Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Кано́ны 8-ми́ гласо́въ
преподо́бному Іоа́нну Ры́льскому, пѣва́еміи [во оби́тели его́] на моле́бнѣхъ въ четверто́къ, и́же и на у́трени чита́еміи по суббо́тамъ.

Кано́нъ [моле́бный], гла́съ 7:

[Благослови́вшу свяще́ннику, начина́емъ псало́мъ 142-й: Го́споди, услы́ши моли́тву мою́... Сла́ва, и ны́нѣ. Аллилу́ія [3]. Та́же: Бо́гъ Госпо́дь... [4] И тропа́рь преподо́бнаго: Покая́нія основа́ніе... Сла́ва, и ны́нѣ, богоро́диченъ: Гавріи́лу вѣща́вшу... И а́біе псало́мъ 50-й: Поми́луй мя́, Бо́же...]. [Ищи́ все́ сіе́ въ кано́нѣ 1-го гла́са.]

Пѣ́снь 1.

Ирмо́съ: Ма́ніемъ Твои́мъ на земны́й о́бразъ преложи́ся пре́жде удоборазлива́емое водно́е естество́, Го́споди. Тѣ́мже немо́кренно пѣшеше́ствовавъ Изра́иль, пое́тъ Тебѣ́ пѣ́снь побѣ́дную.

Благода́ть имы́й въ себѣ́ отъ вы́шнія прему́дрости, тоя́ да́ръ пода́ждь ми́, рабу́ твоему́, я́ко да, ра́дуяся, воспою́ по́двиги твоя́, прему́дре.

По́ты по́стническими, я́коже въ мо́ри Чермнѣ́мъ, потопи́лъ еси́ фарао́на прего́рдаго и въ зе́млю обѣтова́нія дости́глъ еси́, преблаже́нне.

Ду́хомъ Святы́мъ укрѣпи́вся, духо́въ зло́бы побѣди́лъ еси́ жезло́мъ ве́ры, храня́ше бо тя́ Иже жезло́мъ мо́ре лю́демъ раздѣли́вый.

Богоро́диченъ: Дѣ́ва и Ма́ти па́че естества́ яви́лася еси́, Еди́наго отъ Еди́наго роди́вши, вся́ исполня́ющаго, я́коже Са́мъ вѣ́сть.

Пѣ́снь 3.

Ирмо́съ: Въ нача́лѣ небеса́ всеси́льнымъ Сло́вомъ Твои́мъ утверже́й, Го́споди Спа́се, и Вседѣ́тельнымъ и Бо́жіимъ Ду́хомъ всю́ си́лу и́хъ, на недви́жимѣмъ мя́ ка́мени исповѣ́данія Твоего́ утверди́.

Земна́я я́ко тлѣ́нна прему́дренно оста́вивъ, послѣ́довалъ еси́ возсія́вшему воздержа́ніемъ Предте́чи и, въ пусты́ню всели́вся, тезоимени́тъ вои́стинну дѣ́лы боже́ственными тому́ показа́лся еси́.

Въ ко́жу обле́кся и кре́стнымъ огра́ждься ору́жіемъ, мо́ре страсте́й плотски́хъ преплы́лъ еси́ немо́кренно, я́коже Елиссе́й иногда́ ми́лотію Иліино́ю быстрину́ рѣки́ Іорда́на.

Якоже сто́лпъ яви́лся еси́, основа́нъ на Ка́мени, усѣ́кшемся отъ горы́ дѣви́ческія, тѣ́мъ, де́монское каменомета́ніе му́жески отрази́въ, я́коже степе́ньми, къ небе́сному восхожде́нію восте́клъ еси́.

Богоро́диченъ: Лѣ́ствицу Тя́ прови́дѣша, до небесе́ утвержде́нну, Влады́чице Чи́стая, Еюже отъ земли́ къ небе́снымъ ро́дъ человѣ́ческій Бо́гъ съ Собо́ю вознесе́ и въ сла́вѣ Свое́й спосади́.

[На моле́бнѣ а́біе: Спаси́ отъ бѣ́дъ... и При́зри благосе́рдіемъ.., сугу́бая ектенія́ и сѣда́ленъ, гла́съ 2: Моле́ніе те́плое...]. [Ищи́ все́ сіе́ въ кано́нѣ 1-го гла́са.]

Пѣ́снь 4.

Ирмо́съ: Отча нѣ́дра не оста́вль и соше́дъ на зе́млю, Христе́ Бо́же, та́йну услы́шахъ смотре́нія Твоего́ и просла́вихъ Тя́, еди́не Человѣколю́бче.

Ангельское житіе́ на земли́ явля́я, а́лченъ пребыва́лъ еси́, преблаже́нне, хлѣ́бомъ вѣ́рнымъ укрѣпля́емь всю́ тва́рь Пита́ющаго.

Процвѣ́лъ еси́, я́коже кри́нъ въ те́рніихъ, и сія́ возвели́чилъ еси́ воня́ми по́двигъ твои́хъ, благоуха́нно вѣнча́я ро́дъ тво́й благода́тію.

Боже́ственнымъ серпо́мъ страстно́е ссѣ́къ те́рніе отъ ни́вы души́ твоея́, слеза́ми, о́тче, и кла́съ безстра́стія пожа́лъ еси́, ра́дуяся.

Богоро́диченъ: Авваку́мъ Тя́ го́ру прови́дѣ осѣне́нную, изъ Тебе́ бо про́йде Святы́й, Пренепоро́чная, небеса́ покрыва́я добродѣ́телію Свое́ю.

Пѣ́снь 5.

Ирмо́съ: Го́споди Бо́же мо́й, отъ но́щи у́треневавъ, Тебѣ́ молю́ся: пода́ждь ми́ оставле́ніе прегрѣше́ній мои́хъ и къ свѣ́ту Твои́хъ повелѣ́ній пути́ моя́ напра́ви, молю́ся.

Возве́лъ еси́ о́чи твои́ къ Бо́гу, спасти́ могу́щему, и шата́нія врага́ лука́ваго на зе́млю низве́рглъ еси́, тѣ́мже отъ него́ бори́мымъ помога́еши.

Блюды́й пя́ты твоя́ и но́зѣ главу́ свою́ сокруши́, ты́ же на небеса́ возше́лъ еси́ невозбра́нно, отъ у́зъ свобожде́нъ плотски́хъ.

Якоже юне́цъ, яре́мъ Госпо́день поне́съ и души́ твоея́ зе́млю удобри́въ, несѣ́янно слану́токъ возрасти́лъ еси́ себѣ́ на ма́лую пи́щу.

Богоро́диченъ: Ма́ніемъ Боже́ственнымъ вся́ческая Нося́щаго во чре́вѣ Твое́мъ имѣ́ла еси́, Влады́чице, и млеко́мъ пита́ла еси́ отъ сосцу́ Твое́ю младе́нцы во чре́вѣ ма́терни Пита́ющаго.

Пѣ́снь 6.

Ирмо́съ: Іо́на изъ чре́ва а́дова вопія́ше: возведи́ отъ тли́ живо́тъ мо́й. Мы́ же Тебѣ́ вопіе́мъ: Всеси́льне Спа́се, поми́луй на́съ.

Во дре́вѣ кры́яся ду́пленнѣ, сѣте́й лука́ваго избѣ́глъ еси́ и къ Боже́ственнымъ жили́щемъ, я́коже оре́лъ, высоко́ паря́, восте́клъ еси́.

Не вола́ закла́лъ еси́, Тро́ицу въ ду́бѣ страннопріе́мля, я́коже Авраа́мъ дре́вле, но сама́го себе́, добродѣ́тельми соверша́ема.

Па́че живота́ умрѣ́ти изво́лилъ еси́ по сло́ву апо́стола и спогре́блся еси́ Христу́, за ны́ уме́ршему и тридне́вно воскре́сшему.

Богоро́диченъ: Окрада́ема хотѣ́ніемъ божества́, Ева дре́вле кля́тву введе́; Ты́ же, Бо́га поро́ждши, благослове́ніе ввела́ еси́, Ма́ти Дѣ́во.

[Аще моле́бенъ: Спаси́ отъ бѣ́дъ... и При́зри благосе́рдіемъ.., ектенія́, та́же конда́къ, гла́съ 2: Моля́щимъ тя́ теплѣ́йшій засту́пниче... И ве́сь ева́нгельскій чи́нъ, я́коже преднаписа́ся]. [Ищи́ все́ сіе́ въ кано́нѣ 1-го гла́са.]

Пѣ́снь 7.

Ирмо́съ: Пе́щь о́троцы огнепа́льну дре́вле росоточа́щу показа́ша, еди́наго Бо́га воспѣва́юще и глаго́люще: превозноси́мый отце́въ Бо́гъ и препросла́вленъ.

Во́ду проше́дъ непостоя́нную, Іоа́нне преблаже́нне, ны́нѣ на вода́хъ поко́йныхъ всели́лся еси́ и ороша́еши ду́ши притека́ющихъ ти́.

Яви́лся еси́ ми́лостивъ и кро́токъ, Іоа́нне блаже́нне, се́рдцемъ же чи́стъ и непоро́ченъ, тѣ́мъ Бо́га ви́дѣлъ еси́, при́сно чи́стыя утѣша́ющаго.

Но́щь страсте́й преше́дъ и ко дни́ дости́гъ безстра́стія, сы́нъ бы́лъ еси́ невече́рнія благода́ти, озаря́я вѣ́рою блажа́щія тя́.

Богоро́диченъ: Го́ру Тя́ прови́дѣ Даніи́лъ, Дѣ́во, отъ нея́же отсѣче́ся Ка́мень, и́долы сокруши́вый и зе́млю всю́ благода́тію испо́лнивый.

Пѣ́снь 8.

Ирмо́съ: Еди́наго Безнача́льнаго Царя́ Сла́вы, Его́же благословя́тъ небе́сныя си́лы и трепе́щутъ чи́ни а́нгельстіи, по́йте, свяще́нницы, лю́діе, превозноси́те Его́ во вѣ́ки.

Кипя́тъ отъ ра́ки моще́й твои́хъ исто́чницы благодѣя́ній и вѣ́рныхъ веселя́тъ сердца́, я́коже рѣ́ки дре́вле Еде́мскаго рая́, богому́дре.

Въ броню́ вѣ́ры тѣ́ло одѣ́явъ, лице́ же свое́ безъ покрыва́ла имы́й, бдѣ́нія претерпѣ́лъ еси́ крѣ́пко и Бо́га зрѣ́лъ еси́ Моисе́йски.

Узъ тѣле́сныхъ, я́ко ме́ртвъ, разрѣши́лся еси́, но, я́ко жи́въ, неруши́мь пребыва́еши, многолѣ́тныя рѣша́ болѣ́зни си́лою сме́рть претерпѣ́вшаго Влады́ки Христа́.

Богоро́диченъ: На горѣ́ Сина́йстѣй прови́дѣ Тя́ Моисе́й купину́, огне́мъ неопали́мую, Влады́чице, пребыла́ бо еси́ неопали́ма отню́дь, Боже́ственный Огнь неизрече́нно пріе́мши во утро́бѣ Твое́й.

Пѣ́снь 9.

Ирмо́съ: Нетлѣ́нія искуше́ніемъ ро́ждшая и всехитрецу́ Сло́ву пло́ть взаимода́вшая, Ма́ти Неискусому́жная, Дѣ́во Богоро́дице, Прія́телище Нестерпи́маго, Село́ Невмѣсти́маго Зижди́теля Твоего́, Тя́ велича́емъ.

Съ ли́ки преподо́бныхъ водворя́яся, у престо́ла Влады́ки твоего́ предстои́ши, ра́дуяся, Его́же моли́ отъ вся́кихъ скорбе́й изба́витися предстоя́щимъ ра́цѣ моще́й твои́хъ и твоему́ предста́тельству моля́щимся.

Всесвѣ́телъ сы́й, я́коже со́лнце, це́рковь твою́ озаря́еши, преподо́бне, просвѣти́ у́бо твои́ми свѣтоли́тіи мра́комъ одержи́мыя и лю́тыми неду́ги къ тебѣ́ притека́ющія и страсте́й разли́чныхъ изба́ви.

Дерзну́въ, пѣ́снь ны́нѣ принесо́хъ ти́, преподо́бне, отъ Бо́га благода́ть тобо́ю получи́ти моля́ся и страсте́мъ всѣ́мъ разрѣше́ніе, житію́ же исправле́ніе и души́ спасе́ніе, да, ра́дуяся, при́сно прославля́ю тя́.

Богоро́диченъ: Разноли́чно проро́цы Тя́ проповѣ́даша: ру́чку злату́ю и свѣ́щникъ, две́рь и мо́стъ, го́ру осѣне́нную и лѣ́ствицу. Мы́ же, сбытіе́ си́хъ вѣ́рою ви́дяще, Богоро́дицу Тя́ проповѣ́дуемъ.

[И а́ще у́бо моле́бенъ, а́біе: Досто́йно е́сть.., велича́нія, во гла́съ 2: Ангела земна́го.., Трисвято́е, тропа́рь съ богоро́дичнымъ, ектенія́, моли́тва и отпу́стъ]. [Ищи́ все́ сіе́ въ кано́нѣ 1-го гла́са.]

Источникъ: Богослужебная послѣдованія на все лѣто преподобному и богоносному отцу нашему Іоанну Рыльскому, съ приложеніемъ. † Левкійскій епископъ Парѳеній. — Софія: Синодально издательство, 1955. — C. 208-212.

/ Къ оглавленію раздѣла /


Наверхъ / Къ титульной страницѣ

0