Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 28-й де́нь.
Преподо́бного отца́ на́шего Моисе́я Му́рина.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: Му́ченицы Твои́.

Моисе́й многонаро́читый, мірско́е украше́ніе оста́вль му́дрѣ, болѣ́зньми воздержа́нія крѣ́пкими стра́сти покори́ плотскíя, и низложи́въ многоко́зненнаго, побѣ́ды вѣне́цъ прія́тъ. Того́ моли́твами, Го́споди, всѣ́мъ пода́ждь ве́лію ми́лость.

Воздержа́ніе изря́дное, стоя́ніе всено́щное, бдѣ́нное о́ко, у́мъ, смотря́ющь боже́ственныя добро́ты, имѣ́лъ еси́, блаже́нне Моисе́е, тѣ́мже исцѣле́ній благода́ть прія́лъ еси́, стра́сти цѣли́ти лю́тыя. Сего́ ра́ди тя́ мо́лимъ: испроси́, о́тче, всѣ́мъ ве́лію ми́лость.

Де́монскія ко́зни, и стрѣля́нія, и ловле́нія, боже́ственною покрыва́емь, Моисе́е, дла́нію, о́тче, проше́лъ еси́ невре́дно, и безстра́стіемъ украша́емь, всѣ́мъ преподо́бнымъ приче́лся еси́. Моли́ дарова́ти вѣ́рою чту́щимъ тя́ ве́лію ми́лость.

Сла́ва, и ны́нѣ, богоро́диченъ:

Помышле́нія нечи́ста и устны́ льсти́вы, дѣла́ же моя́ вся́ оскверне́на, и что́ сотворю́? Ка́ко усря́щу Судію́? Влады́чице Дѣ́во, моли́ Сы́на Твоего́, и Зижди́теля, и Го́спода, я́ко да въ покая́ніи пріи́метъ ду́хъ мо́й, я́ко еди́нъ Благоутро́бенъ.

Крестобогоро́диченъ:

Не терплю́, Ча́до, ви́дящи Тя́ на Дре́вѣ усну́вша, бо́дрость всѣ́мъ подаю́щаго, я́ко да и́же дре́вле преступле́нія плодо́мъ, сно́мъ поги́бельнымъ усну́вшимъ, боже́ственную и спаси́тельную бо́дрость пода́си, — Дѣ́ва глаго́лаше, пла́чущися, Юже велича́емъ.

На стихо́внѣ окто́иха. Сла́ва, и ны́нѣ, богоро́диченъ.

Тропа́рь, гла́съ 1:

Пусты́нный жи́тель, и въ тѣлеси́ а́нгелъ, и чудотво́рецъ яви́лся еси́, богоно́се о́тче на́шъ Моисе́е: посто́мъ, бдѣ́ніемъ, моли́твою небе́сная дарова́нія пріи́мъ, исцѣля́еши неду́жныя и ду́ши вѣ́рою приходя́щихъ ти́. Сла́ва Да́вшему тебѣ́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.


НА УТРЕНИ,
Оба кано́на окто́иха и свята́го на 4, гласъ 8.

Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Грызе́ніемъ грѣхо́внымъ помраче́нное се́рдце мое́ убѣли́, о́тче, покая́нія ту́чами, моли́твами твои́ми.

Стра́ху Влады́чню пло́ть пригвозди́въ, вся́ко помышле́ніе стра́стное отъ се́рдца, богоно́се преблаже́нне, изсуши́лъ еси́.

Въ бразда́хъ мы́сленныхъ скры́въ Сло́ва, о́тче, сѣ́мена, воздѣ́лалъ еси́ пшени́цу, въ сокро́вищахъ неистоща́емыхъ соблюда́ему.

Богоро́диченъ: Всего́ мя спаса́етъ Сло́во Пребоже́ственное бла́гостію, восхотѣ́въ изъ чре́ва Твоего́ воплоти́тися, Чи́стая Ма́ти Дѣ́во.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Ду́хомъ дви́жимь, духо́вными, му́дре, дѣя́ніи, терпя́, лука́вствія покори́лъ еси́ ду́хи.

Си́лою укрѣпля́емь богонача́льною, Моисе́е преподо́бне, крѣ́пкаго, я́ко безпло́тенъ, смири́лъ еси́ змíя.

Ту́чами сле́зъ твои́хъ, о́гненное опале́ніе страсте́й угаси́лъ еси́ и рѣка́ яви́лся еси́ дарова́ній, наполня́ема Ду́хомъ.

Богоро́диченъ: Имѣ́я Тя́ по́мощь, враго́въ стремле́нія, Чи́стая, не убою́ся: имѣ́я Тя́ Предста́тельницу, тѣ́хъ побѣжда́ю полки́.

Сѣда́ленъ, гла́съ 3. Подо́бенъ: Боже́ственныя вѣ́ры.

Боже́ственными сія́ніи разбогатѣ́въ, и тму́ разруши́лъ еси́ страсте́й, всеблаже́нне, и бо́дрыми моли́твами твои́ми увяди́лъ еси́ пло́ти возвыша́емая мудрова́нія, и къ го́рнему преше́лъ еси́ кра́йнему гра́ду. Отче преподо́бне, Христа́ Бо́га моли́ дарова́ти на́мъ ве́лію ми́лость.

Сла́ва, и ны́нѣ, богоро́диченъ:

Боже́ственнаго естества́ не отлу́чся, пло́ть бы́въ во чре́вѣ Твое́мъ, но Бо́гъ вочеловѣ́чся и пребы́сть, Иже по рождествѣ́ Ма́терь Тя́ Дѣ́ву, я́ко пре́жде рождества́, сохрани́въ Всенепоро́чну, еди́нъ Госпо́дь. Того́ прилѣ́жно моли́ дарова́ти на́мъ ве́лію ми́лость.

Крестобогоро́диченъ:

Нескве́рная Агница Сло́ва, Нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни Прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Любопло́тнаго де́мона непреста́нными, о́тче, мольба́ми и болѣ́зней придая́ньми отъ души́, преблаже́нне, отгна́лъ еси́.

Преложи́въ помышле́ніе къ су́щимъ па́че ума́ же и сло́ва, преподо́бне, воздержа́нія зно́й, я́коже боже́ственную ро́су, терпѣ́лъ еси́.

Вѣ́триломъ воскрили́вся нестяжа́нія, легко́ преплы́лъ еси́ жите́йское, о́тче, мо́ре, ко приста́нищу ти́хому направля́емь.

Богоро́диченъ: Дѣ́вства сосу́де и невмѣсти́маго естества́ селе́ніе, ду́шу мою́ просвѣти́ омраче́нную, Богоневѣ́сто.

Пѣ́снь 5.

Ирмо́съ: Утренююще вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́, ино́го не вѣ́мы.

Углемъ разжига́емь, блаже́нне, безстра́стія, ве́щь удобопа́льную страсте́й попали́лъ еси́.

Звѣзда́ воздержа́нія, высота́ми сія́я, яви́лся еси́, ду́ши на́ша просвѣща́я, пресла́вне.

На высоту́ добродѣ́телей возше́лъ еси́ и во о́стровъ дости́глъ еси́ небе́сный, о́тче Моисе́е досточу́дне.

Богоро́диченъ: Дѣ́ву по рождествѣ́ пое́мъ Тя́, Богоро́дице: Ты́ бо Бо́га Сло́ва пло́тію мíру родила́ еси́.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Но́щію мя́ грѣхо́вною и сласте́й омраче́ніемъ окруже́на, и́же въ тебѣ́ духо́вными сія́ніи всего́ просвѣти́, всего́ ко приста́нищу спасе́нія, о́тче, напра́ви.

Якоже пчела́ трудолюби́вая, со́томъ ума́ твоего́ цвѣ́ты добродѣ́телей собра́въ, источи́лъ еси́ сла́дость безсме́ртную, го́ресть, о́тче, де́монскую отгоня́щую.

Въ пусты́няхъ претерпѣва́я, вы́шній гра́дъ наслѣ́довалъ еси́, пло́ть порабоща́я поще́ньми, чу́дне, къ пи́щи неоскудѣва́емѣй и къ ра́йскимъ селе́ніемъ отше́лъ еси́.

Богоро́диченъ: Свяще́ніе у́мное и неприкоснове́нное очисти́лище, свѣти́льникъ златови́дѣнъ и трапе́зу одушевле́нну, Хлѣ́бъ носи́вшую жи́зни, Дѣ́во, вѣ́рніи, Тя́ имену́емъ.

Конда́къ, гла́съ 4:

Му́рины зауши́въ и ли́ца де́моновъ поплева́въ, мы́сленно просія́лъ еси́, я́коже со́лнце свѣ́тло, свѣ́томъ житія́ твоего́ и уче́ніемъ наставля́я ду́ши на́ша.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Ка́ла страсте́й очище́нъ, духо́вными блиста́яся сія́ньми, къ Свѣ́ту вои́стинну невеще́ственному преста́вился еси́, идѣ́же ли́цы, блаже́нне, по́стниковъ во вѣ́ки.

Вся́кія избѣ́глъ еси́ зло́бы, присво́ився же до́брымъ преложе́ніемъ, до́брымъ жела́ніемъ, невеще́ственно примѣси́лся еси́, вопія́, блаже́нне: Бо́же, благослове́нъ еси́.

Болѣ́зньми воздержа́нія безмѣ́рными болѣ́зненный изсуши́лъ еси́ грѣ́хъ, богоно́се, тѣ́мже безболѣ́зненное обрѣ́лъ еси́ благи́хъ наслажде́ніе, благословя́ твоего́ Влады́ку.

Богоро́диченъ: Се́, Юже рече́ Дѣ́ву Ду́хомъ вели́кій Иса́ія, во утро́бѣ Бо́га зача́тъ и ражда́етъ. Ему́же пое́мъ: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Моли́твами вжиля́емь, смире́ніемъ возвыша́емь, пра́вдою ду́шу облиста́я, любо́вію украша́емь, къ добродѣ́телей соверше́нію, къ явле́ннѣй, о́тче, восте́клъ еси́ высотѣ́, зовы́й Влады́цѣ: свяще́нницы, благослови́те, лю́діе, превозноси́те во вся́ вѣ́ки.

Че́рный тѣ́ломъ, ду́шу же свѣтлѣ́йшу со́лнечныхъ сія́ній стяжа́въ, де́моновъ очерни́ омраче́нная ли́ца, вѣ́рныхъ же просвѣща́етъ сердца́ свои́мъ подо́біемъ, те́плѣ пою́щихъ: лю́діе, превозноси́те Христа́ во вѣ́ки.

Смире́ніемъ всю́ду огражде́нъ, убѣжа́лъ еси́, о́тче, еѳіо́повъ мы́сленныхъ стрѣля́нія, о́бразъ же бы́лъ еси́ мона́хомъ къ боре́нію враго́въ, дѣ́лы же и словесы́, съ ни́ми взыва́я: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Па́че естества́ зачала́ еси́, па́че сло́ва родила́ еси́ Содѣ́теля человѣ́ческаго естества́, бы́вша Человѣ́ка, Отцу́ неразлу́чна, Влады́чице Чи́стая. Ему́же пое́тъ вся́ тва́рь: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Въ дѣ́лѣхъ вои́стинну благи́хъ жи́знь сконча́въ, пости́глъ еси́ благи́хъ исто́чникъ, и твоего́ жела́нія коне́цъ прія́лъ еси́, пра́зднующихъ же идѣ́же гла́съ съ хвале́ніемъ, ра́дуяся, всели́лся еси́, досточу́дне Моисе́е, о́тче преподо́бне.

Иска́паютъ, о́тче, сла́дость по́льзы болѣ́зней по́тове твои́, и го́ресть на́шу стра́стную отго́нятъ, источа́ютъ на́мъ исцѣле́нія мо́щи, и гное́нія зо́лъ и ду́шъ скве́рну очища́ютъ.

Вѣнцы́ вѣнча́ Христо́съ неувяда́ющими твою́ главу́, чу́дне, побѣди́вша тве́рдо полки́ міроде́ржца, и преподо́бныхъ лико́мъ преподо́бно приче́лся еси́. Съ ни́миже моли́ся изба́витися напа́стей чту́щимъ тя́.

Богоро́диченъ: Уста́вила еси́ еди́на въ жена́хъ кля́тву первозда́нныхъ, Богоневѣ́сто, Неопи́санна пло́тію ро́ждши опису́ема, обнови́ла еси́ зако́ны естества́, Нескве́рная, разстоя́щая пе́рвѣе, пресла́внымъ хода́тайствомъ Твои́мъ соедини́ла еси́.

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1863. — Л. 137 – 138 об.

/ Къ оглавленію раздѣла /


Наверхъ / Къ титульной страницѣ

0