Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 20 октября 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 21-й де́нь.
Свята́го апо́стола Ѳадде́я и святы́я му́ченицы Ва́ссы [и ча́дъ ея Ѳеогнíя, Ага́пія и Пи́ста].

[ВЕЧЕРЪ,]
На Го́споди воззва́хъ: стихи́ры апо́стола 3, гла́съ 8. Подо́бенъ: О, пресла́внаго чудесе́!

Блаже́нне Ѳадде́е богопрія́тне,* по боже́ственнѣмъ Христо́вѣ* и свѣтоно́снѣмъ воскресе́ніи* и къ небеси́ пресвятѣ́мъ вознесе́ніи* Еде́сскому гра́ду* боже́ственное проповѣ́даніе увѣ́рилъ еси́,* въ него́же прише́дъ,* словесы́ и чудесы́* мѣ́стнаго кня́зя Авгаря* и съ ни́мъ всѣ́хъ утве́рдилъ еси́ во и́стинѣ.

Блаже́нне Ѳадде́е богому́дре,* слѣпы́мъ е́же ви́дѣти* твои́мъ прикоснове́ніемъ боже́ственнымъ даде́ся,* и хромы́мъ хожде́ніе,* и неду́жнымъ здра́віе,* и разсла́бленнымъ па́ки исправле́ніе,* и невѣ́ждамъ ра́зумъ спаси́теленъ.* Ты́ бо испо́лненъ дарова́ній бы́лъ еси́* Вседѣ́тельнаго Ду́ха, пребога́те,* тѣ́мже воспѣва́емъ тя́.

Ины стихи́ры святы́я, гла́съ 4. Подо́бенъ: Да́лъ еси́ зна́меніе.

Стра́сть претерпѣ́ла еси́* мно́гихъ му́къ, всехва́льная,* крѣ́пко присту́пльши,* отсю́ду къ неболѣ́зненному* преста́вилася еси́ поко́ю,* и незаходи́мому сія́нію,* и свѣ́тлѣй ра́дости,* и вѣ́чному боже́ственному наслажде́нію.* Тѣ́мъ тя́ ублажа́емъ* и свято́е твое́ дне́сь соверша́емъ торжество́,* страстоте́рпице богопрія́тная.

По многоболѣ́зненныхъ* и многоразли́чныхъ му́кахъ* въ мо́ре вве́рженѣй бы́вшей,* Бо́гъ тя́ спасе́, Спа́съ вся́ческихъ,* Боже́ственною си́лою попра́вшую крѣ́пость чужда́го,* Ва́ссо многострада́льная,* и отсю́ду просвѣти́ла еси́ благочести́выхъ ра́зумы,* сконча́вши зна́менія,* па́че ума́ и помышле́нія.

Якоже пти́ца сладкопѣ́снива,* въ лу́зѣ возгласи́вши кра́снаго страда́нія,* твоя́ созвала́ еси́ птенцы́ кра́сныя,* ловле́нія пре́лести избѣ́гши съ ни́ми,* Ва́ссо богому́драя досточу́дная,* съ ни́миже и всели́лася еси́* въ добро́тахъ, преблаже́нная, небе́сныхъ,* моля́щи о всѣ́хъ всегда́.

Сла́ва, и ны́нѣ, гла́съ 6:

Пріиди́те, всемíрное успе́ніе Всенепоро́чныя Богоро́дицы пра́зднуемъ, дне́сь бо а́нгели торжеству́ютъ честно́е преставле́ніе Бо́жія Ма́тере, и къ весе́лію на́съ, земны́хъ, призыва́ютъ, вопи́ти немо́лчнымъ гла́сомъ: ра́дуйся, преста́вльшаяся отъ земли́, и къ небе́снымъ оби́телемъ пресе́льшаяся; ра́дуйся, я́же учени́ческій ли́къ о́блакомъ ле́гкимъ во eди́но собра́вшая; ра́дуйся, упова́ніе и спасе́ніе на́ше: Тя́ бо христіа́нскій ро́дъ непреста́нно ублажа́етъ.

На стихо́внѣ стихи́ры пра́здника, гла́съ 2. Подо́бенъ: Егда́ отъ дре́ва.

Пріиди́те, свѣтлоно́сніи,* свяще́нными вси́ съ пѣ́сньми и кимва́лы* Богоро́дицы Ма́тере успе́ніе почти́мъ многопѣ́сненное:* отъ земли́ бо преставля́ется,* въ се́лѣхъ же невеще́ственныхъ* сла́вою вселя́ется и водворя́ется,* добро́ту зря́щи Боже́ственную,* благода́ть же источа́ющи всѣ́мъ,* вѣ́рно чту́щимъ па́мять Ея́.

Сти́хъ: Воскресни́, Го́споди, въ поко́й Тво́й,* Ты́ и Киво́тъ святы́ни Твоея́.

Ли́къ апо́стольскій свяще́нный* боже́ственныхъ о́блакъ ороше́ньми* отъ коне́цъ земли́, Влады́чице, собра́ся* погребсти́ Твое́ честно́е,* богопрія́тное же и нетлѣ́нное тѣ́ло.* Тѣ́мже и во́инства премíрная,* о́дръ неви́димо обсту́пльше,* пѣ́сньми поя́ху Тебѣ́:* ра́дуйся, но́вый Ковче́же свяще́нія.

Сти́хъ: Кля́тся Госпо́дь Дави́ду и́стиною* и не отве́ржется ея́.

Вся́ непостижи́ма Твоя́,* вся́ несказа́нна вои́стинну, стра́шна та́инства:* Ты́ бо была́ еси́ Бо́жія Роди́тельница,* небеса́ удобри́ла еси́,* просвѣти́ла еси́ мíръ,* вся́ благоуха́ла еси́* боже́ственною па́мятію Твое́ю.* Тѣ́мже блажа́тъ Тя́ язы́цы,* тѣ́мже благословя́тъ Тя́:* ра́дуйся, но́вый Ковче́же свяще́нія.

Сла́ва, и ны́нѣ, гла́съ 8:

Дѣви́честіи ли́цы дне́сь та́йно одру́ Дѣ́вы и Ма́тере о́крестъ предстоя́тъ, и ду́ши пра́ведныхъ, обступи́вше, Цари́цу сла́вятъ. Ови у́бо я́ко да́ръ дѣ́вство вмѣ́сто мѵ́ра прино́сятъ, о́ви же невеще́ственное пѣ́ніе съ добродѣ́телію прино́сятъ, подоба́етъ бо Ма́тери Бо́жіи я́ко Цари́цѣ ца́рскими добродѣ́тельми свѣтлосія́ющими дориноси́тися. Съ ни́миже и мы́, житіе́ чи́стое совне́сше, изы́демъ къ погребе́нію су́щія Ма́тере Бо́га на́шего, пѣ́ньми и пѣ́сньми духо́вными согла́сно Ю ублажа́юще.

Тропа́рь апо́стола, гла́съ 3:

Апо́столе святы́й Ѳадде́е, моли́ ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.

Сла́ва, и ны́нѣ, пра́здника, гла́съ 1:

Въ рождествѣ́ дѣ́вство сохрани́ла eси́, во успе́ніи мíра не оста́вила eси́, Богоро́дице, преста́вилася eси́ къ животу́, Ма́ти су́щи Живота́, и моли́твами Твои́ми избавля́еши отъ сме́рти ду́ши на́ша.


НА УТРЕНИ,
По 1-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Велѣ́ніемъ Зижди́теля Твоего́, ро́ждшагося изъ Тебе́, о́блакъ собра́въ апо́столы, Твое́ ви́дѣти преставле́ніе. Тѣ́мже и со сла́вою и мно́гимъ весе́ліемъ погребо́ша, воспѣва́юще, пречи́стое тѣ́ло Твоего́ блаже́нства, Ма́ти Христа́ Бо́га.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ то́йже. Подо́бенъ: Удиви́ся Іо́сифъ.

Апо́стольскій ли́къ, разсѣ́янный по земли́, собра́ся въ Сіо́нѣ, да предпо́слетъ отъ земли́ Богоро́дицу къ Вы́шнему, Его́же роди́. Си́лы небе́сныя премíрныя предтеча́ху, вку́пѣ и ликова́ху, духо́внѣ зову́ще: весели́теся, небеса́, пріе́мше Бо́жію Ма́терь, Иже влады́чествуетъ ви́димыми и неви́димыми.

Сла́ва, и ны́нѣ, то́йже.

Кано́нъ пра́здника, со ирмосо́мъ на 6, ки́ръ Іоа́нна, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ успе́ніе.

Дѣ́вы отрокови́цы, съ Маріамíею проро́чицею, пѣ́снь исхо́дную ны́нѣ воскли́кните: Дѣ́ва бо и еди́на Богома́ти ко прія́тію небе́сному преставля́ется.

Досто́йно, я́ко одушевле́нное Тя́ Не́бо, прія́ша небе́сная, Пречи́стая, Боже́ственная селе́нія, и предста́, свѣ́тло укра́шена, я́ко Невѣ́ста Всенепоро́чная, Царю́ и Бо́гу.

Кано́нъ апо́стола на 4, его́же краегране́сіе: Ѳадде́я пою́, му́драго богоглаго́льника. Творе́ніе Іо́сифово, гла́съ 8.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Престо́лу Влады́чню, прему́дре Ѳадде́е, предстоя́, просвѣще́ніе ми́ пода́ждь свѣтоно́сное твое́ пѣ́ти торжество́.

Безлѣ́тный Свѣ́тъ въ лѣ́то, съ на́ми, я́влься пресу́щный, я́ко лучу́, тя́, блаже́нне, оста́ви, мíръ просвѣща́юща.

Си́лою опоя́савъ тя́, въ крѣ́пости Непобѣди́мый, льсти́ваго всю́ крѣ́пость погуби́ти укрѣпи́лъ е́сть.

Богоро́диченъ: Влады́чице, всѣ́ми яви́лася еси́ тварьми́ Влады́чествующаго неизрече́нно ро́ждши, Богоро́дице Дѣ́во Препѣ́тая.

Кано́нъ святы́я, на 4, его́же краегране́сіе: Твоя́ по́двиги, Ва́ссо честна́я, приношу́. Творе́ніе Іо́сифово, гла́съ то́йже.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Твою́ восхваля́ющему ра́достно всесла́вную па́мять, съ небесе́ ми́ просвѣще́ніе да́ти моли́ся, блаже́нная, и душетлѣ́нныхъ согрѣше́ній проще́ніе.

Не устраши́ся повелѣ́ній богоме́рзкихъ стра́хомъ Госпо́днимъ огражде́ная твоя́ душа́, ра́нъ разли́чныхъ и бѣ́дъ, тѣ́мже му́жески дерзну́ла еси́.

Прія́ла еси́ му́ки многови́дныя съ треми́ сы́ны, страстоте́рпице, терпѣли́вно, съ ни́миже исплела́ еси́ вѣнцы́ нетлѣ́нныя, Тро́ицу сла́вящи.

Богоро́диченъ: Зачала́ еси́ Сло́во Отчее безъ болѣ́зней, Пресвята́я, ма́тернихъ и Сего неизрече́нно па́че сло́ва на спасе́ніе на́ше породила́ еси́.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ Боже́ственнѣй па́мяти Твое́й вѣнце́въ сла́вы сподо́би.

Отъ ме́ртвыхъ чре́слъ произве́дшися, естество́мъ подо́бна, Чи́стая, исхожде́ніе разрѣши́, ро́ждши же су́щую Жи́знь, къ жи́зни преста́вися Боже́ственнѣй и Ѵпоста́снѣй.

Ли́къ богосло́вовъ отъ коне́цъ, свы́ше же Ангелъ мно́жества къ Сіо́ну идя́ху, всеси́льнымъ манове́ніемъ, достодо́лжно, Влады́чице, Твоему́ погребе́нію служа́ще.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Заре́ю Боже́ственныя благода́ти просвѣща́я лю́ди, сла́вне, свѣ́тъ чи́стъ яви́лся еси́ су́щимъ во тмѣ́ лю́тыхъ.

Цѣльбу́ и избавле́ніе, богодѣ́тельными, му́дре, манове́ніи, царю́ прине́слъ еси́ Авгарю, къ нему́ прише́дъ.

Хра́мы содѣ́лалъ еси́ Вседѣ́тельному, му́дре, Ду́ху, земноро́дныхъ па́губныя разори́лъ еси́ хра́мы.

Богоро́диченъ: Зако́на проначерта́нія и проро́честіи гла́си, Влады́чице, Твое́ стра́шное рождество́ богоявле́нно сказа́ша.

Инъ.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Разже́гшися вѣ́рою и те́плымъ жела́ніемъ премно́гія любве́ Христо́вы, всехва́льная, о́гнь угаси́ла еси́ предстоя́ніемъ а́нгела и лю́ди неразу́мныя а́біе попали́ла еси́.

Ро́дъ ны́нѣ пра́выхъ благослове́нъ бы́сть, изъ твоего́ чре́ва возсія́вшій страда́ній свѣ́тлостію, Ва́ссо пресла́вная, и тму́ разо́ршій беззако́нныхъ противле́ніи ра́зума тве́рдостію.

О, ма́тере превозше́ствіе зако́на теку́щаго естества́! И и́же па́че естества́ едине́ніемъ, я́ко претерпѣ́ непра́ведну сме́рть, разли́чно зря́щи, и́хже воспита́ вѣ́рою и млеко́мъ.

Богоро́диченъ: Умерщвле́на мя́ снѣ́дію преслуша́нія спасла́ еси́, еди́на Живо́тъ ро́ждши Ѵпоста́сный, Дѣ́во Всенепоро́чная. Тѣ́мже Тя́ достодо́лжно, Присноблаже́нную, ны́нѣ ублажа́емъ.

Конда́къ апо́стола, гла́съ 4:

Яко звѣзду́ пресвѣ́тлую Це́рковь тя́ стяжа́, апо́столе Ѳадде́е, чудесы́ твои́ми всегда́ просвѣща́ема, спаси́ вѣ́рою чту́щія па́мять твою́.

Сѣда́ленъ, гла́съ 8. Подо́бенъ: Прему́дрости.

Приступи́въ къ Со́лнцу мы́сленному, отъ него́ зари́ та́йныя прія́лъ еси́ и бы́лъ еси́, я́ко звѣзда́ пресвѣ́тлая, озаря́я всея́ земли́ исполне́нія и разоря́я пре́лести мглу́, блаже́нне. Тѣ́мже свѣтоно́сную твою́ соверша́емъ па́мять, вѣ́рно восхваля́юще тя́, и согла́сно вопіе́мъ ти́: Ѳадде́е апо́столе, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

Сла́ва, сѣда́ленъ святы́я, гла́съ 1. Подо́бенъ: Гро́бъ Тво́й.

Муче́ній о́гнь Ду́ха росо́ю погаси́ла еси́, честна́я, и къ свѣ́ту преста́вилася еси́ боже́ственному и невеще́ственному, и по кончи́нѣ блаже́ннѣй источа́еши же исцѣле́ній ка́пли, уставля́ющи разжже́нія страсте́й си́лою духо́вною.

И ны́нѣ пра́здника, гла́съ и подо́бенъ то́йже:

Всечестны́й ли́къ прему́дрыхъ апо́столъ собра́ся чу́дно, погребсти́ сла́вно тѣ́ло Твое́ пречи́стое, Богоро́дице Всепѣ́тая. Съ ни́миже воспѣ́ша и Ангелъ мно́жество, преставле́ніе Твое́ че́стно хва́ляще, е́же вѣ́рою пра́зднуемъ.

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ, усмотря́я, зовя́ше: сла́ва си́лѣ Твое́й, Го́споди.

Чу́до бя́ше зрѣ́ти, Не́бо всѣ́хъ Царя́ одушевле́нное, испражне́нія преходя́щее земна́я, я́ко чу́дна дѣла́ Твоя́! Сла́ва си́лѣ Твое́й, Го́споди.

Аще и непости́жный Сея́ Пло́дъ, Имже небеса́ бы́ша, погребе́ніе прія́тъ во́лею, я́ко ме́ртвъ; ка́ко погребе́нія отве́ржется, неискусобра́чно Ро́ждшая?

Въ преставле́ніи Твое́мъ, Ма́ти Бо́жія, простра́ннѣйшее тѣ́ло Твое́ и богопрія́тное, Ангельская во́инства свяще́нными кри́лы, тре́петомъ и ра́достію покрыва́ху.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Высо́къ у́мъ имѣ́я, прія́тъ боже́ственныя ра́зумы и духо́вная дарова́нія, учениче́, Ѳадде́е, всѣ́хъ Царя́.

Та́инъ, пребога́те, боже́ственныхъ, во уче́ніи, блаже́нне, бы́въ, ненака́занныя просвѣти́лъ еси́, Тро́ицу чести́ Единосу́щную.

Зако́нъ Боже́ственный начерта́лъ еси́, блаже́нне, на сердца́хъ, заглади́въ пе́рвѣе невѣ́дѣнія начерта́ніе и злоче́стія истука́нныя.

Богоро́диченъ: Яко Зижди́теля ро́ждши, всѣ́хъ тва́рей яви́лася еси́ Цари́ца. Сего́ ра́ди Тя́ сла́вимъ, Богоро́дице, еди́на Приснодѣ́во.

Инъ. Ирмо́съ то́йже.

Нераздво́енъ иму́щи тво́й по́мыслъ, къ боре́нію отлучи́лася еси́ льсти́ваго борца́ и глубино́ю крове́й сего́ потопи́ла еси́.

Тя́ глубина́ пріе́мши, осужде́ну сме́ртію непра́ведною, ути́шися и спасе́, страстоте́рпице Ва́ссо, Боже́ственнымъ манове́ніемъ.

Ца́рство непоколеби́мое со благохва́льными сы́ны твои́ми, сла́вная, наслѣ́дила еси́, и небе́сный вои́стинну черто́гъ, и свѣ́тъ незаходи́мый.

Богоро́диченъ: Несѣко́мую го́ру Тя́ дре́вле Авваку́мъ прови́дѣ Ду́хомъ: Бо́гъ изъ Тебе́ яви́ся и на́съ, Дѣ́во, спасе́.

Пѣ́снь 5.

Ирмо́съ: Ужасо́шася вся́ческая о честнѣ́мъ успе́ніи Твое́мъ: Ты́ бо, неискусобра́чная Дѣ́во, отъ земли́ преста́вилася еси́ къ вѣ́чнымъ оби́телемъ, и къ безконе́чнѣй жи́зни, всѣ́мъ, воспѣва́ющимъ Тя́, спасе́ніе подава́ющая.

Да возглася́тъ трубы́ богосло́вовъ дне́сь, язы́къ же многовѣща́нный человѣ́ческій ны́нѣ да восхва́литъ, да огласи́тъ же возду́хъ, безмѣ́рнымъ сія́я свѣ́томъ, Ангели да пою́тъ Пречи́стыя Дѣ́вы успе́ніе.

Сосу́дъ подоба́ше избра́нный, пѣ́ніемъ Ти́ ве́сь удивля́емь, Дѣви́це, исхо́денъ, ве́сь освяще́нъ Бо́гу, всѣ́мъ богопрія́тенъ, и се́й и́стинно явля́емый, Богоро́дице Всепѣ́тая.

Инъ.

Ирмо́съ: Отъ но́щи невѣ́дѣнія боговѣ́дѣніемъ просвѣти́вый концы́, просвѣти́ мя у́тромъ человѣколю́бія Твоего́, Го́споди.

Влады́ки боже́ственное нося́, блаже́нне, подо́біе, мѣ́стному кня́зю Авгарю боже́ственный вра́чь прише́лъ еси́.

Свяще́нный Ѳома́ тя́, по боже́ственнѣмъ Сло́ва вознесе́ніи, проповѣ́дника посыла́етъ, прему́дре Ѳадде́е, тре́бующимъ.

Неду́ги отгони́мы и исцѣля́ема сердца́ зря́ Авгарь, испо́лнися боже́ственнаго просвѣще́нія хода́тайствомъ твои́мъ.

Богоро́диченъ: Воплоще́нно Сло́во, сугу́бо дѣ́йство нося́ща, родила́ еси́, Неискусобра́чная Отрокови́це, пребы́вши Дѣ́ва Нескве́рная.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Содержи́мь жа́ждею, сла́вне Ага́піе богоблаже́нне, Христо́вы любве́, зло́бу до конца́ возненави́дѣлъ еси́ и крѣ́пко подъя́лъ еси́ болѣ́зни му́къ и копіе́мъ тѣле́сное убіе́ніе.

Разве́рзеннымъ твои́мъ вну́треннимъ, ноготьми́ стру́жемь, му́чениче Ѳео́гніе, позна́лъ еси́ мно́жае, чи́стѣе и соверше́ннѣе Бо́га всѣ́хъ, къ Нему́же возше́лъ еси́ со сла́вою, страда́льчески блиста́я свѣтлостьми́.

Несумнѣ́нною вѣ́рою, прему́дре вѣ́рне, вше́дъ въ суди́лище невѣ́рныхъ, блаже́нне, неразу́мныхъ сердца́ удиви́лъ еси́, внегда́ сокруша́тися твои́мъ косте́мъ и на у́ды раздроби́тися всему́ тѣлеси́.

Богоро́диченъ: Прама́тере Евы ны́нѣ испра́вила еси́ паде́ніе, ро́ждши Изба́вителя всѣ́хъ, и Спа́са, и Зижди́теля, и Го́спода, Богома́ти, еди́на въ жена́хъ Благослове́нная. Сего́ ра́ди Тя́, вѣ́рніи, сла́вимъ.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Изъ Тебе́ Жи́знь возсія́, ключи́ дѣ́вства не руши́вши; ка́ко у́бо пречи́стое и живонача́льное Твое́ тѣ́ло искуше́нія сме́рти бы́сть прича́стно?

Жи́зни бы́вши хра́мъ, жи́знь присносу́щную улучи́ла еси́: сме́ртію бо къ животу́ премину́ла еси́, Яже Жи́знь ро́ждши воѵпоста́сную.

Инъ.

Ирмо́съ: Іо́ну въ ки́тѣ, Го́споди, еди́наго всели́лъ еси́, мене́ же свя́зана мре́жами вра́жіими, я́ко отъ тли́ о́наго, спаси́.

Просвѣще́ніе Свята́го Ду́ха, всели́вшееся въ се́рдце твое́, свѣти́льника мíру тя́, Ѳадде́е, содѣ́ла и́стинна, омраче́ніе ле́сти разоря́юща.

Нося́ пло́тію Христо́вы ра́ны, Ѳадде́е, спаси́тельныя, я́ко украше́ніе вся́кія некрасоты́, лю́ди изба́вилъ еси́, му́дре, и къ ра́дости взя́лся еси́ прекра́снѣй.

Утреннее на́мъ яви́лъ еси́ со́лнце пра́вды, сла́вне, показу́я, и́мже просвѣти́вшеся, сы́нове свѣ́та мы́сленнаго, земноро́дніи, Ѳадде́е, бы́хомъ.

Богоро́диченъ: Но́ваго на́мъ Младе́нца породила́ еси́, Отцу́ Единосу́щна, истлѣ́вшее естество́ человѣ́ческое къ пе́рвѣй добро́тѣ, Чи́стая, сіе́ па́ки возводя́ща.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Водруже́нія ме́рзкихъ бого́въ до конца́ истни́ла еси́, водрузи́вши ду́шу къ Бо́жіи несказа́ннѣй любви́, и была́ еси́, страстоте́рпице Ва́ссо, а́нгеловъ единожи́тельна.

Вели́ки за Христа́ по́двиги, му́ченице, прошла́ еси́, вели́ка и отъ Него́ прія́ла еси́ воздая́нія: безсме́ртное благосла́віе и черто́гъ боже́ственный, и пи́щу немимотеку́щую.

Якоже дре́вле Іо́ну отъ глубины́ мо́ря, спасе́ Бо́гъ тя́ вседѣ́тельною си́лою, прехва́льная, въ тебѣ́ чу́дный и въ совѣ́тѣхъ святы́хъ всегда́ прославля́емый.

Богоро́диченъ: Пучи́ны грѣхо́вныя, и во́лны отча́янія обурева́ютъ мо́й у́мъ; умилосе́рдися, Влады́чице, и ру́ку ми́ простри́, и спаси́ мя, Спа́са ро́ждшая.

Конда́къ пра́здника, гла́съ 2:

Въ моли́твахъ неусыпа́ющую Богоро́дицу и въ предста́тельствахъ непрело́жное упова́ніе, гро́бъ и умерщвле́ніе не удержа́ста: я́коже бо Живота́ Ма́терь, къ животу́ преста́ви, во утро́бу Всели́выйся приснодѣ́вственную.

Икосъ:

Огради́ моя́ помышле́нія, Христе́ мо́й, и́бо Стѣ́ну мíра воспѣ́ти дерза́ю, Чи́стую Ма́терь Твою́, на столпѣ́ глаго́лъ укрѣпи́ мя, и въ тя́жкихъ мы́слехъ заступи́ мя, Ты́ бо взыва́ющимъ и прося́щимъ вѣ́рою моле́нія исполня́еши. Ты́ мнѣ́ у́бо да́руй язы́къ доброрѣ́чивъ и по́мыслъ непосты́денъ: вся́кое бо дая́ніе сія́нія отъ Тебе́ низпосыла́ется, Свѣтопода́телю, во утро́бу всели́выйся приснодѣ́вственную.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Юноши и дѣ́вы, Дѣ́выя же и Богома́тере па́мять чту́ще, ста́рцы и кня́зи, ца́ріе и судіи́, по́йте: оте́цъ на́шихъ Го́споди и Бо́же, благослове́нъ еси́.

Да востру́бятъ трубо́ю духо́вною го́ры небе́сныя, да ра́дуются хо́лми, и да игра́ютъ боже́ственніи апо́столи: Цари́ца къ Сы́ну преставля́ется, съ Ни́мъ ца́рствующи.

Всесвяще́нное преставле́ніе боже́ственныя Твоея́ и нетлѣ́нныя Ма́тере, премíрныя вы́шнихъ си́лъ совокупи́ чи́ны, весели́тися съ су́щими на земли́, Тебѣ́ пою́щими: Бо́же, благослове́нъ еси́.

Инъ.

Ирмо́съ: Отроцы богочести́віи въ Вавило́нѣ, о́бразу злато́му не поклони́шася, но посредѣ́ пе́щи о́гненныя, ороша́еми, пѣ́снь воспѣва́ху, глаго́люще: превозноси́мый отце́въ и на́шъ Бо́же, благослове́нъ еси́.

Чудеса́ соверша́я призыва́ніемъ Христа́, я́вльшагося ве́щію тѣ́ла, привле́клъ еси́ лю́ди же и гра́ды, прехва́льне, во извѣ́стную вѣ́ру, зову́щія: благослове́нъ Бо́гъ оте́цъ на́шихъ.

Уста́вилъ еси́ гное́ніе безбо́жія сла́дкихъ твои́хъ слове́съ боже́ственною со́лію и исцѣли́лъ еси́ сердца́, стрѣло́ю зміи́ною уя́звеная, блаже́нне апо́столе, — благослове́нъ еси́, — вопія́, — Бо́же оте́цъ на́шихъ.

Взя́тся къ высотѣ́ видѣ́нія, испо́лнився, о Ѳадде́е, Боже́ственнаго Ду́ха, и спаси́тельнымъ сло́вомъ боже́ственнѣ обогати́лся еси́, и лю́ди вопи́ти научи́лъ еси́: благослове́нъ Бо́гъ оте́цъ на́шихъ.

Богоро́диченъ: Нра́вомъ мои́мъ поползну́вся и дѣя́ніи неподо́бными обложе́нъ, къ Тебѣ́ прибѣга́ю: помози́ ми, Влады́чице, покая́нія о́бразы подаю́щи смире́ннѣй мое́й души́, да прославля́ю Тя́.

Инъ.

Ирмо́съ: Отъ Іуде́и доше́дше, о́троцы въ Вавило́нѣ иногда́ вѣ́рою Тро́ическою пла́мень пе́щный попра́ша пою́ще: отцевъ Бо́же, благослове́нъ еси́.

Си́лою Боже́ственною пла́мень огня́ проше́дши, му́ченице, неопали́ма, огне́мъ твои́хъ крове́й, я́ко ве́щь, пре́лесть, вопію́щи, попали́ла еси́: оте́цъ на́шихъ Бо́же, благослове́нъ еси́.

Иже льво́въ связа́вый стремле́нія въ ро́вѣ, спаса́я Твоего́ Даніи́ла, невреди́му показа́лъ еси́ звѣрьми́ страстоте́рпицу, пою́щую Ти́, Влады́ко: оте́цъ на́шихъ Бо́же, благослове́нъ еси́.

Свѣ́тлыми луча́ми Креста́ осія́ема, Ва́ссо сла́вная, тму́ пре́лести невре́дно премину́ла еси́ и къ свѣ́ту изшла́ еси́, вопію́щи: оте́цъ на́шихъ Бо́же, благослове́нъ еси́.

Богоро́диченъ: Расто́ргни многоплете́нныя мои́хъ согрѣше́ній плени́цы, Богоневѣ́сто, взе́млющаго мíра грѣ́хъ, Бо́га па́че сло́ва ро́ждши, Благослове́нная Чи́стая, при́сно препросла́вленная.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Па́мять Твою́, Чи́стая Дѣ́во, Нача́ла же, и Вла́сти, и Си́лы, Ангели, Арха́нгели, Престо́ли, Госпо́дства, Херуви́ми сла́вятъ и стра́шніи Серафи́ми; человѣ́ческій же ро́дъ — пое́мъ и превозно́симъ во вся́ вѣ́ки.

Иже стра́нно всели́выйся, Богоро́дице, въ чи́стое чре́во Твое́, воплоща́емь, Се́й, всесвяще́нный ду́хъ Тво́й пріе́мъ, у Себе́ упоко́и, я́ко должни́къ Сы́нъ. Тѣ́мже Тя́ пое́мъ, Дѣ́во, и превозно́симъ во вся́ вѣ́ки.

О, вы́ше ума́ чуде́съ Приснодѣ́вы же и Богома́тере! Во гро́бъ бо все́льшися, показа́ ра́й, ему́же предстоя́ще дне́сь, ра́дующеся, пое́мъ: Го́спода по́йте, дѣла́, и превозноси́те Его́ во вся́ вѣ́ки.

Инъ.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.

Не́бо яви́лся еси́, сла́ву повѣ́дая Бо́жію, Ѳадде́е, и язы́ковъ бы́лъ еси́ просвѣще́ніе, къ вѣ́рѣ Боже́ственнѣй возводя́ те́плѣ вопію́щихъ: по́йте Го́спода и превозноси́те Его́ во вѣ́ки.

Крѣ́пость немощны́мъ, и слѣпы́мъ прозрѣ́ніе, и хромы́мъ благотече́ніе, блаже́нне, подая́ духо́вною си́лою, гра́да Еде́сскаго свѣти́льникъ бы́лъ еси́, при́сно вѣ́рно тя́, Ѳадде́е, хва́лящаго.

Иже бога́тствомъ чуде́съ невѣ́ренъ язы́къ въ вѣ́ру ма́ніемъ Боже́ственнымъ претвори́вый и отъ и́дольскія ле́сти спасы́й къ Нему́ притека́ющія, вѣ́рою по до́лгу сла́вится Ѳадде́й.

Богоро́диченъ: Зако́на сѣно́вное преста́, Влады́чице, Тебѣ́ ро́ждшей зако́ну Да́теля, благода́тію просвѣща́юща вселе́нную: Его́же при́сно моли́, зако́номъ мя́ побѣжда́ема грѣхо́внымъ уще́дрити вско́рѣ.

Инъ.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Иже на́шею не́мощію Себе́ обложи́вый, твое́ немощно́е я́вѣ укрѣпи́ и тя́ содѣ́ла си́льнѣйшу, му́ченице, огня́, воды́, и звѣре́й, и мучи́тельныхъ сосу́дъ, вѣ́рно вопію́щую: свяще́нницы, благослови́те, лю́діе, превозноси́те во вся́ вѣ́ки.

Юношески хра́брствовавше и му́жески побѣди́ша о́троцы честнíи сопроти́вныхъ противле́ніе, боже́ственный Ѳеогнíй, свяще́нный Ага́пій, ку́пно и Пи́стъ, дѣ́ломъ и сло́вомъ показа́вшеся и побѣ́дныя вѣнцы́ отъ Бо́га пріи́мше, Того́ превозно́сятъ во вся́ вѣ́ки.

Яко ма́слина благопло́дна, я́ко многоно́сенъ виногра́дъ, лоза́ми треми́ управля́емь, съ ни́миже воздѣ́ла исповѣ́данія гро́зды, вино́ свидѣ́нія источа́ющи, Ва́ссо, веселя́щее сердца́ благоче́стно вопію́щихъ: лю́діе, превозноси́те Христа́ во вѣ́ки.

Со безпло́тными чи́ны, съ му́ченическими во́инствы престо́лу предстоя́ще Бо́жію, прехва́льніи, и сла́вы, и благода́ти, и просвѣще́нія испо́лнени, разори́те на́шихъ согрѣше́ній мра́къ, вѣ́рою творя́щихъ свѣтоно́сную и боже́ственную, испо́лнену дарова́ній, ва́шу изря́дную па́мять.

Богоро́диченъ: Иже небеса́ ма́ніемъ и зе́млю хотѣ́ніемъ Сло́во Отчее содѣ́лавъ, Пречи́стая, и созда́въ человѣ́ка, изъ Тебе́ я́вѣ прія́тъ пло́ть Себѣ́, назда́ти естество́ на́ше истлѣ́вшее и сокруше́нное пре́лестію змíя, Дѣ́во, Еди́ный Ми́лостивый.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное преставле́ніе Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Пріиди́те въ Сіо́нъ, на Боже́ственную и ту́чную Го́ру жива́го Бо́га, возра́дуемся, Богоро́дицу зря́ще: къ зѣло́ бо лу́чшей и Боже́ственнѣй сѣ́ни, я́ко Ма́терь, Сію́ во Свята́я святы́хъ Христо́съ преста́ви.

Пріиди́те, вѣ́рніи, ко гро́бу присту́пимъ Бо́жія Ма́тере, и объи́мемъ сердцы́ и устна́ми, очесы́ и лице́мъ чи́сто прикаса́ющеся и почерпа́юще исцѣле́ній незави́стныя да́ры от исто́чника приснотеку́щаго.

Пріими́ отъ на́съ пѣ́снь исхо́дную, Ма́ти жива́го Бо́га, и свѣтоно́сною Твое́ю и Боже́ственною осени́ благода́тію, Императору — побѣдительная, христолюби́вымъ лю́демъ — ми́ръ, оставле́ніе — пою́щимъ и душа́мъ спасе́ніе подаю́щи.

Инъ.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Ви́дѣти я́же вѣ́чная Боже́ственная воздая́нія и жела́ній кра́йнихъ яснѣ́йше, блаже́нне, приближа́яся, Ѳадде́е, красу́йся и лику́й.

Яко ке́дръ, я́ко вели́къ кипари́съ, сла́вне Ѳадде́е, добродѣ́тельми возне́слся еси́, благоуха́я сердца́ восхваля́ющихъ тя́.

Совоку́плься, блаже́нне, апо́столомъ, и му́ченикомъ, и безпло́тнымъ лико́мъ веселя́ся, съ ни́миже моли́ спасти́ тя́ чту́щія.

Па́мять твоя́, бога́тнымъ сія́ніемъ дарова́ній вѣ́рныхъ мы́сли просвѣща́ющи, восхвали́ти тя́, Ѳадде́е, всѣ́хъ понужда́етъ.

Богоро́диченъ: Благолюби́вая Дѣ́во, озло́бленную грѣхми́ ду́шу мою́ ублажи́, Яже Преблага́го Сло́ва поро́ждши.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Ви́дѣти жела́ющи, я́же земно́е о́ко вои́стинну не ви́дѣ, тѣле́сная терпя́ше болѣ́зненная му́жески сокруше́нія удо́въ, прехва́льная, стремле́ніе звѣре́й, жже́ніе огня́, мо́ря треволне́ніе, невеще́ственнымъ свѣтозаре́ніемъ уясня́ема, всеблаже́нная.

Яко вои́стинну свѣтоно́сна и благолѣ́пна, богоно́сна луна́ возсія́ла еси́ боже́ственнаго ли́ка, я́коже во звѣзда́хъ свѣтоявле́нныхъ приводи́ма благода́ти со проше́дшими изъ твоего́ чре́ва. И ны́нѣ вселе́нную невеще́ственнымъ свѣтозаре́ніемъ уясня́ете, блаже́нніи.

Утверди́вше на ка́мени терпѣ́нія мы́сли восхожде́нія, блаже́нніи, искуше́ніи многови́дныхъ наведе́ній, я́ко вои́стинну неукло́нни яви́стеся и, побѣ́ду по Христѣ́ взе́мше, съ Си́мъ при́сно ца́рствовати сподо́бистеся, ра́дующеся.

Яко вои́стинну цѣла́ голуби́ца и го́рлица, я́же Бо́га возлю́бльши, ла́стовица, съ боже́ственными возлетѣ́вши птенцы́, на небесѣ́хъ всели́ся, къ держа́вѣ боже́ственнѣй и мы́сленнѣй, зимы́ убѣжа́вши и ловле́нія де́монскаго, Ва́сса, ю́же любо́вію ублажа́емъ.

Богоро́диченъ: Человѣколю́бца ро́ждши и Изба́вителя, чу́дная и благолюби́вая Влады́чице, грѣхо́въ избавле́ніе ми́ да́ждь Твои́ми моли́твами и ду́шу мою́, Всечестна́я, озло́бленную помышле́ніи, ублажи́ и покажи́ страсте́й смертоно́сныхъ свобо́дну, Всенепоро́чная.

Свѣти́ленъ апо́стола. Подо́бенъ: Жены́, услы́шите.

Еде́су пома́занъ бы́въ свѣти́льникъ, Ѳадде́е всему́дре, въ не́мже проповѣ́далъ еси́ боже́ственное смотре́ніе Сло́ва, и, мѣстонача́льника Авгаря и и́же съ ни́мъ вся́ просвѣти́въ, служи́тели показа́лъ еси́ Пресвѣ́тлыя Тро́ицы, апо́столе богопроповѣ́дниче.

Сла́ва, и ны́нѣ, пра́здника:

Оле та́инъ Твои́хъ, Чи́стая Богороди́тельнице! Вы́шняго бо, Дѣ́во, престо́лъ стра́шный показа́лася еси́, херуви́мъ пребо́льши, на не́мже сѣ́де, яви́ся Творе́цъ тва́ри. Къ Нему́же и ны́нѣ преста́вльшися, покры́й и снабди́ мíръ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Помина́й прилѣ́жно* Тя́ моля́щія,* Дѣ́во Богоро́дице,* и любо́вію чту́щія* свяще́нное Твое́ успе́ніе.

Сти́хъ: Воскресни́, Го́споди, въ поко́й Тво́й,* Ты́ и Киво́тъ святы́ни Твоея́.

Лѣ́ствица къ небеси́* гро́бъ Пречи́стыя* Богоро́дицы е́сть,* возводя́щая пою́щія,* Боже́ственное Сея́ успе́ніе.

Сти́хъ: Кля́тся Госпо́дь Дави́ду и́стиною* и не отве́ржется ея́.

Невѣ́сту Тя́ Бо́жію* вы́шнее Ца́рство,* избра́нныхъ сла́ва* пріе́млетъ, Дѣ́во,* къ Сы́ну иду́щую.

Сла́ва, и ны́нѣ, гла́съ и подо́бенъ то́йже:

Вси́ небе́сніи,* воспо́йте, ли́цы,* и́бо Дѣ́ва Ма́ти* преста́вися пресла́вно* отъ земли́ къ небе́снымъ.


НА ЛИТУРГІИ,

Блаже́нна пра́здника, пѣ́снь 7-я, обою́ кано́новъ, со ирмосо́мъ на 6.

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 202 об. – 211.

/ Къ оглавленію раздѣла /


Наверхъ / Къ титульной страницѣ

0