Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Кано́ны 8-ми́ гласо́въ
преподо́бному Іоа́нну Ры́льскому, пѣва́еміи [во оби́тели его́] на моле́бнѣхъ въ четверто́къ, и́же и на у́трени чита́еміи по суббо́тамъ.

[Кано́нъ моле́бный, гла́съ 3:]

[Благослови́вшу свяще́ннику, начина́емъ псало́мъ 142-й: Го́споди, услы́ши моли́тву мою́... Сла́ва, и ны́нѣ. Аллилу́ія [3]. Та́же: Бо́гъ Госпо́дь... [4] И тропа́рь преподо́бнаго: Покая́нія основа́ніе... Сла́ва, и ны́нѣ, богоро́диченъ: Гавріи́лу вѣща́вшу... И а́біе псало́мъ 50-й: Поми́луй мя́, Бо́же...]. [Ищи́ все́ сіе́ въ кано́нѣ 1-го гла́са.]

Пѣ́снь 1.

Ирмо́съ: Во́ды дре́вле, ма́ніемъ Боже́ственнымъ, во еди́но со́нмище совокупи́вый, и раздѣли́вый мо́ре Изра́ильтескимъ лю́демъ, Се́й Бо́гъ на́шъ, препросла́вленъ е́сть, Тому́ Еди́ному пои́мъ, я́ко просла́вися.

Запѣ́въ: Преподо́бне о́тче Іоа́нне, моли́ Бо́га о на́съ.

Луча́ми вы́шняго свѣтоли́тія ве́сь озаря́емь, треблаже́нне, и мою́ просвѣти́ омраче́нную ду́шу, я́ко да воспою́ свѣтоно́сныя по́двиги твоя́, и́миже помрачи́лъ еси́ кня́зя те́мнаго.

Иліино́ житіе́ и Предте́чево ты́ ре́вностію подража́я, въ пусты́нехъ водвори́лся еси́, преподо́бне, ча́я Бо́га, при́сно спаса́ющаго тя́ отъ сѣ́ти и треволне́нія де́монскаго.

Сла́ва: Сраспя́лся еси́ распя́тому на́съ ра́ди Христу́; умертви́въ же ся мíрови, къ животу́ преше́лъ еси́, преподо́бне, идѣ́же свѣ́тло ны́нѣ кра́сныхъ твои́хъ по́двигъ по́чести пріе́млеши.

И ны́нѣ, богоро́диченъ: Соломо́нъ Тя́ о́дръ прови́дѣ, на не́мже па́че сло́ва Сло́во почи́ло е́сть, подава́я претружде́ннымъ лю́тѣ Боже́ственный поко́й, Влады́чице, Его́же моли́ вы́шнее ми́ дарова́ти поко́ище.

Пѣ́снь 3.

Ирмо́съ: Иже отъ не су́щихъ вся́ приведы́й, Сло́вомъ созида́емая, соверша́емая Ду́хомъ, Вседержи́телю Вы́шній, въ любви́ Твое́й утверди́ мене́.

Безпло́тное житіе́ на земли́ стяжа́въ, враги́ безпло́тныя умертви́лъ еси́, Помо́щника имѣ́я живо́тъ вдыха́ющаго умерщвле́ннымъ страстьми́.

Жезло́мъ боже́ственнымъ за на́съ Поже́ршагося, я́ко овча́ священнопасо́мо, на па́жить приспѣ́лъ еси́ безстра́стія, Іоа́нне богому́дре.

Сла́ва: Въ ко́жу о́вчую прему́дреннѣ обле́кся, во́лка расто́рглъ еси́ ди́віяго, я́коже а́гнца ко льву́ спле́тшагося къ тебѣ́, преподо́бне.

И ны́нѣ, богоро́диченъ: Неизмѣ́римую глубину́ свѣ́дущи безчи́сленныхъ мои́хъ собла́зновъ, Ты́ мя́ упра́ви въ спасе́нное приста́нище, Влады́чице Богома́ти.

[На моле́бнѣ а́біе: Спаси́ отъ бѣ́дъ... и При́зри благосе́рдіемъ.., сугу́бая ектенія́ и сѣда́ленъ, гла́съ 2: Моле́ніе те́плое...]. [Ищи́ все́ сіе́ въ кано́нѣ 1-го гла́са.]

Пѣ́снь 4.

Ирмо́съ: Положи́лъ еси́ къ на́мъ тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́лъ еси́. Тѣ́мже Ти́ зове́мъ, благодаря́ще: сла́ва си́лѣ Твое́й, Го́споди.

Преклони́ти крѣ́пость души́ твоея́ отню́дь не возмого́ша, мета́юще тя́ ни́зъ ка́мене, врази́, сто́лпъ бо ты́ яви́лся еси́ вои́стинну непоколе́блемый, основа́ніе водрузи́вый на Ка́мени краеуго́льнѣмъ.

Зе́млю души́ твоея́ напои́въ слеза́ми, земля́ неора́нная тебѣ́ слану́токъ прозябе́, всеблаже́нне, тѣ́лу твоему́ въ ма́лое утѣше́ніе.

Сла́ва: Во пло́ти безпло́тныхъ житіе́ пожи́въ, зно́емъ опаля́емь и мра́зомъ устужда́емь, Боже́ственную свы́ше благода́ть имѣ́лъ еси́, помога́ющу ти́.

И ны́нѣ, богоро́диченъ: Ру́чку Тя́ злату́ю и свѣ́щникъ, Дѣви́це, и трапе́зу дре́вле прообразова́ху нело́жно, Бо́га Роди́тельницу быва́ющую, пита́ющаго вся́ческая си́лою Свое́ю и вѣ́рою просвѣща́ющаго.

Пѣ́снь 5.

Ирмо́съ: Яко ви́дѣ Иса́ія обра́зно на престо́лѣ превознесе́на Бо́га, отъ а́нгелъ сла́вы дориноси́ма, — о, окая́нный, — вопія́ше, — а́зъ! Прови́дѣхъ бо воплоща́ема Бо́га, Свѣ́та невече́рня, и ми́ромъ влады́чествующа.

Пома́завъ главу́ твою́ ма́сломъ поще́нія, покрыва́ломъ тоя́ не покрыва́лъ еси́, и́бо Покрыва́ющаго небеса́ о́блаки имѣ́лъ еси́ неизрече́нно тя́ отъ всѣ́хъ прило́говъ вра́жіихъ покрыва́юща.

Труды́ по́стническими и ме́домъ безстра́стія наслажда́лся еси́, посажде́нъ, я́коже пчела́, въ ду́плинѣ древе́снѣмъ, скрыва́я себе́ мірска́го мяте́жа и ды́ма де́монскаго бѣ́гая.

Сла́ва: Болѣ́зни твоя́ неболѣ́зненное воспрія́тіе исхода́таиша, треблаже́нне: неоску́дный исто́чникъ сле́зъ твои́хъ сла́дость умиле́нія серде́чнаго пріобрѣ́те, по́ти же по́стничестіи ва́ръ страсте́й угаси́ша.

И ны́нѣ, богоро́диченъ: Зако́новъ кромѣ́ человѣ́ческихъ Боже́ственнаго зако́на Да́вца родила́ еси́, Дѣ́во Ма́ти, все́ беззако́ніе человѣ́ческое отъе́млющаго за премно́гую человѣколю́бія бе́здну.

Пѣ́снь 6.

Ирмо́съ: Бе́здна послѣ́дняя грѣхо́въ обы́де мя́, и исчеза́етъ ду́хъ мо́й; но простры́й, Влады́ко, высо́кую Твою́ мы́шцу, я́ко Петра́ мя́, Упра́вителю, спаси́.

Мно́зи твои́ по́двизи ужа́сни удивле́нія и испо́лнь по́честей па́че ума́, я́же тебѣ́ Христо́съ дарова́, Его́же на земли́ почти́лъ еси́, Іоа́нне.

Свѣ́щникъ души́ твоея́ ма́сломъ напое́нъ трудо́въ твои́хъ, преблаже́нне, тя́, я́ко звѣзду́ свѣ́тлу, все́й земли́ явля́етъ и облиста́етъ чудесы́.

Сла́ва: Воспріе́млютъ хромíи благотече́ніе, ви́дятъ слѣпíи пресвѣ́тло и разсла́бленніи вѣ́рою Христо́вою исцѣлева́ютъ моли́твами твои́ми.

И ны́нѣ, богоро́диченъ: Въ ка́лъ углебо́хъ мно́гими прегрѣше́ньми и въ ро́въ снидо́хъ зло́бы, Дѣви́це Пречи́стая, но, ро́ждшая изъ глубины́ Іо́ну Изба́вльшаго, и мене́ возведи́, молю́ся.

[Аще моле́бенъ: Спаси́ отъ бѣ́дъ... и При́зри благосе́рдіемъ.., ектенія́, та́же конда́къ, гла́съ 2: Моля́щимъ тя́ теплѣ́йшій засту́пниче... И ве́сь ева́нгельскій чи́нъ, я́коже преднаписа́ся]. [Ищи́ все́ сіе́ въ кано́нѣ 1-го гла́са.]

Пѣ́снь 7.

Ирмо́съ: Якоже дре́вле благочести́выя три́ о́троки ороси́лъ еси́ въ пла́мени халде́йстѣмъ, свѣ́тлымъ Божества́ огне́мъ и на́съ озари́, благослове́нъ еси́, взыва́ющія, Бо́же оте́цъ на́шихъ.

Не да́лъ еси́ сна́ свои́ма очи́ма, ни вѣ́ждома свои́ма дрема́нія, до́ндеже страстна́я успи́лъ еси́ стремле́нія и къ свѣ́ту преста́вился еси́ незаходи́мому, Влады́ку всѣ́хъ воспѣва́я.

По́стническія по́двиги жесто́кія претерпѣ́лъ еси́, съ кня́зи те́мными и со властьми́ му́жески боря́ся при́сно, и побѣ́дный вѣне́цъ прія́лъ еси́ отъ живонача́льныя руки́ Влады́чни.

Сла́ва: Зимы́ мірскíя избѣ́гъ, ве́сну получи́лъ еси́ премíрнаго пребыва́нія и, страстну́ю бу́рю прете́къ, къ тишинѣ́ доше́лъ еси́ безстра́стія, со а́нгелы непреста́нно Христа́ восхваля́я.

И ны́нѣ, богоро́диченъ: На престо́лѣ херуви́мстѣ благолѣ́пно сѣдя́й Содѣ́тель, въ Твои́хъ нѣ́дрѣхъ стра́шно сѣди́тъ, Пречи́стая, си́льныя со престо́лъ низлага́я, я́коже прорекла́ еси́, и вознося́ смире́нныя.

Пѣ́снь 8.

Ирмо́съ: Ангелами немо́лчно въ вы́шнихъ сла́вимаго Бо́га, небеса́ небе́съ, земля́, и го́ры, и хо́лми, и глубина́, и ве́сь ро́дъ человѣ́ческій, пѣ́сньми Того́, я́ко Созда́теля и Изба́вителя, благослови́те и превозноси́те во вся́ вѣ́ки.

Ны́нѣ, Его́же возлюби́лъ еси́, Христа́ ви́диши не сѣ́нію, ни привидѣ́ніемъ, но незазо́рнымъ зерца́ломъ, я́сно, лице́мъ къ Лицу́ и па́че естества́ и́стиннымъ явле́ніемъ, преблаже́нне.

Твои́ ны́нѣ но́зѣ ра́дуетѣся благостоя́нію на небесѣ́хъ, не связа́стѣ бо ся на земли́ плотски́ми у́зами, пребога́те, его́же ра́ди не кры́ешися, я́коже Ада́мъ, но при ногу́ предстои́ши Влады́цѣ.

Сла́ва: Страстна́я пре́жде разжже́нія росо́ю сле́зъ твои́хъ угаси́лъ еси́, и о́гнь всеяду́щій вода́ми моли́твъ твои́хъ воспяти́лъ еси́, и, къ о́гненнымъ слуга́мъ ны́нѣ причита́яся, воспѣва́еши Влады́ку.

И ны́нѣ, богоро́диченъ: Лѣ́ствицу Тя́ прови́дѣ Іа́ковъ, Всенепоро́чная, е́юже Бо́гъ на зе́млю сни́де, и человѣ́ческое естество́ на небеса́ вознесе́, и Оте́ческимъ почте́ сосѣде́ніемъ.

Пѣ́снь 9.

Ирмо́съ: На Сина́йстѣй горѣ́ ви́дѣ Тя́ въ купинѣ́ Моисе́й, неопа́льно о́гнь Божества́ заче́ншую во чре́вѣ; Даніи́лъ же Тя́ ви́дѣ го́ру несѣко́мую; же́злъ прозя́бшій, Иса́ія взыва́ше, отъ ко́рене Іессе́ова.

Тезоимени́тъ Бо́жіей благода́ти яви́лся еси́, е́юже соблюда́емь, и по сме́рти неруши́мь пребыва́еши, на земли́ лежа́, Бо́гу та́ко благоволи́вшу, вѣ́ру бо Его́ да́же до кончи́ны твоея́ правосла́внѣ соблю́лъ еси́.

Яко фи́никсъ, въ дому́ Бо́жіи процвѣ́лъ еси́, Іоа́нне, и умно́жился еси́, я́ко ке́дръ многовѣ́твенъ, осѣня́я вѣ́рныя, псало́мски же, я́ко ма́слина плодови́та, вся́ умаща́еши ма́сломъ чуде́съ твои́хъ, преблаже́нне.

Сла́ва: Ди́вному Бо́гу, тобо́ю при́сно чудеса́ творя́щему, моли́ся, богодухнове́нне, да удиви́тъ на мнѣ́ ми́лости Своя́ и пода́стъ ми́ оставле́ніе прегрѣше́ній, вѣ́деніемъ и невѣ́деніемъ мно́ю злѣ́ содѣ́янныхъ.

И ны́нѣ, богоро́диченъ: Яже Свѣ́тъ заче́нши Незаходи́мый, просвѣти́ мою́ ду́шу, Лѣ́ствице небе́сная, отъ земли́ на не́бо мя́ возвы́си, Две́ре спаси́тельная, въ живо́тъ вѣ́чный введи́ мя́, Господоимени́тая.

[И а́ще у́бо моле́бенъ, а́біе: Досто́йно е́сть.., велича́нія, во гла́съ 2: Ангела земна́го.., Трисвято́е, тропа́рь съ богоро́дичнымъ, ектенія́, моли́тва и отпу́стъ]. [Ищи́ все́ сіе́ въ кано́нѣ 1-го гла́са.]

Источникъ: Богослужебная послѣдованія на все лѣто преподобному и богоносному отцу нашему Іоанну Рыльскому, съ приложеніемъ. † Левкійскій епископъ Парѳеній. — Софія: Синодально издательство, 1955. — Л. 187-191.

/ Къ оглавленію раздѣла /


Наверхъ / Къ титульной страницѣ

0