Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 28 iюня 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа во 18-й де́нь.
Успе́ніе преподо́бнаго и богоно́снаго отца́ на́шего Іоа́нна, пустынножи́теля Ры́льскаго, чудотво́рца.

НА МАЛѢЙ ВЕЧЕРНИ,
На Го́споди воззва́хъ.., поста́вимъ стихо́въ 4 и пое́мъ стихи́ры, гла́съ 8. Подо́бенъ: О, пресла́внаго чудесе́!

Любе́знѣ Влады́цѣ послѣ́довалъ еси́,* отъ млады́хъ ногте́й Того́ соверша́я повелѣ́нія,* и, благода́тію па́че не́жели млеко́мъ воспита́нъ,* возра́слъ еси́ въ цѣлому́дріи и чистотѣ́,* и, въ до́мъ Бо́жій приходя́ и поуча́яся,* Христа́ обрѣ́лъ еси́,* Іоа́нне преблаже́нне,* Его́же моли́, да спасе́тъ ду́ши на́ша, я́ко Милосе́рдъ.

Поще́ніемъ и бдѣ́ніемъ* у́мъ сво́й очи́стивъ,* возше́лъ еси́ на высоту́ небе́сную* лѣ́ствицею добродѣ́телей,* и, въ сла́вѣ со а́нгелы при́сно водворя́яся,* на враги́ небе́сную побѣ́ду на́мъ испроси́* у Царя́ вѣко́въ, Христа́ Бо́га на́шего,* Іоа́нне преблаже́нне,* Его́же моли́, да спасе́тъ ду́ши на́ша, я́ко Милосе́рдъ.

Весели́ся, пусты́не Ры́льская,* пріе́мши въ себѣ́ свѣти́ло мы́сленное,* свѣтолу́чными сія́ніи ве́сь мíръ просвѣща́ющее* и чудесы́ лю́ди ко Христу́ приводя́щее,* исцѣле́ній бо оби́льно пото́ки излива́етъ* и болѣ́зни вся́ исцѣля́етъ.* Но моли́ся Христу́ Бо́гу,* Іоа́нне преблаже́нне,* да спасе́тъ ду́ши на́ша, я́ко Милосе́рдъ.

Сла́ва, гла́съ 6:

Гла́са послу́шавъ Влады́чня, преподо́бне Іоа́нне, Спа́су глаго́лющу: и́же хо́щетъ вслѣ́дъ Мене́ ити́, да отве́ржется себе́ и, кре́стъ сво́й взе́мъ, да послѣ́дуетъ Мнѣ́; — оста́вилъ еси́ житіе́ тлѣ́нное и самаго́ себе́ сраспя́лъ еси́, я́ко па́стырю овца́, Христу́ послѣ́довалъ еси́ и въ Еде́мскую па́жить, ра́дуяся, всели́лся еси́.

И ны́нѣ, пра́здника, гла́съ 4:

Пріиди́те, воспое́мъ, лю́діе, Пресвяту́ю Дѣ́ву Чи́стую, изъ Нея́же неизрече́нно про́йде, вопло́щся, Сло́во Отчее, зову́ще и глаго́люще: благослове́нна Ты́ въ жена́хъ, блаже́нное чре́во, вмѣсти́вшее Христа́. Того́ святы́мъ рука́мъ ду́шу преда́вши, моли́ся, Пречи́стая, спасти́ся душа́мъ на́шимъ.

На стихо́внѣ стихи́ры [пра́здника], гла́съ 2. Подо́бенъ: До́ме Евфра́ѳовъ.

Вси́ небе́сніи,* воспо́йте, ли́цы,* и́бо Дѣ́ва Ма́ти* преста́вися пресла́вно* отъ земли́ къ небе́снымъ.

Сти́хъ: Воскресни́, Го́споди, въ поко́й Тво́й,* Ты́ и Киво́тъ святы́ни Твоея́.

Собра́ся ли́къ* учени́къ пресла́вно,* Отрокови́це, отъ коне́цъ мíра* погребсти́ Твое́ тѣ́ло* боже́ственное и нетлѣ́нное.

Сти́хъ: Кля́тся Госпо́дь Дави́ду и́стиною* и не отве́ржется ея́.

Две́ри небе́сныя,* возьми́теся, зря́ще* две́рь Вы́шняго,* иду́щую къ вы́шнимъ,* еди́ну Богома́терь.

Сла́ва, самогла́сенъ, гла́съ 5:

Преподо́бне о́тче Іоа́нне, отъ младе́нства добродѣ́тель прилѣ́жно стяжа́въ, сосу́дъ бы́лъ еси́ Свята́го Ду́ха и, отъ Него́ чуде́съ дѣ́йство пріи́мъ, увѣ́рилъ еси́ человѣ́ки преоби́дѣти сла́дкая. Ны́нѣ же Боже́ственнымъ свѣ́томъ чи́стѣ просвѣще́нъ, просвѣти́ на́ша мы́сли и чу́вства.

И ны́нѣ, пра́здника, гла́съ то́йже:

Воспо́йте, лю́діе, Ма́тери Бо́га на́шего, воспо́йте: дне́сь бо всесвѣ́тлую ду́шу Свою́ въ пречи́стыя дла́ни, Иже изъ Нея́ безъ сѣ́мене Вопло́щшагося предае́тъ, Его́же и мо́литъ непреста́нно, дарова́ти вселе́ннѣй ми́ръ, и ве́лію ми́лость.

Тропа́рь преподо́бнаго, гла́съ 1:

Покая́нія основа́ніе,* прописа́ніе умиле́нія,* о́бразъ утѣше́нія,* духо́внаго соверше́нія* равноа́нгельное житіе́ твое́ бы́сть, преподо́бне.* Въ моли́твахъ у́бо и въ поще́ніихъ* и въ слеза́хъ пребыва́вый,* о́тче Іоа́нне,* моли́ Христа́ Бо́га* о душа́хъ на́шихъ.

Сла́ва, и ны́нѣ, пра́здника, гла́съ то́йже:

Въ рождествѣ́ дѣ́вство сохрани́ла eси́,* во успе́ніи мíра* не оста́вила eси́, Богоро́дице,* преста́вилася eси́ къ животу́,* Ма́ти су́щи Живота́,* и моли́твами Твои́ми избавля́еши* отъ сме́рти ду́ши на́ша.


НА ВЕЛИЦѢЙ ВЕЧЕРНИ,
Пе́рвыя каѳи́смы пе́рвый антифо́нъ: Блаже́нъ му́жъ... На Го́споди, воззва́хъ.., поста́вимъ стихо́въ 8 и пое́мъ стихи́ры пра́здника, гла́съ 2. Подо́бенъ: Кíими похва́льными.

Ка́ко недосто́йными устна́ми* ублажи́мъ Богоро́дицу?* Честнѣ́йшую всея́ тва́ри* и святѣ́йши су́щую херуви́мъ и серафи́мъ,* престо́лъ Царя́ недви́жимый,* до́мъ, въ не́мже всели́ся Вы́шній,* спасе́ніе мíра, Бо́жіе свяще́ніе,* подаю́щую вѣ́рнымъ въ боже́ственнѣй па́мяти Ея́* ве́лію ми́лость.

Ка́я стра́шная пѣ́нія,* принесо́ша Ти́ тогда́, Дѣ́во,* о́крестъ одра́ Твоего́ стоя́ще,* вси́ и́же Сло́ва апо́столи* и ужа́снѣ вопію́ще:* отхо́дитъ Царе́ва пала́та,* возвыша́ется киво́тъ свяще́нія;* две́ри, возми́теся,* я́ко да Бо́жія две́рь вни́детъ въ ра́дость,* мíрови прося́щи ве́лія ми́лости.

Ка́я духо́вная пѣ́нія* ны́нѣ принесе́мъ Тебѣ́, Всесвята́я?* Безсме́ртнымъ бо успе́ніемъ Твои́мъ* ве́сь мíръ освяти́ла еси́,* и ко премíрнымъ прешла́ еси́,* добро́ту разумѣва́ти Вседержи́теля,* и Тому́ я́коже Ма́ти сра́доватися,* а́нгельскимъ же чино́мъ дориноси́вшимъ, Чи́стая,* и душа́мъ пра́ведныхъ.* Съ ни́миже проси́ на́мъ ми́ра и ве́лія ми́лости.

[Ины] стихи́ры преподо́бнаго, гла́съ 1. Подо́бенъ: Небе́сныхъ чино́въ.

Въ по́стницѣхъ возсія́вшаго преобразова́ніе,* пусты́нное воспита́ніе,* Ры́льскаго свѣти́льника* словесы́ и пѣ́сньми,* вси́ вѣ́рніи, да восхва́лимъ,* зову́ще и глаго́люще:* ра́дуйся, вели́кая сла́во,* я́же въ на́ша дни́ яви́ся,* Іоа́нне преблаже́нне. [Два́жды.]

Всю́ наде́жду возложи́въ Творцу́ твоему́ и Бо́гу,* самаго́ себе́ приве́лъ еси́ Влады́цѣ,* Иже, нѣ́дра отве́рзъ, млеко́мъ тя́ воспита́* ду́шу пита́ющихъ писа́ній* и небе́снаго Ца́рствія наслѣ́дника тя́ сотвори́,* всѣ́ми вѣ́рными почита́ема,* Іоа́нне преблаже́нне. [Два́жды.]

Ра́дуешися, ви́дѣвъ соверше́ніе трудо́въ твои́хъ,* и́хже бо о́ко не ви́дѣ,* ни у́хо слы́ша,* добро́ты ра́йскія воспрія́лъ еси́,* свѣ́тлое воздая́ніе* подвиго́въ твои́хъ,* и ра́ка твоя́ на земли́* благода́ть источа́етъ,* тѣ́ло твое́ неруши́мо иму́щи,* Іоа́нне преблаже́нне.

Сла́ва, гла́съ 6:

Пріиди́те, правосла́вныхъ собо́ри, духо́внѣ возра́дуимся дне́сь, идѣ́же богому́дрый Іоа́ннъ, въ па́мять свою́ собра́лъ ны́ е́сть, къ нему́ вопію́щихъ: ра́дуйся, пусты́нная красото́ и а́нгеловъ совсе́льниче; ра́дуйся, Ры́льская похвало́ и бо́лгаромъ сограждани́не; не преста́й моля́ся Христу́ Бо́гу о и́же вѣ́рою и любо́вію почита́ющихъ присночестну́ю и всепра́зднственную па́мять твою́.

И ны́нѣ, пра́здника, гла́съ то́йже:

Пріиди́те, всемíрное успе́ніе Всенепоро́чныя Богоро́дицы пра́зднуемъ, дне́сь бо а́нгели торжеству́ютъ честно́е преставле́ніе Бо́жія Ма́тере, и къ весе́лію на́съ, земны́хъ, призыва́ютъ, вопи́ти немо́лчнымъ гла́сомъ: ра́дуйся, преста́вльшаяся отъ земли́, и къ небе́снымъ оби́телемъ пресе́льшаяся; ра́дуйся, я́же учени́ческій ли́къ о́блакомъ ле́гкимъ во eди́но собра́вшая; ра́дуйся, упова́ніе и спасе́ніе на́ше: Тя́ бо христіа́нскій ро́дъ непреста́нно ублажа́етъ.

Вхо́дъ. Проки́менъ дне́ и паримíи три́ преподо́бнымъ.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры самогла́сны, гла́съ 2:

Воздержа́тельное обуче́ніе на земли́ собра́въ, преподо́бне о́тче Іоа́нне, и страсте́й прило́ги вся́ угаси́въ тече́ніемъ сле́зъ твои́хъ, лѣ́ствица боже́ственная и честна́я, на не́бо возводя́щая, всѣ́мъ яви́ся богопрія́тное житіе́ твое́; благоче́стія бо плоды́ показу́я, исцѣля́еши не́мощи страсте́й вѣ́рно тебѣ́ вопію́щихъ: ра́дуйся, восто́ка звѣздо́ свѣтоза́рная и мона́шествующихъ до́брый па́стырю; ра́дуйся, пресла́вное пусты́ннымъ овца́мъ крѣ́пкое огражде́ніе и Це́ркве честно́е утвержде́ніе; ра́дуйся, заблу́ждшимъ вели́кій наста́вниче и вселе́ннѣй свѣ́тлое ра́дованіе.

Земна́го а́нгела и небе́снаго человѣ́ка, мíрови благоукраше́ніе, сла́дость добродѣ́телей и наслажде́ніе благи́хъ, по́стниковъ похвалу́, Іоа́нна почти́мъ, насажде́нъ бо въ дому́ Бо́жіи пра́ведно, я́ко ке́дръ въ пусты́ни, умно́жи ста́до Христо́выхъ ове́цъ въ преподо́біи и пра́вдѣ.

Гла́съ 4:

Возсія́ дне́сь пресвѣ́тлая па́мять твоя́, богому́дре Іоа́нне, насъ созыва́ющи къ похвале́нію Христа́ Бо́га на́шего. Тѣ́мже притека́юще къ ра́цѣ моще́й твои́хъ и исцѣле́нія да́ры пріе́млюще, Спа́са, тя́ просла́вльшаго, воспѣва́емъ во вѣ́ки.

Чи́стый душе́ю и се́рдцемъ, а́нгеле земны́й и человѣ́че небе́сный, дѣ́вства учи́телю и воздержа́нія извѣ́стное мѣ́рило, Іоа́нне блаже́нне, живы́й съ Влады́кою твои́мъ и немо́лчное славосло́віе со а́нгелы и преподо́бными Тому́ принося́, творя́щія твою́ свяще́нную па́мять спаса́й непреста́нными моли́твами твои́ми.

Гла́съ 5:

Преподо́бне о́тче Іоа́нне, ты́ вои́стинну яви́лся еси́ по́стникомъ похвала́, крѣ́пость Правосла́вію и вселе́ннѣй свѣти́ло незаходи́мое, льсти́ваго врага́ не убоя́вся и устраше́ній его́ не смути́вся, но благода́тію Боже́ственною прему́дренно попра́лъ еси́ всю́ ле́сть его́, отъ нея́же и на́съ изба́ви, мо́лимъ тя́.

Сла́ва, гла́съ 5:

Ра́дуйся, пусты́нное украше́ніе, благоуха́нія вселе́нную исполня́ющее, и го́ру Ры́льскую пѣ́ніемъ оглаша́ющее, и Це́рковь Бо́лгарскую вѣнча́ющее, а́нгеломъ бо бы́лъ еси́ сожи́тель, полко́въ бѣсо́вскихъ прогони́тель, ересе́й же разори́тель и вся́кія ле́сти изъ ко́рене потреби́тель. Тѣ́мже въ вы́шнее всели́вся жили́ще, преподо́бне о́тче Іоа́нне, Христу́ Бо́гу моли́ся дарова́ти душа́мъ на́шимъ ми́ръ и ве́лію ми́лость.

И ны́нѣ, пра́здника, гла́съ то́йже:

Пріиди́те, празднолю́бныхъ собо́ри, пріиди́те, и ли́къ соста́вимъ, пріиди́те, вѣнча́имъ пѣ́сньми Це́рковь, упокое́ніемъ Ковче́га Бо́жія. Дне́сь бо не́бо простира́етъ нѣ́дра, пріе́мля Ро́ждшую всѣ́ми Невмѣсти́маго, и земля́, исто́чникъ жи́зни, отдаю́щи благослове́ніе, украша́ется благолѣ́піемъ. Ангели ли́къ составля́ютъ со апо́столы, ужа́сно взира́юще отъ живота́ въ живо́тъ преставля́ему, Ро́ждшую Нача́льника жи́зни. Вси́ поклони́мся Ей́, моля́щеся: сро́дна присвое́нія не забу́ди, Влады́чице, вѣ́рно пра́зднующихъ всесвято́е Твое́ успе́ніе.

На стихо́внѣ стихи́ры, гла́съ 5. Подо́бенъ: Ра́дуйся, по́стническихъ.

Ра́дуйся, богому́дре Іоа́нне,* Крести́телю тезоиме́нный* и въ утро́бѣ ма́терней отъ а́нгела нарече́нный,* и непло́дови благода́тію ложесна́ разверза́вый,* посто́мъ же и моли́твою стра́сти плотскíя умертви́вый,* и въ пусты́ни Ры́льстѣй [я́ко] звѣзда́ незаходи́мая возсія́вый,* мра́къ грѣхо́вный всю́ду прогоня́ющая* и тму́ ересе́й облича́ющая* си́лою Христа́ Бо́га на́шего,* Его́же моли́* дарова́ти душа́мъ на́шимъ* ми́ръ и ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Ра́дуйся, богому́дре Іоа́нне,* струя́ми сле́зными пусты́ню напои́вый* и па́жить зла́чную удобри́вый,* и ста́до мона́шествующихъ на не́й воспита́вый,* и, къ Бо́гу бесѣ́дуя пресвѣ́тлою чистото́ю души́ твоея́,* я́ко сто́лпъ пресвѣ́тлый, свѣ́томъ благоче́стія* си́хъ путеводи́вый во дво́ръ о́вчій Па́стыря До́браго,* Ца́рствіе Христа́ Бо́га на́шего,* Его́же моли́* дарова́ти душа́мъ на́шимъ* ми́ръ и ве́лію ми́лость.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Ра́дуйся, богому́дре Іоа́нне,* а́нгельскихъ лико́въ собесѣ́дниче* и вы́шняго Ца́рствія соприча́стниче,* житіе́ на земли́ пра́ведное вои́стину* добродѣ́тельнѣ пожи́вый* и пречи́стое зерца́ло яви́выйся,* свѣтозаре́нія лучи́ блиста́ющее;* Ду́ха же Свята́го пребога́тнѣ въ себе́ всели́въ,* озаре́ніемъ бу́дущая зрѣ́лъ еси́* и вся́ предглаго́лалъ еси́* свѣтоявле́ніемъ Христа́ Бо́га на́шего,* Его́же моли́* дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 4:

Пусты́нное возлюби́въ житіе́ и а́нгельское воспріи́мъ служе́ніе, мíра возненави́дѣлъ еси́ ле́сть вре́менную и яви́лся еси́ Це́ркве свѣти́ло пресвѣ́тлое, а́нгеломъ соприча́стникъ и пусты́ннымъ боже́ственное украше́ніе, скорбя́щимъ ра́дость, немощны́мъ исцѣле́ніе и всѣ́мъ вѣ́рнымъ спасе́ніе. Но моли́ся Христу́ Бо́гу, всеблаже́нне Іоа́нне, ми́ръ вселе́ннѣй дарова́ти и душа́мъ на́шимъ ве́лію ми́лость.

И ны́нѣ, пра́здника, гла́съ то́йже:

Дави́дскую пѣ́снь дне́сь, лю́діе, воспои́мъ Христу́ Бо́гу: приведу́тся, рече́, Царю́ дѣ́вы въ слѣ́дъ Ея́, и и́скренняя Ея́ приведу́тся въ весе́ліи и ра́дованіи. Ибо отъ сѣ́мене Дави́дова, Ея́же ра́ди мы́ обожи́хомся, въ ру́цѣ Своего́ Сы́на и Влады́ки, сла́вно и па́че сло́ва прелага́ется, Юже, я́ко Ма́терь Бо́жію, воспѣва́юще, вопіе́мъ и глаго́лемъ: спаси́ на́съ, исповѣ́дающихъ Тя́, Богоро́дицу, отъ вся́каго обстоя́нія, и изба́ви отъ бѣ́дъ ду́ши на́ша.

На благослове́ніи хлѣ́бовъ: тропа́рь преподо́бнаго два́жды [пи́санъ на ма́лѣй вече́рни] и пра́здника еди́ножды.



НА УТРЕНИ,
На Бо́гъ Госпо́дь: [Тропа́рь пра́здника два́жды. Сла́ва, преподо́бнаго. И ны́нѣ, пра́здника.]

По 1-мъ стихосло́віи сѣда́ленъ, гла́съ 4. Подо́бенъ: Вознесы́йся на кре́стъ.

Зва́нію Го́спода твоего́ послѣ́довалъ еси́,* мíръ оста́вилъ еси́ и вся́ мíра прекра́сная,* преблаже́нне о́тче Іоа́нне,* претерпѣ́лъ же еси́ усе́рдно* озлобле́ніе пусты́нное* и му́жески отрази́лъ еси́* полки́ бѣсо́вскія.* Тѣ́мже при́сно твою́ па́мять* пѣ́сньми восхваля́емъ вѣ́рно. [Два́жды.]

Сла́ва, и ны́нѣ, пра́здника, гла́съ 4. Подо́бенъ: Яви́лся еси́ дне́сь.

Въ сла́внѣй па́мяти* Твое́й вселе́нная,* невеще́ственнымъ Ду́хомъ* преукра́шена, у́мно* съ весе́ліемъ зове́тъ Ти́:* ра́дуйся, Дѣ́во, христіа́нъ похвало́.

По 2-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.

Пресе́льникъ бы́въ отъ земли́ оте́чества твоего́* и любо́вь всю́ земну́ю оста́вивъ,* на го́ру возше́лъ еси́* и до небе́съ возвы́сился еси́ [я́ко] сто́лпъ,* человѣ́ки наставля́яй на пу́ть спасе́нія.* Тѣ́мже и всели́лся еси́ въ зе́млю кро́ткихъ,* Іоа́нне преподо́бне, о́тче на́шъ. [Два́жды.]

Сла́ва, и ны́нѣ, пра́здника, гла́съ и подо́бенъ то́йже:

Ангелъ мно́жества славосло́вятъ Тя́* и, человѣ́ческій ро́дъ, вѣ́рно пое́мъ Тя́,* я́ко преста́вилася еси́ отъ земли́* къ Ро́ждшемуся изъ Тебе́, Богоро́дице Чи́стая,* и ны́нѣ мо́лишися прилѣ́жно* изба́витися отъ бѣ́дъ* вѣ́рою соверша́ющимъ Твое́, Дѣ́во, преставле́ніе.

По поліеле́и сѣда́ленъ, гла́съ 8. Подо́бенъ: Прему́дрость и Сло́во.

Видѣ́ніе и дѣя́ніе воспріи́мъ,* чу́вствія укроща́я,* житіе́ упра́вилъ еси́ къ боже́ственнымъ повелѣ́ніемъ,* и́нокомъ же яви́лся еси́ свѣти́льникъ пресвѣ́тлый,* наставля́яй къ позна́нію.* Тѣ́мже тя́ восхваля́юще,* воспѣва́емъ успе́ніе твое́,* богоно́се Іоа́нне,* и любо́вію взыва́емъ:* моли́ Христа́ Бо́га* согрѣше́ній проще́ніе дарова́ти* чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника, гла́съ и подо́бенъ то́йже:

Яже Бо́га заче́нши безъ сѣ́мене* и воплоще́нна ро́ждши безъ тли́,* но́вымъ одѣя́ніемъ облекла́ся еси́ нетлѣ́нія Ду́ха:* я́ко Жи́зни бо Ма́ти и всѣ́хъ Цари́ца,* къ жи́зни преста́вилася еси́, Дѣ́во, невеще́ственнѣй.* Тѣ́мже по достоя́нію вои́стинну* показа́лася еси́ о́блакъ,* источа́яй жи́зни на́шея во́ды, Богома́ти Всенепоро́чная,* моли́ Сы́на Твоего́ и Бо́га* согрѣше́ній оставле́ніе пода́ти* пра́зднующимъ любо́вію свято́е Твое́ успе́ніе.

Та́же степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподомъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе отъ Матѳе́я, зача́ло 43: Вся́ Мнѣ́ предана́ су́ть... и бре́мя Мое́ легко́ е́сть.

По 50-мъ псалмѣ́ стихи́ра самогла́сна, гла́съ 6:

Гора́ небеси́ подо́бяшеся, я́ко ма́ти младе́нца, во объя́тія пріе́млющи свѣти́льника пусты́ннаго Іоа́нна, и́же, я́коже оре́лъ Святы́мъ Ду́хомъ прелета́я го́ры Ры́льскія и верте́пы, отту́ду вы́спрь взя́тся на не́бо ко Го́споду, Его́же и возлюби́. Но, о красноду́шне, просвѣща́яй вѣ́рныя, притека́ющія къ честнѣ́й ра́цѣ моще́й твои́хъ и почита́ющія всечестно́е твое́ успе́ніе, съ Богоро́дицею моли́ся о спасе́ніи ду́шъ на́шихъ.

Кано́нъ пра́здника, творе́ніе ки́ръ Космы́, гла́съ 1.
Пѣ́снь 1.

Ирмо́съ: Преукраше́нная Боже́ственною сла́вою, свяще́нная и сла́вная, Дѣ́во, па́мять Твоя́, вся́ собра́ къ весе́лію вѣ́рныя, начина́ющей Маріа́мѣ, съ ли́ки и тимпа́ны, Твоему́ пою́ще Единоро́дному: сла́вно я́ко просла́вися.

Да провожда́ютъ невеще́ственніи чи́нове, небоше́ственное въ Сіо́нъ Боже́ственное тѣ́ло Твое́, внеза́пу же сте́кшеся апо́столъ мно́жество отъ коне́цъ, Богоро́дице, Тебѣ́ предста́ша а́біе, съ ни́миже, Чи́стая, Твою́ честну́ю, Дѣ́во, па́мять сла́вимъ.

Побѣ́дныя по́чести взяла́ еси́ на естество́, Чи́стая, Бо́га ро́ждши, оба́че же, подо́бящися Творцу́ Твоему́ и Сы́ну, па́че естества́ повину́ешися есте́ственнымъ зако́номъ. Тѣ́мже уме́рши, съ Сы́номъ востае́ши вѣ́чнующи.

Инъ кано́нъ преподо́бному, гла́съ 1, его́же краегране́сіе: Ди́венъ Бо́гъ во святы́хъ Свои́хъ, Бо́гъ Исра́илевъ.
Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяномъ пу́ть глубины́ новосодѣ́лавшая.

Да́ждь ми́, блаже́нне, крѣ́пкую съ высоты́ по́мощь и просвѣще́ніе ра́зума, я́ко да равноа́нгельное твое́ на земли́ житіе́ восхвалю́, и́мже исто́чникъ чуде́съ яви́лся еси́.

Иже въ Лива́нѣ ке́дру уподо́бился еси́, добродѣ́тели боже́ственныя преумно́живъ, и, я́ко дре́во насади́вся при исхо́дищихъ воды́ живы́я, осѣня́еши ны́нѣ неду́жныхъ благода́тію.

Вы́спрь житіе́ на́ше я́ко слы́шавъ и на небесѣ́хъ пребыва́ніе, оста́вилъ еси́ зе́млю оте́чества твоего́, и мíра кра́сная презрѣ́лъ еси́, и къ вы́шней жи́зни впери́лся еси́.

Богоро́диченъ: Егда́ восхожда́ху небе́сніи уми́ лѣ́ствицу Іа́ковлю и низхожда́ху, Твое́ стра́шное тогда́ рождество́ та́йно яви́ша, Богоро́дице, и́мже у́бо Бо́гъ на зе́млю сни́де, да человѣ́ки на не́бо вознесе́тъ.

Пѣ́снь 3.

Ирмо́съ: Содѣ́тельная и содержи́тельная всѣ́хъ, Бо́жія Му́дросте и Си́ло, непрекло́нну, недви́жиму Це́рковь утверди́, Христе́, еди́нъ бо еси́ Свя́тъ, во святы́хъ почива́яй.

Жену́ Тя́ ме́ртвенну, но па́че естества́ и Ма́терь Бо́жію, ви́дѣвше, Всенепоро́чная, сла́вніи апо́столи, ужа́сно прикаса́хуся рука́ми сла́вою облиста́ющей, я́ко богопрія́тное Селе́ніе ви́дяще.

Пости́же ру́цѣ досади́тельныя де́рзаго, усѣче́ніемъ су́дъ нане́съ, Бо́гу сохра́ншу че́сть одушевле́нному Киво́ту, сла́вою Божества́, въ Не́мже Сло́во пло́ть бы́сть.

Инъ.

Ирмо́съ: Еди́не Вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й: одушевле́нный хра́ме неизрече́нныя сла́вы Твоея́, Человѣколю́бче.

Не роди́вся отъ по́хоти плотскíя, я́ко безпло́тенъ пожи́лъ еси́ на земли́, и ча́до бы́лъ еси́ Вы́шняго благода́тію, и я́ко жре́бій оте́ческій прія́лъ еси́ угото́ванное Ца́рство Того́ возлю́бльшимъ.

Благода́тію Ду́ха исполня́я за́повѣдь изра́ильтяномъ Моисе́йскую, очи́стилъ еси́ тѣ́ло и ду́шу де́ньми мно́жайшими, на го́ру возше́дъ, и я́ко безпло́тенъ пребыва́лъ еси́ та́мо, и боговидѣ́нія сподо́бился еси́.

Отъ ю́ности украси́вся ра́зумомъ, Соломо́нову му́дрость стяжа́лъ еси́ и, всю́ мíра сего́ сла́стную пи́щу премину́въ, а́лчбою и болѣ́знію потща́лся еси́ нетлѣ́нную получи́ти, всеблаже́нне.

Богоро́диченъ: Госпо́дь пе́рстомъ написа́ въ Тебѣ́ Сло́во Безнача́льное, я́коже въ глави́знѣ кни́жнѣй, Всепѣ́тая; тѣ́мже припа́даю Ти́, моля́ся, въ кни́зѣ живо́тнѣй мя́ написа́ти, грѣхо́въ рукописа́ніе растерза́ющи.

Конда́къ пра́здника, гла́съ 2:

Въ моли́твахъ неусыпа́ющую Богоро́дицу* и въ предста́тельствахъ непрело́жное упова́ніе,* гро́бъ и умерщвле́ніе не удержа́ста:* я́коже бо Живота́ Ма́терь,* къ животу́ преста́ви,* во утро́бу Всели́выйся* приснодѣ́вственную.

[Икосъ:

Огради́ моя́ помышле́нія, Христе́ мо́й, и́бо Стѣ́ну мíра воспѣ́ти дерза́ю, Чи́стую Ма́терь Твою́, на столпѣ́ глаго́лъ укрѣпи́ мя, и въ тя́жкихъ мы́слехъ заступи́ мя, Ты́ бо взыва́ющимъ и прося́щимъ вѣ́рою моле́нія исполня́еши. Ты́ мнѣ́ у́бо да́руй язы́къ прино́сенъ и по́мыслъ непосты́денъ: вся́кое бо дая́ніе сія́нія отъ Тебе́ низпосыла́ется, Свѣтопода́телю, во утро́бу всели́выйся приснодѣ́вственную.]

Сѣда́ленъ преподо́бнаго, гла́съ 6. Подо́бенъ: Милосе́рдія две́ри.

По́стническія по́двиги поне́слъ еси́* и страда́льческимъ вѣнце́мъ увяза́лся еси́,* съ безпло́тными бо враги́ въ тѣлеси́ боря́ся* и во́инства и́хъ низлага́я,* удиви́лъ еси́ терпѣ́ніемъ твои́мъ а́нгелы,* и́хже житію́ во пло́ти поревнова́лъ еси́.* Но моли́ся Христу́ Бо́гу,* о́тче Іоа́нне, спасти́ся на́мъ. [Два́жды.]

Сла́ва, и ны́нѣ, пра́здника, гла́съ и подо́бенъ то́йже:

Твое́ преставле́ніе, Чи́стая,* вси́ вѣ́рніи, похваля́юще, пое́мъ Тя́,* преста́вила бо ся еси́ отъ земли́,* отъ живота́ въ живо́тъ,* и, су́щи на небесѣ́хъ,* Бо́гу мо́лишися изба́витися* отъ бѣ́дъ ро́ду человѣ́ческому.

Пѣ́снь 4.

Ирмо́съ: Рѣ́чи проро́ковъ и гада́нія, воплоще́ніе прояви́ша отъ Дѣ́вы Твое́, Христе́: сія́ніе блиста́нія Твоего́ во свѣ́тъ язы́ковъ изы́детъ, и возгласи́тъ Тебѣ́ бе́здна съ весе́ліемъ: си́лѣ Твое́й сла́ва, Человѣколю́бче.

Ви́дите лю́діе и чуди́теся: Гора́ бо свята́я и я́вственная Бо́гу въ небе́сныя оби́тели превы́шше взе́млется, Не́бо земно́е въ небе́сное и нетлѣ́нное селе́ніе вселя́емо.

Жи́зни присносу́щныя и лу́чшія, сме́рть Твоя́ бы́сть прехожде́ніе, Чи́стая, отъ привре́менныя къ Боже́ственнѣй вои́стинну и непреходи́мѣй, преставля́я Тя́, Чи́стая, въ весе́ліи Сы́на зрѣ́ти Твоего́ и Го́спода.

Инъ.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Видѣ́ніе Даніи́лово разсмотри́въ, я́ко отъ горы́ отто́ржеся ка́мень несѣче́нный и въ пра́хъ и́дольское сокруши́ мучи́тельство, обрѣ́лъ еси́ на горѣ́ краеуго́льный Ка́мень, Христа́, зло́бу всю́ сокруша́юща.

Огне́мъ да не опали́тся содо́мскимъ, а́нгелъ Ло́тови повелѣва́ше на горѣ́ спасти́ся, ты́ же, ра́вное тому́ рве́ніе воспріи́мъ и на го́ру возше́дъ, та́мо жи́ти изво́лилъ еси́ и пла́мене стра́стнаго избѣжа́лъ еси́.

Смире́нно послѣ́довалъ еси́ жезло́мъ позва́вшему тя́ Па́стырю и, я́ко овча́ незло́биво, зе́ліемъ го́рнимъ пита́лся еси́; ны́нѣ же на па́жити ра́йстѣй поко́ище обрѣ́тъ, на вода́хъ пи́щныхъ насыща́ешися.

Богоро́диченъ: Вкуси́ Ада́мъ печа́ль плода́ дре́вняго, жену́ послу́шавъ, Ты́ же, Чи́стая, гла́съ арха́нгела воспріи́мши, — се́ Раба́ Госпо́дня! — возопи́вши и Бо́га поро́ждши, ра́дость въ мíръ ввела́ еси́.

Пѣ́снь 5.

Ирмо́съ: Бо́жію и неизрече́нную добро́ту, добродѣ́телей Твои́хъ, Христе́ исповѣ́мъ: отъ Присносу́щныя бо Сла́вы, Соприсносу́щное и Ѵпоста́сное возсія́вый Сія́ніе, изъ дѣ́вственныя утро́бы, су́щимъ во тмѣ́ и сѣ́ни, вопло́щся, возсія́лъ еси́ Со́лнце.

Яко на о́блацѣ Дѣ́во, апо́стольскій ли́къ носи́мь, къ Сіо́ну отъ коне́цъ, служи́ти Тебѣ́, Облаку ле́гкому, собира́шеся: отъ Нея́же Вы́шній Бо́гъ, су́щимъ во тьмѣ́ и сѣ́ни, Пра́ведное возсія́ Со́лнце.

Тру́бъ, богопрія́тніи язы́цы богосло́вныхъ муже́й благогла́снѣйше Богоро́дицѣ вопія́ху, исхо́дную возглаша́юще пѣ́снь Ду́хомъ: ра́дуйся нетлѣ́нный Исто́чниче, Бо́жія живонача́льнаго и спаси́тельнаго всѣ́мъ воплоще́нія.

Инъ.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія правосла́вно пою́щихъ Тя́.

Якоже а́нгелъ на земли́ пребы́въ, воздержа́ніемъ Крести́телю уподо́бился еси́, пусты́нному воспита́нію, преподо́бне; ны́нѣ же хлѣ́бомъ а́нгельскимъ пита́яся по пи́санному, насы́ти ду́ши на́ша благода́тію.

Твое́ дерзнове́ніе, е́же къ Бо́гу, неора́нно прозябы́й слану́токъ проповѣ́дуетъ, о́тче, и́мже самаго́ себе́ ди́вно пита́лъ еси́, я́коже естество́мъ пло́ти обложе́ннаго, и и́же къ тебѣ́ приходя́щія.

Истинная наде́жда не посрами́ тебе́, блаже́нне, увѣ́дѣвша бу́дущую сла́ву, къ не́йже недосто́йна вмѣни́лъ еси́, я́же на земли́ боре́нія и дерзнове́нно къ по́стническимъ страсте́мъ устреми́лся еси́.

Богоро́диченъ: Хи́тростію змíя Ада́мъ боже́ственныя ри́зы совлече́ся и въ ри́зу ко́жаную одѣ́яся; отъ Тебе́ же пло́ть пріи́мъ, Зижди́тель мо́й дебельства́ пло́ти совлече́ мя и въ пе́рвую мя́ па́ки оде́жду одѣ́я.

Пѣ́снь 6.

Ирмо́съ: Морскíй пучиноро́дный ки́товъ вну́тренній о́гнь — тридне́внаго Твоего́ погребе́нія проображе́ніе, его́же Іо́на проро́къ показа́ся. Спасе́нъ бо, я́ко и предпосла́ся, неврежде́нъ, вопія́ше: пожру́ Ти́ со гла́сомъ хвале́нія, Го́споди.

Дае́тъ Тебѣ́, я́же превы́ше естества́, Ца́рь всѣ́хъ Бо́гъ: въ рождествѣ́ бо Дѣ́ву я́коже сохрани́, та́ко во гро́бѣ тѣ́ло соблю́дъ нетлѣ́нно и спросла́ви Боже́ственнымъ преставле́ніемъ, че́сть Тебѣ́, я́ко Сы́нъ Ма́тери, да́руя.

Вои́стинну Тя́, я́ко свѣ́телъ свѣ́щникъ, невеще́ственнаго Свѣ́та, кади́льницу злату́ю Боже́ственнаго Угля, во Свята́я святы́хъ всели́, ру́чку и же́злъ, скрижа́ль богопи́санную, ковче́гъ святы́й, трапе́зу Сло́ва жи́зни, Дѣ́во, Рождество́ Твое́.

Инъ.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Свѣ́томъ пе́рвымъ облиста́вся, бы́лъ еси́ свѣти́льникъ, блаже́нне, и а́нгеломъ подо́бникъ, безпреста́нно поя́ въ моли́твахъ всено́щныхъ Еди́наго Бо́га, Его́же и сы́нъ благода́тію яви́лся еси́.

Волну́ющееся бу́рею мо́ре житія́ оста́вилъ еси́, погружа́ющее нехотя́щихъ на не́бо вознести́ся, и вся́ преше́лъ еси́ мірскíя прило́ги, на́гъ бѣ́гая искуше́ній лука́ваго.

Обрѣ́лъ еси́ Бо́га, все́льшася въ тя́, не да́въ поко́я скраніа́ма твои́ма, ни ве́ждома твои́ма дрема́нія, и, я́ко безпло́тенъ во пло́ти пожи́въ, въ небе́сныя хра́мы всели́лся еси́.

Богоро́диченъ: Иска́пай ка́пли щедро́тъ, о́блаче небе́сный, Чи́стая Дѣ́во, я́коже руно́ пріи́мшая до́ждь и я́коже ка́плю Бо́га во чре́вѣ, и страсте́й мои́хъ пото́ки изсуши́.

Конда́къ, гла́съ 2. Подо́бенъ: Въ моли́твахъ Неусыпа́ющую.

Въ моли́твахъ бо́дренно не усыпа́я* и въ пѣ́ніихъ непреста́нныхъ а́нгеломъ подо́бяся,* въ гро́бъ вше́лъ еси́, тлѣ́нную жи́знь оста́вивъ,* и къ небеси́ преше́лъ еси́* на нетлѣ́ніе, Іоа́нне о́тче,* отъ сме́рти бо къ животу́ вѣ́чному* тя́ пресели́ Христо́съ Бо́гъ, я́ко Своего́ уго́дника.

Икосъ:

Иже па́че естества́ въ тѣлеси́ ме́ртвеннѣмъ а́нгельскому поревнова́вшаго житію́, пріиди́те, воспои́мъ Іоа́нна преблаже́ннаго, то́й бо я́ко отре́би вмѣни́ мíръ и я́же въ мíрѣ, и, на го́ру возше́дъ, я́коже дре́вле вели́кій Моисе́й, посто́мъ очи́стися, и ви́дѣти сподо́бися Тро́ическую свѣ́тлость не во мра́цѣ, ни во ви́хрѣ, но во свѣ́тѣ благода́ти. Тѣ́мъ и чуде́съ лучи́ облиста́етъ, и рѣ́ки исцѣле́ній вѣ́рнымъ источа́етъ отъ гро́ба своего́, отъ сме́рти бо къ животу́ вѣ́чному пресели́ его́ Христо́съ Бо́гъ, я́ко Своего́ уго́дника.

Пѣ́снь 7.

Ирмо́съ: Безсту́днѣй я́рости же и огню́ Боже́ственное жела́ніе сопротивля́яся, о́гнь у́бо ороша́ше, я́рости же смѣя́шеся, богодохнове́нною слове́сною преподо́бныхъ тривѣща́нною цѣвни́цею, противовѣща́я мусикíйскимъ орга́номъ посреди́ пла́мене: препросла́вленный отце́въ и на́шъ Бо́же, благослове́нъ еси́.

Богодѣ́ланныя скрижа́ли Моисе́й, пи́санныя Боже́ственнымъ Ду́хомъ, я́ростію сокру́шъ, но сего́ Влады́ка, Ро́ждшую неврежде́нну въ небе́сныя сохра́нь до́мы, ны́нѣ вну́трь всели́. Съ Не́ю игра́юще, вопіе́мъ Христу́: препросла́вленный отце́въ и на́шъ Бо́же, благослове́нъ еси́.

Въ кимва́лѣхъ — усты́ чи́стыми, мусикíйски же — се́рдцемъ свѣ́тлымъ, доброгла́сною трубо́ю — высо́кою мы́слію, Дѣ́вы и Чи́стыя въ наро́читый избра́нный де́нь преставле́нія, дѣ́тельными пле́щуще рука́ми, вопіе́мъ: препросла́вленный отце́въ и на́шъ Бо́же, благослове́нъ еси́.

Инъ.

Ирмо́съ: Тебе́, у́мную, Богоро́дице, пе́щь разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Хра́брый ревни́тель бы́въ Иліи́ проро́ку, на стра́сти устреми́лся еси́ ору́жіемъ поста́ и, на горѣ́ водворя́яся, а́лчбою па́че человѣ́къ по́стнически умертви́лъ еси́ сра́мныя по́мыслы.

Бо́жія пути́ пра́ваго восхотѣ́въ, и мірска́го жела́нія отве́ргся, и на ка́мени разу́мнѣмъ стопы́ души́ твоея́ утверди́въ, ка́мене собла́зна при стези́ всѣ́хъ избавля́еши и прило́говъ искуше́ній.

Окрестъ ра́ки моще́й твои́хъ то́чатся чудеса́ исцѣле́ній приходя́щимъ, Бо́гу бо коне́чнѣ угоди́лъ еси́, вѣ́рующимъ обѣща́вшему рѣ́ки изъ чре́ва источи́ти Боже́ственныя благода́ти.

Богоро́диченъ: Глубину́ слы́шимъ прему́дрости, Пречи́стая, я́ко Созда́вшаго руко́ю Ада́ма и отъ ребра́ Еву Сотво́ршаго Сло́ва воплоти́ла еси́, Иже, въ ре́бра на Крестѣ́ пробожде́нъ, ро́дъ человѣ́ческій обнови́.

Пѣ́снь 8.

Ирмо́съ: Пла́мень, ороша́ющь преподо́бныя, злочести́выя же попаля́ющь, Ангелъ Бо́жій всемо́щный показа́ отроко́мъ, живонача́льный же исто́чникъ содѣ́ла Богоро́дицу, тлю́ сме́рти и живо́тъ точа́щу пою́щимъ: Содѣ́теля еди́наго пои́мъ, изба́вленніи, и превозно́симъ во вся́ вѣ́ки.

Глаго́лы послѣ́доваху Боже́ственному Ковче́гу свяще́нному, все́ мно́жество богосло́вовъ въ Сіо́нѣ: ка́мо и́деши ны́нѣ, Ски́ніе, — зову́ще, — Бо́га Жива́го? Не преста́й призира́ющи вѣ́рою пою́щія: Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

Якоже, воздѣ́вши ру́цѣ, исхо́диши Всенепоро́чная, ру́цѣ, и́миже Бо́га носи́ла еси́ пло́тію, со дерзнове́ніемъ, я́ко Ма́ти, рекла́ еси́ къ Рожде́нному: я́же Ми́ да́лъ еси́, во вѣ́ки сохрани́, вопію́щія Тебѣ́: Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

Инъ.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Иску́съ врага́ доблему́дренно отрази́въ во бра́ни крѣ́пцѣй и непобѣди́мь яви́вся бѣсо́вскими кова́рствы, побѣ́дными вѣнцы́ увяза́лся еси́ и, Го́сподеви ны́нѣ предстоя́, мо́лишися о воспѣва́ющихъ тя́.

Сме́ртнѣй кончи́нѣ приспѣ́вшей вре́меннѣй, оста́вилъ еси́ труды́ по́стническія, и, вѣ́чный поко́й воспріи́мь, Бо́гу предстои́ши, и, посрѣди́ луче́й неизрече́ннаго Божества́ сія́я, о на́съ мо́лишися.

Ра́внѣ дре́внему патріа́рху Іа́кову ва́ръ дневны́й поне́съ и сту́день нощну́ю претерпѣ́въ, возше́лъ еси́ лѣ́ствицею добродѣ́телей на высоту́ боговидѣ́нія, о́тче Іоа́нне, чуде́съ исто́чниче.

Богоро́диченъ: Агнице Пречи́стая, къ Тебѣ́ прибѣга́ю: ду́шу мою́, страстьми́ оскверне́нную, вода́ми омы́й сле́зными, вода́ми благода́ти Ду́ха Бо́жія глубо́кій ка́лъ грѣ́хъ человѣ́ческихъ омы́вшая.

Пѣ́снь 9.

Ирмо́съ: Побѣжда́ются естества́ уста́вы въ Тебѣ́, Дѣ́во Чи́стая: дѣ́вствуетъ бо рождество́ и живо́тъ предобруча́етъ сме́рть; по рождествѣ́ Дѣ́ва и по сме́рти жива́, спаса́еши при́сно, Богоро́дице, наслѣ́діе Твое́.

Дивля́хуся а́нгельскія си́лы, въ Сіо́нѣ смотря́юще своего́ Влады́ку, же́нскую ду́шу рука́ми нося́щаго, пречи́сто бо Ро́ждшей, сынолѣ́пно провозглаша́ше: гряди́, Чи́стая, съ Сы́номъ и Бо́гомъ просла́вленна бу́ди.

Опря́та ли́къ апо́стольскій богопрія́тное тѣ́ло Твое́, со стра́хомъ зря́ще и гла́сомъ ве́ліимъ вѣща́юще: въ небе́сныя до́мы къ Сы́ну восходя́щи, спаса́еши при́сно, Богоро́дице, наслѣ́діе Твое́.

Инъ.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Изя́щныя по́чести по́двига твоего́ воспрія́лъ еси́ терпѣ́ніемъ твои́мъ, его́же ра́ди со а́нгелы водворя́ешися и за наготу́ тѣле́сную въ небе́сную ри́зу обле́клся еси́, въ по́стницѣхъ всеизря́дне.

Любому́дрыхъ собо́рище, ви́ждь, каковы́ми благода́тьми воздае́тъ Бо́гъ и́стинно Того́ добро́ты вожделѣ́вшимъ: ни естество́ бо, ни вре́мя тѣлесе́ Іоа́нна пустыннолю́бнаго побѣди́, точа́щаго чудеса́ да́же доны́нѣ.

Ели́ко си́ла скрижа́ли се́рдца моего́ распросте́ръ, вся́ написа́хъ мно́гія твоя́ благода́ти, но досто́йна ничесо́же принесо́хъ тебѣ́; тѣ́мже молю́ тя́: вѣ́ру пріими́ и любо́вь, преблаже́нне.

Богоро́диченъ: Вонми́ Дави́дскихъ гу́слей провѣща́нію, Дщи́ Царе́ва, и приклони́ у́хо Твое́. Люде́й Твои́хъ не забу́ди, но уще́дри, Дѣви́це, и́же непреста́нно Тя́ сла́вящихъ.

Свѣти́ленъ, гла́съ 2. Подо́бенъ: Жены́, услы́шите.

Пустынножи́теля вси́ Іоа́нна* вѣ́рно восхва́лимъ,* а́нгела земна́го* и человѣ́ка небе́снаго,* чуде́съ мно́жества неиждива́емо* на́мъ точа́щаго. [Два́жды.]

Сла́ва, и ны́нѣ, пра́здника, гла́съ 3:

Апо́столи отъ коне́цъ* совоку́пльшеся здѣ́,* въ Геѳсиманíйстѣй ве́си* погреби́те тѣ́ло Мое́,* и Ты́, Сы́не и Бо́же Мо́й,* пріими́ ду́хъ Мо́й.

На хвали́техъ поста́вимъ стихо́въ 6 и пое́мъ стихи́ры пра́здника, гла́съ 4. Подо́бенъ: Яко до́бля.

Въ сла́вномъ успе́ніи Твое́мъ* небеса́ ра́дуются,* и а́нгельская возра́довашася во́инства,* вся́ же земля́ весели́тся,* пѣ́снь Тебѣ́ исхо́дную провозглаша́ющи,* Ма́тери всѣ́ми Влады́чествующаго,* Неискусобра́чная Пресвята́я Дѣ́во,* Яже ро́дъ человѣ́ческій изба́вльшая* прароди́тельнаго осужде́нія.

Отъ коне́цъ стеко́шася* апо́столовъ лу́чшіи,* богонача́льнымъ манове́ніемъ, погребсти́ Тя́,* и отъ земли́ взе́млему Тя́* къ высотѣ́ зря́ще,* гла́съ Гавріи́ловъ ра́достію вопія́ху Тебѣ́:* ра́дуйся, Носи́ло Божества́ всего́.* Ра́дуйся, Еди́на,* земна́я съ вы́шними,* Рождество́мъ Твои́мъ совоку́пльшая.

Яже Живо́тъ ро́ждшая,* къ жи́зни премину́ла еси́,* честны́мъ успе́ніемъ Твои́мъ, безсме́ртнѣй,* доринося́щимъ Тя́ а́нгеломъ,* нача́ломъ и си́ламъ,* апо́столомъ и проро́комъ, и все́й тва́ри,* пріе́мшу же нетлѣ́нными дла́ньми Сы́ну Твоему́,* непоро́чную ду́шу Твою́,* Дѣ́во Ма́ти Богоневѣ́сто.

Ины стихи́ры преподо́бнаго, гла́съ 6. Подо́бенъ: Все́ отло́жше.

Десни́цею укрѣпля́емь Вседержи́теля,* все́ отве́ргъ страсте́й безслове́сіе,* пло́ть ду́ху покори́лъ еси́* и добродѣ́телей бы́лъ еси́ пра́вило,* мона́ховъ утвержде́ніе,* по́стниковъ прописа́ніе,* преподо́бныхъ удобре́ніе.* И ны́нѣ, неизрече́нную добро́ту зря́* Нераздѣ́льныя Тро́ицы,* Іоа́нне прему́дре,* со дерзнове́ніемъ моли́ся* о душа́хъ на́шихъ.

Иліи́ подо́бяся* и Предте́чи Іоа́нну,* возлюби́лъ еси́ безмо́лвіе* пусты́ни непрохо́дныя* и, преспѣва́я въ добродѣ́телехъ,* дости́глъ еси́ жела́нія кра́йняго,* Іоа́нне прему́дре,* тѣ́мже, ра́дуяся, предстои́ши трисія́нному свѣ́ту Святы́я Тро́ицы,* отъ него́же нехода́тайственнѣ* боже́ственныя пріе́мля зари́,* со дерзнове́ніемъ моли́ся* о душа́хъ на́шихъ.

Любве́ ра́ди Христо́вы* вся́ оста́вилъ еси́* и въ пусты́ню всели́лся еси́,* ника́коже устраша́яся* боре́ній врага́ неви́димого,* мно́гажды на тя́ мечта́ньми находя́щаго* и привидѣ́нія показу́ющаго,* па́че же моли́твами твои́ми* того́, я́ко пра́хъ, безъ вѣ́сти сотворя́я.* О, непоро́чныя души́* и крѣ́пкаго терпѣ́нія!* Христу́ со дерзнове́ніемъ моли́ся* о душа́хъ на́шихъ.

Сла́ва, гла́съ 3:

Ра́дуется дне́сь страна́ Бо́лгарская, гора́ же Ры́льская весели́тся, торжеству́ющи во успе́ніи твое́мъ, преподо́бне о́тче. Вѣ́рныхъ мно́жества земли́ Бо́лгарскія, воструби́мъ трубо́ю пѣ́сней, благода́ть бо Ду́ха вся́кія трубы́ благолѣ́пнѣйше на́съ созыва́етъ къ пѣ́нію богоно́снаго отца́, въ добродѣ́телехъ свѣ́тлаго, въ вѣ́рѣ богоразу́мнаго, въ видѣ́ніи высо́каго, во уче́ніи неистощи́маго, наста́вника заблу́ждшимъ, изба́вителя плѣне́ннымъ, исцѣле́ніе боля́щимъ, оте́честву всему́ вели́кое украше́ніе. Тѣ́мже, того́ восхваля́юще, си́це къ нему́ возопіи́мъ: преподо́бне о́тче Іоа́нне, предста́ни рабо́мъ твои́мъ и спаса́й ста́до твое́ всегда́ моли́твами твои́ми.

И ны́нѣ, гла́съ 4:

Всечестно́е Твое́ успе́ніе, Пресвята́я Дѣ́во Чи́стая, а́нгелъ мно́жество на небеси́, и человѣ́ческій ро́дъ на земли́, ублажа́емъ, я́ко Ма́ти была́ еси́ Творца́ всѣ́хъ, Христа́ Бо́га, Того́ моля́щи не преста́й о на́съ, мо́лимся, и́же на Тя́ съ Бо́гомъ упова́ніе поло́жшихъ, Богоро́дице Всепѣ́тая и Неискусобра́чная.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна пра́здника и свята́го. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213: Пло́дъ духо́вный е́сть любы́... и та́ко испо́лните зако́нъ Христо́въ. Аллилуія, гласъ 8: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Матѳе́я, зача́ло 10: По Іису́сѣ идо́ша наро́ди мно́зи... я́ко мзда́ ва́ша мно́га на небесѣ́хъ. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.] Аллилу́ія.

Коне́цъ и Бо́гу сла́ва.

Источникъ: Служби на българските светии. — Света Гора, Атон: Славянобългарски манастир «Св. Вмчк Георги Зограф», 2007. — Л. 384-405.

/ Къ оглавленію раздѣла /


Наверхъ / Къ титульной страницѣ

0