Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 16 декабря 2017 г. Сейчасъ на порталѣ посѣтителей - 2.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 29-й де́нь.
Усѣкнове́ніе честны́я главы́ честна́го сла́внаго Проро́ка, Предте́чи и Крести́теля Іоа́нна.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 1. Подо́бенъ: Небе́сныхъ чино́въ.

Предте́чу Іоа́нна и Крести́теля Христо́ва,* пріиди́те согла́сно, вси́ вѣ́рніи,* досто́йно почти́мъ приле́жно:* проро́къ бо сы́й проро́чествуетъ бу́дущая,* я́ко служи́тель и таи́нникъ боголѣ́пенъ* неизрече́нныхъ чуде́съ Христо́выхъ.

Иродъ безу́мный отсѣка́етъ твою́ главу́ неща́дно,* облича́ющу сего́ прескве́рный нра́въ;* Христо́съ же тя́, треблаже́нне,* я́ко Крести́теля, главу́ содѣва́етъ Це́ркви,* всѣ́хъ Содѣ́тель Госпо́дь* и всѣ́хъ Изба́витель.

На блю́дѣ принести́ твою́ главу́* Иродъ беззако́нный скве́рнѣй Иродіа́дѣ,* отсѣ́къ со дерзнове́ніемъ,* повелѣва́етъ, всеблаже́нне.* О, чу́до стра́шное, и пресла́вно слы́шаніе!* Но Христо́ва Це́рковь ра́достно пра́зднуетъ твое́ страда́ніе.

Сла́ва, гла́съ 8:

Предте́че Спа́совъ, а́ще и убíйствомъ разрѣши́ Иродъ тя́, и́стины проповѣ́дника, но у́стъ твои́хъ свѣтолу́чная свѣща́ и су́щимъ во а́дѣ вѣ́ры сія́ніе, призыва́ющи, свѣтя́ше. Тѣ́мже моли́ поми́ловатися душа́мъ на́шимъ.

И ны́нѣ: Влады́чице, пріими́...
Проки́менъ дне́.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Бо́лій въ рожде́нныхъ жена́ми* яви́лся еси́, блаже́нне,* я́ко Влады́ку всѣ́хъ* крести́въ, Іоа́нне,* проро́че, проповѣ́дниче и Предте́че.

Сти́хъ: Честна́ предъ Го́сподемъ* сме́рть преподо́бныхъ Его́.

Егда́ Иродíя* пія́нствомъ и блудо́мъ* одержи́ма ви́дѣ* беззако́ннаго Ирода,* ко убíйству сего́ привлече́.

Сти́хъ: Въ па́мять вѣ́чную* бу́детъ пра́ведникъ.

Па́мять свяще́нную* боже́ственнаго Іоа́нна* и Крести́теля* любо́вію соверша́емъ,* пою́ще Тро́ицу Пребоже́ственную.

Сла́ва, и ны́нѣ. Подо́бенъ то́йже:

Еди́на христіа́нъ упова́ніе* и Предста́тельнице Чи́стая,* съ Предоте́чею* моли́ Сы́на Твоего́* о Твои́хъ рабѣ́хъ.

Тропа́рь, гла́съ 2:

Па́мять пра́веднаго съ похвала́ми, тебѣ́ же довлѣ́етъ свидѣ́тельство Госпо́дне, Предте́че: показа́лъ бо ся еси́ вои́стинну и проро́ковъ честнѣ́йшій, я́ко и въ струя́хъ крести́ти сподо́бился еси́ Проповѣ́даннаго. Тѣ́мже за и́стину пострада́въ, ра́дуяся, благовѣсти́лъ еси́ и су́щимъ во а́дѣ Бо́га, я́вльшагося пло́тію, взе́млющаго грѣ́хъ мíра и подаю́щаго на́мъ ве́лію ми́лость.

Сла́ва, и ны́нѣ, богоро́диченъ: Вся́ па́че смы́сла...



НА ВЕЛИЦѢЙ ВЕЧЕРНИ,
Стихологису́емъ Блаже́нъ му́жъ, 1-й антифо́нъ. На Го́споди воззва́хъ: поста́вимъ стихо́въ 8 и пое́мъ стихи́ры самогла́сны. Гла́съ 6. Іоа́нна мона́ха:

Рождеству́ сотворя́ему безсту́днаго Ирода, скве́рныя пляса́вицы исполня́шеся сложе́ніе кля́твы: Предте́чева бо глава́, отсѣ́кшися, я́ко снѣ́дь, ноша́шеся на блю́дѣ возлежа́щимъ. О, пи́ра ме́рзка, непреподо́бна дѣя́нія и убíйства испо́лнена! Но мы́ Крести́теля, я́ко въ рожде́нныхъ жена́ми бо́льша, досто́йно чту́ще, ублажа́емъ. [Два́жды.]

Пляса́ учени́ца вселука́ваго діа́вола, и главу́ твою́, Предте́че, мзду́ взя́тъ. О, пи́ра, испо́лнена крове́й! Лу́чше бѣ́ не кля́тися, Ироде беззако́нне, лжи́ вну́че. Аще ли же и кля́лся еси́, но не о добрѣ́ кля́лся: лу́чше бѣ́ солга́вшу жи́знь получи́ти, не́же и́стинствовавшу главу́ Предте́чеву усѣ́кнути. Но мы́ Крести́теля, я́ко въ рожде́нныхъ жена́ми бо́льша, досто́йно чту́ще, ублажа́емъ. [Два́жды.]

Не подоба́ше ти́, о Ироде, прелюбодѣя́нію обличи́теля, ра́ди раче́нія сатани́нска и разжже́нія неи́стовнаго блуда́, сме́ртію осуди́ти. Не подоба́ше ти́ того́ всечестну́ю главу́ пребеззако́ннѣй женѣ́ ра́ди кля́твы пляса́нія преда́ти бѣ́днѣ. О, ка́ко дерзну́лъ еси́ таково́ убíйство соверши́ти? Ка́ко же не опали́ся скве́рная пляса́вица, посреди́ пи́ра на блю́дѣ нося́щи сію́? Но мы́ Крести́теля, я́ко въ рожде́нныхъ жена́ми бо́льша, досто́йно чту́ще, ублажа́емъ. [Два́жды.]

Па́ки Иродíя бѣ́сится, па́ки смуща́ется. О, пляса́нія льсти́вна и пи́ра съ ле́стію! Крести́тель усѣка́шеся, и Иродъ смуща́шеся. Моли́твами, Го́споди, Твоего́ Предте́чи, ми́ръ пода́ждь душа́мъ на́шимъ. [Два́жды.]

Сла́ва, гла́съ то́йже:

Рождеству́ сотворя́ему безсту́днаго Ирода, скве́рныя пляса́вицы исполня́шеся сложе́ніе кля́твы: Предте́чева бо глава́, отсѣ́кшися, я́ко снѣ́дь, ноша́шеся на блю́дѣ возлежа́щимъ. О, пи́ра ме́рзка, непреподо́бна дѣя́нія и убíйства испо́лнена! Но мы́ Крести́теля, я́ко въ рожде́нныхъ жена́ми бо́льша, досто́йно чту́ще, ублажа́емъ.

И ны́нѣ, богоро́диченъ: Кто́ Тебе́ не ублажи́тъ...
Вхо́дъ, проки́менъ дне́, и чте́нія.

Проро́чества Иса́іина чте́ніе. [Главы́ 40, 41, 45, 48, 54.]

Та́ко глаго́летъ Госпо́дь: утѣша́йте, утѣша́йте лю́ди Моя́, глаго́летъ Бо́гъ: свяще́нницы, глаго́лите въ се́рдцы Іерусали́му, умоли́те его́, я́ко умно́жися смире́ніе его́. Разрѣши́ся бо грѣ́хъ его́, я́ко прія́тъ изъ руки́ Госпо́дни сугу́ба согрѣше́нія своя́. Гла́съ вопію́щего въ пусты́ни: угото́вайте пу́ть Госпо́день, пра́вы твори́те стези́ Бо́гу на́шему. На го́ру высо́ку взы́ди, благовѣству́й Сіо́ну, возвыша́й крѣ́постію гла́съ сво́й, благовѣству́яй Іерусали́му: вознеси́те, не бо́йтеся. Азъ Го́сподь Бо́гъ, Азъ услы́шу убо́гихъ Изра́илевъ, и не оста́влю тѣ́хъ. Но отве́рзу отъ го́ръ рѣ́ки и посредѣ́ по́ля исто́чники, сотворю́ пусты́ню въ лу́гъ и жа́ждущую зе́млю во исто́чники водны́я. Да возвесели́тся не́бо свы́ше, и о́блацы да кропя́тъ пра́вду, да возсія́етъ земля́, и да прозя́бнетъ ми́лость, и пра́вда да возсія́етъ вку́пѣ. Гла́съ весе́лія возвѣсти́те, и услы́шано да бу́детъ, возвѣсти́те да́же до коне́цъ земли́, глаго́лите, я́ко изба́ви Госпо́дь раба́ Своего́ Іа́кова и, а́ще вжа́ждутъ въ пусты́ни, источи́тъ и́мъ во́ду изъ ка́мене. Возвесели́ся, непло́ды неражда́ющая, расто́ргни и возопíй, неболѣ́вшая, я́ко мно́га ча́да пусты́я па́че, не́жели иму́щія му́жа.

Проро́чества Малахíина чте́ніе. [Глава́ 3.]

Та́ко глаго́летъ Госпо́дь Вседержи́тель: се́ Азъ посыла́ю Ангела Моего́ предъ лице́мъ Твои́мъ, и́же угото́витъ пу́ть Тво́й предъ Тобо́ю. И пріи́детъ во хра́мъ Сво́й Госпо́дь, Его́же вы́ и́щете, и кто́ стерпи́тъ де́нь вхо́да Его́? Зане́же тому́ пріити́, я́ко о́гнь въ горни́лѣ и я́коже бы́ліе перу́щихъ, и очи́ститъ, пояда́я и очища́я, я́ко сребро́ и зла́то. И пріи́детъ къ ва́мъ судо́мъ, и бу́детъ свидѣ́тель ско́ръ на лука́выя, и на прелюбодѣ́йцы, и на клену́щіяся и́менемъ Мои́мъ во лжу́, и на лиша́ющія мзды́ нае́мника, и на наси́льствующія вдови́цы и пха́ющія си́рыя, и на уклоня́ющія су́дъ прише́льца, и на небоя́щіяся Его́, глаго́летъ Госпо́дь Вседержи́тель. Зане́ Азъ Госпо́дь Бо́гъ ва́шъ, и не измѣню́ Себе́; и вы́, сы́нове Іа́ковли, уклони́стеся отъ зако́на и не сохрани́сте. Сего́ ра́ди обрати́теся ко Мнѣ́, и обращу́ся къ ва́мъ, глаго́летъ Госпо́дь Вседержи́тель, и ублажа́тъ ва́съ вси́ язы́цы, и разумѣ́йте, я́ко Азъ Госпо́дь, смотря́яй посреди́ пра́веднаго и посреди́ беззако́нника въ де́нь о́нъ, въ о́ньже сотворю́ снабдѣ́ніе лю́бящимъ Мя́. Позна́йте у́бо и помяни́те зако́нъ Моисе́овъ, раба́ Моего́, я́коже заповѣ́да ва́мъ въ Хори́вѣ, ко всему́ Изра́илю повелѣ́ніе и оправда́ніе. И се́ Азъ послю́ ва́мъ Илію́ Ѳесви́тянина, пре́жде да́же не пріити́ дню́ Госпо́дню вели́кому, просвѣще́нному, и́же напра́витъ се́рдце отца́ къ сы́ну и се́рдце человѣ́ка ко и́скреннему своему́, да не, прише́дъ, поражу́ зе́млю вско́рѣ, глаго́летъ Госпо́дь Вседержи́тель, Бо́гъ Святы́й Изра́илевъ.

Прему́дрости Соломо́ни чте́ніе. [Главы́ 4 и 5.]

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. Узрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо къ себѣ́, ка́ющеся, и въ тѣснотѣ́ ду́ха воздо́хнутъ, и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ и во святы́хъ жре́бій его́ е́сть? Убо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели и ходи́хомъ стези́ непрохо́дны, пути́ же Госпо́дня не разумѣ́хомъ.

На литíи стихи́ры самогла́сны, гла́съ 1. [Ге́рмана патріа́рха:]

Что́ тя нарече́мъ, проро́че? а́нгела ли? апо́стола ли? или́ му́ченика? — Ангела, зане́ я́ко безпло́тенъ пожи́лъ еси́; апо́стола, я́ко научи́лъ еси́ язы́ки; му́ченика же, я́ко твоя́ глава́ за Христа́ усѣче́ся. Его́же моли́ поми́ловати ду́ши на́ша.

Отсѣ́ченнѣй главѣ́ Предте́чевѣ па́мять соверша́емъ: тогда́ у́бо на блю́дѣ источа́ющи кро́вь, ны́нѣ же въ концѣ́хъ пролива́ющи исцѣле́нія.

Дне́сь непреподобнодѣлообра́зная ма́ти убíйства, е́же отъ беззако́ннаго сплете́нія своего́ всескве́рную дще́рь надъ всѣ́хъ проро́къ богоизя́щна бо́льшаго, убійственнообра́знымъ совѣ́томъ лука́вствова: вражде́бному бо Ироду творя́щу пи́ръ своего́ скве́рнаго рождества́, съ кля́твою испроси́ти устро́и чудото́чную богопроповѣ́дника честну́ю главу́. Еже и соверши́ пребезу́мный, же́нскому пляса́нію да́въ ту́ возме́здіе, кля́твенный да́ръ. Оба́че не преста́ таи́нникъ Христо́ва прише́ствія, богоме́рзкое смѣше́ніе и́хъ и по кончи́нѣ облича́ти, но облича́я, вопія́ше: не подоба́етъ ти́, глаго́ля, прелюбодѣ́йствовати бра́та твоего́ Фили́ппа жену́. О, рожде́нія пророкоубíйственна и крове́й напо́лнена пи́ра! Мы́ же благочестному́дреннѣ во усѣкнове́ніи Предте́чевѣ, бѣлообразу́юще, пра́зднуемъ, я́ко въ благонаро́читый де́нь ра́дующеся, и умо́лимъ сего́ благоусе́рдствовати Тро́ицу, отъ страсте́й безче́стія изба́вити на́съ, и спасти́ ду́ши на́ша.

Гла́съ 4:

Рожде́ніе неподо́бно и пи́ръ безсту́днѣйшій Иродъ соверши́лъ е́сть. Любодѣ́йствомъ бо же́нскимъ услажда́емь и нечести́вымъ женонеи́стовствомъ подстрека́емь, отсѣче́ главу́ Предте́чеву, но не отсѣче́ язы́ка проро́ческа, облича́ющаго безу́міе его́. Пролія́ кро́вь непови́нну, покры́ти хотя́ грѣ́хъ беззако́ненъ, но ни о се́мъ скры́ гла́са, вопію́щаго всѣ́мъ покая́ніе. Онъ у́бо свеселя́шеся убíйствомъ, мы́ же спра́зднуемъ любо́вію Крести́теля Іоа́нна блаже́нное заколе́ніе. Предвари́ бо во а́дѣ Жи́знь, проповѣ́дати су́щимъ во тьмѣ́ и сѣ́ни сме́ртнѣй сѣдя́щимъ, Свы́ше Восто́къ — Христа́ Бо́га на́шего, еди́наго Многоми́лостиваго.

Проро́ка, и му́ченика, и Крести́теля Спа́сова, пріиди́те, лю́діе, восхва́лимъ: се́й бо во пло́ти а́нгелъ сы́й, Ирода изобличи́лъ е́сть, пребеззако́ннаго любодѣя́нія содѣ́яніемъ осуди́въ его́. И беззако́ннаго ра́ди пляса́нія честна́я глава́ отсѣка́ется, су́щимъ во а́дѣ благовѣству́яй изъ ме́ртвыхъ воскресе́ніе, и мо́лится приле́жно Го́сподеви спасти́ся душа́мъ на́шимъ.

Проро́ка, и му́ченика, и Крести́теля Спа́сова, пріиди́те, лю́діе, восхва́лимъ: я́ко бѣ́гая, въ пусты́ни водворя́шеся, ме́дъ ди́вій и акри́ды яды́й, царя́ беззако́ннующа обличи́лъ е́сть. На́ше же малоду́шіе утѣша́ше, глаго́ля: пока́йтеся, прибли́жи бо ся Ца́рство небе́сное.

Сла́ва, гла́съ 5. [Іоа́нна мона́ха:]

Беззако́ннаго дѣя́нія обличе́нія убѣжа́ти Иродъ умы́сливъ, главу́ твою́, Предте́че, беззако́ннѣй женѣ́ предаде́ па́костно, не разумѣ́ бо окая́нный, облича́я себе́, на блю́дѣ обнося́ ю́. Но я́ко чистоты́ дѣ́тельный учи́тель, и покая́нія наста́вникъ спаси́тельный, моли́ся, Крести́телю Христо́въ, отъ страсте́й безче́стія изба́вити на́съ.

И ны́нѣ, гла́съ то́йже:

Воспо́йте, лю́діе, Ма́тери Бо́га на́шего, воспо́йте: дне́сь бо всесвѣ́тлую ду́шу Свою́ въ пречи́стыя дла́ни изъ Нея́ вопло́щшагося безъ сѣ́мене предае́тъ, Его́же и мо́литъ непреста́нно, дарова́ти вселе́ннѣй ми́ръ и ве́лію ми́лость.

На стихо́внѣ стихи́ры самогла́сны, гла́съ 2:

Покая́нія проповѣ́дниче, Іоа́нне Крести́телю, отсѣ́ченѣ бы́вшей твое́й главѣ́, зе́млю освяти́лъ еси́, зане́ зако́нъ Бо́жій вѣ́рнымъ уясни́лъ еси́ и беззако́ніе потреби́лъ еси́. Яко предстоя́ престо́лу небе́снаго Царя́ Христа́, Того́ моли́ поми́ловати ду́ши на́ша.

Сти́хъ: Пра́ведникъ я́ко фи́никсъ процвѣте́тъ, я́ко ке́дръ и́же въ Лива́нѣ, умно́жится.

Зако́на ра́ди Госпо́дня во главу́ усѣкнове́нъ бы́лъ еси́, о всесвяты́й Іоа́нне! Обличи́лъ еси́ царя́ злочести́ва, беззако́нновавша дерзнове́ніемъ непоро́чнымъ. Тѣ́мже дивя́тся тебѣ́ во́инства а́нгельская, сла́вятъ тя́ ли́цы апо́столъ и му́ченикъ. Чти́мъ твою́ и мы́ лѣ́тнюю па́мять, всесла́вне, сла́вяще Святу́ю Тро́ицу, тебе́ вѣнча́вшую, Предте́че блаже́нне.

Сти́хъ: Возвесели́тся пра́ведникъ о Го́сподѣ, и упова́етъ на Него́.

Иже отъ проро́ка проро́къ и бо́лій проро́ковъ бы́въ, изъ чре́ва ма́терня освяще́нный въ служе́ніе Госпо́дне, дне́сь отъ беззако́нна царя́ въ главу́ усѣкнове́нъ бы́сть, и безче́стно пляса́вшую отрокови́цу, я́сно и пре́жде усѣкнове́нія, и по усѣкнове́ніи обличи́въ, посрами́ грѣха́ по́лкъ. И сего́ ра́ди возопіе́мъ: Крести́телю Іоа́нне, я́ко имѣ́я дерзнове́ніе, приле́жно моли́ся о душа́хъ на́шихъ.

Сла́ва, гла́съ 8:

Предте́че Спа́совъ, ты́ царя́ изобличи́лъ еси́ беззако́нія не дѣ́лати. Тѣ́мже игра́ніе беззако́нныя жены́ повину́ Ирода отсѣщи́ твою́ главу́, и сего́ ра́ди отъ восто́къ со́лнца да́же до за́падъ хва́льно и́мя твое́. Дерзнове́ніе имѣ́я ко Го́споду, приле́жно моли́ спасти́ся душа́мъ на́шимъ.

И ны́нѣ, богоро́диченъ: Безневѣ́стная Дѣ́во...

На благослове́ніи хлѣ́бовъ: тропа́рь два́жды [пи́санъ на ма́лѣй вече́рни], и Богоро́дице Дѣ́во.., еди́ножды. И чте́ніе.



НА УТРЕНИ,
По 1-й стихоло́гіи сѣда́ленъ, гла́съ 5. Подо́бенъ: Собезнача́льное Сло́во.

Хода́тая согла́сно зако́на и благода́ти, вѣ́рніи, соше́дшеся, восхва́лимъ: я́ко покая́ніе на́мъ проповѣ́да, и Ирода я́вѣ обличи́въ дерзнове́ннѣ, въ главу́ свою́ усѣ́ченъ бы́сть. И ны́нѣ, со а́нгелы живу́ши, Христу́ мо́лится спасти́ся на́мъ.

Сла́ва, гла́съ 4. Подо́бенъ: Яви́лся еси́ дне́сь.

Свѣ́тлую твою́ па́мять дне́сь творя́ще, Спа́са и Го́спода моли́ти приле́жно Тя́ мо́лимъ, Предте́че, всѣ́мъ да́ти согрѣше́ній проще́ніе.

И ны́нѣ, богоро́диченъ. Подо́бенъ:

Те́плое заступле́ніе су́щимъ въ бѣда́хъ, и Помо́щницу на́шу, и къ Бо́гу премѣне́ніе, Еюже тли́ изба́вихомся, Богоро́дицу, вѣ́рніи, ублажа́емъ.

По 2-й стихосло́віи сѣда́ленъ, гла́съ 5. Подо́бенъ: Собезнача́льное Сло́во.

Иже отъ ложе́снъ проро́ка, я́вльшагося на́мъ, и отъ непло́дове свѣти́льника вселе́ннѣй, я́сно произше́дша, въ пѣ́снехъ восхва́лимъ Христо́ва Крести́теля и побѣдоно́сна страда́льца Предте́чу Іоа́нна. Мо́лится бо Го́сподеви поми́ловатися душа́мъ на́шимъ.

Сла́ва, гла́съ 4. Подо́бенъ: Удиви́ся Іо́сифъ.

Ны́нѣ яви́ся на́мъ Спа́совъ Крести́тель и весели́тъ разу́мнѣ помышле́нія вѣ́рныхъ, пусты́ни красота́, и проро́ковъ печа́ть, тѣ́мже Христо́въ показа́ся Предте́ча и свидѣ́тель нело́женъ прише́ствія Того́. Духо́вными у́бо пѣ́сньми согла́сно Іоа́нну возопіе́мъ: проро́че проповѣ́дниче и́стины, моли́ся спасти́ся на́мъ.

И ны́нѣ, богоро́диченъ:

Удиви́шася, Чи́стая, вси́ а́нгеловъ ли́цы та́инству Твоего́ рожде́нія стра́шному: ка́ко, Иже вся́ содержа́й ма́ніемъ еди́нымъ, объя́тіи Твои́ми, я́ко Человѣ́къ, содержи́тся, и пріе́млетъ нача́ло Превѣ́чный, и млеко́мъ пита́ется, вся́кое дыха́ніе пита́яй неизрече́нною бла́гостію? И Тя́, я́ко вои́стинну Бо́жію Ма́терь, хва́ляще, сла́вятъ.

По поліеле́и сѣда́ленъ, гла́съ 8. Подо́бенъ: Свирѣ́лей па́стырскихъ.

Предте́ча, вѣ́рніи, Крести́тель и а́нгелъ всѣ́хъ Изба́вителя, Ирода обличи́въ за беззако́ніе Иродіа́дино, умира́етъ, во главу́ усѣ́ченъ, я́ко да и су́щимъ во а́дѣ со дерзнове́ніемъ благовѣсти́тъ, я́ко Бо́гъ схо́дитъ та́мо плѣни́ти сме́рть. [Два́жды.]

Сла́ва, и ны́нѣ, богоро́диченъ:

Сло́во Отчее на зе́млю сни́де, и а́нгелъ свѣ́телъ Богоро́дицѣ глаго́лаше: ра́дуйся, Благослове́нная, Яже черто́гъ еди́на сохра́ншая, зача́тіе пріе́мши Превѣ́чнаго Бо́га и Го́спода, да отъ пре́лести, я́ко Бо́гъ, спасе́тъ ро́дъ человѣ́ческій.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе Матѳе́я, зача́ло 57.

По 50-мъ псалмѣ́ стихи́ра, гла́съ 6:

Пляса́ учени́ца вселука́ваго діа́вола, и главу́ твою́, Предте́че, мзду́ взя́тъ. О, пи́ра, испо́лнена крове́й! Лу́чше бѣ́ не кля́тися, Ироде беззако́нне, лжи́ вну́че. Аще ли же и кля́лся еси́, но не о добрѣ́ кля́лся: лу́чше бѣ́ солга́вшу жи́знь получи́ти, не́же и́стинствовавшу главу́ Предте́чеву усѣ́кнути. Но мы́ Крести́теля, я́ко въ рожде́нныхъ жена́ми бо́льша, досто́йно чту́ще, ублажа́емъ.

Кано́на два́, пе́рвый со ирмосо́мъ на 8. [Іоа́нна мона́ха.] Гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Отъ утро́бы непло́дныя я́вльшася проро́ка, въ ложесна́хъ Дѣви́ческихъ, во чре́вѣ Носи́мому неизрече́нно, свяще́ннаго воспое́мъ Предте́чу.

Предѣ́лы естества́ превозше́дъ, пра́вды соблю́лъ еси́ зако́ны, беззако́нное смѣше́ніе облича́я, не убоя́вся царе́ва суровства́.

Зако́ннымъ млеко́мъ воспита́вся, законоположе́ніе совокупле́нія зако́ннаго, я́ко зако́на печа́ть запеча́тствуя, сопроти́вился еси́ ме́рзкому прелюбодѣя́нію.

Богоро́диченъ: Чи́ни Тя́ а́нгелъ и человѣ́къ, Безневѣ́стная Ма́ти, восхваля́ютъ непреста́нно: Зижди́теля бо си́хъ я́ко Младе́нца на объя́тіихъ Твои́хъ носи́ла еси́.

Другíй кано́нъ на 6. [Ки́ръ Андре́я Кри́тскаго.] Гла́съ то́йже.
Пѣ́снь 1.

Ирмо́съ: Истря́сшему въ мо́ри мучи́тельство фарао́не, и Изра́иля су́шею наста́вльшему пои́мъ Христу́, я́ко просла́вися во вѣ́ки.

Пусты́ни кра́сное овча́, Заха́ріинъ пло́дъ и Елисаве́тино па́че наде́жды прозябе́ніе, предповелѣва́етъ вѣ́рнымъ торжествова́ти честну́ю его́ па́мять.

О, рожде́нія, испо́лнена кро́ве! О, пи́ра ме́рзка! Убíйствомъ бо пія́нство Иродъ раствори́, трапе́за же его́ скверноубíйства го́рькаго испо́лнися.

Обличи́вшаго Ирода беззако́ннующа, вѣ́рніи, и отсѣче́ніе главы́ претерпѣ́вша, воспои́мъ Крести́теля, я́ко за ре́вность Бо́жію умерщвле́на.

Богоро́диченъ: Неопи́саннаго Бо́га Сло́ва, всего́ все́льшася въ Тя́, родила́ еси́, Чи́стая Богороди́тельнице, сугу́ба Того́, я́ко еди́на су́ща Сы́на, воплоще́нна изъ Тебе́ неизрече́нно.

Катава́сія: Кре́стъ начерта́въ, Моисе́й...

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Дре́внихъ я́ко хода́тай и но́выхъ, Предте́че, ева́нгельскихъ проповѣ́даній, ты́ предста́въ, смѣше́ніе беззако́нное мучи́тельское обличи́лъ еси́, сла́вную сме́рть, ра́дуяся, прія́лъ еси́.

Отъ ма́тере беззако́нныя преднаучена́ отрокови́ца, объюродѣ́вшу пія́нствомъ Иродови рече́: да́ждь на блю́дѣ главу́ Іоа́ннову, ма́тери да пода́мъ да́ръ возжелѣ́ненъ.

Обличе́нія не терпя́ безсту́дный мучи́тель богоно́снаго твоего́ язы́ка, сла́вне Предте́че, отрокови́цѣ предае́тъ, же́нскимъ пляса́ніемъ, честну́ю твою́ страда́льную главу́, пресла́вне.

Богоро́диченъ: Всели́вся въ Дѣ́ву тѣле́снѣ, Го́споди, яви́лся еси́ человѣ́комъ, я́коже подоба́ше ви́дѣти Тя́, Юже и показа́лъ еси́ я́ко и́стинную Богоро́дицу и вѣ́рнымъ по́мощь, Еди́не Человѣколю́бче.

Инъ.

Ирмо́съ: Нѣ́сть свя́тъ, я́ко Госпо́дь, и нѣ́сть пра́веденъ, я́ко Бо́гъ на́шъ, Его́же пое́тъ вся́ тва́рь: нѣ́сть пра́веденъ, па́че, Тебе́, Го́споди.

Бо́лій не воста́ въ рожде́нныхъ жена́ми Іоа́нна, взыва́ше Христо́съ Истина: во утро́бѣ бо позна́ созда́ніе Созда́вшаго, проповѣ́даше ма́тернимъ гла́сомъ.

Пе́рстомъ, пе́рвѣе, показа́въ Агнца, и язы́комъ, второ́е, Ирода обличи́лъ еси́, главо́ю же, тре́тіе, источа́еши чудеса́ отъ зда́нна сосу́да на́мъ.

Рожде́ніе сла́вно, Крести́телю Христо́въ, и житіе́ твое́ непоро́чно, и предъизше́ствіе че́стно, и показа́ніе стра́нно, сме́рть честна́ и погребе́ніе сла́вно.

Богоро́диченъ: Бо́гъ Сы́й, Са́мъ Себе́ истощи́лъ еси́, Единоро́дне, да спасе́ши, я́же созда́лъ еси́, и́хже ра́ди вочеловѣ́чился еси́, вопло́щься отъ Дѣ́вы, и все́ мое́ премѣни́въ естество́, приве́лъ еси́ Твоему́ Роди́телю.

Катава́сія: Же́злъ во о́бразъ...

Сѣда́ленъ, гла́съ 8. Подо́бенъ: Прему́дрости.

Отъ непло́дове просія́въ судо́мъ Бо́жіимъ и у́зы разрѣши́въ язы́ка о́тча, показа́лъ еси́ со́лнце, денни́цу озаря́ющее, и лю́демъ въ пусты́ни Зижди́теля проповѣ́далъ еси́, Агнца, взе́млющаго мíра грѣхи́. Тѣ́мже ре́вностію царя́ обличи́въ, въ пресла́вную главу́ твою́ усѣ́ченъ бы́лъ еси́, приснопа́мятне, Іоа́нне всехва́льне, моли́ся Христу́ Бо́гу согрѣше́ній оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко Дѣ́ву и еди́ну въ жена́хъ, Тя́ безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е рождество́ Твое́, и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти́: си́лѣ Твое́й сла́ва, Человѣколю́бче.

Не могíй терпѣ́ти обличе́нія де́рзости, и́же зако́на томле́ніемъ пови́нный, ни де́рзость благоче́стія, и́же скве́рными сластьми́ растлѣ́нный, связа́въ, блюдя́ше невеще́ственно го́рнимъ пре́жде конца́ лико́мъ совокупля́емаго.

Душевре́днымъ пія́нствомъ и разжже́ніемъ блу́днымъ поболѣ́въ, отда́нъ окая́нный, отрокови́цы пляса́ніемъ ножны́мъ свя́занъ, убíйца проро́ка быва́етъ. Зача́тъ бо пія́нство — блуда́ ма́терь и лю́тое беззако́ніе породи́.

Вои́стинну въ тебѣ́ не солга́ Боже́ственный гла́съ: ты́ бо во проро́цѣхъ бо́льшій еси́, я́ко проро́честву сподо́бився отъ са́мыя утро́бы въ несоверше́ннѣ тѣлеси́, и прорече́ннаго тобо́ю Бо́га Сло́ва, и ви́дѣвъ, и крести́въ въ тѣлеси́.

Богоро́диченъ: Ты́ вѣ́рныхъ похвала́ еси́, Безневѣ́стная, Ты́ предста́тельница, Ты́ и прибѣ́жище христіа́нъ, стѣна́ и приста́нище: къ Сы́ну бо Твоему́ мольбы́ но́сиши, Всенепоро́чная, и спаса́еши отъ бѣ́дъ вѣ́рою и любо́вію Богоро́дицу чи́стую Тебе́ зна́ющія.

Инъ.

Ирмо́съ: Изъ горы́ пріосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися богови́дно усмотри́ и со стра́хомъ славосло́вяше си́лу Твою́.

Уясни́лъ еси́ на́мъ Христо́во Ца́рство, показа́лъ еси́ лю́демъ пути́ покая́нія и Ирода обличи́лъ еси́ беззако́ннующа, вели́кій проповѣ́дниче, Іоа́нне му́дре.

Не терпя́, Крести́телю, Иродъ обличе́нія, побѣди́ся гнѣ́вомъ, и за́вистію, и го́рестію; и соблюда́ше вре́мя рожде́нія, въ не́же усѣче́ главу́ твою́, проповѣ́дниче Христо́въ.

Весели́ся, Крести́телю, да игра́етъ ду́хъ тво́й: облича́еши бо и та́мо безбо́жнаго Ирода, и су́щимъ во а́дѣ проповѣ́дуеши душа́мъ, глаго́ля: спасе́ніе на́ше прибли́жися.

Чуди́тся земля́ твоему́ житію́, Іоа́нне, проповѣ́дуетъ не́бо непра́ведное твое́ заколе́ніе, и сказу́етъ мно́жество добродѣ́телей твои́хъ Це́рковь, воспѣва́ющи.

Богоро́диченъ: Роди́вся отъ Ма́тере, Дѣ́вы непоро́чныя, сохрани́лъ еси́ чи́сту по рождествѣ́, Иже въ мое́ существо́ ве́сь обле́кся, грѣха́ кромѣ́.

Катава́сія: Услы́шахъ, Го́споди...

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те Незаходи́мый, и покры́ла мя́ е́сть чужда́я тьма́, окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Ма́терними наважде́ньми цѣ́ну пляса́нія злоде́монскаго суро́выя льви́цы суро́вѣйшее исча́діе испроси́, ю́же и звѣ́ріе са́ми въ пусты́ни почита́ху, главу́ Предте́чи и проповѣ́дника.

О, твои́хъ неизрече́нныхъ и непости́жныхъ суде́бъ, Человѣколю́бче! Яко во утро́бѣ еще́ су́ща ма́терни, Ду́ха Свята́го прія́телище бы́вша и возра́стша цѣлому́дріемъ и чистото́ю, скверна́вая испляса́ отрокови́ца.

Любе́зно и и́скренно изво́ли беззако́нное сопряже́ніе лю́бящему къ рожде́ственнымъ его́ питія́мъ и проро́че присовокупи́ти убíйство, и ча́шу, испо́лнену святы́хъ и проро́ческихъ крове́й, сластолю́біемъ раствори́ти.

Богоро́диченъ: Ма́терне дерзнове́ніе, е́же къ Сы́ну Твоему́ иму́щи, Пречи́стая, сро́днаго промышле́нія, е́же о на́съ, не пре́зри, мо́лимся: я́ко Тебе́ и еди́ну, христіа́не, ко Влады́цѣ, очище́ніе ми́лостивно предлага́емъ.

Инъ.

Ирмо́съ: Отъ но́щи невѣ́денія боговѣ́дѣніемъ просвѣти́вый концы́, просвѣти́ мя у́тромъ человѣколю́бія Твоего́, Го́споди.

Пусты́нное овча́ и вселе́ннѣй стяжа́ніе Предте́ча, дне́сь гото́витъ духо́вную трапе́зу на́мъ.

Сласте́й раба́ и зако́новъ престу́пника, обличи́лъ еси́, Іоа́нне, Ирода, Иродіа́ды го́рькаго рачи́теля.

Иродіа́да пля́шетъ, Іоа́ннъ вя́жется и закала́ется. О, пія́нства Иродова! О, несмы́сльства души́ его́!

Богоро́диченъ: Ра́дуйся, Боже́ственная Горо́, отъ Нея́же Ка́мень отсѣче́ся безъ ру́къ, Пречи́стая, усыри́вшися Бо́гу и Сло́ву, Всенепоро́чная, пло́тію.

Катава́сія: О, треблаже́нное Дре́во...

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

О за́повѣдехъ зако́на бѣ́дствуяй, блаже́нне, обличе́ньми наказу́еши беззако́новавшаго: не бы́лъ бо еси́ тро́сть, вра́жіихъ вѣ́тровъ коле́блема дунове́ньми.

Кро́вію закла́нія глава́ ка́плющи твоя́, принесе́ся блу́днымъ по́двигомъ вмѣ́сто мзды́, Ирода облича́ющи и по кончи́нѣ, я́ко естество́ смѣси́вша.

Въ пусты́няхъ ходя́, власы́ велбу́жи покрыва́емь, во о́вѣхъ у́бо я́ко свѣтосія́нно жи́лъ еси́ ца́рски, во о́вѣхъ же, я́ко ца́рску обнося́ красоту́, надъ страстьми́ воцари́лся еси́.

Богоро́диченъ: Да изба́вимся отъ лю́тъ прегрѣше́ній, моли́твами Твои́ми, Богороди́тельнице Чи́стая, и да улучи́мъ, Пресвята́я, Боже́ственное сія́ніе изъ Тебе́ неизрече́нно воплоще́ннаго Сы́на Бо́жія.

Инъ.

Ирмо́съ: Якоже проро́ка изба́вилъ еси́ изъ глубины́ преиспо́днія, Христе́ Бо́же, и мене́ отъ грѣхо́въ мои́хъ изба́ви, я́ко Человѣколю́бецъ, и упра́ви живо́тъ мо́й, молю́ся.

Усѣче́ніе честны́я и всехва́льныя твоея́ главы́, Предте́че Христо́въ, почита́юще, сла́вимъ твою́ приснохва́льную и всемíрную па́мять, преблаже́нне.

О, скве́рнаго гоще́нія! О, го́рькаго рожде́нія! О, пія́нства скве́рнаго Ирода беззако́ннаго! Содержи́мь бы́сть къ беззако́нію и облича́емь, проро́ка уби́ти поучава́ется.

Пляса́вши но́вая еги́птяныня посреди́ пи́ра скве́рнено, главу́ испроси́, сея́ обличи́вшую роди́тельницу и Иродову нало́жницу.

Богоро́диченъ: Иже ны́нѣ Сы́нъ Дѣ́вы, пе́рвѣе Сы́нъ Оте́чь показа́ся, не и́нъ разумѣва́емь, отъ ви́димаго, а́ще и пребы́сть еди́нъ во обою́ соверше́нъ.

Катава́сія: Во́днаго звѣ́ря во утро́бѣ...

Конда́къ, гла́съ 5:

Предте́чево сла́вное усѣкнове́ніе смотре́ніе бы́сть нѣ́кое Боже́ственное, да и су́щимъ во а́дѣ Спа́сово проповѣ́сть прише́ствіе. Да рыда́етъ у́бо Иродíя, беззако́нное убíйство испроси́вши: не зако́нъ бо Бо́жій, ни живы́й вѣ́къ возлюби́, но притво́рный, привре́менный.

Икосъ:

Рожде́ніе Иродово всѣ́мъ яви́ся непреподо́бно, егда́ посреди́ пита́ющихся глава́ постя́щагося предложи́ся, я́коже снѣ́дь: ра́дости совокупи́ся печа́ль, и смѣ́ху раствори́ся го́рькое рыда́ніе, я́ко главу́ Крести́телеву на блю́дѣ нося́, предъ всѣ́ми вни́де, я́коже рече́, отрокови́ца. И кля́твы ра́ди рыда́ніе нападе́ на вся́ возлежа́щія тогда́ съ царе́мъ: не бо́ обвесели́ о́нѣхъ, ниже́ Ирода самого́. Рече́ бо: оскорбѣ́ша печа́лію не и́стинною, но притво́рною, привре́менною.

Пѣ́снь 7.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще, поя́ху: благослове́нъ еси́, Бо́же оте́цъ на́шихъ.

Блу́днымъ жела́ніемъ, лю́тымъ же пія́нствомъ вооруже́нъ, прирази́вся, разсѣ́деся, къ воздержа́нія столпу́ непрекло́нному и цѣлому́дрія ко гра́ду неразруши́мому, Христо́ву Крести́телю, Иродъ беззако́нный.

Не ужасе́ся, Предте́че, не устыдѣ́ся, не ослабѣ́ науче́ная діа́воломъ, твою́ принося́щи честну́ю главу́ безсты́дно на блю́дѣ, наважде́ніемъ ма́тернимъ прельсти́вши у́мъ.

Яко свѣти́льникъ, просія́лъ еси́, предпосла́вся же, я́ко а́нгелъ; я́ко проро́къ, проповѣ́дуеши Агнца Бо́жія, я́вльшагося Христа́; я́ко му́ченикъ, мече́мъ во главу́ усѣ́клся еси́, предвозвѣща́я Того́ и су́щимъ во а́дѣ ме́ртвымъ.

Богоро́диченъ: Изба́вльшеся рождество́мъ Твои́мъ осужде́нія дре́вняго паде́нія, явле́нную вину́ свобожде́нія, Тя́, Ма́ти Дѣ́во, съ Сы́номъ Твои́мъ, да́вшимъ изба́ву о на́съ Себе́, при́сно сла́вимъ.

Инъ.

Ирмо́съ: Въ нача́лѣ зе́млю основа́вый и небеса́ сло́вомъ утверди́вый, благослове́нъ еси́ во вѣ́ки, Го́споди, Бо́же оте́цъ на́шихъ.

Зако́нъ Бо́жій проповѣ́дуя, Іоа́ннъ злочести́ваго не убоя́ся Ирода беззако́ннующаго уцѣлому́дрити: о́гнь бо бѣ́ въ не́мъ грѣха́ его́.

О, главы́, я́сно законополага́ющія и отъ земли́ Ироду провозглаша́ющія: не досто́итъ тебѣ́ беззако́ннующу багряни́цу носи́ти, я́ко мучи́тельскую оде́жду.

Ору́жіи скве́рными беззако́нный Иродъ вооружи́вся, съ кля́твою исполня́ше беззако́ніе, гоще́нія пія́нство имѣ́я та́мо, сво́инствующее тому́.

Богоро́диченъ: Безпло́тенъ сы́й — непрело́жно воплоти́ся; Безлѣ́тенъ сы́й — во вре́мени позна́ся отъ Дѣ́вы, всѣ́хъ Зижди́тель, несмѣ́сно пребы́въ, я́коже бѣ́, и бы́въ, я́коже не бѣ́.

Катава́сія: Безу́мное велѣ́ніе...

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Предтекíй рождество́ Твое́ и Боже́ственное страда́ніе, въ преиспо́днихъ мече́мъ быва́етъ проро́къ и вѣ́стникъ та́мошняго прише́ствія Твоего́, я́ко гла́съ Сло́ва Іоа́ннъ взыва́я: ме́ртвіи, — Животода́вца, слѣпíи, — Свѣтода́вца, плѣне́нніи, — Изба́вителя Христа́ превозноси́те во вся́ вѣ́ки.

Дѣви́ческаго рождества́ предте́къ отъ непло́дове, ны́нѣ во́льнаго вся́ Созда́вшего бы́сть распя́тія предше́ственникъ, усѣкнове́ніемъ главны́мъ су́щимъ во а́дѣ зовы́й: о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Главѣ́ твое́й отъ тѣлесе́ отъя́тѣ бы́вши, Предте́че, твое́ю пло́тію душа́ владя́щая отъ сея́ раздѣли́ся, но Божество́ отъ пло́ти Емману́ила не разлучи́ся отсю́ду, и ко́сть не сокруши́ся Бо́га и Влады́ки. Тѣ́мже превозно́симъ Его́ во вѣ́ки вся́.

Богоро́диченъ: Господороди́тельнице Пречи́стая, души́ моея́ я́звы и гное́нія ми́лостивною мольбо́ю Твое́ю, Дѣ́во, очи́сти и па́дша возста́ви. Спаси́ мя, Всенепоро́чная, блу́днаго, спаси́: Ты́ бо ми еси́ Предста́тельница и заступле́ніе, еди́на Чи́стая и Благослове́нная во вся́ вѣ́ки.

Инъ.

Ирмо́съ: На горѣ́ святѣ́й просла́вльшася, и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Проповѣ́давый Христо́во прише́ствіе су́щимъ во а́дѣ, вѣ́рою возвѣща́я, болѣ́зни рѣша́яй прихо́дитъ Госпо́дь сла́вы, Его́же превозно́симъ во вся́ вѣ́ки.

Въ темни́цѣ тя́ затвори́ Иродъ, Іоа́нне, втора́го Илію́, и желѣ́зными у́зы связа́въ, уби́, покая́нія и Ца́рствія вѣ́рнаго священнопроповѣ́дника.

О, трапе́зы, кро́ве испо́лненныя! О, снѣ́дей, убíйствомъ растворе́нныхъ! О, пи́ра, испо́лнена су́етства! О, безчеловѣ́чія и скверноубíйства Ирода беззако́ннаго!

Богоро́диченъ: Горѣ́ ве́сь и до́лѣ ве́сь, Сло́ве, въ нѣ́дрѣхъ Отчихъ и Ма́тере Твоея́, ве́сь Бо́гъ и ве́сь естество́мъ Человѣ́къ, еди́нъ ѵпоста́сію и сугу́бъ естество́мъ еси́, Ми́лостиве.

Катава́сія: Благослови́те, о́троцы...

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Устраши́ся по́лкъ лука́вый и сего́ предста́тель діа́волъ богосло́внаго твоего́, проро́че, язы́ка, Христа́ проповѣ́давшаго, и отрокови́цею скве́рною Ирода повину́ главу́ усѣщи́ твою́, но мы́ тя, Крести́теля, велича́емъ.

Удо́ль у́бо естества́ смире́на возвы́сися, и хо́лмъ смири́ся сме́ртныя горды́ни, гла́съ бо вопію́щаго воззва́ въ пусты́няхъ свѣ́та, во а́довыхъ жили́щахъ: врата́ возми́теся, Ца́рь бо всѣ́хъ вни́детъ.

Трепе́щутъ стра́сти человѣ́ческія и стра́хомъ отбѣга́ютъ де́мони, осѣне́ніемъ отъ Бо́га тебѣ́ да́нныя благода́ти. Но отъ обои́хъ искуше́ній ста́до твое́ изба́ви, Госпо́день Предте́че, вѣ́рою тя́ при́сно велича́ющее.

Богоро́диченъ: Напрязи́, и успѣва́й, и ца́рствуй, Сы́не Богома́тере, исма́ильтескія лю́ди покаря́я, борю́щія на́съ, Правосла́вному Импера́тору побѣ́ды да́руя на ва́рвары враги́, мольба́ми ро́ждшія Тя́, Сло́ве Бо́жій.

Инъ.

Ирмо́съ: Проявле́нное на горѣ́ законополо́жнику во огни́ и купинѣ́ рождество́ Приснодѣ́вы въ на́ше, вѣ́рныхъ, спасе́ніе пѣ́сньми немо́лчными велича́емъ.

Па́ки Іезаве́ль лику́етъ на Илію́, па́ки еги́птяныня Іо́сифа и́щетъ, Проро́ка же и Крести́теля Спа́сова — ны́нѣ я́вльшаяся Иродіа́да скверна́вая.

Во главу́ усѣ́ченъ бы́въ, Іоа́нне, отъ Ирода, су́щимъ во а́дѣ душа́мъ посла́лся еси́ проповѣ́дати Гряду́щаго, и тѣ́хъ спасти́ всѣ́хъ, пре́жде сконча́вшихся вѣ́рныхъ отъ Ада́ма.

Свѣти́льникъ Свѣ́та и гла́съ Сло́ва сы́й, проповѣ́дникъ Агнца Бо́жія, пусты́нное овча́, Іоа́нне, честны́й му́чениче Госпо́день, моли́ спасти́ся пою́щимъ тя́.

Богоро́диченъ: Еди́на въ жена́хъ по рождествѣ́ яви́лася еси́ Дѣ́ва, еди́на въ жена́хъ Ты́, Богороди́тельница, показа́лася еси́, еди́на разрѣши́ла еси́ отъ болѣ́зни Еву, и перворо́дную изсуши́ла еси́ кля́тву.

Катава́сія: Та́инъ еси́, Богоро́дице, ра́й...

Свѣти́ленъ. Подо́бенъ: Ученико́мъ зря́щимъ.

Во проро́цѣхъ бо́льша позна́на и апо́столъ предъизбра́нна бы́вша, пѣ́сньми похва́льными вѣнча́емъ Предте́чу благода́ти: во главу́ бо усѣ́ченъ бы́сть зако́на ра́ди Госпо́дня.

Сла́ва: Скве́рный Иродъ чистоты́ сади́телю, тебѣ́, Крести́телю Спа́совъ, главу́ усѣче́ льсти́внѣ, обличе́ній же твоего́ язы́ка посѣщи́ ника́коже возмо́же.

И ны́нѣ, богоро́диченъ: Яже кля́тву мірску́ю боже́ственнымъ рождество́мъ Твои́мъ, Чи́стая, потре́бльши, ста́до, Тебѣ́ моля́щееся вѣ́рно, отъ вся́кихъ бѣ́дъ изба́ви моли́твами Твои́ми, Отрокови́це.

На хвали́техъ стихи́ры на 4, гла́съ 8. Подо́бенъ: О, пресла́внаго чудесе́.

О, пресла́внаго чудесе́!* Свяще́нную главу́* и а́нгеломъ говѣ́йную,* нечи́стая блудни́ца ноша́ше, отрокови́ца,* обличи́вшую дѣя́ніе беззако́нно,* прелюбодѣ́йцѣ ма́тери принесе́.* О, неизрече́ннаго твоего́ терпѣ́нія, Человѣколю́бче!* Имже, Христе́, спаси́ ду́ши на́ша,* я́ко еди́нъ Благоутро́бенъ. [Два́жды.]

О, Иродова окамене́нія!* Обезче́стивый Бо́га* зако́нными преступле́ньми,* кля́твы соблюде́ніемъ ле́стнѣ лицемѣ́рствуетъ,* и къ прелюбодѣя́нію убíйство прилага́етъ,* сѣ́товати творя́йся.* О, неизглаго́ланнаго Твоего́ милосе́рдія, Влады́ко!* Имже, Христе́, спаси́ ду́ши на́ша,* я́ко еди́нъ Благоутро́бенъ.

О, па́че ума́ удивле́нія!* Проро́ковъ печа́ть,* земны́й а́нгелъ,* блу́дному пляса́нію показу́ется цѣна́,* богосло́вный язы́къ,* предпосыла́ется и су́щимъ во а́дѣ Христо́въ провозвѣ́стникъ.* О, несказа́ннаго Твоего́ промышле́нія, Влады́ко!* Имже, Христе́, спаси́ ду́ши на́ша,* я́ко еди́нъ Благоутро́бенъ.

Сла́ва, гла́съ 6:

Па́ки Иродíя бѣ́сится, па́ки смуща́ется. О, пляса́нія льсти́внаго, и пи́ра съ ле́стію! Крести́тель усѣка́шеся, и Иродъ смуща́шеся. Моли́твами, Го́споди, Твоего́ Предте́чи ми́ръ пода́ждь душа́мъ на́шимъ.

И ны́нѣ, богоро́диченъ: Богоро́дице, Ты́ еси́ лоза́ и́стинная...
Славосло́віе вели́кое.

По трисвято́мъ тропа́рь Предте́чи. Сла́ва, и ны́нѣ: Вся́, па́че смы́сла... Ектеніи́ и отпу́стъ. И дае́тся святы́й еле́й бра́тіи отъ канди́ла свята́го Предте́чи. И ча́съ 1-й. На 1-мъ часѣ́ тропа́рь и конда́къ Предте́чи, и коне́чный отпу́стъ.


НА ЛИТУРГІИ,

Блаже́нна отъ кано́на 1-го, пѣ́снь 3-я, на 4; и 2-го 6-я, на 4. Проки́менъ, гла́съ 7: Возвесели́тся пра́ведникъ о Го́сподѣ,* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ Дѣя́ній, зача́ло 33. Аллилу́ія, гла́съ 4: Пра́ведникъ я́ко фи́никсъ процвѣте́тъ, я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни во дво́рѣхъ до́му Бо́га на́шего процвѣту́тъ. Ева́нгеліе Ма́рка, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

На трапе́зѣ утѣше́ніе бра́тіи, кромѣ́ сы́ра, и яи́цъ, и ры́бы. Яди́мъ же два́жды дне́мъ, а́ще среда́ или́ пято́къ.


Зри́: Вѣ́домо же бу́ди, я́ко а́ще случи́тся пра́здникъ се́й въ недѣ́лю.

Предваря́етъ вся́ слу́жба воскре́сна на вече́рни, и на у́трени, и на литургíи.


Зри́ по́стнаго сего́ уста́ва на усѣкнове́ніе честны́я главы́ Предте́чевы, дре́вними святы́ми отцы́ въ се́й де́нь завѣща́ннаго.

Су́ть у́бо нѣ́цыи предаю́тъ, ка́честву бы́ти тогда́ снѣ́дей, а не посту́. О то́мъ бо не возмого́хомъ ничто́же обрѣсти́ напи́сано въ разли́чныхъ ти́пицѣхъ, но па́че досто́итъ въ то́й де́нь вся́ко воздержа́тися посто́мъ пострада́вшего ра́ди за и́стину проро́ка и проповѣ́давшаго во а́дѣ Го́спода. Разрѣше́нію же бы́ти то́чію на древяно́е ма́сло, и про́чая отъ разли́чныхъ ово́щнаго плода́, и по мѣ́рѣ еди́ной ча́шицѣ вина́ въ сла́ву Бо́жію, труда́ ра́ди бдѣ́ннаго. Вся́ко бо достои́тъ на́мъ въ то́й де́нь сѣ́тованіемъ уны́лымъ бы́ти, а не чревоугожде́ніе имѣ́ти воздержа́тельнаго ра́ди житія́ свята́го и скверноубíйственнаго кровопроли́тія его́ отъ Ирода. Поне́же усѣ́чена бы́сть глава́ Предте́чева на пиру́ пляса́ніемъ блу́дныя пляса́вицы, и чревоуго́діемъ, и разли́чныхъ живо́тныхъ закла́ніемъ, и кровопроли́тіемъ, на́мъ же ни еди́наго отъ таковы́хъ живо́тныхъ, изъ ни́хже кро́вь излива́ется, но ниже́ ры́бъ [кро́вь бо имѣ́ютъ, а́ще и въ водѣ́ жи́тельствуютъ, и отъ тва́рей живо́тныхъ су́ть], подоба́етъ вкуша́ти, да не соо́бщницы яви́мся Иродову чревоуго́дію. Ка́ко бо Крести́телево честно́е усѣкнове́ніе почти́ти восхо́щемъ? Мя́со ли хо́щемъ я́сти, или́ отъ ины́хъ разли́чныхъ бра́шенъ многоцѣ́нныхъ? А о́нъ живя́ше въ пусты́ни безво́днѣй и безтра́внѣй, ни хлѣ́ба ядя́ше, ни трапе́зы имя́ше. Вино́ ли піе́мъ? А о́нъ никогда́же пія́ше вина́, ни ина́го питія́ мірска́го. Ни въ хра́мѣхъ живя́ше, но подъ ка́менемъ вкопа́вся живя́ше. Сто́лъ, и трапе́за и о́дръ ему́ бя́ше земля́, ра́звѣ ра́ди ну́жды есте́ственныя еди́ною дне́мъ вкуша́ше акри́ды и ме́дъ ди́вій. Ча́ша же ему́ приго́рщи бя́ше, а питіе́ — изъ ка́мене теку́щая вода́. Тѣ́мже, бра́тіе, усе́рдно почти́мъ де́нь се́й моли́твою и посто́мъ въ цѣлому́дріи. Отбѣжи́мъ пія́нственнаго сего́ зла́го нра́ва. Аще бо кто́ невѣ́рствіемъ одержи́мь бу́детъ и узаконе́ннаго сего́ многоразсуди́тельнаго повелѣ́нія не сохрани́тъ, таковы́й злѣ́ па́губныя напа́сти постра́ждетъ. Пра́во содержа́щихъ же по́двигъ се́й, Го́споди, благослови́, упра́ви моли́твами свята́го Предте́чи.

Источникъ: Мине́я пра́здничная, имену́емая Анѳоло́гіонъ, содержа́щая слу́жбы Госпо́дскимъ и Богоро́дичнымъ пра́здникомъ и святы́мъ избра́ннымъ. — М.: Сѵнода́льная Тѵпогра́фія, 1901. — Л. 425 об. – 437.

/ Къ оглавленію раздѣла /


Наверхъ / Къ титульной страницѣ

0