Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 25-й де́нь.
Возвраще́ніе моще́й свята́го апо́стола Варѳоломе́я и па́мять свята́го апо́стола Ти́та.

[ВЕЧЕРЪ,]
На Го́споди воззва́хъ: стихи́ры свята́го Варѳоломе́я, 3, гла́съ 4. Подо́бенъ: Яко до́бля.

Ше́ствія твоя́ яви́шася въ мо́ри, апо́столе,* па́че ума́ человѣ́ческа явля́ема:* вве́рженъ бо бы́въ съ ковче́гомъ,* къ за́паду те́клъ еси́,* отъ восто́ка благосла́внымъ* послѣ́дующимъ му́ченикомъ тебѣ́ отобою́ду* и че́сть творя́щимъ,* манове́ньми Влады́ки вся́ческихъ,* Варѳоломе́е всеизря́дне.

Во́ду восхожде́ньми* чу́дными освяти́лъ еси́* и ко о́строву дости́глъ еси́ Липа́рскому,* мѵ́ро источа́я, сла́вне,* и стра́сти неисцѣ́льныя исцѣля́я,* и спа́съ су́щимъ та́мо бы́въ, и прибѣ́жище,* и предста́тель, и изба́витель* ко всѣ́хъ Царю́ и Спасу́,* Варѳоломе́е апо́столе.

Ины стихи́ры свята́го Ти́та, гла́съ то́йже. Подо́бенъ: Да́лъ еси́ зна́меніе.

Еди́но Тріѵпоста́сное* проповѣ́дуя Божество́,* многобо́жное мо́ре язы́къ возмути́лъ еси́* и къ ти́химъ, блаже́нне, приста́нищемъ* погружа́емыя глубино́ю безбо́жія* ты́ возве́лъ еси́.* Тѣ́мже небе́сное возме́здіе воспрія́лъ еси́,* моля́ Человѣколю́бца* о воспѣва́ющихъ тя́.

Боже́ственными сія́ньми* озари́въ тво́й у́мъ,* я́коже луча́ ше́ствовавъ съ со́лнцемъ,* просвѣща́ющи омраче́нныя* съ Па́вломъ, боже́ственный Ти́те,* и съ ни́мъ всю́ зе́млю отъ глубо́кія но́щи изба́вилъ еси́.* Тѣ́мже тя́ ублажа́емъ, я́ко святи́теля богопрія́тна,* я́ко апо́стола боже́ственна,* я́ко моли́твенника те́пла.

Отъ Кри́та устреми́вся* и въ него́ возвраща́емь,* я́ко незы́блемо основа́ніе,* на не́мже утверди́ся пра́вая вѣ́ра,* зда́ніемъ назда́ вѣ́рныя,* небе́сною Боже́ственною си́лою,* Ти́тъ блаже́нный, оте́честву первопресто́льникъ,* Па́влу спу́тникъ, и вѣ́рныхъ утѣше́ніе.

Сла́ва, гла́съ 2:

Оста́вивъ земна́я, послѣ́довалъ еси́ Христу́ и, зна́менався дохнове́ніемъ Свята́го Ду́ха, по́сланъ бы́въ отъ Него́ въ язы́ки поги́бшія, обраща́ти человѣ́ки въ свѣ́тъ богоразу́мія, апо́столе Варѳоломе́е, и, сконча́въ по́двиги боже́ственныя твоея́ стра́сти и му́къ разли́чныхъ, ду́шу твою́ Христу́ пре́далъ еси́. Того́ моли́, всеблаже́нне, дарова́ти на́мъ ве́лію ми́лость.

И ны́нѣ, богоро́диченъ, или́ крестобогоро́диченъ:

Дре́ву кре́стному Тя́, Іису́се, пригвожде́на зря́щи, Неискусобра́чная, пла́чущи, глаго́лаше: Ча́до сла́дкое, почто́ оста́вилъ еси́ Мене́, ро́ждшую Тя́, еди́ну, Свѣ́те непристу́пный, Пребезнача́льнаго Отца́? Потщи́ся и просла́вися, я́ко да сла́ву получа́тъ Боже́ственную, и́же Боже́ственныя стра́сти Твоя́ сла́вящіи.

Тропа́рь, гла́съ 3:

Апо́столи святíи, моли́те ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.


НА УТРЕНИ,
Кано́нъ окто́иха еди́нъ и святы́хъ два́ на 8.

Кано́нъ свята́го апо́стола Варѳоломе́я, его́же краегране́сіе: Пѣ́сньми почита́ю до́браго моего́ предста́теля. Творе́ніе Іо́сифово, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Прече́стна ка́меня тя́ живота́ Ка́мень показа́, на не́мже созда́ Це́рковь Свою́, Варѳоломе́е, апо́столе Госпо́день. Тѣ́мже тя́ чти́мъ и ублажа́емъ.

Вели́кимъ научи́лся еси́, су́щимъ па́че ума́ и смы́сла, Прему́дрость обрѣ́тъ ѵпоста́сную, объюро́дилъ еси́ е́ллиновъ му́дрость, умудри́въ концы́ Боже́ственными уче́ніи.

Мертве́цъ погребе́нный, мо́ря ше́ственникъ бы́лъ еси́, Боже́ственнымъ повелѣ́ніемъ повину́яся, и, я́ко со́лнце къ за́паду, отъ восто́ка, апо́столе, приспѣ́лъ еси́, просвѣща́я его́.

Богоро́диченъ: По́лный истощева́ется, Превѣ́чный начина́ется, отъ Дѣ́вы Богоотрокови́цы ражда́емь, Его́же проповѣ́далъ еси́ во двою́ существу́, во еди́ной же ѵпоста́си, богоблаже́нне.

Другíй кано́нъ свята́го апо́стола Ти́та, его́же краегране́сіе: Па́влова ученика́ Ти́та пою́ прему́дренно. Творе́ніе Ѳеофа́ново, гла́съ то́йже.
Пѣ́снь 1. Ирмо́съ то́йже.

Вся́кими дарова́ньми обогати́вши тя́ благода́ть Ду́ха, проповѣ́дника боже́ственна апо́стола, въ концы́ проповѣ́дающа, посла́ Сло́ва воплоще́ніе, Ти́те пресла́вне.

Зарю́ боже́ственныя благода́ти пріе́мь, облиста́лъ еси́, я́ко со́лнце, прему́дре, су́щимъ во тмѣ́ душа́мъ, я́же просвѣти́лъ еси́, изыма́я невѣ́дѣнія, пре́лести рабо́ты избавля́я, блаже́нне.

Сы́й испо́лненъ даро́въ духо́вныхъ, Па́велъ прему́дрый на тя́ рукоположе́ніе возлага́етъ и служи́теля, и боже́ственна ученика́, и вѣ́ры проповѣ́дника устроя́етъ, Ти́те пречу́дне.

Богоро́диченъ: Избавля́я мірскíя концы́ пре́лести, возсія́ отъ Твоего́ чре́ва Госпо́дь, Богоневѣ́сто, Его́же моли́ всегда́ спасти́ вѣ́рою Тя́, Дѣ́во, чту́щія.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Крѣ́пко утѣше́ніе тя́ обрѣто́ша, и свѣ́тъ, и лю́тыхъ избавле́ніе, Варѳоломе́е прему́дре, и́же пре́лестію содержи́міи и безбо́жія мра́комъ умовре́дно обложе́нніи.

Уста́ бы́лъ еси́ Бо́га Сло́ва, отъ у́стъ во́лка лука́ваго лю́ди изба́вилъ еси́, сла́вне, приводя́ къ Зижди́телю твоему́ ба́нею креще́нія, Варѳоломе́е апо́столе.

Язы́комъ твои́мъ о́гненнымъ попали́въ пре́лести ве́щь го́рькую, оляденѣ́вшая, прему́дре, сердца́ обнови́лъ еси́ и дѣ́лати небе́сныя ра́зумы устро́илъ еси́.

Богоро́диченъ: Изъ Тебе́ па́че сло́ва Бо́гъ Сло́во роди́тися благоизво́ли пло́тію, Дѣвома́ти Чи́стая, ученика́ избра́въ и служи́теля при́снаго, Варѳоломе́я сла́внаго.

Инъ.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́біе.

Не му́дростію объюро́ди то́й внима́ющія, но ра́зумомъ и́стины ослѣпле́ніе, блаже́нне, ду́шъ отгна́лъ еси́, притека́ющихъ къ тебѣ́.

Оляденѣ́вшую безбо́жія те́рніемъ бразду́, всенаслѣ́діе язы́къ, серпо́мъ боже́ственнымъ очи́стилъ еси́, ра́зума сѣ́мена насѣ́явъ.

Еди́но проповѣ́дая въ Тре́хъ Ли́цахъ Божество́, отгна́лъ еси́ мглу́ многобо́жія, блаже́нне, къ боже́ственному ра́зуму приводя́ концы́.

Богоро́диченъ: Святѣ́йшу а́нгеловъ и всея́ тва́ри вы́шшу, изъ Тебе́ пло́тію Роди́выйся Тя́ содѣ́ла, тѣ́мже Тя́, я́ко Влады́чицу всѣ́хъ, почита́емъ.

Конда́къ Ти́та, гла́съ 2. Подо́бенъ: Вы́шнихъ ища́.

Па́вловъ яви́вся собесѣ́дникъ, апо́столе, съ ни́мъ на́мъ сло́во предвозвѣсти́лъ еси́ Боже́ственныя благода́ти, тайноглаго́льниче Ти́те приснопа́мятне. Сего́ ра́ди вопіе́мъ ти́: не преста́й моля́ся о всѣ́хъ на́съ.

Сѣда́ленъ Варѳоломе́я, гла́съ 3. Подо́бенъ: Боже́ственныя.

Бога́тство некра́домо Це́ркви, сто́лпъ непоколеби́мь благоче́стія, Варѳоломе́е, показа́лся еси́, апо́столе, въ мо́ри же стезю́ творя́, пучи́ну боже́ственныхъ источа́еши исцѣле́ній, достосла́вне. Христа́ Бо́га моли́ дарова́ти на́мъ ве́лію ми́лость.

Сла́ва, Ти́та, гла́съ 8. Подо́бенъ: Прему́дрости.

Якоже звѣзда́ съ со́лнцемъ, ходи́лъ еси́, пресла́вне Ти́те, съ Па́вломъ, я́вѣ зе́млю просвѣти́сте и тму́ разори́сте, въ Кри́тстѣмъ же о́стровѣ заше́дъ, блаже́нне, сме́ртію, всѣ́мъ незаходи́мы оста́вилъ еси́, я́ко зари́, богому́дре, твоя́ болѣ́зни и словеса́, и́миже просвѣ́щшеся, благоче́стно тя́ чти́мъ и согла́сно вопіе́мъ ти́: моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

И ны́нѣ, богоро́диченъ:

Яко Всенепоро́чная Невѣ́сто Творцу́, я́ко неискусому́жная Ма́ти Изба́вителя, прія́телище я́ко су́щи Утѣ́шителя, Препѣ́тая, беззако́нію мя́ су́ща скве́рное оби́телище и бѣсо́мъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, Свѣтоно́сная, Нетлѣ́нная, отжени́ о́блакъ страсте́й и Вы́шняго прича́стія сподо́би и Свѣ́та невече́рняго моли́твами Твои́ми.

Крестобогоро́диченъ:

Агнца и Па́стыря и Изба́вителя, Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы, воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Рече́нія коне́цъ прія́ша проро́ческая: свѣ́тъ бо язы́комъ въ снабдѣ́ніе, богогла́сный по́йде учени́къ, просвѣща́я вся́ вселе́нныя концы́.

Заре́ю просвѣща́емь богонача́льною, Боже́ственнымъ прича́стіемъ, вторы́й свѣ́тъ яви́лся еси́, служи́въ перводѣ́тельно на́съ ра́ди Обнища́вшему пло́тію, сла́вне.

Изба́ви твое́ ста́до грѣхо́вныя бу́ри, и бѣ́дъ, и скорбе́й сопроти́вныхъ, наставля́я на́съ при́сно ко приста́нищемъ, сла́вне, спаси́тельнымъ благода́тію.

Богоро́диченъ: Яко несказа́нное премно́гое бога́тство милосе́рдія ро́ждши несказа́нно, обнища́вшія ны́ грѣхо́мъ, Пречи́стая, Боже́ственными дарова́ніи обогати́.

Инъ.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Отъ сокро́вищъ неистощи́мыхъ поче́рпъ, всему́дре, жа́дныя ра́зумы бога́тства и́стиннаго насы́тилъ еси́ и умерщвле́нная сердца́ оживи́лъ еси́, неразу́мія отгоня́я мглу́, всесла́вне.

Па́влова тя́ мре́жа промышле́ніемъ благода́ти уловля́етъ, Ти́те, хотя́ща усе́рдно по́слѣжде твое́ю у́дицею сло́ва язы́ки премно́гія извлещи́ отъ ле́стныя глубины́ ко благоче́стію.

Сла́вному, я́коже а́гня, боже́ственному Па́влу послѣ́дуя, тя́жкія отъ среды́ во́лки, богогла́се, отгна́лъ еси́, и́дольскія же хра́мы на зе́млю низве́рглъ еси́ и хра́мы Бо́гу земноро́дныя сотвори́лъ еси́.

Богоро́диченъ: Свята́я Богоро́дица, сѣ́нь нескве́рная, Свѣ́та две́рь, трапе́за и ру́чка всезлата́я, несѣко́мая гора́ и присѣ́нная, я́ко вмѣсти́вшая Содѣ́теля, ублажа́ется.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Но́ги стяжа́въ красны́ проповѣ́даніемъ, всѣ́мъ блага́я благовѣсти́лъ еси́, всѣ́мъ ми́ръ, блаже́нне, проповѣ́далъ еси́, вражды́ дре́внія отчужди́въ Боже́ственными уче́ніи Спа́са, апо́столе.

Сло́во твое́ цѣльба́ бы́сть пріе́мшимъ змíя я́дъ смертоно́сный, Варѳоломе́е, земля́ же паде́ся нечести́выхъ проро́чески, вѣща́ніемъ прему́дрыхъ уче́ній твои́хъ.

Мертве́цъ многодне́вный, жи́знь источа́я незави́стную, хребты́ носи́мь морски́ми, Варѳоломе́е, съ боже́ственными му́ченики, безмѣ́рныя пучи́ны проше́дъ, во о́стровъ Липа́рскій устреми́лся еси́, апо́столе.

Богоро́диченъ: Истинно сла́влю Тя́, Бо́жію Ма́терь Пречи́стую, ра́дуйся, Тебѣ́ зову́, я́ко а́нгелъ, Благослове́нная Обра́дованная, слы́шаніе и глаго́ланіе стра́шно, стра́нно прія́телище Влады́цѣ тва́ри.

Инъ.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Смердя́щую уста́вилъ еси́ зло́бы я́зву язы́комъ, блаже́нне, ду́шъ, сла́дкою со́лію боже́ственныхъ слове́съ твои́хъ, я́коже вра́чь изря́денъ и я́ко благода́ти служи́тель.

Па́вла велѣ́ніемъ повину́яся кро́тко, съ ни́мъ поднебе́сную обхо́диши, прему́дре, сло́во ра́зума благовѣству́я, богопроповѣ́дниче всече́стне.

Равнодѣ́тельна, Единопресто́льна Сло́ва Отцу́ науча́я, я́коже му́дръ, богогла́се, повину́лъ еси́ суему́дрыя и́дольскую всю́ ле́сть отри́нути.

Богоро́диченъ: Чи́стую чи́стымъ почти́мъ умо́мъ, добро́ту Іа́ковлю, Боже́ственными дѣя́ньми удобря́еми, благоче́стно воспое́мъ, я́ко Ма́терь Бо́га на́шего.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Заря́ со́лнца, возсія́вшаго мíру, пло́тію бы́лъ еси́, свѣтоно́сными твои́ми уче́ніи, апо́столе, отгоня́я но́щь ле́сти многобо́жную.

Лю́демъ Бо́жіе спасе́ніе уясни́лъ еси́, пло́ти подо́біемъ я́вльшагося за мно́гую бла́гость, Варѳоломе́е, проповѣ́дниче язы́ковъ и апо́столе.

Пу́ть мо́ря имѣ́лъ еси́ и стези́ въ вода́хъ сотвори́лъ еси́, и позна́шася твоя́ въ си́хъ стопы́ Ду́хомъ, я́коже Дави́дъ прорече́, блаже́нне апо́столе.

Богоро́диченъ: Хра́мъ сла́вы была́ еси́ и две́рь Свѣ́та яви́лася еси́, гора́ присѣ́нная, зна́меньми проро́ческими пѣва́ема, Дѣ́во Ма́ти Богора́дованная.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Па́велъ, мíра невече́рнее со́лнце, тя́, я́коже зарю́, испуща́етъ свѣтолу́чну, блаже́нне, я́же во тмѣ́ неразу́мія сѣдя́щая сердца́ просвѣща́юща.

Во́дъ живото́чныхъ сы́й испо́лненъ, струя́ми Боже́ственныхъ уче́ній пото́ки, блаже́нне, неразу́мія потопля́еши, напоя́я язы́ковъ совокупле́нія.

Богоро́диченъ: Пою́тъ ро́ди родо́въ Тя́, Всепѣ́тая: препѣ́тое бо Сло́во Бо́жіе родила́ еси́ па́че сло́ва, Его́же сла́вятъ и человѣ́честіи и а́нгельстіи чи́ни.

Конда́къ, гла́съ 4. Подо́бенъ: Яви́лся еси́ дне́сь.

Яви́лся еси́ ве́ліе со́лнце Це́ркви, уче́ній сія́ніемъ и чудесы́ стра́шными просвѣща́я пою́щія тя́, Варѳоломе́е, Госпо́день апо́столе.

Икосъ:

Якоже со́лнце многосвѣ́тлое, проше́дъ мíръ и се́й луча́ми слове́съ твои́хъ просвѣ́щь, заше́лъ еси́, у́меръ му́ченически, и исходя́щими отъ гро́ба твоего́ сія́ніи тму́ страсте́й отгна́лъ еси́. Тѣ́мже тя́ и́же за́вистію одержи́міи, и къ за́падомъ со́лнца отгна́вше, страстоно́сче, отпуща́ютъ, по мо́рю ходя́ща. Узрѣ́жеся въ тебѣ́ превели́ко чу́до, отъ пла́вающаго стра́шно глубины́ мо́ря, е́же чу́дными освяти́ся твои́ми ше́ствованіи, Варѳоломе́е, Госпо́день апо́столе.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Объюродѣ́вшее зло́бою, пресла́вне, человѣ́чество, сла́дкою со́лію исцѣли́лъ еси́ слове́съ твои́хъ и пѣ́ти увѣ́рилъ еси́: препѣ́тый отце́въ Госпо́дь и Бо́гъ, благослове́нъ еси́.

Яко не́бо превысо́ко, бы́въ, сла́ву Бо́жію мы́сленно высо́кимъ гла́сомъ проповѣ́дуеши, я́ко боже́ственный апо́столъ, Ему́же зове́мъ: препѣ́тый отце́въ Госпо́дь и Бо́гъ, благослове́нъ еси́.

Изтка́въ Боже́ственныя благода́ти ри́зу, блаже́нне, одѣ́ялъ еси́ обнаже́нныя лю́тѣ зло́бою змíя и пѣ́ти увѣ́рилъ еси́: препѣ́тый отце́въ Госпо́дь и Бо́гъ, благослове́нъ еси́.

Богоро́диченъ: Предста́тельницу Тя́ и стѣ́ну необори́мую обогати́вшеся, Богороди́тельнице Чи́стая, раби́ Твои́, всегда́ вѣ́рою вопіе́мъ Ти́: ра́дуйся, мо́сте, къ Бо́гу преводя́й отъ земли́, Благослове́нная.

Инъ.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Еди́но Божество́ пѣ́ти, Еди́но Госпо́дство чти́ти Ти́тъ науча́я человѣ́ки, многобо́жнаго неи́стовства измѣни́ благоче́стно взыва́ющія: благослове́нъ Бо́гъ оте́цъ на́шихъ.

Умерщвле́нныя душе́ю, безду́шную чту́щія ве́щь, умерщвле́ннаго на́съ ра́ди Животода́вца Бо́га позна́ша, тобо́ю наказу́емы, учениче́ и тайновѣща́телю неизрече́нныхъ.

Яко и́стины служи́тель, лжи́ отгони́тель яви́лся еси́ и, я́ко Па́вловъ учени́къ, гоне́нія и бѣды́ претерпѣ́лъ еси́, съ ни́мъ поя́, сла́вне: благослове́нъ Бо́гъ оте́цъ на́шихъ.

Богоро́диченъ: Испещре́на добродѣ́тельми, Всецарю́ предста́ла еси́ одесну́ю, отъ Твои́хъ воплоще́на крове́й, Безневѣ́стная, прилѣ́жно моля́щи изба́витися на́мъ отъ вся́кія ну́жды.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Струя́ми наводня́емь боже́ственными, я́коже изъ Еде́ма рѣка́, изше́лъ еси́ напои́ти подсо́лнечную уче́ніи твои́ми и преле́стныя во́ды изсуша́я благода́тію, — Го́спода по́йте, — зовы́й, — и превозноси́те Его́ во вѣ́ки.

Сло́во, я́ко боже́ственна богосло́ва слове́съ вы́шшихъ научи́въ тя́, я́коже стрѣлу́ небе́сную, мíру посла́, уязвля́я собо́ры вра́жія, сла́вне, и спаса́я вѣ́рою пою́щія и превознося́щія Его́ во вѣ́ки.

Иска́пая, я́коже гора́, яви́лся еси́, Боже́ственную сла́дость, достохва́льне, мо́ре же имѣ́лъ еси́ стезю́ по сме́рти, Боже́ственными си́лами пла́вая, сего́ непотопля́емь пучи́ною, тя́ доринося́щимъ, до́блій страда́льче.

Богоро́диченъ: Зако́новъ естества́ утаи́вшися, и ражда́еши и пребыва́еши Приснодѣ́ва: Сло́во бо родила́ еси́, Человѣ́ка бы́вша за премно́гую бла́гость, Ему́же вси́ зове́мъ: Го́спода по́йте, дѣла́, и превозноси́те Его́ во вѣ́ки.

Инъ. Ирмо́съ то́йже.

Кропле́ніемъ крове́й твои́хъ угасе́ о́гнь пре́лести чуждíй, неду́зи отгна́шася, де́мони исчезо́ша къ Бо́гу мольбо́ю твое́ю, Ти́те апо́столе. Тѣ́мъ тя́, я́ко уго́дника боже́ственна Всецаря́ Христа́, восхваля́емъ.

Ве́сь Бо́гу освяще́нъ и Боже́ственными укра́шенъ, Ти́те, благода́тьми, сло́во спаси́тельное всѣ́мъ уясни́лъ еси́, безслове́сія, всему́дре, на́съ изба́вльшее, вѣ́рою и́стинною благосло́вящихъ и превознося́щихъ Христа́ во вѣ́ки.

Свѣ́та чистѣ́йшее прія́телище бы́въ, просвѣти́лъ еси́ подсо́лнечную Боже́ственными сія́ньми, Ти́те досточу́дне, и омрачи́лъ еси́ сопротивле́нія беззако́ннующихъ вра́гъ, Го́спода поя́ и превознося́ во вся́ вѣ́ки.

Богоро́диченъ: Ору́жіе, дре́вле обраща́емое, плещи́, Дѣ́во, ны́нѣ мнѣ́ дае́тъ, я́ко Сло́во родила́ еси́, пло́тію обложе́но и во двою́ естеству́ разумѣва́емо, Его́же трепе́щутъ а́нгельстіи чи́ни и славосло́вятъ земнíи во вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Приво́дитъ пра́здникъ па́мяти твоея́ дне́сь апо́стольскій ли́къ, му́ченицы ра́дуются и пра́ведныхъ всѣ́хъ чи́нове. Вѣ́рніи же, пѣ́сньми тя́ почита́емъ и вопіе́мъ: отъ вся́кія на́съ печа́ли, учениче́ Христо́въ, изба́ви.

Кресто́мъ блаже́нную кончи́ну, сла́вне, пріе́мъ, сообра́зенъ бы́лъ еси́ страсте́мъ Учи́теля твоего́ и прича́стникъ свѣ́тлости и Боже́ственныя сла́вы, при́сно со а́нгелы Тому́ предстоя́ и неизрече́ннаго свѣ́та сподобля́емь.

Пресвѣ́тлая и благонаро́читая па́мять твоя́ на́мъ возсія́, всѣ́хъ просвѣща́ющи, Христо́въ самови́дче, Варѳоломе́е му́дре, въ не́йже мо́лимъ тя́: помяни́ всѣ́хъ на́съ, супротивле́нія вся́каго и обстоя́нія моли́твами твои́ми на́съ избавля́я.

Богоро́диченъ: Умертви́ на́ша плотска́я мудрова́нія, Богороди́тельнице Чи́стая, уста́ви страсте́й на́шихъ бу́рю, ути́ши смуще́ніе и помышле́ньми утверди́ боже́ственными, Чи́стая, сердца́ вѣ́рою чту́щихъ Тя́, Предста́тельнице на́ша непосты́дная.

Инъ.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Всю́ твою́ ко Изба́вителю нося́ и любо́вь и наде́жду, влече́тъ спу́тника Па́велъ, съ тобо́ю свяще́нное Ева́нгеліе язы́комъ проповѣ́дуя, апо́столе. Тѣ́мже съ ни́мъ тя́ почита́емъ.

Неду́ги отго́ниши вѣ́рныхъ, де́моны прогоня́еши Боже́ственною благода́тію. Кри́тъ, вели́кій гра́дъ, первопресто́льника тя́ стяжа́ боже́ственна, свѣти́льника же и зарю́ небе́сную, Ти́те богому́дре и достохва́льне.

Яко со́лнце, возсія́ на́мъ па́мять твоя́, заря́ми духо́вными всесвѣ́тло укра́шена, о́блаки ду́шъ отгоня́щи, ю́же вѣ́рою творя́щія на́съ сохраня́й, Ти́те всеблаже́нне и достохва́льне.

Богоро́диченъ: Плени́цы прегрѣше́ній мои́хъ, Чи́стая, разрѣши́ хода́тайствомъ Твои́мъ, Всенепоро́чная, разори́ тму́ души́ моея́, бу́рю страсте́й мои́хъ ути́ши, всу́е борю́щія мя́ сокруши́ и спаси́ мя, Влады́чице Приснодѣ́во.

Свѣти́ленъ. Подо́бенъ: Не́бо звѣзда́ми.

Свѣ́та прія́телища, непремѣ́нныя зари́ невече́рняго дне́, свѣтолу́чныя мо́лніи, Варѳоломе́я и Ти́та, вѣ́рніи, сла́вимъ вси́.

Богоро́диченъ: Крѣ́пкимъ Твои́мъ покро́вомъ отъ навѣ́та вра́жія на́съ, Чи́стая, Твоя́ рабы́, сохрани́ вся́ невре́дны: Тя́ бо и́мамы еди́ну прибѣ́жище въ напа́стехъ.


НА ЛИТУРГІИ,

Проки́менъ, гла́съ 8: Во всю́ зе́млю изы́де вѣща́ніе и́хъ [и въ концы́ вселе́нныя глаго́лы и́хъ]. Сти́хъ: Небеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. Апо́столъ къ Ти́ту, зача́ло 300. Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, [и́бо и́стину Твою́ въ це́ркви святы́хъ. Сти́хъ: Бо́гъ прославля́емь въ совѣ́тѣ святы́хъ]. Ева́нгеліе Матѳе́я, зача́ло 11. Прича́стенъ: Во всю́ зе́млю [изы́де вѣща́ніе и́хъ и въ концы́ вселе́нныя глаго́лы и́хъ].

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 242 – 248 об.

/ Къ оглавленію раздѣла /


Наверхъ / Къ титульной страницѣ

0