Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 8.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 28-й де́нь.
Слу́жба преподо́бному отцу́ на́шему Іову, Поча́евскому чудотво́рцу.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 7:

Яви́ся де́нь благоволе́нія Бо́жія и пра́здникъ весе́лія, стеце́мся у́бо, вѣ́рніи, на го́ру Поча́евскую и воспои́мъ всеблаже́ннаго Іова, честну́ю па́мять того́ соверша́юще.

Дрема́нія вѣ́ждома, ниже́ сна́ очи́ма твои́ма да́лъ еси́, преподо́бне, бо́дренными моли́твами и по́стническимъ житіе́мъ Го́сподеви угожда́я, тѣ́мже ра́достно соверша́емъ па́мять твою́, всече́стне.

Пріиди́те, вѣ́рніи, на святу́ю го́ру Поча́евскую, идѣ́же уго́дникъ Бо́жій подвиза́ся въ житіи́ свое́мъ и отъ си́лы въ си́лу восхожда́ше, и тому́ ны́нѣ помо́лимся, да во оби́телѣхъ небе́сныхъ водвори́вся, мо́лится ко Го́споду о спасе́ніи ду́шъ на́шихъ.

Не мо́жетъ гра́дъ укры́тися, верху́ горы́ стоя́, ты́ же, преподо́бне, а́ще и въ те́мнѣй ка́меннѣй пеще́рѣ почива́еши нетлѣ́ннымъ тѣ́ломъ твои́мъ, оба́че всѣ́хъ призыва́еши на го́ру Поча́евскую, свѣ́тлаго ра́ди пра́здника твоего́, моля́ Христа́ Бо́га спасти́ся душа́мъ на́шимъ.

Сла́ва, и ны́нѣ, богоро́диченъ, гла́съ 6:

Всесвята́я Богоро́дице, во вре́мя живота́ моего́ не оста́ви мене́, человѣ́ческому предста́тельству не ввѣ́ри мя́, но Сама́ заступи́ и поми́луй мя́.

На стихо́внѣ стихи́ры, гла́съ 6:

Па́мять твою́ дне́сь пра́зднующе, преподо́бне о́тче на́шъ Іове, вопіе́мъ ти́: со а́нгелы предстоя́ въ дерзнове́ніи мно́зѣ, о всѣ́хъ на́съ, о́тче, моли́ся ко Влады́цѣ Христу́.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Утро и де́нь свѣ́телъ тво́й пра́здникъ яви́ся, просвѣща́я на́ша сердца́, вѣ́рою хва́лящихъ честны́я твоя́ по́двиги, о́тче на́шъ Іове.

Сти́хъ: Честна́ предъ Го́сподемъ сме́рть преподо́бныхъ Его́.

Яко со́лнце на земли́ обрѣ́тъ всечестну́ю ико́ну Бо́жія Ма́тере на горѣ́ Поча́евстѣй, всесвѣ́тлая звѣзда́ тоя́ показа́лся еси́, тѣ́мже и на́съ, пою́щихъ тя́, свѣ́томъ богоразу́мія озари́, моли́твами Богоро́дицы, Іове, о́тче на́шъ.

Сла́ва, и ны́нѣ, гла́съ то́йже:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.

Тропа́рь, гла́съ 4:

Многострада́льнаго пра́отца долготерпѣ́ніе стяжа́въ, Крести́телеву воздержа́нію уподобля́яся, боже́ственныя же ре́вности обою́ пріобща́яся, тѣ́хъ имена́ досто́йно прія́ти сподо́бился еси́, и и́стинныя вѣ́ры бы́лъ еси́ проповѣ́дникъ безбоя́зненъ; тѣ́мже мона́ховъ мно́жества ко Христу́ приве́лъ еси́, и вся́ лю́ди въ Правосла́віи утверди́лъ еси́, Іове преподо́бне о́тче на́шъ, моли́ спасти́ся душа́мъ на́шимъ.

Сла́ва, и ны́нѣ: Еже отъ вѣ́ка утае́нное...



НА ВЕЛИЦѢЙ ВЕЧЕРНИ,
На Го́споди воззва́хъ: стихи́ры на 8, гла́съ 1:

Пріи́де де́нь па́мяти твоея́, Іове пресла́вне, и Волы́нская земля́ ра́дости исполня́ется, я́ко твои́мъ науче́ніемъ во Правосла́віи утверди́вшися и твои́ми по́двиги благоче́стію научи́вшися, на твоя́ же моли́твы упова́ющи: и́миже, о́тче преподо́бне, испроси́ мíрови ми́ръ и душа́мъ на́шимъ ве́лію ми́лость. [Два́жды.]

Во сла́внѣй па́мяти твое́й, уго́дниче Христо́въ, мона́шестіи собо́ри ликовству́ютъ и о богоуго́днѣмъ житіи́ ре́вностію распала́ются, твои́мъ же нетлѣ́ннымъ моще́мъ покланя́ющеся, я́ко живу́щему ти́ съ на́ми восклица́ютъ: о́тче Іове, ми́лостиве и богоувѣ́тливе, испроси́ у Го́спода мíрови ми́ръ и душа́мъ на́шимъ ве́лію ми́лость.

Кто́ не подиви́тся твоему́ долготерпѣли́вому житію́, о́тче преподо́бне? Во тріе́хъ бо оби́телехъ твоя́ пресла́вная дѣя́нія проповѣ́дашася, по́стъ же, и сле́зы, и бдѣ́ніе, въ пеще́рѣ себе́ заключе́ніе и во все́мъ себе́ непощадѣ́ніе, но ко бра́тіи любо́вь ми́лующая, та́темъ проще́ніе и всѣ́мъ лю́демъ до́брое науче́ніе.

Ины стихи́ры, гла́съ 2:

Кíими похва́льными вѣнцы́ увязе́мъ преподо́бнаго Іова, вѣ́ры Правосла́вныя учи́теля и ратобо́рца, Боже́ственныхъ Писа́ній глаша́тая, оте́ческихъ же Преда́ній списа́теля, но и тя́жкихъ слу́жбъ исполни́теля, земли́ копа́ніемъ и древе́съ сажде́ніемъ себе́ смиря́вшаго и всѣ́мъ о́бразъ послуша́нія бы́вшаго? Сего́ ны́нѣ нетлѣ́нною сла́вою вѣнча́етъ Христо́съ Бо́гъ на́шъ, имѣ́яй ве́лію ми́лость. [Два́жды.]

Кíими досто́йными благодаре́ньми просла́вимъ Іова, Поча́евскую похвалу́ и всея́ страны́ Россíйскія украше́ніе? То́й бо моли́твами свои́ми небе́сный свѣ́тъ въ пеще́ру низведе́, то́й и по преставле́ніи свое́мъ съ небесе́ явля́ется и моли́тву возно́ситъ о напа́ствуемыхъ лю́дехъ. Та́мо бо сла́вою вѣнча́етъ его́ Христо́съ Бо́гъ на́шъ, имѣ́яй ве́лію ми́лость.

Кíими умиле́нными слеза́ми сокруши́мъ растлѣ́нная сердца́ на́ша, зря́ще Іова нетлѣ́нное тѣ́ло, е́же по сме́рти, а́ки жи́во, сохраня́ется, но во вре́мя житія́ его́, а́ки ме́ртво, пребыва́ше, посто́мъ и бдѣ́ніемъ изнуря́емо? Того́ у́бо подвиго́мъ подража́ти потщи́мся, да и на́съ во гряду́щемъ житіи́ поми́луетъ Христо́съ Бо́гъ на́шъ, имѣ́яй ве́лію ми́лость.

Сла́ва, гла́съ 3:

Твои́мъ словесе́мъ, Го́споди, послѣ́довалъ Іовъ преподо́бный, вся́ кра́сная мíра сего́ во уме́ты вмѣни́лъ е́сть, и о ю́ности свое́й неради́въ, измла́да мона́шескому послуша́нію вдаде́ся, тѣ́мже де́монскія ко́зни побѣди́въ, адама́нтъ крѣ́покъ правосла́внаго благоче́стія яви́лся е́сть, всю́ же страну́ сію́ свои́ми по́двиги просвѣща́етъ. Того́ моли́твами ду́ши на́ша пощади́, и да́руй на́мъ по́мыслъ до́брый е́же пре́жде конца́ покая́нія.

И ны́нѣ, богоро́диченъ: Ка́ко не диви́мся...

Вхо́дъ, и чте́нія три́ преподо́бническая.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе. [Глава́ 4.]

Пра́ведникъ а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть и живы́й посредѣ́ грѣ́шникъ преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая, и паре́ніе по́хоти премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше, и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма и свята́го двѣ́, гла́съ 8:

Пріиди́те, вси́ слове́нстіи собо́ри, просла́вимъ о́бщаго спасе́нія рачи́теля и е́реси безбоя́зненнаго обличи́теля, ни́щихъ пита́теля и грѣ́шниковъ кро́ткаго вразуми́теля, Па́влову ре́вность о лю́дѣхъ яви́вшаго и дерзнове́ніе ве́ліе ко Го́споду стяжа́вшаго; то́й бо и по преставле́ніи свое́мъ боля́щія исцѣля́етъ и дерзнове́нная наше́ствія ва́рваръ отгоня́етъ, на́съ же умиле́нными по́мыслы исполня́етъ и мо́лится при́сно о спасе́ніи ду́шъ на́шихъ.

Сла́ва, гла́съ 2:

Дне́сь лику́етъ твоя́ Ла́вра, преподо́бне о́тче Іове, и вси́ лю́діе твоя́ мо́щи лобыза́ти подвиза́ются, де́мони твоея́ благода́ти трепе́щутъ, и а́нгели о твое́мъ заступле́ніи ра́дуются. Мы́ же непреста́нно вопіе́мъ: утверди́ твои́ми моли́твами правосла́вныхъ вѣ́ру, житіе́ на́ше испра́ви и спасе́ніе испроси́ душа́мъ на́шимъ.

И ны́нѣ:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.

На стихо́внѣ стихи́ры, гла́съ 5:

Ра́дуйся, свяще́нная главо́, Іове, Волы́нскія страны́ украше́ніе, ту́ю бо зри́ши въ Правосла́внѣй вѣ́рѣ утвержда́ему, тебѣ́, я́ко жи́ву сущу, моля́щуюся и заступле́нія на де́моны прося́щую, е́йже бу́ди засту́пникъ необори́мый и о все́мъ мíрѣ моли́твенникъ.

Сти́хъ: Честна́ предъ Го́сподемъ сме́рть преподо́бныхъ Его́.

Ра́дуйся, свяще́нная главо́, преподо́бне Іове, звѣздо́ отъ Га́лицкія земли́ къ восто́ку прише́дшая и немощны́хъ ду́ши обо́дрившая, во смире́ніи свое́мъ дерзнове́нію проти́ву е́реси лю́ди россíйскія наста́вившая и къ небе́сному Ца́рствію приве́дшая, его́же и на́съ сподо́би предста́тельствомъ твои́мъ, и о все́мъ мíрѣ бу́ди моли́твенникъ.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Ра́дуйся, свяще́нная главо́, надъ Волы́нскою страно́ю Го́сподемъ вознесе́нная, е́йже повину́шася кня́зи и лю́діе; мы́ же, духо́вная твоя́ ча́да, се́рдцемъ сокруше́ннымъ къ тебѣ́ припа́дающе, про́симъ ко одолѣ́нію страсте́й твоея́ по́мощи, въ ско́рбехъ благоду́шія, и о сме́ртномъ часѣ́ па́мяти непреста́нныя, и о все́мъ мíрѣ моли́твъ твои́хъ, Іове преподо́бне.

Сла́ва, гласъ 8:

Мона́ховъ мно́жества, наста́вника тя́ почита́емъ, о́тче на́шъ Іове, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ и вра́жію обличи́лъ еси́ си́лу, а́нгеловъ собесѣ́дниче и преподо́бныхъ соприча́стниче и пра́ведныхъ, съ ни́ми же моли́ся Го́сподеви, поми́ловатися душа́мъ на́шимъ.

И ны́нѣ, богоро́диченъ: Безневѣ́стная Дѣ́во...


Тропа́рь, гла́съ 4: Многострада́льнаго пра́отца долготерпѣ́ніе стяжа́въ.., два́жды [пи́санъ на ма́лѣй вече́рни] и Богоро́дице Дѣ́во.., еди́ножды.


НА УТРЕНИ,
На Бо́гъ Госпо́дь: тропа́рь преподо́бному, два́жды. Сла́ва, и ны́нѣ, богоро́диченъ.

По 1-й каѳи́смѣ сѣда́ленъ, гла́съ 4:

Зва́нію Госпо́дню послѣ́довавъ, роди́тельскій до́мъ оста́вилъ еси́ и отъ тѣ́снаго житія́ на тѣснѣ́йшее преходи́лъ еси́, но се́рдце твое́ вся́, притека́ющія къ тебѣ́, не тѣ́сно вмѣща́ше, тѣ́мже духо́вная ча́да твоя́ умно́жишася и о Го́сподѣ возвесели́шася. Его́же моли́, о́тче на́шъ Іове, спасти́ся вѣ́рою чту́щимъ святу́ю па́мять твою́. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее страстьми́ земноро́дныхъ ме́ртвенное существо́ и воздви́гла еси́ вся́ отъ сме́рти къ жи́зни нетлѣ́нія. Тѣ́мже Тя́ по до́лгу блажи́мъ вси́, Дѣ́во Препросла́вленная, я́коже прорекла́ еси́.

По 2-й каѳи́смѣ сѣда́ленъ, гла́съ 5:

Пеще́рнаго затво́рника и бдѣ́ннаго моли́твенника почти́мъ, преподо́бнаго Іова, отъ младе́нства до ста́рости себе́ смиря́вшаго и Святу́ю Це́рковь просла́вльшаго, та́ти и злодѣ́и къ покая́нію приве́дшаго и те́плѣ моля́щася о душа́хъ на́шихъ. [Два́жды.]

Сла́ва, и ны́нѣ, богоро́диченъ:

Ужа́сно чу́до зача́тія и несказа́ненъ о́бразъ рождества́ въ Тебѣ́ позна́ся, Приснодѣ́во Чи́стая, ужаса́етъ мо́й у́мъ и удивля́етъ помышле́ніе: сла́ва Твоя́, Богоро́дице, всѣ́мъ простре́ся, во спасе́ніе ду́шъ на́шихъ.

[Поліеле́й и велича́ніе:

Ублажа́емъ тя́, преподо́бне о́тче на́шъ Іове, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.]

Псало́мъ избра́нный преподо́бному: Терпя́ потерпѣ́хъ Го́спода, и вня́тъ ми́ и услы́ша моли́тву мою́.

По поліеле́и сѣда́ленъ, гла́съ 8:

Па́стырскую му́дрость смиренному́дріемъ стяжа́въ, мно́гимъ бы́лъ еси́ учи́тель: мона́хомъ оте́цъ, и скорбя́щимъ утѣ́шитель, и моли́твы Іису́совы неумолка́яй орга́нъ. Тѣ́мже моще́й нетлѣ́ніемъ просла́ви тя́ мздовоздая́тель Госпо́дь, Его́же непреста́нно моли́, прегрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, всесвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíру и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́, дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ Богоро́дицѣ на 6 и преподо́бному на 8, по а́збуцѣ.

Кано́нъ преподо́бному и богоно́сному Іову, Поча́евскому чудотво́рцу, гла́съ 8.
Пѣ́снь 1.

Ирмо́съ: Посѣ́ченный несѣко́маго пресѣче́, и ви́дѣ со́лнце зе́млю, ю́же не ви́дѣ; лю́таго врага́ вода́ потопи́, и непроходи́мое про́йде Изра́иль; пѣ́снь же воспѣва́шеся: Го́сподеви пои́мъ, сла́вно бо просла́вися.

Ангела земна́го и небе́снаго человѣ́ка, Іова преподо́бнаго, Волы́нскую похвалу́, досто́йно воспѣ́ти помози́ ми, Сло́ве Бо́жій, презира́я моя́ прегрѣше́нія и подава́я сло́во усто́мъ мои́мъ.

Бы́лъ еси́, преподо́бне, вои́стинну мíру свѣти́льникъ пресвѣ́телъ, всѣ́мъ пу́ть спасе́нія показу́яй; тѣ́мже и мнѣ́ бу́ди помо́щникъ, во е́же просла́вити житіе́ твое́ и умиле́ніе стяжа́ти.

Въ дому́ роди́телей твои́хъ пе́рвѣе позна́лъ еси́ Го́спода, Іове сла́вне, и о́трокъ сы́й, ра́зумъ соверше́нъ показа́лъ еси́, егда́ мона́шеское житіе́ изво́лилъ еси́, вся́ же жите́йская преоби́дѣвъ, еди́наго Бо́га возлюби́лъ еси́.

Горѣ́ о́чи твои́ и ду́шу вознося́, во оби́тели Уго́рництѣй бра́тію въ богоуго́днѣмъ житіи́ ско́ро превозше́лъ еси́, ху́ждша всѣ́хъ себе́ помышля́я и тѣ́мъ лу́чшій Іису́су явля́яся, ста́рцемъ же и ю́нымъ о́бразъ бы́въ прелюбе́знѣйшій.

До́брѣ тя́ на діа́волы во́инствовавши помышля́я, преподо́бне, своея́ стыжду́ся лѣ́ности, и мно́жества грѣхо́въ мои́хъ ужаса́юся: но твои́ми, свя́те, моли́твами да́руй ми́ жела́ніе благо́е, во е́же про́чее вре́мя житія́ моего́ въ покая́ніи сконча́ти.

Богоро́диченъ: Яко Бо́жія Ма́ти дерзнове́ніе иму́щи къ ро́ждшемуся изъ Тебе́, Единоро́дному Сло́ву, и Отцу́ Собезнача́льному, и Соесте́ственному Ду́ху, моля́щи не преста́й отъ бѣ́дъ спасти́, Всенепоро́чная, Тя́ Богоро́дицу сла́вящія.

Катава́сія по уста́ву.

Пѣ́снь 3.

Ирмо́съ: Утверди́ся се́рдце мое́ въ Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Есть во мнѣ́, о́тче преподо́бне, до́браго исправле́нія жела́ніе, но искуше́нія лѣ́ности побѣжда́ти не навыко́хъ, увы́ мнѣ́. Оба́че на по́мощь твою́ надѣ́яся, уны́нія по́мыслы отгоня́ю, на твоя́ же взира́ю сла́вныя по́двиги.

Желѣ́зо нарече́ся ро́дъ тво́й, Іове преподо́бне, крѣ́пость души́ твоея́ предуказу́я; въ пеще́рѣ ка́меннѣй заключи́вся, я́ко зла́то сокрове́но, освяти́лъ еси́ мѣ́сто по́двигъ твои́хъ, и го́ру Поча́евскую, я́ко стѣ́ну мѣ́дяну, проти́ву враго́въ Правосла́вія яви́лъ еси́.

Зѣло́ углуби́шася помышле́нія твоя́, я́же о небе́снѣмъ Ца́рствіи, егда́, еще́ о́трокъ сы́й, а́нгельскій о́бразъ воспрія́лъ еси́; тѣ́мже и свяще́нникъ бы́въ Бо́гу вѣ́ренъ, да́же ны́нѣ моле́нія о лю́дѣхъ возно́сиши, Іове преподо́бне.

Земля́ Га́лицкая ю́ностію твое́ю сла́вится, и Ду́бенская оби́тель му́жескія по́двиги твоя́ благовѣству́етъ, оби́тель же Поча́евская ста́ростію твое́ю хва́лится и блаже́нною кончи́ною весели́тся, вся́ же вселе́нная о чудесѣ́хъ твои́хъ ра́дуется и ликовству́етъ.

Иже подае́ши блага́я всѣ́мъ, моля́щимся тебѣ́, и мене́ припа́дающа не отри́ни, свя́тче, но покая́ніе мое́ зря́, да́ждь ми́ житія́ исправле́ніе, ре́вность же вдохни́, е́же подража́ти твои́мъ боголюби́вымъ дѣя́ніемъ.

Богоро́диченъ: Умерщвле́нный мо́й у́мъ, живо́тнымъ дѣ́йствомъ изъ Тебе́ Явльшимся мíру, воздви́гни, Чи́стая, и къ жи́зни наста́ви, Яже сме́рти две́ри разо́ршая Еди́на Рождество́мъ Твои́мъ.

Сѣда́ленъ, гла́съ 8:

Дне́сь исполня́ется ра́дости оби́тель Поча́евская, твое́ боголюби́вое житіе́ прославля́ющи; дне́сь христоимени́тіи лю́діе ре́вностію спасе́нія просвѣща́ются, зря́ще нетлѣ́ніемъ просла́вленныя мо́щи твоя́, преподо́бне; дне́сь грѣхо́вныя отгоня́ются стра́сти, и по́мыслы покая́нія ду́ши на́ша объе́млютъ, въ ни́хже утверди́ всѣ́хъ, пресла́вне, вѣ́рно почита́ющихъ па́мять твою́. [Два́жды.]

Сла́ва, и ны́нѣ, богоро́диченъ:

Яко Всенепоро́чная Невѣ́ста Творца́, я́ко Неискусому́жная Ма́ти Изба́вителя, прія́телище я́ко су́щи Утѣ́шителя, Всепѣ́тая, беззако́нія мя́ су́ща скве́рное оби́телище и де́моновъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, Свѣтоно́сная Нетлѣ́нная, отжени́ о́блакъ страсте́й, и Вы́шняго прича́стія сподо́би, и Свѣ́та невече́рняго моли́твами Твои́ми.

Пѣ́снь 4.

Ирмо́съ: Проро́къ Авваку́мъ у́мныма очи́ма прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́.

Іове преподо́бне, о всѣ́хъ моли́твенникъ бу́ди те́плый, твоему́ заступле́нію вѣ́рующихъ, свое́ же окаява́ющихъ житіе́ и на Бо́жіе милосе́рдіе упова́ющихъ, а́ще и прельще́ньми житія́ сего́ вла́ющихся.

Кто́ отъ человѣ́къ не подиви́тся долготерпѣли́вому житію́ твоему́, о́тче? Кто́ ли не просла́витъ твоея́ о Правосла́віи ре́вности? Ты́ бо, я́ко адама́нтъ крѣ́покъ, еретико́мъ противоста́лъ еси́, и и́стинныя вѣ́ры проповѣ́даніе словесы́ же и писа́ньми всѣ́мъ препо́далъ еси́.

Льва́ рыка́юща и и́щуща поглоти́ти ду́ши спаса́емыхъ моли́твою твое́ю побѣди́лъ еси́, о́тче, но и тому́ служа́щія лю́ди въ покая́ніе приводи́лъ еси́, та́ти милосе́рдіемъ твои́мъ постыжда́я и вразумля́я, граби́тели же обличе́ньми устраша́я и вся́ науча́я спаси́тельному покая́нію.

Мра́къ души́ моея́, о́тче, предста́тельствомъ твои́мъ разсѣ́й и свѣ́томъ за́повѣдей Госпо́днихъ просвѣти́ мое́ окая́нное се́рдце, да и а́зъ, твои́мъ ученико́мъ послѣ́дуя, тѣ́хъ ча́сти лише́нъ не пребу́ду, твою́ восхваля́я святу́ю па́мять.

Богоро́диченъ: Бо́га, изъ Тебе́ воплоще́ннаго моли́, непрело́жно, е́же бѣ́, пребы́вша, и есте́ственно ра́вна Отцу́, и Ду́ху сопресто́льна, проще́ніе прегрѣше́ній и ду́шъ спасе́ніе пою́щимъ Тя́ вѣ́рою дарова́ти.

Пѣ́снь 5.

Ирмо́съ: Мра́къ души́ моея́ разжени́, Свѣтода́вче Христе́ Бо́же, началоро́дную тму́ изгна́въ бе́здны, и да́руй ми́ свѣ́тъ повелѣ́ній Твои́хъ, Сло́ве, да у́тренюя, сла́влю Тя́.

На́шъ еси́ вои́стинну предста́тель и чудотво́рецъ пресвѣ́тлый, — взыва́ше Діони́сій, обрѣты́й мо́щи твоя́, тлѣ́нію неприча́стны; мы́ же, сія́ лобыза́юще, вопіе́мъ: на́шихъ скве́рнъ не возгнуша́йся, уго́дниче Бо́жій, но твои́ми моли́твами сія́ очи́сти.

Оправда́ніемъ Бо́жіимъ отъ ю́ности, о́тче, науча́емь, суеты́ жите́йскія уклони́тися крѣ́пко возжела́лъ еси́, безмо́лвіе же возлюби́лъ еси́: оба́че велѣ́нію Христо́ву не противля́яся, притека́ющія къ тебѣ́ пра́вому исповѣ́данію и ева́нгельскому житію́ науча́лъ еси́.

Предста́тель яви́лся еси́ и по преставле́ніи твое́мъ стра́ждущимъ и скорбя́щимъ человѣ́комъ: та́ко бо тя́ ви́дѣша лю́діе, изъ гро́ба твоего́ исходя́ща и со а́нгелы посредѣ́ це́ркве моля́щася. О, чу́до пресла́вное вои́стинну! О, ра́дость вѣ́рнымъ и утвержде́ніе!

Рачи́тель бы́въ небе́снаго Ца́рствія, о свое́мъ та́мо вхожде́ніи извѣству́ешися и кромѣ́ болѣ́зни и стра́ха пресе́льникъ явля́ешися лу́чшія жи́зни, бра́тіи же твоея́ учи́тель и упова́ніе.

Сопу́тникъ житію́ моему́ бу́ди, о́тче Іове, моли́твою твое́ю огражда́й многомяте́жную мою́ ду́шу и введи́ ю́ въ небе́сное Ца́рство, твои́ми умиле́нную по́двиги, Христу́ же покая́нныя принося́щую сле́зы.

Богоро́диченъ: Тя́ стѣ́ну иму́ще и предста́тельствомъ Твои́мъ соблюда́еми, Твое́ю боже́ственною сла́вою хва́лящеся, Тя́ блажи́мъ: Ты́ бо, Всечи́стая, душа́мъ на́шимъ источа́еши весе́ліе и ра́дованіе.

Пѣ́снь 6.

Ирмо́съ: Іо́ну въ ки́тѣ, Го́споди, еди́наго всели́лъ еси́, мене́ же свя́зана мре́жами вра́жіими, я́ко отъ тли́ о́наго, спаси́.

Тве́рдое упова́ніе на предста́тельство твое́ возлага́ю, преподо́бне, и вѣ́рою молю́ся: да́ждь ми́ страсте́й лю́тыхъ одолѣ́ніе, сме́рти же непреста́нную па́мять и блаже́нства жела́ніе гряду́щаго вѣ́ка.

Утвержда́ется тобо́ю, преподо́бне, Свята́я Це́рковь, е́ресь же вся́кая посрамля́ется, обличе́ніе иму́щи твоя́ многоцѣле́бныя мо́щи, и житія́ твоего́ столѣ́тняго труды́, и болѣ́зни, и сле́зы, и по́стъ, и пло́ти отъ косте́й отпаде́ніе.

Фарао́на мы́сленнаго побѣжда́ше Іовъ преподо́бный, послуша́нію всегда́ прилѣжа́ и обурева́емымъ на по́мощь приходи́ти не отрица́яся, и та́ко три́ оби́тели уче́ніемъ свои́мъ просвѣти́въ и по́двиги мно́гими просла́вивъ, веселя́ше Спа́са всѣ́хъ, Человѣколю́бца.

Христо́ву смире́нію подража́ше Іовъ, егда́ нача́льство, я́ко служе́ніе всѣ́мъ прія́тъ, и игу́менъ сы́й, въ тя́жкихъ слу́жбахъ подвиза́шеся, бра́тіи же бя́ше о́бразъ кро́тости, и трудолю́бія пра́вило, и о моли́твѣ при́сное напомина́ніе.

Отъ скве́рныхъ изба́ви мя́ страсте́й твои́ми моли́твами, тѣ́хъ одолѣ́ніе мнѣ́ подава́я Боже́ственныя по́мощи при́снымъ призыва́ніемъ, и на себе́ ненадѣ́яніемъ, и бра́та моего́ неосужде́ніемъ.

Богоро́диченъ: Вознесла́ еси́ всеи́стинно па́дшееся человѣ́ческое существо́ во зра́цѣ Боже́ственнѣмъ, и Отца́ въ ра́венствѣ, ви́димаго Сы́на неизмѣ́ннаго, Богома́ти, безъ сѣ́мене во чре́вѣ поноси́вши.

Конда́къ, гла́съ 4. Подо́бенъ: Яви́лся еси́ дне́сь вселе́ннѣй.

Яви́лся еси́ и́стинныя вѣ́ры сто́лпъ, ева́нгельскихъ же за́повѣдей ревни́тель, горды́ни обличе́ніе, смире́ннымъ же предста́тель и науче́ніе: тѣ́мже и ублажа́ющимъ тя́ грѣхо́въ отпуще́ніе испроси́ и оби́тель твою́ невреди́му сохрани́, Іове о́тче на́шъ, многострада́льному подо́бный.

Икосъ:

Отве́рзи уста́ твоя́, пеще́ро ка́менная, и рцы́ на́мъ, колькра́ты то́ки сле́зъ Іовлихъ омочи́лася еси́, ка́ко того́ воздыха́нія твои́хъ стѣ́нъ не расторго́ша, ка́ко свѣ́тъ Боже́ственный тебе́ не сожже́, ка́ко а́нгели бдѣ́ннымъ подвиго́мъ Іовлимъ диви́шася, тѣ́ми бо освяти́ся земля́ Га́лицкая и Волы́нская? Мы́ же, сія́ вся́ помышля́юще, слеза́ми умиле́нія о́чи на́ши исполня́емъ: е́сть бо преподо́бный Іовъ уго́дникъ ди́вный, многострада́льному подо́бный.

Пѣ́снь 7.

Ирмо́съ: На по́ли Деи́рѣ иногда́ мучи́тель пе́щь поста́ви на муче́ніе богоно́сныхъ, въ не́й же тріе́ о́троци пѣсносло́вяху Еди́наго Бо́га, тро́ично воспѣва́ху, глаго́люще: отце́въ Бо́же, благослове́нъ еси́.

Царя́ правосла́внаго, тя́ блажа́ща, преподо́бне Іове, укрѣпи́ на враги́ и о Це́ркви ми́рная глаго́ли въ се́рдце его́, на́мъ же всѣ́мъ единомы́сліе испроси́ у Бо́га, и дру́гъ ко дру́гу любо́вь, и о Правосла́віи ре́вность.

Ча́шу житія́ Твоего́ пи́ти, Го́споди, не могу́ а́зъ, окая́нный, боя́знію скорбе́й обурева́емь и страсте́й сплета́емь те́рніемъ, оба́че молю́ся: Іова, Твоего́ уго́дника, моли́твами поми́луй мя́, и помози́ ми грѣхо́вную отрясти́ лѣ́ность.

Широ́кій пу́ть, поги́бель души́ преднося́щій, возненави́дѣвъ, Іове преподо́бне, въ тѣ́снѣй пеще́рѣ заключи́лся еси́ и тѣ́снаго пути́ жи́зни въ нача́льствѣ твое́мъ не уклони́лся еси́, де́нь и но́щь въ моли́твѣ и трудѣ́хъ пребыва́я и науче́ніе здра́вое всѣ́мъ приходя́щимъ къ тебѣ́ подава́я.

Ще́дръ бы́лъ еси́ ни́щимъ, ка́ющимся же ми́лостивъ и науче́нія тре́бующимъ учи́тель кро́токъ, боже́ственныя же му́дрости люби́тель и ева́нгельскихъ за́повѣдей проповѣ́дникъ, кни́гъ же боже́ственныхъ изда́тель и е́реси безбоя́зненный обличи́тель.

Богоро́диченъ: Марíю Пречи́стую и Всесвяту́ю восхва́лимъ: То́ю бо благода́ть на́мъ источа́ется па́че ума́ даро́въ, я́ко отъ пото́ка боже́ственныя бла́гости, Юже благочести́вымъ по́мысломъ ны́нѣ ублажа́емъ.

Пѣ́снь 8.

Ирмо́съ: Покрыва́яй вода́ми превы́спренняя своя́, полага́яй мо́рю предѣ́лъ песо́къ и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Ѣдущимъ и иду́щимъ во оби́тель твою́ безчи́сленнымъ лю́демъ, твои́мъ же моще́мъ припа́дающимъ, бу́ди дарова́ній духо́вныхъ пода́тель, тѣле́сныхъ же болѣ́зней цѣли́тель и предъ Спа́сомъ те́плый о всѣ́хъ предста́тель, Іове, земли́ Волы́нскія сла́во и украше́ніе.

Юноша тѣ́ломъ, но ста́рецъ умо́мъ въ нача́лѣ мона́шескаго житія́ твоего́ бы́лъ еси́, о́тче: состарѣ́вся же пло́тію, ю́ношескую бо́дрость въ трудѣ́хъ явля́лъ еси́, земли́ копа́ніемъ и древе́съ насажде́ніемъ о́бразъ всѣ́мъ смиренному́дрія подава́я.

Явле́ніе твое́ со а́нгелы вку́пѣ смире́нную дѣ́ву ужаса́ше, здра́віе же ученику́ твоему́ подава́ше и вся́ лю́ди на славосло́віе Бо́гови воздвиза́ше, и́стинную же утвержда́ше въ ни́хъ вѣ́ру и ерети́ческая отрѣва́ше нападе́нія.

Ѳиміа́момъ моли́твъ твои́хъ и мене́ облагоуха́й, Іове пресла́вне, мои́хъ грѣхо́въ злосмра́діе тѣ́мъ отгоня́я и упова́ніе на Го́спода вселя́я въ мою́ смра́дную ду́шу, да благода́тію Бо́жіею очища́емъ, воспою́ твое́, преблаже́нне, крѣ́пкое заступле́ніе.

Богоро́диченъ: Богороди́тельнице Всечи́стая, души́ моея́ я́звы и грѣхо́вныя стру́пы очи́сти, исто́чниками омыва́ющи су́щимъ изъ ре́бръ Сы́на Твоего́, и поте́кшими изъ тѣ́хъ очища́ющи струя́ми: къ Тебѣ́ прибѣга́ю, и Тя́ призыва́ю, Богоблагода́тную.

Пѣ́снь 9.

Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Ѵссо́помъ благода́ти Бо́жія окропи́ сердца́ на́ша, Іове преподо́бне, твои́мъ святы́мъ моще́мъ покланя́ющихся, да твоея́ ре́вности о вѣ́рѣ причасти́вшеся, ко исполне́нію за́повѣдей Христо́выхъ до́брѣ потщи́мся.

Псало́мски взыва́ти къ Бо́гу на земли́ не престава́лъ еси́, и дѣ́вства твоего́ сосу́дъ соблю́лъ еси́: тѣ́мже на небеси́ ра́йскія воспѣва́еши ны́нѣ пѣ́сни со а́нгелы и всѣ́ми святы́ми, лю́ди же, на земли́ трудя́щіяся, отъ вы́шнихъ назира́еши.

О, коли́ка житія́ твоего́ нетлѣ́нная красота́! О, коли́ка по сме́рти твое́й чудеса́ и исцѣле́нія! Се́ бо земна́я оста́вивъ, вои́стинну стори́цею небе́сная бла́га еще́ въ житіи́, па́че же во гряду́щемъ, по глаго́лу Христо́ву стяжа́лъ еси́.

О, коли́ко грѣхо́въ на́шихъ мно́жество! Но сія́ превосхо́дитъ твои́хъ моли́твъ крѣ́пость, и́хже не лиши́ на́съ, о́тче преподо́бне Іове, дру́же Христо́въ и святы́хъ всѣ́хъ соприча́стниче, церко́вный сто́лпе и о душа́хъ человѣ́ческихъ предста́телю теплѣ́йшій.

Богоро́диченъ: Зачала́ еси́, Дѣ́во, безъ сѣ́мене, вся́ческая созда́вшаго Сло́во Бо́жіе, кромѣ́ хотѣ́ній плотски́хъ, и безъ истлѣ́нія родила́ еси́, безъ болѣ́зней ма́тернихъ. Тѣ́мъ Тя́, Богоро́дицу, и язы́комъ, и се́рдцемъ исповѣ́дающе, велича́емъ.

Свѣти́ленъ. Подо́бенъ: Свѣ́те неизмѣ́нный.

Іовъ преподо́бный дне́сь да восхва́лится, я́ко Христо́въ во́инъ и о лю́дѣхъ моли́твенникъ, вѣ́ры проповѣ́дникъ, е́реси обличи́тель и Це́ркве украше́ніе. [Два́жды.]

Сла́ва и ны́нѣ:

Тя́ пѣ́сньми немо́лчными ублажа́емъ, Дѣ́во, я́ко отъ Тро́ицы Еди́наго родила́ еси́, Богоро́дице, и носи́ла еси́ на боже́ственныхъ объя́тіихъ Пресу́щественное Сло́во, невра́щно и неизмѣ́нно.

На хвали́техъ стихи́ры на 4, гла́съ 4:

Просія́ша по́двизи твои́ во странѣ́ Га́лицтѣй, о́тче Іове, тѣ́мже Правосла́вія ревни́тели въ зе́млю Волы́нскую тебе́ глаша́ютъ, и оби́тель Ду́бенская твои́мъ преподо́бнымъ житіе́мъ украша́ется, но того́ соверше́ніе Поча́евская Ла́вра пріе́млетъ, вся́ же страна́ сія́ уче́ньми твои́ми просвѣща́ется. [Два́жды.]

Братолюби́вое твое́ се́рдце, преподо́бне, мона́ховъ мно́жества на го́ру Поча́евскую привлече́, и́хже спасе́нія бы́лъ еси́ ревни́тель; тѣ́мже и мы́ апо́стольскій глаго́лъ вѣ́дуще, я́ко никогда́же престае́тъ духо́вная любы́, твоему́ чуде́сному попече́нію ду́ши на́ша ввѣря́емъ, я́же приведи́ ко Іису́су Человѣколю́бцу.

Не смѣ́яше тлѣ́ніе косну́тися ме́ртваго тѣлесе́ твоего́, преподо́бне, е́же чрезъ все́ житіе́ умерщвля́лъ еси́; душа́ же твоя́, живу́щи со а́нгелы, вся́ притека́ющія къ тебѣ́ въ свою́ любо́вь пріе́млетъ. Тѣ́мже и на́ша ду́ши приведи́ ко Іису́су Человѣколю́бцу.

Сла́ва, гла́съ 8:

Не довлѣ́ютъ словеса́ на́ша къ восхвале́нію по́двигъ твои́хъ, преподо́бне Іове: кто́ бо изочте́тъ твои́хъ добродѣ́телей полноту́, кто́ уразумѣ́етъ безмо́лвное твое́ къ Бо́гу собесѣ́дованіе? Но не отри́ни твоя́ пѣвцы́ и духо́вная ча́да, твоего́ заступле́нія прося́щія, и о твое́мъ святѣ́мъ житіи́ умиля́ющіяся, и во твое́й па́мяти веселя́щіяся.

И ны́нѣ: Влады́чице, пріими́...
Славосло́віе вели́кое. Ектеніи́ и отпу́стъ.



НА ЛИТУРГІИ,
Слу́жба вся́ преподо́бническая:

[Блаже́нна отъ кано́на преподо́бнаго, пѣ́снь 3 и 6. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]


Зри́: Вѣ́домо бу́ди, я́ко па́мять преподо́бнаго Іова соверша́ется въ де́нь блаже́нныя кончи́ны его́, Окто́врія въ 28-й де́нь, и въ де́нь обрѣ́тенія святы́хъ моще́й его́, Августа въ 28-й де́нь, егда́ во святѣ́й Поча́евстѣй Ла́врѣ святы́я мо́щи его́ изно́сятся въ вели́кую це́рковь. [Аще па́мять преподо́бнаго случи́тся въ недѣ́лю, соверша́емъ всю́ слу́жбу его́ по 3-й главѣ́ типико́на; а́ще въ суббо́ту — по 15-й, отъ «зри́» неизмѣ́нно.] Трети́цею же твори́мъ па́мять преподо́бнаго Іова Ма́ія въ 6-й де́нь. Въ се́й де́нь на повече́ріи пое́мъ слу́жбу свята́го Іова Многострада́льнаго, про́чее же совокупля́емъ слу́жбу преподо́бнаго съ тріо́дію, я́коже во главѣ́ Іоа́нна Богосло́ва указа́ся, е́же зри́ мѣ́сяца того́жде во 8-й де́нь.

Источникъ: Минíя дополни́тельная. — СПб.: С.-Петербургская Сѵнодальная Типографія, 1909. — Л. 50 об. – 58.

/ Къ оглавленію раздѣла /


Наверхъ / Къ титульной страницѣ

0