Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Кано́ны 8-ми́ гласо́въ
преподо́бному Іоа́нну Ры́льскому, пѣва́еміи [во оби́тели его́] на моле́бнѣхъ въ четверто́къ, и́же и на у́трени чита́еміи по суббо́тамъ.

[Кано́нъ моле́бный, гла́съ 5:]

[Благослови́вшу свяще́ннику, начина́емъ псало́мъ 142-й: Го́споди, услы́ши моли́тву мою́... Сла́ва, и ны́нѣ. Аллилу́ія [3]. Та́же: Бо́гъ Госпо́дь... [4] И тропа́рь преподо́бнаго: Покая́нія основа́ніе... Сла́ва, и ны́нѣ, богоро́диченъ: Гавріи́лу вѣща́вшу... И а́біе псало́мъ 50-й: Поми́луй мя́, Бо́же...]. [Ищи́ все́ сіе́ въ кано́нѣ 1-го гла́са.]

Пѣ́снь 1.

Ирмо́съ: Коня́ и вса́дника въ мо́ре Чермно́е сокруша́яй бра́ни, мы́шцею высо́кою, Христо́съ истрясе́, Изра́иля же спасе́, побѣ́дную пѣ́снь пою́ща.

На гора́хъ пусты́нныхъ всели́выйся, пусты́нниковъ преподо́бныхъ ве́рше и по́стниковъ изря́дная похвало́, у́мъ мо́й плодоно́сенъ покажи́ воспѣ́ти твоя́ боже́ственная чудеса́.

Гла́са Влады́ки Христа́ послу́шавъ и, я́ко вѣ́рный ра́бъ, за́повѣди соблю́дъ, две́ри черто́га небе́снаго отверзо́шася тебѣ́ и въ ра́дость прія́ша тя́ Го́спода твоего́.

На го́ру возше́дшу ти́ добродѣ́телей, возсія́ на́мъ свѣ́тло луча́ чуде́съ твои́хъ и дѣя́ній, не подоба́етъ бо, — рече́ Госпо́дь, — гра́ду укры́тися, верху́ горы́ стоя́щему.

Богоро́диченъ: Исцѣли́ ду́шу мою́, стрѣла́ми страстны́ми уя́звленную, Богоро́дице, ма́тернею Твое́ю моли́твою Боже́ственное врачева́ніе прилага́ющи, и изба́ви мя́ родства́ о́гненнаго, Купино́ Неопали́мая.

Пѣ́снь 3.

Ирмо́съ: Водрузи́вый на ничесо́мже зе́млю повелѣ́ніемъ Твои́мъ, и повѣ́сивши неодержи́мо тяготѣ́ющую, на недви́жимѣмъ, Христе́, ка́мени за́повѣдей Твои́хъ, Це́рковь Твою́ утверди́, Еди́не Бла́же и Человѣколю́бче.

Отложи́въ земна́я и на не́бо возлетѣ́въ, со безпло́тными ны́нѣ чи́нми а́нгельскими въ вы́шнихъ кро́вѣхъ водворя́ешися и въ концѣ́хъ вселе́нныя съ вѣ́рою прося́щимъ тму́ страстну́ю отгоня́еши.

Во́лки неви́димыя сокруши́лъ еси́ ору́жіемъ Креста́ и, кровопíйцъ утаи́тися хотя́ на горѣ́, я́ко овча́ незло́биво, потща́лся еси́ ко Агнцу притещи́, всѣ́мъ во спасе́ніе закла́нному.

Тѣсноту́ а́лчбную прете́къ, въ широтѣ́ ра́йстѣй водвори́лся еси́ и, у́зкую стезю́ мона́шескую преше́дъ, житіе́ наслѣ́довалъ еси́ безпеча́льное, отону́дуже ста́до твое́ присѣща́еши чудесы́ пресла́вными.

Богоро́диченъ: Облаче благода́ти, до́ждь Боже́ственный мíрови одожди́вый, изсо́хшія ны́ ва́ромъ прегрѣше́ній напо́й росо́ю спасе́нія и на вода́хъ поко́йныхъ упасе́ннымъ бы́ти на́мъ благоволи́, Пречи́стая.

[На моле́бнѣ а́біе: Спаси́ отъ бѣ́дъ... и При́зри благосе́рдіемъ.., сугу́бая ектенія́ и сѣда́ленъ, гла́съ 2: Моле́ніе те́плое...]. [Ищи́ все́ сіе́ въ кано́нѣ 1-го гла́са.]

Пѣ́снь 4.

Ирмо́съ: Боже́ственное Твое́ разумѣ́въ истоща́ніе прозорли́во, Авваку́мъ, Христе́, со тре́петомъ вопія́ше Тебѣ́: во спасе́ніе люде́й Твои́хъ, спасти́ пома́занныя Твоя́ прише́лъ еси́.

Во́зрасты по́стническія преше́лъ еси́, хотя́ вѣне́цъ побѣ́дный воспрія́ти, и вра́жіе наси́ліе попра́лъ еси́ си́лою въ тя́ все́льшагося Ду́ха.

Обнови́въ души́ твоея́ бразду́ на благопло́діе добродѣ́тели, соугото́валъ еси́ себѣ́ несѣ́яннаго слану́тка пита́ніе, чудотво́рче Іоа́нне.

Ви́денъ бы́въ и́менемъ Бо́жіимъ прогони́тель де́монскихъ нападе́ній, одержи́мыя страстьми́ проповѣ́дники сотвори́лъ еси́ благода́ти твоея́.

Богоро́диченъ: Пое́тъ Дави́дъ, пра́дѣдъ Тво́й, Тебѣ́, Дѣ́во Богоро́дице, я́ко благолѣ́пно одесну́ю Бо́га предстои́ши, Цари́ца: десны́мъ мя́ у́бо овца́мъ сопричти́, Агнице Всечи́стая.

Пѣ́снь 5.

Ирмо́съ: Одѣя́йся свѣ́томъ, я́ко ри́зою, къ Тебѣ́ у́тренюю и Тебѣ́ зову́: ду́шу мою́ просвѣти́ омраче́нную, Христе́, я́ко Еди́нъ Благоутро́бенъ.

Но́вымъ о́бразомъ обрѣ́лся еси́ Бо́гу уго́дникъ и учени́къ, Того́ словеса́ слу́хомъ предава́я и прича́стникъ вы́шнія сла́вы явля́яся.

Разу́мно завѣща́лъ еси́ себѣ́ вы́шняя му́дрствовати, я́коже Па́велъ пи́шетъ, прему́дрый апо́столъ, земны́хъ же любве́ отвраща́тися.

Во Христа́ обо́лкся, младе́нческія стрѣ́лы вмѣни́лъ еси́ де́монская на горѣ́ нападе́нія, тѣ́мже по́мощь то́чиши обурева́емымъ непреста́нно.

Богоро́диченъ: Смуща́емое страстьми́ се́рдце мое́ отъ бѣ́дъ изба́ви, Дѣ́во Ма́ти, напа́стей же и скорбе́й и Твоея́ по́мощи мя́ сподо́би, Чи́стая.

Пѣ́снь 6.

Ирмо́съ: Неи́стовствующееся бу́рею душетлѣ́нною, Влады́ко Христе́, страсте́й мо́ре укроти́ и отъ тли́ возведи́ мя, я́ко Благоутро́бенъ.

Пра́во ходи́ти хромы́мъ сотвори́лъ еси́ и глухи́мъ слы́шати благопослу́шно и, са́мъ молча́, нѣмы́я глаго́лати научи́лъ еси́.

Явля́яся помо́щникъ, о́чи слѣпы́хъ просвѣща́еши, свѣ́томъ пра́ведныхъ дѣ́лъ твои́хъ озаря́я и ра́достію Боже́ственною облиста́я.

Воспріи́мъ проше́ніе, огне́мъ жего́мое мое́ тѣ́ло дре́вле исцѣли́лъ еси́, тѣ́мъ къ тебѣ́ жела́ніе возжего́хъ се́рдца, присногоря́щее.

Богоро́диченъ: Извѣ́стная Покрови́тельнице Пречи́стая, обою́ду покры́й мя́, я́коже Стѣна́ необори́мая, и льсти́ваго врага́ крѣ́пость разори́.

[Аще моле́бенъ: Спаси́ отъ бѣ́дъ... и При́зри благосе́рдіемъ.., ектенія́, та́же конда́къ, гла́съ 2: Моля́щимъ тя́ теплѣ́йшій засту́пниче... И ве́сь ева́нгельскій чи́нъ, я́коже преднаписа́ся]. [Ищи́ все́ сіе́ въ кано́нѣ 1-го гла́са.]

Пѣ́снь 7.

Ирмо́съ: Превозноси́мый отце́въ Госпо́дь, пла́мень угаси́, о́троки ороси́, согла́сно пою́щія: Бо́же, благослове́нъ еси́.

Вѣ́чная проразумѣ́въ пребыва́юща, мíра удали́лся еси́, и, бѣ́гая усе́рдно, въ пусты́ню всели́лся еси́, и къ Бо́гу прибли́зился еси́.

Возрасти́лъ еси́ тала́нтъ, я́ко до́брый купе́цъ, Ка́мень краеуго́льный и Боже́ственный би́серъ пріобрѣ́тъ — Христа́, позла́щшаго тя́ чудесы́.

Впери́въ на не́бо о́чи твои́ и мимотеку́щая возненави́дѣвъ, души́ твоея́ вѣ́жды недре́млемо соблюда́еши, я́ко засту́пникъ неусыпа́ющій.

Богоро́диченъ: Да Тя́ сла́вимъ, Пречи́стая Влады́чице, Твоя́ моли́твенники, на́съ отъ страсте́й свободи́ и Влады́цѣ, Сы́ну Твоему́, я́ко це́рковь освяще́нну, принеси́.

Пѣ́снь 8.

Ирмо́съ: Тебѣ́, Вседѣ́телю, въ пещи́ о́троцы, всемíрный ли́къ спле́тше, поя́ху: дѣла́ вся́кая, Го́спода по́йте и превозноси́те во вся́ вѣ́ки.

На го́ру возше́дъ, за́дняя Бо́га ви́дѣ Моисе́й; ты́ же, посредѣ́ добро́ты Влады́чнія озаря́емь, не зерца́ломъ при́сно Того́ ви́диши.

Цѣ́ло соблю́дъ чи́стое се́рдце, рука́ми же явля́яся непови́ненъ, на го́ру возше́лъ еси́ Госпо́дню и на мѣ́стѣ святѣ́мъ Его́ ста́лъ еси́.

Яко да свяще́ннѣи твои́ на простра́ннѣ поста́виши но́зѣ, тѣ́ми ходи́лъ еси́ стезе́ю Боже́ственною, пости́вся на горѣ́ пусты́ннѣй.

Богоро́диченъ: Ра́дуйся, Влады́чице! — Пѣ́снь отъ души́ Препѣ́той Дѣ́вѣ принесе́мъ, Еди́наго Бо́га и всѣ́хъ Царя́ роди́вшей, ра́дости Пода́теля.

Пѣ́снь 9.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Просвѣти́вся свѣ́томъ до́брыхъ дѣ́лъ, богодухнове́нне, яви́лся еси́ на́мъ свѣти́льникъ и сто́лпъ о́гненный, наставля́яй но́ваго Изра́иля и но́щь отгоня́яй страсте́й омраче́нія.

Исцѣле́ній мо́ре и чуде́съ кипя́щій исто́чниче, приснотеку́щій вѣ́рнымъ во спасе́ніе и рѣ́ки источа́яй сугу́быя Бо́жіихъ дарова́ній, зо́лъ мои́хъ струю́ изсуши́ твои́ми моли́твами.

Жела́ніе души́ моея́ вѣ́си, чудотво́рче, и любо́внаго къ тебѣ́ огня́ опале́ніемъ разжже́нна мя́ ви́диши: разрѣше́ніе грѣхо́въ прія́ти ми́ да́руй и вся́каго проше́нія исполне́ніе.

Богоро́диченъ: Спасе́ніе родила́ еси́ человѣ́комъ, кля́тву же дре́внюю разрѣши́ла еси́ и обновле́ніе принесла́ еси́ на́мъ, обетша́вшимъ грѣхми́, Дѣ́во, Ма́ти Бо́жія.

[И а́ще у́бо моле́бенъ, а́біе: Досто́йно е́сть.., велича́нія, во гла́съ 2: Ангела земна́го.., Трисвято́е, тропа́рь съ богоро́дичнымъ, ектенія́, моли́тва и отпу́стъ]. [Ищи́ все́ сіе́ въ кано́нѣ 1-го гла́са.]

Источникъ: Богослужебная послѣдованія на все лѣто преподобному и богоносному отцу нашему Іоанну Рыльскому, съ приложеніемъ. † Левкійскій епископъ Парѳеній. — Софія: Синодально издательство, 1955. — Л. 198-202.

/ Къ оглавленію раздѣла /


Наверхъ / Къ титульной страницѣ

0