Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа, въ 17-й де́нь.
Слу́жба преподо́бному Али́пію, иконопи́сцу Пече́рскому.

НА ВЕЧЕРНИ,
Пое́мъ: Блаже́нъ му́жъ, 1-й антифо́нъ. На Го́споди воззва́хъ, стихи́ры на 8: Успе́нія 3 и преподо́бнаго 5.
Стихи́ры Успе́нія, гла́съ 4. Подо́бенъ: Зва́нный свы́ше.

Иже Жи́знь, Богоро́дице, заче́ншая,* умира́еши зако́номъ естества́* и прехо́диши отъ земли́ къ Небе́снымъ,* ма́ніемъ Вопло́щшагося* отъ пречи́стыхъ и Боже́ственныхъ крове́й Твои́хъ.* Тѣ́мже отъ коне́цъ Тебѣ́ вси́ предста́ша,* богогла́сніи апо́столи Тя́ погребсти́,* пѣ́сненно Тебѣ́ вѣща́юще:* Одушевле́нный Престо́ле всѣ́хъ Царя́,* и честны́я Святы́ни Ковче́же,* ра́дуйся, Еди́на ро́ждшая* Спа́са ду́шъ на́шихъ.

Свѣ́та чистѣ́йшаго прія́телища,* свѣти́льницы, разо́ршіи но́щь многобо́жную,* Спа́совы апо́столи,* о́блакъ Боже́ственный,* изъ него́ же незаходи́мый Свѣ́тъ возсія́,* егда́ ду́хомъ преста́влену Тя́ отъ мірски́хъ,* увѣ́дѣша, Благослове́нная,* къ премíрнѣй ра́дости* о́блакомъ преидо́ша,* исхо́дными пѣ́сньми Тя́ проводи́вше* ко гро́бу живоно́сному,* Богоро́дице, упова́ніе на́ше.

Да пра́зднуетъ тва́рь моле́бно:* всѣ́хъ Цари́ца* къ Ца́рству мы́сленному пре́йде,* сца́рствовати Ца́рствующему* все́ю тва́рію.* Ея́же ра́ди разруши́ся а́дово ца́рство,* и мы́ отъ земли́ вознесо́хомся,* и со Ангелы жи́ти сподо́бихомся.* Ея́же успе́ніемъ собра́ся мы́сленное естество́ все́,* патріа́рси, проро́цы* и съ му́ченики апо́столи.

Ины стихи́ры, преподо́бнаго, гла́съ 1-й. Подо́бенъ: О, ди́вное чу́до.

Али́піе чу́дне,* блаже́нный о́тче, во и́ноцѣхъ изря́днѣйшій,* соше́дшеся у́бо дне́сь, тя́ восхва́лимъ,* я́ко взя́лъ еси́ яре́мъ Христо́въ,* цѣлому́дріемъ подви́гъ ду́шу,* та́же горѣ́ дѣ́тельно,* къ Жизнода́вцу по лѣ́ствицѣ добродѣ́телей* преподо́бно возше́лъ еси́,* Его́ же моли́,* да пода́стъ вся́ко на́мъ Сво́й ми́ръ и ве́лію ми́лость.

Али́піе ди́вне,* прему́дрый ра́бе,* пріи́мъ у́бо тала́нтъ Царе́въ,* сверши́лъ еси́ житіе́мъ ку́плю сла́вно,* преумно́живъ то́й со тща́ніемъ,* добродѣ́тельми снабди́въ ду́шу.* Се́ вопіе́мъ дне́сь къ тебѣ́,* зане́ къ Бо́гу прія́лъ еси́ дерзнове́ніе:* умоли́ бла́гъ Пода́теля* уще́дрити ны́,* подая́ при́сно на́мъ Сво́й ми́ръ и ве́лію ми́лость.

Али́піе чу́дне,* еле́й душе́вный,* стяжа́въ труды́ и бдѣ́ніи,* и ре́вности о́гнь въ души́ си́мъ воспла́менивъ,* стра́сти, о́тче, истреби́лъ еси́,* чистото́ю украси́въ ду́шу,* та́же полки́ де́моновъ,* а́ки хвра́стіе, во́инственно поже́глъ еси́.* Тѣ́мже вше́дый въ черто́гъ Царе́въ,* Христа́ умоли́,* да пода́стъ вся́ко на́мъ Сво́й ми́ръ и ве́лію ми́лость.

Любо́вію ду́шу* разже́гъ прему́дро,* соблю́лъ еси́, Али́піе,* отъ мíра не оскверне́нъ о́бразъ Бо́жій,* возлюби́въ Христа́ отъ ю́ности,* и къ Тому́ у́бо восте́къ ди́вно,* и въ красоту́ пе́рвую* по подо́бію Бо́жію добродѣ́тельми* то́й преди́вно обле́клъ еси́.* Тѣ́мъ Спа́са моли́* да пода́стъ вѣ́рно на́мъ тобо́ю ве́лію ми́лость.

О, ди́вное чу́до* пріи́мъ Али́пій* худо́жный да́ръ отъ Го́спода,* ико́нами украси́ хра́мы ди́вно,* си́мъ назна́менуя я́вственно* ты́я Не́бо на земли́ бы́ти,* во е́же святы́хъ о́бразы* зрѣ́ти лю́демъ къ духо́вному поуче́нію,* да небе́сная вне́млюще,* потща́тся горѣ́,* ко Христу́ Бо́гу, подаю́щу ве́лію ми́лость.

Сла́ва, преподо́бному, гла́съ 8:

Егда́, преподо́бне, це́рковь Пече́рская святы́хъ о́бразы украша́шеся, ви́дѣлъ еси́ преди́вная и сла́вная, отъ Бо́га я́вльшаяся, тѣ́мже и позна́лъ еси́ Бо́жіе благоутро́бное о лю́дехъ смотрѣ́ніе, и цѣлому́дренно ко Христу́ любо́вію разже́гся, къ Тому́ усе́рдно восте́клъ еси́: пло́ть у́бо дѣя́ньми утружда́я, се́рдцемъ же и умо́мъ къ Возлю́бленному вы́ну прилѣпля́яся, да дѣя́ніемъ и видѣ́ніемъ, я́ко на двою́ крилу́, горѣ́ воспери́ши ле́гцѣ; ны́нѣ же Христу́ съ ли́ки преподо́бныхъ предстоя́, не преста́й моля́ся о вѣ́рою и любо́вію соверша́ющихъ па́мять твою́.

И ны́нѣ, Успе́нія, гла́съ 2:

Яже Небе́съ вы́шшая, су́щи, и Херуви́мъ сла́внѣйшая, и всея́ тва́ри честнѣ́йша, Яже премно́гія ра́ди чистоты́, Присносу́щнаго существа́ прія́телище бы́вши, въ Сыно́внѣ ру́цѣ дне́сь всесвяту́ю предае́тъ ду́шу, и съ Не́ю исполня́ются вся́ческая ра́дости, и на́мъ да́руетъ ве́лію ми́лость.

Вхо́дъ. Проки́менъ дне́. Чте́нія три́, преподо́бническія:

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

На стихо́внѣ стихи́ры Успе́нія, гла́съ 2. Подо́бенъ: До́ме Евфра́ѳовъ.

Пѣ́сньми Твое́ честно́е* и богопрія́тное тѣ́ло,* провожда́юще, Боже́ственніи* апо́столи, вопія́ху:* гдѣ́ ны́нѣ отхо́диши, Влады́чице?

Сти́хъ: Воскресни́, Го́споди, въ поко́й Тво́й,* Ты́ и Киво́тъ святы́ни Твоея́.

Пріиди́те, земноро́дніи,* соста́вимъ ли́къ,* исхо́дное вопію́ще* на преставле́ніе Богоро́дицы дне́сь.

Сти́хъ: Кля́тся Госпо́дь Дави́ду и́стиною,* и не отве́ржется ея́.

Земля́ у́бо Твои́мъ погребе́ніемъ* благослови́ся, Дѣ́во,* возду́хъ же восхожде́ніемъ* освяти́ся стра́ннымъ,* зако́номъ уме́рши естества́.

Гла́съ 1-й.

Сти́хъ: Честна́ предъ Го́сподемъ* сме́рть преподо́бныхъ Его́.

Гряди́те, вѣ́рніи, нача́льника россíйскаго ико́ннаго писа́нія восхва́лимъ, просла́вимъ ди́внаго, святы́хъ и пра́ведныхъ во о́бразѣхъ ди́вно просла́вльшаго. Просла́вимъ преподо́бнаго, тѣ́хъ житіе́ въ се́рдцѣ свое́мъ проподо́бно вообрази́вшаго. Возвы́симъ свѣти́льникъ Христо́въ, свѣ́тъ Того́ на́мъ пресвѣ́тло возсія́вшій. О, лю́діе, подража́имъ сего́ житіе́, и́же въ го́рняя сего́ восхо́дъ въ се́рдцѣ свое́мъ вообража́юще, да не въ о́бразѣхъ та́мо, но несре́дственнѣ лицезри́мъ Христа́, Спа́са на́шего.

Сла́ва, гла́съ то́йже:

О, нача́льниче, россíйскаго ико́ннаго писа́нія! Что́ е́сть та́инство твоего́ ди́внаго дѣ́ланія и написа́нія худо́жнаго? Ты́ бо сѵмволи́ческими начерта́ньми и въ шаро́вныхъ счета́ніихъ, язы́къ духо́вный пріи́мъ, я́же го́рняя и та́йная лю́демъ я́вѣ изъясня́лъ еси́, я́коже ста́рцемъ ку́пно и отроко́мъ разумѣ́ти. О, чу́дне Али́піе, помози́ и на́мъ, я́же небе́снымъ въ душа́хъ на́шихъ вообрази́тися.

И ны́нѣ, гла́съ 2-й, Успе́нія:

Всенепоро́чная Невѣ́ста и Ма́ти благоволе́нія Отча, Яже Бо́гу пронарече́нная во Свое́ Ему́ жили́ще, несли́тнаго соедине́нія, дне́сь пречи́стую ду́шу Творцу́ и Бо́гу предае́тъ, ю́же Безпло́тныхъ си́лы боголѣ́пно подъе́млютъ, и къ Животу́ преставля́ется, су́щая Ма́ти Живота́, свѣща́ непристу́пнаго Свѣ́та, спасе́ніе вѣ́рныхъ и упова́ніе ду́шъ на́шихъ.

Тропа́рь, гла́съ 8:

Зра́ки изобразу́я святы́хъ на дщи́цахъ, си́хъ благодѣя́нія спѣ́шно, я́ко иску́сенъ худо́жникъ, всехва́льне Али́піе, написова́лъ еси́ на скрижа́лехъ твоего́ се́рдца, и сего́ ра́ди а́ки о́бразъ боголѣ́пно укра́шенъ, свяще́нства благода́тію а́ки зла́томъ обложи́лся еси́ отъ Христа́ Бо́га и Спа́са ду́шъ на́шихъ.

Сла́ва, и ны́нѣ, пра́здника, гла́съ 1-й:

Въ рождествѣ́ дѣ́вство сохрани́ла еси́, во успе́ніи мíра не оста́вила еси́, Богоро́дице, преста́вилася еси́ къ животу́, Ма́ти су́щи Живота́, и моли́твами Твои́ми избавля́еши отъ сме́рти ду́ши на́ша.


НА УТРЕНИ,
На Бо́гъ Госпо́дь, тропа́рь пра́здника: Въ рождествѣ́..., 2-жды.
Сла́ва, свято́му: Зра́ки изобразу́я... И ны́нѣ, пра́здника: Въ рождествѣ́...

По 1-й каѳи́смѣ, сѣда́ленъ, гла́съ 5. Подо́бенъ: Собезнача́льное Сло́во.

Вся́ отложи́лъ еси́, о́тче, бога́тства тлѣ́нная, вмѣня́я вся́ческая, я́же мíра, въ уме́ты, да къ лико́мъ Ангельскимъ взы́деши ле́гцѣ, и́стинную и небе́сную жи́знь возлюби́въ, идѣ́же бога́тство, е́же не прича́стно е́сть тлѣ́нію, тща́ніемъ стяжа́лъ еси́ твои́мъ. [Два́жды.]

Сла́ва, и ны́нѣ, пра́здника, гла́съ 3. Подо́бенъ: Красотѣ́ дѣ́вства.

Въ небе́сная мы́сленная Твоя́ душа́, въ ра́й чи́стое Твое́ тѣ́ло преста́вися, отъ тли́, Пренепоро́чная, въ мѣ́сто свѣ́тло, сего́ ра́ди возда́стъ беззако́ннымъ Госпо́дь, ле́сть бо содѣ́лаша честно́му Твоему́ тѣ́лу. Тѣ́мже со апо́столы вопіе́мъ: ра́дуйся, Благода́тная.

По 2-й каѳи́смѣ, седа́ленъ, гла́съ 4. Подо́бенъ: Удиви́ся Іо́сифъ.

Подвиза́вся усе́рдно, мудрова́ніе плотско́е и страсте́й взыгра́ніе, о́тче всеблаже́нне, поще́ньми и моли́твою прему́дро смири́лъ еси́, да боже́ственными озаре́ніи се́рдце твое́ просвѣти́ши, тѣ́мже ны́нѣ, я́ко досто́йнѣйшій, преподо́бне, Влады́цѣ предстои́ши съ у́мными чи́нми, Его́же моли́, на́мъ спасе́ніе пода́ти. [Два́жды.]

Сла́ва, и ны́нѣ, пра́здника, гла́съ и подо́бенъ то́йже:

Въ ру́цѣ на́съ ра́ди вочеловѣ́чшагося изъ Тебе́, преда́вши ду́шу, я́ко Зижди́телю Твоему́ и Бо́гу, къ жи́зни нетлѣ́ннѣй преста́вилася еси́. Тѣ́мже Тя́ че́стно ублажа́емъ, еди́ну чи́стую и нескве́рную, Богоро́дицу вси́ и́стинно исповѣ́дающе, взыва́емъ: Христа́ моли́, къ Нему́же преста́вилася еси́, спасти́ ду́ши на́ша.

Поліеле́й и велича́ніе:

Ублажа́емъ тя́, преподо́бне о́тче Али́піе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́, и услы́ша моли́тву мою́.

По поліеле́и сѣда́ленъ, гла́съ 8. Подо́бенъ: Повелѣ́нное.

Пріиди́те, слику́юще дне́сь вѣ́рніи, Христо́въ избра́нный сосу́дъ пѣ́сненно почти́мъ, зову́ще: о, го́рнѣйшихъ си́лъ удивле́ніе и изря́дная и́ноковъ похвало́, се́ сни́ди, и покажи́ на́мъ о́бразъ преди́внаго къ Бо́гу восхожде́нія. Потщи́мся лю́діе, и того́ подражи́мъ житіе́, къ Бо́гу восходя́ще Жизнода́телю. [Два́жды.]

Сла́ва, и ны́нѣ, пра́здника, гла́съ 4. Подо́бенъ: Удиви́ся Іо́сифъ:

Возопíй, Дави́де: что́ се́й пра́здникъ, его́ же воспѣ́лъ еси́ дре́вле въ кни́зѣ псало́мстѣй? Яко дще́рь Богоотрокови́цу и Дѣ́ву, преложи́ Ю на о́ны оби́тели Христо́съ, Иже изъ Нея́ безъ сѣ́мене ро́ждся, и сего́ ра́ди ра́дуются ма́тери и дще́ри, и невѣ́сты Христо́вы, вопію́ще: ра́дуйся, Преста́вившаяся къ вы́шнему Ца́рствію.

Степе́нна, 1-й антифо́нъ 4-го гла́са: Отъ ю́ности моея́... Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Дне́сь соверша́юще па́мять твою́, наста́вниче на́шъ, преподо́бне Али́піе, апо́столу Па́влу та́ко повелѣ́вшу, и взира́юще на сконча́ніе жи́тельства твоего́, тщи́мся подража́ти преизря́дному житію́ твоему́: моли́твѣ и трудо́мъ непреста́ннымъ, воздержа́нію преди́вному, усе́рдію нелѣ́ностному и вѣ́рѣ непосты́днѣй. Ты́ же, уго́дниче Христо́въ, не преста́й моля́ся за на́съ, во е́же спасти́ ду́ши на́ша.

Кано́нъ пра́здника, со ирмосо́мъ на 6. Ки́ръ Іоа́нна Дамаскина́, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ успе́ніе.

Дѣ́вы отрокови́цы, съ Маріамíею проро́чицею, пѣ́снь исхо́дную ны́нѣ воскли́кните: Дѣ́ва бо и еди́на Богома́ти ко прія́тію небе́сному преставля́ется.

Досто́йно, я́ко одушевле́нное Тя́ Не́бо, прія́ша небе́сная, Пречи́стая, Боже́ственная селе́нія, и предста́, свѣ́тло укра́шена, я́ко Невѣ́ста Всенепоро́чная, Царю́ и Бо́гу.

Кано́нъ преподо́бному на 8, его́же краегране́сіе: Образу Бо́жію, Али́піе, во мнѣ́ обнови́тися моли́, гласъ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Оби́тель Пече́рская, я́коже Боже́ственный ра́й, по́стниковъ ли́ки процвѣте́, въ не́й же возра́слъ еси́, Али́піе преподо́бне, я́ко дре́во, насажде́нное при исхо́дищахъ во́дъ. Тѣ́мже плоды́ стокра́тно стяжа́лъ еси́, я́ко изря́днѣйшій.

Бо́жія наипа́че возлю́бль, мірски́мъ, о́тче, печа́лемъ ника́коже се́рдца твоего́ приложи́лъ еси́, по и́мени безпеча́ленъ сы́й, но при́сно ра́дуяся о Го́сподѣ Спа́сѣ, сла́вно преше́лъ еси́ злоко́зненную мíра пучи́ну.

Ре́вность го́рнюю пріи́мъ, горѣ́ ди́вно восте́клъ еси́, начерта́въ, преподо́бне, стремле́ніемъ го́рнимъ, вопреки́ до́льнему пло́ти тече́нію, побѣ́дное ору́жіе — Кре́стъ, взе́мъ кре́стъ сво́й и гряды́й вслѣ́дъ Го́спода, поя́ пѣ́снь побѣ́дную.

Богоро́диченъ: Ааро́новъ прозя́бшій же́злъ и Боже́ственный престо́лъ, на не́мже всѣ́де Христо́съ, и небе́сный хра́мъ, и́же Влады́ку на́мъ яви́, и́мамы Тя́, Дѣ́во Пречи́стая: не преста́й спаса́ющи ны́, да пѣ́снь воспое́мъ побѣ́дную.

Катава́сія пра́здника.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ Боже́ственнѣй па́мяти Твое́й вѣнце́въ сла́вы сподо́би.

Отъ ме́ртвыхъ чре́слъ произве́дшися, естество́мъ подо́бна, Чи́стая, исхожде́ніе разрѣши́, ро́ждши же су́щую Жи́знь, къ жи́зни преста́вися Боже́ственнѣй и Ѵпоста́снѣй.

Ли́къ богосло́вовъ отъ коне́цъ, свы́ше же Ангелъ мно́жества къ Сіо́ну идя́ху, всеси́льнымъ манове́ніемъ, достодо́лжно, Влады́чице, Твоему́ погребе́нію служа́ще.

Инъ.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

За́повѣди Христо́вы, я́ко тве́рдый ка́мень, положи́ въ основа́ніе преподо́бный, на не́мъ же поста́вивъ свои́ но́зѣ благоче́стія, ро́ва страсте́й и треволне́ній де́монскихъ избѣже́ ди́вно.

Умныя си́лы подража́я, о́тче, лѣ́ствицу у́мнаго восхожде́нія въ се́рдцѣ твое́мъ дѣ́тельнѣ утверди́лъ еси́, вопія́ Христу́: па́че Тебе́ нѣ́сть свя́та, Человѣколю́бче.

Благода́ть сугу́бу имѣ́еши у Го́спода, Ему́же предстои́ши, всехва́льне, помоли́ся о на́съ, во е́же и на́мъ прія́ти го́рнѣйшее блаже́нство отъ Христа́ Влады́ки, избѣ́гнувъ мно́гихъ бѣ́дъ и де́монскихъ искуше́ній.

Отрокъ сы́й, преди́вне, худо́жнѣй хи́трости вда́нъ бы́лъ еси́ поучи́тися, но го́рнѣйшаго худо́жества бы́лъ еси́ жела́ніемъ уловле́нъ, о́бразы добродѣ́телей на скрижа́лехъ се́рдца твоего́ живопису́я.

Богоро́диченъ: Живота́ Влады́ку и Творца́ ро́ждшая, Еди́наго предвѣ́чнаго Спа́са, Блага́я, Того́ моли́ за при́сно вопію́щія Ти́, да спасе́тъ на́съ, я́ко Еди́нъ Пребла́гъ и Человѣколю́бецъ.

Конда́къ пра́здника, гла́съ 2:

Въ моли́твахъ неусыпа́ющую Богоро́дицу и въ предста́тельствахъ непрело́жное упова́ніе, гро́бъ и умерщвле́ніе не удержа́ста: я́коже бо Живота́ Ма́терь, къ животу́ преста́ви, во утро́бу Всели́выйся приснодѣ́вственную.

Икосъ:

Огради́ моя́ помышле́нія, Христе́ мо́й, и́бо Стѣ́ну мíра воспѣ́ти дерза́ю, Чи́стую Ма́терь Твою́, на столпѣ́ глаго́лъ укрѣпи́ мя, и въ тя́жкихъ мы́слехъ заступи́ мя, Ты́ бо взыва́ющимъ и прося́щимъ вѣ́рою моле́нія исполня́еши. Ты́ мнѣ́ у́бо да́руй язы́къ доброрѣ́чивъ и по́мыслъ непосты́денъ: вся́кое бо дая́ніе сія́нія отъ Тебе́ низпосыла́ется, Свѣтопода́телю, во утро́бу всели́выйся приснодѣ́вственную.

Сѣда́ленъ, гла́съ 1, подо́бенъ: Гро́бъ Тво́й, Спа́се.

О, блаже́нне, ка́ко сле́зными тече́ніи се́рдце твое́ напая́лъ еси́, е́же ороша́я оби́льно, плодоно́сно яви́лъ еси́ добродѣ́тельми, сего́ ра́ди го́рнѣйшее жи́тельство прія́лъ еси́ отъ Го́спода, къ нему́ же, преподо́бне, дерзнове́нно за ны́ предста́тельствуй. [Два́жды.]

Сла́ва, и ны́нѣ, пра́здника, гла́съ и подо́бенъ то́й же:

Всечестны́й ли́къ прему́дрыхъ апо́столъ собра́ся чу́дно, погребсти́ сла́вно тѣ́ло Твое́ пречи́стое, Богоро́дице Всепѣ́тая, съ ни́ми же воспѣ́ша и Ангелъ мно́жество, преставле́ніе Твое́ че́стно хва́ляще, е́же вѣ́рою пра́зднуемъ.

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ, усмотря́я, зовя́ше: сла́ва си́лѣ Твое́й, Го́споди.

Чу́до бя́ше зрѣ́ти, Не́бо всѣ́хъ Царя́ одушевле́нное, испражне́нія преходя́щее земна́я, я́ко чу́дна дѣла́ Твоя́! Сла́ва си́лѣ Твое́й, Го́споди.

Аще и непости́жный Сея́ Пло́дъ, Имже небеса́ бы́ша, погребе́ніе прія́тъ во́лею, я́ко ме́ртвъ; ка́ко погребе́нія отве́ржется, неискусобра́чно Ро́ждшая?

Въ преставле́ніи Твое́мъ, Ма́ти Бо́жія, простра́ннѣйшее тѣ́ло Твое́ и богопрія́тное, Ангельская во́инства свяще́нными кри́лы, тре́петомъ и ра́достію покрыва́ху.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти́: си́лѣ Твое́й сла́ва, Человѣколю́бче.

Ико́ннаго худо́жества свы́ше воспріи́мъ да́ръ, хра́мы, о́тче, небоподо́бно украси́лъ еси́, я́коже Веселеи́лъ дре́вле, твою́ же непоро́чную ду́шу, добродѣ́тельми прилѣ́жно украша́я, хра́мъ Ду́ха Свята́го содѣ́лалъ еси́.

Юность нескве́рну Го́споду, я́ко да́ръ перворо́дный, безъ поро́ка, въ же́ртву прине́слъ еси́, тѣ́мже и отъ Христа́, о́тче, свяще́нства да́ромъ обле́клся еси́, да Тому́ та́инственное непоро́чно жертвоприно́сиши благодаре́ніе.

Алчбою же и жа́ждею и труды́ безмѣ́рными крѣ́пость пло́ти, блаже́нне, не щадѣ́лъ еси́, во е́же ду́ха крѣ́пости яви́тися. Тѣ́мже и чудотворе́нія да́ръ отъ Христа́ прія́лъ еси́ е́же цѣли́ти ду́шъ и тѣле́съ не́мощь къ тебѣ́ приходя́щихъ.

Любо́вь боже́ственную, я́же е́сть соу́зъ соверше́нства, въ се́рдцѣ твое́мъ, преподо́бне, стяжа́въ у́бо дѣ́тельнѣ, добродѣ́телей ве́рхъ показа́лъ еси́, тѣ́мже преди́вный къ Бо́гу бу́ди хода́тай, вы́ну моля́ о на́съ Человѣколю́бца.

Богоро́диченъ: Ѵпоста́снаго Сло́ва непоро́чно ро́ждшая, пре́жде вѣ́къ отъ Отца́ ро́ждшагося, умоли́ Того́, Дѣ́во, отъ напа́стей злы́хъ изба́вити на́съ, да жите́йскую преплы́вше пучи́ну, Ца́рствіе небе́сное улучи́мъ вско́рѣ.

Пѣ́снь 5.

Ирмо́съ: Ужасо́шася вся́ческая о честнѣ́мъ успе́ніи Твое́мъ: Ты́ бо, неискусобра́чная Дѣ́во, отъ земли́ преста́вилася еси́ къ вѣ́чнымъ оби́телемъ, и къ безконе́чнѣй жи́зни, всѣ́мъ, воспѣва́ющимъ Тя́, спасе́ніе подава́ющая.

Да возглася́тъ трубы́ богосло́вовъ дне́сь, язы́къ же многовѣща́нный человѣ́ческій ны́нѣ да восхва́литъ, да огласи́тъ же возду́хъ, безмѣ́рнымъ сія́я свѣ́томъ, Ангели да пою́тъ Пречи́стыя Дѣ́вы успе́ніе.

Сосу́дъ подоба́ше избра́нный, пѣ́ніемъ Ти́ ве́сь удивля́емь, Дѣви́це, исхо́денъ, ве́сь освяще́нъ Бо́гу, всѣ́мъ богопрія́тенъ, и се́й и́стинно явля́емый, Богоро́дице Всепѣ́тая.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́, окая́ннаго, но обрати́ мя и къ свѣ́ту за́повѣдей Твои́хъ пути́ моя́ напра́ви, молю́ся.

Прокаже́нна, прише́дша къ тебѣ́, подража́тельно Христу́, исцѣля́еши, о́тче, смѣше́ніемъ худо́жнымъ лица́ сокры́въ безобра́зіе, и ко іере́емъ умы́тися того́ посла́въ, отню́дъ людскíя бѣ́гая сла́вы.

Іису́су, живота́ Нача́льнику, ве́сь отъ ю́ности живо́тъ сво́й предаде́ Али́пій, разумѣ́ бо тщету́ и пре́лесть мíра жите́йскаго. Тѣ́мже прилѣ́жно ко свѣ́ту за́повѣдей Христо́выхъ стопы́ своя́ и се́рдце напра́ви.

Еди́наго Христа́ предзря́, къ Тому́ а́нгельски восте́клъ еси́, преподо́бне, житіе́мъ разу́мно, умо́мъ же цѣлому́дренно, творя́ восхо́дъ сво́й. Тѣ́мже Ца́рство го́рнѣйшее прія́лъ еси́, да а́нгеломъ слику́еши при́сно.

Вѣ́рніи, слику́юще дне́сь, притеце́мъ у́бо къ Али́пію, зову́ще: преблаже́нне о́тче, моли́ся вы́ну ко Го́споду, да укрѣпи́тъ на́съ и къ свѣ́ту за́повѣдей Свои́хъ преди́вно но́ги на́ша напра́витъ.

Богоро́диченъ: Отцу́ сопресто́льное Сло́во, пре́жде вѣ́къ отъ Него́ ро́ждшееся безлѣ́тно, Преблага́я Дѣ́во, ди́вно родила́ еси́ пло́тію, Иже отъ вѣ́ка Тя́ Дѣ́ву чи́стую избра́, да на́съ спасе́тъ отъ кля́твы Тобо́ю.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Изъ Тебе́ Жи́знь возсія́, ключи́ дѣ́вства не руши́вши; ка́ко у́бо пречи́стое и живонача́льное Твое́ тѣ́ло искуше́нія сме́рти бы́сть прича́стно?

Жи́зни бы́вши хра́мъ, жи́знь присносу́щную улучи́ла еси́: сме́ртію бо къ животу́ премину́ла еси́, Яже Жи́знь ро́ждши воѵпоста́сную.

Инъ.

Ирмо́ъ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися, и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возвѣди́ мя́.

Моли́твою и воздержа́ніемъ мудрова́ніе пло́ти увяди́въ, въ животво́рную ме́ртвость обле́клся еси́, вопія́ съ Па́вломъ боже́ственнымъ: не ктому́ у́бо живу́ а́зъ, но живе́тъ во мнѣ́ Христо́съ, Спа́съ мо́й.

Небла́зненно сверша́я ше́ствіе, трудолю́бно на ра́ло ру́цѣ возло́жь, мíра вспя́ть ника́коже назира́лъ еси́, разжиза́емь къ Бо́гу любо́вію, тѣ́мже ра́дуешися ны́нѣ, дости́гъ Ца́рствія Христо́ва.

Ѣжде́нію Иліину́, е́же на не́бо, уподо́бися восхо́дъ тво́й, Али́піе, колесни́цу бо о́гненную добродѣ́телей усе́рднѣйшимъ тща́ніемъ состро́ивъ и впря́гъ о́гненныя ко́ни — ре́вность и вѣ́ру, небесе́ сла́вно дости́глъ еси́.

Богоро́диченъ: Очи́стити хотя́ Ада́мовъ грѣ́хъ, предъизбра́ Тя́ еди́ну Дѣ́ву Христо́съ, да Тобо́ю сни́детъ къ на́мъ, Пречи́стая, свобожда́я ле́сти лука́ваго. Тѣ́мже мо́лимся Тебѣ́ Дѣ́во: отъ грѣ́хъ вся́ко огради́ ны.

Конда́къ свята́го, гла́съ 2:

Отъ ю́ности Боже́ственное въ себѣ́ имѣ́я начерта́ніе, вда́нъ бы́лъ еси́ въ науче́ніе ико́ннаго писа́нія; и внегда́ небеси́ подо́бная Богоро́дицы писа́шеся це́рковь, ты́ та́можде посо́бствовалъ еси́, и ви́дѣлъ еси́ Ду́ха Свята́го осія́ніе, отъ Него́же прія́лъ еси́ чуде́съ дѣ́йство, я́ко ико́ны твоя́ чудотворя́ху. Тѣ́мъ тя́ чти́мъ и ублажа́емъ, чу́дне Али́піе.

Икосъ:

Юже це́ркве Пече́рскія, небеси́ подо́бную, красоту́ узрѣ́въ, преподо́бне, первообра́зныя и го́рнѣйшія красоты́ наслади́тися и небе́снаго жи́тельства разже́глся еси́ жела́ніемъ, и ю́ношески Ангельскому житію́ поревнова́въ, боже́ственными добродѣ́тельми потща́лся еси́ ду́шу твою́ украша́ти: посто́мъ и бдѣ́ніемъ, труды́ и ми́лостынею, и моли́твою непреста́нною, да все́льникъ го́рнѣйшія Це́ркве яви́шися, идѣ́же съ Ангельскими ли́ки Святѣ́й Тро́ицѣ ны́нѣ предстои́ши за чту́щія тя́ вы́ну предста́тельствуя. Тѣ́мъ тя́ чти́мъ и ублажа́емъ, чу́дне Али́піе.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Юноши и дѣ́вы, Дѣ́выя же и Богома́тере па́мять чту́ще, ста́рцы и кня́зи, ца́ріе и судіи́, по́йте: оте́цъ на́шихъ Го́споди и Бо́же, благослове́нъ еси́.

Да востру́бятъ трубо́ю духо́вною го́ры небе́сныя, да ра́дуются хо́лми, и да игра́ютъ боже́ственніи апо́столи: Цари́ца къ Сы́ну преставля́ется, съ Ни́мъ ца́рствующи.

Всесвяще́нное преставле́ніе боже́ственныя Твоея́ и нетлѣ́нныя Ма́тере, премíрныя вы́шнихъ си́лъ совокупи́ чи́ны, весели́тися съ су́щими на земли́, Тебѣ́ пою́щими: Бо́же, благослове́нъ еси́.

Инъ.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Бо́жіею десни́цею о́бразъ Влады́чицы ви́дѣвъ начерта́нъ, та́же Ду́ха Бо́жія, я́ко го́лубя въ це́ркви лета́юща, сла́вно воспѣ́лъ еси́, со и́ноки взыва́я: благослове́нъ еси́ Бо́же, оте́цъ на́шихъ.

Напа́сти хитросплете́нныя, я́же лука́вый, я́ко сѣ́ти, распростре́, трудолю́бно вѣ́рою и смире́ніемъ низложи́въ, о́тче, того́ ловле́нія избѣ́глъ еси́, взыва́я: благослове́нъ еси́, Бо́же, оте́цъ на́шихъ.

Область міродержи́теля, о́тче, Боже́ственною си́лою попра́въ, того́ зло́бу низве́рглъ еси́, добродѣ́тельми препобѣжда́я. Ны́нѣ же, го́рняя наслѣ́довавъ, пое́ши: благослове́нъ еси́, Бо́же, оте́цъ на́шихъ.

Вѣрою любому́дрствуя, ско́рбнымъ и тѣ́снымъ путе́мъ ше́ствовалъ еси́, тѣ́мже две́ри ра́йскія расшири́шася тебѣ́ пресла́вно, идѣ́же пра́зднственно лику́еши, взыва́я: благослове́нъ еси́, Бо́же, оте́цъ на́шихъ.

Богоро́диченъ: Иже отъ невеще́ственныхъ пло́ть человѣ́чу воспрія́лъ е́сть отъ Тебе́, да спасе́тъ ны́, Чи́стая, животво́рныя подая́ то́ки, и сродни́въ пло́тію себѣ́, пѣснопою́щихъ: благослове́нъ еси́, Бо́же, оте́цъ на́шихъ.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Па́мять Твою́, Чи́стая Дѣ́во, Нача́ла же, и Вла́сти, и Си́лы, Ангели, Арха́нгели, Престо́ли, Госпо́дства, Херуви́ми сла́вятъ и стра́шніи Серафи́ми; человѣ́ческій же ро́дъ — пое́мъ и превозно́симъ во вся́ вѣ́ки.

Иже стра́нно всели́выйся, Богоро́дице, въ чи́стое чре́во Твое́, воплоща́емь, Се́й, всесвяще́нный ду́хъ Тво́й пріе́мъ, у Себе́ упоко́и, я́ко должни́къ Сы́нъ. Тѣ́мже Тя́ пое́мъ, Дѣ́во, и превозно́симъ во вся́ вѣ́ки.

О, вы́ше ума́ чуде́съ Приснодѣ́вы же и Богома́тере! Во гро́бъ бо все́льшися, показа́ ра́й, ему́же предстоя́ще дне́сь, ра́дующеся, пое́мъ: Го́спода по́йте, дѣла́, и превозноси́те Его́ во вся́ вѣ́ки.

Инъ.

Ирмо́съ: Седмери́цею пе́щь, халде́йскій мучи́тель Богочести́вымъ неи́стово разжже́, си́лою же лу́чшею, спасе́ны сія́ ви́дѣвъ, Творцу́ и Изба́вителю вопія́ше: о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Терпѣли́внымъ путе́мъ гряды́й вслѣ́дъ Влады́ки, кре́стъ трудолю́бно на ра́мена пріи́мъ, Ца́рствія небе́снаго дости́глъ еси́ пресла́вно, идѣ́же Содѣ́телю всѣ́хъ вопіе́ши: о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Иже па́мять твою́ творя́щіи, о́тче, я́ко преди́вна во и́ноцѣхъ тя́ зри́мъ, о́бразъ возхожде́нія на́мъ дѣ́тельнѣ яви́вша. Тѣ́мъ же ны́нѣ Влады́цѣ научи́ взыва́ти: о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Свѣтоза́рнымъ вѣнце́мъ вѣнча́ тя Влады́ка, до́брымъ бо по́двигомъ тече́ніе сконча́въ, ду́шу добродѣ́тельми сверши́лъ еси́ прему́дро. Тѣ́мъ же ны́нѣ Изба́вителю вопіе́ши: о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Богоро́диченъ: Яко стѣ́ну въ бѣда́хъ, и вѣ́рную по́мощь и преблагу́ю засту́пницу о на́съ вѣ́мы Тя́, Пречи́стая. Тѣ́мъ же мо́лимъ Ти ся вы́ну: спаси́, о Влады́чице, отъ злоключе́ній, ко́зней бѣсо́вскихъ и зло́бы, да вѣ́рно вопіе́мъ Ти́: ра́дуйся, Чи́стая Дѣ́во, во вся вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное преставле́ніе Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Пріиди́те въ Сіо́нъ, на Боже́ственную и ту́чную Го́ру жива́го Бо́га, возра́дуемся, Богоро́дицу зря́ще: къ зѣло́ бо лу́чшей и Боже́ственнѣй сѣ́ни, я́ко Ма́терь, Сію́ во Свята́я святы́хъ Христо́съ преста́ви.

Пріиди́те, вѣ́рніи, ко гро́бу присту́пимъ Бо́жія Ма́тере, и объи́мемъ сердцы́ и устна́ми, очесы́ и лице́мъ чи́сто прикаса́ющеся и почерпа́юще исцѣле́ній незави́стныя да́ры от исто́чника приснотеку́щаго.

Пріими́ отъ на́съ пѣ́снь исхо́дную, Ма́ти жива́го Бо́га, и свѣтоно́сною Твое́ю и Боже́ственною осени́ благода́тію, христолюби́вымъ лю́демъ — ми́ръ, оставле́ніе — пою́щимъ и душа́мъ спасе́ніе подаю́щи.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Многопѣ́сненно слику́имъ и досто́йно Али́пія почти́мъ, вознесе́мъ Боже́ственный свѣти́льникъ я́вѣ, да свѣ́титъ всѣ́мъ сла́дость преди́внаго житія́, возвы́симъ небе́сный кри́нъ, по́стническую воню́ на́мъ преизря́дно благоуха́ющъ.

Огнезра́чному престо́лу, съ ли́ки по́стниковъ ны́нѣ предстоя́й, не преста́й моли́тися о на́съ ко Спа́су, Али́піе о́тче, изря́дная похвало́, небе́сныхъ сожи́телю, до́льныя не оставля́й, да тебе́ пѣ́сненно возвели́чимъ.

Лико́мъ Ангельскимъ ревну́я, о́бразъ а́нгельскій ю́нъ сы́й воспрія́лъ, на земли́ же Ангельски пожи́въ преди́вно, престо́лу Влады́чню со Ангелы ны́нѣ предстои́тъ. Тѣ́мже къ Али́пію съ вѣ́рою припаде́мъ, прося́ще о на́съ моли́тися непреста́нно.

Богоро́диченъ: Изъ Тебе́, Отрокови́це, произы́де неизрече́нно безсѣ́менно Госпо́дь, Иже Тя́ засту́пницу яви́ на́мъ ди́вну, благу́ю наде́жду, помо́щницу на враги́. Тѣ́мже у́бо предста́тельствуй ми́лостивому Царю́ за вопію́щія къ Тебѣ́ вы́ну.

Свѣти́ленъ. Подо́бенъ: Не́бо звѣзда́ми.

Отче блаже́нне, земноро́дныхъ похвало́ и небе́сныхъ совсе́льниче, преди́вно возсія́вый, Содѣ́теля всѣ́хъ за чту́щія тя́ моли́.

Сла́ва, и ны́нѣ, пра́здника. Подо́бенъ: Ученико́мъ зря́щимъ.

Отъ земли́ на небеса́ преста́вльшися, Твоего́ наслѣ́дія, Чи́стая, не оста́ви: ски́птры ца́рствія утверди́, язы́ки укроти́, и проле́й ми́ръ въ концы́ мíра.

На хвали́техъ, стихи́ры на 6. Пра́здника 3, подо́бенъ: Тридне́венъ.

Глаго́ломъ Боже́ственнаго Гавріи́ла послѣ́дующе,* ра́дуйся, Тебѣ́ зове́мъ, Чи́стая.* Ты́ у́бо Пресвята́я и Ма́ти Госпо́дня,* къ Сему́ преста́вльшися,* помина́й о воспѣва́ющихъ Тя́.

Неизмѣ́рная Прему́дрость Бо́жія,* хра́мъ Себѣ́ па́че ума́, Богоро́дице, созда́* изъ Тебе́ Ду́хомъ Святы́мъ,* и ны́нѣ Тя́ къ невеще́ственнымъ селе́ніемъ* преста́ви, Всепѣ́тая.

Ра́бъ, ны́нѣ прихожду́ къ Тебѣ́,* Ма́тери всѣ́хъ Бо́га,* отъ вся́ческихъ изба́витися напа́стей моля́ся.* Но, о Богороди́тельнице,* ца́рствующи съ Сы́номъ Твои́мъ,* христіа́нскій ро́дъ сохраня́й.

И преподо́бнаго 3, гла́съ 8, подо́бенъ: О, пресла́внаго чудесе́!

О, пресла́внаго чудесе́!* Подража́тель Христу́* Али́пій преди́вный,* ша́ры пріе́мъ, прокаже́нна помазу́етъ,* безъобра́зіе зра́ка украша́я,* и ко іере́емъ сего́ посыла́етъ,* та́мо умы́тися повелева́я,* тѣ́мже и повеле́нная испо́лнивъ,* а́біе прія́тъ исцѣле́ніе.

О, пресла́внаго чудесе́!* Дски́ бѣ́лы и гла́дки* въ о́бразы красны́* Бо́жіимъ смотре́ніемъ претвори́шася,* да Али́пія яви́тся незло́біе,* отъ лука́выхъ собра́тій оклевета́нна,* а́ки лѣня́шася и сребролю́бца.* О, Твоего́ смотре́нія, Спа́се,* ди́внаго и благоутро́бнаго.

О, пресла́внаго чудесе́!* Се́ Ангелъ, пло́ти не имы́й,* ко а́нгелу отъ пло́ти отходя́щу,* подо́біемъ пло́ти прихо́дитъ,* и слу́житъ тому́ усе́рдно,* а́ки учени́къ вопроша́я.* Его́ же и ду́шу пріе́мъ,* приведе́ къ Влады́цѣ живота́* и Нача́льнику а́нгеловъ.

Сла́ва, гла́съ 4:

Пресла́вный уго́дниче Христо́въ, оби́тели Пече́рскія изя́щный украси́телю и преди́вное украше́ніе, ны́нѣ Влады́цѣ и Иконотво́рцу нача́льному предстоя́й, не преста́й моли́тися о на́съ прилѣ́жно, да въ на́съ о́бразъ Сво́й, грѣхми́ оскверне́нный, обнови́тъ благоутро́біемъ Свои́мъ, къ трудолю́бному подвиза́я добродѣ́ланію.

И ны́нѣ, пра́здника, гла́съ 3:

Пріиди́те, вси́ концы́ земнíи, честно́е преставле́ніе Богома́тере восхва́лимъ, въ ру́цѣ бо Сы́на ду́шу непоро́чную положи́. Тѣ́мже святы́мъ успе́ніемъ Ея́ мíръ оживотвори́ся, во псалмѣ́хъ, и пѣ́ніихъ, и пѣ́снехъ духо́вныхъ, со безпло́тными и апо́столы пра́зднуетъ свѣ́тло.

Славосло́віе вели́кое.
Тропа́рь преподо́бнаго: Зра́ки изобразу́я...
Сла́ва, и ны́нѣ, пра́здника: Въ рождествѣ́ дѣ́вство..., и про́чее.



НА ЛИТУРГІИ:

Блаже́нна пра́здника пѣ́снь 3-я, на 4, и преподо́бнаго пѣ́снь 6-я, на 4. Проки́менъ, пра́здника, пѣ́снь Богоро́дицы, гла́съ 3: Вели́читъ душа́ моя́ Го́спода, и возра́довася ду́хъ Мо́й о Бо́зѣ Спа́се Мое́мъ. Сти́хъ: Яко призрѣ́ на смире́ніе рабы́ Свое́я, се́ бо отъ ны́нѣ ублажа́тъ Мя́ вси́ ро́ди. И преподо́бнаго, гла́съ 7: Честна́ предъ Го́сподемъ сме́рть преподо́бныхъ его́. Апо́столъ, преподо́бнаго, къ Гала́томъ, зача́ло 213. Аллилу́ія, пра́здника, гла́съ 2: Воскресни́, Го́споди, въ поко́й Тво́й, Ты́ и Киво́тъ святы́ни Твоея́. Сти́хъ: Кля́тся Госпо́дь Дави́ду и́стиною, и не отве́ржется ея́. И преподо́бнаго, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Ева́нгеліе отъ Луки́, зача́ло 24. Прича́стенъ пра́здника: Ча́шу спасе́нія пріиму́, и и́мя Госпо́дне призову́. И преподо́бнаго: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Источникъ: Слу́жба преподо́бному Алѵ́пію, иконопи́сцу Пече́рскому. — Jordanville: Тѵпогра́фія Преп. Іова Поча́евскаго, 2003. — 40 c.

/ Къ оглавленію раздѣла /


Наверхъ / Къ титульной страницѣ

0