Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 28 iюня 2017 г. Сейчасъ на порталѣ посѣтителей - 8.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 24-й де́нь.
Свята́го священному́ченика Евти́ха, ученика́ свята́го Іоа́нна Богосло́ва.

[ВЕЧЕРЪ,]
На Го́споди воззва́хъ: стихи́ры Евти́ха, гла́съ 8. Подо́бенъ: О, пресла́внаго чудесе́!

Пре́лести низложи́лъ еси́ утвержде́ніе* по́двигомъ тве́рдымъ терпѣ́нія, пребога́те,* и у́зами, и ра́нами,* и сла́вною сме́ртію,* тѣ́мже безсме́ртіе получи́лъ еси́,* съ ли́ки му́ченикъ* и со а́нгельскими чи́ны водворя́яся,* прича́стіемъ лу́чшимъ боголѣ́пно,* до́брѣ обожа́емь и соверше́ннѣ.

Въ темни́цѣ затворя́емь,* хлѣ́бъ прія́лъ еси́ жи́зни съ небесе́, сла́вне,* вве́рженъ же бы́въ въ пла́мень,* неопале́нъ пребы́лъ еси́.* Ра́ны подъя́тъ, лю́тѣ стру́жемь,* стремле́нія звѣре́й моли́твами укроти́лъ еси́.* Мече́мъ глава́ твоя́ отсѣ́чена бы́сть,* кровьми́ къ небеси́ облегча́емь,* я́ко боже́ственною колесни́цею.

Сла́ва, и ны́нѣ, богоро́диченъ, [гла́съ то́йже]:

Спаси́ мя, Влады́чице Пречи́стая,* Яже Спа́са Христа́ неизрече́нно ро́ждшая:* Тя́ бо еди́ну стяжа́хъ предста́тельницу,* и необори́мую стѣ́ну,* и покро́въ, и ра́дованіе,* и души́ моея́ боже́ственное утѣше́ніе.* Ты́ у́бо мя́ изба́ви неусыпа́ющаго че́рвія* и огня́ вѣ́чнующаго,* Ма́ти Христа́ Бо́га.

Крестобогоро́диченъ:

Что́ зри́мое видѣ́ніе,* е́же Мои́ма очи́ма ви́дится, о Влады́ко?* Содержа́й всю́ тва́рь* на дре́во воздви́женъ бы́въ* и умира́еши, всѣ́мъ дая́й жи́знь? —* Богоро́дица, пла́чущися, глаго́лаше,* егда́ узрѣ́ на Крестѣ́ возноси́ма* изъ Нея́ неизрече́нно возсія́вшаго* Бо́га и Человѣ́ка.

На стихо́внѣ окто́иха.

Тропа́рь, гла́съ 4:

И нра́вомъ прича́стникъ, и престо́ломъ намѣ́стникъ апо́столомъ бы́въ, дѣя́ніе обрѣ́лъ еси́, богодохнове́нне, въ видѣ́нія восхо́дъ; сего́ ра́ди, сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Евти́хе, моли́ Христа́ Бо́га спасти́ся душа́мъ на́шимъ.


НА УТРЕНИ,
Оба кано́на окто́иха и свята́го кано́нъ на 4, гла́съ 8. Творе́ніе Іо́сифово.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Апо́столомъ и му́ченикомъ сожи́тель явля́емый и боже́ственныя зари́ всегда́ исполня́емь, честны́й тво́й дне́сь пра́здникъ творя́щія свѣ́та прича́стники покажи́, му́чениче Евти́хе достосла́вне.

Возлю́бленнаго ученика́, блаже́нне, учени́къ бы́въ благоче́стно и того́ нра́вы вельми́ подража́я, Го́спода возлюби́лъ еси́, Того́ Боже́ственныя зако́ны испо́лнивъ, и страсте́мъ Сего́, Евти́хе, уподо́бился еси́.

Зако́ну Боже́ственному благоче́стно повину́яся, пло́ть умертви́лъ еси́ по́стными болѣ́зньми, мíра удаля́яся, и въ гора́хъ, сла́вне, пребыва́я, му́чениче, и ду́шу очища́я, и богови́дѣнъ познава́емь.

Богоро́диченъ: На Тя́, Дѣ́во, наде́жду положи́хъ спасе́нія моего́: грѣхо́вныя скве́рны всего́ мя́ омы́й и чи́ста содѣ́лай, Сы́ну Твоему́ изря́дно благоугожда́юща и творя́ща Сего́ всесвяту́ю во́лю.

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, Еди́не Человѣколю́бче.

Облиста́юща свѣ́томъ проповѣ́данія прему́драго, я́коже со́лнца, обрѣ́тъ Па́вла ходи́ти съ ни́мъ, я́ко звѣзда́ ве́лія, просвѣща́я сердца́, блаже́нне богому́дре, Ду́хомъ.

Богосло́вовъ основа́ніе, ученико́въ ве́рхъ, Іоа́ннъ, при́сный дру́гъ Спа́совъ, отъ земли́ боже́ственно прело́жся, тебѣ́ Бо́жіе ста́до, блаже́нне, пасти́ предаде́.

Прекра́сенъ, и свѣтоза́ренъ, и испо́лненъ Ду́ха Боже́ственнаго, судя́щему непра́ведно предста́лъ еси́, облича́я того́ злоче́стіе, пребога́те, и Христо́во Боже́ственное исповѣ́да вочеловѣ́ченіе.

Богоро́диченъ: Ра́дуйся, Яже еди́на ра́дость несказа́нно ро́ждши; ра́дуйся, колесни́це и о́блаче Сло́ва; ра́дуйся, Ма́ти Бо́жія, Дѣ́во Неискусобра́чная; ра́дуйся, преподо́бныхъ сла́во; ра́дуйся, му́чениковъ вѣнча́ніе.

Сѣда́ленъ, гла́съ 3. Подо́бенъ: Боже́ственныя вѣ́ры.

Сія́ніе облиста́въ богоразу́мія, тму́ разори́лъ еси́ многобо́жія, му́ченически сконча́въ тече́ніе твое́, и исцѣле́ній источа́еши дарова́нія, приходя́щихъ очища́еши неду́ги, му́чениче сла́вне, Христа́ Бо́га моли́ дарова́ти душа́мъ на́шимъ ве́лію ми́лость.

Сла́ва, и ны́нѣ, богоро́диченъ:

Боже́ственная ски́нія была́ еси́ Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая, па́че всѣ́хъ мене́, пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́во Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́! Ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Всѣ́мъ умо́мъ отше́дъ ко Го́споду, не чу́вствоваше, всю́ду біе́мь и растерза́емь лю́тѣ, и, я́коже благово́нное кади́ло, достосла́вне, благово́нія предстоя́щія испо́лнилъ еси́ боже́ственнаго, дѣ́йствомъ, богому́дре, Ду́ха.

Бо́гомъ, му́чениче богому́дре, соблюда́емь, въ темни́цѣ же свя́занъ сѣдя́, хлѣ́бъ небе́сный ви́димо, ра́дуяся, прія́лъ еси́, Бо́гу тя́ укрѣпля́ющу, еди́ному Подвигополо́жнику, Евти́хе богоно́се, Его́же стра́сти Боже́ственнѣй поревнова́лъ еси́.

Твоя́ честна́я уста́ отве́рзлъ [еси́] Ду́хомъ, предъ суди́щемъ, прему́дре, стоя́ мучи́телей, и́стинную вѣ́ру Тро́ическую уясни́лъ еси́ я́вѣ, и́дольскую же пре́лесть обличи́лъ еси́, блаже́нне, и мучи́телей безбо́жныхъ мудрова́нія.

По мно́гихъ ины́хъ ра́нахъ тѣле́сныхъ, Боже́ственною любо́вію, блаже́нне, распаля́емь, запале́нный пла́мень огня́, ра́дуяся, проше́лъ еси́, преще́ніемъ мучи́теля ника́коже опали́вся, и́бо Боже́ственная тя́ роса́, Евти́хе, съ небесе́ ороша́ше.

Богоро́диченъ: Въ жена́хъ еди́на Дѣ́ва пребыла́ еси́ и пре́жде рождества́ и по рождествѣ́: Бо́гъ бо бѣ́ обновля́я естества́ па́че сло́ва, изъ Тебе́ неизрече́нно воплоща́емь, Иже горѣ́ пре́жде вѣ́къ и на земли́ въ послѣ́дняя лѣ́та ро́ждся, Пренепоро́чная.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Сло́вомъ Боже́ственнымъ обога́щся, всѣ́мъ тре́бующимъ, му́чениче, пода́лъ еси́ и Христо́во ста́до, свяще́нникъ бы́въ, упа́слъ еси́, утѣша́я, наказу́я и наставля́я ко спасе́нію, Евти́хе, страстоно́сче многострада́льне.

Душепа́губную пре́лесть си́лою Боже́ственнаго Ду́ха оттря́съ, ко Христу́ приступи́лъ еси́ и мно́жества Сему́, му́чениче, приве́лъ еси́ спаса́емыхъ вѣ́рою, твои́ми честны́ми боговѣща́ніи, Евти́хе, страда́льцевъ удобре́ніе.

Яко красны́ но́ги твоя́, преблаже́нне, стезе́ю ходи́вшія свидѣ́ній боже́ственныхъ, и въ си́хъ до́брѣ ступа́вшія, и къ широтѣ́ вели́цѣй небе́снаго Ца́рства дости́гшія, му́чениче сла́вне.

Богоро́диченъ: Дѣ́во Ма́ти Отрокови́це, Непостижи́маго пло́тію ро́ждши, а́нгеловъ сла́во и де́моновъ я́зва, Богоневѣ́сто, мое́ се́рдце, уя́звенное грѣхми́, исцѣле́нія боже́ственнаго сподо́би.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Во Ефе́сѣ пріе́мь е́же за Христа́ кончи́ну, отъ Ефе́са, му́дре, у́зникъ устреми́лся еси́ и во оте́чествіи твое́мъ честнѣ́мъ, страда́ньми украша́емь, почи́лъ еси́.

Хра́мъ сы́й Бо́жій красе́нъ и пречи́стъ, хра́мы и́дольскія скве́рныя низложи́лъ еси́ благода́тію и къ небе́сному хра́му возне́слся еси́, Евти́хе, Бо́гу предста́ти.

Укрѣпи́ тя, путе́мъ ше́ствующа, боже́ственный а́нгелъ, предглаго́ля тебѣ́ я́вѣ хотя́щая бы́ти, Евти́хе, пребога́те, равноа́нгельну су́щу и пло́ти внѣ́ ду́хомъ.

Богоро́диченъ: Ума́ моего́ извраще́нія и души́ двиза́нія стра́стная и лю́тая, Дѣ́во, испра́ви и цѣ́ла мя́ соблюди́ отъ всегда́ неми́лостивно находя́щихъ ми́.

Конда́къ, гла́съ 3. Подо́бенъ: Дѣ́ва дне́сь.

Апо́столовъ сопресто́льникъ и святи́телей красота́ бы́въ, Евти́хе, му́ченически просла́вился еси́, просія́лъ еси́, я́ко со́лнце, всѣ́хъ просвѣща́я, и разори́лъ еси́ безбо́жія но́щь глубо́кую; сего́ ра́ди тя́ почита́емъ, я́ко боже́ственнаго вои́стинну священнотаи́нника Христо́ва.

Икосъ:

Яко Бо́жій свяще́нникъ, я́ко служи́тель небе́сный, я́ко па́стырей па́стырь, я́ко страда́лецъ непобѣди́мь, съ вы́шними ны́нѣ ли́ки водворя́яся, священнотаи́нниче, свѣ́тъ ми́ низпосли́ и сло́во ми́ вдохни́ восхвали́ти боже́ственныя стра́сти твоя́, и гоне́нія, и боре́нія изря́дная и му́жественная, сломле́нія косте́й, удо́въ ссѣче́нія, и́хже ра́ди бы́лъ еси́, блаже́нне, причте́нъ а́нгеломъ, я́ко боже́ственный вои́стинну священнотаи́нникъ Христо́въ.

Пѣ́снь 7.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Бо́жіимъ манове́ніемъ о́гнь угасе́, на па́губу тебѣ́ разжже́нный, богому́дре: съ небесе́ бо гро́мъ слы́шашеся и снѣ́жныя ка́пли пуща́хуся, невѣ́дущія Христа́ покрыва́юще.

Крѣ́пко стру́жемь, благово́нія мѵ́ро, му́чениче, испусти́лъ еси́, во благово́ніе страсте́й излія́вшагося. Ибо прите́къ къ Сло́ву и Содѣ́телю, къ Нему́же взыва́лъ еси́: благослове́нъ еси́, Бо́же оте́цъ на́шихъ.

Житіе́ твое́ непоро́чно, муче́ніе, му́дре, пречу́дно и спаси́тельно всѣ́мъ, приступа́ющимъ моще́й твои́хъ ко святѣ́й ра́цѣ, исцѣле́нія точа́щи и скверне́нія страсте́й мно́гихъ изыма́ющи.

Богоро́диченъ: Разумѣ́вше издале́ча честнíи проро́цы та́инства Твоего́ неизрече́нную глубину́, многообра́зно всѣ́мъ уясни́ша Твое́ рождество́, Дѣ́во, взыва́юще: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Ру́цѣ просте́ръ, сла́вне, ко Христу́ Бо́гу на́шему, посредѣ́ суди́ща боря́ся со львы́, невреди́мь бы́лъ еси́, я́коже проро́къ пре́жде Даніи́лъ, а́нгела, при́сно соблюда́юща тя́, имѣ́я и поя́ непреста́нно: свяще́нницы, благослови́те, лю́діе, превозноси́те во вся́ вѣ́ки.

Ско́тски ви́дѣ тя́, беззако́нными осужде́на, звѣ́рь, твое́й угото́вленный поги́бели, я́сно провѣща́ всеси́льнымъ манове́ніемъ и вели́чія Спа́са Христа́ проповѣ́да, удивля́я вопію́щія: свяще́нницы, благослови́те, лю́діе, превозноси́те во вся́ вѣ́ки.

Си́лою Бо́жіею и благода́тію по́двигъ вели́кій муче́нія проше́дъ, вѣнцы́ улучи́лъ еси́ побѣ́ды, ра́дуяся, и лико́мъ приче́лся еси́ всѣ́хъ апо́столъ и му́ченикъ, съ ни́миже вопіе́ши непреста́нно: свяще́нницы, благослови́те, лю́діе, превозноси́те во вся́ вѣ́ки.

Богоро́диченъ: Умерщвле́нную угрызе́ніемъ ду́шу мою́ зміи́нымъ, еди́на явле́нно живо́тъ ро́ждшая, Всенепоро́чная, оживи́ и твори́ти сподо́би на́съ ра́ди изъ Тебе́, Дѣ́во, Ро́ждшагося хотѣ́ніе, вопію́щу: свяще́нницы, благослови́те, лю́діе, превозноси́те во вся́ вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Исцѣле́нія источа́еши разли́чна и неду́ги утиша́еши тя́жкія, отъ Христа́ благода́ть пріи́мъ вои́стинну, до́брѣ подви́гся и побѣди́въ враги́, богому́дре страстоте́рпче, а́нгеловъ сограждани́не и му́чениковъ ве́рхъ.

Красе́нъ въ по́двизѣхъ я́влься, въ кра́сныя черто́ги всели́лся еси́, усѣ́ченъ бы́въ мече́мъ во святу́ю твою́ главу́, ю́же Іису́съ вѣнча́ побѣ́ды вѣнце́мъ благолѣ́пнымъ, свѣти́льниче Це́ркве, утвержде́ніе и похвала́ благоче́стно блажа́щихъ тя́.

Сокруши́лъ еси́ держа́ву лука́ваго, Евти́хе страстоте́рпче прехва́льне, и на него́ побѣ́ду поста́вль ю́ношески, и побѣди́тель преизря́денъ ны́нѣ еси́ на небесѣ́хъ, престо́лу Тро́ическому со дерзнове́ніемъ мно́гимъ свѣ́тло предстоя́.

Па́мять твоя́ боже́ственная и свѣтоза́рная па́че со́лнца всѣ́мъ просія́, свѣ́тлыми сія́ніи просвѣща́ющи вѣ́рно и благоче́стно всегда́ сіе́ пра́зднующихъ, Евти́хе, въ не́йже тя́ мо́лимъ, я́ко имѣ́я дерзнове́ніе, спасе́ніе на́мъ испроси́.

Богоро́диченъ: Гла́съ Ти́ провозглаша́емъ Гавріи́ловъ: ра́дуйся, земле́ избра́нная; ра́дуйся, трапе́зо златови́дная; ра́дуйся, человѣ́ковъ прибѣ́жище; ра́дуйся, му́чениковъ похвало́; ра́дуйся, а́нгеловъ ра́дованіе, Свята́я Богоро́дице, держа́во вѣ́рою чи́стою блажа́щихъ Тя́.

Свѣти́ленъ. Подо́бенъ: Жены́, услы́шите.

И престо́ловъ я́ко прее́мникъ, и нра́вовъ я́ко прича́стникъ свяще́нныхъ апо́столовъ ты́ бы́въ, богому́дре, вѣ́рою свято́е твое́ страда́ніе пра́зднующія съ небесе́ назира́й, я́ко учени́къ Сло́ва, Евти́хе святи́телю.

Богоро́диченъ: При́зри, Чи́стая, на достоя́ніе Твое́ и непобѣди́мымъ Твои́мъ сіе́ соблюди́ предста́тельствомъ: ца́рствія упра́ви ски́птры и утверди́, язы́ки укроти́ и изле́й ми́ръ въ концы́ мíра.

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 227 об. – 231 об.

/ Къ оглавленію раздѣла /


Наверхъ / Къ титульной страницѣ

0