Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 29 апрѣля 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 20-й де́нь.
Свята́го проро́ка Самуи́ла.

[ВЕЧЕРЪ,]
На Го́споди воззва́хъ: стихи́ры пра́здника, гла́съ 6. Подо́бенъ: Всю́ отло́жше.

Къ жи́зни присносу́щнѣй* Жи́знь ро́ждшая преста́вися,* подаю́щи вѣ́рнымъ ми́лость,* Всенепоро́чная Богоро́дица дне́сь,* и тва́рь вся́ ны́нѣ, игра́ющи, ра́дуется,* а́нгельская совокупле́нія ны́нѣ,* я́ко Цари́цѣ сра́дующеся, провожда́ютъ,* пра́зднственное пѣ́ніе* соверша́юще въ пѣ́снехъ:* еди́ный же Сея́ Сы́нъ и всѣ́хъ Ца́рь* съ Собо́ю всели́,* я́ко всѣ́ми влады́чествующую.

Облаки носи́ми,* богогла́сніи отъ всея́ земли́* пріидо́ша въ Сіо́нъ взе́млеми апо́столи,* ви́дѣти сла́вное Ма́тере Госпо́дни* и свято́е вои́стинну успе́ніе,* и свѣтоза́рны глаго́лы принести́,* и чу́дно погребе́ніе содѣ́лати Се́й,* я́ко ро́ждшей Го́спода,* и вѣ́рнымъ всѣ́мъ прибѣ́жище,* и покро́въ держа́венъ,* и́же на земли́ боже́ственный* и непобори́мый вои́стинну бы́вши.

Свѣ́тло пра́зднуемъ* въ боже́ственнѣмъ успе́ніи,* Яже всѣ́хъ вы́шши тва́рей,* принося́ще Се́й сла́вныя* и свѣ́тлыя вси́ да́ры,* вои́стинну боже́ственны,* я́же су́ть Се́й лѣ́потны,* вѣ́ру, и наде́жду, и любо́вь несму́тну,* чистоту́, освяще́ніе и пра́вду,* и́миже наслажда́ется,* да и прича́стники Ей сподо́битъ на́съ,* и Ца́рствія Вы́шняго удосто́итъ.

Ины стихи́ры свята́го, гла́съ 4. Подо́бенъ: Да́лъ еси́ зна́меніе.

Да́ръ благопрія́тенъ,* отъ ма́тернихъ тя́ ру́къ* возложи́ ро́ждшая,* моли́твы досто́инъ, Самуи́ле,* пло́дъ тя́ наслѣ́довавши* и отда́вши Бо́гу Благодѣ́телю,* я́коже обѣща́ся.* Тѣ́мже въ тебѣ́ упоко́ися благода́ть Ду́ха, сла́вне,* беззло́біемъ возрасти́вши* и му́дростію украси́вши.

Ма́стію свяще́нною* я́ко свяще́нникъ обложи́мь* и проро́къ явля́емь,* прозира́еши пре́дняя,* и повелѣ́ніемъ Боже́ственнымъ помазу́еши царя́,* и бу́дущая сказу́еши,* судя́ пра́ведно изра́ильтескимъ лю́демъ,* непреста́нно согрѣша́ющимъ* и отъ Бо́га удаля́ющимся,* Самуи́ле досточу́дне, богоно́се пребога́те.

Ны́нѣ не въ гада́ніихъ,* ниже́ въ сѣ́нѣхъ, я́ко пе́рвѣе,* къ лицу́ же лице́мъ зри́ши,* Его́же возжела́лъ еси́,* плотскíй мра́къ и тяготу́ отложи́въ,* и небеса́ обходя́, ра́дуешися,* проро́че всече́стне,* проро́комъ равностоя́телю,* пра́веднымъ собесѣ́дниче* и а́нгеломъ соприча́стниче.

Сла́ва, и ны́нѣ, гла́съ 6.

На безсме́ртное Твое́ успе́ніе, Богоро́дице, Ма́ти Живота́, о́блацы апо́столы по возду́ху восхища́ху, и, по мíру разсѣ́янныя, во еди́номъ ли́цѣ предста́ша пресвято́му Твоему́ тѣ́лу, е́же и погре́бше че́стно, гла́съ Тебѣ́ Гавріи́ловъ, пою́ще, вопія́ху: ра́дуйся, Благода́тная Дѣ́во, Ма́ти Безневѣ́стная, Госпо́дь съ Тобо́ю. Съ ни́миже, я́ко Сы́на Твоего́ и Бо́га на́шего моли́, спасти́ся душа́мъ на́шимъ.

На стихо́внѣ стихи́ры, гла́съ 6. Подо́бенъ: Тридне́венъ.

Глаго́ломъ боже́ственнаго Гавріи́ла послѣ́дующе, ра́дуйся, Тебѣ́ зове́мъ, Чи́стая: Ты́ у́бо Пресвята́я и Ма́ти Госпо́дня, къ Сему́ преста́вльшися, помина́й о воспѣва́ющихъ Тя́.

Сти́хъ: Воскресни́, Го́споди, въ поко́й Тво́й, Ты́ и Киво́тъ святы́ни Твоея́.

Неизмѣ́рная Прему́дрость Бо́жія хра́мъ Себѣ́ па́че ума́, Богоро́дице, созда́, изъ Тебе́ Ду́хомъ Святы́мъ, и ны́нѣ Тя́ къ невеще́ственнымъ селе́ніемъ преста́ви, Всепѣ́тая.

Сти́хъ: Кля́тся Госпо́дь Дави́ду и́стиною и не отве́ржется ея́.

Ра́бъ, ны́нѣ прихожду́ къ Тебѣ́, Ма́тери всѣ́хъ Бо́га, отъ вся́кихъ изба́витися напа́стей моля́ся. Но, о Богороди́тельнице! Ца́рствующи съ Сы́номъ Твои́мъ, христіа́нскій ро́дъ сохраня́й.

Сла́ва, и ны́нѣ, гла́съ то́йже. Самогла́сенъ:

Егда́ преставле́ніе пречи́стаго Твоего́ тѣ́ла готовля́шеся, тогда́ апо́столи, обстоя́ще о́дръ, съ тре́петомъ зря́ху Тя́; и о́ви у́бо, взира́юще на тѣ́ло, у́жасомъ одержи́ми бя́ху, Пе́тръ же со слеза́ми вопія́ше Ти́: О, Дѣ́во, ви́жду Тя́ я́сно просте́рту про́сту, Живота́ всѣ́хъ, и удивля́юся, въ Не́йже всели́ся бу́дущія жи́зни наслажде́ніе. Но, о Пречи́стая, моли́ся прилѣ́жно Сы́ну и Бо́гу Твоему́, спасти́ся ста́ду Твоему́ невреди́му.

Тропа́рь свята́го, гла́съ 2:

Проро́ка Твоего́ Самуи́ла па́мять, Го́споди, пра́зднующе, тѣ́мъ Тя́ мо́лимъ: спаси́ ду́ши на́ша.

Сла́ва, и ны́нѣ, тропа́рь пра́здника, гла́съ 1:

Въ рождествѣ́ дѣ́вство сохрани́ла eси́, во успе́ніи мíра не оста́вила eси́, Богоро́дице, преста́вилася eси́ къ животу́, Ма́ти су́щи Живота́, и моли́твами Твои́ми избавля́еши отъ сме́рти ду́ши на́ша.


НА УТРЕНИ,
По 1-й стихоло́гіи сѣда́ленъ, гла́съ 4. Подо́бенъ: Удиви́ся Іо́сифъ.

Ши́ршая небе́съ я́вльшися на земли́, Ро́ждшая пло́тію всѣ́хъ Содѣ́теля, ны́нѣ въ са́мая небе́сная отъ земли́ преста́вилася еси, пра́ведныхъ у́бо ду́ши, смотря́юще Тя́, а́нгельстіи же ли́цы, зря́ще, я́ко Цари́цѣ, хвалу́ досто́йно всегда́ Тебѣ́ прино́сятъ. Тѣ́мже моля́щи не преста́й о воспѣва́ющихъ Тя́.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 5. Подо́бенъ: Собезнача́льное.

Ангелъ мно́жества славосло́вятъ Тя́, и человѣ́ческій ро́дъ вѣ́рно пое́тъ Тя́, я́ко преста́вилася еси́ отъ земли́ къ Ро́ждшемуся изъ Тебе́, Богоро́дице Чи́стая, и ны́нѣ мо́лишися прилѣ́жно изба́витися отъ бѣ́дъ, вѣ́рою пра́зднующимъ Твое́, Дѣ́во, преставле́ніе.

Сла́ва, и ны́нѣ, то́йже.

Кано́нъ пра́здника со ирмосо́мъ на 8, гла́съ 1.
Пѣ́снь 1.

Ирмо́съ: Преукраше́нная Боже́ственною сла́вою, свяще́нная и сла́вная, Дѣ́во, па́мять Твоя́, вся́ собра́ къ весе́лію вѣ́рныя, начина́ющей Маріа́мѣ, съ ли́ки и тимпа́ны, Твоему́ пою́ще Единоро́дному: сла́вно я́ко просла́вися.

Да провожда́ютъ невеще́ственніи чи́нове, небоше́ственное въ Сіо́нъ Боже́ственное тѣ́ло Твое́, внеза́пу же сте́кшеся апо́столъ мно́жество отъ коне́цъ, Богоро́дице, Тебѣ́ предста́ша а́біе, съ ни́миже, Чи́стая, Твою́ честну́ю, Дѣ́во, па́мять сла́вимъ.

Побѣ́дныя по́чести взяла́ еси́ на естество́, Чи́стая, Бо́га ро́ждши, оба́че же, подо́бящися Творцу́ Твоему́ и Сы́ну, па́че естества́ повину́ешися есте́ственнымъ зако́номъ. Тѣ́мже уме́рши, съ Сы́номъ востае́ши вѣ́чнующи.

Инъ кано́нъ свята́го на 4, его́же краегране́сіе: Зря́щаго Самуи́ла пою́ сла́ву. Творе́ніе Іо́сифово, гла́съ 4.
Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Непло́днѣй мое́й души́ добродѣ́телей благопло́діе израсти́ти, твои́ми моли́твами сподо́би, му́дре, непло́дныя прозябе́ніе, я́ко да твое́ восхвалю́ свѣтоно́сное торжество́ свяще́нными, Самуи́ле, пѣ́сньми.

Разве́рзый дре́вле ложесна́ Са́рры, и Аннину моли́тву исполня́етъ проявле́нно, и непло́дную плодови́ту благода́тію сотвори́, Самуи́ле, я́ко звѣзду́ тя́, изъ нея́ возсія́ти благоизво́ли.

Боже́ственную свяще́нно омочи́въ, преблаже́нне, оде́жду, ду́шу же заря́ми та́йными просвѣти́лъ еси́ Ду́ха, вся́кой та́йнѣ, богому́дре, научи́вся, и я́ко а́нгелъ, служи́въ Бо́гу Вседержи́телю.

Богоро́диченъ: Сы́й со Отце́мъ, я́ко Сы́нъ превѣ́ченъ, въ послѣ́дняя вопло́щся, Сы́нъ Тво́й и́стинно бы́сть, Чи́стая, всѣ́хъ же сыноположи́въ Бо́гу вѣ́ры ра́ди, рабо́тавшія лю́тому бори́телю.

Пѣ́снь 3.

Ирмо́съ: Содѣ́тельная и содержи́тельная всѣ́хъ, Бо́жія Му́дросте и Си́ло, непрекло́нну, недви́жиму Це́рковь утверди́, Христе́, еди́нъ бо еси́ Свя́тъ, во святы́хъ почива́яй.

Жену́ Тя́ ме́ртвенну, но па́че естества́ и Ма́терь Бо́жію, ви́дѣвше, Всенепоро́чная, сла́вніи апо́столи, ужа́сно прикаса́хуся рука́ми сла́вою облиста́ющей, я́ко богопрія́тное Селе́ніе ви́дяще.

Пости́же ру́цѣ досади́тельныя де́рзаго, усѣче́ніемъ су́дъ нане́съ, Бо́гу сохра́ншу че́сть одушевле́нному Киво́ту, сла́вою Божества́, въ Не́мже Сло́во пло́ть бы́сть.

Инъ.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́біе.

Высоча́йшій Бо́гу прилѣпи́вся, сла́вне, возлю́бленъ бы́лъ еси́ отъ Него́, му́дростію боже́ственною украша́емь и цѣ́лостію удобря́емь.

Житіе́ а́нгельское на земли́, Самуи́ле, показу́я, собесѣ́дующія я́вѣ а́нгелы имѣ́лъ еси́, блаже́нне, и я́же па́че ума́ науча́ющія тя́.

Свѣ́тло о́ко душе́вное стяжа́въ, зри́ши вои́стинну да́льная, я́ко настоя́щая, благода́тію, проро́къ показу́яся Вседержи́теля.

Богоро́диченъ: Изъ Тебе́ про́йде Іису́съ Христо́съ воплоща́емь и обожи́ на́съ пло́ти прія́тіемъ, Всенепоро́чная, тѣ́мже я́ко Ма́терь Тя́ Сего́ почита́емъ.

Конда́къ проро́ка, гла́съ 8:

Яко многоче́стный да́ръ, пре́жде зача́тія вда́нъ Бо́гу, и изъ мла́да Тому́, я́ко а́нгелъ, послужи́лъ еси́, всеблаже́нне, и сподо́бился еси́ предбу́дущая вѣща́ти. Тѣ́мже вопіе́мъ ти́: ра́дуйся, проро́че Бо́жій Самуи́ле, архіере́ю вели́кій.

Сѣда́ленъ, гла́съ 3. Подо́бенъ: Боже́ственныя вѣ́ры.

Зако́на судьба́ми воспита́нъ, пома́заніе че́стно яви́лся еси́, я́коже Ааро́нъ, свяще́нствовавъ, и просвѣти́въ се́рдце Ду́хомъ, я́ко настоя́щая, да́льная прови́дѣлъ еси́, проро́че честны́й. Христа́ Бо́га моли́, дарова́ти душа́мъ на́шимъ ми́ръ и ве́лію ми́лость.

Сла́ва, и ны́нѣ, то́йже. Подо́бенъ: Красотѣ́ дѣ́вства.

Въ рождествѣ́ Твое́мъ зача́тіе безсѣ́менное, во успе́ніи Твое́мъ ме́ртвость нетлѣ́нная, чу́до въ чудеси́ сугу́бо стече́ся Богоро́дице: ка́ко бо Неискусому́жная, Младопита́тельница чиста́ су́щи? Ка́ко же Ма́ти Бо́гу мертвоно́сна мѵроуха́ющи? Тѣ́мже со а́нгеломъ вопіе́мъ Ти́: ра́дуйся, Благода́тная.

Пѣ́снь 4.

Ирмо́съ: Рѣ́чи проро́ковъ и гада́нія, воплоще́ніе прояви́ша отъ Дѣ́вы Твое́, Христе́: сія́ніе блиста́нія Твоего́ во свѣ́тъ язы́ковъ изы́детъ, и возгласи́тъ Тебѣ́ бе́здна съ весе́ліемъ: си́лѣ Твое́й сла́ва, Человѣколю́бче.

Ви́дите лю́діе и чуди́теся: Гора́ бо свята́я и я́вственная Бо́гу въ небе́сныя оби́тели превы́шше взе́млется, Не́бо земно́е въ небе́сное и нетлѣ́нное селе́ніе вселя́емо.

Жи́зни присносу́щныя и лу́чшія, сме́рть Твоя́ бы́сть прехожде́ніе, Чи́стая, отъ привре́менныя къ Боже́ственнѣй вои́стинну и непреходи́мѣй, преставля́я Тя́, Чи́стая, въ весе́ліи Сы́на зрѣ́ти Твоего́ и Го́спода.

Взя́шася две́ри небе́сныя, и Ангели воспѣ́ша, и прія́тъ Христо́съ дѣ́вства Своея́ Ма́тере сосу́дъ; Херуви́ми подъя́ша Тя́ съ весе́ліемъ, Серафи́ми же сла́вятъ, ра́дующеся.

Инъ.

Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.

Изря́днымъ житіе́мъ священноукраша́емь, Бо́жія зако́ны спаси́тельныя ввѣ́рени тебѣ́ бы́ша, Изра́илю возвѣща́ти преступа́ющу и Милосе́рдаго всегда́ прогнѣ́вающу.

Илíй жре́цъ, беззако́ннующимъ сыно́мъ, осужда́ется, и пра́веднымъ судо́мъ Боже́ственныя слу́жбы отлуча́ется, свяще́нный же Самуи́лъ, я́ко послу́шникъ Зову́щаго, неле́стною душе́ю вво́дится.

Зако́ннымъ оправда́ніемъ предстоя́ изря́дно, я́коже Ааро́нъ дре́вле, Всецарю́ служи́лъ еси́ и зако́нныя же́ртвы приноси́лъ еси́, прообразу́ющія Христо́во заколе́ніе спаси́тельное.

Безу́мнымъ лю́демъ твои́мъ, Самуи́ле, не пребыва́ющимъ всѣ́хъ Царя́ въ Боже́ственныхъ повелѣ́ніихъ, помазу́еши манове́ніемъ богодѣ́льнымъ царя́, я́коже проси́ша, рогопосѣка́юща тѣ́хъ крѣ́пость безу́мную.

Богоро́диченъ: Нѣ́дръ не истощи́въ Отчихъ, въ нѣ́дрѣхъ Твои́хъ я́коже но́въ Младе́нецъ восклони́тися благоволи́, на воззва́ніе, Дѣ́во, ду́шъ на́шихъ, Ему́же зове́мъ: сла́ва, Христе́, си́лѣ Твое́й.

Пѣ́снь 5.

Ирмо́съ: Бо́жію и неизрече́нную добро́ту, добродѣ́телей Твои́хъ, Христе́ исповѣ́мъ: отъ Присносу́щныя бо Сла́вы, Соприсносу́щное и Ѵпоста́сное возсія́вый Сія́ніе, изъ дѣ́вственныя утро́бы, су́щимъ во тмѣ́ и сѣ́ни, вопло́щся, возсія́лъ еси́ Со́лнце.

Яко на о́блацѣ Дѣ́во, апо́стольскій ли́къ носи́мь, къ Сіо́ну отъ коне́цъ, служи́ти Тебѣ́, Облаку ле́гкому, собира́шеся: отъ Нея́же Вы́шній Бо́гъ, су́щимъ во тьмѣ́ и сѣ́ни, Пра́ведное возсія́ Со́лнце.

Тру́бъ, богопрія́тніи язы́цы богосло́вныхъ муже́й благогла́снѣйше Богоро́дицѣ вопія́ху, исхо́дную возглаша́юще пѣ́снь Ду́хомъ: ра́дуйся нетлѣ́нный Исто́чниче, Бо́жія живонача́льнаго и спаси́тельнаго всѣ́мъ воплоще́нія.

Инъ.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Умудри́вся Ду́хомъ Боже́ственнымъ, изъ младе́нства служи́тель бы́лъ еси́ Бо́гу, еле́емъ, сла́вне, пома́занія цари́ благода́тію помазу́я, Боже́ственными манове́ньми.

Непоко́рно пребыва́ющу предре́клъ еси́ Сау́лу, безчи́нная преложе́нія, Самуи́ле блаже́нне, Боже́ственное хотѣ́ніе и оставле́ніе я́вѣ Боже́ственнаго Ду́ха.

Беззло́біемъ всегда́ со изра́ильтяны живы́й, зло́е преложе́ніе я́вѣ облича́ше, исправля́я, я́ко свяще́нникъ Боже́ственъ, я́ко проро́къ и́стиннѣйшій.

Богоро́диченъ: Съ на́ми бы́въ за милосе́рдіе, Спа́съ отъ крове́й Твои́хъ свяще́нныхъ па́че ума́, Всенепоро́чная, воплоща́ется и Бо́гъ и Человѣ́къ, Человѣколю́бецъ познава́ется.

Пѣ́снь 6.

Ирмо́съ: Морскíй пучиноро́дный ки́товъ вну́тренній о́гнь — тридне́внаго Твоего́ погребе́нія проображе́ніе, его́же Іо́на проро́къ показа́ся. Спасе́нъ бо, я́ко и предпосла́ся, неврежде́нъ, вопія́ше: пожру́ Ти́ со гла́сомъ хвале́нія, Го́споди.

Дае́тъ Тебѣ́, я́же превы́ше естества́, Ца́рь всѣ́хъ Бо́гъ: въ рождествѣ́ бо Дѣ́ву я́коже сохрани́, та́ко во гро́бѣ тѣ́ло соблю́дъ нетлѣ́нно и спросла́ви Боже́ственнымъ преставле́ніемъ, че́сть Тебѣ́, я́ко Сы́нъ Ма́тери, да́руя.

Вои́стинну Тя́, я́ко свѣ́телъ свѣ́щникъ, невеще́ственнаго Свѣ́та, кади́льницу злату́ю Боже́ственнаго Угля, во Свята́я святы́хъ всели́, ру́чку и же́злъ, скрижа́ль богопи́санную, ковче́гъ святы́й, трапе́зу Сло́ва жи́зни, Дѣ́во, Рождество́ Твое́.

Инъ.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Сло́во твое́, сло́во обожа́емо благода́тію, проявля́ше да́льная, я́ко бли́зъ су́ща, Самуи́ле проро́че, сосу́де Боже́ственнаго Ду́ха.

Возвыша́емь высо́кими видѣ́ніи и дѣя́нми, я́ко проро́къ и Бо́жій свяще́нникъ Вседержи́теля, зако́нными служе́ніи очища́еши лю́ди, досточу́дне.

Непотре́бствовася Сау́лъ, престу́пникъ бы́въ, и Бо́гъ тебѣ́ вмѣ́сто о́наго Дави́да кро́ткаго, Самуи́ле богому́дре, повелѣва́етъ пома́зати ма́стію.

Богоро́диченъ: Изба́вися отъ болѣ́зней Ева, Пренепоро́чная, безъ болѣ́зни бо Ты́ родила́ еси́ Христа́ Бо́га на́шего, стра́сти всѣ́хъ и болѣ́зни я́вѣ исцѣли́вшаго.

Конда́къ, гла́съ 2:

Въ моли́твахъ неусыпа́ющую Богоро́дицу и въ предста́тельствахъ непрело́жное упова́ніе, гро́бъ и умерщвле́ніе не удержа́ста: я́коже бо Живота́ Ма́терь, къ животу́ преста́ви, во утро́бу Всели́выйся приснодѣ́вственную.

Икосъ:

Огради́ моя́ помышле́нія, Христе́ мо́й, и́бо Стѣ́ну мíра воспѣ́ти дерза́ю, Чи́стую Ма́терь Твою́, на столпѣ́ глаго́лъ укрѣпи́ мя, и въ тя́жкихъ мы́слехъ заступи́ мя, Ты́ бо взыва́ющимъ и прося́щимъ вѣ́рою моле́нія исполня́еши. Ты́ мнѣ́ у́бо да́руй язы́къ прино́сенъ и по́мыслъ непосты́денъ: вся́кое бо дая́ніе сія́нія отъ Тебе́ низпосыла́ется, Свѣтопода́телю, во утро́бу всели́выйся приснодѣ́вственную.

Пѣ́снь 7.

Ирмо́съ: Безсту́днѣй я́рости же и огню́ Боже́ственное жела́ніе сопротивля́яся, о́гнь у́бо ороша́ше, я́рости же смѣя́шеся, богодохнове́нною слове́сною преподо́бныхъ тривѣща́нною цѣвни́цею, противовѣща́я мусикíйскимъ орга́номъ посреди́ пла́мене: препросла́вленный отце́въ и на́шъ Бо́же, благослове́нъ еси́.

Богодѣ́ланныя скрижа́ли Моисе́й, пи́санныя Боже́ственнымъ Ду́хомъ, я́ростію сокру́шъ, но сего́ Влады́ка, Ро́ждшую неврежде́нну въ небе́сныя сохра́нь до́мы, ны́нѣ вну́трь всели́. Съ Не́ю игра́юще, вопіе́мъ Христу́: препросла́вленный отце́въ и на́шъ Бо́же, благослове́нъ еси́.

Въ кимва́лѣхъ — усты́ чи́стыми, мусикíйски же — се́рдцемъ свѣ́тлымъ, доброгла́сною трубо́ю — высо́кою мы́слію, Дѣ́вы и Чи́стыя въ наро́читый избра́нный де́нь преставле́нія, дѣ́тельными пле́щуще рука́ми, вопіе́мъ: препросла́вленный отце́въ и на́шъ Бо́же, благослове́нъ еси́.

Богому́дріи, собери́теся, лю́діе: Бо́жія бо сла́вы Селе́ніе, отъ Сіо́на преставля́ется къ небе́сному жили́щу, идѣ́же гла́съ чи́стъ пра́зднующихъ, гла́съ несказа́ннаго ра́дованія, и въ весе́ліи вопію́щихъ Христу́: препросла́вленный отце́въ и на́шъ Бо́же, благослове́нъ еси́.

Инъ.

Ирмо́съ: Юноши три́ въ Вавило́нѣ, велѣ́ніе мучи́телево на бу́йство прело́жше, посредѣ́ пла́мене вопія́ху: благослове́нъ еси́, Го́споди, Бо́же оте́цъ на́шихъ.

Вели́къ тя́ ро́ждшая да́ръ всѣ́хъ Царю́ приво́дитъ, блаже́нне, моли́тву свяще́нну соверши́вши и пою́щи: Го́споди Бо́же оте́цъ на́шихъ, благослове́нъ еси́.

Вну́трь су́ща хра́ма тя́, и по чи́ну Ааро́ню служа́ща Небе́сному Влады́цѣ, Боже́ственная благода́ть, сла́вне Самуи́ле, просвѣти́.

Сло́вомъ Боже́ственнымъ су́диши, блаже́нне, лю́демъ Изра́илевымъ, си́мъ оправда́ніе всегда́ Бо́жіе возвѣща́я и отвраща́я вся́къ вре́дъ враго́въ моли́твою прилѣ́жною.

Вся́ку ве́щь упраздни́въ, сла́вне, твоего́ ума́, зерца́ло Ду́ха показа́лся еси́, вопія́ немо́лчно: благослове́нъ еси́, Го́споди Бо́же оте́цъ на́шихъ.

Богоро́диченъ: Яви́лася еси́ неопа́льно ро́ждши, Пречи́стая, я́ко вои́стинну Огнь Божества́. Тѣ́мже, ве́щныя моя́ стра́сти, Богороди́тельнице, попали́, я́ко ми́лостива и благолюби́ва.

Пѣ́снь 8.

Ирмо́съ: Пла́мень, ороша́ющь преподо́бныя, злочести́выя же попаля́ющь, Ангелъ Бо́жій всемо́щный показа́ отроко́мъ, живонача́льный же исто́чникъ содѣ́ла Богоро́дицу, тлю́ сме́рти и живо́тъ точа́щу пою́щимъ: Содѣ́теля еди́наго пои́мъ, изба́вленніи, и превозно́симъ во вся́ вѣ́ки.

Глаго́лы послѣ́доваху Боже́ственному Ковче́гу свяще́нному, все́ мно́жество богосло́вовъ въ Сіо́нѣ: ка́мо и́деши ны́нѣ, Ски́ніе, — зову́ще, — Бо́га Жива́го? Не преста́й призира́ющи вѣ́рою пою́щія: Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

Якоже, воздѣ́вши ру́цѣ, исхо́диши Всенепоро́чная, ру́цѣ, и́миже Бо́га носи́ла еси́ пло́тію, со дерзнове́ніемъ, я́ко Ма́ти, рекла́ еси́ къ Рожде́нному: я́же Ми́ да́лъ еси́, во вѣ́ки сохрани́, вопію́щія Тебѣ́: Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

Инъ.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Украси́вся Ааро́нею оде́ждою, во святы́хъ Свята́я вше́лъ еси́, же́ртвами, преблаже́нне, Изра́иля очища́я, провозвѣща́ющими закла́ніе Агнца спаси́тельное.

По́мысломъ чи́стымъ пріе́мъ зарю́, Самуи́ле, Ду́ха, я́коже проро́къ Боже́ственъ, провозвѣща́еши да́льная, я́ко настоя́щая, сего́ ра́ди вѣ́рно восхваля́емъ тя́.

Избра́нъ Дави́дъ бы́сть въ сынѣ́хъ Іессе́евыхъ, я́коже яви́лъ еси́, помазу́я того́ ма́стію, Самуи́ле, свято́ю и взыва́я: благослови́те, вся́ дѣла́ Госпо́дня, Го́спода.

Иже твое́ соверша́юще торжество́, Самуи́ле, пра́веднымъ собесѣ́дниче, твои́ми моли́твами да улучи́мъ Ца́рство вы́шнее, вопію́ще: благослови́те, вся́ дѣла́ Госпо́дня, Го́спода.

Богоро́диченъ: Милосе́рдія Твоего́ мя́ сподо́би, ми́лостивая и благолюби́вая Влады́чице, и гее́нны изба́ви мя́ и тмы́ о́ноя кромѣ́шнія, да вѣ́рою и любо́вію почита́ю Тя́.

Пѣ́снь 9.

Ирмо́съ: Побѣжда́ются естества́ уста́вы въ Тебѣ́, Дѣ́во Чи́стая: дѣ́вствуетъ бо рождество́ и живо́тъ предобруча́етъ сме́рть; по рождествѣ́ Дѣ́ва и по сме́рти жива́, спаса́еши при́сно, Богоро́дице, наслѣ́діе Твое́.

Дивля́хуся Ангельскія си́лы, въ Сіо́нѣ смотря́юще своего́ Влады́ку, же́нскую ду́шу рука́ми нося́щаго, пречи́сто бо Ро́ждшей, сынолѣ́пно провозглаша́ше: гряди́, Чи́стая, съ Сы́номъ и Бо́гомъ просла́вленна бу́ди.

Опря́та ли́къ апо́стольскій богопрія́тное тѣ́ло Твое́, со стра́хомъ зря́ще и гла́сомъ ве́ліимъ вѣща́юще: въ небе́сныя до́мы къ Сы́ну восходя́щи, спаса́еши при́сно, Богоро́дице, наслѣ́діе Твое́.

Инъ.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Стоя́ я́ко служи́тель предъ лице́мъ Влады́ки и Бо́га на́шего, блаже́нне, непоро́чнымъ житіе́мъ укра́шенъ, Тому́ служи́лъ еси́, Боже́ственныя лучи́ пріе́мля, и проро́чествуя явле́ннѣе.

Яви́лся еси́ отъ утро́бы ма́терни, сла́вне, Свята́го Ду́ха сосу́дъ: свяще́нною же просія́въ оде́ждою, Бо́гу угоди́лъ еси́ кро́тостію се́рдца, пребога́те, и по́мысла красото́ю.

Дне́сь па́мять твоя́ на́мъ, я́ко со́лнце, богоно́се, возсія́ лучи́ бога́тыхъ дарова́ній, просвѣща́ющи ду́ши чту́щихъ тя́, мглу́ же лю́тыхъ отгоня́щи. Тѣ́мже тя́ вси́ ублажа́емъ.

Взя́тся ко оби́телемъ свѣтови́днымъ и просія́лъ еси́ со́лнца свѣтлѣ́йше, ви́диши, я́же ви́дятъ проро́цы и апо́столи, и вси́ пра́ведніи, обожа́емь прича́стіемъ, богодохнове́нне. Тѣ́мже тя́ вси́ ублажа́емъ.

Богоро́диченъ: Тлѣ́нія не позна́вши му́жеска, Нетлѣ́ннаго во утро́бѣ прія́ла еси́ Сло́ва, на́съ, истлѣ́вшія, избавля́ющаго мно́гими грѣхи́, стра́стію нетлѣ́нныя пло́ти Его́, нетлѣ́нная еди́на, Всенепоро́чная.

Свѣти́ленъ. Подо́бенъ: Не́бо звѣзда́ми.

Самуи́лъ пѣ́тъ бу́ди, пре́жде зача́тія да́нный да́ръ Бо́гу Вы́шнему, отъ ма́тере всеблагосла́вныя, и цари́ помазу́яй се́й, я́ко іере́й и проро́къ.

Сла́ва, и ны́нѣ, пра́здника:

Апо́столи отъ коне́цъ совоку́пльшеся здѣ́, въ Геѳсиманíйстѣй ве́си погреби́те тѣ́ло Мое́, и Ты́, Сы́не и Бо́же Мо́й, пріими́ ду́хъ Мо́й.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

О, па́че есте́ственныхъ,* Чи́стая, Твои́хъ та́инствъ:* Бо́жія бо Ма́ти,* къ Сему́, Богоро́дице, свѣ́тло* ны́нѣ прешла́ еси́.

Сти́хъ: Воскресни́, Го́споди, въ поко́й Тво́й, Ты́ и Киво́тъ святы́ни Твоея́.

Лѣ́стница къ небеси́* гро́бъ Пречи́стыя* Богоро́дицы е́сть,* возводя́ пою́щія* боже́ственное Сея́ успе́ніе.

Сти́хъ: Кля́тся Госпо́дь Дави́ду и́стиною и не отве́ржется ея́.

Егда́ ко изъ Тебе́* Рожде́нному преста́вилася еси́,* снидо́шася на о́блацѣхъ,* тѣ́ло Твое́ погребсти́,* Дѣ́во, апо́столи.

Сла́ва, и ны́нѣ, гла́съ и подо́бенъ то́йже:

Вси́ земноро́дніи,* стеце́мся усе́рдно* со безпло́тными* погребсти́ Ро́ждшую* Творца́ тва́ри.


НА ЛИТУРГІИ,
Блаже́нна пра́здника, пѣ́снь 6-я, обою́ кано́новъ со ирмосо́мъ на 6.

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 195 об. – 202.

/ Къ оглавленію раздѣла /


Наверхъ / Къ титульной страницѣ

0