Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 26-й де́нь.
Святы́хъ му́ченикъ Адріа́на и Ната́ліи.

[ВЕЧЕРЪ,]
На Го́споди воззва́хъ: стихи́ры святы́хъ, гла́съ 4. Подо́бенъ: Яко до́бля.

Пречестно́е страда́ніе,* до́блественная боре́нія* му́чениковъ, сла́вне, узрѣ́въ,* самово́льнѣ вда́лся еси́ къ подвиго́мъ му́жескимъ умо́мъ,* не пощади́въ пло́ти любве́ ра́ди Боже́ственныя.* Тѣ́мже проше́лъ еси́* до́блественныя по́двиги,* смири́въ го́рдость сопроти́внаго,* Адріа́не терпѣливоду́шне.

Въ темни́цахъ затворя́емь,* волу́ями жи́лами біе́мь,* желѣ́зами же, сла́вне, отягчева́емь* и ка́меніемъ сокруша́емь,* со мно́жествомъ му́ченикъ,* съ ни́миже блага́я небе́сная получи́лъ еси́,* споспѣ́шницу супру́жницу имѣ́я Ната́лію,* на Бо́га упова́вшую,* Адріа́не до́блественный.

Ада́ма супру́жница изъ рая́ изгна́* совѣ́томъ зміи́нымъ;* Ната́лія же Адріа́на въ ра́й прему́дро введе́,* свяще́нными бесѣ́дами,* уче́ніи наказу́ющи* болѣ́зненная страда́нія терпѣ́ти,* небе́сная воздая́нія хода́тайствующи* и вѣ́чнующую сла́ву.

Сла́ва, гла́съ 6:

О, супру́же святы́й и избра́нный Го́споду! О, версто́ изря́дная и блаже́нная Бо́гу! О, вожделѣ́нная дво́ице и возлю́бленная Христу́! Кто́ не удиви́тся о се́мъ услы́шавъ, си́хъ я́же вы́ше человѣ́ка дѣя́нія? Ка́ко же́нскій по́лъ вмужи́ся на го́рькаго мучи́теля и своего́ све́рстника укрѣпи́ не вда́тися лю́тымъ, но о вѣ́рѣ избра́ти, е́же умре́ти па́че, не́же жи́ти? О, богоплете́нныхъ глаго́лъ Ната́ліи прему́дрыя! О, поуче́ній боже́ственныхъ, небеса́ преше́дшихъ и къ самому́ престо́лу Вели́каго Царя́, Адріа́на сла́внаго зна́ема поста́вльшихъ! Но, о дво́ице свята́я! О на́съ Бо́гу моли́теся, любо́вію творя́щихъ па́мять ва́шу, напа́стей изба́вити и вся́кія ско́рби.

И ны́нѣ, богоро́диченъ или́ крестобогоро́диченъ. Подо́бенъ: Все́ отло́жше.

Ору́жіе, я́коже рече́ Симео́нъ,* се́рдце Твое́ про́йде, Пречи́стая Влады́чице,* егда́ узрѣ́ла еси́ изъ Тебе́ Возсія́вшаго* неизрече́ннымъ сло́вомъ,* отъ беззако́нныхъ я́ко осужде́на,* возноси́ма на кре́стъ,* о́цтомъ и же́лчію напая́емаго,* ре́бра же пробода́ема,* и ру́цѣ и но́зѣ пригвожда́емы,* и рыда́ющи восклица́ше,* ма́терски вопію́щи:* что́ сіе́, Ча́до Сладча́йшее, но́вое та́инство?

На стихо́внѣ окто́иха. Сла́ва, гла́съ 1. Ефре́ма Карíя:

Ре́вность му́жа благочести́ва, привлече́ жену́ боголюби́вую къ поуче́нію свѣ́тлу; Адріа́нъ бо всеизря́дный, Ната́ліиными глаго́лы приведе́ся, страда́нія тече́ніе соверши́лъ е́сть. О, жены́ боголюби́выя нра́ва! Не я́коже бо Ева принесе́ Ада́му тлѣ́ніе, но жи́знь несконча́ему супру́гу исхода́таи. Сію́ съ му́жемъ похваля́юще, возопіе́мъ Христу́: да́ждь на́мъ по́мощь моли́твами святы́хъ Твои́хъ.

И ны́нѣ, богоро́диченъ или́ крестобогоро́диченъ. Подо́бенъ: Небе́сныхъ чино́въ.

У креста́ предстоя́щи Сы́на и Бо́га Твоего́* и долготерпѣ́ніе Того́ смотря́ющи,* глаго́лаше, пла́чущи, Ма́ти Чи́стая:* увы́ Мнѣ́, Ча́до Сладча́йшее!* Что́ сія́ стра́ждеши непра́ведно, Сло́ве Бо́жій,* да спасе́ши человѣ́чество?

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.


НА УТРЕНИ,
Оба кано́на окто́иха и святы́хъ на 4, гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Въ нощи́ мя житія́, сно́мъ лю́тымъ одержи́ма дѣя́ній, къ свѣ́ту покая́нія, Бо́же, воздви́гни моли́твами му́ченикъ Твои́хъ, Христе́, да сла́влю Тя́.

Восто́комъ мы́сленнаго со́лнца озари́вшеся му́ченицы и дне́ сы́нове бы́вше, всю́ и́дольскую мглу́ крѣ́пко потреби́сте.

Отъ усте́нъ, иска́пающихъ сла́дости Боже́ственнаго ра́зума, наслади́вся, Адріа́не, я́дъ изблева́лъ еси́ пре́жняго неразу́мія, вои́стинну, богоблаже́нне.

Богоро́диченъ: Твоего́ пріе́мши Содѣ́теля, я́ко Са́мъ восхотѣ́, отъ безсѣ́менна Твоего́ чре́ва, па́че ума́ воплоща́ема, Чи́стая, тва́ри вои́стинну яви́лася еси́ Влады́чица.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Узъ избѣжа́въ и́дольскаго су́етства, му́чениче, связа́лся еси́ жела́ніемъ любве́ Христо́вы, и у́замъ страда́лецъ Его́ ра́достію пріобщи́лся еси́.

Заво́рами желѣ́зными го́лени сокруша́еми, страстоте́рпцы Госпо́дни, нече́стія ко́сти терпѣ́нія заво́рами и му́жествомъ вои́стинну сокруши́сте.

Огне́мъ любве́ Боже́ственныя ду́шу опаля́ему супру́га, распали́ла еси́ жела́ніе ко Христу́, любо́вь плотску́ю, Ната́ліе, до конца́ возненави́дѣвши.

Богоро́диченъ: Боже́ственнаго рождества́ Твоего́, Чи́стая, вся́кій естества́ чи́нъ превосхо́дитъ чу́до: Бо́га бо преесте́ственнѣ зачала́ еси́ во чре́вѣ, и ро́ждши, пребыва́еши Приснодѣ́ва.

Конда́къ, гла́съ 4:

Жены́ богому́дрыя боже́ственная словеса́ въ се́рдцѣ положи́въ, Адріа́не, му́чениче Христо́въ, къ муче́ніямъ усе́рдно устреми́лся еси́, съ супру́гою вѣне́цъ пріе́мь.

Сѣда́ленъ, гла́съ 4. Подо́бенъ: Удиви́ся Іо́сифъ.

Нече́стія запале́ніе благоче́стія ороше́ніемъ угаси́лъ еси́, страстоте́рпче, сокруше́ніемъ твои́хъ удо́въ, и́дольскую крѣ́пость истни́лъ еси́, супру́жницу обрѣ́тъ помо́щницу ко всѣ́мъ лю́тымъ, му́чениче, ополче́ніемъ, съ не́юже въ вы́шнее всели́лся еси́ Ца́рство, Адріа́не, крѣпкоду́шне. Христу́ моли́ся да́ти всѣ́мъ, чту́щимъ тя́, ми́лость.

Сла́ва, и ны́нѣ, богоро́диченъ:

Треволне́ніи страстны́ми безсо́вѣстный а́зъ обурева́емь, Чи́стая, призыва́ю Тя́ те́плѣ, да не пре́зриши мене́, окая́ннаго, поги́бнути, бе́здну милосе́рдія ро́ждши, ра́звѣ бо Тебе́, наде́жды не и́мамъ. Да не враго́мъ у́бо обра́дованіе и смѣ́хъ, надѣ́явся на Тя́, явлю́ся, и́бо мо́жеши, ели́ко хо́щеши, я́ко Ма́ти су́щи всѣ́хъ Бо́га.

Крестобогоро́диченъ:

Дѣ́ва и Агница, ви́дѣвши на крестѣ́, безъ сѣ́мене изъ Нея́ Агнца ро́ждшагося и копіе́мъ прободе́на, печа́ли уя́звлена стрѣла́ми, вопія́ше болѣ́зненно, восклица́ющи: что́ но́вое та́инство? Ка́ко умира́еши, Иже живота́ еди́нъ Госпо́дь? Тѣ́мже воскресни́, па́дшаго воздвиза́я пра́отца.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Христа́ му́ченицы крѣ́пость стяжа́вше, некрѣ́пкое суровство́ гони́телей вои́стинну попра́вше, и вѣнцы́ побѣ́ды съ небесе́ прія́ша.

Гно́емъ, всю́ду обтека́ющимъ святы́хъ тѣлесе́мъ, мѵ́ро Бо́гу вои́стинну принесе́ся, гное́ніе пре́лести очища́ющее держа́вно.

Твои́ми кровьми́ оде́жду обагри́лъ еси́ себѣ́ нетлѣ́нія, совле́къ тлѣ́нія оде́жду, и Христу́, Адріа́не, со сла́вою ны́нѣ предстои́ши.

Богоро́диченъ: Яко вои́стинну неизвѣща́нна и непостижи́ма, я́же Твоего́ боголѣ́пнаго, Богоро́дице, су́ть рождества́, су́щимъ на земли́ и на небеси́, Приснодѣ́во, та́инства.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Десяти́ца сугу́ба страда́лецъ съ просто́ю тро́ицею, Христа́ ны́нѣ моля́ще, разрѣши́ша соу́зъ нече́стія, су́ща безкрѣ́постна, крѣ́постію Тро́ичною, до́блественніи.

Якоже со́лнце, посредѣ́ стоя́ звѣ́здъ свѣ́тлыхъ, Адріа́не, съ тобо́ю стра́ждущихъ облиста́лъ еси́ свѣ́томъ благоче́стія, нече́стія мглу́ отгна́въ, и просвѣти́лъ еси́ мíра концы́.

Роса́ глаго́лъ твои́хъ честны́хъ, исцѣле́ніе болѣ́зней вои́стинну твоему́ супру́жнику бы́сть, вкуси́вшу лу́чшихъ любо́вь, богому́драя Ната́ліе, му́чениковъ сожи́тельнице.

Богоро́диченъ: Богоро́дицу Тя́ отъ души́, Влады́чице мíра Блага́я, исповѣ́дающихъ спаси́: Тя́ бо предста́тельство непобори́мое и́мамы, и́стинную Богороди́тельницу.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Христо́вою окормля́еми дла́нію благоче́стно, безбо́жія пучи́ну преидо́сте и ко приста́нищу ти́хому вы́шнія свѣ́тлости, страда́льцы Госпо́дни, устреми́стеся.

Яко цвѣ́ти, благоуха́ютъ по́двигъ твои́хъ, му́дре, я́же па́че естества́ одолѣ́нія, и́бо Бо́жіе яви́лся еси́, Адріа́не, благово́нно кади́ло, огне́мъ му́къ опаля́емь.

Добро́тою вѣ́ры свята́я твоя́ душа́ укра́шена, всечестна́я, и добро́ту и́щущи, я́ко вои́стинну Христо́ву безмѣ́рную, Ната́ліе, жела́нія не погрѣши́.

Богоро́диченъ: Всечи́стая Влады́чице, ро́ждшая человѣ́комъ ко́рмчія Го́спода, страсте́й мои́хъ непостоя́нное и лю́тое утоли́ смуще́ніе, и тишину́ пода́ждь се́рдцу моему́.

Конда́къ, гла́съ 4. Подо́бенъ: Яви́лся еси́ дне́сь.

Му́ченикъ возсія́ боже́ственная па́мять, и земны́я озари́ вся́ концы́ свѣ́тло, съ весе́ліемъ зову́щихъ: Ты́ еси́ му́чениковъ, Христе́, ра́дованіе.

Икосъ:

На дре́вѣ кре́стнѣмъ пло́тію пригвожде́ннаго, Христа́ Царя́ возжела́вше до́блественнѣ, во́ини, усе́рдно болѣ́зни лю́тыя и му́ки стра́шныя претерпѣ́ша, попра́вше и́дольское нече́стіе все́, и беззако́нныхъ сопротивле́нія низло́жше, десяти́ца сугу́бая и тро́ица му́ченикъ. Тѣ́мже Адріа́нъ и Ната́лія, супру́гъ кра́сный си́хъ зря́ще, поревнова́ша и́мъ, и ра́дующеся, вопію́тъ: Ты́ еси́ му́чениковъ, Христе́, ра́дованіе.

Пѣ́снь 7.

Ирмо́съ: Росода́тельну у́бо пе́щь содѣ́ла Ангелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Необори́мы я́коже столпы́ яви́стеся, Сіо́на вы́шняго му́ченицы, низложи́вше утвержде́нія вся́ вра́жія терпѣ́ніемъ страда́нія ва́шего. Тѣ́мже почита́емъ благоче́стно ва́шу па́мять при́сно.

Помо́щница Адріа́ну Ната́лія я́ко единоду́шна отъ Бо́га дарова́ся, извлача́щи углѣ́бша сего́ во глубинѣ́ пре́лести и увѣря́ющи вопи́ти: благослове́нъ Бо́гъ оте́цъ на́шихъ.

Яко многоцѣ́нно сокро́вище, му́ченика ру́ку скры́вши, не предала́ еси́ цѣлому́дрія твоего́ сокро́вища укра́сти тща́щимся, честна́я, окормля́ема руко́ю отце́въ Бо́га.

Богоро́диченъ: Свяще́нніи проро́цы провозвѣсти́ша, Чи́стая, явле́нно та́инство честна́го рождества́ Твоего́, и ны́нѣ мы́, сбытія́ издале́ча смотря́юще, благоче́стно Тя́ ублажа́емъ.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Огне́мъ муче́нія всесожига́еми, нече́стія пла́мень ве́сь угаси́сте кровьми́ ва́шими, страда́льцы, зову́ще: Тя́ превозно́симъ, Христе́, во вся́ вѣ́ки.

Жены́ чу́дныя кто́ не удиви́тся су́щія къ Бо́гу любви́? Яко возненави́дѣ жела́ніе плотско́е, и супру́жника увѣ́ри чести́ и сла́вити Христа́ во вѣ́ки вся́.

Посрами́въ безбо́жныхъ су́етства и возжела́въ Христо́ву красоту́, сто́лпъ благоче́стія вѣ́рнымъ бы́лъ еси́, му́чениче, страстоте́рпче Адріа́не всеблаже́нне.

Богоро́диченъ: Отъ Свѣ́та Свѣтода́вца Сло́ва зачала́ еси́, и ро́ждши несказа́нно Пресу́щественнаго: Ду́хъ бо въ Тя́, Дѣ́во, Бо́жій всели́ся. Тѣ́мже Тя́ пое́мъ, Чи́стая, во вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Удо́въ сокруше́ніе, лю́тыхъ преще́нія, ни ме́чь, ни о́гнь, ни сме́рть пло́ти тлѣ́нныя, Христо́вы любве́ разлучи́ти ва́съ, сла́вніи страда́льцы, отню́дъ возмого́ша. Тѣ́мже во вѣ́ки съ Ни́мъ при́сно веселите́ся.

Свѣщи́ богосвѣ́тлы, звѣ́зды сія́ющія, свѣти́льницы, на́мъ свѣ́тъ благоче́стія озаря́юще, со́лнца сла́вы сія́нія, чада невече́рняго блаже́нства, му́ченицы яви́стеся Христо́вы всечестнíи.

Исто́чникъ во́дъ испо́лненъ духо́вныхъ, и рѣка́, Боже́ственныхъ дарова́ній испо́лнена, и ча́ша страда́нія пролива́ющая то́ки, пучи́ны спасе́нія, му́ченицы яви́стеся, бу́ри напа́стей разли́чныхъ на́съ избавля́юще.

Богородиченъ: Мертвымъ востаніе нынѣ даровася Твоимъ несказаннымъ и неизреченнымъ рождествомъ, Богородице Всечистая: Жизнь бо изъ Тебе, плотію обложена, всѣмъ возсія и смертную дряхлость явѣ разруши.

Свѣти́ленъ. Подо́бенъ: Жены́, услы́шите.

Адріа́нъ всему́дрый, страда́льцевъ утвержде́ніе, съ честно́ю Ната́ліею пѣ́сньми досто́йно да почти́тся, съ ни́миже облиста́етъ му́ченикъ собо́ръ святы́й. Ихже свѣ́тлое торжество́ соверша́юще благочестному́дренно, пое́мъ пѣ́сньми боже́ственными.

Сла́ва, и ны́нѣ, богоро́диченъ:

Иже дре́вле ми́ обоже́нію во Еде́мѣ позави́дѣвша, томи́теля змíя, Дѣ́во, смири́вся во утро́бѣ Твое́й Творе́цъ тва́ри и Зижди́тель естества́, боголѣ́пно погуби́ кресто́мъ и сме́ртію, источа́я ми́ нетлѣ́ніе.

На стихо́внѣ окто́иха. Сла́ва, и ны́не, богоро́диченъ.

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 248 об. – 252 об.

/ Къ оглавленію раздѣла /


Наверхъ / Къ титульной страницѣ

0