Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 30-й де́нь.
Преставле́ніе преподо́бнаго отца́ на́шего Алекса́ндра, Сви́рскаго чудотво́рца.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 4. Подо́бенъ: Яко до́бля.

Воздержа́ніемъ стра́сть плотску́ю умертви́лъ еси́* и ду́шу оживи́лъ еси́ посто́мъ* и добродѣ́телей свяще́ніемъ.* Отсю́ду же яви́лся еси́, я́ко жи́въ,* и по кончи́нѣ вои́стинну:* я́коже бо со́нъ, вмѣни́ся тебѣ́ сме́рть,* къ Бо́гу преста́вльшуся* и въ ру́цѣ ду́шу прело́жшу Ему́,* Алекса́ндре всесла́вне. [Два́жды.]

Страсте́й успи́лъ еси́* жела́нія, Алекса́ндре,* бдѣ́ніе всено́щное стяжа́въ,* вели́кое послуша́ніе, смире́ніе,* поуче́ніе же Боже́ственныхъ писа́ній,* и се́рдце чи́сто,* и у́мъ несмуще́нъ.* Тѣ́мже бы́лъ еси́ прія́телище Ду́ха Свята́го,* заря́ми чуде́съ облиста́ющаго тя́ всегда́.

Мірско́е пристра́стіе* до конца́ возненави́дѣлъ еси́* и безстра́стія сосу́дъ бы́лъ еси́,* любому́дрія же, сла́вне,* дѣ́тельнымъ восхожде́ніемъ* возвы́сился еси́ къ самому́ жела́нію коне́чному,* узрѣ́лъ еси́ та́йны видѣ́ніемъ неви́димыхъ,* недомы́сленныя Боже́ственныя добро́ты,* Алекса́ндре всему́дре.

Сла́ва, гла́съ то́йже:

Духо́вною благода́тію отъе́млеши неду́ги страсте́й и отго́ниши ду́хи лука́выя, исцѣля́еши стра́сти неисцѣ́льныя, Алекса́ндре всесла́вне, и просвѣща́еши вѣ́рныя блиста́ніи чуде́съ твои́хъ. Тѣ́мже дне́сь гла́сы немо́лчными воспѣва́емъ пресвѣ́тлую и свѣтоно́сную па́мять твою́.

И ны́нѣ, богоро́диченъ: Изба́ви на́съ отъ ну́ждъ на́шихъ...

На стихо́внѣ стихи́ры, гла́съ 4. Подо́бенъ: Да́лъ еси́ зна́меніе.

Свѣ́тло возсія́, я́ко со́лнце, преподо́бне,* всепра́зднственная па́мять твоя́,* заря́ми облиста́ющи* твои́хъ добродѣ́тельныхъ дѣя́ній, всеблаже́нне,* и озаря́ющи вѣ́рныхъ мы́сли* сія́ніемъ чуде́съ твои́хъ.* Сію́ у́бо пра́зднующе,* ра́достно тя́ почита́емъ,* мона́шествующихъ похвало́ и вѣ́рныхъ утвержде́ніе.

Сти́хъ: Честна́ предъ Го́сподемъ* сме́рть преподо́бныхъ Его́.

До́лу лега́ніемъ и воста́ніемъ,* и сле́зъ тече́ніи оскорбля́емь,* и всено́щными стоя́ніи изнуря́емь,* мона́ховъ бы́лъ еси́ о́бразъ ве́лій,* и о́бщее пра́вило,* и похвалы́ вѣне́цъ:* вся́къ бо ви́дъ добродѣ́телей испра́вивъ,* вы́шняго Ца́рствія наслѣ́дникъ яви́лся еси́,* прему́дре, воздержа́ніемъ.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Чу́до па́че ума́* во успе́ніи твое́мъ бы́сть,* богоукраше́нно чуде́снѣ,* внегда́ ти́ собо́ръ мона́шествующихъ, о́тче, предста́* и внеза́пу, я́ко со́лнце, му́дре, лице́ твое́ облиста́,* па́че со́лнечныхъ лу́чъ возсія́вши,* явля́я блиста́ющую твоея́ души́ чистоту́* и увѣря́я всѣ́хъ, какову́ кончи́ну,* блаже́нне, получи́лъ еси́.

Сла́ва, гла́съ 6:

Яко Боже́ственнаго па́стыря и учи́теля тя́ вси́ восхва́лимъ дне́сь: но́во бо на́мъ, я́ко многосвѣ́тлая звѣзда́, въ Россíйстѣй странѣ́ просія́въ, чудесы́ твои́ми весь мíръ удиви́лъ еси́, въ пусты́няхъ же непроходи́мыхъ му́жески подвиза́вся, и крѣ́пко терпя́, врага́ побѣди́лъ еси́ до конца́. Тѣ́мже христоимени́тое твое́ ста́до упа́слъ еси́ и хра́мъ Го́сподеви воздви́глъ еси́ любо́вію, Алекса́ндре прему́дре, и я́ко вои́стинну Боже́ственныя благода́ти сподо́бився и въ небеса́ всели́вся, зри́ши Святу́ю Тро́ицу, Юже моли́ спасти́ся душа́мъ на́шимъ.

И ны́нѣ, богоро́диченъ: Богоро́дице, Ты́ еси́ лоза́ и́стинная...

Тропа́рь, гла́съ 4:

Отъ ю́ности, богому́дре, жела́ніемъ духо́внымъ въ пусты́ню всели́вся, еди́наго Христа́ возжела́лъ еси́ усе́рдно стопа́мъ въ слѣ́дъ ходи́ти. Тѣ́мже и а́нгельстіи чи́ни, зря́ще тя́, удиви́шася: ка́ко, съ пло́тію къ неви́димымъ ко́знемъ подвиза́вся, прему́дре, побѣди́лъ еси́ полки́ страсте́й воздержа́ніемъ и яви́лся еси́ равноа́нгеленъ на земли́. Алекса́ндре преподо́бне, моли́ Христа́ Бо́га, да спасе́тъ ду́ши на́ша.

[Сла́ва, и ны́нѣ, богоро́диченъ: Еже отъ вѣ́ка утае́нное...]



НА ВЕЛИЦѢЙ ВЕЧЕРНИ,
Блаже́нъ му́жъ, [1-й антифо́нъ.] На Го́споди воззва́хъ: стихи́ры на 8, гла́съ 6. Подо́бенъ: Всю́ отло́жше.

Вседержи́тельною десни́цею укрѣпля́емь,* вся́ отве́ргъ страсте́й безслове́сія,* пло́ть ду́ху покори́лъ еси́* и бы́лъ еси́ добродѣ́телей пра́вило,* мона́ховъ утвержде́ніе,* по́стниковъ о́бразъ,* преподо́бныхъ удобре́ніе.* И ны́нѣ неизрече́нныя добро́ты* зри́ши нераздѣли́мыя Тро́ицы,* Алекса́ндре прему́дре,* пита́яся при́сно боже́ственными добро́тами на небесѣ́хъ ду́хомъ.* Тѣ́мъ, соше́дшеся, пѣ́ніи духо́вными,* въ пѣ́снехъ твою́ честну́ю* и всепра́зднственную па́мять пра́зднуемъ. [Два́жды.]

Стра́стная взыгра́нія* воздержа́ніемъ вся́ отве́рглъ еси́,* и многомяте́жное пло́ти волне́ніе укроти́въ,* дыха́нія стра́стнаго пребы́лъ еси́ непрекло́ненъ,* я́ко сто́лпъ, укрѣпля́емь* духо́вными броня́ми,* умо́мъ до́блественнымъ,* Алекса́ндре прему́дре.* И ны́нѣ, Боже́ственнаго получи́лъ еси́ вои́стинну* видѣ́нія свѣ́тлости Святы́я Тро́ицы,* къ Не́йже жела́я, блаже́нне, преста́вился еси́,* наслажда́яся несконча́емыя добро́ты,* дарова́ніемъ обожа́емь. [Два́жды.]

Подо́бяся Иліи́* и Іоа́нну, свѣти́льнику Свѣ́та,* возлюби́въ молча́ти въ мѣ́стѣхъ те́мныхъ* и въ пусты́няхъ непрохо́дныхъ,* восхожде́нію всегда́ поуча́яся боже́ственному* и преспѣва́я добродѣ́телей путе́мъ.* Тѣ́мже дости́глъ еси́ жела́ніе кра́йнее,* Алекса́ндре прему́дре,* и ра́дуяся, предстои́ши* Трисія́нному Святы́я Тро́ицы Свѣ́ту,* отъ него́же нехода́тайственнѣ Боже́ственныя пріе́мля зари́.* Тѣ́мже со дерзнове́ніемъ моли́ся о душа́хъ на́шихъ. [Два́жды.]

Преподо́бне и богоно́се о́тче на́шъ Алекса́ндре,* любве́ ра́ди Христо́вы вся́ оста́вилъ еси́,* и въ пусты́ню всели́вся,* ника́коже устраши́лся еси́ неви́димыхъ вра́гъ боре́нія,* а́ще бо и мно́гажды прише́дше на тя́,* мечта́ніи привидѣ́нія ти́ показу́юще,* ты́ же моли́твами твои́ми,* я́ко пра́хъ, тѣ́хъ безъ вѣ́сти твори́лъ еси́.* О, непоро́чныя твоея́ души́* и крѣ́пкаго терпѣ́нія твоего́!* Христа́ непреста́нно моли́,* спасти́ся душа́мъ на́шимъ. [Два́жды.]

Сла́ва, гла́съ то́йже:

Яко боже́ственна жи́знь твоя́, та́кожде и всеосвяще́нный тво́й исхо́дъ, преблаже́нне о́тче на́шъ Алекса́ндре. Дне́сь бо лику́юще въ па́мять преставле́нія твоего́, всея́ страны́ мно́жества наро́да сте́кшеся, я́ко ви́дѣша тя́, безъ дыха́нія на одрѣ́ лежа́ща, гла́сы велегла́сными вопія́ху: да́ждь на́мъ коне́чное сло́во утѣше́нія, рабо́мъ твои́мъ, свя́те, и научи́ ны, ча́да твоя́, о́тче, я́же уще́дрилъ еси́, я́ко оте́цъ, ка́ко тя́ по достоя́нію похвали́ти возмо́жемъ? Пои́стиннѣ я́ко ми́лостивъ и ще́дръ бы́въ, преподо́бне. Оба́че а́ще и здѣ́ тя́ гро́бъ покрыва́етъ, но страна́ тя́ Россíйская вся́ бога́тна и́мать предста́теля и моли́твенника къ Святѣ́й Тро́ицѣ, Юже непреста́нно моли́ о душа́хъ на́шихъ.

И ны́нѣ, богоро́диченъ: Кто́ Тебе́ не ублажи́тъ...
Вхо́дъ. Проки́менъ дне́. И чте́нія три́.

Прему́дрости Соломо́ни чте́ніе. [Главы́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 1. Самогла́сны:

Пріиди́те, вси́ концы́ земли́, псалмы́ и пѣ́сньми незаходи́маго свѣ́та, вели́каго свѣти́льника вселе́ннѣй, воспое́мъ вси́ Алекса́ндра. Па́че бо со́лнца возсія́ въ тверды́ни вѣ́ры и вѣ́рныхъ собра́ніе къ добродѣ́тели наста́ви: о́во у́бо богодохнове́нными уче́ніи и спаси́тельными глаго́лы въ вожделѣ́ніи, я́же незави́стно и оби́льно устны́ источа́ше, о́во же дѣ́телію чу́дною, равноа́нгельнымъ житіе́мъ къ ре́вности привлача́я, и обоя́ — житіе́ и сло́во пресла́вно, я́коже во́ждь изря́денъ, богоподо́бно показу́я. Того́ моли́твами, Христе́ Бо́же на́шъ, Твое́ ста́до соблюди́ и правосла́вныхъ вѣ́ру утверди́, я́ко Человѣколю́бецъ.

Пріиди́те, мона́ховъ мно́жества, дне́сь, Христо́ва рачи́теля благоче́стно восхва́лимъ, и́стиннаго ученика́ Спа́сова и красоту́ и хвалу́ единообра́зныхъ всѣ́хъ и наста́вниковъ, освяще́ннаго отъ младе́нства Го́сподеви, ли́цы оте́цъ, соше́дшеся, ублажи́мъ. Се́й бо жела́ніе боже́ственное въ себѣ́ пріи́мъ, мірску́ю у́бо оста́ви пре́лесть, взя́тъ же яре́мъ Христо́въ на ра́мо и полки́ бѣсо́въ побѣди́ му́жески, показа́въ на́мъ дѣ́тельно боже́ственныя любве́ изря́дный пу́ть. Ибо и сія́ прете́къ во тща́ніи, пости́же свѣ́тъ и́стинный Тро́ицы Вседѣ́тельныя. О, чудесе́ ужа́снаго и ве́щи богоподо́бныя! Яко земны́й естество́мъ ра́венъ бы́сть мы́сленнымъ существо́мъ. Сла́ву и че́сть Бо́жію воспріе́мля, и моли́твенникъ на́мъ быва́етъ, я́ко да улучи́мъ вѣ́чныхъ бла́гъ въ де́нь су́дный.

Яко боже́ственная и свѣтоно́сная наста́ па́мять преставле́нія твоего́, о́тче, я́ко удиви́ мы́сленныхъ и ужаси́ человѣ́ки, пречу́дне, труды́ воздержа́нія твоего́ житія́, я́ко безпло́тенъ отню́дъ, во пло́ти стра́стнѣ враги́ неви́димыя посрами́лъ еси́. Вся́ же у́бо страна́ оте́чества твоего́ пое́тъ тебе́ благоче́стно, изря́днѣе же — твое́ честно́е ста́до, свѣ́тлость твои́хъ болѣ́зней и трудо́въ, е́же показа́лъ еси́, я́ко гра́дъ въ пусты́ни прекра́сенъ, и́же приста́нище собо́ромъ мона́шескимъ богоподо́бно. Иже, я́ко оде́ждами многочестны́ми твои́ми, красу́ется чудесы́, и до́блественными страда́ніи по́двигъ твои́хъ, Алекса́ндре, и моли́твами твои́ми, притека́юще ко Христу́, иму́щему ве́лію и бога́тую ми́лость.

Сла́ва, гла́съ 5:

Ра́дуется дне́сь вся́ Россíйская страна́, Вели́кій же Но́вградъ да весели́тся, торжеству́я, я́ко имѣ́я въ предѣ́лѣхъ о́бласти своея́ неистощи́мое сокро́вище. Вѣ́рныхъ же мно́жества Россíйскія земли́, сте́кшеся дне́сь, востру́бимъ трубо́ю пѣ́сней: благода́ть бо Ду́ха, вся́кія трубы́ боголѣ́пнѣйши, всѣ́хъ созыва́етъ къ пѣ́нію богоно́снаго отца́. Ца́ріе и кня́зи да чудя́тся всѣ́хъ Царя́ и́скреннему рабу́, и́же міроде́ржца нача́ла и вла́сти тмы́ Ду́ха Боже́ственнаго всѣ́ми ору́жіи побѣди́. Па́стыри и учи́тели изря́днаго вои́стинну пра́вила же и о́браза па́ствѣ да восхва́лятъ, и́же въ добродѣ́телей повелѣ́ніи свѣ́тлаго, и въ вѣ́рѣ благоразу́мнаго, и въ видѣ́ніи высо́каго, въ дѣя́ніихъ богому́драго, во уче́ніихъ же пи́щи пото́ка, наста́вника заблу́ждшимъ, изба́вителя плѣне́ннымъ и всѣ́хъ боля́щихъ исцѣле́ніе, оте́честву своему́ вели́кое украше́ніе, похваля́юще, вси́ рце́мъ: о́тче преподо́бне Алекса́ндре, предста́ни твои́мъ рабо́мъ всегда́, и спаси́ ста́до твое́ моли́твами твои́ми.

И ны́нѣ, богоро́диченъ, гла́съ то́йже:

Ду́ха Боже́ственнаго благода́тію, вѣ́рніи, дне́сь востру́бимъ трубо́ю пѣ́сней: прини́кнувши бо свы́ше, Всецари́ца Ма́ти Дѣ́ва, благослове́ніемъ вѣнчава́етъ воспѣва́ющихъ Ю. Ца́ріе и кня́зи да стеку́тся, и Цари́цѣ воспле́щутъ въ пѣ́снехъ, Царя́ ро́ждшей, Иже сме́ртію одержи́мы пре́жде отпусти́ти благоизво́ливша. Па́стыріе и учи́теліе, до́браго Па́стыря Пречи́стую Ма́терь, соше́дшеся, восхва́лимъ, свѣти́льника свѣтоза́рнаго, свѣтоно́снаго о́блака, небе́съ ши́ршую, одушевле́нный ковче́гъ и огнеобра́зный Влады́чень престо́лъ, маннопріе́мную злату́ю ста́мну, затворе́нную Сло́ва две́рь, всѣ́мъ христіа́номъ прибѣ́жище, пѣ́сньми богогла́сными похваля́юще, си́це рце́мъ: Пала́то Сло́ва, сподо́би смире́нныхъ на́съ небе́снаго Ца́рствія, вся́ бо возмо́жна су́ть хода́тайству Твоему́.

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, а́нгельскимъ бесѣ́дуя ликостоя́ніемъ, Алекса́ндре преподо́бне: житіе́ бо твое́, о́тче, на земли́ добродѣ́тельно стяжа́въ, пожи́лъ еси́. Показа́лся еси́ чистоты́ нескве́рное зерца́ло вои́стинну, лучеза́рныя воспріе́мля мо́лніи Ду́ха Свята́го всесла́вно. Отону́дуже озаря́емь, зрѣ́лъ еси́ бу́дущая, вся́ предглаго́ля, отъ боже́ственнаго свѣтоявле́нія науча́емь Христа́, Его́же моли́ душа́мъ на́шимъ пода́ти ве́лію ми́лость.

Сти́хъ: Честна́ предъ Го́сподемъ сме́рть преподо́бныхъ Его́.

Ра́дуйся, по́стникомъ споспѣ́шникъ бы́въ и непобѣди́мь побо́рникъ: страсте́й бо отсѣка́я ко́рень и бѣсо́въ стремле́нія, предста́въ му́жески, Алекса́ндре, тѣ́хъ посрами́лъ еси́ душепа́губную пре́лесть, Креста́ же Спа́сова дѣ́йство, и непобѣди́мую яви́лъ еси́ си́лу, е́юже и препоя́сався, побѣди́лъ еси́ вся́, отмета́ющія плотско́е явле́ніе Христо́во. Его́же моли́ душа́мъ на́шимъ пода́ти ве́лію ми́лость.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Сто́лпъ свѣтови́дѣнъ, добродѣ́телію утвержде́нъ, о́блакъ свѣ́телъ, и́же во оте́чествѣ твое́мъ яви́лся еси́, о́тче, къ небеси́ отъ земли́ Бо́га зря́щихъ предводя́; кре́стною па́лицею страсте́й пресѣ́къ мо́ре, и мы́сленнаго Амали́ка отри́нувъ, непреткнове́нный небе́сный восхо́дъ обрѣ́лъ еси́, богоблаже́нне Алекса́ндре, и жре́бій непремину́ющь, со безпло́тными предстоя́ престо́лу Христо́ву, ра́дуяся, Его́же моли́ душа́мъ на́шимъ пода́ти ве́лію ми́лость.

Сла́ва, гла́съ 6:

Пріиди́те, вси́ концы́ земли́, псалмы́ и пѣ́сньми свяще́нное и честно́е преподо́бнаго торжество́ Алекса́ндра, дне́сь благоче́стно восхва́лимъ. Преподо́бныхъ оте́цъ единожи́теля и пустынолю́бную добро́ту воспое́мъ, по́стниковъ украше́ніе, исто́чника чуде́съ, къ Бо́гу моли́твенника непосты́дна, сте́кшеся, о празднолю́бцы! пѣ́сньми похва́льными воспое́мъ, глаго́люще: ра́дуйся, мона́шескаго житія́ пра́вило, о́бразъ и печа́ть извѣ́стная; ра́дуйся, свѣти́льниче пресвѣ́тлый, озаря́я вся́ку добродѣ́тель свѣтлостьми́ твоего́ житія́; ра́дуйся, въ бѣда́хъ вели́кое утѣше́ніе и те́плый предста́телю предстоя́щимъ. Не преста́й моля́ Христа́ Бо́га о ста́дѣ твое́мъ и всѣ́хъ вѣ́рныхъ, почита́ющихъ всечестно́е твое́ успе́ніе.

И ны́нѣ, богоро́диченъ: Творе́цъ и Изба́витель мо́й...

Тропа́рь, гла́съ 4: Отъ ю́ности, богому́дре... Пи́санъ на ма́лѣй вече́рни.
Сла́ва, и ны́нѣ, богоро́диченъ: Еже отъ вѣ́ка утае́нное...



НА УТРЕНИ,
По 1-й стихоло́гіи сѣда́ленъ, гла́съ 1. Подо́бенъ: Гро́бъ Тво́й.

Многосвѣ́тлая звѣзда́ мона́шествующимъ показа́лся еси́, и степе́нь извѣ́стенъ, воздержа́нія же предѣ́лъ, пресвѣ́тлое зерца́ло разсужде́нія, преподо́бне, па́мять твою́ ра́достно соверша́ющимъ. Разрѣше́нія проси́ согрѣше́ній, преблаже́нне, Бо́гу предстоя́. [Два́жды.]

Сла́ва, и ны́нѣ, богоро́диченъ:

Наста́ви ны́ на пу́ть покая́нія, укло́ншіяся при́сно къ безпу́тіемъ зо́лъ, и Преблага́го прогнѣ́вавшія Го́спода, Неискусобра́чная Благослове́нная Марíе, прибѣ́жище отча́янныхъ человѣ́ковъ, Бо́жіе жили́ще.

По 2-й стихоло́гіи сѣда́ленъ, гла́съ 3. Подо́бенъ: Боже́ственныя вѣ́ры.

Боже́ственнымъ жела́ніемъ безсме́ртія, Алекса́ндре, одержи́мь, и кре́стъ на ра́мо взе́мъ, въ пусты́ню жела́ніемъ всели́лся еси́, идѣ́же, преподо́бне, Го́сподеви собра́лъ еси́ ста́до. Тѣ́мже и моли́твенника тя́ те́пла стяжа́хомъ ко Го́споду. [Два́жды.]

Сла́ва, и ны́нѣ, богоро́диченъ:

Боже́ственная ски́нія была́ еси́ Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая, па́че всѣ́хъ мене́, пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

По поліеле́и сѣда́ленъ, гла́съ 8. Подо́бенъ: Прему́дрости.

Видѣ́ніе и дѣя́ніе воспріи́мъ, чу́вствія, преподо́бне, украша́я, житіе́ упра́вилъ еси́ къ Боже́ственнымъ повелѣ́ніемъ, мона́хомъ бо яви́лся еси́ свѣти́льникъ пресвѣ́телъ, наставля́я на́съ къ позна́нію. Тѣ́мже, восхваля́юще тя́, велича́емъ любо́вію исхо́дную па́мять твою́, богоно́се Алекса́ндре. Сего́ ра́ди вопіе́мъ ти́: моли́ Христа́ Бо́га, прегрѣше́ній оставле́ніе дарова́ти, чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, пресвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíрови и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́, прегрѣше́ній оставле́ніе дарова́ти, благоче́стно покланя́ющимся всесвято́му Рождеству́ Твоему́.

Та́же степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Возсія́ дне́сь пресвѣ́тлая и всепра́зднственная па́мять твоя́, богоблаже́нне, созыва́ющи многочи́сленное по́стникъ сосло́віе, и преподо́бныхъ всѣ́хъ ликостоя́нія, глаго́лющи: а́ще бо и тѣле́снѣ язы́къ умолче́, но са́ми чудеса́ свидѣ́тельствуютъ отъ гро́ба твоего́, и вся́ же страна́ оте́чества твоего́, проповѣ́дуя, хва́лится: имѣ́ю бо въ себѣ́, рече́, неистощи́мое сокро́вище, пречестну́ю и всебога́тую ра́ку моще́й твои́хъ, облагоуха́ющу душе́вная на́ша чу́вствія, Алекса́ндре, о́тче на́шъ, моли́ Христа́ Бо́га спасти́ся душа́мъ на́шимъ.

Кано́нъ Богоро́дицы со ирмосо́мъ на 6 и преподо́бнаго Алекса́ндра на 4, гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Боже́ственнаго и Пресвята́го Ду́ха блиста́яся благода́тію, свѣтоно́сное, Алекса́ндре, и честно́е соверша́ющихъ твое́ успе́ніе, свѣ́тлою моли́твою твое́ю страсте́й мглу́ очи́сти.

Отъ ю́ности, преподо́бне, яре́мъ Госпо́день воспріе́мъ, въ бразда́хъ твоего́ се́рдца пшени́цу сѣ́ялъ еси́ духо́вну и кла́съ пожа́лъ еси́, утвержда́ющь ду́ши, богоблаже́нне.

Свѣтоно́сная па́мять твоя́ на́мъ дне́сь возсія́, я́ко со́лнечная луча́, Алекса́ндре, исправле́ній твои́хъ, страсте́й на́шихъ отъе́млющи о́блакъ, ю́же сотворя́юще, вѣ́рою тя́ и любо́вію ублажа́емъ.

Богоро́диченъ: Зачала́ еси́, Пречи́стая, неизрече́ннымъ сло́вомъ содержа́щаго земны́я концы́ и Сего́ родила́ еси́, Его́же моли́ прилѣ́жно поми́ловати на́съ.

Инъ кано́нъ на 4, гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Боже́ственную па́мять твою́, богому́дре о́тче, вѣ́рно пра́зднующе, вся́ческихъ Го́спода при́сно сла́вимъ, тя́ просла́вльшаго мно́гими чудесы́.

Безстра́стія жела́ніемъ те́плымъ, о́тче, одержи́мь, ве́щныя увяди́лъ еси́ страсте́й во́лны, Алекса́ндре, и дости́глъ еси́, любо́вію вперя́емь, присносу́щнаго сія́нія, преблаже́нне, Божества́.

Добродѣ́тельно изнача́ла пріе́мъ житіе́, пребога́те, ба́нею, о́тче, пакибытія́, да́ръ духо́вный отъ младе́нства боже́ственнѣ, твоея́ души́ благолѣ́піе, Алекса́ндре, показа́лъ еси́, со́лнца свѣтлѣ́йше.

Богоро́диченъ: Мла́до Отроча́ па́че сло́ва родила́ еси́, Ве́тхаго Де́ньми, но́ву на земли́ стезю́ добродѣ́телей показа́вша. Тѣ́мъ уго́дникъ Тво́й при́сный Алекса́ндръ, Отрокови́це, любо́вію снѣда́емь, сíй хра́мъ Тебѣ́ созда́.

Катава́сія: Кре́стъ начерта́въ...

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Жезло́мъ воздержа́нія страстно́е мо́ре, о́тче, раздѣли́въ, преше́лъ еси́ неистопле́нъ, и предѣ́лъ дости́глъ еси́ и́стиннаго безстра́стія, и Бо́гу предстоя́, бесѣ́довалъ еси́ ума́ чистото́ю.

Кто́ твоя́ по́двиги, Алекса́ндре, по достоя́нію изрещи́ возмо́жетъ? Ты́ бо, пути́ жесто́кія въ пусты́ни ше́ствуя, су́рово бы́ліе я́лъ еси́, вкуше́ніе же отлага́лъ еси́ пи́щи болѣ́зньми воздержа́нія.

Яко ма́слина плодови́та въ дому́ Госпо́дни, прозя́блъ еси́, ма́сломъ трудо́въ твои́хъ, Алекса́ндре, умаща́я на́ша ли́ца; пою́щія тя́, преподо́бне и богоблаже́нне, вся́ ны́ посѣти́, моля́ся Человѣколю́бцу.

Богоро́диченъ: Изъ Тебе́, Чи́стая, Цвѣ́тъ неувяда́емый, благоуха́я все́ человѣ́чество Боже́ственнымъ мѵ́ромъ естества́ Своего́, Иже Отцу́ Собезнача́льный, изъ Тебе́ бы́въ подъ лѣ́томъ, Дѣ́во Всенепоро́чная.

Инъ.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

По́томъ воздержа́нія твоего́ пла́мень страсте́й погаси́лъ еси́, и одожде́ніемъ моли́твъ струи́ чуде́съ источи́лъ еси́, болѣ́зньми разжже́нія погаша́я я́вѣ, преблаже́нне Алекса́ндре.

Иже къ честнѣ́й ра́цѣ твое́й притека́юще, прему́дре, отъ сея́ почерпа́емъ исцѣле́нія сокро́вище, и чуде́съ пучи́ну, и да́ръ незави́стный, Алекса́ндре. Тѣ́мже, пою́ще, тя́ восхваля́емъ.

Душе́вная чу́вства отъ ужа́снаго, преподо́бне о́тче, просвѣ́щь видѣ́нія, я́ко чу́денъ ра́зумъ благи́хъ стяжа́лъ еси́, и́ночества житіе́ иму́щимъ, Алекса́ндре, небла́знено житіе́ показа́лъ еси́.

Богоро́диченъ: Иже пре́жде вѣ́къ ро́ждься отъ Отца́ неизрече́нно, напослѣ́докъ изъ утро́бы Твоея́ про́йде, и обожи́ на́ше естество́, Ма́ти Дѣ́во, Иже преподо́бныхъ ли́ки я́вѣ изводя́й.

Сѣда́ленъ, гла́съ 8. Подо́бенъ: Прему́дрости.

Отъ ю́ности вся́ оста́вль жите́йская, кра́сная же и лѣ́потная, и въ пусты́ню всели́вся, усе́рдно послѣ́довалъ еси́ Зва́вшему тебе́, преподо́бне, въ трудѣ́хъ же и постѣ́хъ, о́тче, тѣ́ло твое́ изнури́лъ еси́. Отону́дуже тя́ па́стыря свои́мъ овца́мъ до́брѣ устроя́етъ всебога́тый Госпо́дь, Алекса́ндре блаже́нне. Моли́ Христа́ Бо́га прегрѣше́ній оставле́ніе дарова́ти, чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко Дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е рождество́ Твое́, и согла́сно вопіе́мъ Ти́: моли́ Христа́ Бо́га, согрѣше́ній оставле́ніе дарова́ти, покланя́ющимся вѣ́рою пресвято́му Рождеству́ Твоему́.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Вѣ́триломъ, о́тче, Креста́, душе́вный тво́й кора́бль окорми́въ, благоути́шно же и легко́ жите́йскаго лю́таго потопле́нія избѣ́глъ еси́ и къ тишинѣ́ боже́ственныхъ извле́клъ еси́ приста́нищь, ра́дуяся.

Обрѣта́я, о́тче, са́мъ себе́, всеблаже́нне, всю́ но́щь стоя́лъ еси́, я́ко безпло́тенъ, недрема́нно о́ко имѣ́лъ еси́, и чи́сто, я́коже зерца́ло, духо́вною заре́ю, и Боже́ственная явле́нія чи́стымъ по́мысломъ пріе́мля.

Яко Боже́ственный зри́тся ра́й, прему́дре, хра́мъ, имѣ́я въ себѣ́ твои́хъ моще́й ра́ку, цвѣ́ты принося́ чуде́сныя, и́миже сердца́ наслажда́ются вѣ́рою, Алекса́ндре, при́сно хва́лящихъ тя́.

Богоро́диченъ: Свята́я Богоро́дице, освяти́ на́съ, Яже Пресвята́го Бо́га ро́ждши пло́тію, уподо́битися восхотѣ́вша человѣ́комъ, и небе́снаго житія́ вся́ покажи́, Пречи́стая, прича́стники моли́твами Твои́ми.

Инъ.

Ирмо́съ: Прише́лъ еси́ отъ Дѣ́вы, не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя человѣ́ка. Тѣ́мъ зову́ Ти́: сла́ва си́лѣ Твое́й, Го́споди.

Житіе твое, богоносе преблаженне Александре, правило извѣстно монашествующихъ бысть, емуже нынѣ ревнующе, спасаемся, иже твоимъ послѣдующе, отче, божественнымъ ученіемъ.

Ду́ха Свята́го зарю́ пріе́мъ, звѣзда́ пресвѣ́тлая, о́тче Алекса́ндре, сія́я благода́тію, бы́лъ еси́ всѣ́мъ, и́хже наста́вилъ еси́ къ спасе́нія приста́нищу твои́ми уче́ніи.

Пребы́ти вну́трь ника́коже мíра восхотѣ́лъ еси́, прему́дре о́тче Алекса́ндре, имѣ́я наставля́ющаго тя́ Бо́жія Ду́ха си́лу, въ непроходи́мыхъ пусты́няхъ живы́й и со звѣрьми́ ходя́ безъ боя́зни, ю́ноша сы́й, и болѣ́зньми пита́лся еси́ тѣле́сными.

Богоро́диченъ: Плещми́ херуви́мскими стра́шными носи́мь, Влады́ко, я́ко на престо́лѣ о́гненнѣ, въ Твою́, Чи́стая, всели́ся утро́бу, и пло́ти прія́тіемъ человѣ́ческое обожи́ существо́, я́ко учи́тъ изря́дный въ преподо́бныхъ Алекса́ндръ, еди́на Всепѣ́тая.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Просвѣща́емь заре́ю, о́тче, невече́рнею и Боже́ственнымъ облиста́ніемъ, бѣсо́вскій мра́къ и страстну́ю мглу́ отгна́лъ еси́, и яви́лся еси́ сто́лпъ свѣтоза́ренъ, и лѣ́ствица вои́стинну, къ Бо́гу вѣ́рныя возводя́щи.

Бо́дръ у́мъ всегда́ имѣ́я, о́тче богому́дре Алекса́ндре, стра́сти успи́лъ еси́ душетлѣ́нныя, къ Боже́ственному свѣтозаре́нію хотя́ дости́гнути, къ незаходи́маго Свѣ́та свѣ́тлости, идѣ́же е́сть веселя́щихся жили́ще.

Яко очи́стившу помышле́нія, преподо́бне, благода́ть тебѣ́ даде́ся, я́ко проро́ку: я́ко настоя́щая, глаго́леши бу́дущая, зри́ши же да́льняя, я́ко бли́жняя, Алекса́ндре, Бо́жіе оби́телище.

Богоро́диченъ: Ро́ждши, Пренепоро́чная, Бо́га Емману́ила, и Человѣ́ка я́вѣ за милосе́рдіе бы́вша, Его́же моли́, я́ко Человѣколю́бца, Чи́стая, уще́дрити лю́ди согрѣ́шшія.

Инъ.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо, Влады́ко, къ Свѣтонача́льнику, Отцу́ Твоему́, отъ но́щи невѣ́дѣнія приведе́ніе и́мамы.

Возжелѣ́въ у́мъ тво́й храни́ти соблюде́нми за́повѣдей, Алекса́ндре, и плотско́е взыгра́ніе твои́мъ воздержа́ніемъ увяди́лъ еси́, и па́стырь показа́лся еси́ боголюбе́зному твоему́ совокупле́нію.

Зако́номъ Боже́ственнымъ послѣ́дуя, прему́дре Алекса́ндре, и повелѣ́ніемъ повину́яся Сотво́ршаго, законополо́жникъ яви́лся еси́ мона́ховъ и пра́вило извѣ́стнѣйшее, наказа́тель безу́мныхъ, и наста́вникъ заблу́ждшихъ, и свѣти́льникъ во тмѣ́ невѣ́дѣнія, пресла́вне.

Огнь искуше́ній и страсте́й пе́щь слеза́ми твои́хъ, о́тче, тече́ній и духо́вною росо́ю бога́тно угаси́лъ еси́, соблю́дся неопали́мъ: опаля́емь бо любо́вію всѣ́хъ Царя́, ве́щная увяди́лъ еси́ жела́нія.

Богоро́диченъ: Жите́йская не мо́гутъ уста́ по достоя́нію Тя́ пѣ́ти, Всепѣ́тая, вы́шшу су́щу херуви́мъ и вся́кія тва́ри. Тѣ́мже съ боже́ственнымъ Алекса́ндромъ Влады́ку о всѣ́хъ на́съ умоли́.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Неболѣ́зненную жи́знь въ болѣ́знехъ воспрія́лъ еси́ и болѣ́зней лю́тыхъ уставля́еши озлобле́нія, вѣ́рою прося́щимъ прія́ти исцѣле́ніе, Алекса́ндре всече́стне. Тѣ́мже разрѣши́ болѣ́зни на́ша душе́вныя и тѣле́сныя.

Къ ра́цѣ твое́й свяще́ннѣй приступа́юще, благоуха́нія боже́ственнаго ра́зума исполня́емся, преблаже́нне Алекса́ндре, смра́да избавля́ющеся страсте́й, любо́вію тя́ чту́щіи, о́тче преподо́бне.

Исправля́еши, о́тче, хромы́хъ и о́чи просвѣща́еши слѣпы́хъ, ходи́ти же твори́ши разсла́бленныхъ о Христѣ́, и отго́ниши ду́хи лука́выя, Алекса́ндре преподо́бне.

Богоро́диченъ: На Тя́, я́ко до́ждь на руно́, сше́дъ, Богоро́дице, Спа́съ изсуши́ я́вѣ пото́ки безбо́жія, ду́ши же на́ша напая́я всегда́, при́сно чту́щія Тя́.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Смы́сленно ты́ вре́менная проразсуди́въ, Алекса́ндре блаже́нне, вѣ́чнующая болѣ́зньми воздержа́нія дости́глъ еси́, о́тче, душа́мъ строи́тель бы́въ, преподо́бне.

Яко терпя́щу ти́ вельми́ по́ты трудо́въ твои́хъ, преподо́бне Алекса́ндре, удо́бь воздержа́ніемъ, чу́дный о́тче, я́влься, Влады́ка тебѣ́ Христо́съ, вруча́етъ си́лу боже́ственну, и си́мъ ти́ неду́ги повелѣва́етъ цѣли́ти.

Мона́шествующихъ наста́вникъ бы́въ, прему́дре Алекса́ндре, су́щихъ ти́ единообра́зныхъ ла́вры, и о́бразъ и начерта́ніе добродѣ́тельныхъ дѣ́яній сы́й, украси́лъ еси́ вся́, я́же во оби́тели супру́жныхъ пребыва́нія.

Богоро́диченъ: Но́въ, я́коже Моисе́й, я́влься, устро́илъ еси́, я́ко ски́нію, огра́ду, всече́стне, ю́же и превозрасти́лъ еси́ болѣ́зньми и по́ты твои́ми, ве́сь возложи́вся Пречи́стѣй Ма́тери Бо́жіи.

Конда́къ, гла́съ 8:

Яко многосвѣ́тлая звѣзда́, дне́сь въ страна́хъ Россíйскихъ возсія́лъ еси́, о́тче, всели́вся въ пусты́ню, Христо́вымъ стопа́мъ послѣ́довати усе́рдно возжелѣ́лъ еси́, и Того́ свято́е и́го на ра́мо твое́ взе́мъ — Честны́й Кре́стъ, умертви́лъ еси́ труды́ по́двигъ твои́хъ тѣле́сная взыгра́нія. Тѣ́мже вопіе́мъ ти́: спаси́ ста́до твое́, е́же собра́лъ еси́, му́дре, да зове́мъ ти́: ра́дуйся, преподо́бне Алекса́ндре, о́тче на́шъ.

Икосъ:

Ка́ко восхвалю́ твоя́ по́двиги и боре́нія, преподо́бне Алекса́ндре? Яко невеще́ственъ ра́зумъ стяжа́въ смире́ніемъ, житіе́ твое́ препроводи́лъ еси́ зѣ́льнымъ воздержа́ніемъ трудо́въ твои́хъ. Аще у́бо и человѣ́къ бы́лъ еси́ естество́мъ, но Вы́шняго Іерусали́ма яви́лся еси́ граждани́нъ: съ пло́тію бо на земли́ пожи́лъ еси́, но а́нгельское пребыва́ніе проше́дъ и бы́лъ еси́ сто́лпъ, страстьми́ непотрясо́мъ. Тѣ́мъ вся́ Россíйская земля́, тобо́ю обога́щшися, хва́литъ тя́ и вѣ́рою велича́етъ, взыва́ющи тебѣ́ такова́я: ра́дуйся, оте́честву твоему́ похвала́, Вели́кому же Нову́граду и все́й странѣ́ Россíйстѣй пресвѣ́тлый свѣти́льниче; ра́дуйся, и́же благочести́ва отца́ пресла́вная о́трасль и благоговѣ́йны ма́тере вѣ́твь многопло́дна; ра́дуйся, цѣлому́дрія непрекло́нный сто́лпе и мона́ховъ пресвѣ́тлая сла́ва; ра́дуйся, па́стырю Христо́вы огра́ды слове́сныхъ ове́цъ, и́хже къ Бо́жію приводя́ ра́зуму; ра́дуйся, ты́ бо многоча́дну пусты́ню воздѣ́лалъ еси́ высото́ю смире́нія твоего́; ра́дуйся, мона́шествующихъ всѣ́хъ о́бразъ добродѣ́тели и единообра́зныхъ ла́вры спасе́ніе; ра́дуйся, кра́сное добродѣ́телей храни́лище и всѣ́мъ, въ печа́ли уныва́ющимъ, утѣше́ніе; ра́дуйся, я́ко вся́ мíра сего́ мудрова́нія презрѣ́въ, стра́сти плотскíя умертви́лъ еси́; ра́дуйся, я́ко а́нгеломъ собесѣ́дникъ бы́ти сподо́бился еси́ и вся́ бѣсо́вскія полки́ посрами́лъ еси́; ра́дуйся, ты́ бо во всѣ́хъ страна́хъ просла́вленъ бы́лъ еси́, о Христѣ́ бо мно́га чудеса́ сотвори́лъ еси́; ра́дуйся, я́ко вои́стинну обрѣ́лъ еси́ Бо́жію благода́ть и со а́нгелы при́сно зрѣ́ти сподо́бился еси́ лице́мъ къ лицу́ Святу́ю Тро́ицу; ра́дуйся, я́ко второ́е со́лнце, сія́я чудесы́, всѣ́мъ да́руеши благода́ть исцѣле́ній; ра́дуйся, преподо́бне Алекса́ндре, о́тче на́шъ.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Освя́щся отъ младе́нства доброгла́сною трубо́ю моли́твы твоея́, и непло́дныя утро́бы многопло́дны сотвори́лъ еси́, слѣпы́мъ подае́ши прозрѣ́ніе и хромы́мъ благотече́ніе, Алекса́ндре преблаже́нне.

Сле́зными излія́ніи погаси́лъ еси́ страсте́й разжже́нія, Алекса́ндре блаже́нне, чуде́съ источи́лъ еси́ струи́ присноживо́тны, и́миже омыва́ются ду́шъ же и тѣле́съ неду́зи, пресла́вне.

Терпѣ́ніе стяжа́въ мно́гое прему́дре, воздержа́ніе, вѣ́ру и любо́вь и́стинну, яви́лся еси́ оте́цъ си́рымъ, вдови́цамъ — засту́пникъ ми́лостивъ и смире́нъ, Алекса́ндре, мона́хомъ — сла́ва и похвала́.

Богоро́диченъ: Ка́ко дои́ши млеко́мъ Сы́на, Чи́стая, безъ отца́, пита́ющаго вся́кое дыха́ніе, Ма́ти Пречи́стая? Ка́ко на руку́ но́сиши вся́ содержа́щаго? Па́че ума́ чу́до Твое́. Тѣ́мъ пое́мъ вели́чія Твоя́.

Инъ.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть, Христо́съ же простре́ богочести́вымъ отроко́мъ ро́су духо́вную, Сы́й благослове́нъ и препросла́вленъ.

Крѣ́постію одѣ́явся, Алекса́ндре, Влады́чнею, и я́ко пра́хъ, сладостра́стіе житія́ попра́лъ еси́, любо́вію побѣжда́емь нетлѣ́нныя жи́зни, е́йже ны́нѣ и причасти́лся еси́, съ ли́ки а́нгелъ, о́тче, сочета́вся.

Крестообра́зно простира́я дла́ни твоя́, Алекса́ндре прему́дре, и моли́твы твоя́ возсыла́я Вы́шнему, я́ко Христа́, Царя́ сла́вы, со а́нгелы, очи́ма явле́нно, богоно́се, узрѣ́лъ еси́, и въ пусты́няхъ непрохо́дныхъ водворя́яся, ища́й Го́спода, Боже́ственною тя́ благода́тію соблюда́юща.

Яко звѣзду́ тя́, Алекса́ндре, всемíрну, мона́ховъ свѣти́ло незаходи́мое, помо́щника въ бѣда́хъ и грѣ́шникомъ вели́кое прибѣ́жище вѣ́дый, хода́тая и моли́твенника тя́ предлага́ю Влады́цѣ Христу́, всече́стне.

Богоро́диченъ: Ви́дети жела́я Тво́й уго́дникъ Твоего́ Сы́на и Бо́га неизрече́нную сла́ву, Богороди́тельнице, Сего́ Честны́й Кре́стъ на ра́мо взе́мъ, послѣ́дова живоно́снымъ Его́ стопа́мъ.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Умо́мъ безстра́стія очище́нъ, бесѣ́довалъ еси́ Го́сподеви Вседержи́телю, отъ Него́же неизглаго́ланно, преподо́бне, науча́емь, проро́чески предглаго́лалъ еси́, просвѣща́я ду́ши, я́ко вели́къ, всеблаже́нне, проро́къ. Тѣ́мъ тя́ согла́сно, Алекса́ндре прему́дре, вѣ́рніи, похваля́емъ, пою́ще: благослови́те, вся́ дѣла́ Госпо́дня, Го́спода.

Подава́я тебѣ́, я́же проти́ву любве́, Зижди́тель и отъ ю́ности соблюда́я тя́ десни́цею, ма́лымъ бы́ліемъ, самовозра́стшимъ отъ земли́, пита́етъ тя́ боголѣ́пно, я́ко отъ младе́нства вся́ко похотѣ́ніе попра́вша и пою́ща: благослови́те, вся́ дѣла́ Госпо́дня, Го́спода.

Яко струя́ боже́ственна исцѣле́ній, происходя́щи отъ ра́ки твоея́, вся́ исцѣля́етъ, и омыва́етъ скве́рны страсте́й, и гное́ніе лю́тыхъ очища́етъ, и вѣ́рныхъ напая́етъ всѣ́хъ сердца́, Алекса́ндре прему́дре, любо́вію пою́щихъ: благослови́те, вся́ дѣла́ Госпо́дня, Го́спода.

Богоро́диченъ: Вопло́щся Безпло́тный изъ Тебе́ боголѣ́пно, Его́же моли́, Пречи́стая, стра́сти пло́ти моея́ умертви́ти и оживи́ти мою́ умерщвле́нную ду́шу грѣхми́.

Инъ.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те, вся́ дѣла́ Госпо́дня, Го́спода.

Якоже мо́лнія вели́кими блиста́ніи, житіе́ сія́ющее всѣ́мъ возсія́ воздержа́нія твоего́, Алекса́ндре прему́дре, благоче́стно Зижди́телю зову́щимъ: благослови́те, вся́ дѣла́ Госпо́дня, Го́спода.

На земли́ я́ко человѣ́къ ходя́, о́тче Алекса́ндре, житіе́ себѣ́ на небесѣ́хъ я́ко вои́стинну стяжа́лъ еси́, а́нгеломъ собесѣ́дникъ я́влься, житіе́ же и жи́знь соверша́я о́нѣхъ. Съ ни́миже воспѣва́еши ны́нѣ: благослови́те, вся́ дѣла́ Госпо́дня, Го́спода.

Тя́, па́че ума́ изъ нерожде́нна Отца́, пре́жде вѣ́къ рожде́нна Сы́на, сла́вный проповѣ́да Алекса́ндръ, и Ду́ха Пресвята́го, Еди́ну Тро́ицу естество́мъ вѣ́дый Божества́.

Богоро́диченъ: Якоже Илія́ пе́рвѣе въ Карми́лѣ всели́ся, та́ко и ты́, въ пусты́няхъ непрохо́дныхъ упражня́яся, возжела́лъ еси́ осо́бь съ Бо́гомъ жи́ти, и богонача́льными озари́вся видѣ́ніи, уго́дникъ яви́лся еси́ Богоро́дицѣ, вопія́ Ей: ра́дуйся, Обра́дованная.

Пѣ́снь 9.

Ирмо́съ: Кам́ень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся, Христо́съ, совокупи́вый разстоя́щаяся естества́. Тѣ́мъ веселя́щеся, Тя́, Богоро́дице, велича́емъ.

Твоя́ свяще́нныя и святы́я мо́щи, во гро́бѣ лежа́ще, многоразли́чныя неду́ги исцѣля́ютъ и попаля́ютъ полки́ бѣсо́вскія всегда́, му́дре Алекса́ндре: Бо́жіею бо благода́тію то́чиши всѣ́мъ исцѣле́нія, вѣ́рно тя́ при́сно блажа́щимъ.

Струи́ на́мъ исцѣле́ній всегда́ честна́я твоя́ ра́ка яви́ся, о́тче, страсте́й излія́ніе вся́ческихъ изсуша́ющи и вся́ напоя́ющи ду́ши ко благопло́дію боже́ственному, прему́дре Алекса́ндре, Христо́въ уго́дниче.

Па́мять твоя́ дне́сь, я́ко со́лнце, возсія́, Алекса́ндре преблаже́нне, благочести́выхъ сердца́ озаря́ющи болѣ́зней твои́хъ и чуде́съ сія́ніемъ, я́ко вои́стинну просвѣща́ющи, о́тче, въ ню́же вся́ ны́ помяни́, вѣ́рно чту́щія тя́.

Богоро́диченъ: Гла́съ прино́симъ Ти́ Гавріи́ловъ, ра́дующеся: ра́дуйся, глаго́люще, мѣ́сто свяще́нія, ра́дуйся, преподо́бныхъ сла́во и всѣ́хъ вѣ́рныхъ спасе́ніе, ея́же ра́ди обожи́хомся, Богоро́дице Приснодѣ́во.

Инъ.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щся отъ Дѣ́вы, на́мъ яви́ся, омраче́нная просвѣти́ти, собра́ти расточе́нная. Тѣ́мъ Всепѣ́тую Богоро́дицу велича́емъ.

Стопа́мъ послѣ́дуя, преподо́бне и богоно́се, Влады́ки Христа́, благоче́стно пожи́въ на земли́, кро́токъ, незло́бивъ яви́лся еси́, ми́лостивъ и смире́нъ, Алекса́ндре, и любве́ испо́лненъ боже́ственныя, сего́ ра́ди тя́ вѣ́рно восхваля́емъ.

Исплете́ся тебѣ́ вѣне́цъ, я́ко побѣди́телю, Алекса́ндре, живоно́сною и вседержи́тельною десни́цею, о́тче, и ны́нѣ пою́щія па́мять твою́ сподо́би, блаже́нне, улучи́ти оставле́ніе согрѣше́ній, пресла́вне.

Совокупи́лся еси́ со безпло́тными во́инствы, и преподо́бнымъ лико́мъ сочта́лся еси́, и со избра́нными всѣ́ми лику́еши, претво́рся и́стиннымъ обоже́ніемъ и безсме́ртною, о́тче, жи́знію, съ ни́миже непреста́нно о на́съ твоего́ Влады́ку умоли́.

Богоро́диченъ: Хра́ме освяще́нный, вмѣ́стенъ Еди́ному отъ Тро́ицы сы́й, хра́мъ Тво́й, Влады́чице, уго́дникъ Тво́й Алекса́ндръ че́стенъ воздви́же въ сла́ву Твою́ и че́сть, въ не́мже не преста́й моля́ся, да́тися на́мъ по́мощи моли́твами Твои́ми.

Свѣти́ленъ. Подо́бенъ: Ду́хомъ во святи́лищи.

Благода́ть преизбы́сть Бо́жія въ души́ твое́й, прему́дре Алекса́ндре, и я́ко безпло́тенъ, на земли́ пожи́лъ еси́. Тѣ́мъ почита́ющихъ тя́ страсте́й изба́ви те́мныхъ о́блакъ, и къ ти́хому приста́нищу приводя́ и отгоня́я ополче́нія бѣсо́вская Боже́ственною си́лою. [Два́жды.]

Сла́ва, и ны́нѣ, богоро́диченъ:

Сотво́рь вои́стинну съ Тобо́ю вели́чія Сы́нъ Превѣ́чный Отчимъ совѣ́томъ: Жи́знь бо нетлѣ́нную безъ стра́сти родила́ еси́ и пребыла́ еси́, я́коже пре́жде рождества́, Дѣ́ва, ма́терскихъ избѣ́гши болѣ́зней и по рождествѣ́ Дѣ́вою пребы́вши.

На хвали́техъ сти́хиры на 4, гла́съ 4. Подо́бенъ: Да́лъ еси́ зна́меніе.

Преподо́бне и богоно́се,* житіе́ твое́ проше́дъ нескве́рно,* терпѣ́ніе же, и кро́тость, и любо́вь нелицемѣ́рну,* воздержа́ніе безмѣ́рно,* всено́щное стоя́ніе,* умиле́ніе боже́ственно,* вѣ́ру и наде́жду и́стинну* съ ми́лованіемъ, о́тче, стяжа́въ,* я́ко а́нгелъ, пожи́лъ еси́ на земли́ съ тѣ́ломъ,* Алекса́ндре блаже́нне,* моли́твенниче о душа́хъ на́шихъ.

Яко земны́й а́нгелъ* и небе́сный человѣ́къ, бы́лъ еси́, прему́дре,* исто́чникъ умиле́нія* и щедро́тъ струя́ незави́стна яви́лся еси́,* пучи́на чуде́съ,* грѣ́шникомъ испору́чникъ,* ма́слина вои́стинну Бо́жія плодови́та,* ма́сломъ трудо́въ твои́хъ,* Алекса́ндре чу́дне, умаща́я сердца́* вѣ́рно восхваля́ющихъ тя́.

Преподо́бне и богоблаже́нне,* умертви́лъ еси́ пло́ти мудрова́ніе боже́ственными разумѣ́ніи,* тѣле́сныхъ превы́ше страсте́й бы́лъ еси́,* и смѣше́нъ до́льними нося́ начерта́ніе,* изобража́я въ себѣ́ боже́ственную добро́ту,* и показа́лся еси́ ве́сь свѣтови́дѣнъ* дѣ́йствомъ Свята́го Ду́ха,* Алекса́ндре, о́тче на́шъ,* и́нокующимъ украше́ніе.

Исто́чникъ чуде́съ показа́* и рѣку́ дарова́ній ра́ку моще́й твои́хъ человѣ́комъ Госпо́дь,* Алекса́ндре прему́дре:* слѣпы́мъ е́же ви́дѣти сія́ дарова́ся,* прокаже́ннымъ — очище́ніе.* Одержи́мыя нечи́стыми ду́хи* отъ тѣ́хъ вла́сти избавля́еши* и цѣлому́дріе тѣ́мъ твори́ши,* исцѣле́ніемъ неоску́дно.

Сла́ва, гла́съ 6:

Ра́дуйся, по́стникомъ свѣти́ло многосвѣ́тлое, и́нокомъ звѣзда́ незаходи́мая, па́стыремъ похвала́, о́тче Алекса́ндре, преподо́бнымъ совсе́льниче. Ра́дуйся, Тро́ицы пресвѣ́тлое жили́ще. Ра́дуйся, любве́ и ми́лованія исто́чниче. Ра́дуйся, пресвѣ́тлый свѣти́льниче разсужде́нія. Ра́дуйся, пра́вило добродѣ́телей и́стинное. Ра́дуйся, сто́лпе одушевле́нный. Ра́дуйся, Вели́кому Нову́граду похвала́ и утвержде́ніе.

И ны́нѣ, богоро́диченъ: Богоро́дице, Ты́ еси́ лоза́ и́стинная...
Славосло́віе вели́кое. [Ектеніи́.] И отпу́стъ.



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, [гла́съ 7:] Честна́ предъ Го́сподемъ [сме́рть преподо́бныхъ Его́]. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 295 – 306 об.

/ Къ оглавленію раздѣла /


Наверхъ / Къ титульной страницѣ

0