Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 19-й де́нь.
Слу́жба преподо́бному отцу́ на́шему Генна́дію, Костромско́му и Любимогра́дскому, чудотво́рцу.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 1. Подо́бенъ: Всехва́льніи му́ченицы.

Уподо́бился еси́ купцу́, и́щущему би́сера многоцѣ́ннаго, оста́вль бо кро́въ о́тчій и вмѣня́я вся́ тщету́ бы́ти, да Христа́ пріобря́щеши, Тому́ послѣ́довалъ еси́, Его́ ра́ди стра́сти и озлобле́нія претерпѣ́лъ еси́, съ Ни́мже и прославля́ешися дне́сь, о́тче богому́дре.

Пріи́мъ вся́ ору́жія Бо́жія, препоя́савъ чре́сла твои́ и́стиною, обо́лкся въ броня́ пра́вды и обу́въ но́зѣ въ угото́ваніе благовѣствова́нія ми́ра, надъ всѣ́ми же воспріи́мъ щи́тъ вѣ́ры, возмо́глъ еси́ вся́ стрѣ́лы лука́ваго разжже́нныя угаси́ти. Сего́ ра́ди сла́вяще Го́спода, и мы́, грѣ́шніи, мо́лимся, изба́витися на́мъ моли́твами твои́ми, о́тче преподо́бне, отъ ко́зней вра́жіихъ, отъ всѣ́хъ зо́лъ и напа́стей.

Сла́ва, гла́съ 6:

Пріиди́те, вѣ́рніи, возвесели́мся дне́сь, я́ко въ наро́читомъ дни́ пра́здника, и, ликовству́юще, возопіе́мъ: ра́дуйся, Генна́діе, вѣ́ры благочести́выя пра́вило; ра́дуйся, о́бразе кро́тости духо́вныя; ра́дуйся, свѣти́льниче Пресвяты́я Тро́ицы, Ейже предстоя́ со а́нгелы, моли́ся, уго́дниче Бо́жій, да благода́ть и ми́ръ пода́стъ душа́мъ на́шимъ.

И ны́нѣ, богоро́диченъ:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Подвиза́яся до́брымъ по́двигомъ вѣ́ры, но́щь же и де́нь въ терпѣ́ніи и моли́твѣ пребыва́я, преподо́бне Генна́діе, тече́ніе твое́, я́ко до́бръ во́инъ, сконча́въ, обѣтова́нія вѣ́чнаго наслѣ́дія прія́лъ еси́.

Сти́хъ: Честна́ предъ Го́сподемъ [сме́рть преподо́бныхъ Его́].

Отложи́въ ве́тхаго человѣ́ка съ дѣя́ньми его́, обновля́яся же вы́ну ду́хомъ ума́ твоего́, обле́клся еси́, о́тче всечестны́й, въ но́ваго человѣ́ка, созда́ннаго по Бо́гу, въ пра́вдѣ и въ преподо́біи и́стины.

Сти́хъ: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́].

Блажи́мъ тя́, благоугоди́вшаго предъ Го́сподемъ, блажи́мъ сохра́ншаго отъ ю́ности чистоту́ душе́вную и тѣле́сную, досто́йно е́сть при́сно ублажа́ти тя́, преподо́бне Генна́діе.

Сла́ва, гла́съ 8:

Чту́ще тя́, преподо́бне, сла́вимъ Отца́, Сы́на и Свята́го Ду́ха Бо́га, Его́же ра́ди вся́ претерпѣ́лъ еси́, Его́же мы́шцею си́лы мно́ги соверши́лъ еси́: пусты́ня бо Любимогра́дская озари́ся свѣ́томъ дѣ́лъ твои́хъ, человѣ́цы возвесели́шася, я́ко а́нгела во пло́ти, ви́дѣвше тя́, оби́тель же твоя́ пребы́сть, я́ко дре́во, насажде́нное при вода́хъ, и, я́ко кри́нъ, процвѣте́. Сего́ ра́ди вопіе́мъ: хва́льна и просла́вленна па́мять твоя́, уго́дниче Бо́жій, Генна́діе.

И ны́нѣ, богоро́диченъ:

Влады́чице, пріими́ [моли́твы ра́бъ Твои́хъ и изба́ви на́съ отъ вся́кія ну́жды и печа́ли].

По Ны́нѣ отпуща́еши: Тропа́рь преподо́бному, гла́съ 4:

Яко пустыннолюби́вая го́рлица, отъ су́етнаго и многомяте́жнаго мíра въ пусты́ню удали́вся, чистото́ю и говѣ́ніемъ, моли́твами и тружде́ніемъ просла́вилъ еси́ Бо́га въ душѣ́ и тѣлеси́ свое́мъ. И та́ко благоче́стно пожи́въ, яви́лся еси́, преподо́бне Генна́діе, пусты́ни Любимогра́дскія украше́ніе, и́нокомъ честна́го житія́ о́бразъ и те́плый моли́твенникъ за всѣ́хъ, притека́ющихъ къ ра́цѣ твое́й съ вѣ́рою.

[Сла́ва, и ны́нѣ, богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.]


НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры, гла́съ 8. Подо́бенъ: О, пресла́внаго чудесе́!

Измла́да умудре́нъ бы́въ боже́ственнымъ Писа́ніемъ, возмога́я же во благода́ти, я́же о Христѣ́ Іису́сѣ, Го́сподѣ на́шемъ, потща́лся еси́, преподо́бне Генна́діе, подвиза́тися по́двигомъ до́брымъ, себе́ иску́сна поста́вити предъ Бо́гомъ, дѣ́лателя непосты́дна, ду́хомъ горя́ща, Го́сподеви рабо́тающа. Тѣ́мже и бы́лъ еси́ о́бразъ вѣ́рнымъ, сло́вомъ и житіе́мъ, любо́вію, вѣ́рою и чистото́ю. Ны́нѣ же водворя́яся въ селе́ніихъ небе́сныхъ и та́мо съ ли́ки безпло́тныхъ си́лъ прославля́я Тріѵпоста́снаго Бо́га, моли́, преподо́бне, о рабѣ́хъ, чту́щихъ всехва́льную па́мять твою́. [Два́жды.]

Возгрѣва́я да́ръ Бо́жій, живу́щій въ тебѣ́, о́тче всечестны́й, отрева́я же вся́ку жите́йскую суету́, очи́стивъ себе́ отъ вся́кія скве́рны пло́ти и ду́ха, содѣ́лался еси́ сосу́дъ въ че́сть, освяще́нъ и благопотре́бенъ Влады́цѣ, на вся́ко дѣ́ло благо́е угото́ванъ. Тѣ́мже угото́вася ти́ неувяда́емый вѣне́цъ Боже́ственныя сла́вы, его́же сподо́би, Го́споди, и на́съ, грѣ́шныхъ, моли́твъ ра́ди уго́дника Твоего́. [Два́жды.]

Тала́нты пріи́мъ отъ руки́ Госпо́дни, потща́вся до́брѣ, и другíя пріобрѣ́лъ еси́ и́ми, да благоуго́дная сотвори́ши Го́сподеви. Сего́ ра́ди и услы́шалъ еси́ отъ Него́ сладча́йшій гла́съ: до́брый ра́бе, благíй и вѣ́рный, вни́ди въ ра́дость Го́спода твоего́. [Два́жды.]

Якоже иногда́ му́дрыя дѣ́вы, пріе́мше еле́й въ сосу́дѣхъ со свѣти́льники свои́ми, изыдо́ша въ срѣ́теніе жениху́, изше́лъ еси́, о́тче преподо́бный, въ пусты́ню Любимогра́дскую, нося́ въ чи́стомъ се́рдцѣ свое́мъ, я́ко въ сосу́дѣ, благопрія́тномъ Влады́цѣ, свѣти́льникъ вѣ́ры, еле́й же любви́ боже́ственныя, и Спа́са Го́спода взыску́я, Его́же и обрѣ́лъ еси́, и въ черто́гъ Его́ вше́лъ еси́. Тѣ́мже вопіе́мъ ти́: блаже́нъ еси́, Генна́діе, зва́нный на ве́черю бра́ка Агнча. [Два́жды.]

Сла́ва, гла́съ 6:

Пріиди́те, вѣ́рніи, возвесели́мся дне́сь, [я́ко въ наро́читомъ дни́ пра́здника, и, ликовству́юще, возопіе́мъ: ра́дуйся, Генна́діе, вѣ́ры благочести́выя пра́вило; ра́дуйся, о́бразе кро́тости духо́вныя; ра́дуйся, свѣти́льниче Пресвяты́я Тро́ицы, Ейже предстоя́ со а́нгелы, моли́ся, уго́дниче Бо́жій, да благода́ть и ми́ръ пода́стъ душа́мъ на́шимъ].

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́. Та́же, чте́нія три́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть и живы́й посредѣ́ грѣ́шникъ преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая, и паре́ніе по́хоти премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше, и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры самогла́сны, гла́съ 2:

Избра́нниче Бо́жій, отъ ю́ности твоея́ испо́лненъ сы́й ду́ха ра́зума и благоче́стія, ду́ха стра́ха Госпо́дня, презрѣ́лъ еси́ вся́ су́етная и тлѣ́нная, въ пусты́ни же водворя́яся, я́ко а́нгелъ во пло́ти, бы́лъ еси́, Генна́діе блаже́нне. Тѣ́мже, къ ра́цѣ твое́й вѣ́рою притека́юще, мо́лимся: моли́ Христа́ Бо́га спасти́ся душа́мъ на́шимъ.

Отбѣ́гъ, я́же въ мíрѣ, похо́тныя тли́, Христу́ послѣ́довалъ еси́, сокро́виществуя основа́ніе себѣ́ добро́ въ бу́дущее, да пріи́меши вѣ́чную жи́знь. Сего́ ра́ди отъ ю́ности твоея́, о́тче преподо́бный, со стра́хомъ и тре́петомъ спасе́ніе свое́ содѣ́лывая, бы́лъ еси́ непоро́ченъ посредѣ́ ро́да стропти́ваго и развраще́ннаго и яви́лся еси́ му́дръ наста́вникъ ста́ду твоему́. Тѣ́мже и па́мять твою́ пѣ́сньми духо́вными благолѣ́пно восхваля́емъ.

Сла́ва, гла́съ 6:

Влады́чнему богому́дренно внима́я гла́су: а́ще кто́ хо́щетъ по Мнѣ́ ити́, да отве́ржется себе́, и во́зметъ кре́стъ сво́й, и по Мнѣ́ гряде́тъ, — вои́стинну, о́тче Генна́діе, себе́ измла́да отве́рглся еси́ и, взе́мъ кре́стъ сво́й, Христу́ послѣ́довалъ еси́, вся́ терпя́ Его́ ра́ди. Тѣ́мже еще́ сы́й во пло́ти, чудодѣ́йственныя благода́ти бы́лъ еси́ прича́стникъ. По блаже́нномъ же успе́ніи твое́мъ, наслѣ́дствуя вѣ́чную жи́знь и съ ли́ки святы́хъ водворя́яся, мо́лиши, преподо́бне, Всесвяту́ю Тро́ицу о чту́щихъ па́мять твою́.

И ны́нѣ, богоро́диченъ:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Пусты́ню облагоуха́вый добродѣ́тельми твои́ми, благоуха́еши дне́сь, преподо́бне, источа́я исцѣле́нія притека́ющимъ съ вѣ́рою къ честны́мъ моще́мъ твои́мъ. Къ ни́мже и мы́ благоговѣ́йно припа́даемъ, моля́ще дарова́ти на́мъ исцѣле́ніе душе́вное, вку́пѣ и тѣле́сное.

Сти́хъ: Честна́ предъ Го́сподемъ сме́рть преподо́бныхъ Его́.

Страсте́й бу́рю укроти́вый и де́монскія по́лчища низложи́вый, ны́нѣ съ ли́ки святы́хъ водворя́яся, мо́лиши е́же изба́витися мíрови отъ лю́тыхъ обстоя́ній.

Сти́хъ: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́].

Совле́кся ве́тхаго человѣ́ка съ дѣя́ньми его́ и обле́кся въ но́ваго, обновля́емаго въ ра́зумъ по о́бразу Созда́вшаго его́, не лиши́лся еси́ ни во еди́номъ дарова́ніи. Иму́щи у́бо дерзнове́ніе е́же хода́тайствовати за ны́, моли́ся ко Го́споду, да, оправди́вшеся благода́тію Его́, наслѣ́дницы бу́демъ жи́зни вѣ́чныя.

Сла́ва, гла́съ 6:

Пріиди́те, вѣ́рніи, духо́вно возвесели́мся дне́сь, я́ко въ наро́читомъ дни́ пра́здника, и, ликовству́юще, возопіе́мъ: ра́дуйся, Генна́діе, вѣ́ры благочести́выя пра́вило; ра́дуйся, о́бразе кро́тости духо́вныя; ра́дуйся, свѣти́льниче Боже́ственныя Тро́ицы, Ейже предстоя́ со а́нгелы, моли́ся, уго́дниче Бо́жій, да благода́ть и ми́ръ пода́стъ душа́мъ на́шимъ.

И ны́нѣ, богоро́диченъ, гла́съ 2:

Благоутро́бія су́щи исто́чникъ, ми́лости сподо́би на́съ, Богоро́дице, при́зри на лю́ди согрѣши́вшія, яви́, я́ко при́сно, си́лу Твою́, на Тя́ бо упова́юще, ра́дуйся, вопіе́мъ Ти́, я́коже иногда́ Гавріи́лъ, безпло́тныхъ Архистрати́гъ.

На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 3:

Въ зако́нѣ Госпо́днемъ поуча́яся де́нь и но́щь и свидѣ́нія Его́ испыту́я, не да́лъ еси́, о́тче, сна́ очи́ма твои́ма, ни вѣ́ждома твои́ма дрема́нія, до́ндеже въ се́рдцѣ свое́мъ обрѣ́лъ еси́ мѣ́сто Го́сподеви, селе́ніе Бо́гу Іа́ковлю. Сего́ ра́ди, я́ко хра́мъ духо́венъ, благода́тію Бо́жіею пріосѣне́нный, до́брое приста́нище еси́, и неоску́дный отъ честны́хъ моще́й твои́хъ источа́еши вѣ́рнымъ исто́чникъ исцѣле́ній. [Два́жды.]

Сла́ва, и ны́нѣ, богоро́диченъ:

Пречи́стая и Преблагослове́нная Дѣ́во, боже́ственнымъ Рождество́мъ Твои́мъ истлѣ́вшее страстьми́ земноро́дныхъ естество́ обнови́ся и, свобо́ждся отъ сме́рти и а́довыхъ у́зъ, приведе́ся къ наслѣ́дію жи́зни вѣ́чныя. Тѣ́мже Тя́ вси́ ро́ди досто́йно ублажа́ютъ.

По 2-мъ стихосло́віи сѣда́ленъ, гла́съ 6:

Облече́нный въ ви́ссонъ чистоты́ и пра́вды, благоуха́я мѵ́рами добродѣ́телей, и ни во еди́номъ отъ благода́тныхъ дарова́ній лиша́яся, всечестны́й Генна́діе, вѣ́мы, я́ко съ ли́ки пра́ведныхъ и съ со́нмы безпло́тныхъ си́лъ предстои́ши предъ престо́ломъ Бо́жіимъ, сла́вя вы́ну Царя́ Сла́вы, Го́спода Вседержи́теля, и моля́ся прилѣ́жно, да и мы́, многогрѣ́шніи и неключи́міи раби́, оправди́вшеся благода́тію Его́, наслѣ́дницы бу́демъ жи́зни вѣ́чныя. [Два́жды.]

Сла́ва, и ны́нѣ, богоро́диченъ:

Непостижи́мому и неизрече́нному, ку́пно же сла́вному и ужа́сному та́инству вочеловѣ́ченія Бо́га Сло́ва дивя́щеся, въ преклоне́ніи ду́шъ и серде́цъ на́шихъ предъ Тобо́ю, Дѣ́во Пречи́стая, ликовству́я, взыва́емъ: ра́дуйся, Благода́тная, Госпо́дь съ Тобо́ю.

По Хвали́те и́мя Госпо́дне...

Велича́ніе: Ублажа́емъ тя́, преподо́бне о́тче Генна́діе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода...

По поліеле́и сѣда́ленъ, гла́съ 1:

Ско́рбь и тѣсноту́, поноше́нія и озлобле́нія Ца́рствія ра́ди небе́снаго и за и́мя иску́пльшаго на́съ и преда́вшаго Себе́ за ны́, Го́спода на́шего Іису́са Христа́, претерпѣ́лъ еси́, о́тче преподо́бне, и не изнемо́глъ еси́. Сего́ ра́ди блаже́нъ еси́, соблю́дшій за́повѣди и Бо́гови вѣ́рный да́же до сме́рти, неувяда́емый бо сла́вы вѣне́цъ угото́вася ти́. Его́же, Царю́ и Го́споди, не лиши́ и на́съ, грѣ́шныхъ, моли́твъ ра́ди уго́дника Твоего́, Генна́дія. [Два́жды.]

Сла́ва, и ны́нѣ, богоро́диченъ:

Яко къ неруши́мѣй стѣнѣ́ и ти́хому приста́нищу, къ покро́ву Твоему́, Преблагослове́нная Богоро́дице, притека́юще, вла́еміи волна́ми жите́йскихъ попече́ній, вопіе́мъ: Влады́чице, покры́й, соблюди́ и спаси́ на Тя́ упова́ющія.

Степе́нна, 1-й антифо́нъ 4-го гла́са. Проки́менъ, [гласъ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Пріи́мъ вся́ ору́жія Бо́жія, препоя́савъ чре́сла твои́ и́стиною, обо́лкся въ броня́ пра́вды и обу́въ но́зѣ во угото́ваніе благовѣствова́нія ми́ра, надъ всѣ́ми же воспріи́мъ щи́тъ вѣ́ры, возмо́глъ еси́ вся́ стрѣ́лы лука́ваго разжже́нныя угаси́ти. Сего́ ра́ди, сла́вяще Го́спода, и мы́, грѣ́шніи, мо́лимся, изба́витися на́мъ моли́твами твои́ми, всечестны́й Генна́діе, отъ ко́зней вра́жіихъ, отъ всѣ́хъ зо́лъ и напа́стей.

Кано́нъ Пресвятѣ́й Богоро́дицѣ на 6 и преподо́бному Генна́дію [на 8], гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Вся́кое пло́ти умертви́въ мудрова́ніе, съ ли́ки безпло́тныхъ водворя́ешися въ небе́сныхъ черто́зѣхъ, преподо́бне Генна́діе.

Озаре́нный свѣ́томъ невече́рнимъ и Влады́цѣ всѣ́хъ предстоя́, моли́, о́тче, изба́витися на́мъ отъ тмы́ грѣхо́вныя.

Мѵ́ромъ добродѣ́телей облагоуха́нныя святы́я мо́щи твои́, преподо́бне, блаже́ннымъ безсме́ртіемъ благоуха́я, источа́ютъ вѣ́рнымъ исцѣле́ніе.

Богоро́диченъ: Лю́тыя пло́ти моея́ стра́сти утоли́, Пресвята́я Дѣ́во, и заблу́ждшаго мя́ къ ти́хому приста́нищу напра́ви.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

По́хоть пло́ти, по́хоть оче́съ и го́рдость жите́йскую отри́нувъ, яви́лся еси́, Генна́діе, сосу́дъ че́стенъ, Влады́цѣ благопотре́бенъ.

Вери́гами желѣ́зными, посто́мъ и бдѣ́ніемъ отягчи́лъ еси́, о́тче, бре́нную, вку́пѣ же и многомяте́жную пло́ть, да ду́шу свободи́ши отъ лю́тости страсте́й.

Язвы Го́спода на тѣ́лѣ свое́мъ носи́въ и стопа́мъ Его́ послѣ́довавъ, воше́лъ еси́ и въ ра́дость Его́, я́ко благíй и вѣ́рный ра́бъ.

Богоро́диченъ: Пресла́вная Ма́ти Дѣ́во Богоро́дице, во утро́бѣ имѣ́въ Превѣ́чнаго Бо́га, вознеси́ къ Нему́ моли́твы на́ша, я́ко Блага́я Хода́таица.

Сѣда́ленъ, гла́съ 8:

Уподо́бился еси́ купцу́, и́щущему би́сера многоцѣ́ннаго, оста́вль бо кро́въ о́тчій и вмѣня́я вся́ тщету́ бы́ти, да Христа́ пріобря́щеши, Тому́ послѣ́довалъ еси́, Его́ ра́ди стра́сти и озлобле́нія претерпѣ́лъ еси́, съ Ни́мже и прославля́ешися дне́сь, о́тче богому́дре. [Два́жды.]

Сла́ва, и ны́нѣ, богоро́диченъ:

Мно́гими скорбьми́ и напа́стьми отъ вра́гъ ви́димыхъ и неви́димыхъ вы́ну обдержи́ми су́ще, къ Тебѣ́, Ма́ти Бо́жія, притека́юще, мо́лимся: не отри́ни на́съ, на Тя́ упова́ющихъ.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Очи́стивъ себе́ отъ вся́кія скве́рны пло́ти и ду́ха, хра́мъ Бо́жій бы́лъ еси́ на земли́, по успе́ніи же твое́мъ во хра́мѣ невече́рнія сла́вы предстои́ши Го́споду.

На вся́къ де́нь и ча́съ моля́ся, тружда́яся и при́сно рабо́тая Го́споду, пребы́лъ еси́ непоколеби́мъ, я́ко утвержде́нный на ка́мени за́повѣдей Госпо́днихъ.

Сла́вимъ Отца́, Сы́на и Свята́го Ду́ха — Бо́га, да́рующаго благода́ть святы́мъ Свои́мъ и тѣ́хъ моли́твами избавля́ющаго на́съ отъ лю́тыхъ обстоя́ній.

Богоро́диченъ: Влады́чице, пріими́ моли́твы на Тя́ надѣ́ющихся: Твои́ бо есмы́ рабы́, да не постыди́мся.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Отъ ю́га въ сѣ́верныя страны́ прите́клъ еси́, преподо́бне, горя́ любо́вію Боже́ственною, ея́же пла́менемъ навѣ́ты вра́жія, я́ко бы́ліе травно́е, сожго́шася.

Гра́де Могиле́ве, ра́дуйся! Ты́ бо произрасти́лъ еси́ благода́тный кла́съ, и́мже процвѣте́ пусты́ня Любимогра́дская и сла́вою его́ возвели́чися.

Вѣ́рніи, пріиди́те, ублажи́мъ преподо́бнаго отца́ на́шего Генна́дія, прозорли́вецъ бо и чудотво́рецъ въ житіи́ бы́въ, по сме́рти источа́етъ исцѣле́нія отъ святы́хъ моще́й свои́хъ.

Богоро́диченъ: Богода́нный души́ моея́ свѣти́льникъ угаси́хъ и свѣ́та стезе́й Госпо́днихъ не увѣ́дѣхъ, оба́че, Ма́ти Свѣ́та! изъ мра́ка грѣхо́внаго вопію́: озари́ мя́, омраче́ннаго, и заблу́ждшаго напра́ви ко приста́нищу спасе́нія.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Езеро Су́рское! во́ды твои́ да воспле́щутъ дне́сь, я́ко въ имени́тый де́нь пра́здника, со струя́ми бо твои́ми слія́стася умиле́нныя сле́зы, и́миже пла́кася преподо́бный Генна́дій, призыва́я благослове́ніе держа́вѣ Россíйстѣй и сыново́мъ ея́.

Кладенцы́, иско́панніи преподо́бнымъ, и́нѣ вся́ ру́къ его́ тружде́нія, да науча́тъ на́съ, ка́ко подоба́етъ умерщвля́ти пло́ть, рабо́тая при́сно Го́сподеви.

Язвы Го́спода Іису́са и Кре́стъ Его́, я́ко вѣне́цъ зла́тъ, съ ра́достію пріи́мъ, услы́шалъ еси́, преподо́бне, вожделѣ́нный гла́съ: до́брый ра́бе, благíй и вѣ́рный, вни́ди въ ра́дость Го́спода твоего́!

Богоро́диченъ: Богода́нный души́ моея́ свѣти́льникъ угаси́хъ, и тма́ обы́де мя́, окая́ннаго, оба́че къ Тебѣ́ зову́, Ма́ти Свѣ́та: озари́ ду́шу мою́ омраче́нную и спаси́ мя.

Конда́къ, гла́съ 3:

Моли́твою и посто́мъ, тружде́ніемъ и терпѣ́ніемъ умертви́вый вся́кое пло́ти мудрова́ніе, чистоты́ сосу́дъ благолѣ́пенъ, Боже́ственныхъ даро́въ и чуде́съ прича́стникъ, и́нокомъ же до́блій наста́вникъ бы́лъ еси́, сподвиза́яся блаже́нному Корни́лію, о́тче богому́дре. Сего́ ра́ди вопіе́мъ: моли́ся ко Го́споду, да моли́твами твои́ми да́руетъ ми́ръ и спасе́ніе душа́мъ на́шимъ.

Икосъ:

Свѣти́льникъ нога́ма твои́ма положи́вый зако́нъ Госпо́день и свѣ́тъ стезя́мъ твои́мъ, се́рдце же утверди́вый на ка́мени вѣ́ры, въ не́йже стоя́ и хваля́ся упова́ніемъ сла́вы Бо́жія, избѣ́глъ еси́ жите́йскія тли́, преподо́бне, и, ко свѣ́ту Ца́рствія Бо́жія упра́вленъ сы́й, призира́еши на ны́, моля́ся ко Го́споду, да обря́щемся сына́ми Свѣ́та и Ца́рствіе Его́ наслѣ́дити сподо́бимся.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Отче Генна́діе, съ дру́гомъ твои́мъ Ѳео́доромъ прише́лъ еси́ къ преподо́бному Алекса́ндру, и́же до́блестно на Сви́рѣ рѣцѣ́ подвиза́ся, и того́ житію́ поревнова́лъ еси́.

Сѣмена́ слове́съ прему́дрости Бо́жія прія́въ въ се́рдце свое́ отъ преподо́бнаго Корни́лія, возрасти́лъ еси́ я́, о́тче Генна́діе, въ дре́во благосѣнноли́ственное, я́ко пріити́ къ тебѣ́ со́нму и́ноковъ и вита́ти, благоговѣ́нствуя, подъ сѣ́нію благода́ти, я́же въ тебѣ́.

Ликовству́я дне́сь, принесе́мъ, вѣ́рніи, хвалу́ и благодаре́ніе Бо́гови, нетлѣ́ніемъ просла́вившему уго́дника Своего́ и дарова́вшему ему́ благода́ть исцѣле́ній.

Богоро́диченъ: Вы́шняго освяще́нное Боже́ственное селе́ніе, ра́дуйся, Тобо́ю бо даде́ся ра́дость, Богоро́дице, зову́щимъ: Благослове́на Ты́ въ жена́хъ еси́, Всенепоро́чная Влады́чице.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Царя́ Небе́снаго вѣ́рный ра́бе! Тому́ пора́боталъ еси́, подвиза́яся по́двигомъ до́брымъ, Того́ ра́ди вся́ претерпѣ́лъ еси́, да наслѣ́диши обѣтова́нія жи́зни вѣ́чныя.

Моли́ся и о на́съ, преподо́бне, да благоче́стно пожи́вше и Бо́гови благоугоди́вше, прича́стницы бу́демъ жи́зни вѣ́чныя.

Не человѣ́ческую, а Бо́жію возлюби́лъ еси́ сла́ву, о́тче Генна́діе, сего́ ра́ди Бо́гъ тя́ просла́ви, да́руя тобо́ю по́мощь и спасе́ніе притека́ющимъ къ тебѣ́ съ вѣ́рою.

Богоро́диченъ: Досто́йно е́сть блажи́ти Тя́, Богоро́дице: Благослове́нна Ты́ въ жена́хъ и благослове́нъ Пло́дъ чре́ва Твоего́.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Воспомина́юще подви́жничество твое́, преподо́бне Генна́діе, честно́е успе́ніе твое́ и зна́менія, я́же содѣ́я Госпо́дь руко́ю твое́ю, со умиле́ніемъ глаго́лемъ: вои́стинну ди́венъ Бо́гъ во святы́хъ Свои́хъ.

Да весели́тся пусты́ня Любимогра́дская, во́ды Су́рскія да воспле́щутъ: та́мо бо просія́ ди́вный уго́дникъ Бо́жій.

Сла́вна и всехва́льна па́мять твоя́, о́тче Генна́діе, сла́вою бо, я́же отъ Отца́, Сы́на и Свята́го Ду́ха, просла́вленъ еси́.

Богоро́диченъ: Ма́ти Бо́жія! ника́коже по достоя́нію мо́жемъ восхвали́ти Тя́. Оба́че Блага́я су́щи, пріими́ моли́тву рабо́въ Твои́хъ и принеси́ Сы́ну Твоему́ и Бо́гу на́шему, да спасе́тъ ду́ши на́ша.

Свѣти́ленъ:

Яко заря́ у́тренняя и я́ко луна́ полна́ во днѣ́хъ свои́хъ, бы́лъ еси́, преподо́бне, въ житіи́ се́мъ, горя́ ре́вностію, я́же по Бо́зѣ, богатѣ́я святы́ми дѣ́лы и словесы́ благи́ми. Тѣ́мже мо́лимся: не забу́ди чту́щихъ святу́ю па́мять твою́ и моли́ся ко Го́споду спасти́ и просвѣти́ти ду́ши на́ша. [Два́жды.]

Сла́ва, и ны́нѣ, богоро́диченъ:

Дивя́щеся непостижи́мому та́инству вочеловѣ́ченія Бо́га Сло́ва, Тя́, Богоро́дицу, немо́лчно велича́емъ, я́ко Сла́внѣйшую во́инствъ небе́сныхъ и при́сную Хода́таицу ро́да христіа́нскаго.

На хвали́техъ стихи́ры на 4, гла́съ 8, самогла́сны:

Благолѣ́пно просія́ свяще́нная па́мять твоя́, преподо́бне, луча́ми бо добродѣ́телей, свѣ́томъ же чуде́съ твои́хъ озаря́еши сердца́ вѣ́рныхъ, сію́ у́бо пра́зднующе съ ра́достію, ублажа́емъ тя́, принося́ пѣ́снь хвалы́ и благодаре́нія Го́споду. [Два́жды.]

Въ зако́нѣ Госпо́днемъ поуча́яся де́нь и но́щь и свидѣ́нія Его́ испыту́я, не да́лъ еси́, о́тче, сна́ очи́ма твои́ма, ни вѣ́ждома твои́ма дрема́нія, до́ндеже въ се́рдцѣ свое́мъ обрѣ́лъ еси́ мѣ́сто Го́сподеви, селе́ніе Бо́гу Іа́ковлю. Сего́ ра́ди, я́ко хра́мъ духо́венъ, благода́тію Бо́жіею пріосѣне́нный, до́брое приста́нище еси́, и неоску́дный отъ честны́хъ моще́й твои́хъ источа́еши вѣ́рнымъ исто́чникъ исцѣле́ній. [Два́жды.]

Сла́ва, гла́съ то́йже:

Чту́ще тя́, преподо́бне, сла́вимъ Отца́, Сы́на и Свята́го Ду́ха Бо́га, Его́же ра́ди вся́ претерпѣ́лъ еси́, Его́же мы́шцею си́лы мно́ги соверши́лъ еси́: пусты́ня бо Любимогра́дская озари́ся свѣ́томъ дѣ́лъ твои́хъ, человѣ́цы возвесели́шася, я́ко а́нгела во пло́ти, ви́дѣвше тя́, оби́тель же твоя́ пребы́сть, я́ко дре́во, насажде́нное при вода́хъ, и, я́ко кри́нъ, процвѣте́. Сего́ ра́ди вопіе́мъ: хва́льна и просла́вленна па́мять твоя́, уго́дниче Бо́жій, Генна́діе.

И ны́нѣ, богоро́диченъ:

Влады́чице, пріими́ [моли́твы ра́бъ Твои́хъ и изба́ви на́съ отъ вся́кія ну́жды и печа́ли].

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна свята́го отъ кано́на, пѣ́снь 3 и 6. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, [гла́съ 6]: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́]. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Слу́жба и ака́ѳистъ преподо́бному отцу́ на́шему Генна́дію, Костромско́му и Любимогра́дскому чудотво́рцу. Съ присовокупле́ніемъ сказа́нія о житіи́ его́ и чудеса́хъ. — М.: Въ Сѵнода́льной Тѵпогра́фіи, 1888. — С. 1-46.

/ Къ оглавленію раздѣла /


Наверхъ / Къ титульной страницѣ

0