Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 21-й де́нь.
Слу́жба преподо́бнаго отца́ на́шего Авра́мія, Смоле́нскаго чудотво́рца.

[НА ВЕЛИЦѢЙ ВЕЧЕРНИ,]
[Блаже́нъ му́жъ, 1-й антифо́нъ. На Го́споди воззва́хъ:] стихи́ры на 8, пра́здника 3 и свята́го 5, гла́съ 5. Подо́бенъ: Ра́дуйся.

Яви́ся, гора́ у́мная на́мъ ты́, преподо́бне о́тче Авра́міе, на ню́же возше́дъ, богоно́се, я́ко на не́бо, сла́вне, я́ко но́вый Моисе́й, скрижа́ли отъ Бо́га, свя́те, Христо́во Ева́нгеліе пріе́мъ, яви́ся, я́ко труба́ наро́чита, всѣ́мъ возвѣща́ющи конце́мъ, утвержда́я и просвѣща́я всѣ́хъ ду́ши къ богоразу́мію, глаго́ля: пока́йтеся и обрати́теся, уже́ бо прибли́жися де́нь Госпо́день Су́дный и гро́зный, Христу́ Бо́гу безпреста́ни моли́теся, дарова́ти душа́мъ на́шимъ ве́лію ми́лость.

Яви́ся, преподо́бне о́тче, лѣ́ствица высо́кая добродѣ́тели духо́вныя, благода́ти восхо́дъ, по не́йже возше́дъ, свя́те, зри́ши Боже́ственную добро́ту, и сла́ву Бо́жію, и святы́хъ а́нгелъ небе́сныхъ ликостоя́нія свѣ́тлости, и гла́съ боголѣ́пныхъ пѣ́ній наслажда́яся, блаже́нне, съ ни́ми же пое́ши, веселя́ся ра́достно, богоно́се Авра́міе, Христу́ Бо́гу моли́ся, дарова́ти душа́мъ на́шимъ ве́лію ми́лость.

Яви́лся еси́, преподо́бне о́тче, вои́стинну Бо́жіе возлюбле́ніе, и освяще́нъ отъ утро́бы ма́терни, и святи́тель, отъ Бо́га по́сланный къ на́мъ, наставля́я на пу́ть благода́ти Христо́ва смире́нія. По нему́же возше́дъ, свя́те, водворя́ешися въ свѣ́тлости блаже́ннаго рая́, идѣ́же всѣ́хъ святы́хъ ду́ши, ра́дующеся, веселя́тся. Съ ни́миже на́съ помина́й, богоно́се Авра́міе, Христу́ Бо́гу моля́ся дарова́ти душа́мъ на́шимъ ве́лію ми́лость.

Ра́дуйся, по́стническихъ вои́стинну подвиго́въ благово́нный сосу́де: кре́стъ на ра́му у́бо взе́мъ и Влады́цѣ Христу́ себе́, преблаже́нне, возложи́въ, пло́ти попра́лъ еси́ до́лу влеку́щее мудрова́ніе, добродѣ́тельми же ду́шу просвѣти́лъ еси́ и къ Боже́ственному впери́лся еси́ жела́нію. Тѣ́мже, всесвяту́ю твою́ окружи́вше ра́ку, прехва́льне Авра́міе, Боже́ственнаго человѣколю́бія про́симъ получи́ти твои́ми моли́твами и мíру дарова́ти ве́лію ми́лость.

Угль богосія́ненъ, огню́ прибли́жився, богоно́се, Ду́ха, показа́лся еси́ въ мíрѣ, Авра́міе, просвѣща́я ду́ши на́ша, вѣ́рно, богому́дре, приступа́ющихъ къ тебѣ́, къ свѣ́ту наставля́я тѣ́хъ невече́рнему, преподо́бне, ороша́ему свы́ше Боже́ственною благода́тію. Тѣ́мже и побѣ́ды тебѣ́ проявле́нно дарова́ вѣне́цъ, блаже́нне, пра́вды Смотри́тель Христо́съ, Его́же моли́, душа́мъ на́шимъ дарова́ти ве́лію ми́лость.

Сла́ва, гла́съ 8:

Мона́ховъ мно́жества наста́вника тя́ почита́емъ, о́тче на́шъ Авра́міе, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́сподеви поми́ловатися душа́мъ на́шимъ.

И ны́нѣ, пра́здника.

Та́же вхо́дъ. Проки́менъ дне́. Чте́нія три́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть и живы́й посредѣ́ грѣ́шникъ преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая, и паре́ніе по́хоти премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше, и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры пра́здника. Та́же свята́го самогла́сенъ, гла́съ 1:

Сти́хъ: Честна́ предъ Го́сподемъ сме́рть преподо́бныхъ Его́.

Лѣ́ствица, небеси́ подо́бна, я́вѣ житіе́ твое́, богому́дре, бы́сть, е́юже на высоту́ возвы́сився дне́сь, Влады́цѣ Христу́ бесѣ́довати, блаже́нне, сподо́бился еси́. У́мъ просвѣ́щь та́мо су́щими сія́ньми, луча́ми же Того́ просвѣща́емь, ра́вно а́нгеломъ прія́лъ еси́ свѣ́тлость. Ему́же ны́нѣ предстоя́, моли́ся, преподо́бне, творя́щимъ боже́ственную и свяще́нную па́мять твою́ съ тобо́ю предста́ти, и мíру да́ти ве́лію ми́лость.

Сла́ва, гла́съ 8:

Пріиди́те всеусе́рдно, вси́ боголюби́віи лю́діе, соше́дшеся, похва́лимъ честно́е преподо́бнаго отца́ успе́ніе: се́й бо отъ ю́ности возлю́бленъ, и отъ утро́бы ма́терни освяти́ся Бо́гу, и Того́ стопа́мъ послѣ́довати изво́лилъ е́сть. Тѣ́мже мо́лимъ того́, Христа́ Бо́га моли́ти непреста́нно о ста́дѣ свое́мъ, и умири́ти мíръ, и спасти́ ду́ши на́ша.

И ны́нѣ, пра́здника.

Тропа́рь, гла́съ 8:

Дне́сь возсія́ на́мъ па́мять твоя́, сла́вне, я́ко со́лнце, свѣтоза́рно луча́ми озаря́ющая мíръ и тму́ но́щи злы́хъ духо́въ отъ на́съ отгоня́ющая. Дне́сь небе́сныя си́лы святы́хъ а́нгелъ и ду́ши пра́ведныхъ мы́сленно торжеству́ютъ, ра́дующеся. Дне́сь и мы́, грѣ́шніи, припа́дающе, мо́лимся: о́тче преподо́бне Авра́міе, Христа́ Бо́га моли́ непреста́нно, спасти́ гра́дъ и лю́ди, любе́зно тебе́ почита́ющія.

Сла́ва, и ны́нѣ, пра́здника, [гла́съ 1:

Въ рождествѣ́ дѣ́вство сохрани́ла eси́, во успе́ніи мíра не оста́вила eси́, Богоро́дице, преста́вилася eси́ къ животу́, Ма́ти су́щи Живота́, и моли́твами Твои́ми избавля́еши отъ сме́рти ду́ши на́ша.]


НА УТРЕНИ,
[На Бо́гъ Госпо́дь, тропа́рь пра́здника: Въ рождествѣ́, два́жды.
Сла́ва, свято́му: Дне́сь возсія́ на́мъ па́мять твоя́. И ны́нѣ, пра́здника: Въ рождествѣ́.]

По 1-й стихоло́гіи сѣда́ленъ, гла́съ 1. Подо́бенъ: Ли́къ а́нгельскій.

Житіе́ на земли́ благоче́стно сконча́въ, прія́телище чистоты́ и Ду́ха яви́лся еси́, просвѣща́я къ тебѣ́ вѣ́рою притека́ющія, блаже́нне. Тѣ́мже моли́ твоего́ Влады́ку Христа́ Бо́га, просвѣти́ти ду́ши на́ша, воспѣва́ющихъ тя́, Авра́міе богому́дре, о́тче на́шъ. [Два́жды.]

Сла́ва, и ны́нѣ, богоро́диченъ:

Всѣ́хъ Творца́, и Го́спода, и Зижди́теля, Всенепоро́чная, Чи́стая, Ду́хомъ Боже́ственнымъ въ ложесна́хъ заче́нши, безъ истлѣ́нія родила́ еси́; Его́же сла́вяще, Тя́ воспѣва́емъ, Дѣ́во, я́ко пала́ту всѣ́хъ Царя́ и мíрови спасе́ніе.

По 2-й стихоло́гіи сѣда́ленъ, гла́съ 4. Подо́бенъ: Яви́лся еси́ дне́сь.

Возсія́въ, я́ко со́лнце, зари́ облиста́еши, преподо́бне, всему́ мíру издале́ча уче́ній твои́хъ, чу́дный Авра́міе свѣтоно́сче, преподо́бныхъ похвало́. [Два́жды.]

Сла́ва, и ны́нѣ, богоро́диченъ:

Въ кро́въ Тво́й, Пречи́стая Дѣ́во, прибѣга́ющихъ на́съ мольбу́ пріе́мши, не преста́й моля́щи Человѣколю́бца, спасти́ рабы́ Твоя́.

По поліеле́и сѣда́ленъ, гла́съ 8. Подо́бенъ: Прему́дрости.

Отъ утро́бы освяти́лся еси́, я́ко вои́стинну, свяще́нне Авра́міе, и на земли́, я́ко а́нгелъ, пожи́лъ еси́: пло́ть бо умертви́въ воздержа́ніемъ, Тро́ицы уго́дникъ показа́лся еси́, блаже́нне. Тѣ́мже и къ ре́вности боже́ственнаго твоего́ житія́ ли́ки совокупи́лъ еси́ мона́шествующихъ, сла́вне, богоно́се о́тче на́шъ, моли́ Христа́ Бо́га согрѣше́ній оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, пресвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíрови и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му рождеству́ Твоему́.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ пра́здника со ирмосо́мъ на 6 и преподо́бнаго на 8, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Яко возсіявъ всѣмъ концемъ, Христе, Праведное Солнце, Пречи́стыя Твоея́ Ма́тере мольба́ми покая́ніе, и умиле́ніе, и сле́зы да́ждь ми́, Бо́же, и моле́ніемъ преподо́бнаго спаси́ мя.

Ангельскія безпло́тныя чи́ны приво́димъ Ти́, Христе́, на моле́ніе, си́хъ мольба́ми изба́ви и сохрани́ ста́до Твое́, Бла́же, отъ всѣ́хъ бѣ́дъ и моли́твами преподо́бнаго спаси́ мя.

Съ ли́ки проро́къ, и апо́столъ, и му́ченикъ, и святи́телей и преподо́бныхъ и со всѣ́ми святы́ми моли́, свя́те, о́тче, моля́щимся тебѣ́ прилѣ́жно изба́вится отъ вся́кія бѣды́, и спасти́ ны.

Богоро́диченъ: Вси́ мо́лимъ Тя́ прилѣ́жно, Госпоже́ Дѣ́во Ма́ти Свята́я: избавле́ніе отъ всѣ́хъ бѣ́дъ пода́ждь на́мъ, моля́щися прилѣ́жно Сы́ну и Бо́гу поми́ловати же и спасти́ ны.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Моле́нія послу́шавъ, Го́споди, иногда́ Анны, пода́лъ еси́ проро́ка, и Тебѣ́ отдаде́ служи́теля, та́ко и на́ше услы́ши моле́ніе, моли́твами преподо́бнаго, и спаси́ ны.

Пріими́ отъ души́ моля́щіяся Тебѣ́, Христе́, и да́ждь на́мъ по́мощь Твою́ свы́ше, я́ко иногда́ ученико́мъ Твои́мъ, Христе́, на мо́ри, и отъ бѣ́дъ изба́ви на́съ моле́ніемъ преподо́бнаго.

Моли́ся прилѣ́жно за ны́, избавле́ніе пода́ти, о́тче Авра́міе, отъ всѣ́хъ бѣ́дъ, я́же на ны́ прихо́дятъ, ускори́, свя́те, на по́мощь на́шу.

Богоро́диченъ: Бо́жія рождества́ Твоего́, Чи́стая, вся́ка существа́ чи́нъ прехо́дитъ чудесы́: Бо́га бо па́че естества́ зачала́ еси́ во чре́вѣ, и ро́ждши, пребыва́еши Приснодѣ́ва.

Конда́къ пра́здника, [гла́съ 2:

Въ моли́твахъ неусыпа́ющую Богоро́дицу и въ предста́тельствахъ непрело́жное упова́ніе, гро́бъ и умерщвле́ніе не удержа́ста: я́коже бо Живота́ Ма́терь, къ животу́ преста́ви, во утро́бу Всели́выйся приснодѣ́вственную.]

Икосъ:

[Огради́ моя́ помышле́нія, Христе́ мо́й, и́бо Стѣ́ну мíра воспѣ́ти дерза́ю, Чи́стую Ма́терь Твою́, на столпѣ́ глаго́лъ укрѣпи́ мя, и въ тя́жкихъ мы́слехъ заступи́ мя, Ты́ бо взыва́ющимъ и прося́щимъ вѣ́рою моле́нія исполня́еши. Ты́ мнѣ́ у́бо да́руй язы́къ прино́сенъ и по́мыслъ непосты́денъ: вся́кое бо дая́ніе сія́нія отъ Тебе́ низпосыла́ется, Свѣтопода́телю, во утро́бу всели́выйся приснодѣ́вственную.]

Сѣда́ленъ свята́го, гла́съ 4. Подо́бенъ: Удиви́ся Іо́сифъ.

Удиви́ся, преподо́бне и богоно́се Авра́міе, во все́мъ мíрѣ житíе твое́, я́ко отъ утро́бы ма́терни воззва́нъ бы́лъ еси́, свя́те, я́ко Самуи́лъ, сла́вне. Веселя́тся Це́ркви Христо́вы, и ра́дуются мона́ховъ стада́, и ве́сь мíръ пра́зднуетъ, Христу́ Бо́гу моля́щеся прилѣ́жно: Го́споди, спаси́ гра́дъ и лю́ди, моли́твами Влады́чицы, и преподо́бнаго ра́ди поми́луй на́съ. [Два́жды.]

Сла́ва, и ны́нѣ, пра́здника.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Христо́въ слуга́ вои́стинну яви́лся еси́, свя́те, я́ко отъ утро́бы ма́терни освяти́вся Бо́гу, я́ко же́ртва прине́слся еси́ честна́ Го́сподеви, отъ со́вѣсти чи́сты моля́ся Ему́.

Вои́стинну Христо́въ слуга́ бы́лъ еси́, о́тче Авра́міе, я́ко проро́къ и апо́столъ, святи́телей и преподо́бныхъ всѣ́хъ подража́тель бы́въ, напоя́я благода́ти умиле́нія сердца́ на́ша.

Вои́стинну Христо́съ Бо́гъ на́шъ показа́ тя въ напа́стехъ ти́хое приста́нище, свя́те, и забра́ло, сирота́мъ же всѣ́мъ утѣше́ніе.

Богоро́диченъ: Неизглаго́ланно и непостижи́мо е́сть Твоего́, Богоро́дице, боголѣ́пнаго вои́стинну рождества́ та́инство, небе́снымъ и земны́мъ, и́мже, вси́ вѣ́рніи, спа́сшеся, Тя́ хва́лимъ.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Утреневалъ еси́ къ Бо́гу отъ ю́ности, блаже́нне о́тче Авра́міе, я́ко славíй, му́дре, сладкоглаго́ливъ, я́ко ла́стовица многогла́сна, свя́те, принося́ моли́тву Бо́гу.

Украси́лся еси́ священнолѣ́пно, богоно́се о́тче Авра́міе, іере́йскою лѣ́потою, я́ко и Ааро́нъ и Самуи́лъ, боголѣ́пно по вся́ дни́ служа́ Бо́гу и моля́ся Ему́.

Вои́стинну отъ утро́бы позна́нъ бы́лъ еси́, о́тче, отъ Бо́га вѣ́ренъ служи́тель, при́званъ же бы́въ, я́ко другíй проро́къ, свя́те, Ду́хомъ Бо́жіимъ, учи́лъ еси́ лю́ди богоразу́мію.

Богоро́диченъ: Богоро́дицу Тя́ отъ души́, Влады́чице мíру Блага́я, исповѣ́дающія спаса́й: Тя́ бо заступле́ніе и́мамы вои́стинну, Всечи́стая.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Жите́йскаго, блаже́нне, убѣжа́въ зла́го волне́нія, въ тишину́ доше́дъ Бо́жія поко́я и наслажде́нія, моли́ся пода́ти и на́мъ о Христѣ́ того́ наслажде́нія.

Бу́рно приста́нище потопля́етъ мя́, пода́ждь ми́ ру́ку Твою́, Влады́ко Го́споди, я́ко иногда́ Петру́ утопа́ющу, и спаси́ мя во оти́шіе Твое́ преподо́бнаго Авра́мія моле́ніемъ.

Помоли́ся прилѣ́жно за ны́, о́тче преподо́бне Авра́міе, къ Бо́гу, изба́витися вско́рѣ отъ всѣ́хъ бѣ́дъ же и скорбе́й, и пода́ти ми́ръ и спасе́ніе.

Богоро́диченъ: Пречи́стая Влады́чице, ро́ждши земны́мъ Прави́теля и Го́спода, похоте́й ми́ злолю́тое укроти́ смуще́ніе, и тишину́ пода́ждь се́рдцу моему́.

Конда́къ, гла́съ 3. Подо́бенъ: Дѣ́ва дне́сь.

Возсія́, Го́споди, гра́ду Твоему́ па́мять Твоего́ уго́дника, я́ко свѣ́тлое со́лнце, ра́достно всѣ́хъ, я́ко луча́ми, озаря́ющи, па́че же моли́твы Пречи́стыя Твоея́ Ма́тере, отъ всѣ́хъ бѣ́дъ избавля́ютъ на́съ и упраждня́ютъ ва́рварская шата́нія. Тѣ́мъ мы́, лю́діе Твои́ и гра́дъ на́шъ, вельми́ хва́лимся и спаса́емся моли́твами Твоего́ уго́дника Авра́мія, преподо́бнаго отца́.

Икосъ:

Уясни́ ми язы́къ и укрѣпи́ ми у́мъ, Христе́ Бо́же, моли́твами Пречи́стыя Твоея́ Ма́тере. Язы́къ ми́ бла́гъ глаго́лати пода́ждь на похвалу́ и на умоле́ніе Твоего́ уго́дника. Свѣщу́ души́ моея́ уны́лую, ю́же, воздрема́вся, угаси́хъ, моли́твами преподо́бнаго Авра́мія возжзи́ и не отлучи́ мене́, Христе, многосогрѣ́шша, ли́ка преподо́бныхъ Твои́хъ. Все́ у́бо упова́ніе къ Тебѣ́ возлага́ю: Ты́ бо и гра́дъ сохраня́еши моли́твами преподо́бнаго.

Пѣ́снь 7.

Ирмо́съ: Росода́тельну у́бо пе́щь содѣ́ла Ангелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Халде́йскую ороси́въ отроко́въ пе́щь и прело́жъ на хла́дъ, на ны́ иноплеме́нникъ нападе́ніе, Христе́, погуби́ моле́ніемъ преподо́бнаго Авра́мія, пою́ща: благослове́нъ Бо́гъ оте́цъ на́шихъ.

Проро́ку Даніи́лу, Влады́ко Христе́, иногда́ ди́вія звѣ́ри укроти́лъ еси́, обузда́въ; та́кожде и ны́не всѣ́хъ проти́вныхъ на ны́ стремле́нія укроти́, и обузда́й моле́ніемъ, Бо́же, преподо́бнаго Авра́мія.

Егда́ пріи́деши, Бо́же, суди́ти на зе́млю, Христе́ Царю́, со а́нгельскими си́лами, тогда́, Ми́лостиве, пощади́ ны, пою́щія, моли́твами преподо́бнаго Авра́мія: благослове́нъ Бо́гъ оте́цъ на́шихъ.

Богоро́диченъ: Тобо́ю на́мъ, Дѣ́во, свѣ́тъ возсія́, те́мнымъ, и отпуще́ніе, Ты́ бо родила́ еси́ Зижди́теля всѣ́хъ Бо́га, Его́же моли́, Пречи́стая Приснодѣ́во, посла́ти вѣ́рнымъ ве́лію ми́лость.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Яви́ся, я́ко рѣка́ у́мная, отъ у́стъ Боже́ственного рая́ исходя́щи, преподо́бне о́тче Авра́міе, и всѣ́хъ вѣ́рныхъ напая́я ду́ши умиле́нія, и омыва́я всѣ́хъ скве́рну, превознося́щихъ Христа́ во вѣ́ки.

Яко небеса́ у́мная, яви́шася уста́ твоя́, свя́те, язы́къ же тво́й, о́тче, я́ко со́тъ ме́двеный сладя́, и всѣ́хъ науча́я вопи́ти: Го́спода по́йте и превозноси́те Его́ во вѣ́ки.

Воздѣжи́ ру́цѣ твои́ ко Влады́цѣ Бо́гу, свя́те, моли́ за ны́ прилѣ́жно, поми́ловати гра́дъ и лю́ди, изба́витися гла́да же, и тру́са, и наше́ствія иноплеме́нныхъ, Его́же превозно́симъ во вѣ́ки.

Богоро́диченъ: Арха́нгела гла́сомъ зове́мъ Ти́, Пречи́стая Дѣ́во Ма́ти: ра́дуйся, Обра́дованная, Госпо́дь съ Тобо́ю, а́нгеломъ и человѣ́комъ заче́нши и ро́ждши Го́спода, Его́же превозно́симъ во вся́ вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Ны́нѣ, блаже́нне, водворя́ешися и весели́шися со а́нгельскими си́лами, пріе́мля поко́й проти́ву трудо́въ, о́тче свя́те Авра́міе, и на́съ, моля́щихся, помяни́, богоно́се, че́стно пра́зднующихъ па́мять твою́ и Христа́ велича́ющихъ.

Ны́нѣ собо́ръ святы́хъ а́нгелъ и ли́ки святы́хъ апо́столъ, проро́къ и му́ченикъ, святи́телей и преподо́бныхъ свѣ́тло торжеству́ютъ, ра́дующеся, въ па́мяти твое́й, свя́те о́тче Авра́міе. Съ ни́миже моли́ся, богоно́се, Христу́ Бо́гу, всѣ́хъ изба́вити бѣ́дъ, вѣ́рою тя́ блажа́щихъ.

Пріими́, Влады́ко Христе́ Царю́, моле́ніе ра́бъ Твои́хъ и обрати́ на ра́дость воздыха́ніе на́ше, мо́литъ Тя́ собо́ръ арха́нгелъ, проро́къ и му́ченикъ, апо́столъ и святи́тель и преподо́бный Авра́мій: егда́ пріи́деши суди́ти всему́ мíру, тогда́ спаси́ и поми́луй велича́ющія Тя́.

Богоро́диченъ: Досто́йно Тя́ ублажа́емъ вои́стинну и велича́емъ, Пречи́стая Дѣ́во Ма́ти Христа́ Бо́га. Ты́ бо еси́ небе́сныхъ си́лъ ра́дость и всѣ́хъ святы́хъ добро́та и украше́ніе, христіа́нъ прибѣ́жище и стѣна́, грѣ́шныхъ пу́ть и пору́чница Тебе́ велича́ющихъ.

Свѣти́ленъ. Подо́бенъ: Жены́, услы́шите.

Мірско́е пристра́стіе оста́вль и бога́тство мимотеку́щее и Кре́стъ тво́й взе́мь, о́тче, Христо́ви, Авра́міе, усе́рдно послѣ́довалъ еси́, по́стнически же умертви́лъ еси́ стра́сти, и къ безстра́стію прите́клъ еси́, и мо́лишися о на́съ, богоно́се. [Два́жды.]

Сла́ва, и ны́нѣ, пра́здника.

На хвали́техъ стихи́ры на 6, пра́здника 3 и свята́го 3, гла́съ 6. Подо́бенъ: Все́ отло́жше.

Все́ упова́ніе* ко Го́споду возло́жь,* всѣ́мъ серде́чнымъ жела́ніемъ горя́ къ Бо́гу, преподо́бне,* я́ко звѣзда́ свѣ́тлая на восто́цѣ,* всѣ́мъ возсія́лъ еси́, свя́те.* Возра́дуйтеся и возвесели́теся, мона́ховъ со́нмы,* торжеству́юще, воспое́мъ* свѣ́тло въ па́мять его́:* Христу́, еди́ному Бо́гу,* со дерзнове́ніемъ моли́ся* о душа́хъ на́шихъ. [Два́жды.]

Ве́сь отъ ю́ности* прибли́жился еси́ Го́сподеви,* преподо́бне о́тче Авра́міе,* все́ю душе́ю го́рнихъ жела́я,* ви́димая и земна́я, свя́те, возненави́дѣвъ,* Христа́ еди́наго возлюби́лъ еси́, прехва́льне,* и Того́ Кре́стъ усе́рдно тща́ся воспрія́ти,* возслѣ́довалъ еси́ Ему́,* не убоя́ся вра́жіихъ стрѣля́ній,* я́ко всѣ́хъ по́мощь имѣ́я Бо́га.* Ему́же со дерзнове́ніемъ моли́ся* о душа́хъ на́шихъ.

Сла́ва, гла́съ 5:

Преподо́бне о́тче, гла́съ Ева́нгелія Госпо́дня услы́шавъ, мíръ оста́вилъ еси́, бога́тство и сла́ву ни во что́же вмѣни́въ. Тѣ́мъ всѣ́мъ возопи́лъ еси́: возлюби́те Бо́га, и обря́щете благода́ть вѣ́чную; ничто́же предпочти́те па́че любве́ Его́, да егда́ пріи́детъ въ сла́вѣ Свое́й, обря́щете поко́й со всѣ́ми святы́ми, его́же моли́твами, Христе́, сохрани́ и спаси́ ду́ши на́ша.

И ны́нѣ, пра́здника.
Славосло́віе вели́кое, и отпу́стъ, и ча́съ 1-й.


На 1-мъ часѣ́ тропа́рь пра́здника. Сла́ва, свята́го. И ны́нѣ, богоро́диченъ часо́въ. По трисвято́мъ конда́къ пра́здника и свята́го, премѣня́юще, глаго́лемъ.


НА ЛИТУРГІИ,

Блаже́нна пра́здника пѣ́снь 7-я на 4 и свята́го, пѣ́снь 6-я на 4. Проки́менъ [пра́здника, пѣ́снь Богоро́дицы, гла́съ 3: Вели́читъ душа́ моя́ Го́спода, и возра́довася ду́хъ Мо́й о Бо́зѣ Спа́се Мое́мъ. Сти́хъ: Яко призрѣ́ на смире́ніе рабы́ Свое́я, се́ бо отъ ны́нѣ ублажа́тъ Мя́ вси́ ро́ди. И преподо́бнаго, гла́съ 7:] Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилу́ія, [пра́здника, гла́съ 2: Воскресни́, Го́споди, въ поко́й Тво́й, Ты́ и Киво́тъ святы́ни Твоея́. Сти́хъ: Кля́тся Госпо́дь Дави́ду и́стиною, и не отве́ржется ея́. И преподо́бнаго, гла́съ 6:] Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе Луки́, зача́ло 24. Прича́стенъ [пра́здника: Ча́шу спасе́нія пріиму́, и и́мя Госпо́дне призову́. И преподо́бнаго: ] Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 211 – 216 об.

/ Къ оглавленію раздѣла /


Наверхъ / Къ титульной страницѣ

0