Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 8.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 28-й де́нь.
Слу́жба преподо́бнымъ отце́мъ Пече́рскимъ, и́хже нетлѣ́нныя мо́щи въ Да́льной пеще́рѣ почива́ютъ.

ВЕЧЕРЪ,
Блаже́нъ му́жъ, 1-й антифо́нъ. На Го́споди воззва́хъ: стихи́ры [на 8], гла́съ 8. Подо́бенъ: О, пресла́внаго чудесе́!

Видѣ́ніе у́мнымъ очеса́мъ зри́тся чуде́сно:* пламеноно́сныя крилѣ́* иму́ще во́ини духо́вніи,* отъ небе́съ прихо́дятъ отцы́ всеблаже́нніи,* и въ по́мощь на́шу ускоря́ютъ, на міроде́ржца ополча́ющеся.* Къ ни́мже припаде́мъ, зову́ще:* ва́съ призыва́емъ, неусы́пніи засту́пницы на́ши,* потщи́теся изба́вити на́съ отъ находя́щихъ враго́въ на́шихъ* и да́ти на́мъ отъ скорбе́й избавле́ніе. [Три́жды.]

Разруши́ нападе́нія вра́жія,* преподо́бне о́тче на́шъ Ѳеодо́сіе,* ста́до твое́ огражда́ющи во́и небе́сными,* при́сно бо совѣ́туютъ* нахожде́ніи злы́ми разори́ти е́,* но ты́, я́ко ско́ръ сы́й въ по́мощь,* да́ждь заступле́ніе къ тебѣ́ притѣка́ющимъ* и прося́щимъ твоего́ избавле́нія* и не отщети́ въ печа́лехъ посѣще́нія. [Два́жды.]

Сла́ва, гла́съ то́йже:

Престо́лу Трисо́лнечнаго Божества́ предстоя́щіи и бога́тно осіява́еми непристу́пными свѣ́тлостьми, отцы́ на́ши всеблаже́нніи, и́же на земли́ любе́зно предстоя́щихъ и собо́ръ ва́шъ дне́сь гла́сы воспѣва́ющихъ, страсте́й и бѣ́дъ свободи́те, я́ко при́сніи къ Бо́гу хода́таи, и моли́твенницы о душа́хъ на́шихъ.

И ны́нѣ, богоро́диченъ: Ца́рь Небе́сный...
Та́же вхо́дъ. Проки́менъ дне́, и чте́нія преподо́бнымъ три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Богоизбра́нніи дѣ́лателіе,* преподо́бніи отцы́ на́ши Пече́рскіи,* мы́сленный добродѣ́телей на земли́ виногра́дъ насади́сте,* отъ него́же возрасте́ ва́мъ* досто́йный пло́дъ вѣ́чнаго живота́.

Сти́хъ: Восхва́лятся преподо́бніи во сла́вѣ,* и возра́дуются на ло́жахъ свои́хъ.

Посѣ́ясте въ горѣ́ сле́зы,* да пло́дъ дово́льный,* ра́дость во дво́рѣхъ Госпо́днихъ, процвѣте́тъ;* ея́же вы́ наслажда́ющеся во вѣ́ки,* моли́теся за ны́ ко Го́споду.

Сти́хъ: Блаже́ни вси́ боя́щіися Го́спода,* ходя́щіи въ путе́хъ Его́.

Мо́лвъ жите́йскихъ изба́витися жела́юще,* всели́стеся въ пеще́ру,* идѣ́же трудолю́бнѣ пожи́вше,* въ вѣ́чный поко́й внидо́сте;* моли́теся та́мо за ны́ Влады́цѣ Христу́.

Сла́ва, гла́съ 1:

Волнобу́рныя молвы́ житія́ избѣ́гше, ко оти́шію же пеще́ры святы́я дости́гше и та́мо трудолю́бнѣ Го́сподеви угоди́вше, ны́нѣ Вы́шняго Сіо́на есте́ гра́ждане, и Ца́рствія Бо́жія су́ще сы́нове, моли́теся, отцы́ богоно́сніи, прича́стіе сла́вы ва́шея улучи́ти при́сно собо́ръ ва́шъ любо́вію почита́ющимъ.

И ны́нѣ, богоро́диченъ:

Небе́сныхъ чино́въ ра́дованіе, на земли́ человѣ́ковъ крѣ́пкое предста́тельство, Пречи́стая Дѣ́во, спаси́ ны, и́же къ Тебѣ́ прибѣга́ющія, я́ко на Тя́ упова́ніе по Бо́зѣ, Богоро́дице, возложи́хомъ.

Тропа́рь, гла́съ 4:

Мы́сленное со́лнце и свѣ́тлую луну́, первонача́льныхъ Пече́рскихъ, со всѣ́мъ собо́ромъ преподо́бныхъ дне́сь почти́мъ, тíи бо, церко́вную тве́рдь озаря́я, просвѣща́ютъ во тмѣ́ страсте́й бѣ́дствующихъ, и подаю́тъ отъ Христа́ Бо́га моли́твами свои́ми по́мощь во всѣ́хъ ско́рбехъ, и душа́мъ на́шимъ про́сятъ избавле́нія.

Сла́ва, и ны́нѣ, богоро́диченъ: Еже отъ вѣ́ка утае́ное...



НА УТРЕНИ,
На Бо́гъ Госпо́дь: тропа́рь [преподо́бныхъ, два́жды. Сла́ва, и ны́нѣ,] богоро́диченъ то́йже.

По 1-мъ стихосло́віи сѣда́ленъ, гла́съ 4. Подо́бенъ: Яви́лся еси́.

Мно́гими скорбьми́ пу́ть жи́зни сея́ преидо́сте, и дости́гше кра́я у́мнаго жела́нія, въ черто́гъ Боже́ственныя сла́вы всели́стеся; и ны́нѣ, ра́дующеся со всѣ́хъ Царе́мъ и Бо́гомъ, моли́теся, я́ко да и мы́ ва́шего весе́лія прича́стницы бу́демъ, ва́шъ собо́ръ почита́ющіи, отцы́ всеблаже́нніи. [Два́жды.]

Сла́ва, и ны́нѣ, богоро́диченъ:

Обра́дованная, хода́тайствуй Твои́ми моли́твами и испроси́ душа́мъ на́шимъ мно́жество щедро́тъ и очище́ніе прегрѣше́ній, всѣ́мъ пою́щимъ Тя́, Чи́стую Ма́терь и Дѣ́ву.

По 2-мъ стихосло́віи сѣда́ленъ, гла́съ 3:

Бра́къ Агнчій въ черто́зѣ небе́сномъ услы́шавше, и зва́нію Царя́ Вы́шняго ко всѣ́мъ бы́вшу, вся́ мірска́я пристра́стія оста́висте, отцы́ богоно́сніи, и сле́зными струя́ми ри́зы своя́ испра́вше, чи́сти внидо́сте въ трапе́зу Христа́ Бо́га; но пре́жде да́же не затворя́тся две́ри того́ вхо́да, моли́теся, я́ко да и мы́, покая́ніемъ вше́дше, ва́мъ прича́стницы бу́демъ. [Два́жды.]

Сла́ва, и ны́нѣ, богоро́диченъ:

Черто́гъ, присносу́щною сла́вою укра́шенъ, ви́дяще вы́ну, жела́ніе и́мамы совни́ти въ о́нь, но оде́жды не иму́ще, стыди́мся, да не свя́зани отъ а́нгелъ и изве́ржени бу́демъ. Ты́, су́щи оде́жда наги́хъ дерзнове́нія, Дѣ́во Марíе, украси́ ны и введи́ вну́трь Ца́рствія Христо́ва.

Та́же, Хвали́те и́мя Госпо́дне... и велича́ніе:

Велича́емъ ва́съ, преподо́бніи отцы́ на́ши Пече́рскіи, и чте́мъ святу́ю па́мять ва́шу, вы́ бо мо́лите о на́съ Христа́, Бо́га на́шего.

Сти́хъ 1: Ра́дуйтеся, пра́ведніи, о Го́сподѣ, пра́вымъ подоба́етъ похвала́. Сти́хъ 2: Сѣ́ющіи слеза́ми ра́достію по́жнутъ. Сти́хъ 3: Восхва́лятся преподо́бніи во сла́вѣ и возра́дуются на ло́жахъ свои́хъ. Сти́хъ 4: Весели́теся о Го́сподѣ и ра́дуйтеся, пра́ведніи, и хвали́теся, вси́ пра́віи се́рдцемъ.

Сла́ва, и ны́нѣ, и Аллилу́ія, три́жды.

По поліеле́и сѣда́ленъ, гла́съ 8. Подо́бенъ: Прему́дрости.

Зва́нію Го́спода своего́ послѣ́дующе, кре́стъ, а́ки же́злъ, въ ру́цѣ воспріе́мше, не убоя́стеся стра́ха, предстоя́щаго во тмѣ́, но упова́ніемъ преидо́сте къ безбѣ́дному приста́нищу, и по́двиговъ свои́хъ обрѣ́тше воздая́ніе, веселите́ся въ свѣ́тѣ непристу́пномъ; тѣ́мже ва́съ почита́емъ, отцы́ всеблаже́нніи, я́ко при́сно моля́щихъ Христа́ Бо́га согрѣше́ній оставле́ніе дарова́ти пра́зднующимъ любо́вію святу́ю па́мять ва́шу.

Сла́ва, и ны́нѣ, богоро́диченъ:

Яко еди́ну въ жена́хъ Благослове́нную и дѣ́вамъ похвалу́ и украше́ніе, въ бра́нехъ непребори́мую по́мощь, немощны́мъ утвержде́ніе и ско́рое посѣще́ніе въ печа́ли су́щимъ иму́ще Тя́, Богоневѣ́стная Дѣ́во, дне́сь въ пречестно́мъ Твое́мъ хра́мѣ припа́даемъ и мольбы́ на́ша къ Тебѣ́ прино́симъ, я́ко да мо́лиши Христа́ Бо́га, согрѣше́ній оставле́ніе дарова́ти, благоче́стно покланя́ющимся Пресвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе да хва́литъ Го́спода. Сти́хъ: Хвали́те Бо́га во святы́хъ Его́... Ева́нгеліе отъ Матѳе́я, зача́ло 43: Рече́ Госпо́дь Свои́мъ ученико́мъ: вся́ Мнѣ́ предана́ су́ть отце́мъ Мои́мъ...

По 50-мъ псалмѣ́ стихи́ра, гла́съ 8:

Престо́лу Трисо́лнечнаго Божества́ [предстоя́щіи и бога́тно осіява́еми непристу́пными свѣ́тлостьми, отцы́ на́ши всеблаже́нніи, и́же на земли́ любе́зно предстоя́щихъ и собо́ръ ва́шъ дне́сь гла́сы воспѣва́ющихъ, страсте́й и бѣ́дъ свободи́те, я́ко при́сніи къ Бо́гу хода́таи, и моли́твенницы о душа́хъ на́шихъ.]

Кано́нъ Богоро́дицы со ирмосо́мъ на 6, и преподо́бныхъ на 8, гласъ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Во́ду преходи́ти пѣ́сненныхъ слове́съ въ па́мять ва́шу, богоно́сніи отцы́, хотя́ща мя́, въ тишинѣ́ у́мной всегда́ испра́вите, и отъ бу́рныхъ страсте́й удержи́те, да въ ва́шемъ хвале́ніи съ пѣ́снію возвели́чу и́мя Бо́га моего́.

Изше́дъ на зла́чное по́ле мы́сленнаго рая́ пеще́ры святы́я, услажда́юся благово́нными арома́ты, я́же источа́ютъ мо́щи ва́ша, преподо́бніи отцы́, и ве́село Созда́телю Бо́гу пѣ́снь умо́мъ возсыла́ю.

Вертогра́дъ заключе́нъ ты́ еси́, пеще́ро свята́я, въ тебѣ́ бо Сади́тель Вы́шній насади́ мно́жество древе́съ, богоно́сныхъ оте́цъ, а́ки ке́дровъ лива́нскихъ, и́же досяго́ша небе́съ высото́ю, и́мже удивля́яся, пою́ пѣ́снь Бо́гу моему́.

Стра́жу неусы́пне, Ло́нгине вра́тарю, да́ръ имѣ́вый прозира́ти мы́сли входя́щихъ, обрѣты́й по́чести вы́шняго зва́нія, вни́ди и объими́ хвалы́ богоно́сныхъ оте́цъ, въ и́хже па́мяти пѣ́снь Бо́гу на́шему пое́мъ.

Игна́тіе, па́стырю и́ночествующихъ и цѣли́телю боля́щихъ, въ неду́зѣхъ на́шихъ посо́бствуй тя́ почита́ющимъ, да въ па́мяти твое́й пѣ́снь хвалы́ Бо́гу на́шему принесе́мъ.

Силуа́не преподо́бне, чистоты́ рачи́телю и храни́телю садо́вій, тате́й чу́вственныхъ и мы́сленныхъ, плоды́ обоя́ окра́сти хотя́щихъ, моли́твою связа́вый, отъ тѣ́хъ нападе́ній и на́съ спаси́, мо́лимся.

Богоро́диченъ: Мно́гими татьми́ обстои́мь, не чу́вствую всегда́, и окрада́ютъ ми́ врази́ покая́нія плоды́, но бо́дренною Твое́ю моли́твою и неисче́тною благосты́нею, Ма́ти Бо́жія, изба́ви мя́, молю́ся.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Небе́снаго и земна́го кру́га Созда́тель созда́ мѣ́сто сіе́, и ва́съ, до́брыя гра́жданы, въ не́мъ поста́ви, треблаже́нніи отцы́. Причти́те на́съ въ сожи́тіе ва́ше нетлѣ́нное и жела́емаго кра́я ми́лости дости́гнути моли́теся, мо́лимъ ва́съ.

Агаѳо́не блаже́нне, бла́гости вѣща́нія имени́те, по́стникомъ красото́, проро́че нело́жный и цѣли́телю неду́жныхъ, скажи́ на́мъ, нечу́вственнымъ, а́ще пу́ть беззако́нія е́сть въ на́съ, и ты́ наста́ви ны́ моли́твами твои́ми на пу́ть вѣ́ченъ.

Пое́мъ ди́внаго Зино́на, сія́ющаго посто́мъ, и Мака́рія, блаже́ству тезоимени́та, си́хъ двои́хъ ра́ди отце́въ, мо́лимтися, Влады́ко, изми́ на́съ душе́вныхъ и тѣле́сныхъ страсте́й, еди́не Человѣколю́бче.

Сла́вимъ Ахи́лу, служи́теля же́ртвы, и я́ко и́стиннаго по́стника приво́димъ Ти́, Христе́, въ моли́тву, его́же ра́ди изми́ на́съ отъ порабоще́нія чре́вныхъ страсте́й, и воздержа́нію того́ научи́ ны, еди́не Человѣколю́бче.

Ипа́тіе, служи́телю немощны́мъ, я́ко имѣ́яй да́ръ больны́хъ цѣли́ти возложе́ніемъ руку́, тя́ мо́лимъ, посѣти́ свы́ше на́съ, душе́вными неду́ги обдержи́мыхъ, и спаси́ моли́твами твои́ми.

Яко въ житіи́ се́мъ любве́ свя́зани сою́зомъ, по сме́рти же въ еди́номъ гро́бѣ су́ще положе́ни, та́ко и въ нетлѣ́нной жи́зни ны́нѣ вку́пѣ живу́ще, Паи́сіе и Мерку́ріе, хода́тайствомъ ва́шимъ къ Бо́гу, въ единомы́сліи и любви́ утверди́те ны́, мо́лимся.

Лавре́нтіе, по́стникомъ свѣти́ло, и Моисе́е крестоно́сне, въ тмѣ́ страсте́й на́съ су́щихъ и ходя́щихъ освѣти́те и моли́твами ва́шими наста́вите, да и мы́ въ крестоноше́ніи на́шемъ не преткне́мъ о ка́мень собла́зна но́гъ на́шихъ.

Богоро́диченъ: Тма́ страсте́й объя́тъ ны́, и въ пути́ сласте́й уклони́хомся непрохо́дны, свѣ́та исправле́нія не ви́димъ. Наста́внице, наста́ви на́съ и свѣ́тъ покая́нія возсія́й на́мъ, Ты́ бо еси́ всѣ́мъ многосвѣ́тлое свѣти́ло, просвѣща́ющее ду́ши на́ша.

Сѣда́ленъ, гла́съ 2:

Поще́ніемъ просія́вшихъ и свѣ́тлыми по́двиги преподо́бныхъ оте́цъ Пече́рскихъ чи́стое житіе́ и труды́ кто́ восхвали́ти мо́щенъ? Оба́че отъ любве́, я́же къ ни́мъ, пѣ́сненныя да́ры прино́симъ, тíи бо, со а́нгелы предстоя́ще, при́сно мо́лятся Го́сподеви о всѣ́хъ на́съ. [Два́жды.]

Сла́ва, и ны́нѣ, богоро́диченъ:

Милосе́рдія су́щи исто́чникъ, ми́лости сподо́би на́съ, Богоро́дице, при́зри на лю́ди согрѣши́вшія, яви́, я́ко при́сно, си́лу Твою́, на Тя́ бо упова́юще, — ра́дуйся, — вопіе́мъ Ти́, я́коже иногда́ Гавріи́лъ, безпло́тныхъ архистрати́гъ.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божcтво́.

Дре́внихъ оте́цъ стопа́мъ послѣ́дующе, не уклони́стеся ни ма́ло отъ и́хъ трудо́въ, тѣ́мже ра́вный дина́рь вѣ́чныя жи́зни отъ Христа́ пріе́мше, со а́нгелы сла́вите превѣ́чное Того́ Божество́.

Иларіо́нъ ди́вный, вели́каго о́браза чи́нъ имѣ́вый, и по чи́ну своему́ ревну́я житію́ преподо́бнаго Ѳеодо́сія, еди́ною всегда́ въ седми́цѣ яды́й, крѣ́покъ бѣ́ во славосло́віи пѣ́ти: сла́ва си́лѣ Твое́й, Го́споди.

По́стническое стече́ся во́инство, въ не́мже просія́ свѣ́тлая звѣзда́, Діони́сій, и́же ны́нѣ сія́етъ во сла́вѣ святы́хъ и сла́витъ Еди́но Божество́.

Трудолю́бцемъ о́бразъ извѣ́стный, Арсе́ній, му́жеству тезоимени́тый, въ трудѣ́хъ де́нь и но́щь живы́й, прія́тъ возмѣ́здіе — да́ръ чудотворе́нія, отъ него́же подае́тъ тре́бующимъ всѣ́мъ неоску́дно.

Пи́мине, по́стникомъ единонра́вне, кровопо́тными труды́ труди́выйся въ послуша́ніи вы́ну, дрова́ нося́, въ же́рновахъ меля́, на вся́ку же но́щь непреста́нно поя́ Бо́га и Того́ Еди́но Божество́.

Сто́лпе непоколеби́ме, Аѳана́сіе затво́рниче, водруже́нъ сы́й въ затво́рѣ, не тре́бовалъ еси́ свѣ́тлости чу́вственныя, поне́же тебѣ́ мы́сленная свѣтя́ше. То́ю моли́, блаже́нне, просвѣти́тися тя́ почита́ющимъ.

Тро́иченъ: Сла́ва Тебѣ́, Тро́ице Пресвята́я, я́ко просла́вила еси́ мѣ́сто земно́е, небе́сному гра́жданы подо́бное, въ и́хже па́мяти приноси́мымъ отъ на́съ пѣ́ніемъ Тя́, Отче и Сы́не и Ду́ше Святы́й, съ раболѣ́пнымъ поклоне́ніемъ, грѣ́шніи, сла́вимъ и Твое́ Еди́но Божество́ превозно́симъ.

Богоро́диченъ: Сла́ва Тебѣ́, правосла́вныхъ сла́во, Чи́стая, Тя́ бо сла́витъ со а́нгелы ро́дъ человѣ́ческій, и припа́дающе, вопіе́тъ: сла́ва бо Твоя́, Богоро́дице, всѣ́мъ простре́ся во спасе́ніе.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Просвѣти́ша всю́ Россíйскую зе́млю да́нною и́мъ благода́тію отцы́ всеблаже́нніи, и тма́ уже́ зловѣ́рія въ коне́цъ поги́бе. Ты́я лучи́ простри́ на ны́ моле́нія и́хъ ра́ди, мо́лимтися, еди́не Человѣколю́бче.

Сисо́е чу́дне и Григо́ріе, и́мя отъ бо́дрости имѣ́вый, о́ба посто́мъ обузда́вшіи своя́ стра́сти, свирѣ́пѣющую по́хоть и на́шея пло́ти смири́те, ва́мъ бо дана́ е́сть благода́ть въ страсте́хъ на́мъ посо́бствовати.

Воздержа́нія рачи́телю, Па́вле блаже́нне, со двѣма́ канона́рхи, простри́те о на́съ мольбы́ ко Влады́цѣ, да Того́ благода́тію отъ чре́вняго несы́тства уде́ржимся и ва́мъ въ воздержа́ніи наслѣ́дницы бу́демъ.

Сло́во Бо́жіе, вразумля́ющее человѣ́ки, некни́жныя му́дрости научи́ тя, Не́сторе свя́те, но вы́шнія, е́юже зрѣ́лъ еси́ при моли́твахъ а́нгелы и кончи́ну свою́ предви́дѣлъ еси́. Тоя́ и на́съ прича́стники сотвори́, мо́лимъ тя́, па́мять твою́ почита́юще.

Ти́те всему́жественне, во́инствующу ти́ иногда́, поби́ша сопроти́вніи ору́жіемъ главу́ твою́, и бы́сть я́зва вино́ю, я́ко прише́лъ еси́ въ Пече́рскую го́ру и та́мо пла́калъ еси́ о грѣсѣ́хъ свои́хъ, о и́хже проще́ніи извѣще́ніе пріе́мь, ра́достно отше́лъ еси́ къ го́рнимъ селе́ніямъ небе́снымъ, преподо́бне.

Па́мву послушли́ваго почита́ти дерза́ю и удивля́юся: то́й бо въ послуша́ніи отъ невѣ́рныхъ и вѣ́ры ра́ди во у́захъ претерпѣ́ мно́го, оба́че, отъ а́нгелъ восхище́нъ и пренесе́нъ, въ ке́лліи свое́й обрѣ́теся, и сбы́стся на не́мъ, я́ко послуша́ніе отъ сме́рти избавля́етъ.

Тро́иченъ: Впадо́хъ въ ру́ки враго́въ мы́сленныхъ и око́ванъ е́смь отъ ни́хъ тя́жкими пу́ты, отъ ни́хже бра́тъ не изба́витъ. Ты́, Тро́ице Пресвята́я, я́ко Ми́лостивая, созда́ніе Твое́ поми́луй и бла́гостію Твое́ю отъ у́зъ сме́ртныхъ свободи́.

Богоро́диченъ: Свя́занъ е́смь мно́гими плени́цами страсте́й, и нѣ́сть ми́ разрѣше́нія наде́жды, но Ты́ поми́луй мя́, я́ко Ма́ти Бо́га вы́шняго, и разрѣши́ мя отъ ни́хъ, Ты́ бо Еди́на си́льна еси́ по Бо́зѣ грѣхо́вныя плени́цы разрѣши́ти.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Моли́твы на́ша прино́симъ ва́мъ, о богоно́сніи отцы́, вы́ бо есте́ моли́твенницы о на́съ къ Бо́гу и хода́таи, хода́тайствомъ у́бо ва́шимъ отъ тли́ грѣхо́вныя изба́вите честны́й ва́шъ собо́ръ почита́ющихъ.

Неусы́пнѣ серде́чное видѣ́ніе иму́ще къ Бо́гу, бы́сте незло́бивіи, а́ки младе́нцы, но я́ро о́ко имѣ́сте на бѣ́сы, я́ко и и́мене ва́шего и́мъ трепета́ти. Мо́лимъ ва́съ, моли́теся, да и отъ на́съ нападе́нія вра́жія со студо́мъ возвратя́тся.

Заха́ріе, па́мяти Госпо́дней тезоимени́те, по и́мени твоему́ и житіе́ стяжа́вый, та́ко бо на враги́ посто́мъ му́жески вооружи́лся еси́, я́ко во все́мъ житіи́ твое́мъ зе́ліемъ пита́яся, дово́ленъ бы́лъ еси́, тѣ́мъ и́мене твоего́ боя́хуся бѣ́си; отъ си́хъ у́бо злодѣ́йства избавля́я, ускори́ на по́мощь на́шу, смире́нно мо́лимтися.

Ѳео́доре блаже́нне, сла́ву благоро́дства своего́ въ пе́рсть всели́вый, измѣни́въ княже́ніе на и́ноческій о́бразъ, въ не́мже Влады́цѣ своему́ до́брѣ угоди́вый и ны́нѣ со а́нгелы въ небе́сныхъ живы́й, моли́ся о на́съ, да сла́вы неги́бнущія прича́стницы бу́демъ.

Софро́ніе преподо́бне, въ те́мнѣмъ мѣ́стѣ себе́ затвори́вый, непреста́нно во псалмѣ́хъ пѣ́лъ еси́ Бо́гу; и ны́нѣ въ простра́ннѣмъ селе́ніи го́рнемъ наслажда́яся а́нгельскихъ пѣ́ній, моли́ся, да и мы́ та́я слы́шати сподо́бимся.

Въ преподо́біи и пра́вдѣ свяще́нствуя Вы́шнему, Панкра́тіе чу́дне, чудотво́рными да́ры обогати́вся, отъ си́хъ подава́лъ еси́ неоску́дно тре́бующимъ; пода́ждь у́бо сія́ и на́мъ, въ болѣ́знехъ къ тебѣ́ усе́рдно приходя́щимъ.

Тро́иченъ: Сла́вы ра́ди и́мене Твоего́, Пресу́щественная Тро́ице, просла́вила еси́ пра́ведныхъ Твои́хъ и мѣ́сто сіе́; бла́гостію у́бо Твое́ю пода́ждь и на́мъ, Бла́же, сла́ву святы́хъ во сла́вѣ Твое́й зрѣ́ти, и съ ни́ми Тебе́ сла́вити, въ тріе́хъ ѵпоста́сѣхъ Еди́наго Бо́га.

Богоро́диченъ: Иже Тя́ не просла́витъ, Пресвята́я Дѣ́во, то́й да не ви́дитъ сла́вы жи́зни вѣ́чныя; на́мъ же да́ждь ви́дѣти ту́ю, и́бо зна́емъ Тя́, сла́виму отъ всѣ́хъ си́лъ небе́сныхъ, и сіе́ прино́симъ Ти́: ра́дуйся, вѣ́рнымъ извѣ́стная похвало́.

Конда́къ, гла́съ 8:

Избра́нніи отъ родо́въ уго́дницы Бо́жіи, святíи преподо́бніи Пече́рскіи, на си́хъ гора́хъ добродѣ́тельми просія́вшіи, ва́съ земля́ не потаи́ла е́сть, но не́бо отве́рзеся ва́мъ и ра́йское селе́ніе. Тѣ́мже мы́ похва́льныя пѣ́сни Бо́гу, просла́вльшему ва́съ, въ па́мяти ва́шей прино́симъ; вы́ же, я́ко иму́щіи дерзнове́ніе, ва́шъ собо́ръ почита́ющихъ, отъ всѣ́хъ бѣ́дъ моли́твами ва́шими заступа́йте, я́ко засту́пницы на́ши и къ Бо́гу хода́таи.

Икосъ:

Восхвали́ти по еди́ному кто́ возмо́жетъ святы́я Твоя́, Бла́же? Изочту́ и́хъ, и па́че песка́ умно́жатся, но Са́мъ, Влады́ко Христе́, исчита́яй мно́жество звѣ́здъ и всѣ́мъ имена́ нарица́яй, пріими́ всѣ́хъ и́хъ мольбы́ о на́съ, и яви́ щедро́ты Твоя́ на лю́дехъ Твои́хъ; вѣ́мы бо, я́ко мно́го и́мутъ дерзнове́ніе къ вели́честву Твоему́, и хода́тайствуютъ къ Тебѣ́, я́ко при́сно моли́твенницы о душа́хъ на́шихъ.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Ту́чная еси́ и усыре́нная, Пече́рская горо́, въ твои́хъ бо гра́жданѣхъ изво́ли Вы́шній селе́ніе Свое́ положи́ти, тѣ́мже и мы́ съ ни́ми пое́мъ: оте́цъ на́шихъ Бо́же, благослове́нъ еси́.

Смѵ́рны испо́лнена и хо́лму Лива́нскому подо́бна еси́, Пече́рская горо́, ка́плющая мѵ́ры богоно́сныхъ оте́цъ на исцѣле́ніе болѣ́зней тлетво́рныхъ, и́хже мы́ благоуха́ніе пріе́млюще, пое́мъ: оте́цъ на́шихъ Бо́же, благослове́нъ еси́.

Аммо́не и Марда́ріе, подви́жный супру́гъ, бы́вше нищеты́ рачи́теліе, ны́нѣ же бога́тство неги́блющее стяжа́вшіи, моли́теся и на́мъ то́ежде стяжа́ти въ вы́шнихъ, идѣ́же пою́тъ: Бо́же, благослове́нъ еси́.

Пое́мъ Ру́фа, по́стникомъ и трудолю́бцемъ зерца́ло, съ Веніами́номъ блаже́ннымъ, и́же все́ свое́ имѣ́ніе отдаде́ ни́щимъ, да еди́нъ би́серъ — Христа́ стя́жетъ, Ему́ же ревни́тели да бу́демъ, пою́ще: Бо́же, благослове́нъ еси́.

Ѳео́филе, іера́рхомъ удобре́ніе, Но́вграда престо́лъ содержа́вый и Сама́го Го́спода ви́дѣвый, умоли́ Того́ бла́гость, да и мы́ лице́ Его́ у́зримъ съ тобо́ю и воспое́мъ: оте́цъ на́шихъ Бо́же, благослове́нъ еси́.

Въ діа́конѣхъ свѣти́ло и въ трудолю́бцехъ о́бразе, Марти́ріе, чистоты́ рачи́телю, да́ръ имѣ́вый прогоня́ти отъ человѣ́къ лука́выя ду́хи и не́мощи цѣли́ти, ду́ха зло́бы и вся́кія ле́сти отжени́ отъ на́съ, да чи́сто воспое́мъ: Бо́же, благослове́нъ еси́.

Тро́иченъ: Прославля́ющія святы́хъ Твои́хъ просла́ви, Преблага́я Тро́ице, сла́вою, ю́же угото́вала еси́ отъ вѣ́ка рабо́мъ Твои́мъ, и сподо́би пѣ́ти: оте́цъ на́шихъ Бо́же, благослове́нъ еси́.

Богоро́диченъ: Прера́дованная Ма́ти и Цари́це, ра́достная Тебѣ́ принося́щихъ ра́дости вѣ́чныя сподо́би и отве́рзи ра́йскія две́ри христіа́нскому всему́ ро́ду, при́сно Тебѣ́ пою́щему: Богоро́дице, благослове́нна еси́.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Цари́цы Небе́сныя селе́ніе еси́, святопече́рская горо́, ю́же си́льныхъ мно́жество преподо́бныхъ оте́цъ окружа́ютъ, вси́ ору́жія изощре́нны иму́ще, моли́твы проти́ву міроде́ржца, пою́тъ пѣ́снь Бо́гу: пое́мъ и превозно́симъ Его́ во вѣ́ки.

Восто́къ и за́падъ, ю́гъ и сѣ́веръ ви́дитъ во огра́дѣ твое́й, Пече́рская горо́, исто́чникъ, кипя́щій мѵ́ры чуде́съ богоно́сныхъ оте́цъ, излива́ющійся всѣ́мъ изоби́льно, и́же пою́тъ и превозно́сятъ Го́спода во вѣ́ки.

Ко́е хвале́ніе ва́мъ принесе́мъ, о богоно́сніи отцы́? Ка́ко исповѣ́мы труды́ и по́двиги ва́ша тупогру́бымъ язы́комъ? — Не вѣ́мы. Но ты́, свя́те Евѳи́міе молчали́ве, научи́ ны, да съ тобо́ю пое́мъ Го́спода во вѣ́ки.

По́стникомъ и трудолю́бцемъ сія́ніе, Кассіа́не и Піо́ре блаже́нне, о́ба свѣтя́щіися житіе́мъ, а́ки небе́сная свѣти́ла, свѣ́тлостію благода́ти, да́нныя ва́мъ, озари́те ны́, да сподо́бимся съ ва́ми пѣ́ти Го́спода во вся́ вѣ́ки.

Пла́чущихъ помина́я блаже́нство, Пафну́тіе преподо́бне, всегда́ пла́калъ еси́, ны́нѣ же ра́достная наслѣ́дивъ мѣста́, моли́ся та́мо и на́мъ во кро́въ безплаче́вный всели́тися, да съ тобо́ю превозно́симъ Го́спода во вѣ́ки.

Со Іо́сифомъ чу́днымъ ва́шу, вси́ святíи, па́мять почита́емъ, посто́мъ и труды́ до́брѣ Бо́гу угоди́вшіи, и мо́лимъ, да отъ всѣ́хъ бѣ́дъ заступле́ніе ва́ми обря́щемъ и сподо́бимся Го́спода превозноси́ти во вѣ́ки.

Во огра́дѣ пеще́ры святы́я проходя́ умо́мъ, зри́мъ на тве́рди ея́ мно́жество, а́ки звѣ́здъ, оте́цъ преподо́бныхъ, и́хже исчи́слити не возмо́жно. Тѣ́мъ о всѣ́хъ возда́вше хвалу́ Бо́гу, мо́лимъ, да да́стъ на́мъ съ ни́ми превозноси́ти Его́ во вѣ́ки.

Богоро́диченъ: Гони́мь су́щи змíемъ міролю́бнымъ, къ Твое́й огра́дѣ прибѣго́хъ, Чи́стая: кро́вомъ у́бо ми́лости Твоея́ защити́ мя́ и того́ зубо́въ изба́ви, я́ко да спасе́нъ, превозношу́ Тя́, Ма́терь Бо́жію, во вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Вои́стинну пре́жде юдо́ль бѣ́ плаче́вная и верте́пъ разбо́йникомъ гора́ сія́ свята́я, ны́нѣ же до́мъ Бо́жій е́сть, и живу́щіи въ не́мъ блаже́нни, я́ко ва́ми освяти́ся, богоно́сніи отцы́: сего́ ра́ди всѣ́хъ ва́съ велича́емъ.

Гла́съ ра́дованія и шу́мъ празднолю́бныхъ стѣка́ется восхвали́ти собо́ръ ва́шъ, отцы́ Пече́рскіи; тѣ́хъ у́бо хвале́нія пріе́мше, отъ всѣ́хъ скорбе́й и печа́лей спаса́йте, да всегда́ ва́съ велича́емъ.

Ра́достною душе́ю взе́мше кре́стное и́го и ра́ломъ трудо́въ го́ру сію́ воздѣ́лавше, насади́сте сады́ по́товъ ва́шихъ, богоно́сніи отцы́, мы́сленныхъ, и́хже плоды́ объе́мше, увеселя́емъ ду́ши на́ша и всѣ́хъ ва́съ велича́емъ.

Во еди́нъ пу́ть за́повѣдей Госпо́днихъ ходя́ще, разли́чная сѣ́мена сѣ́ясте: о́въ чистоту́, о́въ послуша́ніе, и́нъ по́стъ, другíй нищету́, труды́ и сле́зы. Оба́че вси́ ра́вно ра́дости рукоя́ти пожина́ете, отъ ни́хже и на́мъ да́рствуйте, да вы́ну ва́съ всѣ́хъ велича́емъ.

Госпо́дь пасе́тъ ва́съ ны́нѣ на мѣ́стѣ зла́чнѣ, преблаже́нніи отцы́, и ко́е уже́ ва́съ лиша́етъ бла́го? Пото́къ бо сла́дости ва́съ напая́етъ, отъ него́же поне́ ка́плею еди́ною житія́ на́шего го́ресть, мо́лимся, услади́те, да ра́достно Бо́гу на́шему воспое́мъ.

Отъ мѣ́ста плаче́внаго на безплаче́вное преше́дшихъ, мо́лимъ ва́съ, отцы́ преблаже́нніи, на́съ, па́мять ва́шу вку́пѣ почита́ющихъ, вся́кія ско́рби избавля́йте, да вси́ ва́съ велича́емъ.

Тро́иченъ: Сла́ва Ты́ еси́, Тро́ице, преподо́бныхъ оте́цъ ли́ку, и неги́блющее весе́ліе, о Тебѣ́ бо мíръ и пло́ть съ неви́димымъ враго́мъ побѣди́вше, прія́ша вѣнцы́ и ра́дуются со а́нгелы, Тя́ всегда́ велича́юще.

Богоро́диченъ: Сла́вимъ Тя́, пресла́вный гра́де Бо́жій, Тебе́ бо Са́мъ основа́ Вы́шній и даде́ въ прибѣ́жище всѣ́мъ отъ лица́ вра́жія бѣжа́щимъ. И на́мъ бу́ди въ приста́нище, да Тя́ вы́ну велича́емъ.

Свѣти́ленъ:

Ца́рское свяще́ніе, ро́де избра́нный, іера́рси святíи, свяще́нницы, мона́си, дѣ́вственницы, чудотво́рцы и все́ по́стническое сосло́віе преподо́бныхъ оте́цъ Пече́рскихъ, собери́теся дне́сь на моли́тву, да ва́съ ра́ди Ца́рь сла́вы спасе́тъ Импера́тора и вся́ лю́ди, благоче́стно собо́ръ ва́шъ почита́ющихъ. [Два́жды.]

Сла́ва, и ны́нѣ, богоро́диченъ:

Святы́хъ Святѣ́йшую Тя́ сла́вимъ, Чи́стая Дѣ́во, и велича́емъ отъ Тебе́ рожде́нное Сло́во, Ты́ же пріими́ и отъ на́съ славосло́віе сіе́, и да́ждь сла́вити Тя́, идѣ́же вси́ святíи Ма́терь Тя́ Бо́жію сла́вятъ.

На хвали́техъ стихи́ры, гла́съ 4. Подо́бенъ: Да́лъ еси́ зна́меніе.

Плотско́е мудрова́ніе, покоре́ніемъ ума́* плѣни́сте въ послуша́ніе Христо́во,* отцы́ преблаже́нніи,* и стра́стное мо́ре преплы́вше,* достиго́сте кра́йнято жела́нія,* тѣ́мъ дарова́ ва́мъ* по́чести зва́нія вы́шняго* Іису́съ Человѣколю́бецъ* и Спа́съ ду́шъ на́шихъ. [Два́жды.]

Угаси́сте пе́щь мірски́хъ пристра́стій* и самохо́тныя молвы́,* сле́зными пото́ки* и коне́чною нището́ю, отцы́ преподо́бніи,* и я́ко въ черто́зѣ свѣ́тлѣ,* въ те́мныхъ пребы́сте пеще́рахъ,* а́нгельски славосло́вяще* Іису́са Человѣколю́бца* и Спа́са ду́шъ на́шихъ.

Отъ бре́нныя страсте́й глубины́,* скорбе́й и попече́ній жите́йскихъ* у́мъ очи́стивше,* отцы́ богоно́сніи,* упова́ніемъ бу́дущія жи́зни* вся́ тлѣ́нная презрѣ́сте.* И ны́нѣ, въ нетлѣ́нной жи́зни су́ще,* моли́те за ны́ Іису́са Человѣколю́бца* и Спа́са ду́шъ на́шихъ.

Сла́ва, гла́съ 6:

Блаже́нства непоро́чныхъ вожделѣ́вше, въ пу́ть за́повѣдей Госпо́днихъ теко́сте, и свидѣ́нія во́ли Бо́жія взыску́юще, въ го́ры, въ верте́пы и въ те́мныя пеще́ры всели́стеся, мíръ съ по́хотьми распя́сте, и бѣсо́вскія полки́ побѣди́вше, ны́нѣ жи́знь и сла́ву безконе́чную наслѣ́дисте. Моли́теся за ны́, мо́лимъ ва́съ, отцы́ преподо́бніи, улучи́ти прича́стіе съ ва́ми Вы́шняго Іерусали́ма и спасе́ніе душа́мъ на́шимъ.

И ны́нѣ, [богоро́диченъ, гла́съ то́йже:]

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы и со всѣ́ми святы́ми спасти́ся душа́мъ на́шимъ.

Славосло́віе вели́кое. [Ектеніи́.] И отпу́стъ.



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Матѳе́я, зача́ло 43, или́ отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 137 об. – 143 об.

/ Къ оглавленію раздѣла /


Наверхъ / Къ титульной страницѣ

0