Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 19-й де́нь.
Свята́го му́ченика Андре́я Стратила́та и съ ни́мъ дву́ ты́сящь пяти́ со́тъ девяти́десяти тре́хъ.

[ВЕЧЕРЪ,]
На Го́споди воззва́хъ: стихи́ры пра́здника, гла́съ 4. Подо́бенъ: Яко до́бля.

Ковче́гъ свяще́нія* въ Тя́ все́льшагося,* Богоро́дице Чи́стая, бы́вши,* къ нестарѣ́емому поко́ю* отъ земли́ преставля́ешися,* тѣ́мъ и Того́ осія́ема свѣ́тлостію.* Тѣ́мже свы́ше назира́еши* любо́вію Тя́ пою́щія* и боже́ственная вели́чія Твои́хъ чуде́съ проповѣ́дающія.

Яко черто́гъ многосвѣ́телъ,* Сы́нъ Тво́й и Госпо́дь,* въ жили́ща пріе́мъ Тя́, Пречи́стая,* я́ко ковче́гъ свяще́нія,* Тебе́ показа́ безпло́тнымъ во́инствомъ* и святы́хъ селе́ніемъ,* сла́вою неизглаго́ланною* отъ тли́ и бѣ́дъ избавля́ющую* любо́вію воспѣва́ющія* вели́чія Твоя́, Чи́стая.

Ины стихи́ры свята́го, гла́съ 1. Подо́бенъ: Всехва́льніи му́ченицы.

Му́жества о́бразъ я́влься,* на со́нмищи дерзну́лъ еси́* пода́ти себе́* суди́щу страда́нія,* я́коже воево́да, сему́ предъиды́й,* Андре́е страстоте́рпче пребога́те,* вѣ́рнымъ же всегда́ исцѣле́ній* то́чиши во́ды,* съ небе́съ благода́ть пріе́мъ.

Му́жества тезоимени́тъ я́влься,* му́жески хра́бровавъ,* со враго́мъ спле́тся,* и сего́ погуби́лъ еси́,* я́ко ино́го фарао́на,* струя́ми крове́й твои́хъ* погрузи́въ все́ во́инство, досточу́дне.* Тѣ́мже моли́* дарова́ти душа́мъ на́шимъ* ми́ръ и ве́лію ми́лость.

Во́инство многочи́сленное* Бо́гу Да́телю, сла́вне,* благи́хъ приве́лъ еси́, подви́гшееся* и сме́ртію безсме́ртную сла́ву* обрѣ́тшее съ тобо́ю, пресла́вне.* Съ ни́миже моли́* дарова́ти душа́мъ на́шимъ* ми́ръ и ве́лію ми́лость.

Сла́ва, и ны́нѣ, пра́здника, гла́съ 4:

Егда́ изшла́ еси́, Богоро́дице Дѣ́во, ко изъ Тебе́ Ро́ждшемуся неизрече́нно, бя́ше Іа́ковъ, бра́тъ Бо́жій и пе́рвый священнонача́льникъ, Пе́тръ же, честнѣ́йшій верхо́вникъ, богосло́вовъ нача́льникъ, и ве́сь боже́ственный апо́стольскій ли́къ, явле́ннымъ богосло́віемъ пѣсносло́вяще, Боже́ственное и стра́шное Христа́ Бо́га смотре́нія та́инство, и живонача́льное и богопрія́тное Твое́ тѣ́ло погре́бше, ра́довахуся, Всепѣ́тая. Превы́ше же пресвяты́я и старѣ́йшія а́нгельскія си́лы, чудеси́ дивя́щеся, прини́кше дру́гъ ко дру́гу глаго́лаху: возми́те ваша́ врата́, и воспріими́те Ро́ждшую небесе́ и земли́ Творца́, славословле́нми же воспое́мъ честно́е и свято́е тѣ́ло, вмѣсти́вшее на́ми Неви́димаго и Го́спода. Тѣ́мже и мы́, па́мять Твою́ пра́зднующе, вопіе́мъ Ти́, Препѣ́тая: христіа́нскій ро́гъ вознеси́, и спаси́ ду́ши на́ша.

На стихо́внѣ стихи́ры пра́здника, гла́съ 1. Подо́бенъ: Небе́сныхъ чино́въ.

Безсме́ртнымъ успе́ніемъ Бо́жія Ма́тере,* а́нгельскій собо́ръ ра́дуется:* и Сія́ отходя́щи,* во оби́тели вѣ́чныя вселя́ется,* и къ весе́лію небе́сному преходя́щи,* въ Боже́ственную ра́дость и вѣ́чное наслажде́ніе.

Сти́хъ: Воскресни́ Го́споди въ поко́й Тво́й,* Ты́ и Киво́тъ святы́ни Твоея́.

Жи́зни вы́шнія жела́ющи,* сію́ оста́вила eси́ Богороди́тельнице,* Отрокови́це, дѣ́вства цвѣ́те,* Христа́ ро́ждшая, всѣ́хъ Живота́;* благоговѣ́йно предстоя́ше апо́стольскій собо́ръ* честно́му Твоему́ погребе́нію, Богоневѣ́стная.

Сти́хъ: Кля́тся Госпо́дь Дави́ду и́стиною,* и не отве́ржется eя́.

Твои́мъ исхо́днымъ пѣ́ніемъ и надгро́бнымъ,* возду́хъ у́бо освяти́ся,* восхожде́ніемъ Твои́мъ, Ма́ти Бо́га Человѣколю́бца,* чу́до стра́шное, Богоро́дице Неискусому́жная;* тѣ́мже вѣ́рно покланя́емъ Ти ся, вѣ́рніи,* Богоро́дице Неискусобра́чная.

Сла́ва, и ны́нѣ, гла́съ 5:

Пріиди́те, празднолю́бныхъ собо́ръ, пріиди́те, и ли́къ соста́вимъ, пріиди́те, вѣнча́емъ пѣ́сньми Це́рковь, упокое́ніемъ Ковче́га Бо́жія. Дне́сь бо не́бо простира́етъ нѣ́дра, пріе́мля Ро́ждшую всѣ́ми Невмѣсти́маго, и земля́, исто́чникъ жи́зни, отдаю́щи благослове́ніе, украша́ется благолѣ́піемъ. Ангели ли́къ составля́ютъ со апо́столы, ужа́сно взира́юще отъ живота́ въ живо́тъ преставля́ему, Ро́ждшую Нача́льника жи́зни. Вси́ поклони́мся Ей́, моля́щеся: сро́дна присвое́нія не забу́ди, Влады́чице, вѣ́рно пра́зднующихъ всесвято́е Твое́ успе́ніе.

Тропа́рь свята́го, гла́съ 5:

Земна́го са́на сла́ву оста́вивъ, небе́сное Ца́рство наслѣ́довалъ еси́, кро́вными ка́плями, я́ко пречу́днымъ ка́меніемъ, нетлѣ́нныя вѣнцы́ украси́лъ еси́ и ко Христу́ приве́лъ еси́ собо́ръ страстоте́рпецъ. Съ ли́ки а́нгельскими въ невече́рнѣмъ свѣ́тѣ незаходи́маго Со́лнца Христа́ обрѣ́лъ еси́, свя́те Андре́е Стратила́те, Его́же моли́ съ пострада́вшими съ тобо́ю при́сно, да спасе́тъ ду́ши на́ша.

Сла́ва, и ны́нѣ, пра́здника, гла́съ 1:

Въ рождествѣ́ дѣ́вство сохрани́ла eси́, во успе́ніи мíра не оста́вила eси́, Богоро́дице, преста́вилася eси́ къ животу́, Ма́ти су́щи Живота́, и моли́твами Твои́ми избавля́еши отъ сме́рти ду́ши на́ша.


НА УТРЕНИ,
По 1-й стихоло́гіи сѣда́ленъ, гла́съ 3. Подо́бенъ: Красотѣ́ дѣ́вства.

Въ небе́сная мы́сленная Твоя́ душа́, въ ра́й чи́стое Твое́ тѣ́ло преста́вися, отъ тли́, Пренепоро́чная, въ мѣ́сто свѣ́тло, сего́ ра́ди возда́стъ беззако́ннымъ Госпо́дь, ле́сть бо содѣ́лаша честно́му Твоему́ тѣ́лу. Тѣ́мже со апо́столы вопіе́мъ: ра́дуйся, Благода́тная.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Земля́ у́бо благослови́ся погребе́ніемъ Твои́мъ, возду́хъ же освяти́ся восхожде́ніемъ Твои́мъ, Марíе Всепѣ́тая, а́нгели же Тебѣ́ две́ри небе́сныя отверзо́ша, идѣ́же ны́нѣ предстоя́щи, Сы́ну Твоему́ мо́лишися о ми́рѣ мíра, Мати Безневѣ́стная.

Сла́ва, и ны́нѣ, то́йже.

Кано́нъ пра́здника, со ирмосо́мъ на 8. Творе́ніе Іоа́нна Дамаскина́, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ успе́ніе.

Дѣ́вы отрокови́цы, съ Маріамíею проро́чицею, пѣ́снь исхо́дную ны́нѣ воскли́кните: Дѣ́ва бо и еди́на Богома́ти ко прія́тію небе́сному преставля́ется.

Досто́йно, я́ко одушевле́нное Тя́ Не́бо, прія́ша небе́сная, Пречи́стая, Боже́ственная селе́нія, и предста́, свѣ́тло укра́шена, я́ко Невѣ́ста Всенепоро́чная, Царю́ и Бо́гу.

И свята́го на 4, его́же краегране́сіе: Пѣ́сньми пою́ тя́, Андре́е Стратила́те. Творе́ніе Іо́сифово. Гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Пѣ́ти свяще́нное твое́ торжество́ усе́рдствующаго, свѣ́тлыми Ду́ха заря́ми ду́шу мою́ озари́ и мглу́ отжени́ невѣ́дѣнія, му́чениче сла́вне.

Му́ченикъ бога́тно свѣ́тлостьми, блаже́нне, обогати́лся еси́, мужему́дренно си́лою боже́ственною попра́лъ еси́ льсти́ваго и побѣди́тель бы́въ, му́чениче великоимени́те Андре́е.

Умертви́въ я́же на земли́ мудрова́нія, му́чениче многострада́льне, умертви́вшемуся Сло́ву тебе́ ра́ди му́жески послѣ́довалъ еси́ и къ жи́зни неги́бнущей сме́ртію премину́лъ еси́.

Богоро́диченъ: Иже въ пло́ть за премно́гую бла́гость изъ Тебе́, Всенепоро́чная, на спасе́ніе всѣ́мъ человѣ́комъ вои́стинну обле́кся, Бо́гъ вку́пѣ и Человѣ́къ, сугу́бъ естество́мъ познава́ется.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ Боже́ственнѣй па́мяти Твое́й вѣнце́въ сла́вы сподо́би.

Отъ ме́ртвыхъ чре́слъ произве́дшися, естество́мъ подо́бна, Чи́стая, исхожде́ніе разрѣши́, ро́ждши же су́щую Жи́знь, къ жи́зни преста́вися Боже́ственнѣй и Ѵпоста́снѣй.

Ли́къ богосло́вовъ отъ коне́цъ, свы́ше же Ангелъ мно́жества къ Сіо́ну идя́ху, всеси́льнымъ манове́ніемъ, достодо́лжно, Влады́чице, Твоему́ погребе́нію служа́ще.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Вѣ́триломъ Креста́ напа́сти препла́вая пучи́ну, враги́, сла́вне, струя́ми твои́хъ крове́й погрузи́лъ еси́.

Собла́знъ лука́ваго и того́ хи́тростей превы́ше, я́ко побѣди́тель изря́денъ, му́чениче, бы́въ, просла́вился еси́.

Украша́емь благолѣ́пія вѣнце́мъ, му́чениче Христо́въ, всегда́ со избра́нными му́ченики въ ра́дости предстои́ши.

Богоро́диченъ: Избавля́ющаго человѣ́ки отъ мучи́тельства вра́жія, родила́ еси́ всѣ́хъ Го́спода, Влады́чице, Дѣ́во Всенепоро́чная.

Конда́къ свята́го, гла́съ 2:

Въ моли́твахъ Го́сподеви предстоя́, я́коже звѣзда́ со́лнцу предтекíй, и жела́емое сокро́вище Ца́рствія узрѣ́лъ еси́, ра́дости неизрече́нныя исполня́яся. Безсме́ртному Царю́ въ безконе́чныя вѣ́ки, отъ а́нгелъ безпреста́ни хвали́мому, пое́ши, Андре́е Стратила́те. Съ ни́миже моли́ся непреста́нно о всѣ́хъ на́съ.

Сѣда́ленъ, гла́съ 1. Подо́бенъ: Гро́бъ Тво́й.

Му́жествомъ ду́шу укрѣпля́я, му́чениче, потреби́лъ еси́ вра́жіе крѣ́пкое суровство́, и, ра́дуяся, пострада́лъ еси́, и Бо́гу угоди́лъ еси́. Тѣ́мже вси́ пресвяту́ю твою́ па́мять пра́зднуемъ весе́ліемъ се́рдца, Андре́е пребога́те.

Сла́ва, и ны́нѣ, пра́здника, гла́съ то́йже. Подо́бенъ: Ка́мени запеча́тану.

Ли́къ боже́ственныхъ апо́столъ собра́ся погребсти́ Тя прече́стно, Богоро́дице Всечи́стая, съ ни́миже и а́нгельстіи чи́ни воспѣва́ху преставле́ніе Твое́, взыва́юще прехва́льно. Съ ни́миже и мы́, любо́вію игра́юще, Чи́стая, хвалу́ Тебѣ́ прино́симъ, гла́сы пѣ́сненными, вѣ́рніи, и вопіе́мъ: ра́дуйся, Предста́тельнице при́сно чту́щихъ Тя́.

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ, усмотря́я, зовя́ше: сла́ва си́лѣ Твое́й, Го́споди.

Чу́до бя́ше зрѣ́ти, Не́бо всѣ́хъ Царя́ одушевле́нное, испражне́нія преходя́щее земна́я, я́ко чу́дна дѣла́ Твоя́! Сла́ва си́лѣ Твое́й, Го́споди.

Аще и непости́жный Сея́ Пло́дъ, Имже небеса́ бы́ша, погребе́ніе прія́тъ во́лею, я́ко ме́ртвъ; ка́ко погребе́нія отве́ржется, неискусобра́чно Ро́ждшая?

Въ преставле́ніи Твое́мъ, Ма́ти Бо́жія, простра́ннѣйшее тѣ́ло Твое́ и богопрія́тное, Ангельская во́инства свяще́нными кри́лы, тре́петомъ и ра́достію покрыва́ху.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Яко стѣ́ну крѣ́пку, тя́ Це́рковь стяжа́вши, прему́дре, вра́жіими сопроти́вными прило́ги непреклони́ма явля́ется, зову́щи: сла́ва си́лѣ Твое́й, Го́споди.

Боже́ственными уче́ніи укрѣпи́въ му́ченическій по́лкъ, я́коже воево́да, тѣ́лу я́ко растли́тися, сла́вне, хотя́щу пощади́тися ника́коже повину́лъ еси́.

Яко ору́жіемъ, вооружи́вся му́жествомъ, и, я́коже мече́мъ обоюдуо́стрымъ, Андре́е преблаже́нне, Кресто́мъ Честны́мъ враги́ потреби́лъ еси́, я́коже воево́да до́блественнѣйшій.

Тя́, побо́рника вѣ́ры, восхваля́емъ, я́ко страда́льца непобѣди́ма, и небе́сныя свѣ́тлости прича́стника, и исто́чника, источа́юща во́ды чуде́съ тре́бующимъ.

Богоро́диченъ: Восхваля́емъ Тя́, похвало́ му́чениковъ и вѣ́рныхъ спасе́ніе, вси́ человѣ́честіи ро́ди, Пренепоро́чная: Бо́га бо родила́ еси́, пребы́вши Дѣ́ва нетлѣ́нна.

Пѣ́снь 5.

Ирмо́съ: Ужасо́шася вся́ческая о честнѣ́мъ успе́ніи Твое́мъ: Ты́ бо, неискусобра́чная Дѣ́во, отъ земли́ преста́вилася еси́ къ вѣ́чнымъ оби́телемъ, и къ безконе́чнѣй жи́зни, всѣ́мъ, воспѣва́ющимъ Тя́, спасе́ніе подава́ющая.

Да возглася́тъ трубы́ богосло́вовъ дне́сь, язы́къ же многовѣща́нный человѣ́ческій ны́нѣ да восхва́литъ, да огласи́тъ же возду́хъ, безмѣ́рнымъ сія́я свѣ́томъ, Ангели да пою́тъ Пречи́стыя Дѣ́вы успе́ніе.

Сосу́дъ подоба́ше избра́нный, пѣ́ніемъ Ти́ ве́сь удивля́емь, Дѣви́це, исхо́денъ, ве́сь освяще́нъ Бо́гу, всѣ́мъ богопрія́тенъ, и се́й и́стинно явля́емый, Богоро́дице Всепѣ́тая.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Му́жества и́стиннаго бы́въ тезоимени́тъ, отгна́лъ еси́ враги́ твоя́, и до конца́, Андре́е всеблаже́нне, потреби́лъ еси́.

Во́ды вѣ́рнымъ исцѣле́ній всегда́, прехва́льне, источа́еши, спаси́тельною благода́тію обогати́въ духо́вною.

Протече́ во всю́ зе́млю вои́стинну, богодухнове́нне, хвала́ твои́хъ чуде́съ и честна́го муче́нія, сія́ніе Боже́ственныя благода́ти.

Богоро́диченъ: Ору́жія врага́ ны́нѣ до конца́ оскудѣ́ша, ро́ждши Тебѣ́, Богоро́дице, копіе́мъ Уя́звеннаго и мíръ Обно́вльша.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Изъ Тебе́ Жи́знь возсія́, ключи́ дѣ́вства не руши́вши; ка́ко у́бо пречи́стое и живонача́льное Твое́ тѣ́ло искуше́нія сме́рти бы́сть прича́стно?

Жи́зни бы́вши хра́мъ, жи́знь присносу́щную улучи́ла еси́: сме́ртію бо къ животу́ премину́ла еси́, Яже Жи́знь ро́ждши воѵпоста́сную.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Притупи́лъ еси́ лука́ваго жа́ла болѣ́зньми твои́ми и къ неболѣ́зненнѣй сла́вѣ преста́вился еси́, ра́дуяся, му́чениче Андре́е, Стратила́те му́ченическихъ честны́хъ полко́въ.

Кровьми́ ма́лыми измѣни́лъ еси́ свѣ́тлость вѣ́чнующія сла́вы, и ра́дость, никогда́же престаю́щую, и вѣнцы́ небе́сныя, и сія́ніе невече́рнее.

Во́инство многочи́сленное, му́чениче, собра́въ, и лико́мъ а́нгельскимъ приче́лъ еси́, блаже́нне, съ тобо́ю страда́вшее, ра́достно Влады́цѣ всѣ́хъ предстоите́.

Богоро́диченъ: Родила́ еси́ неизглаго́ланно Отцу́ Собезнача́льнаго, уподо́бльшася человѣ́комъ, па́че ума́ и сло́ва, Богороди́тельнице: Его́же моли́ изба́витися отъ бѣ́дъ рабо́мъ Твои́мъ.

Конда́къ пра́здника, гла́съ 2:

Въ моли́твахъ неусыпа́ющую Богоро́дицу и въ предста́тельствахъ непрело́жное упова́ніе, гро́бъ и умерщвле́ніе не удержа́ста: я́коже бо Живота́ Ма́терь, къ животу́ преста́ви, во утро́бу Всели́выйся приснодѣ́вственную.

Икосъ:

Огради́ моя́ помышле́нія, Христе́ мо́й, и́бо Стѣ́ну мíра воспѣ́ти дерза́ю, Чи́стую Ма́терь Твою́, на столпѣ́ глаго́лъ укрѣпи́ мя, и въ тя́жкихъ мы́слехъ заступи́ мя, Ты́ бо взыва́ющимъ и прося́щимъ вѣ́рою моле́нія исполня́еши. Ты́ мнѣ́ у́бо да́руй язы́къ доброрѣ́чивъ и по́мыслъ непосты́денъ: вся́кое бо дая́ніе сія́нія отъ Тебе́ низпосыла́ется, Свѣтопода́телю, во утро́бу всели́выйся приснодѣ́вственную.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Юноши и дѣ́вы, Дѣ́выя же и Богома́тере па́мять чту́ще, ста́рцы и кня́зи, ца́ріе и судіи́, по́йте: оте́цъ на́шихъ Го́споди и Бо́же, благослове́нъ еси́.

Да востру́бятъ трубо́ю духо́вною го́ры небе́сныя, да ра́дуются хо́лми, и да игра́ютъ боже́ственніи апо́столи: Цари́ца къ Сы́ну преставля́ется, съ Ни́мъ ца́рствующи.

Всесвяще́нное преставле́ніе боже́ственныя Твоея́ и нетлѣ́нныя Ма́тере, премíрныя вы́шнихъ си́лъ совокупи́ чи́ны, весели́тися съ су́щими на земли́, Тебѣ́ пою́щими: Бо́же, благослове́нъ еси́.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Струя́ми кро́вными исто́чникъ истещи́ сотвори́лъ еси́, вся́ческихъ неду́гъ, му́чениче, я́ко вои́стинну болѣ́знь исцѣля́ющь, приступа́ющимъ къ тебѣ́ несумнѣ́нною вѣ́рою, богодохнове́нне.

Святы́хъ собо́ръ Пресвято́му Сло́ву, му́дре му́чениче, приве́лъ еси́ кро́вію, жи́знь нестарѣ́емую наслѣ́довалъ еси́, съ ни́миже моли́ о на́съ Христа́ Человѣколю́бца.

Боже́ственною ре́вностію твои́ми кровьми́ багряни́цу себѣ́, му́чениче, обагри́въ и въ сію́ одѣ́явся, всѣ́ми Ца́рствующему сца́рствуеши ны́нѣ, побѣ́днымъ вѣнце́мъ украша́емь.

Богоро́диченъ: Яже человѣ́ки па́че естества́ Боже́ственнымъ Рождество́мъ Твои́мъ, Дѣ́во, проявле́нно обожи́вши, я́ко Бо́га неизрече́нно вопло́щши, благослове́на Ты́ въ жена́хъ еси́, Пренепоро́чная Влады́чице.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Па́мять Твою́, Чи́стая Дѣ́во, Нача́ла же, и Вла́сти, и Си́лы, Ангели, Арха́нгели, Престо́ли, Госпо́дства, Херуви́ми сла́вятъ и стра́шніи Серафи́ми; человѣ́ческій же ро́дъ — пое́мъ и превозно́симъ во вся́ вѣ́ки.

Иже стра́нно всели́выйся, Богоро́дице, въ чи́стое чре́во Твое́, воплоща́емь, Се́й, всесвяще́нный ду́хъ Тво́й пріе́мъ, у Себе́ упоко́и, я́ко должни́къ Сы́нъ. Тѣ́мже Тя́ пое́мъ, Дѣ́во, и превозно́симъ во вся́ вѣ́ки.

О, вы́ше ума́ чуде́съ Приснодѣ́вы же и Богома́тере! Во гро́бъ бо все́льшися, показа́ ра́й, ему́же предстоя́ще дне́сь, ра́дующеся, пое́мъ: Го́спода по́йте, дѣла́, и превозноси́те Его́ во вся́ вѣ́ки.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Льво́въ ди́віихъ стремле́нія удержа́лъ еси́, сла́вне, тве́рдыми по́двиги твои́ми, мучи́телей безбо́жныхъ шата́нія Боже́ственною си́лою смири́лъ еси́ и побѣди́тель къ небесе́мъ, вопія́, восте́клъ еси́: благослови́те, вся́ дѣла́ Госпо́дня, Го́спода.

Святы́хъ свѣ́тлости ви́дѣти и жи́ти въ ра́дости, му́чениче, сподо́бился еси́, подви́гся, до́блественнѣ, и сконча́въ по́двигъ тво́й ме́чнымъ усѣкнове́ніемъ. И ны́нѣ вопіе́ши съ весе́ліемъ: благослови́те, вся́ дѣла́ Госпо́дня, Го́спода.

Къ боже́ственному притека́юще хра́му, боже́ственнаго му́ченика свѣ́тъ пріи́мемъ и, ра́цѣ прикаса́ющеся всегда́ моще́й сего́, ра́дующеся, свяще́ніе пода́тельно благода́ти пріи́мше, вопіе́мъ: вся́ дѣла́, благослови́те, Госпо́дня, Го́спода.

Богоро́диченъ: Свята́я Дѣ́во, Яже Бо́га Пресвята́го свя́то поро́ждши, Его́же вси́ святíи му́ченицы на суди́щи исповѣ́даша, освяще́ніе и просвѣще́ніе на́мъ низпосли́, вопію́щимъ: вся́ дѣла́, благослови́те, Госпо́дня, Го́спода.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное преставле́ніе Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Пріиди́те въ Сіо́нъ, на Боже́ственную и ту́чную Го́ру жива́го Бо́га, возра́дуемся, Богоро́дицу зря́ще: къ зѣло́ бо лу́чшей и Боже́ственнѣй сѣ́ни, я́ко Ма́терь, Сію́ во Свята́я святы́хъ Христо́съ преста́ви.

Пріиди́те, вѣ́рніи, ко гро́бу присту́пимъ Бо́жія Ма́тере, и объи́мемъ сердцы́ и устна́ми, очесы́ и лице́мъ чи́сто прикаса́ющеся и почерпа́юще исцѣле́ній незави́стныя да́ры от исто́чника приснотеку́щаго.

Пріими́ отъ на́съ пѣ́снь исхо́дную, Ма́ти жива́го Бо́га, и свѣтоно́сною Твое́ю и Боже́ственною осени́ благода́тію, Императору — побѣдительная, христолюби́вымъ лю́демъ — ми́ръ, оставле́ніе — пою́щимъ и душа́мъ спасе́ніе подаю́щи.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Се́ свѣтоза́рна страстоте́рпца па́мять просія́ свѣтоно́сно, тму́ де́монскую отгоня́щи, вѣ́рныя же вся́ просвѣща́ющи, сію́ свѣ́тло соверша́емъ, сего́ досто́йно велича́юще.

Яви́лся еси́, я́ко со́лнце ве́ліе, посреди́, Андре́е, стра́ждущихъ съ тобо́ю, си́хъ къ невече́рнему сія́нію небе́сныя свѣ́тлости наставля́я словесы́ твои́ми, съ ни́миже тя́ вѣ́рою ублажа́емъ.

Тя́, свѣ́тлостію чуде́съ всю́ просвѣща́ющаго тва́рь, тя́, неукло́ннымъ муче́ніемъ Це́ркви столпа́ бы́вша и вѣ́рнымъ утвержде́ніе, му́чениче Андре́е, велича́емъ.

Процвѣ́лъ еси́ посреди́ рая́ страда́лецъ, я́коже ши́покъ, нося́ та́йно благово́ніе, и обвеселя́ вѣ́рныхъ исполне́ніе, и смра́дъ, всему́дре, пре́лести отгоня́ Боже́ственною благода́тію.

Богоро́диченъ: Нося́щи Христа́ на руку́, ма́ніемъ нося́щаго вся́, Сего́ моли́ руки́ мя́ чужда́го изба́вити, Влады́чице, правосла́вною вѣ́рою Тя́ непреста́нно велича́юща.

Свѣти́ленъ пра́здника. Подо́бенъ: Не́бо звѣзда́ми.

Апо́столи отъ коне́цъ совоку́пльшеся здѣ́, въ Геѳсиманíйстѣй ве́си погреби́те тѣ́ло Мое́, и Ты́, Сы́не и Бо́же Мо́й, пріими́ ду́хъ Мо́й.

Сла́ва, и ны́нѣ, то́йже.

На стихо́внѣ стихи́ры пра́здника, гла́съ 2: Подо́бенъ: До́ме Евфра́ѳовъ.

Собо́ръ учени́къ* и боже́ственныхъ апо́столъ,* собра́ся погребсти́* богопрія́тное тѣ́ло* eди́ныя Богома́тере.

Сти́хъ: Воскресни́ Го́споди въ поко́й Тво́й,* Ты́ и Киво́тъ святы́ни Твоея́.

Ты́ Иже изъ Нея́* возсія́вый неизрече́нно,* сынолѣ́пно ду́хъ всечи́стый* рука́ми Твои́ми пріими́* Богоро́дицы, Влады́ко.

Сти́хъ: Кля́тся Госпо́дь Дави́ду и́стиною,* и не отве́ржется eя́.

Егда́ ко изъ Тебе́* Ро́ждшемуся преста́вилася eси́,* снидо́шася на о́блацѣхъ,* тѣ́ло Твое́ погребсти́,* Дѣ́во, апо́столи.

Сла́ва, и ны́нѣ, гла́съ 5:

Воспо́йте, лю́діе, Ма́тери Бо́га на́шего, воспо́йте: дне́сь бо всесвѣ́тлую ду́шу Свою́ въ пречи́стыя дла́ни, Иже изъ Нея́ Вопло́щшагося безъ сѣ́мене предае́тъ, Его́же и мо́литъ непреста́нно, дарова́ти вселе́ннѣй ми́ръ, и ве́лію ми́лость.


НА ЛИТУРГІИ,

Блаже́нна пра́здника, пѣ́снь 5-я обою́ кано́новъ, со ирмосо́мъ на 6. Проки́менъ, гла́съ 4: Святы́мъ, и́же су́ть на земли́ Его́,* удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, я́ко одесну́ю мене́ е́сть, [да не подви́жуся]. Апо́столъ ко Ефесе́емъ, зача́ло 233. Аллилу́ія, гла́съ 4: Воззва́ша пра́ведніи, и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ]. Сти́хъ: Мно́ги ско́рби пра́веднымъ [и отъ всѣ́хъ и́хъ изба́витъ я́ Госпо́дь]. Ева́нгеліе Луки́, зача́ло 106. Прича́стенъ: Ра́дуйтеся [пра́ведніи о Го́сподѣ, пра́вымъ подоба́етъ похвала́].

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 189 – 195 об.

/ Къ оглавленію раздѣла /


Наверхъ / Къ титульной страницѣ

0