Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 29 апрѣля 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 18-й де́нь.
Святы́хъ му́ченикъ Фло́ра и Ла́вра.

[ВЕЧЕРЪ,]
На Го́споди воззва́хъ: стихи́ры пра́здника, гла́съ 2. Подо́бенъ: Кíими похва́льными.

Ка́я стра́шная пѣ́нія, я́же принесо́ша Ти́ тогда́, Дѣ́во, о́крестъ Твоего́ одра́ стоя́щіи, вси́ и́же Сло́ва апо́столи? И ужа́снѣ вопію́ще: отхо́дитъ Царе́ва пала́та, возвыша́ется киво́тъ свяще́нія; две́ри, возми́теся, я́ко да Бо́жія две́рь вни́детъ въ ра́дость, мíру непреста́нно прося́щи ве́лія ми́лости!

Ка́я духо́вная пѣ́нія ны́нѣ принесе́мъ Тебѣ́, Всесвята́я? Безсме́ртнымъ бо успе́ніемъ Твои́мъ ве́сь мíръ освяти́ла еси́, и ко премíрнымъ прешла́ еси́, добро́ту разумѣва́ти Вседержи́теля, и Сему́ я́коже Ма́ти сра́доватися, а́нгельскимъ Тя́ чино́мъ доринося́щимъ, Чи́стая, и душа́мъ пра́ведныхъ, съ ни́миже проси́ на́мъ ми́ра и ве́лія ми́лости.

Ины стихи́ры святы́хъ, гла́съ 4. Подо́бенъ: Да́лъ еси́ зна́меніе.

Ка́меніе пресоверше́ни,* муче́ніемъ сѣко́ми* и ка́зньми истеса́еми, святíи, яви́вшеся,* созда́стеся въ Це́рковь Госпо́дню* и и́дольскія хра́мы и тре́бища* низло́жше на зе́млю.* Тѣ́хъ у́бо ублажа́емъ,* я́ко рая́ жи́телей,* я́ко хра́ма возложе́нія небе́снаго су́ща.

Благода́ть почерпи́те* и просвѣще́ніе пріими́те,* весе́ліе и ми́лость,* моще́мъ прикосну́вшіися свяще́нныхъ му́ченикъ* Фло́ра же и Ла́вра,* изъ ни́хже истека́етъ бога́тно исцѣле́ній Боже́ственное дѣ́йство,* и си́хъ ублажа́юще, я́ко Госпо́дни уго́дники,* прилѣ́жно возопіе́мъ:* Бо́же на́шъ, сла́ва Тебѣ́.

Въ ро́вѣ затворе́ни* и подъ земле́ю покрыва́еми* повелѣ́ніемъ мучи́теля,* Боже́ственными повѣ́даньми* и открове́ніемъ Ду́ха Свята́го* явле́ни бы́сте на́мъ, я́коже звѣ́зды,* облиста́юще зна́менія, и чудеса́,* и исцѣле́ній дарова́нія,* страстоте́рпцы самобра́тніи,* а́нгеловъ купножи́тели.

Сла́ва, гла́съ 2:

Ревни́тели святíи, самобра́тніи Христо́вы, Фло́ре и Ла́вре, хвала́ми досто́йными почте́ни бу́дите: вы́ бо, крѣ́пко подви́гшеся, е́же къ Бо́гу исповѣ́даніи тве́рдо пострада́вше, побѣ́дныя вѣнцы́ улучи́сте. Тѣ́мъ со а́нгелы въ вы́шнихъ ликовству́ете, прилѣ́жно моля́ще Святу́ю Тро́ицу умири́ти мíръ и спасти́ ду́ши на́ша.

И ны́нѣ, [пра́здника], гла́съ 4:

Пріиди́те, воспое́мъ, лю́діе, Пресвяту́ю Дѣ́ву Чи́стую, изъ Нея́же неизрече́нно про́йде, вопло́щся, Сло́во Отчее, зову́ще и глаго́люще: благослове́нна Ты́ въ жена́хъ, блаже́нное чре́во, вмѣсти́вшее Христа́. Того́ святы́мъ рука́мъ ду́шу преда́вши, моли́ся, Пречи́стая, спасти́ся душа́мъ на́шимъ.

На стихо́внѣ стихи́ры [пра́здника], гла́съ 2: Подо́бенъ: До́ме Евфра́ѳовъ.

Вси́ небе́сніи,* воспо́йте, ли́цы,* и́бо Дѣ́ва Ма́ти* преста́вися пресла́вно* отъ земли́ къ небе́снымъ.

Сти́хъ: Воскресни́, Го́споди, въ поко́й Тво́й,* Ты́ и Киво́тъ святы́ни Твоея́.

Собра́ся ли́къ учени́къ* пресла́вно, Отрокови́це,* отъ коне́цъ мíра* погребсти́ Твое́ тѣ́ло* боже́ственное и нетлѣ́нное.

Сти́хъ: Кля́тся Госпо́дь Дави́ду и́стиною,* и не отве́ржется eя́.

Две́ри небе́сныя, возми́теся,* зря́ще две́рь Вы́шняго,* иду́щу къ вы́шнимъ,* еди́ну Богома́терь.

Сла́ва, и ны́нѣ, гла́съ то́йже:

Дави́дскую пѣ́снь дне́сь, лю́діе, воспое́мъ Христу́ Бо́гу: приведу́тся, рече́, Царю́ дѣ́вы въ слѣ́дъ Ея́, и и́скренняя Ея́ приведу́тся въ весе́ліи и ра́дованіи. Ибо отъ сѣ́мене Дави́дова, Ея́же ра́ди мы́ обожи́хомся, въ ру́цѣ Своего́ Сы́на и Влады́ки, сла́вно и па́че сло́ва прелага́ется, Юже, я́ко Ма́терь Бо́жію, воспѣва́юще, вопіе́мъ и глаго́лемъ: спаси́ на́съ, исповѣ́дающихъ Тя́, Богоро́дицу, отъ вся́каго обстоя́нія, и изба́ви отъ бѣ́дъ ду́ши на́ша.

Тропа́рь святы́хъ, гла́съ 4:

Преудо́бренную и богому́друю дво́ицу пресвѣ́тлую восхва́лимъ, вѣ́рніи, по достоя́нію, Фло́ра преблаже́ннаго и Ла́вра всечестна́го, и́же усе́рдно Тро́ицу несозда́нную я́сно проповѣ́дасте всѣ́мъ, тѣ́мже пострада́вше до кро́ве, и вѣнцы́ пресвѣ́тлыми увязо́стеся, моли́теся Христу́ Бо́гу, да спасе́тъ ду́ши на́ша.

Сла́ва, и ны́нѣ пра́здника, гла́съ 1:

Въ рождествѣ́ дѣ́вство сохрани́ла eси́, во успе́ніи мíра не оста́вила eси́, Богоро́дице, преста́вилася eси́ къ животу́, Ма́ти су́щи Живота́, и моли́твами Твои́ми избавля́еши отъ сме́рти ду́ши на́ша.


НА УТРЕНИ,
[На Бо́гъ Госпо́дь: Тропа́рь пра́здника два́жды. Сла́ва, святы́хъ. И ны́нѣ, пра́здника.]

По 1-й стихоло́гіи сѣда́ленъ, гла́съ 4. Подо́бенъ: Яви́лся еси́ дне́сь.

Въ сла́внѣй па́мяти Твое́й вселе́нная, невеще́ственнымъ Ду́хомъ преукра́шена, у́мно съ весе́ліемъ зове́тъ Ти́: ра́дуйся, Дѣ́во, христіа́нъ похвало́.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 6. Подо́бенъ: Милосе́рдія две́ри.

Твое́ преставле́ніе, Чи́стая, вси́ вѣ́рніи, восхваля́юще, пое́мъ Тя́: преста́вилася бо отъ земли́, отъ живота́ въ живо́тъ, и су́щи на небесѣ́хъ Бо́гу моля́щися, изба́витися отъ бѣ́дъ ро́ду человѣ́ческому.

Сла́ва, и ны́нѣ, то́йже.

Кано́нъ пра́здника, со ирмосо́мъ на 8, ки́ръ Космы́, гла́съ 1.
Пѣ́снь 1.

Ирмо́съ: Преукраше́нная Боже́ственною сла́вою, свяще́нная и сла́вная, Дѣ́во, па́мять Твоя́, вся́ собра́ къ весе́лію вѣ́рныя, начина́ющей Маріа́мѣ, съ ли́ки и тимпа́ны, Твоему́ пою́ще Единоро́дному: сла́вно я́ко просла́вися.

Да провожда́ютъ невеще́ственніи чи́нове, небоше́ственное въ Сіо́нъ Боже́ственное тѣ́ло Твое́, внеза́пу же сте́кшеся апо́столъ мно́жество отъ коне́цъ, Богоро́дице, Тебѣ́ предста́ша а́біе, съ ни́миже, Чи́стая, Твою́ честну́ю, Дѣ́во, па́мять сла́вимъ.

Побѣ́дныя по́чести взяла́ еси́ на естество́, Чи́стая, Бо́га ро́ждши, оба́че же, подо́бящися Творцу́ Твоему́ и Сы́ну, па́че естества́ повину́ешися есте́ственнымъ зако́номъ. Тѣ́мже уме́рши, съ Сы́номъ востае́ши вѣ́чнующи.

Инъ кано́нъ святы́хъ на 4, его́же краегране́сіе: Кра́сную воспою́ му́чениковъ дво́ицу. Творе́ніе Іо́сифово, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Свѣтоза́рными блиста́ніи Ду́ха просвѣща́еми, мра́чныя о́блаки души́ моея́ разори́те, я́ко да воспою́, ра́дуяся, свѣтоно́сную, святíи, и честну́ю ва́шу па́мять, му́ченицы Христо́вы предо́бліи.

На ка́мени непоро́чныя вѣ́ры созда́вше добродѣ́тельми боже́ственными са́ми себе́, блаже́нніи, предо́бръ показа́стеся и красе́нъ хра́мъ, въ него́же Оте́цъ всели́ся, и Сы́нъ, и Ду́хъ Святы́й.

Изъ ко́рене посѣка́юще пре́лести те́рніе, великоимени́тіи, посѣка́тельнымъ сло́вомъ Боже́ственныя вѣ́ры сердца́ обнови́ша, оляденѣ́вшая ле́стію, и плодоно́сна показа́ша, вѣ́ру процвѣта́юща непоро́чную.

Богоро́диченъ: Отъ Дѣви́ческія утро́бы прозябла́ еси́ Ко́реня ненапое́ннаго, Сади́теля всѣ́мъ, Человѣ́ка бы́вша и стра́сти претерпѣ́вша, Его́же жела́юще, боже́ственніи вѣ́рно пострада́ша му́ченицы, Пречи́стая Дѣ́во Всепѣ́тая.

Пѣ́снь 3.

Ирмо́съ: Содѣ́тельная и содержи́тельная всѣ́хъ, Бо́жія Му́дросте и Си́ло, непрекло́нну, недви́жиму Це́рковь утверди́, Христе́, еди́нъ бо еси́ Свя́тъ, во святы́хъ почива́яй.

Жену́ Тя́ ме́ртвенну, но па́че естества́ и Ма́терь Бо́жію, ви́дѣвше, Всенепоро́чная, сла́вніи апо́столи, ужа́сно прикаса́хуся рука́ми сла́вою облиста́ющей, я́ко богопрія́тное Селе́ніе ви́дяще.

Пости́же ру́цѣ досади́тельныя де́рзаго, усѣче́ніемъ су́дъ нане́съ, Бо́гу сохра́ншу че́сть одушевле́нному Киво́ту, сла́вою Божества́, въ Не́мже Сло́во пло́ть бы́сть.

Инъ.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Зако́нъ Боже́ственный исполня́юще, прехва́льніи му́ченицы, ни́щимъ бога́тно хлѣ́бъ пода́сте и ко благоче́стію наста́висте боже́ственному, спасе́нія хода́таи си́мъ бы́вше.

Дво́ица свѣтоно́сныхъ страда́лецъ, возсія́вши чуде́сными заря́ми, тму́ отгна́ пре́лести многобо́жныя, и прельще́нныя къ сія́нію Боже́ственныя вѣ́ры вся́ наста́висте.

Младе́нствующій наро́дъ, благочести́віи му́ченицы, Боже́ственными уче́ніи къ стези́ Боже́ственнаго ра́зума наста́висте и тре́бища де́монская моли́твою, блаже́нніи, низложи́сте.

Богоро́диченъ: Неискусобра́чная Дѣ́во, Ея́же ра́ди на́мъ возсія́ Сло́во, е́же вы́ше вся́каго нача́ла разумѣва́емо, спаса́й ста́до Твое́ и вся́къ гра́дъ и страну́ отъ вся́каго обстоя́нія, Богора́дованная.

Конда́къ святы́хъ, гла́съ 8. Подо́бенъ: Яко нача́тки.

Яко благоче́стія му́ченики и страда́льцы Христо́вы богому́дрены, вселе́нная пресла́вно почита́етъ Фло́ра и Ла́вра дне́сь, я́ко да улучи́мъ благода́ть и ми́лость моли́твами и́хъ и изба́вимся бѣ́дъ и напа́стей, гнѣ́ва же и ско́рби въ де́нь су́дный.

Сѣда́ленъ, гла́съ 8. Подо́бенъ: Прему́дрости.

Зо́дчіи показа́стеся духо́вніи, назда́сте вѣ́рою благочести́выхъ ду́ши, Боже́ственною благода́тію на ка́мени вѣ́ры, и, себе́ са́ми соверши́вше хра́мъ свяще́нъ честны́я Тро́ицы, тве́рдо пострада́сте. Тѣ́мъ и исцѣле́нія источа́ете вѣ́рою къ ва́мъ притека́ющимъ, и стра́сти отгоня́ете, страстоно́сцы самобра́тніи. Моли́те Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять ва́шу.

Сла́вы, и ны́нѣ, пра́здника:

Яже Бо́га заче́нши безъ сѣ́мене и воплоще́нна ро́ждши безъ тли́, но́вымъ одѣя́ніемъ облекла́ся еси́ нетлѣ́нія Ду́ха: я́ко Жи́зни бо Ма́ти и всѣ́хъ Цари́ца, къ жи́зни преста́вилася еси́, Дѣ́во, невеще́ственнѣй. Тѣ́мже по достоя́нію вои́стинну показа́лася еси́ о́блакъ, источа́ющь жи́зни на́шея во́ды, Богома́ти Всенепоро́чная, моли́ Сы́на Твоего́ и Бо́га согрѣше́ній оставле́ніе пода́ти пра́зднующимъ любо́вію свято́е Твое́ успе́ніе.

Пѣ́снь 4.

Ирмо́съ: Рѣ́чи проро́ковъ и гада́нія, воплоще́ніе прояви́ша отъ Дѣ́вы Твое́, Христе́: сія́ніе блиста́нія Твоего́ во свѣ́тъ язы́ковъ изы́детъ, и возгласи́тъ Тебѣ́ бе́здна съ весе́ліемъ: си́лѣ Твое́й сла́ва, Человѣколю́бче.

Ви́дите лю́діе и чуди́теся: Гора́ бо свята́я и я́вственная Бо́гу въ небе́сныя оби́тели превы́шше взе́млется, Не́бо земно́е въ небе́сное и нетлѣ́нное селе́ніе вселя́емо.

Жи́зни присносу́щныя и лу́чшія, сме́рть Твоя́ бы́сть прехожде́ніе, Чи́стая, отъ привре́менныя къ Боже́ственнѣй вои́стинну и непреходи́мѣй, преставля́я Тя́, Чи́стая, въ весе́ліи Сы́на зрѣ́ти Твоего́ и Го́спода.

Взя́шася две́ри небе́сныя, и Ангели воспѣ́ша, и прія́тъ Христо́съ дѣ́вства Своея́ Ма́тере сосу́дъ; Херуви́ми подъя́ша Тя́ съ весе́ліемъ, Серафи́ми же сла́вятъ, ра́дующеся.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти́: си́лѣ Твое́й сла́ва, Человѣколю́бче.

Юношски со враго́мъ спле́тшеся, до́бліи, сего́ низложи́сте кре́стнымъ ору́жіемъ тве́рдо и сокруше́нныя грѣхо́мъ сотвори́ша хра́мы Го́сподеви жи́вы, благоче́стно пою́щія: си́лѣ Твое́й сла́ва, Человѣколю́бче.

Отъ Христа́ — ка́мене усѣ́ченаго, я́коже пи́шетъ, отъ горы́ — Дѣ́вы Богоотрокови́цы укрѣ́пльшеся, всесла́вніи святíи, и́доломъ сокруше́ніе содѣ́ласте, и взя́ти бы́сте къ горѣ́ явле́ннѣй муче́нія, и а́нгеломъ я́вѣ уподо́бистеся.

Еди́ну зарю́ трисо́лнечнаго Божества́ безбо́жнымъ ра́дующеся возвѣсти́ дво́ица честна́я му́ченикъ, Фло́ръ же и Ла́връ, и муче́нія ча́шу испи́ша усе́рдно, Христу́ пою́ще: сла́ва си́лѣ Твое́й, Человѣколю́бче.

Зако́ну Бо́жію покло́ньшеся, преклони́ша беззако́нныя сего́ еди́наго чести́ отверзе́ніемъ оче́съ, разу́мная и́хъ зрѣ́нія просвѣ́щше, му́ченицы боже́ственніи, свѣти́льника два́, и́же концы́ вся́ просвѣти́вше.

Богоро́диченъ: Яко Чи́стую отъ родо́въ избра́, Богоро́дице, Тя́ Приснодѣ́ву Зижди́тель всѣ́хъ и Бо́гъ, и Твою́ утро́бу пала́ту содѣ́ла нескве́рну еди́ный Ца́рь вѣко́въ, и изъ Тебе́ человѣ́комъ яви́ся.

Пѣ́снь 5.

Ирмо́съ: Бо́жію и неизрече́нную добро́ту, добродѣ́телей Твои́хъ, Христе́ исповѣ́мъ: отъ Присносу́щныя бо Сла́вы, Соприсносу́щное и Ѵпоста́сное возсія́вый Сія́ніе, изъ дѣ́вственныя утро́бы, су́щимъ во тмѣ́ и сѣ́ни, вопло́щся, возсія́лъ еси́ Со́лнце.

Яко на о́блацѣ Дѣ́во, апо́стольскій ли́къ носи́мь, къ Сіо́ну отъ коне́цъ, служи́ти Тебѣ́, Облаку ле́гкому, собира́шеся: отъ Нея́же Вы́шній Бо́гъ, су́щимъ во тьмѣ́ и сѣ́ни, Пра́ведное возсія́ Со́лнце.

Тру́бъ, богопрія́тніи язы́цы богосло́вныхъ муже́й благогла́снѣйше Богоро́дицѣ вопія́ху, исхо́дную возглаша́юще пѣ́снь Ду́хомъ: ра́дуйся нетлѣ́нный Исто́чниче, Бо́жія живонача́льнаго и спаси́тельнаго всѣ́мъ воплоще́нія.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Раздѣле́нія не подъя́тъ боже́ственная дво́ица му́ченикъ самобра́тная: Нераздѣ́льнѣй бо Святѣ́й Тро́ицѣ вѣ́ровавше еди́ною наде́ждою, раздѣле́ніемъ пре́лести безмѣ́стныя содержи́мыя совокупи́ благода́тію.

Истины ве́рвію, оско́рдомъ же боже́ственнаго ра́зума окамене́нныя мы́сли благоче́стно, страда́льцы, истеса́вше, хра́мы Тро́ицѣ пресла́вны Боже́ственною вѣ́рою содѣ́ласте, си́лою Ду́ха.

Кореносѣка́тели зло́бы вся́кія яви́стеся, му́ченицы сла́вніи, сади́тели же вся́каго благоче́стія и словесы́ и вещьми́: изра́стшій цвѣ́тъ Іессе́евъ отъ ко́рене Боже́ственнаго въ непроходи́мыхъ сердца́хъ насади́сте.

Богоро́диченъ: Пре́жде всѣ́хъ вѣ́къ, Дѣ́во, сокрове́нное вели́кое та́инство, е́же не увѣ́дѣно бы́сть родо́мъ пе́рвымъ, Всенепоро́чная, Тобо́ю яви́ся Сло́во Отчее Превѣ́чное, вопло́щся и бы́въ Человѣ́къ.

Пѣ́снь 6.

Ирмо́съ: Морскíй пучиноро́дный ки́товъ вну́тренній о́гнь — тридне́внаго Твоего́ погребе́нія проображе́ніе, его́же Іо́на проро́къ показа́ся. Спасе́нъ бо, я́ко и предпосла́ся, неврежде́нъ, вопія́ше: пожру́ Ти́ со гла́сомъ хвале́нія, Го́споди.

Дае́тъ Тебѣ́, я́же превы́ше естества́, Ца́рь всѣ́хъ Бо́гъ: въ рождествѣ́ бо Дѣ́ву я́коже сохрани́, та́ко во гро́бѣ тѣ́ло соблю́дъ нетлѣ́нно и спросла́ви Боже́ственнымъ преставле́ніемъ, че́сть Тебѣ́, я́ко Сы́нъ Ма́тери, да́руя.

Вои́стинну Тя́, я́ко свѣ́телъ свѣ́щникъ, невеще́ственнаго Свѣ́та, кади́льницу злату́ю Боже́ственнаго Угля, во Свята́я святы́хъ всели́, ру́чку и же́злъ, скрижа́ль богопи́санную, ковче́гъ святы́й, трапе́зу Сло́ва жи́зни, Дѣ́во, Рождество́ Твое́.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Терпѣ́ніемъ неукло́ннымъ беззако́нныя побѣжда́юще, по зако́ну, страда́льцы, Христу́ достохва́льный коне́цъ принесо́сте, не покры́вшеся нече́стія су́етствомъ.

Ору́жія си́льнаго явля́еми Ду́ха, побѣди́сте враги́ безпло́тныя, блаже́нніи, и стра́сть блаже́нную въ ре́бра Прободе́ннаго благоче́стно вообрази́сте.

Якоже два́ предобра́ сосца́, сла́вніи, яви́стеся Це́ркви Христо́вѣ, не млеко́ пролива́юще, но да́ръ незави́стенъ и спаси́теленъ исцѣле́ній источа́юще.

Богоро́диченъ: Неду́говавшую ду́шу мою́ грѣхо́мъ исцѣли́, Яже Врача́ ду́шъ и тѣле́съ ро́ждшая, Пречи́стая, Его́же боже́ственніи му́ченицы исповѣ́дающе, вра́чеве страсте́й яви́стеся.

Конда́къ пра́здника, гла́съ 2:

Въ моли́твахъ неусыпа́ющую Богоро́дицу и въ предста́тельствахъ непрело́жное упова́ніе, гро́бъ и умерщвле́ніе не удержа́ста: я́коже бо Живота́ Ма́терь, къ животу́ преста́ви, во утро́бу Всели́выйся приснодѣ́вственную.

Икосъ:

Огради́ моя́ помышле́нія, Христе́ мо́й, и́бо Стѣ́ну мíра воспѣ́ти дерза́ю, Чи́стую Ма́терь Твою́, на столпѣ́ глаго́лъ укрѣпи́ мя, и въ тя́жкихъ мы́слехъ заступи́ мя, Ты́ бо взыва́ющимъ и прося́щимъ вѣ́рою моле́нія исполня́еши. Ты́ мнѣ́ у́бо да́руй язы́къ прино́сенъ и по́мыслъ непосты́денъ: вся́кое бо дая́ніе сія́нія отъ Тебе́ низпосыла́ется, Свѣтопода́телю, во утро́бу всели́выйся приснодѣ́вственную.

Пѣ́снь 7.

Ирмо́съ: Безсту́днѣй я́рости же и огню́ Боже́ственное жела́ніе сопротивля́яся, о́гнь у́бо ороша́ше, я́рости же смѣя́шеся, богодохнове́нною слове́сною преподо́бныхъ тривѣща́нною цѣвни́цею, противовѣща́я мусикíйскимъ орга́номъ посреди́ пла́мене: препросла́вленный отце́въ и на́шъ Бо́же, благослове́нъ еси́.

Богодѣ́ланныя скрижа́ли Моисе́й, пи́санныя Боже́ственнымъ Ду́хомъ, я́ростію сокру́шъ, но сего́ Влады́ка, Ро́ждшую неврежде́нну въ небе́сныя сохра́нь до́мы, ны́нѣ вну́трь всели́. Съ Не́ю игра́юще, вопіе́мъ Христу́: препросла́вленный отце́въ и на́шъ Бо́же, благослове́нъ еси́.

Въ кимва́лѣхъ — усты́ чи́стыми, мусикíйски же — се́рдцемъ свѣ́тлымъ, доброгла́сною трубо́ю — высо́кою мы́слію, Дѣ́вы и Чи́стыя въ наро́читый избра́нный де́нь преставле́нія, дѣ́тельными пле́щуще рука́ми, вопіе́мъ: препросла́вленный отце́въ и на́шъ Бо́же, благослове́нъ еси́.

Богому́дріи, собери́теся, лю́діе: Бо́жія бо сла́вы Селе́ніе, отъ Сіо́на преставля́ется къ небе́сному жили́щу, идѣ́же гла́съ чи́стъ пра́зднующихъ, гла́съ несказа́ннаго ра́дованія, и въ весе́ліи вопію́щихъ Христу́: препросла́вленный отце́въ и на́шъ Бо́же, благослове́нъ еси́.

Инъ.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Древяны́я у́бо и ка́менныя бо́ги безбо́жныхъ разори́ша, столпы́ богоразу́мныя, Фло́ръ и Ла́връ великоимени́тіи, пою́щимъ себе́ возста́виша: благослове́нъ Бо́гъ оте́цъ на́шихъ.

Су́ще испо́лнени огня́ Боже́ственнаго, му́ченицы, Ду́ха, въ пе́щь воврещи́ преподо́бныя му́жи непра́ведно хотя́щія, ту́чами боже́ственныхъ моли́твъ ва́шихъ соблюдо́сте неврежде́ны, сла́вніи.

Боля́щимъ исцѣле́ніе, оби́димымъ избавле́ніе, бѣ́дствующимъ всѣ́мъ спасе́ніе при́сно подаю́тъ Фло́ръ и Ла́връ, вопію́ще, му́ченицы: благослове́нъ Бо́гъ оте́цъ на́шихъ.

Богоро́диченъ: Яко ши́покъ удо́лія, Тя́ въ житіи́, Отрокови́це, Христо́съ избра́ и, въ Тя́ всели́вся, пло́тію про́йде, благово́нствуя на́съ богоразу́мія дохнове́ніи, Всенепоро́чная, Богоро́дицу при́сно исповѣ́дающихъ Тя́.

Пѣ́снь 8.

Ирмо́съ: Пла́мень, ороша́ющь преподо́бныя, злочести́выя же попаля́ющь, Ангелъ Бо́жій всемо́щный показа́ отроко́мъ, живонача́льный же исто́чникъ содѣ́ла Богоро́дицу, тлю́ сме́рти и живо́тъ точа́щу пою́щимъ: Содѣ́теля еди́наго пои́мъ, изба́вленніи, и превозно́симъ во вся́ вѣ́ки.

Глаго́лы послѣ́доваху Боже́ственному Ковче́гу свяще́нному, все́ мно́жество богосло́вовъ въ Сіо́нѣ: ка́мо и́деши ны́нѣ, Ски́ніе, — зову́ще, — Бо́га Жива́го? Не преста́й призира́ющи вѣ́рою пою́щія: Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

Якоже, воздѣ́вши ру́цѣ, исхо́диши Всенепоро́чная, ру́цѣ, и́миже Бо́га носи́ла еси́ пло́тію, со дерзнове́ніемъ, я́ко Ма́ти, рекла́ еси́ къ Рожде́нному: я́же Ми́ да́лъ еси́, во вѣ́ки сохрани́, вопію́щія Тебѣ́: Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Глаго́ломъ живы́мъ пита́юще ду́ши, всеприснопа́мятніи, гла́домъ та́ющимъ — спаси́тельное бра́шно, убо́гимъ — промышле́ніе и си́рымъ яви́стеся, всѣ́мъ дово́льствующе, и Христу́ пою́ще: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Освяще́нно иму́ще житіе́ и кончи́ну, вре́мя до́лго, му́дріи, скрыва́еми, отъ земли́ изда́стеся, па́че зари́ со́лнечныя на́мъ возсія́вше лучи́ пресла́вныхъ чуде́съ, вѣ́рою пою́щимъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Два́ свѣти́льника яви́стеся мы́сленнѣй тве́рди, Це́рковь свяще́нно украша́юще, и всю́ просвѣща́ете свѣ́тло тва́рь, при́сно чудотворе́ніи страстоте́рпцы, вопію́ще: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Святѣ́йши еси́ а́нгелъ, ро́ждши, Дѣ́во Пресвята́я, святы́хъ Свята́го, за милосе́рдіе бы́вша несмѣ́сно Человѣ́ка, я́коже есмы́, спасти́ вопію́щія Ему́ непреста́нно: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Пѣ́снь 9.

Ирмо́съ: Побѣжда́ются естества́ уста́вы въ Тебѣ́, Дѣ́во Чи́стая: дѣ́вствуетъ бо рождество́ и живо́тъ предобруча́етъ сме́рть; по рождествѣ́ Дѣ́ва и по сме́рти жива́, спаса́еши при́сно, Богоро́дице, наслѣ́діе Твое́.

Дивля́хуся Ангельскія си́лы, въ Сіо́нѣ смотря́юще своего́ Влады́ку, же́нскую ду́шу рука́ми нося́щаго, пречи́сто бо Ро́ждшей, сынолѣ́пно провозглаша́ше: гряди́, Чи́стая, съ Сы́номъ и Бо́гомъ просла́вленна бу́ди.

Опря́та ли́къ апо́стольскій богопрія́тное тѣ́ло Твое́, со стра́хомъ зря́ще и гла́сомъ ве́ліимъ вѣща́юще: въ небе́сныя до́мы къ Сы́ну восходя́щи, спаса́еши при́сно, Богоро́дице, наслѣ́діе Твое́.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Се́ у́бо, — вопія́ше дре́вле Дави́дъ, — что́ добро́, и красно́, и спаси́тельно? Но е́же я́вѣ боже́ственнымъ бра́тіямъ вку́пѣ жи́ти въ ду́сѣ, подви́гшимся я́сно и побѣ́ду взе́мшимъ на діа́вола, и́хже по достоя́нію ублажа́емъ.

Красны́ яви́стеся о́чи честны́я Це́ркве благода́тію, и о́чи, дре́вле ослѣпле́ныя тмо́ю лю́тою, и пре́жде сме́рти, святíи, и по кончи́нѣ свяще́ннѣй отверзо́сте въ сла́ву всѣ́хъ Благодѣ́телю, Ла́вре и Фло́ре достохва́льніи.

Зна́меньми явле́нными и стра́шными Христо́съ гро́бъ ва́шъ, святíи, и ра́ку, дре́вле я́коже прорече́, явля́етъ, идѣ́же терпѣли́вая тѣлеса́ лежа́ху свяще́нно, лучи́ исцѣле́ній испуща́юще бога́тно и благово́ніе достохва́льное.

Боже́ственная и свѣтоно́сная вои́стинну дво́ица, Ла́вре и Фло́ре, добропобѣ́дніи му́ченицы, на небесѣ́хъ всегда́ Тро́ицѣ Вседѣ́тельнѣй предстоя́ще, избавле́ніе грѣхо́въ лю́тыхъ испроси́те, вѣ́рою ва́шу боже́ственную па́мять на земли́ торжеству́ющимъ.

Богоро́диченъ: Стра́шно Твое́ рождество́, Ма́ти Чи́стая, небе́сныя бо Его́же трепе́щутъ чи́ни, Сло́ва Бо́жія, Человѣ́ка бы́вша на земли́, па́че естества́ родила́ еси́, пребы́вши Дѣ́вою, я́коже пре́жде. Тѣ́мже Тя́, Богоро́дицу, и язы́комъ и се́рдцемъ исповѣ́дающе, велича́емъ.

Свѣти́ленъ пра́здника. Подо́бенъ: Не́бо звѣзда́ми.

Апо́столи отъ коне́цъ совоку́пльшеся здѣ́, въ Геѳсиманíйстѣй ве́си погреби́те тѣ́ло Мое́, и Ты́, Сы́не и Бо́же Мо́й, пріими́ ду́хъ Мо́й.

Сла́ва, и ны́нѣ, то́йже.

На стихо́внѣ стихи́ры [пра́здника], гла́съ 2: Подо́бенъ: До́ме Евфра́ѳовъ.

Ли́къ учени́къ собира́ется* погребсти́ Ма́терь Богоро́дицу,* прише́дше отъ коне́цъ,* всеси́льнымъ манове́ніемъ.

Сти́хъ: Воскресни́, Го́споди, въ поко́й Тво́й,* Ты́ и Киво́тъ святы́ни Твоея́.

Невѣ́ста Бо́жія,* Цари́ца Дѣ́ва,* избра́ннымъ сла́ва,* хвала́ дѣ́вамъ,* къ Сы́ну преселя́ется.

Сти́хъ: Кля́тся Госпо́дь Дави́ду и́стиною,* и не отве́ржется eя́.

Тѣ́ло Твое́* тлѣ́нія непристу́пно бы́сть* и къ погребе́нію преда́ся* естество́мъ зако́на,* пребыва́етъ же нетлѣ́нно.

Сла́ва, и ны́нѣ, гла́съ 4:

Всечестно́е Твое́ успе́ніе, Пресвята́я Дѣ́во Чи́стая, а́нгелъ мно́жество на небеси́, и человѣ́ческій ро́дъ на земли́, ублажа́емъ, я́ко Ма́ти была́ еси́ Творца́ всѣ́хъ Христа́ Бо́га, Того́ моля́щи не преста́й о на́съ, мо́лимся, и́же на Тя́ съ Бо́гомъ упова́ніе поло́жшихъ, Богоро́дице Всепѣ́тая и Неискусобра́чная.


НА ЛИТУРГІИ,

Блаже́нна пра́здника, пѣ́снь 4-я обою́ кано́новъ, со ирмосо́мъ на 6. Проки́менъ пра́здника, [пѣ́снь Богоро́дицы, гла́съ 3: Вели́читъ душа́ моя́ Го́спода, и возра́довася ду́хъ Мо́й о Бо́зѣ Спа́се Мое́мъ. Сти́хъ: Яко призрѣ́ на смире́ніе рабы́ Свое́я, се́ бо отъ ны́нѣ ублажа́тъ Мя́ вси́ ро́ди.] И святы́хъ, гла́съ 4: Святы́мъ, и́же су́ть на земли́ Его́, удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, я́ко одесну́ю мене́ е́сть, да не подви́жуся. Апо́столъ ко Ефесе́емъ, зача́ло 233. [Аллилу́ія пра́здника, гла́съ 2: Воскресни́, Го́споди, въ поко́й Тво́й, Ты́ и Киво́тъ святы́ни Твоея́. Сти́хъ: Кля́тся Госпо́дь Дави́ду и́стиною, и не отве́ржется ея́. И святы́хъ, гласъ 4: Воззва́ша пра́ведніи, и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ.] Ева́нгеліе Луки́, зача́ло 63. Прича́стенъ [пра́здника: Ча́шу спасе́нія пріиму́, и и́мя Госпо́дне призову́. И святы́хъ:] Ра́дуйтеся пра́ведніи о Го́сподѣ, [пра́вымъ подоба́етъ похвала́.]

Источникъ: Минíа, мѣ́сяцъ Аѵгустъ . — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 181 об. – 189.

/ Къ оглавленію раздѣла /


Наверхъ / Къ титульной страницѣ

0