Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 27-й де́нь.
Преподо́бнаго отца́ на́шего Пи́мена [Вели́каго].

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: Что́ вы нарече́мъ.

Что́ тя ны́нѣ, Пи́мене, имену́емъ?* Мона́ховъ о́бразъ и исцѣле́ній самодѣ́лателя,* воздержа́нія ра́нами стра́сти уязви́вша душе́вныя,* граждани́на а́нгеловъ и собесѣ́дника,* вы́шнія митропо́ліи жи́теля,* добродѣ́телей сосу́дъ* и благочести́выхъ утвержде́ніе.* Моли́ спасти́ся душа́мъ на́шимъ.

Что́ тя ны́нѣ, Пи́мене, провѣща́емъ?* Пусты́ни жи́теля и безмо́лвію рачи́теля,* страсте́й искорени́теля и мона́ховъ наста́вника,* наводне́ніе уче́ній Боже́ственнаго Ду́ха,* свѣти́льника разсужде́нія неусы́пна,* чудодѣ́йственника и́стинна,* стра́сти разли́чныя исцѣля́юща.* Моли́ спасти́ся душа́мъ на́шимъ.

Свѣти́льникъ разсужде́нія бы́въ,* озаря́я ду́ши приступа́ющія къ тебѣ́ вѣ́рно* и стезю́ жи́зни показу́я тѣ́мъ, му́дре.* Тѣ́мже тя́ хвала́ми ублажа́емъ,* соверша́юще свято́е твое́ торжество́,* Пи́мене, отце́въ похвало́,* по́стниковъ удобре́ніе.* Моли́ спасти́ся душа́мъ на́шимъ.

Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ. Де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Ви́дящи Тя́ распина́ема, Христе́, Тебе́ Ро́ждшая вопія́ше: что́ стра́нное, е́же ви́жу, та́инство, Сы́не Мо́й? Ка́ко на дре́вѣ умира́еши, пло́тію повѣ́шенъ, жи́зни Пода́телю?

На стихо́внѣ окто́иха. Сла́ва, гла́съ 8. Самогла́сенъ:

Мона́ховъ мно́жества, наста́вника тя́ почита́емъ, о́тче на́шъ Пи́мене, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ и вра́жію обличи́вый си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́ми же моли́ся Го́сподеви, поми́ловатися душа́мъ на́шимъ.

И ны́нѣ, богоро́диченъ или крестобогоро́диченъ. Подо́бенъ: О, пресла́внаго чудесе́.

Агница, Агнца я́ко ви́дѣ,* на дре́вѣ просте́рта во́лею кре́стнѣмъ,* вопія́ше ма́терски,* болѣ́знующи съ пла́чемъ:* Сы́не Мо́й, что́ стра́нное сіе́ видѣ́ніе?* Всѣ́мъ живо́тъ дая́й я́ко Госпо́дь,* ка́ко умерщвля́ешися, Долготерпѣли́ве,* земны́мъ подая́ воскресе́ніе?* Сла́влю Твое́ мно́гое, Бо́же Мо́й, снизхожде́ніе.

Тропа́рь, гла́съ 8:

Сле́зъ твои́хъ тече́ньми пусты́ни безпло́дное воздѣ́лалъ еси́, и и́же изъ глубины́ воздыха́ньми, во сто́ трудо́въ уплодоноси́лъ еси́, и бы́лъ еси́ свѣти́льникъ вселе́ннѣй, сія́я чудесы́, Пи́мене, о́тче на́шъ, моли́ Христа́ Бо́га спасти́ся душа́мъ на́шимъ.


НА УТРЕНИ,
Оба кано́на окто́иха, и свята́го кано́нъ на 4, гла́съ 8. Творе́ніе Ѳеофа́ново.

Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Теплото́ю Утѣ́шителя, о́тче, согрѣва́емо се́рдце твое́, ле́дъ де́монскій и страсте́й зи́му разруши́.

Углемъ боже́ственного стра́ха опали́въ страсте́й ве́щь, бы́лъ еси́ разсужде́нія свѣти́льникъ, безстра́стіе же, блаже́нне, о́гненно.

Нося́ на ра́мѣ, о́тче, кре́стъ тво́й, послѣ́довалъ еси́ Зову́щему любо́вію и свѣти́льникъ мона́ховъ бы́лъ еси́.

Богоро́диченъ: Всего́ мя́ спаса́етъ Сло́во Пребоже́ственное, бла́гостію восхотѣ́въ изъ чре́ва Твоего́ воплоти́тися, Чи́стая Ма́ти Дѣ́во.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Стоя́нію всено́щному твоему́ удиви́шася а́нгели, и́бо тѣ́хъ имѣ́лъ еси́ споспѣ́шниковъ и́же къ Бо́гу въ моли́твахъ.

Слѣпоту́ оттря́слъ еси́ страсте́й отъ ума́ твоего́ оче́съ, тѣ́мже прозира́лъ еси́ чи́сто Неви́димаго.

Яко млеко́мъ воздержа́нія воспита́вся, Пи́мене преподо́бне, на высоту́ добродѣ́телей возвы́сился еси́ въ соверше́нное безстра́стіе.

Богоро́диченъ: Имѣ́я Тя́ Помо́щницу, враго́въ стремле́нія, Чи́стая, не убою́ся: имѣ́я Тя́ Предста́тельницу, тѣ́хъ побѣжда́ю полки́.

Сѣда́ленъ, гла́съ 3. Подо́бенъ: Боже́ственныя вѣ́ры.

Пасо́мь отъ Го́спода, Сего́ овча́ яви́лся еси́ кро́тко, сопроти́вныя, блаже́нне, во́лки побѣжда́я, и сконча́въ боже́ственный по́двигъ тво́й, въ небе́сную огра́ду всели́лся еси́, о́тче преподо́бне. Христа́ Бо́га прилѣ́жно моли́, дарова́ти на́мъ ве́лію ми́лость.

Сла́ва, и ны́нѣ, богоро́диченъ:

Боже́ственнаго естества́ не отлу́чся, пло́ть бы́въ во чре́вѣ Твое́мъ, но Бо́гъ вочеловѣ́чся и пребы́сть, Иже по рождествѣ́ Ма́терь Тя́ Дѣ́ву, я́ко пре́жде рождества́, сохрани́въ Всенепоро́чну, еди́нъ Госпо́дь. Того́ прилѣ́жно моли́, дарова́ти на́мъ ве́лію ми́лость.

Крестобогоро́диченъ:

Нескве́рная Агница Сло́ва, Нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни Прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Нескве́рное зерца́ло, утѣ́шительную зарю́ пріе́мъ, богоно́се, бы́лъ еси́ и прія́телище боже́ственныхъ восхожде́ній.

Напая́емо дре́во слеза́ми яви́лся еси́, о́тче, высокора́слено, воздержа́ніемъ удобря́емо и плоды́ боже́ственными направля́емо.

Воздѣ́лалъ еси́ ни́ву твоего́ ума́ болѣ́зньми воздержа́нія, добродѣ́телей кла́съ многопло́денъ и чуде́съ благода́ть разплоди́лъ еси́.

Богоро́диченъ: Дѣ́вства сосу́де и невмѣсти́маго естества́ селе́ніе, ду́шу мою́ просвѣти́ омраче́нную, Богоневѣ́сто.

Пѣ́снь 5.

Ирмо́съ: Утренююще вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́, ино́го не вѣ́мы.

Ва́ръ поне́съ, сла́вне, дневны́й, ра́дости сподо́бился еси́ Го́спода твоего́, преподо́бне.

Воздержа́нія удо́лій сладково́ненъ прозя́блъ еси́ шипо́къ, дыха́ніи Бо́жія ра́зума благово́нствуя концы́.

Пе́рвѣе вельми́ хва́лящагося, о́тче, змíя, къ земли́ смири́лъ еси́, смире́ніемъ огра́ждся.

Богоро́диченъ: Дѣ́ву по рождествѣ́ пое́мъ Тя́, Богоро́дице: Ты́ бо Бо́га Сло́ва пло́тію мíру родила́ еси́.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Умертви́въ тѣле́сная стремле́нія мно́гими по́двиги, къ жи́зни безсме́ртнѣй отше́лъ еси́, Пи́мене досточу́дне.

Воздержа́ніе при́сно, моли́тву и любо́вь нелицемѣ́рну стяжа́въ, преподо́бне, нескве́рно Бо́жіе яви́лся еси́ зерца́ло.

Въ пусты́няхъ непрохо́дныхъ живы́й, страсте́й пусто́шныхъ себе́ обнажи́лъ еси́ и граждани́нъ небе́сный бы́лъ еси́.

Богоро́диченъ: Яже еди́на сло́вомъ пло́тію Сло́во ро́ждши, изба́ви, мо́лимся, отъ сѣте́й вра́жіихъ ду́ши на́ша.

Конда́къ, гла́съ 4. Подо́бенъ: Яви́лся еси́.

Свѣ́тлыхъ по́двигъ твои́хъ, преподо́бне о́тче, наста́ дне́сь свята́я па́мять твоя́, ду́ши благочести́выхъ веселя́щи, Пи́мене богому́дре, о́тче на́шъ преподо́бне.

Икосъ:

Душетлѣ́нныя сла́сти и молвы́ мірскíя вседу́шно возненави́дѣвъ и Христа́ возжела́въ, кре́стъ Его́ взе́мъ на свою́ ра́му, послѣ́довалъ еси́ Ему́ неосла́бнымъ жела́ніемъ, и воздержа́ніи подви́гся, невеще́ственно стяжа́лъ еси́ житіе́, въ постѣ́хъ, и слеза́хъ, и моли́твахъ непреста́нныхъ. Тѣ́мже и Спа́съ тебѣ́ дарова́ Ца́рство небе́сное, сподо́бль незаходи́маго свѣ́та и зари́ непристу́пныя, Пи́мене богому́дре, о́тче на́шъ преподо́бне.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Въ боже́ственныхъ упражня́яся видѣ́ніихъ, просвѣща́яся невеще́ственными заря́ми, и дне́ сы́нъ и свѣ́тъ су́щимъ во тмѣ́ я́ко вои́стинну бы́лъ еси́, богоно́се, во вѣ́ки.

Взя́тся на высоту́ безстра́стія съ пло́тію, а́нгеломъ подо́бяся, рая́ пи́щи бы́лъ еси́ наслѣ́дникъ, взыва́я, блаже́нне: Бо́же, благослове́нъ еси́.

Сія́я заре́ю безстра́стія, омрачи́лъ еси́ де́монская искуше́нія и си́хъ мно́ги озлобле́нія изба́ви, вопію́щія, преподо́бне: Бо́же, благослове́нъ еси́.

Богоро́диченъ: Се́, Юже рече́ Дѣ́ву Ду́хомъ вели́кій Иса́ія, во чре́вѣ Бо́га зача́тъ и ражда́етъ, Ему́же пою́ще, зове́мъ: Бо́же, благослове́нъ еси́.

Пѣ́снь 8.

Ирмо́съ: Безнача́льнаго Царя́ сла́вы, Его́же трепе́щутъ небе́сныя си́лы, по́йте, свяще́нницы, лю́діе, превозноси́те во вся́ вѣ́ки.

Недрема́нно душе́вную свѣщу́ еле́емъ твои́хъ по́двигъ соблю́дъ, вше́лъ еси́ съ ра́достію въ нетлѣ́ненъ черто́гъ и живе́ши во вѣ́ки.

Не поколеба́ша души́ твоея́ столпа́ вѣ́тры нечи́стыхъ духо́въ: утверди́ бо ся на ка́мени вѣ́ры, всеблаже́нне богоно́се.

Злообра́зную страсте́й совле́клъ еси́ ри́зу, обле́клся еси́, блаже́нне, въ кра́сную оде́жду боже́ственнаго безстра́стія, Христу́ сца́рствуя.

Богоро́диченъ: Яко честны́й и превознесе́нный престо́лъ су́щую Бо́га Вы́шняго, воспое́мъ, лю́діе, еди́ну по рождествѣ́ Дѣ́ву сохра́ншуюся.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Заше́лъ еси́ у́бо, я́коже звѣзда́, отъ мíра, у Христа́ же возсія́лъ еси́, у́мнаго вои́стинну Пра́вды, всеблаже́нне, Со́лнца, и я́коже зарю́, вѣ́рнымъ, твоя́ оста́вилъ еси́ свѣтови́дныя добродѣ́тели, отъе́млющія ду́шъ омраче́ніе.

Честна́ предъ Бо́гомъ твоя́ сме́рть, сла́вне, бы́сть: и́бо преподо́бно на земли́ пожи́лъ еси́, Сего́ повелѣ́нія и оправда́нія, Пи́мене, соблю́дъ невре́дна. Тѣ́мже возсія́ я́ко пра́веднику тебѣ́ Свѣ́тъ невече́рній.

Боже́ственными, о́тче, добро́тами наслажда́яся, и прича́стіемъ обожа́емь, и вели́кому Свѣ́ту просвѣще́нъ ны́нѣ предстоя́, и кра́йнимъ жела́ніемъ прибли́жился еси́ яснѣ́йше. Тя́ чту́щія, Пи́мене, и творя́щія твою́ па́мять помина́й.

Богоро́диченъ: Уста́вила еси́ еди́на въ жена́хъ кля́тву первозда́нныхъ, Богоневѣ́сто, Неопи́саннаго пло́тію ро́ждши опису́ема, обнови́ла еси́ зако́ны естества́, Нескве́рная, разстоя́щія пе́рвѣе, пресла́внымъ хода́тайствомъ Твои́мъ соедини́ла еси́.

Свѣти́ленъ. Подо́бенъ: Не́бо звѣзда́ми.

Ангельскаго житія́ жела́я, удали́лся еси́, Пи́мене, въ пусты́ни, и стра́сти покори́лъ еси́ плотскíя, равноа́нгеленъ яви́лся еси́, о́тче на́шъ богоно́се.

Сла́ва, и ны́нѣ, богоро́диченъ:

Держа́внымъ Твои́мъ покро́вомъ отъ враго́въ навѣ́та на́съ, Чи́стая, Твоя́ рабы́, сохрани́ вся́ невре́дны: Тебе́ бо стяжа́хомъ еди́ну прибѣ́жище въ ну́ждахъ.


НА ЛИТУРГІИ,

[Блаже́нна отъ кано́на, пѣ́снь 3 и 6.] Проки́менъ, [гла́съ 7:] Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. [Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе Матѳе́я, зача́ло 10. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 259 об. – 263.

/ Къ оглавленію раздѣла /


Наверхъ / Къ титульной страницѣ

0