Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 29 iюня 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 19-й де́нь.
Слу́жба Пресвятѣ́й Богоро́дицѣ въ де́нь пра́зднества чудотво́рнѣй Ея́ ико́нѣ имену́емѣй Донска́я.

НА ВЕЛИЦѢЙ ВЕЧЕРНИ,
Блаже́нъ му́жъ, 1-й антифо́нъ. На Го́споди воззва́хъ: стихи́ры, гла́съ 1.

Пріиди́те, вѣ́рныхъ собо́ри,* пресла́вное избавле́ніе гра́да Москвы́ воспра́зднуемъ,* се́ бо по́лчища вра́жеская,* я́ко пото́цы воды́ быстротеку́щія,* на прилежа́щія ве́си устреми́шася,* и мно́жество до́брыхъ во́иновъ* ду́ши своя́ положи́ша.* О, чу́до пресла́вное!* О, си́ла моли́твы Богома́тере!* Тече́ніе неукроти́мое ико́ною прегражда́ется* и въ бѣ́гство обраща́ется,* лю́діе сія́ ви́дѣша,* ра́достію испо́лнишася* и вопія́ху Богоро́дицѣ:* ра́дуйся, побѣ́до непобѣди́мая.

Весели́тся дне́сь свѣ́тло* сла́внѣйшій гра́дъ Москва́* и оби́тель Твоя́, Богоро́дице,* я́ко чудотво́рную ико́ну Твою́* та́мо просла́вила еси́* чудесы́ Боже́ственными,* заступле́ніе Твое́ держа́вное е́ю показа́вши* и ага́ряны побѣди́вши,* да вси́ благода́рственно вопіе́мъ Ти́:* ра́дуйся, Благода́тная, Госпо́дь съ Тобо́ю* и Тобо́ю съ на́ми* во спасе́ніе ду́шъ на́шихъ.

Ди́вна дѣла́ Твоя́, Го́споди,* Пречи́стую Ма́терь Твою́ Це́ркви дарова́лъ еси́:* безпо́мощнымъ ско́рую Послу́шницу,* беззащи́тнымъ Изба́вительницу крѣ́пкую,* безотвѣ́тнымъ те́плое хода́тайство,* приста́нище обурева́емымъ,* поги́бшимъ взыска́ніе,* предстоя́щи бо Тебѣ́, всѣ́хъ Влады́цѣ,* мо́лится непреста́нно о всѣ́хъ на́съ.

Ди́вное вели́чіе Твое́ исповѣ́мы,* Пресвята́я Дѣ́во:* взо́ру вѣ́ры предстои́ши,* я́ко гора́ велича́йшая добродѣ́телей,* луча́ми Со́лнца Пра́вды — Христа́, озаре́нная,* чистото́ю дѣ́вства при́сно блиста́ющая,* живоно́сную во́ду благода́ти Свята́го Ду́ха* преизоби́льно излива́ющая на всѣ́хъ,* съ вѣ́рою и любо́вію* къ Тебѣ́ притека́ющихъ.

Сла́ва, и ны́нѣ, гла́съ 4:

Гряди́, гряди́, Богоро́дице, избавле́ніе нося́щи отъ сопроти́вныхъ, Воево́да еси́ полку́ святи́телей, я́ко Тобо́ю Сы́на Бо́жія позна́хомъ, Воево́да еси́ полку́ му́чениковъ, я́ко предъ Кресто́мъ стоя́вшая. Тебѣ́ же Само́й ору́жіе се́рдце про́йде, Воево́да еси́ полку́ преподо́бныхъ, я́ко Приснодѣ́ва, чистото́ю а́нгелы превозше́дшая, тѣ́мже и на́съ защити́, еди́на Засту́пнице Преблагослове́нная.

Вхо́дъ. Проки́менъ дне́ и чте́нія Богоро́дичная.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 2:

Осужде́нія изба́ви, Пресвята́я Богоневѣ́сто, и лю́тыхъ прегрѣше́ній смире́нную мою́ ду́шу, и сме́рти измѣни́ моли́твами Твои́ми, и да́руй оправда́ніе получи́ти въ де́нь испыта́нія, е́же получи́ша святы́хъ собо́ри; покая́ніемъ очище́на мя́ пре́жде конца́ покажи́ и сле́зными излія́ніи.

Сле́зы покая́нія, я́ко мѵ́ро многоцѣ́нное, въ чи́стый пла́тъ со тща́ніемъ собира́еши, Засту́пнице, да егда́ Стра́шному Суду́ грѣ́шная душа́ предста́нетъ, пла́тъ се́й, слеза́ми испо́лненный, на вѣсы́ Бо́жія правосу́дія возложи́ши, да не иму́щей, чи́мъ грѣхи́ покры́ти, милосе́рдіе Бо́жіе приклони́ши и а́дскія му́ки моле́ніемъ крѣ́пкимъ свободи́ши, ка́ющихся прибѣ́жище.

Сла́ва, и ны́нѣ, гла́съ то́йже:

Слеза́ми ра́дости па́че же́мчуга ико́на Твоя́, Дѣ́во, украша́ется, мно́жество пла́чущихъ неча́янную ра́дость обрѣта́ютъ, грѣ́шницы отъ внеза́пныя сме́рти избавля́ются, моли́твами Твои́ми, Всеще́драя.

На стихо́внѣ стихи́ры, гла́съ 8:

Сла́вное ико́ны Твоея́ на по́лѣ бра́ни прише́ствіе, Богоро́дице непоро́чная, пѣсносло́вимъ здѣ́сь и Твое́ держа́вное на́мъ заступле́ніе отъ наше́ствія ага́рянъ досто́йно пра́зднуемъ, я́ко бо, Ма́ти су́щи Живота́, отъ напра́сныя сме́рти непови́нныхъ изба́вила еси́ и гра́ды и ве́си отъ огня́ и меча́ сохрани́ла еси́, Путеводи́тельнице нело́жная на́шего спасе́нія.

Сти́хъ: Помяну́ и́мя Твое́ во вся́комъ ро́дѣ и ро́дѣ.

О, пресла́внаго чудесе́! О, боже́ственнаго къ на́мъ, грѣ́шнымъ, долготерпѣ́нія! Яко наше́дшимъ на зе́млю на́шу лю́тымъ враго́мъ и вѣ́рѣ зѣло́ поруга́емѣй, непостижи́мое возме́здіе отъ ико́ны соверша́ется. Зри́те у́бо, лю́діе россíйстіи, коли́ко мо́жетъ моли́тва Дѣ́вы Пречи́стыя, ка́ко дре́внихъ чуде́съ подо́біе дне́сь на́мъ явля́ется, ка́ко стра́хъ сме́рти на враги́ обраща́ется, беззащи́тный же гра́дъ, во́пли же́нъ оглаша́емый, весе́ліемъ и ра́достію внеза́пу исполня́ется. Сла́ва Тебѣ́, Засту́пнице на́ша Блага́я и Ско́рая!

Сти́хъ: Слы́ши, Дщи́, и ви́ждь, и приклони́ у́хо Твое́.

Что́ Тя́ нарече́мъ, Пречи́стая? Рѣ́ку ли ти́ху и многово́дну, я́ко скорбми́ изсуше́нная сердца́ на́ша благода́тію напоя́еши? Стѣ́ну ли необори́му Христо́вы Це́ркве, стра́жа ли гра́да неусы́пна, я́ко спаса́еши отъ вра́гъ ви́димыхъ и неви́димыхъ? Тѣ́мже, отъ напа́стей внеза́пныхъ избавля́еміи, возопіи́мъ Влады́чицѣ: ра́дуйся, Всеми́лостивая, наде́жды вѣ́рныхъ не посрамля́ющая.

Сла́ва, и ны́нѣ, гла́съ 4:

Пресла́вная дне́сь соверша́ются: Взбра́нная Воево́да и Цари́ца небе́сная гряде́тъ Сама́ на супоста́ты и чудотво́рную ико́ну, я́ко щи́тъ несокруши́мъ, проти́ву злочести́выхъ поставля́етъ, стра́хомъ ве́ліимъ и смяте́ніемъ по́лчища вра́жія поража́етъ, въ бѣ́гство неудержи́мое обраща́етъ, спаса́ющи отъ огня́ и лю́тыхъ гра́дъ и ча́да Своя́.

Тропа́рь, гла́съ 4:

Засту́пнице вѣ́рныхъ преблага́я и ско́рая, Пречи́стая Богоро́дице Дѣ́во! Мо́лимъ Тя́ предъ святы́мъ и чудотво́рнымъ о́бразомъ Твои́мъ, да я́коже дре́вле отъ него́ заступле́ніе Твое́ гра́ду Москвѣ́ дарова́ла еси́, та́ко и ны́нѣ на́съ отъ вся́кихъ бѣ́дъ и напа́стей ми́лостивно изба́ви, и спаси́ ду́ши на́ша, я́ко Милосе́рдая.


НА УТРЕНИ,
На Бо́гъ Госпо́дь: тропари́ по уста́ву.

По 1-мъ стихосло́віи сѣда́ленъ, гла́съ 1:

Твоего́ милосе́рдія сподо́бившеся, Богоро́дице Дѣ́во, благода́рственная Тебѣ́ прино́симъ, зра́ку Пречи́стаго лица́ Твоего́ моля́щеся и Дави́дски вопію́ще: Ты́ еси́ гора́, усыре́нная и колесни́ца Боже́ственная, нося́щая Спа́са ду́шъ на́шихъ.

Сла́ва, и ны́нѣ, пра́здника.

По 2-мъ стихосло́віи сѣда́ленъ, гла́съ 4:

Бе́здну благоутро́бія ро́ждшая, Дѣ́во, исто́чникъ ми́лости на́мъ источа́еши, къ Тебѣ́ вѣ́рою прибѣга́ющимъ, яви́лася бо еси́ спасе́ніе ду́шъ на́шихъ.

Сла́ва, и ны́нѣ, пра́здника.

Велича́ніе:

Велича́емъ Тя́, Пресвята́я Дѣ́во, и чти́мъ о́бразъ Тво́й святы́й, и́мже ди́вную побѣ́ду на ага́ряны правосла́внымъ дарова́ла еси́.

Ино велича́ніе:

Велича́емъ Тя́, Пресвята́я Дѣ́во, и чти́мъ о́бразъ Тво́й святы́й, и́мже заступле́ніе ди́вное гра́ду Твоему́ дарова́ла еси́.

По поліеле́и сѣда́ленъ, гла́съ 1:

Ра́дуйся, Благода́тная Богоро́дице Дѣ́во, предста́тельство и прибѣ́жище ро́да христіа́нскаго, изъ Тебе́ возсія́ Со́лнце пра́вды, Христо́съ Бо́гъ на́шъ, и весели́тся богохрани́мый гра́дъ Москва́, воспріе́мъ чудотво́рную Твою́ ико́ну и Превѣ́чнаго Твоего́ Младе́нца, подаю́щаго на́мъ ве́лію ми́лость.

Сла́ва, и ны́нѣ, пра́здника.


Та́же степе́нна, 1-й антифо́нъ 4-го гла́са. Проки́менъ гла́съ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждь, и приклони́ у́хо Твое́. Вся́кое дыха́ніе... Ева́нгеліе отъ Луки́, зача́ло 4.

По 50-мъ псалмѣ́ стихи́ра, гла́съ 6:

Зна́меніе побѣ́дное ви́дѣвше, восхва́лимъ Возбра́нную го́рнихъ си́лъ Воево́ду, Всемо́щную Засту́пницу. Образъ Тво́й чу́дный чти́мъ, Пресвята́я Дѣ́во, и́мже ско́рое заступле́ніе Твое́ получа́емъ, Покро́въ бо еси́ на́шъ, ди́вную си́лу о́наго издре́вле вѣ́дуще, и́мя Твое́ призыва́емъ. Пріиди́те, вси́ вѣ́рніи, поклони́мся о́бразу Донскíя Бо́жія Ма́тере, гра́дъ бо на́шъ отъ огня́ и меча́ защища́етъ. Возблагодари́мъ же и Влады́ку Го́спода, и Честно́му Кресту́ Его́ поклони́мся, Си́мъ бо побѣжда́емъ враги́ на́ша, злѣ́ на́мъ досажда́ющія.

Кано́нъ, гла́съ 4:
Пѣ́снь 1.

Ирмо́съ: Отве́рзу уста́ моя́ и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Отве́рзи слу́хъ мо́й, Богоизбра́нная Дѣ́во, во е́же разумѣ́ти словеса́ открове́нія и позна́ти пу́ть спасе́нія, да вѣ́ру иму́ тве́рдую Изба́вителю Бо́гу и воспою́ преди́вное Его́ о на́съ промышле́ніе.

Отве́рзи, душе́ моя́, о́чи вѣ́ры, и у́зриши мно́гая благодѣя́нія Бо́жія Ма́тере, во дни́ тя́жкихъ обстоя́ній оте́честву на́шему издре́вле явля́емая, и воспо́й, ра́дующися, ми́лостивое Тоя́ заступле́ніе.

Немощны́хъ здра́віе, разсла́бленныхъ исцѣле́ніе, оби́димыхъ защище́ніе, отъ наси́лія и зло́бы спасе́ніе, ско́рбныхъ въ ну́ждахъ Помо́щнице, не переста́й моли́тися о чту́щихъ Тя́.

Позна́й, душе́ моя́, си́лу Честна́го и Животворя́щаго Креста́ Госпо́дня, си́мъ бо при́сно побѣжда́емъ полки́ вра́гъ ви́димыхъ и неви́димыхъ, моли́твами Богоро́дицы и всѣ́хъ святы́хъ, въ земли́ Россíйстѣй просія́вшихъ.

Гро́зное Боже́ственное преще́ніе врази́ разумѣ́ша прише́ствіемъ чудотво́рнаго о́браза Твоего́, небе́сная Цари́це, стра́хомъ бо одержи́міи, въ бѣ́гство внеза́пное обрати́шася, си́лою свы́ше гони́міи.

Гла́съ хвалы́ и благодаре́нія прино́симъ Ти́, Влады́чице, и покланя́емся пречи́стому о́бразу Твоему́, и́мже мно́гажды на ага́ряны побѣ́ду дарова́ла еси́ и ро́гъ на́шъ вознесла́ еси́, Защи́тнице ско́рая ро́да христіа́нскаго.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный исто́чниче, ли́къ себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Жите́йскими попече́ніи и сластьми́ искуша́еміи, Тебѣ́, исто́чнику тишины́ и богомы́слія, пѣ́сни прино́симъ: утоли́ жа́жду духо́вную, у́мъ на́шъ къ не́бу возведи́, превы́шшая го́рнихъ си́лъ.

Ума́ моего́ просвѣще́ніе, во́ли сла́быя укрѣпле́ніе, се́рдца уны́лаго ра́дованіе — Ты́ еси́, Преблагослове́нная, молю́ Тя усе́рдно: вся́ си́лы души́ моея́ обнови́.

Сла́ва Тебѣ́, Всенепоро́чная, лю́бящимъ Тя́ дѣ́вамъ неотъе́млемое сокро́вище, цѣлому́дрія исто́чниче, небе́сныя сла́дости открове́ніе, уны́нія и печа́ли истребле́ніе, смире́нныхъ и боголю́бцевъ вѣнча́ніе и по́стниковъ удобре́ніе.

Изгла́ди грѣхопаде́нія ю́ности, пріими́ покая́ніе ста́рости моея́, Цари́це небе́сная, се́ бо отъ чре́ва ма́тере моея́ да́же доны́нѣ вра́гъ не отступа́етъ, не попусти́ мя твори́ти по́хоти его́, но у́зы грѣхо́вныя разрѣши́ и поми́луй мя́.

Ка́ко умолю́ Тя, Богоневѣ́сто, усты́, злосло́вія испо́лненными, или́ ку́ю пѣ́снь вознесу́, со́вѣстію облича́емь? Возмогу́ ли позна́ти и́стину, лжи́ сослужи́тель, сосу́дъ гнѣ́ва Бо́жія сы́й? Но, Жизнода́тельнице, страстьми́ умерщвле́нную ду́шу мою́ оживи́.

Врагу́ лю́тому подступа́ющу, мно́гое мно́жество ста́рцевъ и же́нъ простира́ютъ Ти́ немошнѣ́и ру́цѣ съ во́племъ крѣ́пкимъ: пріиди́, Ма́ти Милосе́рдія, пріиди́, отъ лю́тыя сме́рти избавля́ющая, ускори́ спасти́ гра́дъ и лю́ди Твоя́.

Сѣда́ленъ, гла́съ 8:

Блажи́мъ Тя́, вси́ ро́ди, Богоро́дице Дѣ́во, въ Тя́ бо Невмѣсти́мый Христо́съ Бо́гъ на́шъ, вмѣсти́тися благоволи́. Блаже́ни есмы́ и мы́, предста́тельство Тя́ иму́ще: де́нь бо и но́щь мо́лишися о на́съ, и ски́птры ца́рствія Твои́ми моли́твами утвержда́ются. Тѣ́мъ, воспѣва́юще, вопіе́мъ Ти́: ра́дуйся, Благода́тная, Госпо́дь съ Тобо́ю.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.

О, вели́кая си́ла сле́зъ! О, незло́біе Влады́ки! За мене́, па́дшаго, Са́мъ стра́ждетъ! Ты́ же, Богома́ти, у Креста́ Сы́на Своего́ стоя́вшая, неизслѣ́дную глубину́ Бо́жія снизхожде́нія на́мъ покажи́ и неосужде́нно причасти́тися святы́хъ и стра́шныхъ Та́инъ сподо́би.

Ма́ти ча́да злонра́внаго побѣжда́ется сердобо́ліемъ и не мо́жетъ его́ презрѣ́ти, тѣ́мже па́че Ты́, Благоутро́бная, преукраше́нное жили́ще Бо́жія снизхожде́нія, мене́, послѣ́днѣйшаго, не оставля́еши, и дру́гъ дру́га тяготы́ носи́ти на́съ науча́еши.

Облиста́й мя́ свѣ́томъ Боже́ственнаго ли́ка Твоего́, Отра́до моя́ Пречи́стая, да нощна́я вознесу́ Ти моле́нія, услы́ши воздыха́нія немо́лчная и па́мятію сме́ртною отъ пре́лести грѣха́ спаси́.

Пла́четъ ста́рость моя́, лиши́ся бо сыно́въ и дще́рей, нѣ́сть опо́ры въ жи́зни одино́цѣй, но бу́ди мнѣ́ сто́лпъ и крѣ́пость, свобожде́ніе печа́лей, Блага́я Утѣ́шительнице, и до конца́ днíй мои́хъ сохрани́ мя́ отъ зла́.

Неизрече́нною си́лою благода́ти возбрани́ скве́рнымъ помысло́мъ, обурева́ющимъ мя́, Дѣ́во Чи́стая, запрети́ и́мъ, и дале́че отгони́, и Боже́ственныхъ пѣснопѣ́ній дѣ́лателя мя́ сотвори́, да нелѣ́ностно послужу́ Бо́гу моему́.

Во́инствъ благопоспѣше́ніе, борце́въ му́жество, хра́брыхъ спобо́рнице, Воево́до Взбра́нная, мо́лимъ Тя́ крѣ́пость ору́жію на́шему дарова́ти, да низло́жены бу́дутъ востаю́щіи на ны́, Тобо́ю бо побѣ́ды воздви́жутся.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й, Ты́ бо, Неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га и родила́ еси́ Безлѣ́тнаго Сы́на, всѣ́мъ воспѣва́ющимъ Тя́ ми́ръ подава́ющая.

Прама́ти Ева, въ Раю́ согрѣши́вши, му́къ рожде́нія содѣ́ла мя́ прича́стну, но Ты́, Благода́тная, неболѣ́зненно Христа́ ро́ждшая, чадоро́дія ра́ди ду́шу мою́ спаси́.

Яко цвѣ́тъ се́льный, яви́ся ча́до мое́ въ мíръ скорбе́й и дыха́ніемъ сме́рти уже́ опали́ся, но по сло́ву Госпо́дню воспою́: блаже́нно дѣ́тство, и́бо Ца́рство небе́сное наслѣ́дитъ; Ты́ же, Влады́чице, прекраще́ніе воздыха́ній, Сама́, я́коже вѣ́си, ско́рбь мою́ облегчи́.

Очи Твои́ свѣ́тлѣи съ любо́вію на ни́щихъ призира́ютъ, и рука́ всегда́ сирота́мъ и вдови́цамъ просте́рта. Сла́вимъ неусы́пное о ни́хъ хода́тайство, и о́бразъ Тво́й честны́й лобыза́юще, про́симъ: не отврати́ лица́ Твоего́ отъ на́съ, въ нуждѣ́ ожесточе́нныхъ.

Та́йны грѣ́хъ мои́хъ обличе́ніе ужаса́етъ мя́, Пречи́стая, но ничто́же возмо́жно утаи́ти отъ Всеви́дящаго Ока, се́ прибѣга́ю къ Твоему́ милосе́рдію, да́ждь ми́ си́лу къ покая́нію и Твои́ми моли́твами покры́й мою́ наготу́.

Гнѣ́въ, ревнова́ніе и зло́ба въ души́ мое́й го́рдѣй и тщесла́внѣй гнездя́тся, са́мъ па́даю и па́дшихъ осужда́ти дерза́ю, къ Тебѣ́ прибѣго́хъ, обурева́емыхъ Спаси́тельнице, страсте́й мои́хъ смра́дное мо́ре изсуши́.

Ужаса́етъ мя́ де́нь Суда́ Бо́жія, Го́споду бо вѣ́дома вся́ помышле́нія, не надѣ́юся на до́брая дѣла́ моя́, нѣ́сть бо тѣ́хъ у мене́, но прошу́ моли́твъ Твои́хъ, грѣ́шныхъ Спору́чнице.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те рука́ми воспле́щимъ, отъ Нея́ ро́ждшагося Бо́га сла́вимъ.

Окая́нную мою́ ду́шу, влеко́мую лука́выми страстьми́, свободи́ изъ плѣ́на, па́дшихъ воста́ніе, ра́дуется бо Влады́ка Твоему́ о грѣ́шныхъ предста́тельству, проше́нія Твоя́, я́ко Сы́нъ, исполня́яй.

Воздыха́нія тя́жкая слы́шиши, Преблагослове́нная, ско́рбь се́рдца моего́ вѣ́дущи, мѵ́ро утѣше́нія и вино́ весе́лія возле́й на ра́ны душе́вныя, мра́къ уны́нія прогоня́ющи.

Помышля́ю труды́ подви́жниковъ: по́стъ непреста́нный, сле́зы сокруше́нія, моли́твы всено́щныя, послуша́ніе нелицемѣ́рное, терпѣ́ніе поноше́ній, ужаса́юся, Ма́ти Судіи́ Пра́веднаго, моему́ нераде́нію о спасе́ніи, отъ сна́ безчу́вствія мя́ пробуди́.

Су́щіи во а́дѣ не мо́гутъ Го́спода моли́ти, Ты́ же, Всемо́щная Предста́тельнице, я́ко Ма́ти, дерзнове́ніе къ Сы́ну и́маши, мо́лимъ Тя́ о сро́дницѣхъ на́шихъ и всѣ́хъ преста́вльшихся, испроси́ и́мъ грѣхо́въ разрѣше́ніе.

Въ сме́ртный ча́съ слы́шу гла́съ Го́спода, проро́комъ вѣща́ющь: предоста́ви Ми́ ча́дъ твои́хъ, Азъ поддержу́ и препита́ю си́рыхъ твои́хъ. И Ты́, Ма́ти Бо́жія, бу́ди ча́домъ мои́мъ прибѣ́жище въ де́нь ско́рби.

На по́ли бра́ни сме́рть ца́рствуетъ, Ты́ же, Влады́чице, вѣ́рнымъ во́иномъ моли́твою ма́тере жи́знь сохраня́еши, убіе́нныхъ же ду́ши въ Ца́рство Свѣ́та незаходи́маго вселя́еши и та́ко отъ вѣ́чныя сме́рти избавля́еши.

Кондакъ 1.

Взбра́нной Воево́дѣ побѣди́тельная, я́ко изба́вльшеся отъ злы́хъ, благода́рственная воспису́емъ Ти́, раби́ Твои́, Богоро́дице, но, я́ко иму́щая держа́ву непобѣди́мую, отъ вся́кихъ на́съ бѣ́дъ свободи́, да зове́мъ Ти́: Ра́дуйся, Невѣ́сто неневѣ́стная.

Икосъ 1.

Ангелъ предста́тель съ небесе́ по́сланъ бы́сть рещи́ Богоро́дицѣ: ра́дуйся! И, со безпло́тнымъ гла́сомъ воплоща́ема Тя́ зря́, Го́споди, ужаса́шеся, и стоя́ше, зовы́й къ Не́й такова́я: Ра́дуйся, Еюже ра́дость возсія́етъ; ра́дуйся, Еюже кля́тва исче́знетъ. Ра́дуйся, па́дшаго Адама воззва́ніе; ра́дуйся, сле́зъ Евиныхъ избавле́ніе. Ра́дуйся, высото́, неудобовосходи́мая человѣ́ческими по́мыслы; ра́дуйся глубино́, неудобозри́мая и а́нгельскима очи́ма. Ра́дуйся, я́ко еси́ Царе́во сѣда́лище; ра́дуйся, я́ко но́сиши Нося́щаго вся́. Ра́дуйся, звѣздо́, явля́ющая Со́лнце; ра́дуйся, утро́бо Боже́ственнаго воплоще́нія. Ра́дуйся, Еюже обновля́ется тва́рь; ра́дуйся, Еюже покланя́емся Творцу́. Ра́дуйся, Невѣ́сто неневѣ́стная.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Аще вся́ вѣ́си, Бо́га же не вѣ́си, ничто́же вѣ́си, — и́щущимъ му́дрости витія́ возвѣща́етъ. О, Ма́ти Бо́жія! Неизслѣ́димая глубина́ Бо́жіихъ открове́ній Тобо́ю яви́ся, просвѣти́ мо́й у́мъ, во е́же Го́спода Искупи́теля позна́ти, Бо́га оте́цъ на́шихъ.

Чего́ ра́ди оскверня́ются путіе́ грѣ́шника? Отвѣща́етъ проро́къ Дави́дъ: того́ ра́ди, я́ко нѣ́сть Бо́га предъ ни́мъ. Откро́й о́чи мои́ омраче́нніи, Чи́стая, да позна́ю вездѣсу́щіе Творца́ вся́ческихъ, Бо́га оте́цъ на́шихъ.

Ви́жду покая́ніе Дави́дово: во вре́тище облека́ется, ду́шу посто́мъ смиря́етъ, питіе́ пла́чемъ покая́нія растворя́етъ, полу́нощи востае́тъ на моли́тву; моя́ же моли́тва Бо́гомъ отверга́ется, поне́же не явля́ю трудо́въ, ни по́двиговъ, и́мже мя́, Благода́тная, научи́.

Небе́сныхъ си́лъ Цари́це, разсѣ́й о́блаки печа́ли, смяте́нія и бу́рю помысло́въ укроти́, да́руй ми́ ду́хъ сокруше́нія и смире́нія, да изъ глубины́ се́рдца моего́ принесу́ чи́стую моли́тву Бо́гу оте́цъ на́шихъ.

Се́рдце услажда́ется, егда́ благода́ть Твоя́ явля́ется, ми́ръ, умиле́ніе, и сле́зы ражда́ются, о Дѣ́во, ра́досте моя́ неизрече́нная, не пре́зри мя́, ожесточе́ннаго, но Сама́ посѣти́, да му́къ томле́нія изба́витъ мя́ Бо́гъ оте́цъ на́шихъ.

Никто́же изба́витъ мя́ отъ сме́рти, ни роди́теліе, ни ча́да, не спасе́тъ да́ръ, ниже́ приноше́ніе, зна́еміи прово́дятъ то́кмо до гро́ба, грѣси́ же мои́ оста́нутся. Услы́ши, Милосе́рдая, во́пль мо́й, да спасе́тъ мя́ огня́ вѣ́чнаго Бо́гъ оте́цъ на́шихъ.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте дѣла́ и превозноси́те Его́ во вся́ вѣ́ки.

Во́зрастъ ю́ности и жа́жда наслажде́нія плѣ́няютъ мою́ ду́шу, Благода́тная, но къ вѣ́чному блаже́нству и сла́вѣ святы́хъ обрати́ моя́ помышле́нія, да славосло́влю Го́спода моего́ и превознесу́ Его́ во вся́ вѣ́ки.

Во́лны невѣ́рія и скорбе́й лю́тыхъ покрыва́ютъ мою́ ду́шу, но слы́шу гла́съ Го́спода, глаго́люща: маловѣ́рный, почто́ усумни́лся еси́? Къ Тебѣ́ прибѣго́хъ, Ма́ти Бо́жія, спаси́ мя и ча́да моя́, въ Тебѣ́ бо утвержде́ніе вѣ́ры и́мамы, да превозно́симъ Го́спода Творца́ во вѣ́ки.

Чревоуго́дію, нечистотѣ́ служу́ прилѣ́жно, за оби́ды ме́стію воздаю́, облича́емь, гнѣ́ваюся напра́сно, злосло́влю не оказа́вшихъ ми́ по́мощи, са́мъ же немощны́хъ презира́ю. О, Спору́чнице грѣ́шныхъ, яви́ долготерпѣ́ніе и отъ грѣха́ свободи́ мя́ во вѣ́ки!

Немозмо́жно е́сть ма́лою слезо́ю вели́кія скве́рны омы́ти и о́гнь гее́нскій угаси́ти, о Всеми́лостивая Ма́ти, ви́жду ожесточе́ніе мое́ и молю́ся Ти́: да́ждь ми́ сле́зы покая́нія, да убѣлю́ одѣя́ніе души́ моея́.

Съ мольбо́ю неотсту́пною, наде́ждою крѣ́пкою припа́даю Ти́, Держа́вная Влады́чице: зри́ши врага́, лю́таго приближе́ніе, услы́ши въ слеза́хъ прите́кшихъ, воста́ни ско́ро, и я́ко Блага́я, защити́, да сла́влю Тя́, Ма́ти Бо́га моего́, во вѣ́ки.

Пла́чь мо́й въ ра́дость обрати́ и сѣ́тованіе въ весе́ліе, Ма́ти Милосе́рдія, и го́рдыя за́мыслы вра́гъ мои́хъ сокруши́, да благослови́тъ Тя́ вся́къ язы́къ и вся́ка пло́ть отъ ны́нѣ и до вѣ́ка.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

При́зри на нищету́ душе́вную и вся́кую го́речь услади́, непосты́дная наде́ждо на́ша, скорбя́щихъ ободре́ніе, пла́чущихъ ско́рое утѣше́ніе, неистощи́ма бо сокро́вища Твоя́, и ра́дующися, дае́ши я́ всѣ́мъ, по́мощи тре́бующимъ.

Вкуси́те и ви́дите, я́ко бла́гъ Госпо́дь, за любо́вію бо слѣ́дуетъ Го́спода позна́ніе. О, Трапе́зо та́инственныхъ дарова́ній! Сподо́би мя́ неосужде́нно Животворя́щихъ Та́инъ причаща́тися, во очище́ніе грѣхо́въ мои́хъ.

Предъ ико́ною Твое́ю, зри́, Влады́чице, жите́йское мо́ре волну́ется, спаси́ погиба́ющихъ въ волна́хъ невѣ́рія и зло́бою истоще́нныхъ, волно́ю Твоего́ милосе́рдія изнеси́ на бре́гъ спасе́нія, да зову́тъ Ти́: ра́дуйся, отъ вѣ́чныя сме́рти избавле́ніе.

Самомнѣ́ніемъ ослѣпле́нъ, навыко́хъ укоря́ти бра́та моего́. Ка́ко сообщу́ свѣ́тъ бли́жнему, тмо́ю лжи́ покры́тъ сы́й? Да́руй ми́, о Ма́ти Свѣ́та, зрѣ́ти моя́ прегрѣше́нія и бра́та моего́ согрѣше́нія терпѣ́ти и съ любо́вію исправля́ти.

Ангелъ сме́рти нападе́ на мя́, презира́етъ моле́нія, пла́чу не вне́млетъ, разлуча́етъ мя́ безжа́лостно со ча́ды, влече́тъ мя́ наси́льно. О, Богома́ти, съ Сы́номъ Твои́мъ кре́стныя му́ки раздѣли́вшая, ма́тернюю ско́рбь о бли́жнихъ утоли́!

Зе́млю Россíйскую въ достоя́ніе Себѣ́ избра́вшая и утверди́вшая на́съ во благоче́стіи, подъ покро́вомъ Твои́мъ соблюди́, Всепѣ́тая, о́бразомъ Твои́мъ честны́мъ отъ всѣ́хъ напа́стей сохрани́, да зове́мъ Ти́: ра́дуйся, Всеми́лостивая, въ напа́стехъ ско́рая Засту́пнице.

Свѣти́ленъ:

Торжеству́емъ дне́сь, правовѣ́рніи, во хра́мѣ Твое́мъ, Влады́чице, и Ты́, Пречи́стая, пріими́ любо́вію приноси́мыя Тебѣ́ пѣ́сни благода́рственныя.

На хвали́техъ стихи́ры, гла́съ 5. Подо́бенъ: Ра́дуйся.

Красу́йся, страно́ Россíйская,* ра́дуйся и весели́ся, гра́де Москва́,* се́ бо свята́я и чудотво́рная Богома́тере ико́на* отъ Донски́хъ предѣ́лъ чуде́съ заря́ми возсія́* и бы́сть на́мъ во спасе́ніе отъ наше́ствія иноплеме́нныхъ* и ины́хъ вра́гъ, ви́димыхъ и неви́димыхъ,* и отъ вся́кія напа́сти.

Ра́дуйся, земле́ Россíйская,* торжеству́й и весели́ся, всечестны́й гра́де Москва́,* се́ о́бразъ Богоро́дицы* съ по́ля бра́ни гряде́тъ къ тебѣ́,* се́ ра́дость побѣ́ды ми́лостію Бо́жіею возвѣща́ется,* тма́ у́бо ско́рби твоея́ ны́нѣ отгоня́ется,* лю́діе сла́дкое пріе́млютъ утѣше́ніе,* воспо́йте, свяще́нницы,* воспо́йте пѣ́сни хвале́бныя,* вели́чія Богома́тере досто́йныя,* припаде́мъ, вѣ́рніи, къ Влады́чицѣ всѣ́хъ,* да пребу́дутъ покро́въ и ми́лость Ея́* надъ на́ми во вѣ́ки.

Красу́йся, златогла́вый чу́дный гра́де Москва́,* ра́дуйся и весели́ся, оби́теле Донска́я,* се́ бо ше́ствуетъ къ тебѣ́ ико́на Бо́жія Ма́тере,* рука́ми вѣ́рныхъ, я́ко зна́меніе побѣ́дное, носи́ма,* блиста́ніемъ зра́ка Своего́ враги́ прогоня́ющи,* ча́домъ же подаю́щи живо́тъ и ве́лію ми́лость.

Сла́ва, и ны́нѣ, гла́съ 2:

Гряди́те христоимени́тіи лю́діе, пра́здникъ че́стенъ соста́вимъ и пѣ́снми ра́достными воспое́мъ Пресла́вную Ма́терь Бо́жію, я́ко отъ ико́ны Ея́ святы́я, нарица́емыя Донскíя, заступле́ніе гра́ду Москвѣ́ яви́ся, тѣ́мже пое́мъ Тебѣ́, Влады́чице, пѣ́сни хвале́бныя, я́ко Засту́пницѣ Россíйскія земли́ и Хода́таицѣ на́шего спасе́нія.

Славосло́віе вели́кое. Ектеніи́. И отпу́стъ.



НА ЛИТУРГІИ,
Слу́жба вся́ Богоро́дицѣ.

Источникъ: Донская икона Божіей Матери. — М.: Изданіе Донского монастыря. – «Русская энциклопедія», 1991. — С. 15-25, 36-40.

/ Къ оглавленію раздѣла /


Наверхъ / Къ титульной страницѣ

0