Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 17-й де́нь.
Па́мять преподо́бнаго отца́ на́шего Рафаи́ла Бана́тскаго, Хиланда́рца.

НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ.., стихи́ры на 6: му́ченика Ми́рона на 3 и преподо́бнаго Рафаи́ла на 3, гла́съ 4:

Добро́ты ра́йскія жела́я, преподо́бне о́тче Рафаи́ле, и тоя́ ра́ди въ бдѣ́ніихъ и моли́твахъ жи́знь твою́ препроводи́лъ еси́, поста́вилъ еси́ у́мъ влады́ку надъ страстьми́ тѣле́сными, тѣ́мже бы́лъ еси́ селе́ніе Пресвята́го Ду́ха, Его́же моли́, свободи́ти и на́съ отъ страсте́й, да тя́ почита́емъ.

Житіе́ твое́ изря́дно и пресла́вно яви́ся въ послѣ́днія ро́ды, всѣ́мъ же вѣ́рнымъ, приходя́щимъ къ чуде́сному гро́бу твоему́, чудеса́ твоя́ излія́шася, Рафаи́ле блаже́нне, испроси́ и на́мъ, сла́вящимъ тя́, спасе́ніе свы́ше и избавле́ніе, да тя́ вси́ непреста́нно воспѣва́емъ.

Сла́ва, гла́съ 8:

Отче богому́дре, имѣ́я вѣ́ру и́стинную, любо́вь нелицемѣ́рну и наде́жду неукло́нну, во умиле́ніи души́ стяжа́лъ еси́ соверше́нное смире́ніе, и бы́лъ еси́ хра́мъ Боже́ственнаго Ду́ха, благíй бо зако́нъ возлюби́лъ еси́, ду́шу же добродѣ́тельми удобри́лъ еси́. Тѣ́мже тя́ почита́емъ и ублажа́емъ.

И ны́нѣ, Успе́нія, гла́съ 2:

Яже Небе́съ вы́шшая, су́щи, и херуви́мъ сла́внѣйшая, и всея́ тва́ри честнѣ́йша, Яже премно́гія ра́ди чистоты́, Присносу́щнаго существа́ прія́телище бы́вши, въ Сыно́внѣ ру́цѣ дне́сь всесвяту́ю предае́тъ ду́шу, и съ Не́ю исполня́ются вся́ческая ра́дости, и на́мъ да́руетъ ве́лію ми́лость.

Вхо́дъ. Проки́менъ дне́ и чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры Успе́нія, самогла́сны, гла́съ 2:

Пѣ́сньми Твое́ честно́е и богопрія́тное тѣ́ло, провожда́юще, Боже́ственніи апо́столи, вопія́ху: гдѣ́ ны́нѣ отхо́диши, Влады́чице?

Сти́хъ: Воскресни́, Го́споди, въ поко́й Тво́й, Ты́ и Киво́тъ святы́ни Твоея́.

Пріиди́те, земноро́дніи, соста́вимъ ли́къ, исхо́дное вопію́ще на преставле́ніе Богоро́дицы дне́сь.

Сти́хъ: Кля́тся Госпо́дь Дави́ду и́стиною, и не отве́ржется ея́.

Земля́ у́бо Твои́мъ погребе́ніемъ благослови́ся, Дѣ́во, возду́хъ же восхожде́ніемъ освяти́ся стра́ннымъ, зако́номъ уме́рши естества́.

Сла́ва, преподо́бнаго, гла́съ 8:

Въ пусты́няхъ претерпѣва́я, и во оби́тели Хиланда́рстѣй подвиза́яся, преподо́бне о́тче Рафаи́ле, пло́ть свою́ порабоща́я поще́ньми и, я́коже трудолюби́вая пчела́, ума́ своего́ со́томъ, цвѣ́ты добродѣ́телей собра́лъ еси́, источи́лъ еси́ сла́дость безсме́ртную, услажда́я всю́ страну́ Бана́тскую.

И ны́нѣ, Успе́нія, гла́съ 2:

Всенепоро́чная Невѣ́ста и Ма́ти благоволе́нія Отча, Яже Бо́гу пронарече́нная во Свое́ Ему́ жили́ще, несли́тнаго соедине́нія, дне́сь пречи́стую ду́шу Творцу́ и Бо́гу предае́тъ, ю́же Безпло́тныхъ си́лы боголѣ́пно подъе́млютъ, и къ Животу́ преставля́ется, су́щая Ма́ти Живота́, свѣща́ непристу́пнаго Свѣ́та, спасе́ніе вѣ́рныхъ и упова́ніе ду́шъ на́шихъ.

Тропа́рь преподо́бнаго, гла́съ 1:

Смире́ніемъ и поще́ніемъ превозвы́сился еси́ къ Бо́гу, отри́нувъ мíра попече́ніе, сла́ву же сего́ нивочто́же вмѣни́въ, бу́дущія сла́вы взыска́лъ еси́. Тѣ́мъ ны́нѣ со а́нгелы предстоя́ Го́споду, моли́ о всѣ́хъ на́съ, чту́щихъ па́мять твою́.

Сла́ва, и ны́нѣ, Успе́нія, гла́съ то́йже:

Въ рождествѣ́ дѣ́вство [сохрани́ла еси́, во успе́ніи мíра не оста́вила еси́, Богоро́дице, преста́вилася еси́ къ животу́, Ма́ти су́щи Живота́, и моли́твами Твои́ми избавля́еши отъ сме́рти ду́ши на́ша].


НА УТРЕНИ,
На Бо́гъ Госпо́дь: Тропа́рь пра́здника, дважды. Сла́ва, преподо́бнаго. И ны́нѣ, пра́здника.

По 1-мъ стихосло́віи сѣда́ленъ, гла́съ 3:

Кре́стъ сво́й и́ноческій взе́мъ, преподо́бне, Христу́ Вседержи́телю послѣ́довалъ еси́, посто́мъ и моли́твами пло́ть свою́ умертви́въ, вѣ́чныя жи́зни сподо́бился еси́. [Два́жды.]

Сла́ва, и ны́нѣ, Успе́нія, гла́съ то́йже:

Въ небе́сная мы́сленная Твоя́ душа́, [въ ра́й чи́стое Твое́ тѣ́ло преста́вися, отъ тли́, Пренепоро́чная, въ мѣ́сто свѣ́тло, сего́ ра́ди возда́стъ беззако́ннымъ Госпо́дь, ле́сть бо содѣ́лаша честно́му Твоему́ тѣ́лу. Тѣ́мже со апо́столы вопіе́мъ: ра́дуйся, Благода́тная].

По 2-мъ стихосло́віи сѣда́ленъ, гла́съ 4:

Дне́сь воспѣва́ема свяще́нная па́мять твоя́, преподо́бне о́тче Рафаи́ле, весели́тъ всю́ страну́ Бана́тскую, съ не́юже и оби́тель Хиланда́рскую, сíи же, честно́е успе́ніе твое́ сла́вяще, вопію́тъ: моли́твами твои́ми святы́ми, блаже́нне о́тче, соблюди́ на́съ, воспѣва́ющихъ тя́. [Два́жды.]

Сла́ва, и ны́нѣ, Успе́нія, гла́съ то́йже:

Въ ру́цѣ на́съ ра́ди вочеловѣ́чшагося изъ Тебе́, преда́вши ду́шу, я́ко Зижди́телю Твоему́ и Бо́гу, къ жи́зни нетлѣ́ннѣй преста́вилася еси́. Тѣ́мже Тя́ че́стно ублажа́емъ, еди́ну чи́стую и нескве́рную, Богоро́дицу вси́ и́стинно исповѣ́дающе, взыва́емъ: Христа́ моли́, къ Нему́же преста́вилася еси́, спасти́ ду́ши на́ша.

Поліеле́й.

Велича́ніе: Ублажа́емъ тя́, преподо́бне о́тче Рафаи́ле, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода...

По поліеле́и сѣда́ленъ, гла́съ 8:

Плотскíя у́ды, страда́нія по́двигомъ умертви́лъ еси́, сама́го себе́ распе́нъ страсте́мъ и мíрови, на Крестѣ́ Распросте́ршему дла́ни, Христу́, угоди́лъ еси́, Его́же моли́, богоблаже́нне Рафаи́ле, спасти́ ду́ши на́ша. [Два́жды.]

Сла́ва, и ны́нѣ, Успе́нія, гла́съ то́йже:

Жену́ Тя́ ме́ртвенну, но па́че естества́ и Ма́терь Бо́жію, ви́дѣвше, Всенепоро́чная, сла́вніи апо́столи, ужа́сно прикаса́хуся рука́ми сла́вою облиста́ющей, я́ко богопрія́тное Селе́ніе ви́дяще.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Та́же: Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Любо́вію чи́стою Христа́ возжелѣ́въ, красоту́ мірску́ю оста́вилъ еси́, и Христу́ всецѣ́ло прише́лъ еси́, жела́я зрѣ́ти Того́ благолѣ́пія, и во оби́тель Хиланда́рскую всели́лся еси́, воспѣва́я вы́ну Го́спода.

Кано́нъ пра́здника, со ирмосо́мъ, на 4, ки́ръ Іоа́нна Дамаскина́, гла́съ 4. Кано́нъ му́ченика, на 4.
Кано́нъ преподо́бнаго, на 4, его́же краегране́сіе: Па́мять твою́, му́дре Рафаи́ле, пою́. Въ богоро́дичнахъ и въ сѣда́льнѣ: Про́та Ми́рко. Гла́съ 3.

Пѣ́снь 1.

Ирмо́съ: Пѣ́снь но́вую пои́мъ, лю́діе, отъ Дѣ́вы Ро́ждшемуся во спасе́ніе на́ше и еди́но Сотво́ршему съ небе́сными земна́я, я́ко просла́вися.

Проще́ніе душетлѣ́нныхъ прегрѣше́ній испроси́ ми у Христа́ Бо́га, и да́ти ми́ просвѣще́ніе съ небесе́, я́ко да па́мять твою́ честну́ю по достоя́нію восхвалю́.

Ангельски на земли́ пожи́въ, преподо́бне, на небеси́ а́нгеловъ похвалы́ сподо́бился еси́. Ка́ко у́бо досто́йно воспою́ свѣ́тлое житіе́ твое́?

Мудрова́ніе плотско́е умертви́въ, мяте́жное мо́ре страсте́й изсуши́лъ еси́, укрѣпля́яся еди́ною наде́ждею вѣ́чныхъ бла́гъ, я́же и прія́лъ еси́ отъ Христа́ Бо́га.

Богоро́диченъ: Погаси́, Богоро́дице, кропле́ніемъ ми́лости Твоея́, у́гліе страсте́й мои́хъ, и уга́сшій свѣти́льникъ се́рдца моего́ возжжи́, Свѣ́щниче Всезлаты́й, Богора́дованная.

Пѣ́снь 3.

Ирмо́съ: Утверди́ мене́, Го́споди, еди́не Многоми́лостиве, и простри́ ми ру́ку, я́ко Петро́ви, и спаси́ мя.

Язы́къ мо́й недоумѣ́етъ благохвали́ти тя́ по достоя́нію, но ты́, преподо́бне Рафаи́ле, предстоя́ престо́лу Влады́чню, да́ждь ми́ просвѣще́ніе воспѣ́ти досто́йно твое́ торжество́.

Ты́ Го́споду послѣ́довати восхотѣ́въ, блаже́нне, на го́ру Аѳо́нъ прише́лъ еси́, и во оби́тель Хиланда́рскую всели́лся еси́, идѣ́же посто́мъ и моли́твами Христу́ благоугоди́лъ еси́.

Терпѣ́ніемъ, посто́мъ и моли́твами яви́лся еси́ въ Бана́тѣ, я́ко ши́покъ, нося́ та́йно благово́ніе, смра́дъ же пре́лести отгоня́я Боже́ственною благода́тію.

Богоро́диченъ: Ра́дуйся, Обра́дованная, Ма́ти Бо́жія, я́ко Исто́чникъ исцѣле́ній яви́лася еси́: изъ Тебе́ бо истече́ Пото́къ сла́дкій, вся́ лю́ди напая́я, скве́рны же ду́шъ измыва́я.

Конда́къ преподо́бнаго, гла́съ 6:

Къ боже́ственному зва́нію вы́ю твою́ приклони́въ, изнури́лъ еси́ тѣ́ло твое́ посто́мъ, бдѣ́ніемъ и моли́твами, вѣ́ры ра́ди и любве́ Бо́жія, всегда́ же ходи́лъ еси́ путе́мъ за́повѣдей Госпо́днихъ, и́хже и по сме́рти яви́ тя́ исцѣле́ній исто́чника, Его́же со дерзнове́ніемъ моли́, спасти́ся душа́мъ на́шимъ.

[Сѣда́ленъ преподо́бнаго, гла́съ 1:]

Окрестъ ра́ки твоея́ дне́сь предстоя́ще и па́мять твою́ пра́зднующе, мо́лимъ тя́ ны́нѣ, ча́да твоя́, и любе́зно вопіе́мъ ти́: моли́ся Го́споду, преподо́бне, поми́ловатися душа́мъ на́шимъ. [Два́жды.]

Сла́ва, и ны́нѣ, Успе́нія, гла́съ то́йже:

Тѣ́ло Твое́ пречи́стое погребсти́ сла́вно, Богоро́дице Всепѣ́тая, собра́ся чу́дно всечестны́й ли́къ прему́дрыхъ апо́столъ. Съ ни́миже воспѣ́ша и а́нгелъ мно́жество, преставле́ніе Твое́ че́стно хва́ляще, е́же вѣ́рою пра́зднуемъ.

Пѣ́снь 4.

Ирмо́съ: Еда́ въ рѣка́хъ прогнѣ́ваешися, Го́споди, еда́ въ рѣка́хъ я́рость Твоя́ или́ въ мо́ри устремле́ніе Твое́?

Возлюби́въ, преподо́бне, моли́тву непреста́нну и любо́вь нелицемѣ́рну, у́мъ сво́й си́ми очища́лъ еси́, и ду́шу свою́ просвѣща́лъ. Тѣ́мъ и тѣ́ло свое́ смири́лъ еси́ и ко дневны́мъ трудо́мъ благопоко́рно устро́илъ еси́.

Отче преподо́бне Рафаи́ле, ве́сь Бана́тъ ны́нѣ весе́ліемъ красу́ется, имѣ́я въ себѣ́ мо́щи твоя́, ро́дъ же се́рбскій мо́литъ тя́: испроси́ всѣ́мъ на́мъ грѣхо́въ проще́ніе.

Юже показа́лъ еси́, о́тче, сла́дость спасе́нія, и ро́ду твоему́ се́рбскому проси́ вѣ́чнаго ея́ наслажде́нія.

Богоро́диченъ: Ангеловъ весе́ліе, му́чениковъ похвало́, и вѣ́рныхъ спа́сеніе, Дѣ́во Пренепоро́чная, восхваля́ютъ Тя́ вси́ ро́ди человѣ́честіи: родила́ бо еси́ Бо́га, пребы́вши дѣ́ва нетлѣ́нна.

Пѣ́снь 5.

Ирмо́съ: Къ Тебѣ́ у́тренюемъ, Христе́ Бо́же, у́треннюю и́стину, возсія́вшу на́мъ отъ Дѣ́вы и богоразу́міемъ озари́вшу, су́щимъ во мра́цѣ невѣ́денія.

Мѵ́ры духо́вными благоуха́я, а́нгельскій ви́дъ свяжа́лъ еси́, преподо́бне о́тче, съ ни́миже и обходя́, правосла́вный ро́дъ тво́й спаса́й.

Упова́я на Го́спода, и та́йными къ Нему́ моли́твами яви́лся еси́ изря́денъ мно́гими труды́ и по́двиги. Онъ же, ви́дя сіе́, и по сме́рти твое́й, чуде́съ да́ромъ обогати́ тя.

Ду́хомъ Бо́жіимъ наставля́емь, показа́лся еси́ житіе́мъ а́нгелъ на земли́. Тѣ́мъ пріобрѣ́лъ еси́ бога́тство небе́сное и сожи́тель а́нгеловъ яви́лся еси́ во Ца́рствіи Христа́, Бо́га на́шего.

Богоро́диченъ: Ми́лостивая Дѣ́во, ро́ждшая Бо́га Преми́лостиваго, се́рдца моего́ о́чи просвѣти́, молю́ся, ослѣ́пшія тмо́ю грѣхо́вною, и покажи́ прія́тны боже́ственнымъ сія́ніемъ, да боже́ственными гла́сы велича́ю Тя́.

Пѣ́снь 6.

Ирмо́съ: Селе́нія Іо́на е́же въ преиспо́днѣмъ а́дѣ есте́ственный о́бразъ бы́въ, вопія́ше: возведи́ отъ тли́ живо́тъ мо́й, Человѣколю́бче.

Ра́дуяся, Христу́ рабо́талъ еси́ на земли́, и бы́лъ еси́ сы́нъ послуша́нія, тѣ́мъ ны́нѣ, ра́дуяся, предстои́ши во свѣ́тѣ Святѣ́й Тро́ицы, Ейже за ны́ моли́ся, преподо́бне Рафаи́ле.

Естество́мъ бы́лъ еси́ человѣ́къ, но житіе́мъ свои́мъ, смире́ніемъ и послуша́ніемъ уподо́бился еси́ а́нгеломъ, сего́ ра́ди и по сме́рти прія́лъ еси́ да́ръ исцѣле́ній. И ны́нѣ моли́ Христа́ Бо́га, исцѣли́ти и спасти́ ду́ши на́ша.

Ра́ку моще́й имѣ́я въ себѣ́, ве́сь Бана́тъ ра́дуется, и боже́ственнаго ра́зума благоуха́нія исполня́ется, и всѣ́хъ, хва́лящихъ тя́, сердца́ вѣ́рою наслажда́ются.

Богоро́диченъ: Изъ утро́бы Твоея́ про́йде, Иже Отцу́ Собезнача́льный, и на́ше естество́ обожи́, Дѣ́во Всенепоро́чная, Его́же моли́, я́ко Человѣколю́бца, уще́дрити на́съ, согрѣ́шшія.

Конда́къ пра́здника, [гла́съ 2:

Въ моли́твахъ неусыпа́ющую Богоро́дицу и въ предста́тельствахъ непрело́жное упова́ніе, гро́бъ и умерщвле́ніе не удержа́ста: я́коже бо Живота́ Ма́терь, къ животу́ преста́ви, во утро́бу Всели́выйся приснодѣ́вственную].

Икосъ:

[Огради́ моя́ помышле́нія, Христе́ мо́й, и́бо Стѣ́ну мíра воспѣ́ти дерза́ю, Чи́стую Ма́терь Твою́, на столпѣ́ глаго́лъ укрѣпи́ мя, и въ тя́жкихъ мы́слехъ заступи́ мя, Ты́ бо взыва́ющимъ и прося́щимъ вѣ́рою моле́нія исполня́еши. Ты́ мнѣ́ у́бо да́руй язы́къ прино́сенъ и по́мыслъ непосты́денъ: вся́кое бо дая́ніе сія́нія отъ Тебе́ низпосыла́ется, Свѣтопода́телю, во утро́бу всели́выйся приснодѣ́вственную].

Пѣ́снь 7.

Ирмо́съ: Въ пещи́ пла́мень пе́щный, и Дѣ́ву сохрани́ ро́ждшую Тя́, Богоро́дицу: благослове́нъ еси́, Го́споди, Бо́же оте́цъ на́шихъ.

Ангельское житіе́ имѣ́лъ еси́, преподо́бне о́тче Рафаи́ле, въ смире́ніи и послуша́ніи, послѣ́дуя стопа́мъ Влады́ки Христа́. Тѣ́мъ тя́ вси́, вѣ́рніи, согла́сно похваля́емъ, пою́ще: благослове́нъ еси́, Го́споди, Бо́же оте́цъ на́шихъ.

Фи́никсъ, насажде́нный въ дому́ Госпо́дни, яви́лся еси́, цвѣ́ты принося́ чуде́сныя, и́миже сердца́ вѣ́рою наслажда́ются, хва́лящихъ тя́ при́сно, преподо́бне о́тче Рафаи́ле, и вопію́щихъ: благослове́нъ еси́, Го́споди, Бо́же оте́цъ на́шихъ.

Аще человѣ́комъ и невѣ́домы мно́гія труды́ твоя́ и по́двиги, и та́йныя моли́твы, но Бо́гомъ вся́ зри́мы и вѣ́домы, Ему́же при́сно вопіе́ши: благослове́нъ еси́, Го́споди, Бо́же оте́цъ на́шихъ.

Богоро́диченъ: Ро́ждшая зако́ну Да́теля, просвѣща́юща благода́тію всю́ вселе́нную, моли́ Его́ при́сно, зако́номъ мя́ побѣжда́ема грѣхо́внымъ, уще́дрити вско́рѣ.

Пѣ́снь 8.

Ирмо́съ: Благодѣ́теля, и Бо́га, и Изба́вителя всѣ́хъ, и Творца́ всего́ мíра, свяще́нницы, по́йте, лю́діе, превозноси́те во вся́ вѣ́ки.

Испо́лнився благода́ти Свята́го Ду́ха, разумѣ́лъ еси́ благовѣ́стіе Госпо́дне: возненави́дѣвъ простра́нный пу́ть, вводя́й въ па́губу, безмо́лвіе возлюби́лъ еси́, тѣ́снымъ путе́мъ послѣ́дуя Христу́, къ небе́снымъ оби́телемъ возше́лъ еси́.

Лику́етъ дне́сь вся́ страна́ Бана́тская и веселя́тся наро́довъ мно́жества, въ честнѣ́мъ преставле́ніи твое́мъ, соверша́юще моле́бный пра́здникъ.

Еди́наго Христа́ возлюби́въ, Того́ кре́стъ на ра́мо взе́мъ, поне́слъ еси́. Терпѣ́ніемъ же, посто́мъ и моли́твами, пло́ть твою́ ду́ху покори́лъ еси́. Тѣ́мъ ны́нѣ мо́лимъ тя́: моли́ся о душа́хъ на́шихъ.

Богоро́диченъ: Къ Свѣ́ту невече́рнему упра́ви у́мъ мо́й, Богоро́дице, и мои́хъ прегрѣше́ній плѣни́цу расто́ргни, моля́щи Сы́на Твоего́ и Го́спода, и томя́щій мя́ грѣ́хъ низложи́, я́ко да Тобо́ю спаса́емь, воспѣва́ю Тя́ всегда́.

Пѣ́снь 9.

Ирмо́съ: Благода́тная, ра́дуйся, Госпо́дь съ Тобо́ю, благослове́на Ты́ въ жена́хъ, и Тя́ велича́емъ.

Пресвята́го Ду́ха хра́мъ тя́, вси́ вѣ́рніи, вѣ́мы, и́бо па́че всѣ́хъ возлюби́лъ еси́ моли́тву непреста́нну, е́юже очища́я у́мъ, ду́шу же просвѣща́я, тѣ́ло свое́ смири́лъ еси́, тѣ́мъ тя́ велича́емъ.

Отче Рафаи́ле преподо́бне, возше́дъ на высоту́ добродѣ́телей, сла́дость спасе́нія показа́лъ еси́ на́мъ. Испроси́ на́мъ грѣхо́въ проще́ніе, да тя́ непреста́нно велича́емъ.

Юже прія́лъ еси́ отъ Христа́ Бо́га благода́ть, испроси́ и на́мъ, рабо́мъ твои́мъ, я́ко да спаса́еміи, при́сно тя́ велича́емъ.

Богоро́диченъ: Облакъ свѣтоза́рный показа́ся, росо́ю благода́ти вся́ скве́рны тѣле́сныя омыва́ющи, и ду́ши просвѣща́ющи, еди́на Всепѣ́тая.

Свѣти́ленъ преподо́бнаго:

Свѣ́тъ невече́рній, Христо́съ, просвѣти́ тя и показа́ тя въ мона́сѣхъ изря́дна: вои́стинну бо Христо́въ слуга́ бы́лъ еси́, напая́я благода́ти умиле́нія сердца́ на́ша. [Два́жды.]

Сла́ва, и ны́нѣ, пра́здника. [Подо́бенъ: Ученико́мъ зря́щимъ].

Отъ земли́ на небеса́ преста́вльшися, Твоего́ наслѣ́дія, Чи́стая, не оста́ви: ски́птры ца́рствія утверди́, язы́ки укроти́, и проле́й ми́ръ въ концы́ мíра.

На хвали́техъ стихи́ры на 6: пра́здника 3, гла́съ 6; и преподо́бнаго 3, гла́съ 8:

Показу́я при́сно чи́сто и освяще́нно житіе́ и скве́рнамъ несмѣ́сно, позна́лся еси́ на земли́ Христо́въ свяще́нъ сосу́дъ, и всели́лся еси́ во Свята́я святы́хъ, и ны́нѣ, преподо́бне Рафаи́ле, на небеси́ сія́еши благода́тію.

Тро́ицѣ яви́лся еси́ жили́ще, имѣ́я вѣ́ру чи́сту, и наде́жду, и любо́вь нелицемѣ́рну, чистоту́ ума́ и смире́ніе вознося́щее. Тѣ́мъ тя́ мо́лимъ: не забу́ди на́съ, лю́ди твоя́, но при́сно моли́ся ко Го́споду о спасе́ніи ду́шъ на́шихъ.

Преподо́бне Рафаи́ле, пло́ти и мíра внѣ́ бы́лъ еси́, ко премíрнымъ чино́мъ, ра́дуяся, преше́лъ еси́, положе́ніемъ свѣтлѣ́йшимъ обожа́емь. Тѣ́мже и мы́ па́мять твою́ вѣ́рою соверша́емъ на земли́ и сла́вимъ просла́вившаго тя́ Го́спода.

Сла́ва, и ны́нѣ, пра́здника, гла́съ 3:

Пріиди́те, вси́ концы́ земнíи, честно́е преставле́ніе Богома́тере восхва́лимъ, въ ру́цѣ бо Сы́на ду́шу непоро́чную положи́. Тѣ́мже святы́мъ успе́ніемъ Ея́ мíръ оживотвори́ся, во псалмѣ́хъ, и пѣ́ніихъ, и пѣ́снехъ духо́вныхъ, со безпло́тными и апо́столы пра́зднуетъ свѣ́тло.

Славосло́віе вели́кое. Тропа́рь преподо́бнаго. Сла́ва, и ны́нѣ, Успе́нія. Ектеніи́ и отпу́стъ.



НА ЛИТУРГІИ:

Блаже́нна отъ кано́на му́ченика Мирона, пѣ́снь 3-я, на 4, и преподо́бнаго Рафаи́ла, пѣ́снь 6-я, на 4. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Србљак. — Београд: Издаjе Свети Архиjереjски Синод Српске Православне Цркве, 1986. — С. 503-510.

/ Къ оглавленію раздѣла /


Наверхъ / Къ титульной страницѣ

0