Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 20-й де́нь.
Послѣ́дованіе моле́бнаго пѣ́нія святи́телемъ Ѳео́дору и Іоа́нну, Су́ждальскимъ чудотво́рцемъ.

Іере́й обы́чно начина́етъ: Благослове́нъ Бо́гъ на́шъ... Чте́цъ а́біе чте́тъ: Пріиди́те поклони́мся.., три́жды. И 142-й псало́мъ: Го́споди, услы́ши моли́тву мою́... Посе́мъ: Бо́гъ Госпо́дь и яви́ся на́мъ.., со стихи́ и́хъ, на гла́съ 8.

Тропа́рь святи́телемъ, гла́съ то́йже:

Яко апо́столомъ единонра́вныхъ учи́телей Су́ждальскія страны́, и цѣли́телей ду́шъ и тѣле́съ прему́дрыхъ, и служи́телей Бо́гу благопрія́тныхъ, къ ра́камъ честны́хъ моще́й ва́шихъ притека́юще, ублажа́емъ ва́съ, святи́теліе богоблаже́нніи, Ѳео́доре и Іоа́нне, въ пѣ́снехъ же и пѣ́ніихъ, ра́дующеся, сла́вимъ Христа́, дарова́вшаго ва́мъ благода́ть исцѣле́ній и гра́ду на́шему Су́ждалю вели́кое въ ва́съ утвержде́ніе. [Два́жды.]

Сла́ва, и ны́нѣ, богоро́диченъ:

Иже на́съ ра́ди рожде́йся отъ Дѣ́вы, [и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].

Та́же, псало́мъ 50-й: Поми́луй мя́, Бо́же... И по псалмѣ́, начина́емъ кано́нъ святи́телемъ, гла́съ 8.

Пѣ́снь 1.

Припѣ́въ: Святи́теліе Христо́вы Ѳео́доре и Іоа́нне, моли́те Бо́га о на́съ.

Возсія́сте въ мíрѣ, святи́тели прему́дріи, исполни́тели Боже́ственныхъ велѣ́ній, воспѣва́я Царя́ всѣ́хъ, я́ко просла́вися.

Просвѣти́сте мíръ благоче́стія свѣ́томъ, и нече́стія тму́ отгна́сте, тѣ́мже почита́емъ ва́съ вѣ́рно, я́ко святи́телей вели́кихъ и всечестны́хъ.

Сла́ва: Предстоя́ще со а́нгелы непристу́пному Бо́гу, соверша́ющимъ па́мять ва́шу, помоли́теся дарова́ти на́мъ очище́ніе грѣхо́въ, священнопроповѣ́дницы богоно́сніи.

И ны́нѣ: Превѣ́чное и собезнача́льное Отцу́ Сло́во, пло́тію ро́ждши па́че сло́ва, Пречи́стая, моли́ся прилѣ́жно изба́витися на́мъ отъ бѣ́дъ и скорбе́й.

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, Еди́не Человѣколю́бче.

Воздержа́ніемъ и́стиннымъ и моли́твою непреста́нною взыдо́сте на высоту́ добродѣ́телей, преподо́бніи и богоно́сніи, тѣ́мже сла́достей ра́йскихъ наслажда́етеся при́сно.

Иму́ще дерзнове́ніе къ Бо́гу, святи́теліе преподо́бніи, моли́теся о на́съ, спасти́ся на́мъ, вѣ́рою пою́щимъ па́мять ва́шу.

Сла́ва: Яко Боже́ственныхъ за́повѣдей ре́вностныхъ исполни́телей, и Боже́ственныя и́стины му́дрыхъ проповѣ́дниковъ, просла́вилъ вы́ Бо́гъ сла́вою несконча́емою, Его́же моли́те спасти́ ду́ши на́ша.

И ны́нѣ: Не́бо и престо́лъ Тя́ Бо́жій, воспѣва́емъ вси́, Богороди́тельнице Чи́стая Дѣ́во, изъ Тебе́ бо яви́ся Христо́съ Госпо́дь на спасе́ніе на́ше.

Моли́те Бо́га о на́съ, святи́теліе Христо́вы Ѳео́доре и Іоа́нне, я́ко мы́ усе́рдно къ ва́мъ прибѣга́емъ, ско́рымъ помо́щникомъ и моли́твенникомъ о душа́хъ на́шихъ.

Та́же сѣда́ленъ, гла́съ 3:

Сосу́ди честнíи бога́тства некра́домаго яви́стеся вои́стинну, блаже́нніи, безстра́стіемъ житіе́ свое́ украси́вше, тѣ́мже мо́лимъ ва́съ, Христа́ Бо́га моли́те дарова́ти на́мъ ве́лію ми́лость.

Сла́ва, и ны́нѣ, богоро́диченъ:

Къ Тебѣ́ смире́нно притека́емъ, Влады́чице, прибѣ́жище, и покро́мъ, и огражде́ніе на́ше.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Святи́телей прему́дрыхъ вси́ въ пѣ́снехъ восхва́лимъ, взыва́юще: богоно́сніи отцы́, прилѣ́жно моли́те спасти́ся на́мъ.

Пѣ́сньми и пѣ́ніи восхваля́емъ ва́съ, святи́теліе богоблаже́нніи, я́ко благоче́стія насади́телей, и и́стины прему́дрыхъ учи́телей.

Сла́ва: Свяще́нную па́мять ва́шу, вѣ́рніи строи́теліе Боже́ственныя благода́ти, святи́теліе Госпо́дни, пѣ́сньми и пѣ́ніи пра́зднуемъ.

И ны́нѣ: Безневѣ́стная Невѣ́сто, и неискусобра́чная чи́стая Ма́ти Христа́, Того́ непреста́нно моли́ спасти́ ду́ши пою́щихъ Тя́.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Пома́заніемъ отъ Свята́го пома́завшеся, благоче́стія мѵ́ромъ испо́лнисте святу́ю Це́рковь, богому́дріи, тѣ́мже, я́ко Бо́жіихъ святи́телей вси́ почита́емъ ва́съ благоче́стно.

Подо́бницы бы́вше апо́столомъ, богому́дріи па́стыріе, о чту́щихъ па́мять ва́шу лю́дехъ, предста́тели яви́стеся многомо́щніи.

Сла́ва: Ревни́телю Иліѣ́ и Моисе́ю Богови́дцу возревнова́вше, отцы́ богоблаже́нніи, на го́ру боговѣ́дѣнія востеко́сте добродѣ́тельми ва́шими.

И ны́нѣ: Цари́цу, всѣ́хъ Царя́ ро́ждшую, пріиди́те, вѣ́рніи вси́, Благослове́нную почти́мъ.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Це́рковь святу́ю украси́ли есте́, отцы́ блаже́нніи, боже́ственными ва́шими добро́тами, и ны́нѣ ду́ши вѣ́рныхъ просвѣща́ете моли́твами ва́шими.

Яко свѣти́ла благоче́стія, возсія́ли есте́ во всю́ тва́рь уче́ньми, сла́вніи, мра́къ невѣ́дѣнія прогна́вше сло́вомъ Бо́жіимъ.

Сла́ва: Вмѣ́сто ору́жія, язы́къ и сло́во взе́мше, преподо́бніи, чу́ждая отсѣ́кли есте́ уче́нія вся́, и изъясни́ли есте́ Тро́ицу всѣ́мъ я́вственно.

И ны́нѣ: Роди́вся отъ Дѣ́вы, мíръ просвѣти́лъ еси́, Христе́ Бо́же, и мене́ отъ прегрѣше́ній мои́хъ изба́ви, я́ко Человѣколю́бецъ, и упра́ви живо́тъ мо́й, молю́ Тя.

Ектенія́ ма́лая: Па́ки и па́ки...

И по возгла́сѣ, конда́къ, гла́съ 8:

Яко добродѣ́телей учи́тели, моли́твами ва́шими подае́те чту́щимъ ва́съ любо́вію добродѣ́телей исправле́ніе и собла́зновъ избавле́ніе.

Икосъ:

Рѣ́ки благоче́стія яви́стеся, уче́ній ва́шихъ струя́ми всю́ зе́млю Су́ждальскую напои́вшія, тѣ́мже соше́дшеся, благоче́стно ва́съ почита́емъ пѣ́сньми дне́сь, и вѣ́рно вопіе́мъ ва́мъ: моли́те Христа́ Бо́га непреста́нно о всѣ́хъ на́съ.

Та́же проки́менъ, гла́съ 4: Уста́ моя́ возглаго́лютъ прему́дрость,* [и поуче́ніе се́рдца моего́ ра́зумъ]. Сти́хъ: Услы́шите сія́ вси́ язы́цы, [внуши́те вси́ живу́щіи по вселе́ннѣй]. Ева́нгеліе святи́телемъ, отъ Матѳе́я, зача́ло 11.

Пѣ́снь 7.

Ирмо́съ: Въ нача́лѣ зе́млю основа́вый и небеса́ сло́вомъ утверди́вый, благослове́нъ еси́ во вѣ́ки, Го́споди, Бо́же оте́цъ на́шихъ.

Истинные па́стыріе яви́стеся, Боже́ственныя па́жити показу́я ста́ду своему́, вопію́щему: благослове́нъ Бо́гъ оте́цъ на́шихъ.

Страсте́й погаси́сте пла́мень, и ду́ши благочести́выхъ Боже́ственною ороси́сте благода́тію, вопію́щихъ: благослове́нъ Бо́гъ оте́цъ на́шихъ.

Сла́ва: Воздержа́ніемъ и бдѣ́ніемъ, и вѣ́рою и́стинною въ небе́сныя дости́гше селе́нія, святи́теліе, помина́йте всѣ́хъ на́съ.

И ны́нѣ: Иже на́съ ра́ди рожде́йся отъ Дѣ́вы, и отъ врага́ изба́вивый мíръ, благослове́нъ Бо́гъ оте́цъ на́шихъ.

Пѣ́снь 8.

Ирмо́съ: На горѣ́ святѣ́й просла́вльшася и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Моисе́ю подо́бящеся, отцы́, на го́ру безстра́стія взыдо́сте, святи́теліе, тѣ́мъ воспѣва́емъ Христа́ во вѣ́ки.

Лю́ди Христо́вы упа́сше, преподо́бніи, Сіо́на вы́шняго обрѣто́сте жили́ще во вся́ вѣ́ки.

Сла́ва: Пома́заніе отъ Свята́го пріе́мше, Бо́жіи святи́теліе, е́же въ сло́вѣ и дѣ́лѣ благоче́стіе священнодѣ́йствовасте, тѣ́мже Тро́ицу во Еди́номъ Существѣ́ пое́те во вся́ вѣ́ки.

И ны́нѣ: Все́льшагося во чре́во Святы́я Дѣ́вы, и па́че сло́ва, ве́тхаго Ада́ма обнови́вша, Го́спода по́йте и превозноси́те во вѣ́ки.

Пѣ́снь 9.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Иже безстра́стіемъ и вѣ́рою, наде́ждою и любо́вію, пу́ть на́мъ живота́ вѣ́чнаго показа́вшіи, прему́дріи святи́теліе, моли́теся спасти́ся душа́мъ на́шимъ.

Жезло́мъ па́стырства упасо́сте лю́ди, и Бо́жію Це́рковь житіе́мъ ва́шимъ украси́сте, святи́теліе всечестнíи, тѣ́мже ва́съ пѣ́сньми восхваля́емъ.

Сла́ва: Яко церко́вныя свѣти́ла, святи́теліе, въ пѣ́снехъ и пѣ́ніихъ восхваля́емъ ва́съ, ра́ку моще́й ва́шихъ, блаже́нніи отцы́, благоче́стно лобыза́юще.

И ны́нѣ: Ра́дуйся, присноживо́тный исто́чниче нетлѣ́нія; ра́дуйся, всесвѣ́тлый Со́лнца о́блаче; ра́дуйся, колесни́це всего́ Божества́; ра́дуйся, ковче́же освяще́нія, Пречи́стая Богороди́тельнице.

Та́же: Досто́йно е́сть... Трисвято́е, и по Отче на́шъ... И по возгла́сѣ тропа́рь, гла́съ 8: Яко апо́столомъ единонра́вныхъ... Сла́ва, и ны́нѣ, богоро́диченъ: Иже на́съ ра́ди рожде́йся отъ Дѣ́вы... Посе́мъ глаго́лется ектенія́: Поми́луй на́съ, Бо́же... [кра́ткая.]

По возгла́сѣ настоя́тель чте́тъ моли́тву сію́:

О, вели́кіе святи́тели и чудотво́рцы Ѳео́доре и Іоа́нне, уго́дницы Христо́вы и на́ши те́плые засту́пницы и моли́твенницы! Услы́шите на́съ, смире́нныхъ и недосто́йныхъ рабо́въ свои́хъ, съ те́плою вѣ́рою и со слеза́ми припа́дающихъ къ цѣльбоно́снымъ моще́й ва́шихъ ра́камъ, и испроси́те па́ствѣ свое́й, и вся́кому гра́ду и странѣ́, у Го́спода, всея́ тва́ри Содѣ́теля: благоде́нствіе, земли́ благопло́діе, возду́ха благорастворе́ніе, и изоби́ліе плодо́въ земны́хъ, на́мъ же, принося́щимъ ва́мъ сіе́ ма́лое моле́ніе, коему́ждо тѣле́сное здра́віе и душе́вное спасе́ніе, и вся́кое благопоспѣше́ніе, я́ко да ва́шимъ заступле́ніемъ и моли́твами сохраня́еми, поклоне́ніе, сла́ву и благодаре́ніе возсыла́емъ въ Тро́ицѣ Еди́ному Бо́гу и всѣ́хъ Созда́телю ны́нѣ и при́сно, и во вѣ́ки вѣко́въ. Ами́нь.

Діа́конъ: Прему́дрость. И настоя́тель твори́тъ обы́чный отпу́стъ дне́, на кото́ромъ помина́етъ и святи́телей Ѳео́дора и Іоа́нна.

Источникъ: Послѣ́дованіе моле́бнаго пѣ́нія святи́телямъ Ѳео́дору и Іоа́нну, Су́ждальскимъ чудотво́рцамъ. — М.: Въ Сѵнода́льной Тѵпогра́фіи, 1870. — Л. 1 – 4 об.

/ Къ оглавленію раздѣла /


Наверхъ / Къ титульной страницѣ

0