Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 27-й де́нь.
Слу́жба преподобному́ченику Ку́кшѣ и Пи́мину По́стнику, Пече́рскимъ.

ВЕЧЕРЪ,
На Го́споди воззва́хъ: стихи́ры, гла́съ 2. Подо́бенъ: Егда́ отъ дре́ва.

Гла́съ ра́дованія и торжество́,* пріиди́те ны́нѣ,* празднолю́бніи лю́діе, соста́вимъ,* сладкопѣ́сненными добро́тами восклица́юще,* ди́внымъ отце́мъ вели́чествіе принесе́мъ,* лѣ́тнія похвалы́ воздаю́ще* и почита́юще де́нь отше́ствія и́хъ къ Бо́гу,* Ему́же съ весе́ліемъ ны́нѣ предстоя́тъ* и мо́лятся о душа́хъ на́шихъ.

Же́ртвы честны́я* пе́рвѣе принося́ Бо́гови,* Ку́кшо, всеблаже́ннѣйшій о́тче,* послѣди́ же́ртву одушевле́нну* и себе́ прине́слъ еси́,* я́ко непоро́чное а́гня,* со ученико́мъ ти́ честны́мъ,* въ про́повѣди Ева́нгельскаго уче́нія мече́мъ посѣка́емь,* о не́мже пострада́лъ еси́, ра́дуяся,* и предстои́ши Христу́, всегда́ моля́ся о душа́хъ на́шихъ.

Сла́ва, гла́съ 8:

Единоу́мнымъ жела́ніемъ къ Бо́гу возве́дшеся, кора́бль души́ ва́шея добродѣ́тельми устро́ивше, отцы́ преподо́бніи, ле́гцѣ мíра волну́ющееся мо́ре преидо́сте и о посо́біи Ду́ха Свята́го, ти́хаго приста́нища достиго́сте, на не́мже су́ще, стра́сти плотскíя ду́ху покори́сте, и Христо́ви присоедини́стеся, Ему́же ны́нѣ на небеси́ предстоя́ще, прилѣ́жно моли́теся о душа́хъ на́шихъ.

И ны́нѣ, богоро́диченъ или́ крестобогоро́диченъ.

На стихо́внѣ въ окто́ихѣ. Сла́ва, преподо́бнымъ, гла́съ 6:

Та́инъ Боже́ственныя вѣ́ры невѣ́рныя Вя́тскія лю́ди уча́ще, Ку́кшо преблаже́нне со ученико́мъ твои́мъ, пре́лесть зловѣ́рія обличи́ли есте́, и уче́ніемъ ва́шимъ повину́вшіися креще́ніе свято́е воспрія́ша; и́ніи же, идолобѣ́сія тмо́ю ослѣпле́нніи, чу́вственный свѣ́тъ ва́мъ отъя́ти покуси́шася, мече́мъ главы́ ва́ша отсѣ́кше; но, отцы́ свяще́ннѣйшіи, ны́нѣ непристу́пному Свѣ́ту предстоя́ще, непреста́нно моли́теся, спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ.

Тропа́рь, гла́съ 3:

Му́ченическою кро́вію, свяще́нне Ку́кшо, въ про́повѣди Ева́нгелія со ученико́мъ ти́ блаже́ннымъ, че́стнѣ украси́выйся, и Пи́мине, въ по́стничествѣ свѣтоза́рнѣ просія́вый, въ еди́нъ де́нь и ча́съ внидо́сте въ свѣ́тъ незаходи́мый, идѣ́же моли́теся Го́сподеви, да пода́стъ на́мъ ве́лію ми́лость.


[НА УТРЕНИ,]
Кано́нъ преподо́бнымъ, гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Восхвали́ти па́мять святы́хъ равноче́стно кто́ возмо́жетъ? Честна́ бо сме́рть и́хъ предъ Тобо́ю, я́ко друго́въ Твои́хъ, Бо́же; оба́че а́зъ, ели́ко прія́хъ, хвалу́ и́мъ приношу́, и молю́ся Ти́, Влады́ко, препя́тія отъ мене́ отдали́въ, си́лою Твое́ю укрѣпи́.

Ку́кшо свяще́нне со ученико́мъ, сосу́ди свяще́нніи су́ще, пронесо́сте и́мя Христо́во предъ невѣ́рными, и́хже, зна́меньми и чудесы́ уди́вльше, къ богоразу́мію приведо́сте. Да бу́ду и а́зъ сосу́дъ въ че́сть Влады́цѣ моему́, моли́твами ва́шими мене́, отцы́, воспомози́те.

Ва́съ тріе́хъ, Ку́кшо со ученико́мъ, и Пи́мине прозорли́ве, дерза́я дне́сь хвала́ми почита́ти, молю́: предста́ните Тро́ицѣ Свято́й, о мнѣ́ моля́щеся, я́ко да тріе́хъ враго́въ: мíра, пло́ти и діа́вола, изба́влься, явлю́ся до́бръ во́инъ, си́хъ побѣди́въ.

Богоро́диченъ: Изба́вльшая человѣ́ки отъ наси́лія вра́жія пречи́стымъ рождество́мъ Твои́мъ, отъ нечи́стыхъ помышле́ній изба́ви мя́, молю́ся, и спаси́, я́ко Человѣколюби́ваго Бо́га Ма́ти.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Весели́тся вели́кая Пече́рская Ла́вра, воспита́вшая ва́съ въ нѣ́дрѣхъ свои́хъ, преподо́бніи отцы́, и любо́вію зове́тъ: Ку́кши и Пи́мина ра́ди, Христе́ мо́й, бу́ди ми́ въ печа́ли прибѣ́жище и утвержде́ніе.

Мно́гимъ твои́мъ, о́тче, добродѣ́телемъ, мно́гія свы́ше да́ры послѣ́доваху: что́ бо бо́лѣе, я́ко невѣ́рнаго въ вѣ́ру обрати́ти? Вы́шше вои́стинну е́сть, не́жели воскреси́ти уме́ршаго.

Яко апо́столъ, прише́дъ въ невѣ́рныя лю́ди, зна́меньми и чудесы́ удиви́лъ еси́ и́хъ, и си́мъ мно́гія обрати́въ къ Бо́гу, приве́лъ еси́, Ку́кшо, отъ тмы́ ко свѣ́ту. Непостоя́нна мя́ су́ща, преподо́бне, моли́твами твои́ми утверди́.

Богоро́диченъ: Апо́столомъ сла́во и му́ченикомъ добро́то, сла́вы небе́сныя ча́сти не лиши́ мя, и сподо́би добро́ты тоя́, хода́тайствомъ Пи́мина и Ку́кши, Дѣ́во Ма́ти Отрокови́це.

Сѣда́ленъ, гла́съ 2:

Да́ры любве́ святíи Твои́ пріе́мше, въ же́ртву благово́нну Тебѣ́, Христе́, принесо́ша: Пи́минъ — чистоту́ и воздержа́ніе, а́ки благопрія́тну ма́слину, Ку́кша же — кро́вь, излія́нную Ева́нгелія ра́ди, а́ки гро́здъ ло́зный; тѣ́мже досто́йно че́сти небе́сныя сподо́бишася, я́ко до́бріи подви́жницы.

Сла́ва, и ны́нѣ, богоро́диченъ:

Еле́я любве́ Тебѣ́ не принесо́хъ, Бо́же мо́й, тѣ́мже ни са́мъ ча́ю обрѣсти́ отъ Тебе́ ми́лость, но бла́гости ра́ди Твоея́, Христе́ мо́й, и хода́тайствомъ Пречи́стыя Твоея́ Ма́тере поми́луй и спаси́ мя.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Воздви́гшеся бра́нію на міроде́ржца, ополчи́стеся, отцы́ всеблаже́нніи, и прогна́сте враги́ дале́че отъ человѣ́къ, чудодѣ́йствіемъ же ва́шимъ мно́гія приведо́сте ко Христу́, Ему́же пое́мъ: сла́ва си́лѣ Твое́й, Го́споди.

Ка́плями благода́ти Бо́жія свы́ше ороше́нъ сы́й, священному́чениче Ку́кшо, о́блаки дождено́сныя своди́лъ еси́, и пролива́ху многоту́чныя на земли́ ка́пли; ка́плями моли́твъ твои́хъ ороси́ и на́съ, пою́щихъ: сла́ва си́лѣ Твое́й, Го́споди.

Пи́мине, дѣя́ній человѣ́ческихъ, изъ дале́че быва́емыхъ, Ду́хомъ Бо́жіимъ прови́дче, та́йная дѣла́ серде́цъ на́шихъ, въ забве́ніи оста́вльшаяся, на па́мять на́мъ приведи́. Аще бо и дале́че ны́нѣ еси́, но мо́жеши благода́тію Бо́жіею предста́тельствовати, тя́ на по́мощь призыва́ющимъ и пою́щимъ: сла́ва си́лѣ Твое́й, Го́споди.

Богоро́диченъ: Бу́ди ми́ въ печа́ли ско́рое посѣще́ніе, Пречи́стая Дѣ́во, Ты́ бо ра́дость па́че естества́ родила́ еси́, посѣти́вшу на́съ Восто́ку свы́ше, Имже просвѣ́щшеся, — ра́дуйся, — Тебѣ́ прино́симъ.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Ты́, преподо́бне Ку́кшо, е́зеро зловѣ́рія изсуши́лъ еси́, и изсхо́ша му́тныя во́ды, со́лнцу благовѣ́рія въ Вя́тчанѣхъ возсія́вшу; уста́ви зло́бныя пото́ки моли́твами твои́ми и на́мъ, вѣ́рою воспѣва́ющимъ тя́.

Якоже неду́жныя сло́вомъ твои́мъ исцѣли́лъ еси́, си́це и на́съ тое́южде благода́тію, отъ Бо́га ти́ да́нною, посѣти́ и посо́бствуй въ неду́зѣхъ душе́вныхъ, любо́вію па́мять твою́, Пи́мине, воспѣва́ющихъ.

Сла́ву воздади́мъ, лю́діе, въ вы́шнихъ су́щему Бо́гу, просла́вльшему святы́хъ Свои́хъ, и мо́лимъ, да моли́твами и́хъ сла́вы небе́сныя и мы́ не лиши́мся, ра́достно па́мять и́хъ воспѣва́юще.

Богоро́диченъ: Сла́ву Твою́ кто́ исповѣ́сть, Чи́стая Дѣ́во? Тя́ бо сла́вятъ небе́сныя си́лы, и мы́, припа́дающе, земнíи, сла́вимъ Тя́ и велича́емъ, пою́ще: ра́дуйся, сла́во правосла́вныхъ, Чи́стая.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Пожрѣ́ти хотя́щія мы́сленному ки́ту невѣ́рныя лю́ди изъя́лъ еси́, о́тче, святы́мъ креще́ніемъ, и Це́рковь отъ ни́хъ устро́ивъ, очи́стилъ еси́ ту́ отъ ре́бръ Спа́совыхъ ми́лостивно исте́кшею Кро́вію.

На неду́жныя ру́ки возложа́тъ, — я́коже рече́ Писа́ніе, — и здра́ви бу́дутъ. Си́це по вла́сти, отъ Христа́ тебѣ́ да́нной, сло́вомъ свои́мъ боля́щую бра́тію исцѣли́лъ еси́, и́же, отхожда́ху, сла́вяще Да́вшаго тебѣ́ вла́сть сицеву́ю. Тѣ́мже и на́съ, неду́гующихъ душе́ю, посѣти́ и сло́вомъ твои́мъ исцѣли́, Пи́мине блаже́ннѣйшій.

Досто́йно восхвали́ти ва́съ, преблаже́нніи отцы́, я́ко мно́го потруди́стеся здѣ́, кто́ возмо́жетъ? Хвали́ми же есте́ во сла́вѣ небе́сной, и ра́дуетеся на ло́жахъ ва́шихъ во свѣ́тѣ присносу́щномъ. Моли́теся, да и мы́ съ ва́ми бу́демъ, очи́стившеся отъ пречи́стыхъ ре́бръ Спа́совыхъ исте́кшею Кро́вію.

Богоро́диченъ: Хва́лимъ Тя́, блажа́ще, христіа́нстіи ро́ди, и любо́вію зове́мъ: Влады́чице, предста́ни погруже́ннымъ въ ти́нѣ скве́рныхъ дѣ́лъ, а́ще бо и окаля́хомъ ду́ши на́ша, но Ты́ мо́жеши омы́ти на́съ, искупле́нныхъ Сы́на Твоего́ честно́ю Кро́вію.

Конда́къ, гла́съ 4:

Свѣти́ла разу́мная, соше́дшеся, хвала́ми воспое́мъ, лю́діе, просія́ли бо су́ть въ мíрѣ се́мъ: Пи́минъ — мно́гими по́двиги, Ку́кша же со ученико́мъ — про́повѣдію сло́ва; и сíи тріе́, единоу́мно предстоя́ще Святѣ́й Тро́ицѣ, я́ко со́лнце сія́ютъ и просвѣща́ютъ любо́вію па́мять и́хъ восхваля́ющихъ.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Яко единоу́мное сосло́віе, отцы́ святíи, а́ще и дале́че отстоя́ тѣ́ломъ, но ду́хомъ совоку́плени, ко Го́споду востеко́сте вку́пѣ воспѣ́ти: благослове́нъ еси́ въ хра́мѣ сла́вы Твоея́, Го́споди.

Твое́, блаже́нне Ку́кшо, со ученико́мъ отъ невѣ́рныхъ Вя́тчанъ усѣче́ніе, Пи́минъ дале́че отстоя́, прозрѣ́лъ, и велегла́сно посредѣ́ це́ркве Пече́рскія воззва́: бра́тъ на́шъ Ку́кша въ се́й де́нь убіе́нъ е́сть, въ ча́съ приноси́мыя же́ртвы; сла́ва си́лѣ Твое́й, Го́споди.

Ду́хомъ Святы́мъ проре́къ Ку́кши и ученика́ отъ невѣ́рныхъ убіе́ніе, и са́мъ ду́хъ сво́й преда́лъ въ ру́цѣ Бо́гу. Тріе́хъ си́хъ преподо́бныхъ ра́ди, и на́ша ду́хи пріими́ въ сла́ву Твою́, Го́споди.

Богоро́диченъ: Ду́ха Свята́го наше́ствіемъ Пріе́мшая во чре́вѣ, въ ча́съ, егда́ и́мамы преда́ти ду́хи на́ша Го́споду и предста́ти суди́щу Его́, хода́тайствомъ Твои́мъ, предста́ни и умоли́ о на́съ бла́гость Его́, ничто́же бо невозмо́жно хода́тайству Твоему́.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Ру́цѣ распросте́рше къ Бо́гу, о на́съ, пою́щихъ па́мять ва́шу, моли́теся прилѣ́жно, отцы́ богоно́сніи, я́ко да ва́шимъ хода́тайствомъ во свѣ́тѣ присносу́щномъ обря́щемся зрѣ́ти Го́спода.

Ты́, священному́чениче Ку́кшо, со ученико́мъ ти́ честны́мъ, я́ко вино́ растворе́нно прине́сши кро́вь свою́, моли́ся, да изба́вимся наше́ствія враго́въ, и́щущихъ на́шея кро́ве, и въ мíрѣ про́чее благослови́мъ Го́спода.

Пи́мине богому́дре, прови́дяй дале́че и гряду́щая провозвѣща́яй, я́ко проро́къ Бо́жій, отъ гряду́щихъ на ны́ за прегрѣше́нія зо́лъ изми́ ско́рымъ твои́мъ моле́ніемъ ко Влады́цѣ и сподо́би въ небе́сныхъ селе́ніихъ благослови́ти Го́спода во вѣ́ки.

Богоро́диченъ: Истинно прови́дѣ Тя́ преподо́бный Бо́жій, я́ко въ мíрѣ живу́щимъ помога́еши лю́демъ вы́ну; мо́лимъ Тя́, Влады́чице: помози́ и на́мъ, немощны́мъ, да си́лою о Тебѣ́ препоя́санни, возмо́жемъ благослови́ти Го́спода во вѣ́ки.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Проповѣ́дуемый тобо́ю, свяще́нне Ку́кшо, Христо́съ невѣ́рующимъ бы́сть ка́мень претыка́нія, обличе́ніе бо твое́ о зловѣ́ріи и́хъ въ собла́знъ и доса́ду вмѣни́ша; сего́ ра́ди бу́іи, несмы́сленно на тя́ со ученико́мъ твои́мъ напа́дше, мече́мъ главы́ ва́ша отсѣко́ша. Тѣ́мъ ва́съ, я́ко за Христа́ кро́вь свою́ пролія́вшихъ, ку́пно велича́емъ.

Ты́, преблаже́нне Пи́мине, терпѣ́ніемъ на Христѣ́ — Ка́мени себе́ утверди́въ, непреткнове́нно проше́лъ еси́ претыка́ющаго врага́ собла́зненныя сѣ́ти, па́че же ты́я, а́ки паучи́ну, расто́рглъ еси́, и къ вы́шнимъ преше́дъ, наслажда́ешися вѣ́чныя сла́вы, тѣ́мъ тя́ велича́емъ.

Ду́хомъ совоку́пленни въ вы́шнихъ селе́ніихъ живу́ще, на на́съ, ни́жнихъ, призри́те, отцы́ преподо́бніи, зане́ вси́ отъ лю́таго борца́ въ бѣда́хъ есмы́, отъ него́же моли́теся изба́витися на́мъ, я́ко па́мять ва́шу пѣ́сньми велича́емъ.

Богоро́диченъ: Отъ вѣ́ка несвѣ́домую та́йну пріе́мшая, и воплоще́ніемъ Сло́ва Бо́жія откры́вшая мíру, молю́тися, Марíе Богоневѣ́сто: отъ та́йныхъ мои́хъ очи́сти мя́, да не откры́ются предъ а́нгелы и человѣ́ки въ де́нь о́ный, егда́ пріи́детъ Сы́нъ Тво́й суди́ти мíру.

Свѣти́ленъ:

Дне́сь благонаро́читое на́мъ показа́ся вре́мя, въ не́же пеще́ра свята́я пое́тъ богоно́сныхъ, въ не́йже и мы́, совоку́пльшеся, Ку́кшу со ученико́мъ сла́вимъ, Пи́мина пое́мъ, и Бо́га Еди́наго въ Тро́ицѣ, покланя́ющеся, восхваля́емъ.

Сла́ва, и ны́нѣ, богоро́диченъ:

Времена́ и лѣ́та во Свое́й вла́сти Положи́вшаго, въ лѣ́то ро́ждши, безму́жная Дѣ́во, лѣ́та на́ша плету́щаяся, а́ки паучи́на, моли́твами преподо́бныхъ до́брѣ устро́й, да Ро́ждшагося изъ Тебе́ сла́вимъ, и Тя́ любе́зно велича́емъ.

На стихо́внѣ во окто́иху стихи́ры, и преподо́бнымъ, гла́съ 4:

Сти́хъ: Мно́ги ско́рби пра́веднымъ и отъ всѣ́хъ и́хъ изба́витъ я́ Госпо́дь.

По́двигомъ до́брымъ, Пи́мине сла́вне, и му́ченическою кро́вію Ку́кшо преблаже́нне, съ послѣ́дующимъ ти́ ученико́мъ, написа́стеся въ во́инство Царя́ Небе́снаго, и бы́сте крѣ́пцыи ору́жницы на враги́ мы́сленныя, тве́рдымъ бо ополче́ніемъ низложи́сте тѣ́хъ до конца́, и я́ко побѣди́теліе, вѣнцы́ пріе́мше, ра́дуетеся въ небе́сныхъ селе́ніихъ, отню́дуже призри́те на ны́, чту́щія святу́ю па́мять ва́шу.

Сла́ва, гла́съ 5:

Прему́драго Учи́теля — Христа́ Бо́га на́шего, му́дріи ученицы́ яви́стеся, сло́во бо дѣ́ломъ испо́лнисте, въ мíрѣ се́мъ ду́ши своя́ презрѣ́сте, о тѣлеси́ не ради́сте, вся́кое пристра́стіе су́етное отверго́сте, на міроде́ржца ополчи́стеся, ду́хомъ води́ми, плотскíя стра́сти побѣди́сте, Ку́кшо со ученико́мъ мече́мъ усѣка́еми, Пи́мине по́стническими труды́ вра́жію си́лу низложи́вый. Но, отцы́ всеблаже́нніи, ра́тующаго на́съ вы́ну супоста́та низложи́ти, моли́твами ва́шими пособи́те, и испроси́те душа́мъ на́шимъ ве́лію ми́лость.

И ны́нѣ, богоро́диченъ или́ крестобогоро́диченъ.
[Ектенія.] И отпу́стъ.

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 133 об. – 137.

/ Къ оглавленію раздѣла /


Наверхъ / Къ титульной страницѣ

0