Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Кано́ны 8-ми́ гласо́въ
преподо́бному Іоа́нну Ры́льскому, пѣва́еміи [во оби́тели его́] на моле́бнѣхъ въ четверто́къ, и́же и на у́трени чита́еміи по суббо́тамъ.

[Кано́нъ моле́бный, гла́съ 2:]

[Благослови́вшу свяще́ннику, начина́емъ псало́мъ 142-й: Го́споди, услы́ши моли́тву мою́... Сла́ва, и ны́нѣ. Аллилу́ія [3]. Та́же: Бо́гъ Госпо́дь... [4] И тропа́рь преподо́бнаго: Покая́нія основа́ніе... Сла́ва, и ны́нѣ, богоро́диченъ: Гавріи́лу вѣща́вшу... И а́біе псало́мъ 50-й: Поми́луй мя́, Бо́же...]. [Ищи́ сіе́ въ кано́нѣ 1-го гла́са.]

Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Запѣ́въ: Преподо́бне о́тче Іоа́нне, моли́ Бо́га о на́съ.

Присносу́щнымъ свѣ́томъ ны́нѣ озаря́яся и со а́нгелы ве́сь свѣ́телъ предстоя́ Вседѣ́телю, се́рдца моего́ омраче́ніе прожени́, о́тче, я́ко да свѣ́тло проповѣ́даю житія́ твоего́ до́блести.

Вкорени́вшееся въ души́ твое́й жела́ніе неизрече́нныя красоты́ Христо́вы стяжа́въ, чу́вственныя две́ри всѣ́мъ тлѣ́ннымъ и мимотеку́щимъ затвори́лъ еси́ и мно́гими по́двиги получи́лъ еси́ жела́емое.

Сла́ва: Вели́кое смотре́ніе Бо́жіе отъ утро́бы ма́терни тя́ освяти́ и сосу́дъ показа́ благопрія́тенъ Свята́го Ду́ха, тѣ́мже отъ младе́нства при́сно бы́лъ еси́ стра́хомъ Бо́жіимъ огражда́емь.

И ны́нѣ, богоро́диченъ: Та́инства стра́шнаго яви́лася еси́ Дѣ́лательница, разстоя́щая соедини́вши существа́: Бо́га бо безпло́тнаго, заче́нши, пло́тію сопряже́нна произвела́ еси́ во еди́номъ лицѣ́, во двою́ же естеству́, Чи́стая.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Бо́дренно очи́ма души́ твоея́ ви́дѣвъ, я́ко вся́ су́етна су́ть, отве́рглъ еси́ мірску́ю красоту́, и ни́щимъ имѣ́нія твоя́ разда́лъ еси́, и сокро́вище некра́домое на небеси́ стяжа́лъ еси́.

Боже́ственныхъ послу́шавъ за́повѣдей, въ смире́ніи пребыва́лъ еси́ все́ житіе́ твое́ и, я́ко непотре́бенъ, во оте́чествіи твое́мъ вмѣне́нъ бы́лъ еси́ поноше́ніемъ, и́стинныя сла́вы жела́ніемъ пита́яся.

Сла́ва: Отврати́лъ еси́ плещи́ твоя́ отъ мíра и возве́лъ еси́ въ го́ры о́чи твои́, ча́я по́мощи отту́ду Боже́ственныя; тѣ́мже отъ горы́ святы́я Своея́ услы́ша тя́ Бо́гъ и вознесе́ тя́ чудесы́.

И ны́нѣ, богоро́диченъ: Вопіе́тъ Дави́дъ богооте́цъ къ Дѣви́цѣ: у́хо Твое́ приклони́, Дщи́ Царе́ва, и ви́ждь люде́й Твои́хъ озлобле́ніе, гла́сы услы́ши блажа́щихъ Тя́ и Твою́ велича́ющихъ ми́лость.

[На моле́бнѣ а́біе: Спаси́ отъ бѣ́дъ... и При́зри благосе́рдіемъ.., сугу́бая ектенія́ и сѣда́ленъ, гла́съ 2: Моле́ніе те́плое...]. [Ищи́ все́ сіе́ въ кано́нѣ 1-го гла́са.]

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Воззва́ тя Госпо́дь отъ Сіо́на, живы́й во Іерусали́мѣ, я́коже дре́вле пра́отца Авраа́ма, изы́ти отъ земли́ оте́чества твоего́ повелѣва́я, ты́ же послѣ́довалъ еси́ словеси́ Его́ со усе́рдіемъ.

Свѣти́льникъ положи́лъ еси́ нога́ма твои́ма зако́нная повелѣ́нія и свѣ́тъ стезя́мъ твои́мъ, тѣ́мъ во свѣ́тѣ изы́де пра́вда твоя́ и, я́коже полу́дне, всему́ мíру возсія́лъ еси́.

Сла́ва: Оде́жда пло́ти твоея́ ри́за ко́жаная бы́сть, въ ню́же обо́лкся, умертви́лъ еси́ страстна́я взыгра́нія, о́тче, и дебельство́ ко́жное ри́зы Ада́мскія до конца́ истни́лъ еси́.

И ны́нѣ, богоро́диченъ: Уподо́би Тя́ Дави́дъ голуби́цѣ, посре́бреннѣ крилѣ́ иму́щей и злата́я междура́мія, Препѣ́тая; тѣ́мже покры́й мя́ отъ стрѣ́лъ, летя́щихъ во дни́, и изба́ви мя́.

Пѣ́снь 5.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Собла́знъ при стези́ угото́вавъ, препя́ти души́ твоея́ тече́ніе діа́волъ тща́шеся и разбо́йники посла́ отгна́ти тя́ отъ пеще́ры пе́рвыя; ты́ же, я́ко за Христа́ гони́мь, бѣ́гая, ра́довался еси́.

Слеза́ми оче́съ твои́хъ зе́млю напои́въ пребога́тно, прозябе́ слану́токъ тебѣ́ неора́нно, преблаже́нне, и́мже немощно́му тѣ́лу твоему́ ма́лое утѣше́ніе подава́лъ еси́, Пищеда́телю благода́рственная воспѣва́я.

Сла́ва: Зако́номъ Христо́вымъ науче́нный, о пи́щи и оде́жди не попе́клся еси́, но, небе́сныхъ пти́цъ дѣ́ло исполня́я, въ дре́во ду́пленное всели́лся еси́ и безъ покро́ва на мно́ги дни́ пребы́лъ еси́.

И ны́нѣ, богоро́диченъ: Ке́дры лива́нскія превозше́дшая, Горо́ ту́чная и конце́мъ блиста́ющая добродѣ́телію, си́лою безъ руки́ отъ Тебе́ отсѣ́кшагося Ка́мене сокруши́ и́долы страсте́й мои́хъ и ду́шу утверди́, Блага́я.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Обновле́нное ра́ломъ по́стническимъ се́рдце твое́ воспріи́мъ, Бо́гъ въ пусты́ни неора́ннѣй пло́дъ тебѣ́ произрасти́.

Отъ мно́гихъ лѣ́тъ діа́волъ му́чаше человѣ́ка, его́же ты́, къ тебѣ́ приведе́нна, вско́рѣ исцѣли́лъ еси́ моли́твою.

Сла́ва: Илія́ проро́къ го́рстію муки́ вдови́цу пита́ше со ча́ды, ты́ же, чудотворя́, ма́лою пи́щею напита́лъ еси́ пасу́щихъ.

И ны́нѣ, богоро́диченъ: Отъ язы́ка льсти́ваго изба́ви мя́, Ма́ти Бо́жія Благосе́рдая, неду́говъ же и скорбе́й, ра́дость да́рующи се́рдцу моему́.

[Аще моле́бенъ: Спаси́ отъ бѣ́дъ... и При́зри благосе́рдіемъ.., ектенія́, та́же конда́къ, гла́съ 2: Моля́щимъ тя́ теплѣ́йшій засту́пниче... И ве́сь ева́нгельскій чи́нъ, я́коже преднаписа́ся]. [Ищи́ все́ сіе́ въ кано́нѣ 1-го гла́са.]

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Поще́ніемъ мно́гимъ и бо́дренною моли́твою, нестяжа́ніемъ и сле́зными исто́чники украси́лъ еси́ тво́й душе́вный до́мъ, о́тче, Сердцевѣ́децъ же, обрѣ́тъ, всели́ся въ не́мъ, испо́лнивъ его́ Свои́хъ дарова́ній.

Побѣди́лъ еси́ тмочи́сленная кова́рства врага́, стезе́ю тѣ́сною ше́ствовавъ, и Подвигополо́жнику Го́споду угоди́лъ еси́, отъ Него́же вѣне́цъ пріи́мъ, чуде́съ исто́чникъ стяжа́лъ еси́ свѣ́тлое воздая́ніе.

Сла́ва: Боже́ственная ра́ка моще́й твои́хъ, я́коже ра́й, благоуха́етъ, па́че ины́хъ арома́тъ, чу́вства всѣ́хъ притека́ющихъ и сердца́ наслажда́ющи, преподо́бне, и явле́ніе иму́щи нема́лое у́мныхъ дарова́ній.

И ны́нѣ, богоро́диченъ: Не обрѣ́те Бо́гъ святѣ́йшія па́че Тебе́, смы́сломъ и тѣ́ломъ дѣ́вствующія, его́же ра́ди вожделѣ́ добро́ты Твоя́ и въ Тя́ всели́ся, отъ пречи́стыхъ крове́й пло́ть пріи́мъ, да со земны́ми поживе́тъ.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.

Въ тѣлеси́ ме́ртвеннѣмъ твоему́ па́че естества́ терпѣ́нію дивя́щеся, а́нгельстіи ли́цы оби́тель тебѣ́ на небеси́ свѣ́тло предугото́ваша, въ ню́же тя́ и прія́ша, отъ земли́ преста́вльшагося.

Боже́ственное дарова́ніе чудесы́ открыва́етъ сокрове́нное въ земли́ тѣ́ло твое́ дѣ́вственное, Іоа́нне преблаже́нне, и исто́чникъ излива́етъ благода́ти всѣ́мъ вѣ́рнымъ, твоея́ по́мощи прося́щимъ.

Сла́ва: Словесы́ да воспое́тся Бо́гъ Тріѵпоста́сный, Еди́нъ Сы́й по существу́: Сло́во, Еже къ Бо́гу, Оте́цъ, Иже въ нѣ́дрѣхъ Того́ нося́й, и Ду́хъ Боже́ственный, отъ Отца́ исходя́й.

И ны́нѣ, богоро́диченъ: Се́, я́коже изреко́ша злата́я Твоя́ и пречи́стая уста́, Богоро́дице, блажа́тъ Тя́ вси́ ро́ди вѣ́рно, поне́же Бо́гъ Тя́ возвели́чи и херуви́мъ честнѣ́йшую яви́ Тя.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Боже́ственную твою́ Це́рковь исто́чникъ чуде́съ яви́ Бо́гъ па́че, не́жели дре́вле іуде́омъ о́вчую купе́ль: не еди́нъ бо, но безчи́сленное мно́жество, приходя́ще, пріе́млютъ исцѣле́нія, преблаже́нне Іоа́нне.

Жи́зни нетлѣ́нныя на земли́ кро́ткихъ сподо́бился еси́ и со а́нгелы водворе́нія, сно́мъ же на мно́зѣ вре́мени усну́въ, во гро́бѣ я́ко жи́въ явля́ешися и неруши́мь, богоблаже́нне Іоа́нне.

Сла́ва: Благода́ть твою́ и благи́хъ хотѣ́ніе свы́ше на́мъ да́руй, по си́лѣ тебѣ́ словеса́ истка́вшимъ хвале́нія отъ жела́нія серде́чнаго, Іоа́нне прехва́льне, чуде́съ неоску́дный исто́чниче.

И ны́нѣ, богоро́диченъ: Лѣ́ствице небе́сная, свѣ́щниче златы́й и трапе́зо пречи́стая, отъ земли́ на не́бо возведи́ мя, сія́ніемъ Сы́на Твоего́ освѣти́ мя и хлѣ́бомъ Боже́ственнымъ насы́ти, се́рдце мое́ утвержда́ющи пѣ́ти Тя́ во вѣ́ки.

[И а́ще у́бо моле́бенъ, а́біе: Досто́йно е́сть.., велича́нія, во гла́съ 2: Ангела земна́го.., Трисвято́е, тропа́рь съ богоро́дичнымъ, ектенія́, моли́тва и отпу́стъ]. [Ищи́ все́ сіе́ въ кано́нѣ 1-го гла́са.]

Источникъ: Богослужебная послѣдованія на все лѣто преподобному и богоносному отцу нашему Іоанну Рыльскому, съ приложеніемъ. † Левкійскій епископъ Парѳеній. — Софія: Синодально издателство, 1955. — Л. 181-186.

/ Къ оглавленію раздѣла /


Наверхъ / Къ титульной страницѣ

0