Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 30-й де́нь.
Иже во святы́хъ оте́цъ на́шихъ патріа́рховъ Константи́на гра́да Алекса́ндра, Іоа́нна и Па́вла Но́ваго.

[ВЕЧЕРЪ,]
На Го́споди, воззва́хъ: стихи́ры Предте́чи 3 и святы́хъ 3.
Стихи́ры Предте́чи, гла́съ 4. Подо́бенъ: Зва́нный свы́ше.

Иже ве́тхаго и но́ваго боже́ственный хода́тай,* проро́къ и Предте́ча,* а́нгелъ во пло́ти,* беззако́нія обличи́тель,* непло́дныя прозябе́ніе утро́бы,* уста́ огнедохнове́нная,* Ирода обличи́лъ еси́, беззако́нная дѣ́юща.* Иже не терпя́ обличе́нія,* отсѣщи́ главу́ твою́ повелѣва́етъ,* и принесе́ся, я́коже снѣ́дь воздержа́нія,* боже́ственное наслажде́ніе на блю́дѣ,* мно́жае облича́я прелюбы́ дѣ́ющаго.

Отъ беззако́нныя ма́тере нава́ждена,* дщи́ беззако́нная,* твою́ пресла́вную* и а́нгеломъ говѣ́йную про́ситъ главу́,* обличе́нія бо сея́ не терпя́ше.* Тѣ́мже на блю́дѣ сію́ прине́сши* и нога́ми вку́пѣ игра́ющи,* яду́щихъ весе́ліе въ пла́чь обрати́,* но мно́жае облича́еши блу́дную ме́рзость, блаже́нне.* Христа́ моли́* спасти́ся душа́мъ на́шимъ.

Объюро́денъ пія́нствомъ, Иродъ* любодѣя́ніемъ украда́ется,* пляса́нными гла́сы,* и къ кля́твѣ не пра́веднѣй* содѣва́етъ убíйство твое́,* пра́ведна проро́ка, сла́вне.* Но твоя́ сме́рть пре́жде уме́ршимъ* я́вѣ безсме́ртіе возвѣсти́,* и́бо бы́сть и су́щимъ во а́дѣ проповѣ́дникъ и предвѣ́стникъ,* прише́ствіе спаси́тельное провозвѣща́я Христа́ Бо́га на́шего.* Его́же моли́* спасти́ и просвѣти́ти ду́ши на́ша.

Ины стихи́ры святы́хъ, гла́съ 1. Подо́бенъ: Всехва́льніи му́ченицы.

Всеблаже́нне Алекса́ндре,* па́стырь Це́ркве бы́лъ еси́,* Правосла́вія побо́рникъ,* Аріеву е́ресь низложи́въ му́дрѣ,* моли́твами твои́ми, прему́дре,* и сего́ ду́шу отме́тнути злѣ́,* помоли́лся еси́,* въ ме́рзкихъ мѣ́стѣхъ, сла́вне.* Сего́ ра́ди согла́сно тя́ почита́емъ.

Іоа́нне че́стне,* пло́ти тлѣ́ніе возненави́дѣлъ еси́,* воздержа́ніемъ и вѣ́рою,* бдѣ́ніемъ же и исповѣ́даніемъ,* а́нгелъ земны́й обрѣ́лся еси́* и небе́сный человѣ́къ.* Христа́ моли́,* дарова́ти душа́мъ на́шимъ* ве́лію ми́лость.

Па́вла боже́ственнымъ уче́ніемъ,* му́дре, вои́стинну повину́лся еси́,* и я́ко на тре́тіе восте́клъ еси́ не́бо, сла́вне,* добродѣ́телей на высоту́,* и услы́шалъ еси́ глаго́лы неизрече́нны* и боже́ственны Ду́ха,* Па́вле блаже́нне,* правосла́вныхъ степе́нь недви́жима.* Спа́са на́мъ моли́твами твои́ми ми́лостива сотвори́.

Сла́ва, гла́съ 6:

Па́ки Иродíя бѣ́сится, па́ки смуща́ется. О, пляса́нія льсти́вна и пи́ра съ ле́стію! Крести́тель усѣка́шеся, и Иродъ смуща́шеся. Моли́твами, Го́споди, Твоего́ Предте́чи, ми́ръ пода́ждь душа́мъ на́шимъ.

И нынѣ, богоро́диченъ или́ крестобогоро́диченъ. Подо́бенъ: Тридне́венъ.

Ви́дящи Тя́ распина́ема, Христе́,* Тебе́ Ро́ждшая,* вопія́ше:* что́ стра́нное е́же ви́жу та́инство, Сы́не Мо́й?* Ка́ко на Дре́вѣ умира́еши, пло́тію повѣ́шенъ,* жи́зни Пода́телю?

На стихо́внѣ стихи́ры окто́иха. Сла́ва, гла́съ 4:

Рожде́ніе неподо́бно и пи́ръ безсту́днѣйшій Иродъ соверши́лъ е́сть. Любодѣ́йствомъ бо же́нскимъ услажда́емь и нечести́вымъ женонеи́стовствомъ подстрека́емь, отсѣче́ главу́ Предте́чеву, но не отсѣче́ язы́ка проро́ческа, облича́ющаго безу́міе его́. Пролія́ кро́вь непови́нну, покры́ти хотя́ грѣ́хъ беззако́ненъ, но ни о се́мъ скры́ гла́са, вопію́щаго всѣ́мъ покая́ніе. Онъ у́бо свеселя́шеся убíйствомъ, мы́ же спра́зднуемъ любо́вію Крести́теля Іоа́нна блаже́нное заколе́ніе. Предвари́ бо во а́дѣ Жи́знь, проповѣ́дати су́щимъ во тьмѣ́ и сѣ́ни сме́ртнѣй сѣдя́щимъ, Свы́ше Восто́къ — Христа́ Бо́га на́шего, еди́наго Многоми́лостиваго.

И ны́нѣ, богоро́диченъ или́ крестобогоро́диченъ. Подо́бенъ: Яко до́бля.

Агнца и Па́стыря Тя́* на Дре́вѣ я́ко ви́дѣ Агница ро́ждшая, рыда́ше* и ма́терски Ти́ вѣща́ше:* Сы́не возжелѣ́нне,* ка́ко на дре́вѣ Кре́стнѣмъ* повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?

Тропа́рь, гла́съ 2:

Па́мять пра́веднаго съ похвала́ми, тебѣ́ же довлѣ́етъ свидѣ́тельство Госпо́дне, Предте́че: показа́лъ бо ся еси́ вои́стинну и проро́ковъ честнѣ́йшій, я́ко и въ струя́хъ крести́ти сподо́бился еси́ Проповѣ́даннаго. Тѣ́мже за и́стину пострада́въ, ра́дуяся, благовѣсти́лъ еси́ и су́щимъ во а́дѣ Бо́га, я́вльшагося пло́тію, взе́млющаго грѣ́хъ мíра и подаю́щаго на́мъ ве́лію ми́лость.

Сла́ва, святы́хъ, гла́съ 4:

Бо́же оте́цъ на́шихъ, творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но моли́твами и́хъ въ ми́рѣ упра́ви живо́тъ на́шъ.


НА УТРЕНИ,
Кано́нъ окто́иха еди́нъ, и Предте́чи на 4, вчера́шній, и святы́хъ на 4, гла́съ 8.

Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Трисвѣ́тлая оте́цъ дне́сь возсія́ заря́, всесла́вная па́мять, ея́же вѣ́рно наслади́вшеся, лику́емъ.

Разори́лъ еси́, святи́телю, еретико́въ утвержде́нія благочести́вымъ дерзнове́ніемъ, проповѣ́давъ Тро́ицу, Алекса́ндре.

Тро́сть — тво́й язы́къ, богопи́санно соверши́въ Ду́ха благода́ть, о́тче Іоа́нне, вѣ́ру уясни́.

Па́вла чу́днаго причасти́вся зва́нію, блаже́нне, о́наго яви́лся еси́ о́бразъ добродѣ́телей неизмѣ́ненъ.

Богоро́диченъ: Пое́мъ Го́сподеви, изъ Дѣ́вы благоизво́лившему воплоти́тися безъ сѣ́мене за на́ше спасе́ніе и избавле́ніе.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Изря́дно упа́слъ еси́ Влады́ки твоего́ ста́до, тѣ́мже я́ко святи́теля вѣ́чно тя́ сла́витъ, Алекса́ндре.

Во́ды спаси́тельныя язы́комъ твои́мъ источи́лъ еси́, благоче́стна уче́нія ста́ду, Іоа́нне блаже́нне.

Па́вле всеблаже́нне, избра́нія Христо́ва бы́лъ еси́ сосу́дъ свѣ́телъ, зва́ніемъ же и житіе́мъ я́вѣ подо́біе.

Богоро́диченъ: Тя́ вси́ и́мамы прибѣ́жище и стѣ́ну на́шу, христіа́не, Тя́ славосло́вимъ немо́лчно, Безневѣ́стная.

Конда́къ, святы́хъ, гла́съ 8:

Христо́вою любо́вію распала́еми, сла́вніи, и яре́мъ Его́ пріе́мшіи — Кре́стъ Честны́й, подража́тели Того́ житія́ яви́стеся и Боже́ственныя сла́вы Его́ прича́стницы бы́сте, Алекса́ндре богому́дре со Іоа́нномъ чу́днымъ и Па́вломъ сла́внымъ. Тѣ́мже, престо́лу Его́ предстоя́ще, прилѣ́жно моли́теся за ду́ши на́ша.

И сѣда́ленъ Предте́чи, [гла́съ 8:

Отъ непло́дове просія́въ судо́мъ Бо́жіимъ и у́зы разрѣши́въ язы́ка о́тча, показа́лъ еси́ со́лнце, денни́цу озаря́ющее, и лю́демъ въ пусты́ни Зижди́теля проповѣ́далъ еси́, Агнца, взе́млющаго мíра грѣхи́. Тѣ́мже ре́вностію царя́ обличи́въ, въ пресла́вную главу́ твою́ усѣ́ченъ бы́лъ еси́, приснопа́мятне, Іоа́нне всехва́льне, моли́ся Христу́ Бо́гу согрѣше́ній оставле́ніе дарова́ти пра́зднующимъ любо́вію святу́ю па́мять твою́.]

Сла́ва, святы́хъ, гла́съ 4. Подо́бенъ: Ско́ро предвари́.

Отце́въ трисвѣ́тлая свѣща́ возсія́, вѣ́рныхъ составле́нія просвѣща́ющая при́сно къ Боже́ственному позна́нію, разоря́ющи безбо́жныхъ нече́стіе все́, уче́ніемъ прему́дрости посрамля́юще вку́пѣ, Алекса́ндръ и Іоа́ннъ, съ ни́миже и Па́велъ сла́вный.

И ны́нѣ, богоро́диченъ:

Дѣ́во Всенепоро́чная, Яже пресу́щнаго Бо́га ро́ждшая, со безпло́тными Того́ непреста́нно моли́, оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

Крестобогоро́диченъ:

Дѣ́во Пренепоро́чная, Ма́ти Христа́ Бо́га, ору́жіе про́йде Твою́ пресвяту́ю ду́шу, егда́ распина́ема ви́дѣла еси́ во́лею Сы́на и Бо́га Твоего́. Его́же, Благослове́нная, моля́щи не преста́й проще́ніе прегрѣше́ній на́мъ дарова́ти.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Во смра́днѣ мѣ́стѣ отве́рглъ еси́, по подо́бію Іу́ды преда́теля Христо́ва, съ язы́чнымъ вку́пѣ тече́ніемъ, по достоя́нію, о блаже́нне Алекса́ндре!

Яко ма́слина плодови́та, въ дому́ Бо́жіи стоя́, вѣ́рующія въ о́нь приве́лъ еси́, Іоа́нне, пло́дъ зрѣ́лъ.

Смире́нія крыло́ма вра́жія сѣ́ти избѣ́глъ еси́, тѣ́мже, преподо́бне, возвыша́емь, небе́сный граждани́нъ, Па́вле, бы́лъ еси́.

Богоро́диченъ: Дѣ́ву воспое́мъ, по рождествѣ́ Дѣ́ву пребы́вшую, я́ко ро́ждшую Христа́ Бо́га, отъ ле́сти мíръ изба́вльшаго.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́, ино́го не вѣ́мы.

Митрофа́новъ престо́лъ, Алекса́ндре, украша́я, и пре́жде престо́ла просія́лъ еси́ во уче́ніихъ святи́тельскихъ.

Аще и во смире́ніи, о́тче, пожи́лъ еси́, чу́денъ яви́лся еси́ въ Нике́и богослове́сными уче́ніи.

Слове́съ твои́хъ благода́ть утвержда́етъ Це́рковь, сто́лпъ тя́, Іоа́нне, Правосла́вія позна́вши.

Богоро́диченъ: Дѣ́ву по рождествѣ́ пое́мъ Тя́, Богоро́дице: Ты́ бо Бо́га Сло́ва пло́тію мíрови родила́ еси́.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Му́жески по Христо́вѣ побора́я Це́ркви, прострѣли́лъ еси́ моли́твенными, о́тче, стрѣла́ми преда́теля Христо́ва Арія, сла́вне.

Яко лоза́ виногра́да жи́зни, Іоа́нне сла́вне, мно́гъ возрасти́лъ еси́ Влады́цѣ твоему́ пло́дъ, всеблаже́нне.

Бѣжа́ти изво́лилъ еси́ благоче́стно отъ Ца́рскаго гра́да, ико́ннаго поклоне́нія отмета́ющася беззако́нно, Па́вле всече́стне.

Богоро́диченъ: Яже еди́на сло́вомъ пло́тію Сло́ва ро́ждши, изба́ви, мо́лимся, отъ сѣ́ти вра́жія ду́ши на́ша.

Конда́къ, гла́съ 4. Подо́бенъ: Яви́лся еси́ дне́сь.

Иродъ, Предте́че, беззако́нновавъ, женѣ́ подаде́ главу́ твою́ честну́ю, е́йже покланя́ющеся, весели́мся; Иродíя же пла́четъ и рыда́етъ, и Иродъ, и пляса́вшая.

Икосъ:

Угото́вимся, бра́тіе, къ боже́ственному пи́ру: се́ бо Предте́чева богоно́сная глава́, я́коже бра́шно чи́сто, въ Це́ркви предлага́ется на́мъ, я́же кро́ви пролива́ющи, исцѣле́нія же па́че испуща́ющи и и́же отъ пія́нства грѣхо́внаго боля́щія исцѣля́ющи лѣчба́ми по́стными. Никто́же у́бо пи́щею тлѣ́нною да удержи́тся, и лиши́тся Предте́чи ны́нѣ боже́ственныя пи́щи. Мíръ у́бо весели́тся, Иродíя же пла́четъ и рыда́етъ, и Иродъ, и пляса́вшая.

Пѣ́снь 7.

Ирмо́съ: Отъ Іуде́и доше́дше о́троцы, въ Вавило́нѣ иногда́ вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Таи́нникъ и́стинно Пребоже́ственныя Тро́ицы яви́лся еси́, пребога́те, чи́сто Нетлѣ́ннѣй служи́лъ еси́, поя́ отъ се́рдца, Алекса́ндре: оте́цъ на́шихъ Бо́же, благослове́нъ еси́.

Сокро́вище тя́ уче́ній и исто́чника чуде́съ Христо́съ показа́, источа́юща бога́тство богоразу́мія, Іоа́нне, зову́щимъ: оте́цъ на́шихъ Бо́же, благослове́нъ еси́.

Равноа́нгельное житіе́ Па́влу боже́ственному и тебѣ́, тезоимени́тому, въ широтѣ́ же се́рдца излія́нія прему́дрости и въ ра́зумѣ неизглаго́ланнѣмъ, тя́ подсо́лнечнѣй все́й просла́ви, богому́дре.

Богоро́диченъ: Отъ дѣви́ческаго чре́ва вопло́щся, яви́лся еси́ на спасе́ніе на́ше. Тѣ́мже, Твою́ Ма́терь вѣ́дуще Богоро́дицу, благода́рственно зове́мъ: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: На горѣ́ святѣ́й просла́вльшася и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Злочести́ваго, моли́твою прилѣ́жною твое́ю, Арія уби́въ, Алекса́ндре богому́дре, въ ме́рзкихъ мѣ́стѣхъ удави́лъ еси́, я́коже друга́го Іу́ду, подо́бными о́бразы отсту́пльша злѣ́.

Богобо́рецъ, Христо́ву ри́зу раздра́вый, я́ко преда́тель, ни́цъ просѣ́деся посредѣ́. И ны́нѣ въ гее́ннѣ муче́нію подлежи́тъ, я́коже другíй Іу́да, Арій безу́мный, Алекса́ндре треблаже́нне.

Воздержа́ніемъ, я́ко безпло́тенъ, яви́лся еси́, бдѣ́нми я́ко премно́го, во уче́ніихъ вы́ну бы́лъ еси́, и исто́чникъ ра́йскій бога́тъ, Іоа́нне, во вся́ вѣ́ки.

Богоро́диченъ: Стра́шное Твое́ рождество́, Богоро́дице, ка́ко воспое́тъ человѣ́ческое ликостоя́ніе? Яко Дѣ́ва пребыва́еши и ро́ждши, вои́стинну па́че сло́ва, и вы́ше вины́ Твоя́ та́йны, Богороди́тельнице.

Пѣ́снь 9.

Ирмо́съ: Тя́, Неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вомъ вои́стинну Бо́га, вы́шшую пречи́стыхъ си́лъ, немо́лчными славословле́ніи велича́емъ.

Зако́ненъ бы́въ преподо́бенъ учени́къ тво́й, и живоно́снымъ твои́мъ словесе́мъ повину́яся Алекса́ндръ, святи́тель бы́въ, о Митрофа́не! кро́токъ и цѣлому́дръ, ны́нѣ по достоя́нію ублажа́ется.

Та́инникъ извѣ́стенъ бы́лъ еси́, о́тче, неизрече́нныхъ, о богоблаже́нне, Іоа́нне всебога́те! и тайново́децъ неизглаго́ланныхъ устро́ился еси́. Тѣ́мже, о́тче, Тро́ицу Боже́ственную проповѣ́далъ еси́.

Тя́, незло́бива и преподо́бна, о́тче, па́стыря, непоро́чна, чи́ста и нескве́рна, цѣлому́дренна же и сла́вна, и́стины Сло́ва испра́вльша, по достоя́нію, Па́вле, почита́емъ.

О, богоблаже́нная тро́ице оте́цъ чу́дныхъ! Ны́нѣ на небесѣ́хъ безсме́ртнымъ обоже́на Божество́мъ, Ему́же на земли́ благоче́стно послужи́сте, моли́ти о ста́дѣ не преста́йте.

Богоро́диченъ: Свята́я Всенепоро́чная, сосу́де благово́нія, моли́ Христа́, Его́же родила́ еси́, Импера́тору у́бо побѣ́дная и рабо́тнаго и́га да́ти осла́бу лю́демъ Твои́мъ, Тя́ бо непреста́нно велича́емъ.

Свѣти́ленъ Предте́чи:

[Во проро́цѣхъ бо́льша позна́на и апо́столъ предъизбра́нна бы́вша, пѣ́сньми похва́льными вѣнча́емъ Предте́чу благода́ти: во главу́ бо усѣ́ченъ бы́сть зако́на ра́ди Госпо́дня.

Сла́ва, и ны́нѣ, богоро́диченъ:

Яже кля́тву мірску́ю боже́ственнымъ рождество́мъ Твои́мъ, Чи́стая, потре́бльши, ста́до, Тебѣ́ моля́щееся вѣ́рно, отъ вся́кихъ бѣ́дъ изба́ви моли́твами Твои́ми, Отрокови́це.]

На стихо́внѣ стихи́ры окто́иха. Сла́ва, гла́съ 8:

Предте́че Спа́совъ, ты́ царя́ изобличи́лъ еси́ беззако́нія не дѣ́лати. Тѣ́мже игра́ніе беззако́нныя жены́, повину́ Ирода отсѣщи́ твою́ главу́, и сего́ ра́ди отъ восто́къ со́лнца да́же до за́падъ хва́льно и́мя твое́. Дерзнове́ніе имѣ́я ко Го́споду, прилѣ́жно моли́ спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Агница Агнца я́ко ви́дѣ,* на Дре́вѣ просте́рта во́лею Кре́стнѣмъ,* вопія́ше ма́терски,* болѣ́знующи съ пла́чемъ:* Сы́не Мо́й, что́ стра́нное сіе́ видѣ́ніе?* Всѣ́мъ живо́тъ дая́й я́ко Госпо́дь,* ка́ко умерщвля́ешися, Долготерпѣли́ве,* земны́мъ подая́ воскресе́ніе?* Сла́влю Твое́ мно́гое, Бо́же Мо́й, снизхожде́ніе.

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 278 – 282 об.

/ Къ оглавленію раздѣла /


Наверхъ / Къ титульной страницѣ

0