Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Кано́ны 8-ми́ гласо́въ
преподо́бному Іоа́нну Ры́льскому, пѣва́еміи [во оби́тели его́] на моле́бнѣхъ въ четверто́къ, и́же и на у́трени чита́еміи по суббо́тамъ.

[Кано́нъ моле́бный, гла́съ 4:]

[Благослови́вшу свяще́ннику, начина́емъ псало́мъ 142-й: Го́споди, услы́ши моли́тву мою́... Сла́ва, и ны́нѣ. Аллилу́ія [3]. Та́же: Бо́гъ Госпо́дь... [4] И тропа́рь преподо́бнаго: Покая́нія основа́ніе... Сла́ва, и ны́нѣ, богоро́диченъ: Гавріи́лу вѣща́вшу... И а́біе псало́мъ 50-й: Поми́луй мя́, Бо́же...]. [Ищи́ все́ сіе́ въ кано́нѣ 1-го гла́са.]

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Запѣ́въ: Преподо́бне о́тче Іоа́нне, моли́ Бо́га о на́съ.

Серде́чнымъ жела́ніемъ и́скру Бо́жію воспріи́мъ и огне́мъ невеще́ственнымъ разже́гся, отъ зно́я же страсте́й плотски́хъ ма́ло утѣ́шився, пѣ́сни тебѣ́ ны́нѣ, Іоа́нне, провозвѣща́ю.

Мимотеку́щая настоя́щая преоби́дѣвъ, прите́клъ еси́ къ Исто́чнику живо́тныхъ во́дъ, отъ Него́же то́чиши Боже́ственныя рѣ́ки воды́ душеспаси́тельныя, приснотеку́щія и живы́я въ пусты́ни.

Сла́ва: Процвѣ́лъ еси́ душе́ю и тѣ́ломъ, дарова́ній испо́лнь Ду́ха Свята́го, и, мно́гажды поноше́ніемъ злы́хъ люде́й во оте́чествіи твое́мъ безче́стимь, свы́ше прославля́емь бы́лъ еси́ чудесы́ Боже́ственными.

И ны́нѣ, богоро́диченъ: Образъ ви́димый отъ Тебе́ воспріи́мъ, Пренепоро́чная, совлече́ грѣхо́вныя оде́жды человѣ́чество Зижди́тель и па́ки въ пе́рвую ри́зу облече́ Ада́ма, утаи́вся губи́тельства, того́ прельсти́вшаго.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Единообра́зна тя́ вра́гъ ви́дя прекра́сному Іо́сифу, подо́бную тому́ бра́нь тебѣ́ устро́и: поноше́ніемъ бо бра́та твоего́ тща́шеся оскорби́ти тя́, но оба́че яви́ся па́ки посра́мленъ.

Жите́йское сплете́ніе, я́коже ри́зу, оста́вивъ и душе́ю обнажи́вся, еги́петскія зло́бы избѣ́глъ еси́ искуше́ній и ца́рскій вѣне́цъ, я́ко самоде́ржецъ страсте́мъ, воспрія́лъ еси́.

Сла́ва: Слы́шавъ Повелѣва́ющаго пра́хъ отъ ногу́ отрясти́ гра́да, не пріе́млющаго про́повѣди добродѣ́тельныя, оста́вивъ вся́, избѣ́глъ еси́ оте́чества твоего́, съ тобо́ю неединому́дрствовавшаго.

И ны́нѣ, богоро́диченъ: Та́инство е́сть вои́стину ве́ліе рождество́ Твое́, Богоро́дице: Голуби́ца бо су́щи, злата́я междура́мія иму́щая, Орла́ породила́ еси́, Иже на́съ, я́коже птенцы́ крыло́ма, благода́тію покры́лъ е́сть.

[На моле́бнѣ а́біе: Спаси́ отъ бѣ́дъ... и При́зри благосе́рдіемъ.., сугу́бая ектенія́ и сѣда́ленъ, гла́съ 2: Моле́ніе те́плое...]. [Ищи́ все́ сіе́ въ кано́нѣ 1-го гла́са.]

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

На ка́мени испра́вивъ стопы́ души́ твоея́, прило́ги разли́чныхъ искуше́ній непоколеби́мь яви́лся еси́ и, волне́ніе суеты́ мірскíя преплы́въ, на го́ру возше́лъ еси́ спасе́нія.

Уподо́бился еси́ рѣцѣ́ теку́щей и съ высоты́ го́рныя па́дающей, исто́чникъ благода́ти точа́ и то́ю пла́мень страсте́й чу́вственныхъ угаша́я, нача́ло имы́й на водѣ́ упокое́нія.

Сла́ва: Пасо́мь бы́въ жезло́мъ Пасу́щаго и Наставля́ющаго, я́ко овча́, Іо́сифа, я́коже о́вцы, пита́лъ еси́ мно́гъ наро́дъ пасу́щихъ, съ любо́вію къ кро́ву твоему́ притека́ющихъ и вѣ́рою моля́щихъ тя́.

И ны́нѣ, богоро́диченъ: Якоже свѣ́щникъ, просвѣти́ мя́, я́ко лѣ́стница, возведи́ мя́, я́ко клеща́, отъ огня́ исхити́ мя́, я́ко киво́тъ, отъ во́дъ мно́гихъ изба́ви мя́, вѣ́дущаго Тя́, и́стинную Ма́терь Бо́жію.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Сочета́въ житіе́ ревни́теля Иліи́ съ чудесы́, ре́вностію по Бо́зѣ въ го́ру всели́лся еси́ и го́рстію бра́шна мно́жество пасу́щихъ напита́лъ еси́, сію́ имѣ́я на времена́ мно́га неоскудѣва́ющу.

Извести́ тя́ тща́шеся изъ пусты́ни змíй, и́же дре́вле Ада́ма изъ Еде́ма Боже́ственного за́вистію изгна́, разбо́йники бо на тя́ наведе́, но ты́, пре́лесть проразумѣ́въ, еще́ глу́бже въ го́ру угонза́лъ еси́.

Сла́ва: Ме́ртвость совлещи́ потща́лся еси́ съ оде́ждею ку́пно и въ ко́жаную то́кмо одѣ́ялся еси́, на́гло бра́тися слы́шавъ и́стинному стра́ннику, и, вся́кую стра́сть умертви́въ, о Бо́зѣ ны́нѣ живе́ши безсме́ртно.

И ны́нѣ, богоро́диченъ: Пою́тъ Тя́ уста́ херуви́мская, Пречи́стая, но пріими́ окая́ннаго язы́ка пѣ́снь приноси́мую, благосе́рдію Сы́на Твоего́ подража́ющи, и благода́ть мнѣ́ да́руй.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Жениха́, пріити́ хотя́ща въ полу́нощи, я́ко слы́шавъ, не да́лъ еси́ сна́ твои́ма очи́ма, но, всено́щная стоя́нія и моли́твы непреста́нно соверша́я, му́дрымъ дѣ́вамъ сопричта́лся еси́.

По́ты подвиго́въ твои́хъ, я́коже ма́сломъ, просвѣти́въ свѣщу́ души́ твоея́, разу́мно поте́клъ еси́ къ черто́гу небе́сному, его́же и на́мъ две́ри отве́рзи богопрія́тными твои́ми моли́твами.

Сла́ва: Яко ревни́тель Влады́чнихъ Боже́ственныхъ за́повѣдей, не стужа́еши си, гони́мь отъ пусты́ни въ пусты́ню и отъ человѣ́ческаго жи́тельства въ до́мъ Отца́ Небе́снаго.

И ны́нѣ, богоро́диченъ: Ада́мъ, надѣ́явся бо́гъ бы́ти, я́дію лиши́ся безсме́ртія, ме́ртвъ же положе́нъ бы́въ во гро́бѣ но́вый Ада́мъ, Сы́нъ Тво́й, Дѣви́це, обнови́ того́ обоже́ніемъ.

[Аще моле́бенъ: Спаси́ отъ бѣ́дъ... и При́зри благосе́рдіемъ.., ектенія́, та́же конда́къ, гла́съ 2: Моля́щимъ тя́ теплѣ́йшій засту́пниче... И ве́сь ева́нгельскій чи́нъ, я́коже преднаписа́ся]. [Ищи́ все́ сіе́ въ кано́нѣ 1-го гла́са.]

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Разу́мно пита́лся еси́ а́нгельскимъ хлѣ́бомъ, я́коже безпло́тенъ, и на мно́ги дни́ а́лченъ пребыва́я, чудотворя́, Госпо́дь кормля́ше тя́ несѣ́янными слану́тки земли́ неора́нныя.

Но́вому Изра́илю сопричта́лся еси́, я́коже бо дре́вній въ пусты́ни ма́нною свы́ше пита́шеся, си́це и ты́ слану́токъ отъ вы́шняго манове́нія пріима́лъ еси́, Маннода́теля Го́спода воспѣва́я.

Сла́ва: Процвѣ́лъ еси́, я́коже фи́никсъ свяще́нъ, въ дому́ Бо́га на́шего, отъ пеще́ры пе́рвыя бо изринове́нъ и въ дре́во ду́плено всели́вся, да́лъ еси́ сла́дкія плоды́ твоя́ во вре́мя свое́, исцѣля́я неду́ги вся́кія боля́щихъ.

И ны́нѣ, богоро́диченъ: Рожде́йся отъ Тебе́, Пренепоро́чная, Ле́въ нарече́ся и А́гнецъ, о́гнь нестерпи́мь и до́ждь на руно́: я́ко роса́ у́бо да вмѣни́тъ ми ся, я́ко о́гнь, да не попали́тъ мя́, ни да устраши́тъ мя́, я́ко ле́въ, но я́ко а́гнецъ непоро́ченъ да во́зметъ на Ся́ прегрѣше́нія моя́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Мірскíя бу́ри бѣ́гая и гоне́ніемъ воздая́ніе обрѣсти́ хотя́, въ хралу́пинѣ дре́ва, ра́дуяся, всели́лся еси́ и, я́коже корабле́мъ, преплы́лъ еси́ къ ра́йскому приста́нищу Боже́ственными Ду́ха Свята́го вѣ́яніи.

Проповѣ́дники боже́ственныхъ добродѣ́телей твои́хъ слу́хи разсла́лъ еси́, не хотя́, я́коже со́лнце лучи́, и всѣ́мъ, къ тебѣ́ притека́ющимъ, неду́говъ исцѣле́ніе дарова́лъ еси́ моли́твами твои́ми.

Сла́ва: Безъ покро́ва при́сно на зно́и и мра́зѣ пребыва́я, я́коже Іа́ковъ, подвиза́лся еси́ и и́долы вся́ страстны́я сокруши́лъ еси́, къ краеуго́льному же прите́къ Ка́мени, на высоту́ возше́лъ еси́ безстра́стія.

И ны́нѣ, богоро́диченъ: Ми́лостивъ у́бо Сы́нъ Тво́й по Существу́, но и лу́къ напряза́етъ, и ча́шу, испо́лнь гнѣ́ва, растворя́етъ. Ты́ же моли́твами Твои́ми я́ростный пла́мень угаси́ и стрѣ́лы разже́нныя, Богоро́дице.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Кто́ изчести́ мо́жетъ звѣ́зды небе́сныя? Кто́ же ли чуде́съ твои́хъ мно́жество исповѣ́сть, преблаже́нне? Слѣпы́мъ бо свѣ́тъ дае́ши, хромы́мъ хожде́ніе, проше́нія вся́ исполня́еши и прегрѣше́ній оставле́ніе дае́ши.

Яко ме́ртвъ, мíрови сраспну́въ пло́ть твою́, сно́мъ сме́ртнымъ усну́лъ еси́ и неруши́мь премину́лъ еси́ мно́гихъ лѣ́тъ тече́ніе, дыха́ніе то́кмо оста́вивъ, жи́въ въ чудесѣ́хъ явля́ешися.

Сла́ва: Юже ти́ раболѣ́пно принесо́хъ, пѣ́снь пріими́, преблаже́нне, и возда́ждь свы́ше благода́ть, неду́говъ избавля́я и искуше́ній, внегда́ же суди́ти ми ся, предста́въ, изба́ви муче́нія, собесѣ́дниче а́нгеловъ.

И ны́нѣ, богоро́диченъ: Иска́пай на́мъ ороше́ніе ми́лости Твоея́, уставля́ющи зло́бу благода́тію рождества́ Твоего́, Богоро́дице. Объе́млющи, просвѣти́ и, исхи́тивши родства́ о́гненнаго, препита́й на водѣ́ упокое́нія.

[И а́ще у́бо моле́бенъ, а́біе: Досто́йно е́сть.., велича́нія, во гла́съ 2: Ангела земна́го.., Трисвято́е, тропа́рь съ богоро́дичнымъ, ектенія́, моли́тва и отпу́стъ]. [Ищи́ все́ сіе́ въ кано́нѣ 1-го гла́са.]

Источникъ: Богослужебная послѣдованія на все лѣто преподобному и богоносному отцу нашему Іоанну Рыльскому, съ приложеніемъ. † Левкійскій епископъ Парѳеній. — Софія: Синодально издательство, 1955. — Л. 192-197.

/ Къ оглавленію раздѣла /


Наверхъ / Къ титульной страницѣ

0