Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 22-й де́нь.
Свята́го му́ченика Агаѳони́ка и и́же съ ни́мъ.
Въ сíй же де́нь пое́тся слу́жба и свята́го [му́ченика] Лу́ппа.

[ВЕЧЕРЪ,]
На Го́споди воззва́хъ: стихи́ры Агаѳони́ка, гла́съ 4. Подо́бенъ: Да́лъ еси́ зна́меніе.

Му́дростію укра́шенъ,* сло́во живото́чно источи́лъ еси́,* обраща́я несмы́сленныя,* облича́я мучи́теля,* многобо́жія бу́рю утиша́я,* утверди́лъ еси́ вѣ́рныя* пребыва́ти въ Бо́жіей благода́ти.* Тѣ́мже лю́тая претерпѣ́въ опале́нія,* къ вы́шнему Ца́рству вѣнцено́сецъ восте́клъ еси́.

Кро́вію ка́плей* терпѣли́ваго твоего́ страда́нія* Влады́цѣ предста́лъ еси́ же́ртва благово́нна,* чи́сто заколе́ніе,* благопрія́тенъ да́ръ, свяще́нно приноше́ніе* и свяще́ніе соверше́нно непоро́чно.* Тѣ́мже моли́твами твои́ми* церко́вное исполне́ніе въ ми́рѣ соблюди́,* страда́льче Агаѳони́че.

Ины стихи́ры свята́го Лу́ппа, гла́съ и подо́бенъ то́йже:

Лу́ппъ блаже́нный* безбо́жія растопи́ ле́дъ тя́жкій* теплото́ю Боже́ственнаго Ду́ха,* и, усѣ́ченъ бы́въ мече́мъ,* исцѣле́ній струи́ источа́етъ,* и ду́ши иста́явшія ороша́етъ благода́тію.* Того́ восхва́лимъ, я́ко моли́твенника на́шего изря́дна* и те́пла засту́пника* благоче́стно, мучениколю́бцы.

Еллинская чти́лища* глубинѣ́ во́дъ пре́далъ еси́* и безбо́жныхъ удиви́лъ еси́, зря́щихъ чудеса́,* твое́ю, всеблаже́нне, твори́ма вѣ́рою.* Посреди́ и́хъ стоя́,* ба́ню боже́ственную свы́ше прія́тъ,* Бо́гу тя́ велича́ющу,* я́ко присному́ченика и до́бля адама́нта,* страстоте́рпче многострада́льне.

Искуша́юще посѣщи́ тя́ врази́,* дру́гъ дру́га посѣца́ху* и, стрѣ́лы пуща́юще,* дру́гъ дру́га уязвля́ху,* страстоно́сче Лу́ппе,* и, прете́рти мня́ще, дре́ву приложи́ша я́зву,* омраче́ни, блаже́нне, су́ще:* соблюда́ше бо тя́ Госпо́дь,* Его́же ра́ди пострада́ти изво́лилъ еси́,* моли́твенниче о душа́хъ на́шихъ,* а́нгеловъ собесѣ́дниче.

Сла́ва, гла́съ 1. Анато́ліево:

Тезоиме́ннѣ назва́лся еси́, благíя побѣ́ды тезоимени́тъ, Агаѳони́че многострада́льне: боже́ственнымъ бо жела́ніемъ уязви́вся, и́дольскія ле́сти и мучи́тельскія отве́ргся, къ жи́зни неконча́емѣй пресла́вно преше́лъ еси́. Тѣ́мже въ сла́внѣй твое́й па́мяти, дерзнове́ніе имы́й къ Бо́гу, моли́ спасти́ся душа́мъ на́шимъ.

И ны́нѣ, [пра́здника], гла́съ то́йже:

Подоба́ше самови́дцамъ Сло́ва и слуга́мъ, и е́же по пло́ти Ма́тере Его́ успе́ніе ви́дѣти, коне́чное ели́ко на Не́й та́инство, я́ко да не то́кмо е́же отъ земли́ Спа́сово восхожде́ніе у́зрятъ, но и Ро́ждшія Его́ преставле́нію свидѣ́тельствуютъ. Тѣ́мже, отвсю́ду Боже́ственною си́лою собра́вшеся, Сіо́на достиго́ша, и на не́бо иду́щую предсыла́ху, вы́шшую Херуви́мъ, Ейже и мы́ съ ни́ми покланя́емся, я́ко моля́щейся о душа́хъ на́шихъ.

На стихо́внѣ стихи́ры пра́здника, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Яже Бо́га пло́тію неискусому́жно ро́ждши* и Дѣ́ва пребы́вши,* отъ житія́ преставля́ется* и, привре́менныя жи́зни отходя́щи,* къ нестарѣ́емѣй преложи́ся.* Тѣ́мже стека́ются на о́блацѣхъ дне́сь* Христо́вы ученицы́ и апо́столи* къ погребе́нію Ея́.

Сти́хъ: Воскресни́, Го́споди, въ поко́й Тво́й,* Ты́ и Киво́тъ святы́ни Твоея́.

Дне́сь свѣ́тло торжество́,* благопремѣни́мся вси́,* со а́нгелы сла́вяще* честно́е преставле́ніе Ма́тере Бо́га на́шего:* святу́ю бо и свѣтоно́сную ду́шу* преда́вши въ ру́цѣ Сы́на,* съ Ни́мъ совокупля́ется въ жи́зни присносу́щнѣй,* духо́вно всегда́ моля́щи о на́съ прилѣ́жно.

Сти́хъ: Кля́тся Госпо́дь Дави́ду и́стиною* и не отве́ржется ея́.

Пріиди́те мы́сленно,* предвари́мъ Геѳсима́нію честну́ю* и святы́й до́мъ сла́внаго тѣлесе́* Ма́тере Бо́га на́шего.* Со апо́столы благоуха́емся* и со а́нгелы пѣсносло́вимъ:* еди́на бо бы́сть ра́дость дне́сь* су́щимъ на земли́ и небеси́* во успе́ніи Ея́.

Сла́ва, гла́съ то́йже. Самогла́сенъ:

Тезоиме́нно зва́ніе пріе́мъ благи́хъ сокро́вищъ, хра́мъ себе́ освяти́лъ еси́, му́чениче Агаѳони́че, за всѣ́хъ Царя́ въ му́кахъ зако́нно подви́гся, лю́таго врага́ низложи́лъ еси́ си́лу и, побѣ́ды взе́мъ по́честь, вѣнцено́сецъ въ вы́шнихъ Бо́гу предстои́ши, Его́же и моли́ти не преста́й о чту́щихъ тя́, му́чениковъ удобре́ніе.

И ны́нѣ, пра́здника, гла́съ то́йже:

Увѣря́я Іису́съ, Сы́нъ Тво́й, Богоро́дице, и Бо́гъ на́шъ, два́ естества́ Своя́, я́ко у́бо человѣ́къ умира́етъ и я́коже Бо́гъ востае́тъ. И Тя́, Богома́ти, зако́номъ естества́ умре́ти благоизво́ли, да не невѣ́рнымъ привидѣ́ніе мни́тся смотре́ніе. Прешла́ бо еси́ къ небе́снѣй странѣ́, небе́сная Невѣ́сто, я́ко отъ черто́га селе́нія Твоего́ отъ земли́ взята́. Освяти́ся возду́хъ восхожде́ніемъ Твои́мъ, я́ко просвѣти́ся земля́ рождество́мъ Твои́мъ, предпосыла́ютъ апо́столи, и а́нгели подъе́млютъ. Тѣ́мже, погре́бше пречи́стое тѣ́ло Твое́ и надгро́бное пѣ́ніе воспѣ́вше, ужа́сно зря́ху и со стра́хомъ глаго́лаху: сія́ измѣ́на десни́цы Вы́шняго, То́й бо посреди́ Тебе́, и не подви́жешися. Но, о Многопѣ́тая Ма́ти, не отступа́й, на́съ назира́ющи: мы́ бо лю́діе Твои́ и о́вцы па́жити Твоея́, и и́мя Твое́ призыва́емъ, прося́ще Тебе́ ра́ди спасе́нія и ве́лія ми́лости.

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.

Сла́ва, и ны́нѣ, тропа́рь пра́здника, гла́съ 1:

Въ рождествѣ́ дѣ́вство сохрани́ла eси́, во успе́ніи мíра не оста́вила eси́, Богоро́дице, преста́вилася eси́ къ животу́, Ма́ти су́щи Живота́, и моли́твами Твои́ми избавля́еши отъ сме́рти ду́ши на́ша.


НА УТРЕНИ,
По 1-й стихоло́гіи сѣда́ленъ, гла́съ 4. Подо́бенъ: Удиви́ся Іо́сифъ.

Простра́ннѣйши небе́съ я́вльшися на земли́, я́ко ро́ждши пло́тію всѣ́хъ Содѣ́теля, ны́нѣ въ са́мая небеса́ отъ земли́ преста́вилася еси́, пра́ведныхъ же ду́ши зря́ще Тя́, а́нгельстіи же ли́цы смотря́юще, я́ко Цари́цѣ хвалу́ досто́йно всегда́ Тебѣ́ прино́сятъ. Тѣ́мже моля́щи не преста́й о воспѣва́ющихъ Тя́.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ то́йже. Подо́бенъ: Ско́ро предвари́.

Твое́ пра́зднуемъ успе́ніе, Пречи́стая, въ не́же пріи́де изъ Тебе́ воплоти́выйся Христо́съ Бо́гъ на́шъ со сла́вою неизрече́нною прія́ти Тво́й ду́хъ. Тѣ́мъ а́ще и преста́вилася еси́, но на́съ, Богоро́дице, моли́твами Твои́ми не преста́й посѣща́ющи, пою́щихъ Тя́.

Сла́ва, и ны́нѣ, то́йже.

Кано́нъ пра́здника со ирмосо́мъ на 6. Ки́ръ Космы́, гла́съ 1.
Пѣ́снь 1.

Ирмо́съ: Преукраше́нная Боже́ственною сла́вою, свяще́нная и сла́вная, Дѣ́во, па́мять Твоя́, вся́ собра́ къ весе́лію вѣ́рныя, начина́ющей Маріа́мѣ, съ ли́ки и тимпа́ны, Твоему́ пою́ще Единоро́дному: сла́вно я́ко просла́вися.

Да провожда́ютъ невеще́ственніи чи́нове, небоше́ственное въ Сіо́нъ Боже́ственное тѣ́ло Твое́, внеза́пу же сте́кшеся апо́столъ мно́жество отъ коне́цъ, Богоро́дице, Тебѣ́ предста́ша а́біе, съ ни́миже, Чи́стая, Твою́ честну́ю, Дѣ́во, па́мять сла́вимъ.

Побѣ́дныя по́чести взяла́ еси́ на естество́, Чи́стая, Бо́га ро́ждши, оба́че же, подо́бящися Творцу́ Твоему́ и Сы́ну, па́че естества́ повину́ешися есте́ственнымъ зако́номъ. Тѣ́мже уме́рши, съ Сы́номъ востае́ши вѣ́чнующи.

И святы́хъ два́ кано́на, на 8. Кано́нъ свята́го Агаѳони́ка. Творе́ніе Іо́сифово, гла́съ 1.
Пѣ́снь 1.

Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Ублажи́, свя́те, озло́бленную ду́шу мою́ страстьми́, бла́гъ бы́въ Блага́го Бо́га подража́тель, и сло́во да́ждь честну́ю сла́вити па́мять твою́.

Зна́емь Вѣ́дущему вся́, му́чениче, бы́лъ еси́, богодохнове́нне, и Сего́ воплоще́ніе предъ язы́ки проповѣ́далъ еси́, плотскíя не убоя́вся сме́рти.

Возста́вилъ еси́ сло́вомъ твои́мъ па́дшія и возста́нія о́бщники показа́лъ еси́ и свѣ́тлости вѣ́чныя благоче́стно, му́чениче пребога́те.

Богоро́диченъ: Чуде́съ превы́ше ве́ліе чу́до, Чи́стая, рождества́ Твоего́ зри́тся: ражда́еши бо въ подо́біи пло́ти бы́вша Христа́ кромѣ́ преложе́нія и смѣше́нія.

Кано́нъ свята́го Лу́ппа. Творе́ніе Іо́сифово, гла́съ 4.
Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Пою́щу свѣ́тлую и свѣтоно́сную твою́ па́мять, во́ине Христо́въ, до́блій страда́льче, ду́шу мою́ озари́, сія́ньми невече́рними озаря́емь при́сно и Боже́ственному Свѣ́ту предстоя́.

Въ му́ченическія вше́дъ му́жески по́двиги, исповѣ́далъ еси́ Бо́га, я́вльшася на земли́ и естество́ обожи́вша, прему́дре, человѣ́ческое, и бо́ги потреби́лъ еси́ е́ллинскія си́лою духо́вною.

Во́дъ живо́тныхъ испо́лнивъ се́рдце, я́коже боже́ственная рѣка́, струи́, прему́дре, пре́лести изсуши́лъ еси́, вѣ́рою же мы́сли человѣ́ковъ напои́лъ еси́, прозяба́ющія пло́дъ небе́сный.

Богоро́диченъ: Яко у́тро благолѣ́пно, отъ боку́ возсія́ла еси́ Іису́са, просвѣще́ніе всѣ́хъ и Бо́га, Неискусобра́чная Влады́чице, но́щь многобо́жія потре́бльша и сія́ніи невече́рними мíръ просвѣща́юща.

Пѣ́снь 3.

Ирмо́съ: Содѣ́тельная и содержи́тельная всѣ́хъ, Бо́жія Му́дросте и Си́ло, непрекло́нну, недви́жиму Це́рковь утверди́, Христе́, еди́нъ бо еси́ Свя́тъ, во святы́хъ почива́яй.

Жену́ Тя́ ме́ртвенну, но па́че естества́ и Ма́терь Бо́жію, ви́дѣвше, Всенепоро́чная, сла́вніи апо́столи, ужа́сно прикаса́хуся рука́ми сла́вою облиста́ющей, я́ко богопрія́тное Селе́ніе ви́дяще.

Пости́же ру́цѣ досади́тельныя де́рзаго, усѣче́ніемъ су́дъ нане́съ, Бо́гу сохра́ншу че́сть одушевле́нному Киво́ту, сла́вою Божества́, въ Не́мже Сло́во пло́ть бы́сть.

Инъ.

Ирмо́съ: Да утверди́тся се́рдце мое́ въ во́ли Твое́й, Христе́ Бо́же, Иже надъ вода́ми не́бо утвержде́й второ́е и основа́вый на вода́хъ зе́млю, Всеси́льне.

Суему́дренный ласка́ніи тя́ ле́стно укра́сти надѣ́яшеся: осуети́ся же его́ су́етное мудрова́ніе, утвержде́ну тебѣ́ на ка́мени нело́жныя, му́чениче, вѣ́ры.

Преплы́въ пучи́ну ра́нъ и болѣ́зней тѣлесе́ правле́ніемъ Христо́вымъ, му́чениче Агаѳони́че, устреми́лся еси́ къ приста́нищемъ мы́сленнымъ, ра́дуяся.

Сѣче́нія и терза́нія тѣлесе́ на мя́ да пріи́дутъ дне́сь, мечи́, и сковрады́, и о́гнь, и звѣ́ріе, и сме́рть, не убою́ся, — вопія́лъ еси́, страда́льче Агаѳони́че.

Богоро́диченъ: По естеству́ Неопи́санный, вообра́жся изъ Тебе́, на́ше описа́ніе пло́тски прія́тъ, Влады́чице, въ существа́хъ и хотѣ́ніихъ сугу́быхъ познава́емь.

Инъ.

Ирмо́съ: Яко непло́ды роди́ отъ язы́къ Це́рковь, и мно́гое въ ча́дѣхъ изнемо́же со́нмище, чу́дному Бо́гу на́шему возопіи́мъ: Свя́тъ еси́, Го́споди.

Утверди́вся Ду́ха непобѣди́мою си́лою, къ подвиго́мъ, му́чениче, возше́лъ еси́ му́жески и пре́лести шата́ніе упраздни́лъ еси́, Лу́ппе всеблаже́нне.

Разумѣ́въ тя́ свидѣ́теля Христо́выхъ страда́ній, свирѣ́пый гони́тель ласка́ніи тво́й по́мыслъ прельсти́ти надѣ́яшеся: солга́ся же оба́че вселука́вый.

Якоже цѣвни́ца, Ду́хомъ вседѣ́тельнымъ ударя́ема, возглаша́лъ еси́ предъ мучи́тели ра́достно пѣ́снь боже́ственнаго ра́зума и услади́лъ еси́ вѣ́рою притека́ющія.

Богоро́диченъ: Бо́гъ, посреди́ Тебе́ все́лься, я́коже вѣ́сть, дѣ́вства ключа́ не поколеба́, Чи́стая, на недви́жимѣмъ же ка́мени вѣ́ры вся́ утверди́.

Конда́къ му́ченика, гла́съ 1. Подо́бенъ: Ли́къ а́нгельскій.

Зва́ніе благо́е стяжа́въ, богому́дре, муже́й лука́выхъ отврати́лся еси́ вѣ́ры, не убоя́вся му́къ, Агаѳони́че сла́вне, тѣ́мже благи́мъ бы́лъ еси́ наслѣ́дникъ и прія́лъ еси́ со стра́ждущими съ тобо́ю досто́йныя вѣнцы́.

Икосъ:

Блага́го и Человѣколю́бца моли́, Агаѳони́че всему́дре, ублажи́ти озлобле́ніе моего́ се́рдца и дарова́ти ми́ сло́во, е́же досто́йно пѣ́ти твоя́ по́двиги, е́же пострада́лъ еси́ по вѣ́рѣ Христа́ Бо́га на́шего, ка́ко всю́ду сматря́еши, я́коже па́стырь, му́чениче, и, во́лки отгна́въ, наста́вилъ еси́ ста́до твое́ къ земли́ и́стиннѣй, вопія́ со дерзнове́ніемъ: я́ко о́вцы вмѣни́хомся заколе́нія. Тѣ́мже у́мремъ, да пріи́мемъ нетлѣ́нныя вѣнцы́.

Сѣда́ленъ, гла́съ 8. Подо́бенъ: Прему́дрости.

Крове́й твои́хъ струя́ми мы́сленнаго фарао́на удави́въ съ во́и его́, сла́вне, къ земли́ преше́лъ еси́, идѣ́же кро́тцыи живу́тъ и му́ченицы вси́, нетлѣ́нія вѣне́цъ пріе́мъ, досточу́дне. Тѣ́мже источа́еши вѣ́рнымъ исцѣле́нія, и уставля́еши стра́сти, и отгоня́еши ду́хи лука́выя, страда́льче Агаѳони́че, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

Сла́ва, Лу́ппа, гла́съ 1. Подо́бенъ: Гро́бъ Тво́й.

Страда́ніемъ просвѣти́вся, я́ко зла́то въ пещи́, облиста́лъ еси́, му́дре, цѣле́ній зарю́ и тму́ отгна́лъ еси́ де́моновъ благода́тію. Тѣ́мже вси́ святу́ю твою́ па́мять пра́зднуемъ, богоблаже́нне Лу́ппе, му́чениковъ похвало́.

И ны́нѣ, пра́здника, гла́съ то́йже. Подо́бенъ: Ка́мени запеча́тану.

Ли́къ боже́ственныхъ апо́столъ собра́ся погребсти́ Тя прече́стно, Богоро́дице Всечи́стая, съ ни́миже и а́нгельстіи чи́ни воспѣва́ху преставле́ніе Твое́, взыва́юще прехва́льно. Съ ни́миже и мы́, любо́вію игра́юще, Чи́стая, хвалу́ Тебѣ́ прино́симъ, гла́сы пѣ́сненными, вѣ́рніи, и вопіе́мъ: ра́дуйся, Предста́тельнице при́сно чту́щихъ Тя́.

Пѣ́снь 4.

Ирмо́съ: Рѣ́чи проро́ковъ и гада́нія, воплоще́ніе прояви́ша отъ Дѣ́вы Твое́, Христе́: сія́ніе блиста́нія Твоего́ во свѣ́тъ язы́ковъ изы́детъ, и возгласи́тъ Тебѣ́ бе́здна съ весе́ліемъ: си́лѣ Твое́й сла́ва, Человѣколю́бче.

Ви́дите лю́діе и чуди́теся: Гора́ бо свята́я и я́вственная Бо́гу въ небе́сныя оби́тели превы́шше взе́млется, Не́бо земно́е въ небе́сное и нетлѣ́нное селе́ніе вселя́емо.

Жи́зни присносу́щныя и лу́чшія, сме́рть Твоя́ бы́сть прехожде́ніе, Чи́стая, отъ привре́менныя къ Боже́ственнѣй вои́стинну и непреходи́мѣй, преставля́я Тя́, Чи́стая, въ весе́ліи Сы́на зрѣ́ти Твоего́ и Го́спода.

Взя́шася две́ри небе́сныя, и Ангели воспѣ́ша, и прія́тъ Христо́съ дѣ́вства Своея́ Ма́тере сосу́дъ; Херуви́ми подъя́ша Тя́ съ весе́ліемъ, Серафи́ми же сла́вятъ, ра́дующеся.

Инъ.

Ирмо́съ: Ду́хомъ прови́дя, проро́че Авваку́ме, Словесе́ воплоще́ніе, проповѣ́далъ еси́, вопія́: внегда́ прибли́житися лѣ́томъ, позна́ешися, внегда́ пріити́ вре́мени, пока́жешися. Сла́ва си́лѣ Твое́й, Го́споди.

Вше́лъ еси́ въ му́ченическое суди́лище, му́дре, ору́жіемъ Боже́ственныя вѣ́ры свѣ́тло огради́вся: спле́тся же со враго́мъ, держа́вно сего́ побѣди́въ, покори́лъ еси́ подъ но́зѣ твои́, му́чениче страда́льче Агаѳони́че.

Му́дростію твои́хъ слове́съ и дѣ́лъ свяще́нныхъ боже́ственными показа́ніи, устраши́лъ еси́ враги́, надѣ́ющіяся терпѣли́вное ума́ твоего́ побѣди́ти и къ пре́лести привлещи́, му́чениче Христо́въ Агаѳони́че.

Огне́мъ всесоже́гъ любве́ боже́ственныя тво́й у́мъ, сла́вне, огня́ супоста́тъ не устраши́лся еси́, но возже́гъ, я́коже у́гль, безбо́жія запали́лъ еси́ хвра́стіе, му́чениче свяще́нне Агаѳони́че.

Богоро́диченъ: На хребтѣ́хъ ѣ́здяй, Чи́стая, херуви́мскихъ, вопло́щся я́ко Человѣ́къ изъ Тебе́ боголѣ́пно, во Твои́хъ объя́тіяхъ сѣди́тъ, я́коже Младе́нецъ, и младе́нствуетъ, младоу́мнаго дре́вле бы́вша спаса́яй первозда́ннаго.

Инъ.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Превозше́дъ человѣ́ческія не́мощи, блаже́нне, земны́я предѣ́лы, терпѣ́лъ еси́ ра́ны, па́лицами біе́мь, же́злъ си́лы нося́ спаси́тельный, пресла́вный Лу́ппе, Кре́стъ Бо́га на́шего.

Надѣ́явся, я́коже гора́, на Го́спода, пребы́лъ еси́, страстоте́рпче Лу́ппе, Боже́ственною по́мощію непоколеби́мь: тѣ́мже сокруше́нія удо́въ твои́хъ претерпѣ́лъ еси́, возвыша́емь къ небеси́ боже́ственнымъ жела́ніемъ.

Испо́лненъ вѣ́ры сы́й, и прему́дрости, и благода́ти, посредѣ́ беззако́ннующихъ Сло́во Бо́жіе исповѣ́далъ еси́, пуща́емыхъ же стрѣ́лъ небре́глъ еси́, упраждня́емыхъ си́лою Христо́вою прибли́житися тебѣ́.

Богоро́диченъ: На Тебе́, я́коже до́ждь, Прему́дрости бе́здна Іису́съ сни́де, еди́ну чи́сту Тя́ обрѣ́тъ, Богороди́тельнице Дѣ́во, и потопи́ нече́стія пото́ки лю́тыя Боже́ственною благода́тію.

Пѣ́снь 5.

Ирмо́съ: Бо́жію и неизрече́нную добро́ту, добродѣ́телей Твои́хъ, Христе́ исповѣ́мъ: отъ Присносу́щныя бо Сла́вы, Соприсносу́щное и Ѵпоста́сное возсія́вый Сія́ніе, изъ дѣ́вственныя утро́бы, су́щимъ во тмѣ́ и сѣ́ни, вопло́щся, возсія́лъ еси́ Со́лнце.

Яко на о́блацѣ Дѣ́во, апо́стольскій ли́къ носи́мь, къ Сіо́ну отъ коне́цъ, служи́ти Тебѣ́, Облаку ле́гкому, собира́шеся: отъ Нея́же Вы́шній Бо́гъ, су́щимъ во тьмѣ́ и сѣ́ни, Пра́ведное возсія́ Со́лнце.

Тру́бъ, богопрія́тніи язы́цы богосло́вныхъ муже́й благогла́снѣйше Богоро́дицѣ вопія́ху, исхо́дную возглаша́юще пѣ́снь Ду́хомъ: ра́дуйся нетлѣ́нный Исто́чниче, Бо́жія живонача́льнаго и спаси́тельнаго всѣ́мъ воплоще́нія.

Инъ.

Ирмо́съ: Свѣ́тлый на́мъ возсія́й Свѣ́тъ Присносу́щный, у́тренюющимъ о судьба́хъ за́повѣдей Твои́хъ, Влады́ко Человѣколю́бче, Христе́, Бо́же на́шъ.

Зако́номъ проти́вился еси́ губи́теля зако́номъ спаси́тельнымъ, я́ко му́ченикъ зако́ненъ, сла́вне, Законода́вца и всѣ́ми влады́чествующаго Христа́ Бо́га на́шего.

Свѣ́телъ и пресла́венъ му́ченикъ бы́въ, Агаѳони́къ ны́нѣ ублажа́ется, съ небе́сными всегда́ си́лами свѣ́тло ра́дуяся.

Па́че е́же жи́ти, умре́ти изво́лилъ еси́, сла́вне, я́ко да бу́дущую при́сно и вѣ́чнующую жи́знь пріобря́щеши. Тѣ́мже мечу́ сѣку́щему вы́ю подклони́лъ еси́.

Богоро́диченъ: Твоя́ чудеса́ прови́дя Боже́ственнымъ Ду́хомъ, Иса́ія взыва́ше: се́ во чре́вѣ пріи́меши Невмѣсти́маго, воплоща́ема, Чи́стая.

Инъ.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

На у́ды прети́ша ссѣщи́ тя врази́, са́ми же себе́ па́че, му́дре, Боже́ственными манове́ньми посѣка́юще, невреди́ма и не уя́звена смотря́ху сохраня́ема.

Утверди́въ, сла́вне, о́ко душе́вное на ка́мени неразсѣ́днѣмъ, ника́коже волна́ми, му́чениче, поколеба́лся еси́ го́рькихъ му́къ, Боже́ственною си́лою укрѣпля́емь.

Кропле́ньми крове́й твои́хъ запале́ніе и́дольское погаси́лъ еси́, страда́льче, и огне́мъ страда́ній твои́хъ всю́ попали́лъ еси́ ле́сть, Ду́хомъ Святы́мъ разжига́емь.

Богоро́диченъ: Чи́стую чи́стымъ умо́мъ почти́мъ, добро́ту Іа́ковлю, боже́ственными дѣя́ньми удобря́еми, благоче́стно воспое́мъ, я́ко Ма́терь Бо́га на́шего.

Пѣ́снь 6.

Ирмо́съ: Морскíй пучиноро́дный ки́товъ вну́тренній о́гнь — тридне́внаго Твоего́ погребе́нія проображе́ніе, его́же Іо́на проро́къ показа́ся. Спасе́нъ бо, я́ко и предпосла́ся, неврежде́нъ, вопія́ше: пожру́ Ти́ со гла́сомъ хвале́нія, Го́споди.

Дае́тъ Тебѣ́, я́же превы́ше естества́, Ца́рь всѣ́хъ Бо́гъ: въ рождествѣ́ бо Дѣ́ву я́коже сохрани́, та́ко во гро́бѣ тѣ́ло соблю́дъ нетлѣ́нно и спросла́ви Боже́ственнымъ преставле́ніемъ, че́сть Тебѣ́, я́ко Сы́нъ Ма́тери, да́руя.

Вои́стинну Тя́, я́ко свѣ́телъ свѣ́щникъ, невеще́ственнаго Свѣ́та, кади́льницу злату́ю Боже́ственнаго Угля, во Свята́я святы́хъ всели́, ру́чку и же́злъ, скрижа́ль богопи́санную, ковче́гъ святы́й, трапе́зу Сло́ва жи́зни, Дѣ́во, Рождество́ Твое́.

Инъ.

Ирмо́съ: Проро́ка Іо́ну подража́я, вопію́: живо́тъ мо́й, Бла́же, свободи́ изъ тли́, и спаси́ мя, Спа́се мíра, зову́ща: сла́ва Тебѣ́.

Тмочи́сленное мно́жество еѳіо́пъ мы́сленныхъ побѣди́лъ еси́, му́дре, не́мощію плотско́ю и соедини́лся еси́ со тма́ми свяще́нныхъ слу́гъ.

Ше́ствовалъ еси́ му́жески муче́нія пу́ть и утѣсни́лъ еси́ пути́ зло́бы, страда́льче, и дости́глъ еси́ простра́нная селе́нія небе́сная.

Просвѣ́щся, я́коже зла́то, въ горни́лѣ лю́тыхъ страда́ній, Христо́въ Агаѳони́че му́дре, изображе́ніе яви́лся еси́, въ боже́ственныхъ положе́нъ сокро́вищахъ.

Богоро́диченъ: Дѣ́вствуеши, я́коже пре́жде, и ро́ждши Христа́, млеко́мъ пита́еши всѣ́мъ пи́щу даю́щаго, Чи́стая, пресла́вно: ди́вно чу́до и непостижи́мо.

Инъ.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Терпѣ́лъ еси́ плотскíя му́ки крѣ́пко, умуча́я беззако́ннующихъ мудрова́нія безбо́жная и го́рько ураня́я де́моновъ мно́жества, досточу́дне.

Стря́слъ еси́, я́ко пра́хъ, бо́ги истни́въ безбо́жныхъ, тебе́ же сама́го возста́вилъ еси́ одушевле́нъ благоче́стія сто́лпъ и му́жества о́бразъ, богодохнове́нне.

Ра́довашеся, пита́емь му́ками, сла́вный страстоно́сецъ, прови́дѣ вѣнцы́ Ду́хомъ и вѣ́чную бу́дущую му́ченикомъ сла́ву.

Богоро́диченъ: Родила́ еси́, Его́же Оте́цъ пре́жде вѣ́къ роди́ пребезнача́льно, и сосце́ма Пита́теля пита́ла еси́: па́че ума́ чу́до, и па́че сло́ва, Чи́стая, та́инство.

Конда́къ пра́здника, гла́съ 2:

Въ моли́твахъ неусыпа́ющую Богоро́дицу и въ предста́тельствахъ непрело́жное упова́ніе, гро́бъ и умерщвле́ніе не удержа́ста: я́коже бо Живота́ Ма́терь, къ животу́ преста́ви, во утро́бу Всели́выйся приснодѣ́вственную.

Икосъ:

Огради́ моя́ помышле́нія, Христе́ мо́й, и́бо Стѣ́ну мíра воспѣ́ти дерза́ю, Чи́стую Ма́терь Твою́, на столпѣ́ глаго́лъ укрѣпи́ мя, и въ тя́жкихъ мы́слехъ заступи́ мя, Ты́ бо взыва́ющимъ и прося́щимъ вѣ́рою моле́нія исполня́еши. Ты́ мнѣ́ у́бо да́руй язы́къ прино́сенъ и по́мыслъ непосты́денъ: вся́кое бо дая́ніе сія́нія отъ Тебе́ низпосыла́ется, Свѣтопода́телю, во утро́бу всели́выйся приснодѣ́вственную.

Пѣ́снь 7.

Ирмо́съ: Безсту́днѣй я́рости же и огню́ Боже́ственное жела́ніе сопротивля́яся, о́гнь у́бо ороша́ше, я́рости же смѣя́шеся, богодохнове́нною слове́сною преподо́бныхъ тривѣща́нною цѣвни́цею, противовѣща́я мусикíйскимъ орга́номъ посреди́ пла́мене: препросла́вленный отце́въ и на́шъ Бо́же, благослове́нъ еси́.

Богодѣ́ланныя скрижа́ли Моисе́й, пи́санныя Боже́ственнымъ Ду́хомъ, я́ростію сокру́шъ, но сего́ Влады́ка, Ро́ждшую неврежде́нну въ небе́сныя сохра́нь до́мы, ны́нѣ вну́трь всели́. Съ Не́ю игра́юще, вопіе́мъ Христу́: препросла́вленный отце́въ и на́шъ Бо́же, благослове́нъ еси́.

Въ кимва́лѣхъ — усты́ чи́стыми, мусикíйски же — се́рдцемъ свѣ́тлымъ, доброгла́сною трубо́ю — высо́кою мы́слію, Дѣ́вы и Чи́стыя въ наро́читый избра́нный де́нь преставле́нія, дѣ́тельными пле́щуще рука́ми, вопіе́мъ: препросла́вленный отце́въ и на́шъ Бо́же, благослове́нъ еси́.

Богому́дріи, собери́теся, лю́діе: Бо́жія бо сла́вы Селе́ніе, отъ Сіо́на преставля́ется къ небе́сному жили́щу, идѣ́же гла́съ чи́стъ пра́зднующихъ, гла́съ несказа́ннаго ра́дованія, и въ весе́ліи вопію́щихъ Христу́: препросла́вленный отце́въ и на́шъ Бо́же, благослове́нъ еси́.

Инъ.

Ирмо́съ: Су́щимъ въ пещи́ отроко́мъ Твои́мъ, Спа́се, не прикосну́ся, ниже́ стужи́ о́гнь. Тогда́ тріе́ я́ко еди́нѣми усты́ поя́ху и благословля́ху, глаго́люще: благослове́нъ Бо́гъ оте́цъ на́шихъ.

Небе́сныя сла́вы о́бщникъ бы́лъ еси́, вся́, я́же на земли́, ми́мо те́къ и отъ души́ небесе́ и земли́ Влады́ку возлюби́въ, сла́вне, тѣ́мже почита́емъ твою́ святу́ю па́мять вѣ́рно.

Послѣ́дуя стра́сти Христо́вѣ, источи́вшаго всѣ́мъ безстра́стіе вѣ́рнымъ, претерпѣ́лъ еси́ поноше́ніе, и ско́рби, му́чениче, и сме́рть непра́ведную, мече́мъ твоя́ глава́ отсѣ́чена бы́вши, съ ра́достію.

Ме́ртвымъ ка́пищемъ че́сти ника́коже по́далъ еси́, честву́я безсме́ртнаго Бо́га, на́съ ра́ди ме́ртва я́вльшася и льсти́ваго крѣ́пость умори́вша. Тѣ́мже жи́знь и́стинную улучи́лъ еси́, му́чениче му́дре.

Богоро́диченъ: Бо́гъ изъ Тебе́ бы́сть Человѣ́къ, смѣше́ніемъ, Чи́стая, обожи́въ человѣ́чество и о́бщники естества́ Боже́ственнаго сотво́рь, Тебе́ блажа́щія, въ жена́хъ вои́стинну благослове́нная, Чи́стая.

Инъ.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Просвѣще́нъ добро́тами добротво́рныхъ страда́ній, на Крестѣ́ на́съ ра́ди Претерпѣ́вшему стра́сти, сла́вне, ра́дуяся, ны́нѣ предстои́ши, озаря́емь Боже́ственными свѣтоли́тіи.

Съ небесе́ тебѣ́ я́вѣ вода́ излія́ся пресла́вно, просвѣща́етъ и укрѣпля́етъ ду́шу твою́, вопи́ти повелѣва́ющи: препѣ́тый Го́споди, Бо́же оте́цъ на́шихъ, благослове́нъ еси́.

Стоя́лъ еси́ посредѣ́ враго́въ, я́коже сто́лпъ непревра́тенъ, непоколеби́мь умо́мъ, многообра́зныхъ му́къ, сла́вный страда́льче, козньми́, разори́лъ же еси́ ле́сть велему́дренно.

Богоро́диченъ: Тя́, добро́ту Іа́ковлю, еди́ну избра́ Еди́ный, Живы́й на небесѣ́хъ, и, всели́вся посредѣ́ Тебе́, Чи́стая, ника́коже поколеба́ дѣ́вства Твоего́ ключи́, Благослове́нная.

Пѣ́снь 8.

Ирмо́съ: Пла́мень, ороша́ющь преподо́бныя, злочести́выя же попаля́ющь, Ангелъ Бо́жій всемо́щный показа́ отроко́мъ, живонача́льный же исто́чникъ содѣ́ла Богоро́дицу, тлю́ сме́рти и живо́тъ точа́щу пою́щимъ: Содѣ́теля еди́наго пои́мъ, изба́вленніи, и превозно́симъ во вся́ вѣ́ки.

Глаго́лы послѣ́доваху Боже́ственному Ковче́гу свяще́нному, все́ мно́жество богосло́вовъ въ Сіо́нѣ: ка́мо и́деши ны́нѣ, Ски́ніе, — зову́ще, — Бо́га Жива́го? Не преста́й призира́ющи вѣ́рою пою́щія: Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

Якоже, воздѣ́вши ру́цѣ, исхо́диши Всенепоро́чная, ру́цѣ, и́миже Бо́га носи́ла еси́ пло́тію, со дерзнове́ніемъ, я́ко Ма́ти, рекла́ еси́ къ Рожде́нному: я́же Ми́ да́лъ еси́, во вѣ́ки сохрани́, вопію́щія Тебѣ́: Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

Инъ.

Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.

Отъ мѣ́ста влачи́мь на мѣ́сто, страда́льче, зе́млю освяти́лъ еси́ стопа́ми твои́ми, и, прекло́нь вы́ю мечу́ сѣку́щему, пло́ти отлучи́лся еси́ и Бо́гу соедини́лся еси́.

Біе́нія вся́кая и му́ки плотскíя преоби́дѣлъ еси́, жела́ніемъ опаля́емь Бо́жіимъ, и, ра́дуяся, совокупи́лся еси́, по́двигъ до́брый тво́й сконча́въ, вы́шнимъ тма́мъ.

Крѣ́пость низложи́ся безпло́тнаго врага́, плотско́ю не́мощію му́ченицы Христо́вы побѣди́ша сего́, укрѣпля́еми всеси́льною крѣ́постію Влады́ки.

Богоро́диченъ: Ски́нію Тя́, и Трапе́зу, и Боже́ственный Киво́тъ, и Ста́мну, вмѣсти́вшую Ма́нну жи́зни, и святу́ю Го́ру имену́емъ, Дѣ́во Марíе, при́сно благослове́нная.

Инъ.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

По мно́гихъ му́кахъ, блаже́нне, Бо́гу вы́ю преклони́лъ еси́, мече́мъ во главу́ усѣка́емь, главы́ же ссѣка́я, я́ко во у́жасѣ, беззако́нныхъ вра́гъ вѣ́рою.

Са́мъ себе́ на заколе́ніе во́льное, я́ко а́гня, даде́, непоро́чно, Агнцу Бо́жію подо́бяся, взе́млющему грѣхи́ мíра, не вопію́щему, ни взыва́ющему.

Неду́говъ вся́кихъ цѣльба́ и врачева́ніе ду́шъ неиждива́емое твоя́ ра́ка бы́сть, отъ Бо́га бо благода́тію исцѣле́ній обогати́ся, Лу́ппе прехва́льне.

Богоро́диченъ: Благослови́тъ вся́ тва́рь, Дѣ́во, Рождество́ Твое́, благослове́ньми на́съ вѣнча́вшаго, и кля́тву отъе́мшаго: Всеблагослове́нная, еди́на Препросла́вленная, ро́дъ на́шъ облагода́тившая.

Пѣ́снь 9.

Ирмо́съ: Побѣжда́ются естества́ уста́вы въ Тебѣ́, Дѣ́во Чи́стая: дѣ́вствуетъ бо рождество́ и живо́тъ предобруча́етъ сме́рть; по рождествѣ́ Дѣ́ва и по сме́рти жива́, спаса́еши при́сно, Богоро́дице, наслѣ́діе Твое́.

Дивля́хуся Ангельскія си́лы, въ Сіо́нѣ смотря́юще своего́ Влады́ку, же́нскую ду́шу рука́ми нося́щаго, пречи́сто бо Ро́ждшей, сынолѣ́пно провозглаша́ше: гряди́, Чи́стая, съ Сы́номъ и Бо́гомъ просла́вленна бу́ди.

Опря́та ли́къ апо́стольскій богопрія́тное тѣ́ло Твое́, со стра́хомъ зря́ще и гла́сомъ ве́ліимъ вѣща́юще: въ небе́сныя до́мы къ Сы́ну восходя́щи, спаса́еши при́сно, Богоро́дице, наслѣ́діе Твое́.

Инъ.

Ирмо́съ: Свѣтоно́сный о́блакъ, въ о́ньже всѣ́хъ Влады́ка, я́ко до́ждь съ небесе́ на руно́, сни́де и воплоти́ся на́съ ра́ди, бы́въ Человѣ́къ, Безнача́льный, велича́емъ вси́ я́ко Ма́терь Бо́га на́шего Чи́стую.

Во святы́хъ ли́цѣхъ свяще́нныхъ апо́столъ, и во дво́рѣхъ страда́льцевъ, и преподо́бныхъ ста́дѣхъ, и со проро́ки причте́нъ, му́дре Агаѳони́че, ра́дуяся съ ни́ми, Тро́ицѣ вѣнцено́сецъ ны́нѣ предстои́ши свѣ́тло.

Яко чудна́ ре́вность твоя́, я́ко тверда́ твоя́ вѣ́ра, я́ко блага́ я́же къ Бо́гу твоя́ наде́жда, му́чениче, я́ко свѣтоза́рна твоя́ жи́знь, я́ко благода́ти испо́лнена сме́рть, безсме́ртныя тя́ сла́вы, страстоно́сче, сотвори́ прича́стника.

Тя́, Христо́ва а́гнца, свяще́нное заколе́ніе, страда́лецъ добро́ту, чуде́съ исто́чника, Це́ркви кра́сное, богому́дре, украше́ніе, утвержде́ніе вѣ́рныхъ, восхваля́емъ по до́лгу, Агаѳони́че му́дре.

Всесвята́я твоя́ па́мять, освяща́ющая мíръ, ны́нѣ пріи́де на́мъ, всесла́вный му́чениче, въ не́йже мо́лимся улучи́ти твое́ заступле́ніе, почита́юще тя́ любо́вію, Агаѳони́че, я́ко Сло́ва блага́го уго́дника.

Богоро́диченъ: Грѣхолюби́вый нра́въ, и неиспра́влено житіе́, и грѣ́шну ду́шу, и се́рдце оскверне́но имѣ́я, блу́дный а́зъ, припа́даю Тебѣ́, Влады́чице: помози́ ми, и исправле́ніе да́ждь, пре́жде да́же не пости́гнетъ мене́ сме́ртное посѣче́ніе.

Инъ.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Возмо́глъ еси́ си́лою Боже́ственною змíя дре́вняго, пресла́вне, съ пло́тію попра́ти и побѣ́днымъ вѣнча́лся еси́ вѣнце́мъ, тѣ́мже, съ му́ченики ра́дуяся, живе́ши на небесѣ́хъ.

Яви́лся еси́, я́ко многосвѣ́тлая звѣзда́, Со́лнце возвѣща́я сѣдя́щимъ, му́чениче, во тмѣ́ поги́бели, Имже озари́вшеся, яви́шася дне́ прича́стницы вѣ́рою невече́рняго, достосла́вне.

Дне́сь па́мять твоя́ на́мъ просія́, со́лнца свѣтлѣ́йши, всю́ зе́млю просвѣща́ющи, о́блаки ду́шъ отгоня́щи и мра́къ страсте́й отъе́млющи, ю́же моле́бно пра́зднуемъ.

Вы́шній Сіо́нъ, избра́нныхъ гра́дъ, тво́й ду́хъ но́ситъ, ра́дуяся, перворо́дныхъ Це́рковь уясня́ется, вѣ́рніи же, почита́емъ тя́, прося́ще спасти́ся моли́твами твои́ми, Лу́ппе богому́дре всеблаже́нне.

Богоро́диченъ: Свѣ́та, и́же въ Тебѣ́, луча́ми, Богоневѣ́сто, ду́шу мою́ просвѣти́, лежа́щую въ ро́вѣ поги́бели возста́ви, враги́ низлага́ющи, оскорбля́ющія при́сно се́рдце мое́ и къ страсте́мъ порѣва́ющія мя́.

Свѣти́ленъ. Подо́бенъ: Ду́хомъ во святи́лищи.

Яко благи́хъ тезоимени́тъ и побѣ́ды вку́пѣ, блага́го моли́, Агаѳони́че му́чениче, и щедролюби́ваго Бо́га, благи́хъ бы́ти ми́ прича́стнику вѣ́чныхъ и пою́щимъ вѣ́рно свѣ́тлую твою́ и достохва́льную па́мять.

Сла́ва, и ны́нѣ, пра́здника. Подо́бенъ:

Апо́столи, собери́теся погребсти́ тѣ́ло еди́ныя Богоневѣ́сты и Ма́тере Госпо́дни. Ра́дуйся, ны́нѣ, Гефсиманíи гра́дъ ве́сь, и надгро́бная по́йте на небеса́ возлетѣ́вшей и со а́нгелы лику́ющей въ безконе́чнѣй сла́вѣ.

На стихо́внѣ стихи́ры пра́здника, гла́съ 2. Подо́бенъ: До́ме Евфра́ѳовъ.

Пѣ́сньми Твое́* честно́е и богопрія́тное тѣ́ло,* провожда́юще, боже́ственніи апо́столи,* вопія́ху:* гдѣ́ ны́нѣ и́деши, Влады́чице?

Сти́хъ: Воскресни́, Го́споди, въ поко́й Тво́й,* Ты́ и Киво́тъ святы́ни Твоея́.

Пріиди́те, земноро́дніи,* соста́вимъ ли́къ,* исхо́дная вопію́ще* въ преставле́ніи* Богоро́дицѣ дне́сь.

Сти́хъ: Кля́тся Госпо́дь Дави́ду и́стиною,* и не отве́ржется ея́.

Земля́ у́бо Твои́мъ погребе́ніемъ* благослови́ся, Дѣ́во,* возду́хъ же восхожде́ніемъ* освяти́ся стра́ннымъ,* зако́номъ умира́ющи естества́.

Сла́ва, и ны́нѣ. Подо́бенъ:

Вси́ земноро́дніи,* стеце́мся усе́рдно* со безпло́тными* погребсти́ Ро́ждшую* Творца́ тва́ри.

На часѣ́хъ глаго́лемъ конда́къ пра́здника.



НА ЛИТУРГІИ,

Блаже́нна пра́здника, пѣ́снь 8-я обою́ кано́новъ, со ирмосо́мъ на 6.

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 216 об. – 226.

/ Къ оглавленію раздѣла /


Наверхъ / Къ титульной страницѣ

0