Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа, въ 17-й де́нь.
Слу́жба преподо́бному отцу́ на́шему Али́пію иконопи́сцу, Пече́рскому.

ВЕЧЕРЪ,
На Го́споди воззва́хъ, стихи́ры, гла́съ 4. Подо́бенъ: Зва́нный свы́ше.

Зри́тель лица́ Бо́жія хотя́ бы́ти,* поста́вилъ еси́ во умѣ́ свое́мъ, о́тче,* вы́ну зрѣ́ти сладча́йшій о́бразъ Іису́совъ;* тѣ́мъ положи́въ ка́мень послѣ́дняго смире́нія,* поте́ръ ва́пы безпреста́нныхъ моли́твъ,* раствори́въ ты́я сле́зными пото́ки,* написа́лъ еси́ на се́рдцѣ пло́тяномъ* видѣ́ніе неви́димыя сла́вы Пресвяты́я Тро́ицы,* Ейже ны́нѣ предстоя́,* моли́ о на́съ, свя́те,* улучи́ти ми́лость,* и лица́ Бо́жія сла́дкое видѣ́ніе.

Напису́я зра́ки святы́хъ,* неопи́санныя сла́вы Бо́жія* жела́ніемъ распали́вся,* напи́совалъ еси́ ша́рами благи́хъ дѣя́ній* на скрижа́лѣхъ се́рдца своего́,* зра́къ непреста́нныя любве́ къ Пречи́стой Богома́тери,* Ейже худо́жествомъ твои́мъ послужи́въ,* чудотвори́выя благода́ти сподо́блься,* прія́лъ еси́ мзду́ безконе́чнаго воздая́нія;* и ны́нѣ, со а́нгелы водворя́яся,* моли́ о на́съ, преподо́бне,* умири́ти мíръ и спасти́ ду́ши на́ша.

Сла́ва, гла́съ 8:

Образъ человѣ́ческій иногда́ ле́стію вкуше́нія змíй вселука́вый обезсла́вивый, ны́нѣ тебѣ́, о́тче, благода́ть отъ Бо́га пріе́мшу, испо́лнися сту́да, не стерпѣ́ бо на ико́ны твоего́ худо́жества взира́ти, я́же чудотво́рными луча́ми тму́ разгоня́ютъ, и подаю́тъ всѣ́мъ притека́ющимъ съ вѣ́рою исцѣле́нія да́ры; си́хъ и на́съ прича́стники сотвори́, въ дне́шній де́нь па́мять твою́ соверша́ющихъ, Али́піе му́дре.

И ны́нѣ, пра́здника.

На стихо́внѣ, стихи́ры пра́зднику. Сла́ва, гла́съ 4:

Мы́сленное начерта́ніе души́ своея́ имы́й свѣ́тло, преподо́бне о́тче на́шъ Али́піе, свѣ́тлыя благода́ти и чу́вственнѣ сподо́бился еси́, ю́же изъявля́ше ико́нъ твои́хъ написа́ніе и тре́бующимъ въ неду́зѣхъ исцѣле́нія подая́ніе. Тѣ́мъ мо́лимъ тя́, всеблаже́нне, безобра́зіе ду́шъ на́шихъ добродѣ́тельми испра́ви, и стра́стныя стру́пы на́ша ша́рами моли́твъ твои́хъ исцѣли́, я́коже прокаже́ннаго иногда́, да сла́вимъ тя́ хвала́ми, преподо́бнымъ украше́ніе.

И ны́нѣ, пра́здника.

Тропа́рь, гла́съ 8:

Зра́ки изобразу́я святы́хъ на дщи́цахъ, си́хъ благодѣя́нія спѣ́шно, я́ко иску́сенъ худо́жникъ, всехва́льне Али́піе, напи́совалъ еси́ на скрижа́лѣхъ твоего́ се́рдца, и сего́ ра́ди а́ки о́бразъ боголѣ́пнѣ укра́шенъ, свяще́нства благода́тію а́ки зла́томъ обложи́лся еси́ отъ Христа́ Бо́га и Спа́са ду́шъ на́шихъ.

Сла́ва, и ны́нѣ, пра́здника, [гла́съ 1-й:

Въ рождествѣ́ дѣ́вство сохрани́ла еси́, во успе́ніи мíра не оста́вила еси́, Богоро́дице, преста́вилася еси́ къ животу́, Ма́ти су́щи Живота́, и моли́твами Твои́ми избавля́еши отъ сме́рти ду́ши на́ша.]


НА УТРЕНИ:
[На Бо́гъ Госпо́дь, тропа́рь пра́здника: Въ рождествѣ́..., два́жды.
Сла́ва, свято́му: Зра́ки изобразу́я... И ны́нѣ, пра́здника: Въ рождествѣ́...]

Кано́нъ пра́зднику и преподо́бному, гла́съ 8.
Пѣ́снь 1.

Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, Еди́ному Влады́цѣ.

Пѣ́снь возсла́ти пода́ждь, Христе́, по́мощь свы́ше рабо́мъ Твои́мъ, да принесе́мъ отъ те́плыя любве́ хвале́ніе, въ па́мяти уго́дника Твоего́, Тебѣ́, Еди́ному Влады́цѣ.

Благода́ти умно́жившейся, процвѣта́ше вѣ́ра, и умножа́шеся по́лкъ преподо́бныхъ на горѣ́ Пече́рской, и́мже соо́бщникъ въ житіи́ хотя́ бы́ти преподо́бный, пріи́де послужи́ти Еди́ному Христу́ и Влады́цѣ.

Отъ ю́ности твоея́, вда́лся еси́ роди́тельми свои́ми, преподо́бне, въ науче́ніе ико́ннаго писа́нія, ему́же усе́рдно прилѣжа́, напи́совалъ еси́ въ се́рдцѣ свое́мъ цѣлому́дріе и чистоту́, я́ко отъ обои́хъ бы́лъ еси́ ра́бъ своему́ Влады́цѣ.

Чу́дное твое́ послуша́ніе ди́внаго тя́ чудесе́ зри́теля показа́, о́тче, ви́дѣлъ бо еси́ о́бразъ Влады́чицы, изображе́нъ нерукотворе́ннѣ, и, отъ сего́ видѣ́нія бо́льшею любо́вію къ богомы́слію разгорѣ́вся, се́рдце свое́ уготовля́лъ еси́, а́ки скрижа́ль, къ написа́нію па́мяти о Христѣ́ Влады́цѣ.

Богоро́диченъ: Скрижа́ль, иму́щая Ду́хомъ Святы́мъ напи́санный несказа́нно о́бразъ ѵпоста́си Отчія, мое́ злообра́зіе, Ма́ти Дѣ́во, во благообра́зіе благи́хъ дѣя́ній претвори́, да отъ ны́нѣ угото́влюся послужи́ти Христу́, Бо́гу моему́ и Влады́цѣ.

Пѣ́снь 3.

Ирмо́съ: Нѣ́сть свя́тъ, я́ко Госпо́дь, и нѣ́сть пра́веденъ, я́ко Бо́гъ на́шъ, Его́же пое́тъ вся́ тва́рь: нѣ́сть пра́веденъ, па́че Тебе́, Го́споди.

Нѣ́сть Тебѣ́ подо́бенъ въ бозѣ́хъ, Христе́, дѣ́йствомъ бо Твоего́ Пресвята́го Ду́ха изобрази́лъ еси́ ико́ну Ма́тере Твоея́ нерукотворе́ннѣ, и бы́сть чу́до ве́ліе, ему́же самови́децъ бѣ́ преподо́бный Тво́й, Го́споди.

Иже чудеса́ дѣ́йствоваше, То́йжде излетѣ́ отъ у́стъ ико́ны нерукотворе́нныя во о́бразѣ голуби́номъ, Его́же ви́дѣвъ облета́юща вну́трь це́ркве, преподо́бный Тво́й, Христе́, вся́ презрѣ́, и ничто́же въ мíрѣ се́мъ возлюби́, па́че Тебе́, Го́споди.

Образъ сла́вы Бо́жія ви́дѣвъ, преподо́бне, а́біе измѣни́лъ еси́ мірскíй о́бразъ, бы́въ чернори́зецъ, до́брѣ напису́я добродѣ́тели изображе́ніе, е́же и на́мъ вообрази́ те́плыми моли́твами твои́ми.

Отъ ико́ннаго худо́жества своего́, о́тче, навы́клъ еси́ духо́вныя дѣ́тели вообража́ти, до́брѣ бо убѣли́въ сви́токъ се́рдца своего́ сле́зными пото́ки, написа́лъ еси́ па́мяти о Бо́зѣ помышле́ніе.

Богоро́диченъ: Ра́дуйся, сви́тче, Богоневѣ́стная Дѣ́во, на не́мже пе́рстомъ Бо́жіимъ написа́ся Отчее Сло́во, напиши́ на сви́тцѣ се́рдца моего́ па́мять Стра́шнаго Суда́, и гряду́щими муче́ніи удержи́ е́ отъ злы́хъ, молю́ся.

Сѣда́ленъ, гла́съ 4:

Бо́жія сла́вы зри́теля и ико́ннаго дѣ́лателя прему́дра, кто́ съ на́ми пѣ́сньми тя́ не восхва́литъ, преподо́бне, ви́дѣлъ бо еси́ отъ ча́сти чу́вственнѣ Свята́го Ду́ха, — ны́нѣ же, предстоя́ Вы́шняго престо́лу, не зерца́ломъ, но лице́мъ къ лицу́ присносу́щную зри́ши сла́ву Бо́жію, ея́же и мы́ да причасти́мся, о́тче Али́піе, моли́твами твои́ми.

Сла́ва, и ны́нѣ, богоро́диченъ:

Предста́тельнице Святѣ́й Тро́ицѣ, предста́ни на́мъ ско́ро, въ дне́шній де́нь собра́вшимся въ хра́мѣ Твое́мъ пречестно́мъ, и да́ждь сла́ву преподо́бныхъ Твои́хъ зрѣ́ти сла́вящимъ Тя́, Дѣ́во, моли́твами Твои́ми.

Пѣ́снь 4.

Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися, богови́дно усмотри́, и со стра́хомъ славосло́вяше си́лу Твою́.

Изъ горы́ призва́лъ еси́ въ слѣ́дъ Тебе́ тещи́ преподо́бнаго Твоего́, Христе́, то́йже, мірскíя молвы́ отве́ргся, все́ю душе́ю приложи́ся Тебѣ́, и во умѣ́ изобража́ше при́сно си́лу Твою́.

Яко свѣ́тлая звѣзда́, возсія́лъ еси́, о́тче, на горѣ́ Пече́рской, добродѣ́тели бо отъ тебе́, я́ко лучи́, простро́шася, блаже́нне, и освѣща́ютъ дне́сь тя́ велича́ющихъ, тѣ́мже и мы́ прославля́емъ благода́ть твою́.

Не мзды́ ра́ди, но ре́вностію дви́жимь, прилѣжа́лъ еси́ дѣ́лу своему́, и отъ сего́ во благолѣ́піе неща́дно раздава́лъ еси́ це́рквамъ Бо́жіимъ, я́ко да вси́, зря́ще на ико́ны твоя́, въ любо́вь Бо́жію сердца́ своя́ обраща́ютъ.

До́бръ дѣ́латель яви́лся еси́, блаже́нне, виногра́да Христо́ва, я́ко сво́йственно тебѣ́ со апо́столомъ глаго́лати: не ту́нѣ хлѣ́бъ ядо́хъ, и́бо ру́цѣ мои́ мнѣ́ и инѣ́мъ послужи́стѣ. Тѣ́мже прія́лъ еси́ отъ Бо́га дина́ръ, и съ благи́ми рабы́ сла́ву присносу́щную зри́ши.

Богоро́диченъ: Отъ чи́стаго сокро́вища чре́ва Твоего́ Дина́ръ яви́вшая мíру, искупи́ла еси́ тѣ́мъ всѣ́хъ отъ перво́роднаго до́лга, Ма́ти Бо́жія, къ Тебѣ́ прибѣга́ю, искупи́ мя отъ мы́сленныхъ заимода́вцовъ, да при́сно сла́влю бла́гость Твою́.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Утренюющихъ славосло́віемъ къ тебѣ́ отъ уны́нія возста́ви, о́тче, и отъ мра́чныхъ дѣ́лъ къ свѣ́ту богоразу́мія моли́твами твои́ми возведи́ умы́ на́ша, ско́раго бо тебе́ на по́мощь поспѣ́шника зна́емъ.

Отъ дѣ́ла руку́ твое́ю, о́тче, въ че́сть Еди́наго Бо́га, въ трича́стное отлуча́лъ еси́ раздѣле́ніе: ико́нному тре́бованію, въ монасты́рское дѣ́ланіе и въ ми́лостыню ни́щимъ, и си́мъ стяжа́лъ еси́ лу́чшее, присножела́емое рая́ селе́ніе.

День ручны́мъ дѣ́ланіемъ, но́щь же бдѣ́ніемъ, моли́твою и поклоне́ніемъ провожда́лъ еси́ всегда́, блаже́нне, и та́ко, возложи́въ ру́ку на ра́ло, упра́вленъ бы́лъ еси́ въ Ца́рство Бо́жіе. Та́мо помяни́ и на́съ хода́тайствомъ твои́мъ къ Бо́гу.

Возсія́ со́лнце и ви́дѣ твоя́ труды́, свя́те, и́бо смире́ніе, нестяжа́ніе, чистоту́, терпѣ́ніе, по́стъ любо́вію ко всѣ́мъ растворя́лъ еси́, и си́мъ восхожде́ніемъ возше́лъ еси́ на высоту́ богомы́слія, и небе́снаго дарова́нія сподо́бился.

Богоро́диченъ: Утро мы́сленное, произве́дшая въ мíръ вели́кое Со́лнце, озари́ на́шъ у́мъ и се́рдце, и сы́ны Свѣ́ту покажи́ ны, мо́лимтися, Безневѣ́стная Дѣ́во, Ты́ бо еси́ просвѣще́ніе и упова́ніе на́ше.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Ри́зу а́нгельскаго о́браза украси́въ ша́рами и́ноческихъ трудо́въ, возше́лъ еси́ на высо́кій степе́нь свяще́нства, совѣ́томъ наста́вника своего́, и на то́мъ стоя́ а́ки свѣти́ло, свѣ́томъ твои́хъ дѣ́лъ мно́гихъ просвѣти́лъ еси́.

Ри́зу креще́нія окаля́вшему мнѣ́ грѣха́ ка́ломъ, да́ждь умиле́ніе, свя́те, моли́твами твои́ми, да въ не́мъ исперу́ и чи́стъ явлю́ся лицу́ Бо́жію: се́ бо предстою́, пѣсносло́вя хвалу́ Твою́ бре́нными устна́ми.

Оде́жду свяще́нства пріе́мь, по подо́бію Вели́каго Архіере́я, Сы́на Бо́жія, вше́лъ еси́, о́тче, во вну́тренняя завѣ́сы, приноси́ти же́ртву Поже́ршемуся за грѣ́хъ всего́ мíра, твои́ми моли́твами ны́нѣ, а́ки же́ртвою, и о на́съ, свя́те, Творца́ уми́лостиви.

Одѣ́янъ сы́й оде́ждою свяще́нства, бо́льшихъ дарова́ній сподо́бился еси́, я́ко и одѣ́янныхъ прокаже́ніемъ моли́твами твои́ми исцѣля́лъ еси́, и на́съ, мы́сленнѣ неду́гующихъ, си́ми исцѣли́, мо́лимтися, преблаже́нне.

Богоро́диченъ: Уязви́вшихъ на́съ грѣхолю́бія стрѣло́ю, уязви́, Пречи́стая Дѣ́во, и побѣ́гнутъ, студо́мъ пораже́нни, де́монскія полки́, Ты́ бо еси́ бѣсо́мъ стру́пъ неисцѣ́льный.

Конда́къ, гла́съ 2:

Отъ ю́ности Боже́ственное въ себѣ́ имѣ́я начерта́ніе, вда́нъ бы́лъ еси́ въ науче́ніе ико́ннаго писа́нія; и внегда́ небеси́ подо́бная Богоро́дицы писа́шеся це́рковь, ты́ та́можде посо́бствовалъ, и ви́дѣлъ еси́ Ду́ха Свята́го осія́ніе, отъ Него́же прія́лъ еси́ чуде́съ дѣ́йство, я́ко ико́ны твоя́ чудотворя́ху, тѣ́мъ тя́ чте́мъ и ублажа́емъ, чу́дне Али́піе.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно, и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Дѣ́тски игра́юща сумнѣ́ніемъ въ вѣ́рѣ, пра́ведно ка́знь Бо́жія пости́же: покры́ бо прока́за лице́ его́, сего́ ты́, о́тче, исцѣли́лъ еси́, и отъи́де, поя́: благослове́нъ Бо́гъ оте́цъ на́шихъ.

Исповѣ́давшему грѣ́хъ невѣ́рствія своего́, пе́рвѣе приложи́лъ еси́, блаже́нне, покая́нія пла́стырь, и, души́ исцѣлѣ́вшей, исцѣлѣ́ и лице́ пома́заніемъ ва́пъ твои́хъ, и то́й о тебѣ́ воспѣтъ́: благослове́нъ Бо́гъ оте́цъ на́шихъ.

Иже пе́рвѣе обоня́нія грѣхо́мъ острупи́вся, по совѣ́ту діа́волю отча́яся спасе́нія наде́жды. Се́ то́й па́ки, твои́мъ, свя́те, уче́ніемъ къ Бо́гу обрати́вся, исцѣле́нъ бы́сть, и избы́въ обои́хъ струпо́въ, воззва́: благослове́нъ Бо́гъ оте́цъ на́шихъ.

Твои́мъ, преподо́бне, дивя́щеся чудесе́мъ мно́гимъ, взыва́емъ согла́сно: ра́дуйся, Елисе́е но́вый, невѣ́рующаго исцѣли́вый отъ прока́зы, я́ко Неема́на, и о тебѣ́ пѣ́снь о́троческую воспѣ́тъ: благослове́нъ Бо́гъ оте́цъ на́шихъ.

Богоро́диченъ: Безобра́зіе души́ моея́ кто́ испра́витъ, а́ще не Ты́, Ма́ти Бо́жія, ша́рами бла́гости Твоея́ тоя́ лице́ въ благообра́зіе претвори́ши? И благолѣ́піе пріе́мъ, воспою́: ра́дуйся, Образу́ющая живописа́тельнѣ человѣ́ческій о́бразъ.

Пѣ́снь 8.

Ирмо́съ: На горѣ́ святѣ́й просла́вльшася, и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Яви́ тя, о́тче, всѣ́хъ Созда́тель на горѣ́ Пече́рской доброцвѣту́щее ко исцѣле́нію дре́во, плода́ми бо твои́хъ моли́твъ всѣ́мъ къ тебѣ́ приходя́щимъ подава́лъ еси́ исцѣле́ніе неоску́дно, и отхожда́ху здра́вы, превознося́ще Го́спода во вѣ́ки.

Незло́біе се́рдца твоего́ не лиши́ тя, преподо́бне, вели́кихъ дарова́ній, никогда́же бо огорчи́лся еси́ на оскорбля́ющихъ тя́, ниже́ возда́лъ еси́ зло́ за зло́, тѣ́мъ и просла́ви тя́ Христо́съ здѣ́ и та́мо во вѣ́ки.

Сребролю́бія омраче́нніи тмо́ю облича́ху тя́ предъ человѣ́ки, но Бо́гъ изведе́, я́ко свѣ́тъ, пра́вду твою́ и незло́біе твое́, я́ко полу́дне, ископа́вшіи же тебѣ́ я́му впадо́ша въ ню́, и сту́дъ и́хъ помина́ютъ вси́ во вѣ́ки.

Тро́иченъ: Седми́ дарова́ніи дѣ́йствуяй въ Тро́ицѣ Еди́ный Бо́же, изобрази́тися седми́мъ ико́намъ повелѣ́лъ еси́ нерукотворе́ннѣ, и яви́лъ еси́ преподо́бнаго, иму́щаго се́дмь Паракли́та Твоего́ даро́въ, сія́ и на́мъ пода́ждь, всеще́дрый Царю́, да превозно́симъ Тя́ во вѣ́ки.

Богоро́диченъ: Отъ всѣ́хъ дарова́ній пріе́мшая истка́нную ри́зу, ря́сны златы́ми одѣ́яна предста́ла еси́ Тро́ицѣ Живонача́льнѣй. Ста́ни у́бо, воздѣ́вши пречи́стеи ру́цѣ Твои́, и о на́съ, благотворе́нія обнаже́нныхъ, помоли́ся, Ты́ бо еси́, Пренепоро́чная, покрыва́ющая грѣхи́ на́ша.

Пѣ́снь 9.

Ирмо́съ: Тя́, неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вомъ вои́стинну Бо́га, вы́шшую пречи́стыхъ Си́лъ, немо́лчными славословле́ніи велича́емъ.

Тя́, о́тче, прославля́ющаго, просла́ви Бо́гъ, я́ко твоего́ писа́нія ико́намъ никогда́же о́гнь одолѣва́ше, но пребыва́ху цѣ́лы отъ пожа́ра невреди́мы, я́же чудодѣ́ющія ви́дяще, о тебѣ́ немо́лчно славословле́ніи Христа́ велича́емъ.

Отвсю́ду стека́хуся лю́діе ви́дѣти пресла́вное чу́до, я́ко вся́ ина́я пояде́ пла́мень о́гненный, твоего́же писа́нія ико́нъ, ника́коже вреди́. Еже и мы́, слы́шаще чудодѣ́йствующаго въ тебѣ́ Бо́га, славословле́ніи велича́емъ.

Храни́лъ еси́ незло́біе и ви́дѣлъ еси́ правоту́, житіе́ свое́ провожда́я во вся́кой святы́ни, тѣ́мже отвсю́ду Бо́гъ тя́ прославля́ше, и изыма́ше отъ вся́кія напа́сти; сея́ и на́съ изба́ви твои́ми моли́твами, свя́те, да вы́ну тя́ пѣ́сньми велича́емъ.

Ра́дуется гра́дъ Росто́въ, содержа́й ико́ну, ма́ніемъ Бо́жіимъ напи́санну, и я́ко многоцѣ́ннымъ сокро́вищемъ искупу́ется отъ всѣ́хъ страсте́й, ю́же лобыза́юще, помина́етъ, коли́ко Бо́гъ дѣ́йствоваше тобо́ю, блаже́нне. Сіе́ чудодѣ́йствіе и мы́ дне́сь чту́ще, удивля́емся и славословле́ніи велича́емъ.

Богоро́диченъ: Сто́лпъ крѣ́пости иму́ще Тя́, раби́ Твои́, Богоро́дице Дѣ́во, отъ лица́ вра́гъ на́шихъ гони́ми, къ Тебѣ́ прибѣга́емъ, и припа́дающе, мо́лимся: сохраня́й на́съ, въ бѣда́хъ су́щихъ, Ты́ бо еси́ сто́лпъ на́мъ крѣ́покъ отъ лица́ вра́жія и стѣна́ необори́ма.

Свѣти́ленъ:

При́сно храня́й тя́, преподо́бне, въ ско́рбехъ, пріи́де за тя́ предъ лице́мъ твои́мъ, Богома́тере ико́ну написа́ти, ю́же въ три́ часа́ изобрази́въ свѣ́тло, даде́ во благолѣ́піе пречи́стому хра́му на пра́здникъ, тебе́ же поя́тъ во хра́мъ Го́рній съ су́щими отъ вѣ́ка святы́ми пра́здновати, идѣ́же ны́нѣ гла́сомъ ра́дости пра́зднуяй, помяни́ и на́съ, Али́піе, о́тче блаже́ннѣйшій.

Сла́ва, и ны́нѣ, богоро́диченъ:

Хра́мъ су́щи, Вы́шняго десни́цею созда́нный, хра́мъ души́ моея́, грѣхо́мъ па́дшій, возста́ви, Ма́ти Бо́жія, обнови́ Твои́мъ посѣще́ніемъ, и да́ждь безъ лѣ́ности сла́ву Тебѣ́ принося́щимъ, непреста́нно Тебѣ́ воспѣ́ти: ра́дуйся, Хра́мѣ Госпо́день, въ прибѣ́жище христіа́номъ со́зданный.

На хвали́техъ стихи́ры, гла́съ 4. Подо́бенъ: Яко до́бля.

Дави́дски дне́сь, лю́діе, воспое́мъ,* въ па́мяти твое́й, о́тче всеблаже́нне:* насажде́нъ бы́лъ еси́ въ дому́ Госпо́дни,* и процвѣ́лъ еси́ во дворѣ́ Богома́тере,* я́ко благово́нное дре́во,* отъ него́же плоды́ пріе́млюще исцѣле́ній,* прославля́емъ просла́вльшаго тя́ Бо́га на́шего,* и мо́лимся прилѣ́жно,* улучи́ти ми́лость твои́мъ хода́тайствомъ, и душе́внымъ страсте́мъ исцѣле́ніе.

Пра́ведникъ, я́ко фи́никсъ, процвѣте́тъ;* на тебѣ́, о́тче на́шъ Али́піе, сіе́ исло́лнися,* при исхо́дищи бо воды́ живы́я,* богоно́сныхъ оте́цъ уче́нія,* израсто́ша вѣ́тви твои́хъ исправле́ній,* на и́хже сѣ́нь взира́юще,* къ ра́цѣ моще́й твои́хъ притека́емъ,* и любо́вію объе́млюще, мо́лимся:* пода́ждь, свя́те, твои́ми моли́твами ми́ръ отъ Христа́ улучи́ти, и житію́ исправле́ніе.

Кто́ по достоя́нію похвали́ти возмо́жетъ* труды́ и по́двиги твоя́, преподо́бне?* Не да́лъ бо еси́ сна́ свои́ма очи́ма,* ни вѣ́ждома дрема́нія,* до́ндеже ду́шу свою́* ва́пами украси́лъ еси́ добродѣ́телей,* сообра́зну напису́я отце́мъ первонача́льнымъ,* и́хже житія́ ре́вность и въ па́мяти на́шей напиши́,* мо́лимся прилѣ́жно,* да не лиши́мся и мы́* небе́сныхъ съ тѣ́ми пребыва́ній.

Сла́ва, гла́съ 8:

Образъ сла́вы Бо́жія во умѣ́ свое́мъ имѣ́я вы́ну, напи́совалъ еси́ въ души́ свое́й ре́вность, непреста́нно о́бразомъ ше́ствовати оте́цъ на́шихъ первонача́льныхъ, и́хже житію́ послѣ́дуя, въ ме́ртвенномъ тѣ́лѣ безпло́тнымъ во святы́ни уподо́бился еси́; съ ни́миже ны́нѣ Вы́шняго престо́лу предстоя́, моли́ся, о́тче преподо́бне, пода́тися оби́тели на́шей единомы́слію, я́ко чту́щей любо́вію святу́ю па́мять твою́.

И ны́нѣ, пра́здника.

Славосло́віе вели́кое, ектеніи́, и отпу́стъ.



[НА ЛИТУРГІИ,

Блаже́нна пра́здника пѣ́снь 3-я, на 4, и преподо́бнаго пѣ́снь 6-я, на 4. Проки́менъ, пра́здника, пѣ́снь Богоро́дицы, гла́съ 3: Вели́читъ душа́ моя́ Го́спода, и возра́довася ду́хъ Мо́й о Бо́зѣ Спа́се Мое́мъ. Сти́хъ: Яко призрѣ́ на смире́ніе рабы́ Свое́я, се́ бо отъ ны́нѣ ублажа́тъ Мя́ вси́ ро́ди. И преподо́бнаго, гла́съ 7: Честна́ предъ Го́сподемъ сме́рть преподо́бныхъ его́. Апо́столъ, преподо́бнаго, къ Гала́томъ, зача́ло 213. Аллилу́ія, пра́здника, гла́съ 2: Воскресни́, Го́споди, въ поко́й Тво́й, Ты́ и Киво́тъ святы́ни Твоея́. Сти́хъ: Кля́тся Госпо́дь Дави́ду и́стиною, и не отве́ржется ея́. И преподо́бнаго, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Ева́нгеліе отъ Луки́, зача́ло 24. Прича́стенъ пра́здника: Ча́шу спасе́нія пріиму́, и и́мя Госпо́дне призову́. И преподо́бнаго: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 129-133.

/ Къ оглавленію раздѣла /


Наверхъ / Къ титульной страницѣ

0