Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Кано́ны 8-ми́ гласо́въ
преподо́бному Іоа́нну Ры́льскому, пѣва́еміи [во оби́тели его́] на моле́бнѣхъ въ четверто́къ, и́же и на у́трени чита́еміи по суббо́тамъ.

[Кано́нъ моле́бный, гла́съ 1:]

Благослови́вшу свяще́ннику, начина́емъ псало́мъ 142-й: Го́споди, услы́ши моли́тву мою́... Сла́ва, и ны́нѣ. Аллилу́ія [3]. Та́же: Бо́гъ Госпо́дь... [4]

И тропа́рь преподо́бнаго, [гла́съ 1]:

Покая́нія основа́ніе, [прописа́ніе умиле́нія, о́бразъ утѣше́нія, духо́внаго соверше́нія равноа́нгельное житіе́ твое́ бы́сть, преподо́бне. Въ моли́твахъ у́бо и въ поще́ніихъ и въ слеза́хъ пребыва́вый, о́тче Іоа́нне, моли́ Христа́ Бо́га о душа́хъ на́шихъ].

Сла́ва, и ны́нѣ, богоро́диченъ:

Гавріи́лу вѣща́вшу [Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ].

И а́біе псало́мъ 50-й: Поми́луй мя́, Бо́же...

Кано́нъ, гла́съ 1, его́же краегране́сіе: Ди́венъ Бо́гъ во святы́хъ Свои́хъ, Бо́гъ Исра́илевъ.

Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяномъ пу́ть глубины́ новосодѣ́лавшая.

Запѣ́въ: Преподо́бне о́тче Іоа́нне, моли́ Бо́га о на́съ.

Да́ждь ми́, блаже́нне, крѣ́пкую съ высоты́ по́мощь и просвѣще́ніе ра́зума, я́ко да равноа́нгельное твое́ на земли́ житіе́ восхвалю́, и́мже исто́чникъ чуде́съ яви́лся еси́.

Иже въ Лива́нѣ ке́дру уподо́бился еси́, добродѣ́тели боже́ственныя преумно́живъ, и, я́ко дре́во насади́вся при исхо́дищихъ воды́ живы́я, осѣня́еши ны́нѣ неду́жныхъ благода́тію.

Сла́ва: Вы́спрь житіе́ на́ше я́ко слы́шавъ и на небесѣ́хъ пребыва́ніе, оста́вилъ еси́ зе́млю оте́чества твоего́, и мíра кра́сная презрѣ́лъ еси́, и къ вы́шней жи́зни впери́лся еси́.

И ны́нѣ, богоро́диченъ: Егда́ восхожда́ху небе́сніи уми́ лѣ́ствицу Іа́ковлю и низхожда́ху, Твое́ стра́шное рождество́ тогда́ та́йно яви́ша, Богоро́дице, и́мже у́бо Бо́гъ на зе́млю сни́де, да человѣ́ки на не́бо вознесе́тъ.

Пѣ́снь 3.

Ирмо́съ: Еди́не Вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й: одушевле́нный хра́ме неизрече́нныя сла́вы Твоея́, Человѣколю́бче.

Не роди́вся отъ по́хоти плотскíя, я́ко безпло́тенъ пожи́лъ еси́ на земли́, и ча́до бы́лъ еси́ Вы́шняго благода́тію, и я́ко жре́бій оте́ческій прія́лъ еси́ угото́ванное Ца́рство Того́ возлю́бльшимъ.

Благода́тію Ду́ха исполня́я за́повѣдь изра́ильтяномъ Моисе́йскую, очи́стилъ еси́ тѣ́ло и ду́шу де́ньми мно́жайшими, на го́ру возше́дъ, и я́ко безпло́тенъ пребыва́лъ еси́ та́мо, и боговидѣ́нія сподо́бился еси́.

Сла́ва: Отъ ю́ности украси́вся ра́зумомъ, Соломо́нову му́дрость стяжа́лъ еси́ и, всю́ мíра сего́ сла́стную пи́щу премину́въ, а́лчбою и болѣ́знію потща́лся еси́ нетлѣ́нную получи́ти, всеблаже́нне.

И ны́нѣ, богоро́диченъ: Госпо́дь пе́рстомъ написа́ въ Тебѣ́ Сло́во Безнача́льное, я́коже въ глави́знѣ кни́жнѣй, Всепѣ́тая; тѣ́мже припа́даю Ти́, моля́ся, въ кни́зѣ живо́тнѣй мя́ написа́ти, грѣхо́въ рукописа́ніе растерза́ющи.

По си́хъ а́біе пое́мъ:

Спаси́ отъ бѣ́дъ рабы́ твоя́, преподо́бне о́тче Іоа́нне, я́ко вси́ по Бо́зѣ къ тебѣ́ прибѣга́емъ, я́ко неруши́мому столпу́ и предста́телю.

При́зри благосе́рдіемъ, Всепѣ́тая Богоро́дице, на мое́ лю́тое тѣлесе́ озлобле́ніе и исцѣли́ души́ моея́ болѣ́знь.

Та́же свяще́нникъ или діа́конъ ектенію́:

Поми́луй на́съ, Бо́же, по вели́цѣй ми́лости Твое́й, мо́лимъ Ти ся, услы́ши и поми́луй.

Ли́къ: Го́споди, поми́луй [3].

Еще́ мо́лимся о святѣ́йшемъ отцѣ́ на́шемъ [и́мярекъ], Мирополи́тѣ Софíйстѣмъ и Патріа́рсѣ Бо́лгарстѣмъ, о высокопреосвяще́ннѣйшемъ Митрополи́тѣ на́шемъ [и́мярекъ], о бра́тіяхъ на́шихъ свяще́нницѣхъ, священномона́сѣхъ, священнодіа́конѣхъ и мона́сѣхъ, и о все́й во Христѣ́ бра́тіи на́шей.

Еще́ мо́лимся о благочести́вомъ правосла́вномъ бо́лгарстѣмъ наро́дѣ и христолюби́вомъ его́ во́инствѣ.

Еще́ мо́лимся о ми́лости, жи́зни, ми́рѣ, здра́віи, спасе́ніи, посѣще́ніи, проще́ніи и оставле́ніи грѣхо́въ рабо́въ Бо́жіихъ [и помина́етъ имена́, за ни́хже пое́тся моле́бенъ] и о е́же умно́житися лѣ́томъ живота́ и́хъ.

Еще́ мо́лимся за всю́ бра́тію и за вся́ христіа́ны.

Во́згласъ: Яко ми́лостивъ и человѣколю́бецъ Бо́гъ еси́, и Тебѣ́ сла́ву возсыла́емъ, Отцу́ и Сы́ну и Свято́му Ду́ху, ны́нѣ и при́сно и во вѣ́ки вѣко́въ. Ами́нь.

И а́біе сѣда́ленъ, гла́съ 2:

Моле́ніе те́плое и стена́ніе серде́чное принося́ще тебѣ́, преподо́бне о́тче Іоа́нне, прилѣ́жно вопіе́мъ ти́: предвари́ и отъ бѣ́дъ изба́ви на́съ, я́ко ско́рый помо́щникъ и те́плый на́шъ предста́тель.

Пѣ́снь 4.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Видѣ́ніе Даніи́лово разсмотри́въ, я́ко отъ горы́ отто́ржеся ка́мень несѣче́нный и въ пра́хъ и́дольское сокруши́ мучи́тельство, обрѣ́лъ еси́ на горѣ́ краеуго́льный Ка́мень, Христа́, зло́бу всю́ сокруша́юща.

Огне́мъ да не опали́тся содо́мскимъ, а́нгелъ Ло́тови повелѣва́ше на горѣ́ спасти́ся, ты́ же, ра́вное тому́ рве́ніе воспріи́мъ и на го́ру возше́дъ, та́мо жи́ти изво́лилъ еси́ и пла́мене стра́стнаго избѣжа́лъ еси́.

Сла́ва: Смире́нно послѣ́довалъ еси́ жезло́мъ позва́вшему тя́ Па́стырю и, я́ко овча́ незло́биво, зе́ліемъ го́рнимъ пита́лся еси́; ны́нѣ же на па́жити ра́йстѣй поко́ище обрѣ́тъ, на вода́хъ пи́щныхъ насыща́ешися.

И ны́нѣ, богоро́диченъ: Вкуси́ Ада́мъ печа́ль плода́ дре́вняго, жену́ послу́шавъ, Ты́ же, Чи́стая, гла́съ арха́нгела воспріи́мши, — се́ Раба́ Госпо́дня! — возопи́вши и Бо́га поро́ждши, ра́дость въ мíръ ввела́ еси́.

Пѣ́снь 5.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія правосла́вно пою́щихъ Тя́.

Якоже а́нгелъ на земли́ пребы́въ, воздержа́ніемъ Крести́телю уподо́бился еси́, пусты́нному воспита́нію, преподо́бне; ны́нѣ же хлѣ́бомъ а́нгельскимъ пита́яся по пи́санному, насы́ти ду́ши на́ша благода́тію.

Твое́ дерзнове́ніе, е́же къ Бо́гу, неора́нно прозябы́й слану́токъ проповѣ́дуетъ, о́тче, и́мже самаго́ себе́ ди́вно пита́лъ еси́, я́коже естество́мъ пло́ти обложе́ннаго, и и́же къ тебѣ́ приходя́щія.

Сла́ва: Истинная наде́жда не посрами́ тебе́, блаже́нне, увѣ́дѣвша бу́дущую сла́ву, къ не́йже недосто́йна вмѣни́лъ еси́, я́же на земли́ боре́нія и дерзнове́нно къ по́стническимъ страсте́мъ устреми́лся еси́.

И ны́нѣ, богоро́диченъ: Хи́тростію змíя Ада́мъ боже́ственныя ри́зы совлече́ся и въ ри́зу ко́жаную одѣ́яся; отъ Тебе́ же пло́ть пріи́мъ, Зижди́тель мо́й дебельства́ пло́ти совлече́ мя и въ пе́рвую мя́ па́ки оде́жду одѣ́я.

Пѣ́снь 6.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Свѣ́томъ пе́рвымъ облиста́вся, бы́лъ еси́ свѣти́льникъ, блаже́нне, и а́нгеломъ подо́бникъ, безпреста́нно поя́ въ моли́твахъ всено́щныхъ Еди́наго Бо́га, Его́же и сы́нъ благода́тію яви́лся еси́.

Волну́ющееся бу́рею мо́ре житія́ оста́вилъ еси́, погружа́ющее нехотя́щихъ на не́бо вознести́ся, и вся́ преше́лъ еси́ мірскíя прило́ги, на́гъ бѣ́гая искуше́ній лука́ваго.

Сла́ва: Обрѣ́лъ еси́ Бо́га, все́льшася въ тя́, не да́въ поко́я скраніа́ма твои́ма, ни ве́ждома твои́ма дрема́нія, и, я́ко безпло́тенъ во пло́ти пожи́въ, въ небе́сныя хра́мы всели́лся еси́.

И ны́нѣ, богоро́диченъ: Иска́пай ка́пли щедро́тъ, о́блаче небе́сный, Чи́стая Дѣ́во, я́коже руно́ пріи́мшая до́ждь и я́коже ка́плю — Бо́га во чре́вѣ, и страсте́й мои́хъ пото́ки изсуши́.

И па́ки: Спаси́ отъ бѣ́дъ рабы́ твоя́... и При́зри благосе́рдіемъ.., я́коже по 3-й пѣ́сни. Та́же ектенія́ ма́лая, и по во́згласѣ а́біе

Конда́къ, гла́съ 2. Подо́бенъ: Въ моли́твахъ Неусыпа́ющую.

Моля́щимъ тя́ теплѣ́йшій засту́пниче и прося́щимъ скорѣ́йшій послу́шателю, преподо́бне о́тче Іоа́нне, пріими́ моле́ніе на́ше и Христа́ умоли́ поми́ловати на́съ, Еди́наго Преблага́го и Многоми́лостиваго.

Проки́менъ, гла́съ 4: Честна́ предъ Го́сподомъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Свяще́нникъ: И о сподо́битися на́мъ слы́шанію свята́го Ева́нгелія, Го́спода Бо́га мо́лимъ. Прему́дрость, про́сти, услы́шимъ свята́го Ева́нгелія. Ми́ръ всѣ́мъ. Отъ Матѳе́я свята́го Ева́нгелія чте́ніе.

И чте́тъ зача́ло 43:

Рече́ Госпо́дь Свои́мъ ученико́мъ: вся́ Мнѣ́ предана́ су́ть Отце́мъ Мои́мъ. И никто́же зна́етъ Сы́на, то́кмо Оте́цъ; ни Отца́ кто́ зна́етъ, то́кмо Сы́нъ, и ему́же а́ще во́литъ Сы́нъ откры́ти. Пріиди́те ко Мнѣ́ вси́ тружда́ющіися и обремене́нніи, и Азъ упоко́ю вы́. Возми́те и́го Мое́ на себе́ и научи́теся отъ Мене́, я́ко кро́токъ е́смь и смире́нъ се́рдцемъ, и обря́щете поко́й душа́мъ ва́шимъ. Иго бо Мое́ бла́го, и бре́мя мое́ легко́ е́сть.

И а́біе: Сла́ва, гла́съ 2: Моли́твами преподо́бнаго, Ми́лостиве, очи́сти мно́жества согрѣше́ній на́шихъ. И ны́нѣ: Моли́твами Богоро́дицы... Та́же сти́хъ: Поми́луй мя́, Бо́же...

И стихи́ра, гла́съ 6:

Моле́бное пѣ́ніе творя́ще богоно́сному отцу́, пріиди́те, припаде́мъ къ честнѣ́й ра́цѣ моще́й его́, изъ глубины́ серде́чныя взыва́юще: уго́дниче Христо́въ, преподо́бне Іоа́нне, не пре́зри ма́лаго на́шего пѣ́нія, недосто́йными устна́ми тебѣ́ приноси́маго, но пріими́ моле́ніе на́ше и низпосли́ на́мъ свы́ше бога́тую по́мощь, отъ напа́стей ны́ избавля́я твои́ми къ Бо́гу моли́твами, всеблаже́нне и досточу́дне о́тче.

Свяще́нникъ:

Спаси́, Бо́же, лю́ди Твоя́ и благослови́ достоя́ніе Твое́, посѣти́ мíръ Тво́й ми́лостію и щедро́тами, возвы́си ро́гъ христіа́нъ правосла́вныхъ и низпосли́ на ны́ ми́лости Твоя́ бога́тыя, моли́твами всепречи́стыя Влады́чицы на́шея Богоро́дицы и Приснодѣ́вы Марíи, си́лою Честна́го и Животворя́щаго Креста́, предста́тельствы честны́хъ небе́сныхъ си́лъ безпло́тныхъ, моли́твами честна́го, сла́внаго проро́ка, Предте́чи и Крести́теля Іоа́нна, святы́хъ сла́вныхъ и всехва́льныхъ апо́столъ, святы́хъ, сла́вныхъ и добропобѣ́дныхъ му́чениковъ, преподо́бныхъ и богоно́сныхъ оте́цъ на́шихъ, и́же во святы́хъ оте́цъ на́шихъ и вселе́нскихъ вели́кихъ учи́телей и святи́телей, Васи́лія Вели́каго, Григо́рія Богосло́ва и Іоа́нна Златоу́стаго, и́же во святы́хъ отца́ на́шего Никола́я, архіепи́скопа Мѵрликíйскаго, чудотво́рца, святы́хъ равноапо́стольныхъ славянобо́лгарскихъ просвѣти́телей Меѳо́дія и Кири́лла, и святы́хъ ученико́въ и́хъ Кли́мента и Нау́ма, Охридскихъ чудотво́рцевъ, Са́ввы, Гора́зда и Ангела́рія, свята́го благовѣ́рнаго царя́ Бори́са, преподо́бнаго и богоно́снаго отца́ на́шего Іоа́нна, пустыножи́теля Ры́льскаго чудотво́рца, и́же во святы́хъ отца́ на́шего Иларіо́на, епи́скопа Ме́гленскаго, и Евѳи́мія, патріа́рха Те́рновскаго, преподо́бныхъ и богоно́сныхъ оте́цъ на́шихъ Гавріи́ла Лѣ́сновскаго, Іоаки́ма Осого́вскаго, Про́хора Пши́нскаго и Ѳеодо́сія Те́рновскаго, святы́хъ сла́вныхъ и добропобѣ́дныхъ му́чениковъ Гео́ргія Побѣдоно́сца и Дими́трія Мѵроточи́ваго, святы́хъ му́ченикъ Гео́ргія, Гео́ргія и Никола́я Софíйскихъ, и свята́го [его́же е́сть хра́мъ], святы́хъ и пра́ведныхъ богооте́цъ Іоаки́ма и Анны и свята́го [его́же е́сть де́нь], его́же и па́мять соверша́емъ, и всѣ́хъ святы́хъ, мо́лимъ Тя́, многоми́лостиве Го́споди, услы́ши на́съ, грѣ́шныхъ, моля́щихся Тебѣ́, и поми́луй на́съ.

Ли́къ: Го́споди, поми́луй, [12].

Возгла́съ: Ми́лостію и щедро́тами и человѣколю́біемъ единоро́днаго Сы́на Твоего́, съ Ни́мже благослове́нъ еси́, со Пресвяты́мъ, и благи́мъ, и животворя́щимъ Твои́мъ Ду́хомъ, ны́нѣ и при́сно, и во вѣ́ки вѣко́въ.

Пѣ́снь 7.

Ирмо́съ: Тебе́, у́мную, Богоро́дице, пе́щь разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Хра́брый ревни́тель бы́въ Иліи́ проро́ку, на стра́сти устреми́лся еси́ ору́жіемъ поста́ и, на горѣ́ водворя́яся, а́лчбою па́че человѣ́къ по́стнически умертви́лъ еси́ сра́мныя по́мыслы.

Бо́жія пути́ пра́ваго восхотѣ́въ, и мірска́го жела́нія отве́ргся, и на ка́мени разу́мнѣмъ стопы́ души́ твоея́ утверди́въ, ка́мене собла́зна при стези́ всѣ́хъ избавля́еши и прило́говъ искуше́ній.

Сла́ва: Окрестъ ра́ки моще́й твои́хъ то́чатся чудеса́ исцѣле́ній приходя́щимъ, Бо́гу бо коне́чнѣ угоди́лъ еси́, вѣ́рующимъ обѣща́вшему рѣ́ки изъ чре́ва источи́ти Боже́ственныя благода́ти.

И ны́нѣ, богоро́диченъ: Глубину́ слы́шимъ прему́дрости, Пречи́стая, я́ко Созда́вшаго руко́ю Ада́ма и отъ ребра́ Еву Сотво́ршаго Сло́ва воплоти́ла еси́, Иже, въ ре́бра на Крестѣ́ пробожде́нъ, ро́дъ человѣ́ческій обнови́.

Пѣ́снь 8.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Иску́съ врага́ доблему́дренно отрази́въ во бра́ни крѣ́пцѣй и непобѣди́мь яви́вся бѣсо́вскими кова́рствы, побѣ́дными вѣнцы́ увяза́лся еси́ и, Го́сподеви ны́нѣ предстоя́, мо́лишися о воспѣва́ющихъ тя́.

Сме́ртнѣй кончи́нѣ приспѣ́вшей вре́меннѣй, оста́вилъ еси́ труды́ по́стническія, и, вѣ́чный поко́й воспріи́мь, Бо́гу предстои́ши, и, посрѣди́ луче́й неизрече́ннаго Божества́ сія́я, о на́съ мо́лишися.

Сла́ва: Ра́внѣ дре́внему патріа́рху Іа́кову ва́ръ дневны́й поне́съ и сту́день нощну́ю претерпѣ́въ, возше́лъ еси́ лѣ́ствицею добродѣ́телей на высоту́ боговидѣ́нія, о́тче Іоа́нне, чуде́съ исто́чниче.

И ны́нѣ, богоро́диченъ: Агнице Пречи́стая, къ Тебѣ́ прибѣга́ю: ду́шу мою́, страстьми́ оскверне́нную, вода́ми омы́й сле́зными, вода́ми благода́ти Ду́ха Бо́жія глубо́кій ка́лъ грѣ́хъ человѣ́ческихъ омы́вшая.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Изя́щныя по́чести по́двига твоего́ воспрія́лъ еси́ терпѣ́ніемъ твои́мъ, его́же ра́ди со а́нгелы водворя́ешися и за наготу́ тѣле́сную въ небе́сную ри́зу обле́клся еси́, въ по́стницѣхъ всеизря́дне.

Любому́дрыхъ собо́рище, ви́ждь, каковы́ми благода́тьми воздае́тъ Бо́гъ и́стинно Того́ добро́ты вожделѣ́вшимъ: ни естество́ бо, ни вре́мя тѣлесе́ Іоа́нна пустыннолю́бнаго побѣди́, точа́щаго чудеса́ да́же доны́нѣ.

Сла́ва: Ели́ко си́ла скрижа́ли се́рдца моего́ распросте́ръ, вся́ написа́хъ мно́гія твоя́ благода́ти, но досто́йна ничесо́же принесо́хъ тебѣ́; тѣ́мже молю́ тя́: вѣ́ру пріими́ и любо́вь, преблаже́нне.

И ны́нѣ, богоро́диченъ: Вонми́ Дави́дскихъ гу́слей провѣща́нію, Дщи́ Царе́ва, и приклони́ у́хо Твое́. Люде́й Твои́хъ не забу́ди, но уще́дри, Дѣви́це, и́же непреста́нно Тя́ сла́вящихъ.

Та́же: Досто́йно е́сть я́ко вои́стину блажи́ти Тя́ Богоро́дицу, присноблаже́нную и пренепоро́чную и Ма́терь Бо́га на́шего. Честнѣ́йшую херуви́мъ и сла́внѣйшую безъ сравне́нія серафи́мъ, безъ истлѣ́нія Бо́га Сло́ва ро́ждшую, су́щую Богоро́дицу, Тя́ велича́емъ.

И кади́тъ свяще́нникъ олта́рь, иконоста́съ и лю́ди, мы́ же пое́мъ настоя́щія тропари́ преподо́бнаго, [гла́съ 2]:

Ангела земна́го въ пѣ́снехъ почти́мъ, Іоа́нна, и граждани́на небе́снаго, при́сно предстоя́щаго въ свѣ́тлостехъ со а́нгельскими ли́ки престо́лу Святы́я Тро́ицы.

Отъ мно́гихъ мои́хъ и лю́тыхъ грѣхо́въ немощству́етъ тѣ́ло, немощству́етъ и душа́ моя́: къ тебѣ́ прибѣга́ю, моля́ся, преподо́бне, спаси́ мя, окая́ннаго, въ си́хъ погиба́юща.

Ско́ро пріими́ мольбы́ на́ша, пла́чь же и сле́зы недосто́йныхъ ра́бъ твои́хъ, и при́сно о на́съ моли́ся преблаго́му Бо́гу, Іоа́нне блаже́нне, Бо́жій уго́дниче.

Пое́мъ вси́ прилѣ́жно пѣ́снь тебѣ́ ны́нѣ, всеблаже́нне Іоа́нне, и вопіе́мъ: отъ бѣ́дъ на́съ изба́ви и бу́ди на́мъ помо́щникъ, честну́ю твою́ па́мять вѣ́рно почита́ющимъ.

Вся́ а́нгеловъ во́инства, Предте́че Госпо́день, апо́столовъ ли́че ве́сь и всѣ́хъ святы́хъ чи́ни, прилѣ́жно съ Богоро́дицею благо́му Бо́гу о на́съ при́сно моли́теся.

И а́біе: Трисвято́е, и по Отче на́шъ. Свяще́нникъ: Яко Твое́ е́сть Ца́рство... Ами́нь. Тропа́рь: Покая́нія основа́ніе... Сла́ва, и ны́нѣ: Гавріи́лу вѣща́вшу...

И ектенія́ сугу́бая:

Поми́луй на́съ, Бо́же, по вели́цѣй ми́лости Твое́й, мо́лимъ Ти ся, услы́ши и поми́луй.

Ли́къ: Го́споди, поми́луй [3].

Еще́ мо́лимся о святѣ́йшемъ отцѣ́ на́шемъ [и́мярекъ], Мирополи́тѣ Софíйстѣмъ и Патріа́рсѣ Бо́лгарстѣмъ, о высокопреосвяще́ннѣйшемъ Митрополи́тѣ на́шемъ [и́мярекъ], о бра́тіяхъ на́шихъ свяще́нницѣхъ, священномона́сѣхъ, священнодіа́конѣхъ и мона́сѣхъ, и о все́й во Христѣ́ бра́тіи на́шей.

Еще́ мо́лимся о благочести́вомъ правосла́вномъ бо́лгарстѣмъ наро́дѣ и христолюби́вомъ его́ во́инствѣ.

Еще́ мо́лимся о ми́лости, жи́зни, ми́рѣ, здра́віи, спасе́ніи, посѣще́ніи, проще́ніи и оставле́ніи грѣхо́въ рабо́въ Бо́жіихъ [и помина́етъ имена́, и́хже хо́щетъ] и о е́же умно́житися лѣ́томъ живота́ и́хъ.

Еще́ мо́лимся, и о е́же сохрани́тися святѣ́й оби́тели се́й [или́: свято́му хра́му сему́, или́: честно́му до́му сему́], и вся́кому гра́ду и странѣ́, отъ гла́да, губи́тельства, тру́са, пото́па, огня́, меча́, наше́ствія иноплеме́нныхъ и междоусо́бныя бра́ни; о е́же ми́лостиву и благоувѣ́тливу бы́ти благо́му и человѣколюби́вому Бо́гу на́шему, отврати́ти вся́кій гнѣ́въ, на ны́ дви́жимый, и изба́вити ны́ отъ належа́щаго и пра́веднаго Своего́ преще́нія, и поми́ловати ны́. [Ли́къ:] Го́споди поми́луй. [40.]

Свяще́нникъ: Услы́ши ны́, Бо́же Спаси́телю на́шъ, упова́ніе всѣ́хъ конце́въ земли́ и су́щихъ въ мо́ри дале́че, и ми́лостивъ, ми́лостивъ бу́ди, Влады́ко, о грѣсѣ́хъ на́шихъ, и поми́луй ны́. Ми́лостивъ бо и человѣколю́бецъ Бо́гъ еси́, и Тебѣ́ сла́ву возсыла́емъ, Отцу́ и Сы́ну и Свято́му Ду́ху, ны́нѣ и при́сно и во вѣ́ки вѣко́въ. Ами́нь.

Та́же: Па́ки и па́ки, прекло́ньше колѣ́на, ко преподо́бному и богоно́сному отцу́ на́шему Іоа́нну, пустыножи́телю Ры́льскому, помо́лимся.

Ли́къ: Преподо́бне о́тче Іоа́нне, моли́ Бо́га о на́съ.

И чте́тъ свяще́нникъ ку́ю-ли́бо изъ моли́твъ ака́ѳистныхъ, или́ же настоя́щую моли́тву:

О, преподо́бне о́тче Іоа́нне, уго́дниче Госпо́день преизря́дный, те́плый на́шъ засту́пниче и вездѣ́ въ ско́рбехъ ско́рый помо́щниче! Помози́ мнѣ́, грѣ́шному и уны́лому, въ настоя́щемъ се́мъ житіи́ и умоли́ Го́спода Бо́га дарова́ти ми́ оставле́ніе всѣ́хъ мои́хъ грѣхо́въ, ели́ко согрѣши́хъ отъ ю́ности моея́ во все́мъ житіи́ мое́мъ дѣ́ломъ, сло́вомъ, помышле́ніемъ и всѣ́ми мои́ми чу́вствы. И во исхо́дѣ души́ моея́ помози́ ми, окая́нному, и умоли́ Го́спода Бо́га, всея́ тва́ри Содѣ́теля, изба́вити мя́ возду́шныхъ мыта́рствъ и вѣ́чнаго муче́нія, да всегда́ прославля́ю Отца́ и Сы́на и Свята́го Ду́ха, и твое́ ми́лостивное предста́тельство, ны́нѣ, и при́сно, и во вѣ́ки вѣко́въ.

И отпу́стъ.

Источникъ: Богослужебная послѣдованія на все лѣто преподобному и богоносному отцу нашему Іоанну Рыльскому, съ приложеніемъ. † Левкійскій епископъ Парѳеній. — Софія: Синодально издателство, 1955. — Л. 169-180.

/ Къ оглавленію раздѣла /


Наверхъ / Къ титульной страницѣ

0