Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Кано́ны 8-ми́ гласо́въ
преподо́бному Іоа́нну Ры́льскому, пѣва́еміи [во оби́тели его́] на моле́бнѣхъ въ четверто́къ, и́же и на у́трени чита́еміи по суббо́тамъ.

[Кано́нъ моле́бный, гла́съ 6:]

[Благослови́вшу свяще́ннику, начина́емъ псало́мъ 142-й: Го́споди, услы́ши моли́тву мою́... Сла́ва, и ны́нѣ. Аллилу́ія [3]. Та́же: Бо́гъ Госпо́дь... [4] И тропа́рь преподо́бнаго: Покая́нія основа́ніе... Сла́ва, и ны́нѣ, богоро́диченъ: Гавріи́лу вѣща́вшу... И а́біе псало́мъ 50-й: Поми́луй мя́, Бо́же...]. [Ищи́ все́ сіе́ въ кано́нѣ 1-го гла́са.]

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Да дѣ́лъ твои́хъ свѣ́тъ вели́кій, въ нощи́ жите́йстѣй блиста́ющій, предъ человѣ́ки воспою́, зарю́ ми́ благода́ти твоея́ возсія́й, о́тче Іоа́нне.

Яко морскíя пучи́ны бу́рею носи́мь и вся́ разумѣ́въ, сама́го себе́ соблю́лъ еси́ и, на го́ру возше́дъ, морски́хъ во́лнъ мно́гія изыма́еши.

Отве́ргся мíра и сама́го себе́, кре́стъ взя́лъ еси́, и, Позва́вшаго тя́ въ пусты́ни обрѣ́тъ, Тому́ послѣ́довалъ еси́, и сла́ву получи́лъ еси́.

Богоро́диченъ: Черто́гъ зла́тъ Небе́сному Жениху́ была́ еси́, Пречи́стая: ри́зы бра́чныя неиму́щаго мя́ облецы́, я́ко да Го́спода моего́ ра́дости не лишу́ся.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Умертви́въ у́ды на земли́ посто́мъ и мно́гими труды́, живе́ши па́че человѣ́къ на небесѣ́хъ, живу́ща имѣ́я въ себѣ́ Іису́са Спа́са Христа́.

Сладка́ горта́ни твое́й па́че ме́да словеса́ Госпо́дня, тѣ́мъ, жите́йскія сла́дости преше́дъ, нетлѣ́нную получи́лъ еси́ сла́ву и сла́дость.

Во́дъ испо́лнь бы́въ Бо́жія Ду́ха, рѣ́ки то́чиши исцѣле́ній и мо́ре страсте́й изсуша́еши съ вѣ́рою къ тебѣ́ притека́ющимъ.

Богоро́диченъ: Утѣша́еши, я́ко жезло́мъ крѣ́пкимъ, ду́шу мою́ и му́чиши вра́гъ мои́хъ полки́; но свѣ́томъ Рождества́ Твоего́ у́мъ мо́й просвѣти́.

[На моле́бнѣ а́біе: Спаси́ отъ бѣ́дъ... и При́зри благосе́рдіемъ.., сугу́бая ектенія́ и сѣда́ленъ, гла́съ 2: Моле́ніе те́плое...]. [Ищи́ все́ сіе́ въ кано́нѣ 1-го гла́са.]

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Не носи́ти па́че еди́ныя ри́зы Спа́съ ученико́мъ повелѣ́, ты́ же, за́повѣдь превозше́дъ, раболѣ́пно обнажи́лся еси́ во еди́нѣй ко́жи.

Ра́зума острото́ю помы́сливъ Ада́ма, изгна́нна отъ мѣ́ста Еде́мскаго не пости́вшася, потща́лся еси́ вни́ти въ не́ посто́мъ и моли́твою.

Ви́дѣвъ Бо́гъ терпѣ́ніе твое́ безъ вся́каго бра́шна въ пусты́ни, слану́ткомъ тя́ напита́, кромѣ́ ра́ла того́ израсти́въ, о тебѣ́ пекíйся.

Богоро́диченъ: Нова́ Твоя́ вся́, Пречи́стая: въ рождествѣ́ бо болѣ́зни ма́тернія не яви́шася и въ дѣ́вствѣ препо́ни рождеству́ не бы́ша.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Дави́да слы́шавъ, пою́ща на го́ру взы́ти Госпо́дню, въ пусты́нныя го́ры устреми́лся еси́ и, всю́ зе́млю разумѣ́въ Госпо́дню, лице́ Бо́га Іа́ковля та́мо узрѣ́лъ еси́.

Увѣ́дѣвъ получи́ти я́же рабу́, несо́нныма очи́ма Го́спода своего́ жду́щему, но́щи и дни́ мно́ги соверши́лъ еси́, я́ко безпло́тенъ, Бо́га срѣта́я.

Жела́ніе Христо́во неразсу́дно воспріи́мъ и повелѣ́ніе дѣ́ломъ усе́рдно соверши́въ, любо́вь сродства́ и бога́тства пусты́нею измѣни́лъ еси́.

Богоро́диченъ: Еву въ тлю́ введе́ ле́сть зміи́на, Ты́ же, воспроси́вши: ка́ко безъ му́жа зачну́, дѣви́ца су́щи? — и стра́шное рождество́ увѣ́дѣвши, Бо́га породила́ еси́, отъ тли́ на́съ изба́вльшаго.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Якоже гра́дъ высо́кій, на горѣ́ предлежи́ши, преподо́бне о́тче, и ка́ко мо́жеши укры́тися, Бо́гъ бо, чудесы́ тя́ просла́вивъ, откры́лъ е́сть.

Якоже Дави́да слы́шавъ, на го́ру возше́лъ еси́ Госпо́дню и въ до́мъ Бо́га Іа́ковля и бы́лъ еси́ до́мъ одушевле́нъ Тро́ицы Безнача́льныя.

Ка́плями сле́зъ твои́хъ ка́меніе го́рское, окропля́я, извая́лъ еси́, тѣ́мъ, къ Ка́мени та́йному прите́къ, Христу́, то́чиши рѣ́ки исцѣле́ній.

Богоро́диченъ: Уязвля́емь страстьми́ болѣ́зненными, къ Тебѣ́ прибѣга́ю, Пречи́стая, моли́твами, раствори́вши, услади́ и страсте́й мя́ очи́сти.

[Аще моле́бенъ: Спаси́ отъ бѣ́дъ... и При́зри благосе́рдіемъ.., ектенія́, та́же конда́къ, гла́съ 2: Моля́щимъ тя́ теплѣ́йшій засту́пниче... И ве́сь ева́нгельскій чи́нъ, я́коже преднаписа́ся]. [Ищи́ все́ сіе́ въ кано́нѣ 1-го гла́са.]

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Въ ри́зу спасе́нія облече́ тя́ Госпо́дь, раздра́въ вре́тище жесто́каго житія́ твоего́, тѣ́мъ ны́нѣ те́пло согрѣва́еши земны́ми неду́ги одержи́мыя моли́твами твои́ми.

Возмога́емь благода́тію Христа́, Свою́ си́лу возвѣща́юща па́че въ не́мощи соверша́ти, преподо́бне, болѣ́зньми тѣ́ло твое́ сокруша́лъ еси́, и́мже безпло́тныя враги́ побѣди́ти возмо́глъ еси́.

Воспріи́мъ всеору́жіе на те́мныя си́лы, я́коже Па́велъ проповѣ́да, побѣ́ду поста́вилъ еси́ свѣ́тлую и вѣнце́мъ та́йно вѣнча́лся еси́.

Богоро́диченъ: Возвели́чи Тя́ Госпо́дь, изъ утро́бы Твоея́ проше́дъ, въ жена́хъ Благослове́нная: удиви́ у́бо на на́съ вели́чія Твоя́.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Тяготу́ на ся́ возложи́лъ еси́ ле́гкаго и́га Госпо́дня, и, ру́ку на ра́ло возло́жь, вспя́ть не обрати́лся еси́, и въ Ца́рство вше́лъ еси́.

Земна́я звѣзда́ чуде́сная облиста́лъ еси́ на за́падѣ, и на тве́рди явля́ешися церко́внѣй, и сія́еши па́че восто́ка, Іоа́нне преблаже́нне.

Вели́кому Анто́нію подо́бяся, единотру́днымъ воздержа́ніемъ и́ноческаго житія́ тому́ послѣ́довавъ, ра́венъ отъ Бо́га вѣне́цъ прія́лъ еси́.

Богоро́диченъ: Яко купина́ неопали́мая, огне́мъ Твои́мъ страсте́й мои́хъ те́рніе попали́, и, я́ко трапе́за, Твои́мъ мя́ хлѣ́бомъ напита́й, и, я́ко голуби́ца, крило́ма Твои́ма покры́й мя́.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Изба́влься отъ глубо́кихъ во́дъ и отъ ка́ла ти́ннаго, разрѣши́лся еси́ отъ тѣ́ла непоро́чно и, ду́шу не оскверни́въ мірски́ми сластьми́, чи́стъ Бо́гови предстои́ши, на вода́хъ поко́йныхъ утѣша́яся.

Проразумѣ́въ Госпо́дь, я́ко сосу́дъ избра́нъ бы́ти и́маши, воспрія́тъ тя́ вну́трь въ ра́йская селе́нія, идѣ́же а́нгели ликовству́ютъ въ преставле́ніи твое́мъ, сожи́теля тя́ и подо́бника иму́ще.

Се́ коне́цъ твоего́ преложе́нія: Бо́га ви́диши и со а́нгелы ра́дуешися, съ проро́ки и апо́столы, съ му́ченики же и по́стники. Но всѣ́хъ къ тебѣ́ приходя́щихъ проше́нія испо́лни твои́ми моли́твами, блаже́нне.

Богоро́диченъ: Мѣ́рилы пра́ведными всѣ́й земли́ судя́щаго Бо́га умоли́, Богома́ти, щедро́тъ Свои́хъ до́ждь на мя́ источи́ти, и плѣни́цу мои́хъ прегрѣше́ній растерза́ти, и въ су́дное вре́мя добродѣ́тельми мя́ украси́ти.

[И а́ще у́бо моле́бенъ, а́біе: Досто́йно е́сть.., велича́нія, во гла́съ 2: Ангела земна́го.., Трисвято́е, тропа́рь съ богоро́дичнымъ, ектенія́, моли́тва и отпу́стъ]. [Ищи́ все́ сіе́ въ кано́нѣ 1-го гла́са.]

Источникъ: Богослужебная послѣдованія на все лѣто преподобному и богоносному отцу нашему Іоанну Рыльскому, съ приложеніемъ. † Левкійскій епископъ Парѳеній. — Софія: Синодально издательство, 1955. — Л. 203-207.

/ Къ оглавленію раздѣла /


Наверхъ / Къ титульной страницѣ

0