бля.

Зва́нію Влады́ки твоего́ Христа́, Иже рече́: гряди́ въ слѣ́дъ Мене́, усе́рдно послѣ́довалъ еси́, богому́дре кня́же Даніи́ле, взе́мь бо кре́стъ — непобѣди́мое ору́жіе, на стра́сти па́губныя му́жески укрѣпи́вся, побѣди́лъ еси́ ви́димыхъ и неви́димыхъ враго́въ по́лчища и, здѣ́ пожи́въ богоуго́дно, ны́нѣ на небесѣ́хъ почива́еши съ ми́ромъ.

Сти́хъ: Честна́ предъ Го́сподемъ сме́рть преподо́бныхъ Его́.

Терпѣ́ніе мно́го стяжа́въ, отъ зави́ствующихъ на твое́ оте́чественное наслѣ́діе премо́глъ еси́ вся́ приключи́вшіяся напа́сти, благовѣ́рный кня́же Даніи́ле, благомо́щнымъ посто́мъ и богопрія́тною моли́твою, небе́сная дарова́нія отъ Христа́ пріе́мъ врачева́ти вся́кія болѣ́зни, да́руй у́бо и на́мъ вся́кихъ бѣ́дъ свобожде́ніе.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Богому́дреннымъ смы́сломъ въ за́повѣдехъ Бо́жіихъ пребы́лъ еси́ тве́рдъ, правосла́вною укрѣпля́емь вѣ́рою, крѣ́пцѣ оправда́нія Госпо́дня соверша́я, богоблаже́нне кня́же Даніи́ле, житія́ цѣлому́дріемъ въ по́стничествѣ пожи́лъ еси́, богопрія́тными моли́твами удиви́лъ еси́ лю́ди своя́, и́миже испроси́ у Христа́ Бо́га ве́лію ми́лость.

Сла́ва, гла́съ 6:

Возсія́ дне́сь ра́достная па́мять всѣ́мъ благочести́вымъ лю́демъ, па́че же великоца́рственному гра́ду Москвѣ́, въ не́мъ же лежа́тъ святы́я мо́щи всеблаже́ннаго кня́зя Даніи́ла, и́же къ честнѣ́й его́ ра́цѣ вѣ́рно приходя́щихъ отъ бѣ́дъ избавля́етъ и вра́жія навѣ́ты разоря́етъ, ца́рству устроя́етъ ми́ръ, и о благоде́нствѣ Импера́тора на́шего [и́мярекъ], и о все́мъ ро́дѣ Россíйскомъ непреста́нно мо́литъ Всеблага́го Бо́га, да, отъ вся́кихъ бѣ́дъ и напа́стей изба́вльшеся, полу́чимъ вси́ моли́твами его́ Ца́рство небе́сное.

И ны́нѣ, богоро́диченъ:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.

На благослове́ніи хлѣ́бовъ тропа́рь, гла́съ 4, два́жды. [Пи́санъ на ма́лѣй вече́рни.] И Богоро́дице Дѣ́во.., еди́ножды. И чте́ніе.



НА УТРЕНИ,
На Бо́гъ Госпо́дь: тропа́рь свята́го, два́жды. Сла́ва, и ны́нѣ, богоро́диченъ: Еже отъ вѣ́ка утае́нное...

По 1-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.

Благíй яре́мъ и ле́гкое Ева́нгелія за́повѣдей Бо́жіихъ бре́мя богому́дренне возжела́лъ еси́ носи́ти, досточу́дне кня́же Даніи́ле, и, въ таково́мъ трудѣ́ и по́двизѣ веліа́рова злоко́знства попра́въ, не обремени́лся еси́ грѣха́ми, добродѣ́тельми же благоукраси́лся еси́, тѣ́мъ и ле́гко преше́лъ еси́ въ небе́сныя оби́тели. [Два́жды.]

Сла́ва, и ны́нѣ, богоро́диченъ:

Тебе́, Небе́сную Цари́цу, Дѣ́ву и Богоро́дицу, вси́ ро́ди, блажи́мъ: Ты́ бо еди́на крѣ́пкая и те́плая Предста́тельница ро́ду человѣ́ческому; непреста́нно у́бо моли́, Его́же родила́ еси́ па́че естества́, Бо́га Сло́ва, да грѣхо́внаго тя́жка бре́мене свободи́тъ ны́, и Ца́рствія Своего́ наслѣ́дники пока́жетъ.

По 2-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

По о́бразу Бо́жію благоро́діе боготво́рныя души́ имѣ́я, о́тче преподо́бне и чудотво́рче Даніи́ле, непреста́нно во все́мъ твое́мъ житіи́ боготворя́щей всѣ́хъ су́щихъ Винѣ́, Тро́ическому въ Божествѣ́ Еди́нству воспере́нъ богомы́сленнѣ бы́лъ еси́, тѣ́мже и по подо́бію вся́кимъ достодо́лжнствомъ благоче́стія благоукраси́лся еси́ соверше́нне; моли́ Творца́ на́шего Го́спода, да на́съ, согрѣ́шшихъ, спасе́тъ и по подо́бію благочести́вы сотвори́тъ. [Два́жды.]

Сла́ва, и ны́нѣ, богоро́диченъ:

Удиви́шася вся́ небе́сная чинонача́лія и на земли́ живу́щіи человѣ́цы о Тебѣ́, Богома́ти Влады́чице, я́ко сподо́билася еси́ преесте́ственно роди́ти пло́тію Ѵпоста́сное Бо́га Отца́ Сло́во и я́ко мы́сленной киво́тъ, содержа́вшій въ Себѣ́ не Моисе́овы богопи́санныя скрижа́ли, но Са́мую Ѵпоста́сь Тро́ичныя Зари́, Законода́теля Ве́тхаго и Но́ваго Завѣ́та Іису́са Христа́, Го́спода на́шего, Имже прешла́ еси́ пло́тію въ го́рняя жили́ща, Его́же, Пречи́стая Дѣ́во, моли́ спасти́ ду́ши на́ша.

Посе́мъ поліеле́й, та́же припѣ́въ:

Ублажа́емъ тя́, благовѣ́рный кня́же Даніи́ле, и чте́мъ святу́ю па́мять твою́, ты́ бо мо́лиши о на́съ Христа́ Бо́га на́шего.

Псало́мъ со стихи́ преподо́бническій.

По поліеле́и сѣда́ленъ, гла́съ 8. Подо́бенъ: Прему́дрости.

Благоче́стно и свя́то житіе́ твое́ соверши́въ, богоуго́денъ показа́лся еси́ власти́тель имени́таго гра́да Москвы́, престо́лъ имѣ́я, и держа́ву вла́сти твоея́ управля́я богозако́ннѣ, и въ Бо́га и́стинно вѣ́руя, отъ всѣ́хъ враго́въ Це́рковь Святу́ю и вся́ лю́ди защища́я, непобѣди́мъ яви́лся еси́, Даніи́ле приснопа́мятне, о́тче на́шъ; благоудобри́вся же мона́шескимъ житіе́мъ и а́нгельски во оби́тели смиренному́дрствуя, на ве́рхъ добродѣ́телей возше́лъ еси́, прекра́снаго рая́ наслѣ́діе пріе́мъ; моли́ Христа́ Го́спода прегрѣше́ній оставле́ніе дарова́ти чту́щимъ святу́ю па́мять твою́. [Два́жды.]

Сла́ва, и ны́нѣ, богоро́диченъ:

Ра́дуйся, Богоро́дице Дѣ́во, Ма́ти Всечи́стая, непоро́чное вѣ́чныя жи́зни зерца́ло, Бо́га Отца́ благоволе́ніе, Бо́га Сы́на жили́ще, Бо́га Ду́ха Свята́го дѣ́йство, Еди́наго Тріѵпоста́снаго Божества́ благоукраше́нная и соверше́нная чистоты́ оби́тель. Ра́дуйся, ключу́ Ца́рства небе́снаго, отверза́ющій вхо́дъ всѣ́мъ, къ Тебѣ́ притека́ющимъ и зову́щимъ Тебѣ́: ра́дуйся, Влады́чице, пода́ждь всѣ́мъ здра́вое и благовре́менное пребыва́ніе и вѣ́чна рая́ со святы́ми всѣ́ми наслѣ́діе.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Пріиди́те дне́сь, ца́рствующаго гра́да Москвы́ наро́ди, во оби́тель вели́каго и чу́днаго кня́зя Даніи́ла, въ де́нь пра́здника его́ веселя́щеся, и въ хра́мъ Бо́га на́шего вни́демъ и, къ ра́цѣ моще́й уго́дника Его́ прите́кше, духо́вный соста́вимъ ли́къ, пѣ́сненными похвала́ми воспое́мъ, глаго́люще: ра́дуйся, земны́й а́нгеле, и́же а́нгельскому житію́ подража́вый чи́стымъ житіе́мъ свои́мъ; ра́дуйся, граждани́не небе́сный и вѣ́чныя ра́дости наслѣ́дниче, и́же пріе́мый благíй яре́мъ Влады́ки своего́ Христа́ и ле́гко понесы́й; и ны́нѣ, преблаже́нне кня́же Даніи́ле, воспріе́мый мзду́ трудо́въ свои́хъ, и вше́дый въ ра́дость Го́спода твоего́, и я́ко имѣ́я дерзнове́ніе къ Нему́, моли́ держа́вѣ Благовѣ́рнаго Импера́тора на́шего [и́мярекъ], въ ми́рѣ пребыва́ти, и всѣ́мъ правосла́вно чту́щимъ святу́ю па́мять твою́, получи́ти отъ Христа́ Бо́га ве́лію ми́лость.

Кано́нъ Богоро́дицы со ирмосо́мъ на 6, и свята́го два́ кано́на на 8.

Кано́нъ свята́го, его́же краегране́сіе си́це: Посли́ мнѣ́ благода́ть Твою́, Христе́, да просла́влю Твоего́ уго́дника. Гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Просвѣти́ ми́ у́мъ и озари́ моя́ чу́вства, согрѣше́ній мра́къ души́ моея́ отгна́въ, Христе́ Бо́же, да чи́стою со́вѣстію возмогу́ пѣ́снь соста́вити и возвели́чити Твоего́ уго́дника, блаже́ннаго кня́зя Даніи́ла.

Свѣтолу́чными блиста́ніи Ду́ха Свята́го осіява́емый, яви́лся еси́ пресвѣ́тлый свѣти́льникъ Россíйскія земли́, богому́дре кня́же Даніи́ле, тѣ́мъ ны́нѣ свѣтоза́рному Тро́ическому Свѣ́ту предстоя́, моли́ о наслѣ́діи держа́вы твоея́.

Изъ мла́да себе́ самаго́ Бо́гу освяти́лъ еси́ и чре́зъ всю́ жи́знь твою́ бы́лъ еси́ и́стинный Христо́ва Ева́нгелія подража́тель, тѣ́мъ и наслѣ́дникъ Боже́ственнаго Ца́рствія позна́лся еси́, приснопа́мятне кня́же Даніи́ле.

Богоро́диченъ: Сѣдя́щаго на херуви́мѣхъ Творца́ Ты́ еди́на, Богоневѣ́сто, на объя́тіяхъ носи́ти сподо́билася еси́ и яви́лася еси́ отъ всѣ́хъ родо́въ Бо́га Сло́ва Прія́телище досто́йное.

Другíй кано́нъ, гла́съ 8.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

О Ца́рствѣ небе́снѣмъ вы́ну помышля́я, земну́ю оста́вилъ еси́ вла́сть, еди́наго всѣ́хъ Царя́ Бо́га возлюби́въ, съ Ни́мже ны́нѣ водворя́яся въ небе́сныхъ оби́телѣхъ, моли́ Его́ о чту́щихъ тя́, досточу́дне Даніи́ле.

Отъ са́мыхъ пеле́нъ ма́тернихъ избра́ тя́ Влады́ка, и, я́ко хра́мъ честны́й и непоро́чный, ду́шу твою́ освяти́, и предугото́ва въ жили́ще Себѣ́, и просла́ви тя́ въ чудесе́хъ, богоблаже́нне уго́дниче Христо́въ Даніи́ле.

Младе́нецъ по боже́ственномъ роди́телѣ твое́мъ оста́вльшися, Бо́гомъ воспи́танъ и наста́вленъ еси́, всѣ́хъ роди́тельскихъ дѣ́лъ и́стинное зерца́ло показа́лся еси́, блаже́нне.

Богоро́диченъ: Яко Дѣ́ву еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи, и, наде́жду на Тя́ возложи́вше, спаса́емся, и, къ Тебѣ́ прибѣга́юще, отъ вся́кихъ бѣ́дъ свобожда́емся.

Катава́сія: Отве́рзу уста́ моя́...

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Зако́ну Спа́сову покаря́ющися, всесла́вне Даніи́ле, сладостра́стіе плотско́е отри́нулъ еси́, добродѣ́тельною же душе́ю свѣ́тло просвѣща́яся, небе́снаго Ца́рствія дости́глъ еси́.

Вели́кое Це́ркви бы́лъ еси́ украше́ніе, въ не́йже Христу́, Царю́ сла́вы, наслѣ́дникъ небе́снаго хра́ма показа́лся еси́, блаже́нне, идѣ́же со а́нгелы уже́ пѣ́ти Творцу́ удосто́ился еси́.

Терпя́, потерпѣ́лъ еси́ Го́спода, и услы́ша тя́, и вня́тъ гла́су непреста́ннаго моле́нія твоего́, и воззва́ тя́ къ вѣ́чному весе́лію, ра́йскаго сотвори́въ наслѣ́дника.

Богоро́диченъ: Влады́чице Блага́я, всѣ́хъ Творца́ во утро́бѣ Твое́й заче́ншая и ро́ждшая мíру Спа́са и Го́спода, Его́же моли́, да изба́витъ на́съ отъ вся́кихъ искуше́ній и въ чи́стомъ житіи́ соблюде́тъ на́съ.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Пло́дными добродѣ́тельми украша́емь, вся́ку тлѣ́емую сла́дость жите́йскую я́вѣ отрази́лъ еси́, къ Бо́жіей добро́тѣ непреста́нно взира́ющи.

Яко украше́ніемъ чуде́съ одѣ́янъ всегда́, чудотво́рецъ яви́лся еси́, мірска́го у́бо вре́да и на́съ изба́ви, блаже́нне, да пое́мъ вы́ну Бо́га, просла́вльшаго тя́.

Цѣлому́дріе соблю́дши и ева́нгельскимъ укра́шенъ ра́зумомъ, смиренному́дрствовалъ еси́ о Христѣ́ и ны́нѣ съ Ни́мъ вѣ́чно ра́дуешися.

Богоро́диченъ: Родила́ еси́, Ма́ти Дѣ́во Чи́стая, Свѣ́тъ непристу́пный, Иже ве́сь мíръ просвѣща́етъ ясносія́тельными заря́ми Своего́ Божества́.

Сѣда́ленъ, гла́съ 4:

Отъ ко́рене блага́го прекра́сная вѣ́твь изра́слъ еси́, и а́ки благоуха́нный кри́нъ, добродѣ́тельми укра́шенъ бы́лъ еси́, призира́я ми́лостію на ни́ща и убо́га и на вся́ подвла́стныя тебѣ́ лю́ди, блаже́нне и приснопа́мятне кня́же Даніи́ле, зловѣ́рныя же и вражде́бныя въ любо́вь и смире́ніе преклони́въ, въ бдѣ́ніяхъ и трудѣ́хъ богоуго́дно пожи́лъ еси́, и досто́йную мзду́ отъ Го́спода твоего́ прія́лъ еси́. Того́ у́бо моли́, дарова́ти душа́мъ на́шимъ ми́ръ и ве́лію ми́лость. [Два́жды.]

Сла́ва, и ны́нѣ, богоро́диченъ:

Боже́ственная ски́нія была́ еси́, еди́на Пречи́стая Дѣ́во Ма́ти, чистото́ю а́нгелы превозше́дшая и заче́ншая во утро́бѣ Твое́й Пребезнача́льнаго Сло́ва, Собезнача́льна же Отцу́, и Сего́ всему́ мíру Изба́вителя ро́ждшая, мене́, па́че всѣ́хъ оскверне́нна плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи души́ мое́й ми́ръ и ве́лію ми́лость.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Яко же зла́то огне́мъ, свяще́ннѣйше, воздержа́ніемъ честно́е тѣ́ло твое́ очи́стивъ, красно́ показа́лъ еси́ Творцу́, сего́ ра́ди тебѣ́ порфи́ру нетлѣ́нну вѣ́чнаго блаже́нства дарова́.

Ро́дъ, и бога́тство, и держа́ву Христа́ ра́ди оста́вивъ и взе́мъ кре́стъ сво́й, подвиза́лся еси́ боголѣ́пно, тѣ́мъ ны́нѣ съ преподо́бныхъ ли́ки ра́дуешися.

Ревнова́въ въ добродѣ́телехъ богому́дрымъ отце́мъ, ева́нгельское сѣ́мя Бо́жія словесе́ въ се́рдцѣ твое́мъ насади́лъ еси́, и пло́дъ прине́слъ еси́ Влады́цѣ, тѣ́мъ и мзду́ отъ Него́ прія́лъ еси́ досто́йную.

Богоро́диченъ: Родила́ еси́ въ лѣ́то Безлѣ́тнаго, Пречи́стая, бы́вша Богочеловѣ́ка; Того́ у́бо прилѣ́жно моли́, да свободи́тъ вѣ́чнаго муче́нія и спасе́тъ по о́бразу Своему́ созда́ннаго человѣ́ка.

Инъ.

Ирмо́съ: Проро́къ Авваку́мъ у́мныма очи́ма прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́.

Умертви́лъ еси́ вся́ пло́ти смертоно́сныя стра́сти благода́тію Христо́вою, тѣ́мъ животво́рными твои́хъ чуде́съ приложе́ньми стра́ждущія оживи́ и вра́тъ сме́ртныхъ изба́ви.

Щито́мъ огради́вшись благоче́стія, бы́лъ еси́, блаже́нне, о́бразъ лю́демъ Госпо́днимъ въ нача́льствѣ княже́нія и въ пребыва́ніи мона́шества, тѣ́мъ вси́ тебе́ ублажа́емъ.

Исто́чникъ чуде́съ яви́ся гро́бъ тво́й, богоблаже́нне кня́же Даніи́ле, къ нему́же вѣ́рою приходя́щіи и кла́няющіися честнѣ́й твое́й ра́цѣ, жела́емая пріе́млютъ исцѣле́нія.

Богоро́диченъ: Ма́терь Тя́ Бо́жію вѣ́мы вси́ и по рождествѣ́ я́вльшуюся нетлѣ́нну Дѣ́ву; Тѣ́мъ моли́ изъ Тебе́ Ро́ждшагося, да изба́витъ вѣ́чнаго тлѣ́нія всѣ́хъ, вѣ́рою воспѣва́ющихъ Тя́.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Огне́мъ любве́ Бо́жія непреста́нно распаля́яся, оста́вивъ мíръ, во оби́тели мона́шествовати изво́лилъ еси́, всече́стне, тѣ́мъ дарова́ньми Ду́ха Свята́го обогаще́нъ, чудодѣ́йствомъ лю́ди спаса́еши.

Се́ хра́мъ тво́й чудесы́ всеблаголѣ́пно, я́ко звѣзда́ми свѣ́тлыми, украша́ется, и, веселя́ся, всегда́ блажи́тся и всечестну́ю твою́ па́мять пра́зднуетъ благоче́стно, вели́кій чудотво́рче Даніи́ле.

Разли́чныхъ напа́стей и бѣ́дъ нахожде́ніе твои́ми моли́твами отрази́, богоблаже́нне кня́же Даніи́ле, и всѣ́мъ, усе́рдно соверша́ющимъ всепра́зднственную па́мять твою́, грѣхо́въ оставле́ніе испроси́.

Богоро́диченъ: Тебе́ еди́ну по Бо́зѣ и́мамы Предста́тельницу ро́да на́шего, Тебе́ у́бо про́симъ, я́ко и́маши дерзнове́ніе къ Сы́ну Твоему́ и Бо́гу на́шему, помоли́ся къ Нему́, во е́же спасти́ся на́мъ.

Инъ.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Теку́щая и тлѣ́нная презрѣ́въ, нетлѣ́нная сподо́бился еси́ зрѣ́ти, идѣ́же вы́ну Христа́ прославля́я, моли́ Его́, да на́съ вѣ́чныя Своея́ сла́вы наслѣ́дниковъ пока́жетъ.

Благонра́вно и добродѣ́тельно въ кня́жествѣ пожи́лъ еси́, и, а́нгельскому подража́въ житію́, во оби́тель всели́лся еси́, ю́же са́мъ еси́ созда́лъ, и въ не́й чи́стымъ пожи́въ житіе́мъ, ны́нѣ въ небе́сныхъ водворя́ешися оби́телехъ.

Яко предста́теля тя́ и засту́пника гра́ду твоему́, и оби́тели твое́й, и всѣ́мъ лю́демъ россíйскимъ показа́ Бо́гъ; защища́й у́бо гра́дъ тво́й, ми́рну же и во все́мъ дово́льну содѣ́лай оби́тель и лю́демъ твои́мъ спасе́ніе исхода́тайствуй.

Богоро́диченъ: Пренепоро́чная Нетлѣ́нная Отрокови́це, Богома́ти Влады́чице, при́зри на рабы́ Твоя́, вѣ́рно прибѣга́ющія подъ кро́въ Тво́й, и моли́ Сы́на Своего́ отъ вся́кихъ бѣ́дъ изба́вити на́съ.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Предстоя́ при́сно престо́лу Тро́ичныя благода́ти, со всѣ́ми ра́дуяся а́нгелы и мíру исцѣле́ній бога́тство подава́я, спаси́ всѣ́хъ на́съ моли́твами твои́ми.

Отверзо́шася тебѣ́ две́ри Еде́мскія, и жи́тели небе́сныя съ вели́кимъ весе́ліемъ и ра́достію тя́ прія́ша, идѣ́же съ ни́ми ра́дуяся, вы́ну Благовѣрнаго Импера́тора на́шего [и́мярекъ], ми́лостивно посѣща́й, и всѣ́хъ, вѣ́рно чту́щихъ тя́ помина́й.

Яви́лся еси́ лю́демъ твои́мъ предста́тель те́плый, вдо́въ и сиро́тъ засту́пникъ, ни́щихъ пита́тель, скорбя́щихъ утѣше́ніе, и вѣ́рному Импера́тору на́шему [и́мярекъ], побо́рникъ, и гра́ду и оби́тели твое́й утвержде́ніе.

Богоро́диченъ: Яви́лася еси́ Изба́вительница ро́да человѣ́ческаго, Ма́ти Бо́га на́шего, тѣ́мъ Ти́ вѣ́рно припа́даемъ: Сы́на Твоего́, я́ко Бла́га, моли́, Всенепоро́чная, отъ вся́кихъ бѣ́дъ и искуше́ній изба́вити ны́.

Инъ.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Да́ръ Бо́жій жела́емый да́лся еси́ Россíи, бога́тыми чуде́съ дара́ми сія́ющъ, тѣ́мъ, вы́ну Тро́ичными озаре́ніи осіява́емь, мно́жеству святы́хъ ли́къ сликовствова́ти сподо́бился еси́.

Ра́ка, идѣ́же лежа́тъ честны́я твоя́ и святы́я мо́щи, богоблаже́нне кня́же Даніи́ле, исто́чникъ чуде́съ излива́етъ съ вѣ́рою приходя́щимъ и покланя́ющимся тебѣ́.

Блаже́нъ гра́дъ, блаже́нна и оби́тель, въ не́йже въ житіи́ твое́мъ подвиза́тися изво́лилъ еси́, и по сме́рти твое́й, я́ко многоцѣ́нный да́ръ, мо́щи твои́ оста́вивъ, призира́еши на всѣ́хъ, живу́щихъ въ не́й.

Богоро́диченъ: Во мно́гія бѣды́ и напа́сти впа́дъ, бу́рею одержи́мь безчи́сленныхъ согрѣше́ній, сего́ ра́ди къ Тебѣ́, я́ко къ те́плому предста́тельству, прибѣга́ю, Дѣ́во: моли́ изъ Тебе́ воплоще́ннаго Бо́га, да прегрѣше́ній оставле́ніе пода́стъ рабу́ Твоему́.

Конда́къ, гла́съ 4:

Избра́нный Бо́гомъ отъ чре́слъ роди́тельскихъ и воспи́танный отъ младе́нчества въ зако́нѣ Госпо́дни въ му́жа соверше́нна и Про́мысломъ Вы́шняго, имени́таго гра́да Москвы́ наслѣ́діе кня́жества пріе́мъ, вѣ́ренъ строи́тель благочести́вымъ лю́демъ твои́мъ показа́лся еси́, богоблаже́нне Даніи́ле, и́хже о́бразомъ свои́мъ наставля́я и поуча́я за́повѣдемъ Госпо́днимъ вы́ну, путе́мъ, веду́щимъ въ живо́тъ вѣ́чный, при́сно ше́ствуя, небе́снаго Ца́рства дости́глъ еси́, идѣ́же со а́нгельскими водворя́яся ли́ки, пое́ши Бо́гу: Аллилу́ія.

Икосъ:

Ангелъ во пло́ти на земли́ показа́лся еси́, богому́дре кня́же Даніи́ле, сла́вя непреста́нно Творца́ не́ба и земли́, вся́кимъ бо о́бразомъ во́лю Его́ чре́зъ всю́ твою́ жи́знь испо́лнити потща́лся еси́, всѣ́мъ благотворя́, прія́лъ еси́ отъ Христа́ да́ръ чудотворе́нія, тѣ́мже зове́мъ ти́: ра́дуйся, я́ко отъ младе́нства Бо́гомъ избра́нный; ра́дуйся, я́ко Тѣ́мже въ гражда́нство небе́сное зва́нный; ра́дуйся, я́ко держа́ву вла́сти твое́й благоче́стіемъ и пра́вдою украси́лъ еси́; ра́дуйся, я́ко на враги́ зловѣ́рцы и враждотво́рцы отъ Бо́га получи́вый побѣ́ды; ра́дуйся, я́ко, оста́вивъ мíръ преле́стный, къ ти́хому приста́нищу равноа́нгельскаго житія́ прите́клъ еси́, въ не́мже показа́лъ еси́ всѣ́мъ о́бразъ воздержа́нія; ра́дуйся, я́ко за толи́кіи по́двиги твоя́ сподо́бивыйся отъ Христа́ благода́ти и чуде́съ дарова́нія; ра́дуйся, я́ко въ не́бѣ со всѣ́ми святы́ми Богонача́льную Тро́ицу зри́ши и То́й вы́ну пое́ши: Аллилу́ія.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Утреневавъ къ Бо́гу отъ младе́нства, всебога́те, тьмы́ избѣ́глъ еси́ тѣле́сныхъ страсте́й, воздержа́ніемъ и да́ромъ чуде́съ обогати́лся еси́, преподо́бне, и ны́нѣ съ го́рними водворя́яся ли́ки, пое́ши Творцу́: благослове́нъ еси́ въ хра́мѣ сла́вы Твоея́, Го́споди.

Во всю́ Россíю про́йде сла́ва чуде́съ Твои́хъ, блаже́нне, и́миже просвѣти́лъ еси́ лю́ди твоя́, и́же, твои́мъ чудодѣ́йствомъ отъ вся́кихъ бѣ́дъ и напа́стей избавля́еми, пою́тъ Творцу́: благослове́нъ еси́ въ хра́мѣ сла́вы Твоея́, Го́споди.

Пѣ́сньми и пѣ́ньми духо́вными хва́лимъ тя́, блаже́нне, и честну́ю твою́ и многоцѣле́бную обстоя́ще ра́ку, си́це вопіе́мъ просла́вльшему тя́ Творцу́: благослове́нъ еси́ въ хра́мѣ сла́вы Твоея́, Го́споди.

Богоро́диченъ: Дѣ́ва пребыла́ еси́ по рождествѣ́, я́коже была́ еси́ пре́жде рождества́, Бо́га бо Сло́ва родила́ еси́, избавля́ющаго ны́ хода́тайствомъ Свои́мъ, Ему́же, вѣ́рніи, непреста́нно пое́мъ: благослове́нъ еси́ въ хра́мѣ сла́вы Твоея́, Го́споди.

Инъ.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Стопа́мъ послѣ́дуя я́вѣ всеблаже́ннаго роди́теля твоего́ Алекса́ндра, богому́дре приснопа́мятне кня́же Даніи́ле, наслѣ́діе кня́жества Моско́вскаго воспрія́лъ еси́, послѣди́ же и́ноческимъ житіе́мъ преше́лъ еси́ въ го́рняя оби́тели, идѣ́же вы́ну пое́ши отце́въ Бо́га Благослове́ннаго.

Въ по́стничествѣ и бдѣ́нныхъ моли́твахъ богому́дренно пожи́лъ еси́ и непреста́нно сла́вилъ Творца́ твоего́, воспѣва́я Ему́: отце́въ Бо́же, благослове́нъ еси́.

Богоро́диченъ: Яко Кра́сная, Кра́снаго родила́ еси́, безобра́зіе на́ше обрати́вшаго въ пе́рвый о́бразъ, Отрокови́це Всенепоро́чная, Ему́же пое́мъ: отце́въ Бо́же, благослове́нъ еси́.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Досто́йно дне́сь въ преставле́ніи твое́мъ торжеству́етъ ца́рствующій гра́дъ Москва́, досто́йно и оби́тель твоя́ честна́я, ю́же созда́лъ еси́, въ не́й же святы́я твоя́ почива́ютъ мо́щи, ублажа́я тя́, Творцу́ взыва́етъ: благослови́те, вся́ дѣла́ Госпо́дня, Го́спода.

Ми́лостивными твои́ми щедро́тами ни́щихъ и убо́гихъ напита́лъ еси́, и са́мъ отъ Христа́ вѣ́чную получи́лъ еси́ ми́лость, Ему́же вы́ну предстоя́, со а́нгелы пое́ши: благослови́те, вся́ дѣла́ Госпо́дня, Го́спода.

Вели́кое твое́ заступле́ніе и предста́тельство воспомина́емъ, богоблаже́нне кня́же Даніи́ле, и сего́ ра́ди собра́вшеся въ де́нь па́мяти твое́я, я́ко о́бщему всѣ́хъ на́съ засту́пнику, хвалу́ воздае́мъ ти́, воспѣва́юще: благослови́те, вся́ дѣла́ Госпо́дня, Го́спода.

Богоро́диченъ: Вседержи́тельною си́лою нося́й вся́ческая въ человѣ́ческую пло́ть изъ Тебе́ одѣ́яся, Дѣ́во Всенепоро́чная, на благодѣя́ніе пою́щимъ: благослови́те, вся́ дѣла́ Госпо́дня, Го́спода.

Инъ.

Ирмо́съ: Богоглаго́ливіи о́троцы въ пещи́, со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Дне́сь ца́рствующаго гра́да Москвы́ наро́ди, сте́кшеся отвсю́ду въ честну́ю оби́тель благовѣ́рнаго кня́зя Даніи́ла, въ де́нь пра́зднственный па́мяти его́, Творцу́ воспое́мъ: благослови́те, дѣла́ Госпо́дня, Го́спода.

Пріиди́те, вси́ ца́ріе и кня́зи, святи́тели и вси́ свяще́нныхъ собо́ри, въ хра́мъ Бо́га на́шего, идѣ́же лежа́тъ мо́щи вели́каго кня́зя Даніи́ла, и́хже облобыза́юще, Творцу́ вопіе́мъ: благослови́те, дѣла́ Госпо́дня, Го́спода.

Дне́сь Це́рковь Христо́ва, пра́зднующи Даніи́лово торжество́, су́щее о Бо́зѣ, всѣ́хъ созыва́етъ вѣ́рныхъ къ похвалѣ́ уго́дника Христо́ва, и́же исцѣле́ніе источа́етъ вѣ́рою приходя́щимъ къ нему́ и пою́щимъ Творцу́: благослови́те, дѣла́ Госпо́дня, Го́спода.

Богоро́диченъ: Глаго́ломъ Иса́іи проро́ка послѣ́дующе, Богоро́дицу Тя́ исповѣ́дуемъ: родила́ бо еси́ Отроча́, всѣ́хъ дре́внѣйшее, нарица́емое Емману́илъ, Ему́же зове́мъ: благослови́те, дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Дне́сь сте́кшеся во оби́тель твою́ и въ хра́мъ Бо́га на́шего, благовѣ́рный кня́же Даніи́ле, прилѣ́жно мо́лимтися: пода́ждь лю́демъ ми́рное здра́віе и въ ско́рбехъ ра́достное утѣше́ніе, да тя́, ско́раго защи́тника на́шего, вѣ́рою ублажа́емъ.

Основа́теля и первонача́льника, кня́зя гра́да Москвы́, богоблаже́нне кня́же Даніи́ле, показа́ тя́ Госпо́дь, къ Нему́же непреста́нно моля́ся, гра́дъ и оби́тель твою́ отъ вся́кихъ бѣ́дъ спаса́й и Благовѣ́рнаго Импера́тора на́шего [и́мярекъ], ми́лостивно посѣща́й.

Па́мять пра́здника твоего́ хва́ляще, вси́ лю́діе твои́ со мно́жествомъ и́ночествующихъ по́стникъ покланя́ются тебѣ́, и ви́дяще отъ Бо́га да́нная ти́ пресла́вная чудеса́, про́сятъ отъ тебе́ ми́лости, и́хже моле́нія не пре́зри.

Богоро́диченъ: Свѣ́тъ ро́ждшая — Іису́са Го́спода, просвѣща́яй вся́каго человѣ́ка, Дѣ́во Богома́ти, тѣ́мъ Тя́ мо́лимъ: отъ вся́кихъ бѣ́дъ и напа́стей лю́ди Твоя́ изба́ви, да Тя́, Засту́пницу ро́да на́шего, при́сно велича́емъ.

Инъ.

Ирмо́съ: Чи́стую сла́вно почти́мъ, лю́діе, Богоро́дицу, о́гнь Божества́ пріи́мшую во чре́вѣ неопа́льно, пѣ́сньми велича́емъ.

Еди́но Божество́ въ Тріе́хъ Ѵпоста́сѣхъ, Богонача́льную и Всетворя́щую Вину́ въ житіи́ твое́мъ при́сно велича́лъ еси́, предстоя́ Ему́, моли́ о лю́дехъ твои́хъ, во е́же отъ вся́кихъ бѣ́дъ и напа́стей спасти́ся и́мъ.

Ре́вность вели́кую показа́лъ еси́ къ благоче́стію, Даніи́ле блаже́нне, преизря́денъ о́бразъ бы́въ всѣ́мъ лю́демъ твои́мъ, тѣ́мъ ны́нѣ предстоя́ всѣ́хъ Творцу́, моли́ся, да отъ всѣ́хъ бѣ́дъ и искуше́ній изба́витъ и наслѣ́дники Ца́рствія Своего́ пока́жетъ ны́.

Ели́ко вели́къ въ правосла́вномъ княже́ніи твое́мъ, богому́дре кня́же Даніи́ле, бы́лъ еси́, толи́ко смири́лъ еси́ себе́, тѣ́мже Всеблагíй Бо́гъ тя́ превознесе́ и дарова́ тебѣ́ небе́сное наслѣ́діе и чуде́съ благода́ть, ю́же вѣ́рнымъ лю́демъ твои́мъ ми́лостивно подава́й, и о здра́віи Импера́тора на́шего [и́мярекъ], ко Го́споду помоли́ся.

Богоро́диченъ: Изба́вителя и Спа́са на́шего родила́ еси́, Всенепоро́чная Дѣ́во, Сего́ у́бо моли́ изба́вити на́съ прегрѣше́ній на́шихъ и наслѣ́дники Ца́рствія Своего́ сотвори́, да Тя́, Предста́тельницу на́шу, при́сно велича́емъ.

Свѣти́ленъ. Подо́бенъ: Жены́, услы́шите.

Богонача́льныя и Всебоже́ственныя Тро́ицы Свѣ́томъ озари́вся, свѣ́тъ, добросія́ющій благода́тію Іису́съ Христо́вою, все́й Россíи яви́лся еси́, благоро́дный кня́же Даніи́ле; озари́тися у́бо и на́мъ Пребоже́ственнымъ свѣ́томъ, Живонача́льную Тро́ицу моли́, да, съ тобо́ю вѣ́чныя ра́дости наслажда́ющеся, воспое́мъ Бо́га, просла́вльшаго тя́. [Два́жды.]

Сла́ва, и ны́нѣ, богоро́диченъ:

Всю́ наде́жду спасе́нія на́шего на Тя́ возлага́емъ, Богома́ти Неискусобра́чная, и на по́мощь при́сно Тя́ призыва́емъ: отъ напа́сти и печа́ли врага́ спаси́ на́съ, грѣхо́вную плѣни́цу зо́лъ на́шихъ разрѣша́я, вѣ́чнаго огня́ исхити́, да Тя́, Предста́тельницу ро́да на́шего, при́сно велича́емъ.

На хвали́техъ стихи́ры на 4, гла́съ 4. Подо́бенъ: Да́лъ еси́ зна́меніе.

Да́лъ еси́, Христе́ Бо́же, Россíйстѣй земли́ чудотво́рца пресла́вна, Даніи́ла блаже́ннаго, всѣ́мъ въ бѣда́хъ ско́раго помо́щника, вдо́въ и сиро́тъ засту́пника, плѣ́нныхъ свободи́теля и ни́щихъ пита́теля, свѣти́льника всесвѣ́тлаго, вся́ Россíйскія страны́ просвѣща́ющего и лю́ди своя́ отъ вся́кихъ бѣ́дъ избавля́ющаго, его́же моли́твами да́руй гра́ду и оби́тели на́шей утвержде́ніе, и лю́демъ Твои́мъ ве́лію ми́лость.

Да́лъ еси́, Христе́ Бо́же, Це́ркве непоколеби́маго столпа́, уго́дника Твоего́ Даніи́ла блаже́ннаго, благоче́стія яви́теля, нече́стія и вражды́ прогони́теля, вѣ́ры правосла́вной утвержде́ніе, крѣ́пкое цѣлому́дрія забра́ло и равноа́нгельнаго житія́ чи́стое зерца́ло, безпло́тныхъ чистоты́ подража́теля, воздержа́нія наста́вника, по́стниковъ и преподо́бныхъ сожи́теля, его́же моли́твами гра́дъ и оби́тель на́шу невреди́му сохрани́, и лю́демъ Твои́мъ да́руй ве́лію ми́лость.

Да́лъ еси́, Христе́ Бо́же, великоимени́тому твоему́ гра́ду Москвѣ́ крѣ́пкаго защи́тника, Даніи́ла всеблаже́ннаго, и князе́мъ похвалу́ и утвержде́ніе, враго́въ пресла́внаго побѣди́теля, христіа́номъ ра́тника непобѣди́маго, оте́чество свое́ неотсту́пно храня́ща, о́бщаго всѣ́хъ предста́теля и помо́щника, его́же моли́твами Импера́тору на́шему [и́мярекъ], да́руй на враги́ побѣ́ду, и лю́демъ Твои́мъ низпосли́ ве́лію ми́лость.

Да́лъ еси́, Христе́ Бо́же, всѣ́мъ правосла́внымъ лю́демъ Твои́мъ чуде́съ неисчерпа́емую пучи́ну, всехва́льнаго кня́зя Даніи́ла, и всѣ́мъ, приходя́щимъ къ нему́, исцѣле́ній исто́чника, ско́рбнымъ всѣ́мъ предста́теля, боля́щимъ врача́ преди́внаго, въ ско́рбехъ и печа́лехъ су́щу и́мъ утѣ́ху и отча́яннымъ непосты́дную наде́жду, его́же моли́твами вся́ вра́жія разруши́ шата́нія и лю́демъ Твои́мъ да́руй ве́лію ми́лость.

Сла́ва, гла́съ 6:

Пріиди́те дне́сь, моско́встіи наро́ди, восхва́лимъ первонача́льнаго гра́ду на́шему основа́теля, и пе́рваго въ гра́дѣ свое́мъ нача́льника, досточу́днаго кня́зя Даніи́ла; пріиди́те, псало́мски воспле́щемъ рука́ми, духо́вное его́ торжество́ дне́сь пра́зднующе и я́ко ди́внаго засту́пника на́шего сла́вяще; пріиди́те, къ честнѣ́й его́ ра́цѣ припаде́мъ, многоцѣле́бныя его́ мо́щи облобыза́юще, и, благоговѣ́йно почита́юще, возопіе́мъ ему́, глаго́люще: ра́дуйся, великоимени́таго гра́да твоего́ засту́пниче; ра́дуйся, Крестоно́сному Импера́тору на́шему [и́мярекъ] похвало́ боговѣнча́нная, ра́дуйся, всѣ́хъ люде́й твои́хъ крѣ́пкое утвержде́ніе, и всѣ́хъ христіа́нъ побо́рниче; о ни́хъ Христу́ непреста́нно моли́ся, дарова́ти ми́ръ и ве́лію ми́лость.

И ны́нѣ, богоро́диченъ:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.

Славосло́віе вели́кое. И отпу́стъ.



НА ЛИТУРГІИ,

Блаже́нна, пе́рваго кано́на пѣ́снь 3-я, и втора́го пѣ́снь 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Матѳе́я, зача́ло 47. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Примѣчаніе:
[1] Здѣсь и далѣе въ изданіи 1791 года: «Императри́цѣ на́шей [и́мярекъ]...»

Источникъ: Слу́жба преподо́бному и благовѣ́рному вели́кому кня́зю Даніи́лу Алекса́ндровичу Моско́вскому, его́же па́мять положена́ въ про́логѣ Ма́рта 4-го дня́, а обрѣ́теніе честны́хъ моще́й пра́зднуется мѣ́сяца Августа 30-го дня́. — М.: Въ Моско́вской Сѵнода́льной Тѵпогра́фіи, 1791. — 36 л.

/ Къ оглавленію раздѣла /


Наверхъ / Къ титульной страницѣ

0