Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 17-й де́нь.
Свята́го му́ченика Ми́рона.

[ВЕЧЕРЪ,]
На Го́споди воззва́хъ: стихи́ры пра́здника, гла́съ 4. Подо́бенъ: Зва́нный свы́ше.

Свѣ́та чистѣ́йшаго прія́телища,* свѣти́льницы, разо́ршіи но́щь многобо́жную,* Спа́совы апо́столи,* о́блакъ Боже́ственный,* изъ него́ же незаходи́мый Свѣ́тъ возсія́,* егда́ ду́хомъ преста́влену Тя́ отъ мірски́хъ,* увѣ́дѣша, Благослове́нная,* къ премíрнѣй ра́дости* о́блакомъ преидо́ша,* исхо́дными пѣ́сньми Тя́ проводи́вше* ко гро́бу живоно́сному,* Богоро́дице, упова́ніе на́ше.

Да пра́зднуетъ тва́рь моле́бно:* всѣ́хъ Цари́ца* къ Ца́рству мы́сленному пре́йде,* сца́рствовати Ца́рствующему* все́ю тва́рію.* Ея́же ра́ди разруши́ся а́дово ца́рство,* и мы́ отъ земли́ вознесо́хомся,* и со Ангелы жи́ти сподо́бихомся.* Ея́же успе́ніемъ собра́ся мы́сленное естество́ все́,* патріа́рси, проро́цы* и съ му́ченики апо́столи.

Стихи́ры свята́го, гла́съ 2. Подо́бенъ: Егда́ отъ дре́ва.

Егда́ безбо́жное разжже́ніе* вся́ку попаля́ше страну́, преблаже́нне,* тогда́ разжже́ся теплото́ю Ду́ха,* отъ Дѣ́вы Богоотрокови́цы* проповѣ́далъ еси́ Сло́ва, въ пло́ть обле́кшася за бла́гость.* Тѣ́мъ и огня́ и му́къ претерпѣ́лъ еси́ лю́тая томле́нія,* си́лою укрѣпля́емь благода́ти.

Егда́ злоимени́тый вра́гъ тща́шеся* ласка́ньми укра́сти твою́ мы́сль,* тогда́, му́жествомъ удобря́емь,* сопроти́вился еси́ тве́рдѣ* и претерпѣ́лъ еси́ болѣ́зни,* къ неболѣ́зненному поко́ю приводя́щія тя́,* му́чениче достохва́льне Ми́роне,* небе́сному Ца́рствію и вѣ́чному наслажде́нію.

Егда́ волу́ями жи́лами тя́ вра́гъ бія́ше,* строга́ніи непреста́нными изнуря́я, му́чениче,* пло́ть твою́ свяще́нную,* ко Христу́ взира́лъ еси́ Подвигополо́жнику,* ру́ку тебѣ́ простира́ющу боже́ственныя си́лы.* Тѣ́мже, сконча́въ тече́ніе,* улучи́лъ еси́ по́чести вели́ки,* Ми́роне, страда́льче предо́блій.

Сла́ва, и ны́нѣ, гла́съ то́йже. Самогла́сенъ:

Яже небе́съ вы́шшая, су́щи, и херуви́мъ сла́внѣйшая, и всея́ тва́ри честнѣ́йша, Яже премно́гія ра́ди чистоты́, Присносу́щнаго существа́ прія́телище бы́вши, въ Сыно́внѣ ру́цѣ дне́сь всесвяту́ю предае́тъ ду́шу, и съ Не́ю исполня́ются вся́ческая ра́дости, и на́мъ да́руетъ ве́лію ми́лость.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Пѣ́сньми Твое́ честно́е* и богопрія́тное тѣ́ло,* провожда́юще, Боже́ственніи* апо́столи, вопія́ху:* гдѣ́ ны́нѣ отхо́диши, Влады́чице?

Сти́хъ: Воскресни́, Го́споди, въ поко́й Тво́й,* Ты́ и Киво́тъ святы́ни Твоея́.

Пріиди́те, земноро́дніи,* соста́вимъ ли́къ,* исхо́дное вопію́ще* на преставле́ніе Богоро́дицы дне́сь.

Сти́хъ: Кля́тся Госпо́дь Дави́ду и́стиною,* и не отве́ржется ея́.

Земля́ у́бо Твои́мъ погребе́ніемъ* благослови́ся, Дѣ́во,* возду́хъ же восхожде́ніемъ* освяти́ся стра́ннымъ,* зако́номъ уме́рши естества́.

Сла́ва, и ны́нѣ, гла́съ то́йже. Самогла́сенъ:

Всенепоро́чная Невѣ́ста и Ма́ти благоволе́нія Отча, Яже Бо́гу пронарече́нная во Свое́ Ему́ жили́ще, несли́тнаго соедине́нія, дне́сь пречи́стую ду́шу Творцу́ и Бо́гу предае́тъ, ю́же Безпло́тныхъ си́лы боголѣ́пно подъе́млютъ, и къ Животу́ преставля́ется, су́щая Ма́ти Живота́, свѣща́ непристу́пнаго Свѣ́та, спасе́ніе вѣ́рныхъ и упова́ніе ду́шъ на́шихъ.

Тропа́рь пра́здника, гла́съ 1:

Въ рождествѣ́ дѣ́вство сохрани́ла еси́, во успе́ніи мíра не оста́вила еси́, Богоро́дице, преста́вилася еси́ къ животу́, Ма́ти су́щи Живота́, и моли́твами Твои́ми избавля́еши отъ сме́рти ду́ши на́ша.


НА УТРЕНИ,
По 1-й стихоло́гіи сѣда́ленъ, гла́съ 3. Подо́бенъ: Красотѣ́ дѣ́вства.

Въ небе́сная мы́сленная Твоя́ душа́, въ ра́й чи́стое Твое́ тѣ́ло преста́вися, отъ тли́, Пренепоро́чная, въ мѣ́сто свѣ́тло, сего́ ра́ди возда́стъ беззако́ннымъ Госпо́дь, ле́сть бо содѣ́лаша честно́му Твоему́ тѣ́лу. Тѣ́мже со апо́столы вопіе́мъ: ра́дуйся, Благода́тная.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 4. Подо́бенъ: Удиви́ся Іо́сифъ.

Въ ру́цѣ на́съ ра́ди вочеловѣ́чшагося изъ Тебе́, преда́вши ду́шу, я́ко Зижди́телю Твоему́ и Бо́гу, къ жи́зни нетлѣ́ннѣй преста́вилася еси́. Тѣ́мже Тя́ че́стно ублажа́емъ, еди́ну чи́стую и нескве́рную, Богоро́дицу вси́ и́стинно исповѣ́дающе, взыва́емъ: Христа́ моли́, къ Нему́же преста́вилася еси́, спасти́ ду́ши на́ша.

Сла́ва, и ны́нѣ, то́йже.

Кано́нъ пра́здника, со ирмосо́мъ на 8. Ки́ръ Іоа́нна Дамаскина́, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ успе́ніе.

Дѣ́вы отрокови́цы, съ Маріамíею проро́чицею, пѣ́снь исхо́дную ны́нѣ воскли́кните: Дѣ́ва бо и еди́на Богома́ти ко прія́тію небе́сному преставля́ется.

Досто́йно, я́ко одушевле́нное Тя́ Не́бо, прія́ша небе́сная, Пречи́стая, Боже́ственная селе́нія, и предста́, свѣ́тло укра́шена, я́ко Невѣ́ста Всенепоро́чная, Царю́ и Бо́гу.

Кано́нъ свята́го на 4, его́же краегране́сіе: Пою́, Ми́роне, твою́ мѵродохнове́нную благода́ть. Іо́сифъ, гла́съ 2.
Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты Еги́петскія, я́ко просла́вися.

Хвалу́ Бо́гу, въ па́мяти лику́юще страда́льца Ми́рона, дне́сь воспое́мъ, укрѣ́пльшему сего́ держа́ву погуби́ти борца́.

Да́ръ са́мъ себе́ Благодѣ́телю прине́слъ еси́, и свяще́нно возложе́ніе, и добро́ заколе́ніе, и благово́нну же́ртву, зако́нно пострада́въ, му́чениче многострада́льне.

Яко му́дръ, я́ко чи́стъ хра́мъ, сла́вне, отъ Дѣ́вы Возсія́вшаго, устреми́вшагося возмути́ти боже́ственное ста́до душетлѣ́ннаго во́лка отгна́лъ еси́.

Богоро́диченъ: Еди́на Бо́га неискусобра́чно родила́ еси́, Его́же страстоте́рпцы му́ченицы исповѣ́давше, на́мъ уподо́бльшася, упраздни́ша пре́лесть, Чи́стая Влады́чице.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ Боже́ственнѣй па́мяти Твое́й вѣнце́въ сла́вы сподо́би.

Отъ ме́ртвыхъ чре́слъ произве́дшися, естество́мъ подо́бна, Чи́стая, исхожде́ніе разрѣши́, ро́ждши же су́щую Жи́знь, къ жи́зни преста́вися Боже́ственнѣй и Ѵпоста́снѣй.

Ли́къ богосло́вовъ отъ коне́цъ, свы́ше же Ангелъ мно́жества къ Сіо́ну идя́ху, всеси́льнымъ манове́ніемъ, достодо́лжно, Влады́чице, Твоему́ погребе́нію служа́ще.

Инъ.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Возвы́сивъ твое́ жела́ніе серде́чное ко Го́споду, на Кре́стъ возне́сшемуся, вознесе́нъ бы́лъ еси́, пресла́вне, на дре́вѣ стру́жемь, усе́рдно же вопія́: я́ко нѣ́сть пра́веденъ, па́че Тебе́, Го́споди.

Глаго́лъ твои́хъ стрѣла́ми о́стрыми пронзи́лъ еси́ мучи́теля въ се́рдце, до́блій во́ине Царя́ Христа́, всехва́льне, и, поя́, глаго́лалъ еси́: нѣ́сть пра́веденъ, па́че Тебе́, Го́споди.

Яко у́тро, я́ко де́нь, возсія́въ, разори́лъ еси́ мра́къ невѣ́дѣнія, просвѣти́лъ еси́ пою́щія всегда́, Ми́роне многострада́льне: Ты́ еси́ Бо́гъ на́шъ, и нѣ́сть пра́веденъ, па́че Тебе́, Го́споди.

Богоро́диченъ: Неду́гующую безбо́жіемъ тва́рь всю́, Бо́га ро́ждши Исцѣли́теля, Дѣ́во, исцѣли́ла еси́ пресла́вно. Тѣ́мже, благодаря́ще, взыва́емъ Ти́: нѣ́сть пречи́сты, па́че Тебе́, Влады́чице.

Конда́къ свята́го, гла́съ 4. Подо́бенъ: Вознесы́йся.

Измла́да Христа́ возлюби́въ, пресла́вне, и Того́ соблюда́я Боже́ственныя за́повѣди, къ Тому́ прите́клъ еси́ ве́сь цѣ́лъ, Ми́роне всече́стне, и со а́нгелы мо́лишися прилѣ́жно. Проси́ всѣ́мъ почита́ющимъ па́мять твою́ оставле́нія грѣхо́въ.

Сѣда́ленъ, гла́съ 1. Подо́бенъ: Гро́бъ Тво́й, Спа́се.

Огнедохнове́нно показа́лся еси́ благово́ніе, страда́ніемъ обонева́еши на́ша тезоиме́нно сердца́, му́чениковъ украше́ніе и вѣ́рныхъ удобре́ніе. Тѣ́мже, дне́сь всесвяту́ю твою́ па́мять пра́зднующе, освяща́емся вси́ любо́вію, чту́щіи тя́.

Сла́ва, и ны́нѣ, гла́съ и подо́бенъ то́йже:

Всечестны́й ли́къ прему́дрыхъ апо́столъ собра́ся чу́дно, погребсти́ сла́вно тѣ́ло Твое́ пречи́стое, Богоро́дице Всепѣ́тая, съ ни́ми же воспѣ́ша и Ангелъ мно́жество, преставле́ніе Твое́ че́стно хва́ляще, е́же вѣ́рою пра́зднуемъ.

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ, усмотря́я, зовя́ше: сла́ва си́лѣ Твое́й, Го́споди.

Чу́до бя́ше зрѣ́ти, Не́бо всѣ́хъ Царя́ одушевле́нное, испражне́нія преходя́щее земна́я, я́ко чу́дна дѣла́ Твоя́! Сла́ва си́лѣ Твое́й, Го́споди.

Аще и непости́жный Сея́ Пло́дъ, Имже небеса́ бы́ша, погребе́ніе прія́тъ во́лею, я́ко ме́ртвъ; ка́ко погребе́нія отве́ржется, неискусобра́чно Ро́ждшая?

Въ преставле́ніи Твое́мъ, Ма́ти Бо́жія, простра́ннѣйшее тѣ́ло Твое́ и богопрія́тное, Ангельская во́инства свяще́нными кри́лы, тре́петомъ и ра́достію покрыва́ху.

Инъ.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Спа́са, и Бо́га, и Го́спода, возсія́вшаго отъ Дѣ́вы, исповѣ́дуя, сла́вне, посреди́ суди́ща, мучи́телей шата́ніе терпѣ́ніемъ смири́лъ еси́ и многобо́жіе потреби́лъ еси́.

Ника́коже устраши́вся, стру́жемь и біе́мь, доблему́дренне, а́нгелы удиви́лъ еси́, зря́щія твое́ терпѣ́ніе, и́мже враги́ безпло́тныя погуби́въ, и побѣдоно́сенъ му́ченикъ бы́лъ еси́.

Сы́й Боже́ственныя ро́сы испо́лненъ, проше́лъ еси́ доблему́дренно о́гненную пе́щь, зри́мь въ не́й, Ми́роне му́дре, со а́нгелы ра́дующся и ника́коже, блаже́нне, опаля́емь.

Богоро́диченъ: Ве́ліе и стра́шное та́инство рождества́ Твоего́ удивля́етъ, Чи́стая, вся́къ у́мъ: я́ко Бо́гъ вочеловѣ́читися изъ Тебе́ бла́гостію изво́ли во спасе́ніе мíра и назда́ніе.

Пѣ́снь 5.

Ирмо́съ: Ужасо́шася вся́ческая о честнѣ́мъ успе́ніи Твое́мъ: Ты́ бо, неискусобра́чная Дѣ́во, отъ земли́ преста́вилася еси́ къ вѣ́чнымъ оби́телемъ, и къ безконе́чнѣй жи́зни, всѣ́мъ, воспѣва́ющимъ Тя́, спасе́ніе подава́ющая.

Да возглася́тъ трубы́ богосло́вовъ дне́сь, язы́къ же многовѣща́нный человѣ́ческій ны́нѣ да восхва́литъ, да огласи́тъ же возду́хъ, безмѣ́рнымъ сія́я свѣ́томъ, Ангели да пою́тъ Пречи́стыя Дѣ́вы успе́ніе.

Сосу́дъ подоба́ше избра́нный, пѣ́ніемъ Ти́ ве́сь удивля́емь, Дѣви́це, исхо́денъ, ве́сь освяще́нъ Бо́гу, всѣ́мъ богопрія́тенъ, и се́й и́стинно явля́емый, Богоро́дице Всепѣ́тая.

Инъ.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Богоза́рная и свѣтоно́сная твоя́ па́мять, Свята́го Ду́ха си́лою въ ве́сь мíръ простира́ема, просвѣще́ніемъ благоче́стія озаря́етъ сію́ чту́щія и до́блести твоя́ возвѣща́ющія.

Юношски го́рькая томле́нія претерпѣ́лъ еси́, я́ко безпло́тенъ, до́блій му́чениче: одира́емѣ бо ко́жѣ терпѣ́лъ еси́, я́коже ино́му стра́ждущу, сла́вне, си́лою неви́димою я́вѣ укрѣпля́емь.

Мѵ́ро твоя́ иска́паша болѣ́зни, му́чениче, благово́нно, вся́къ смра́дъ отгоня́ безбо́жія, Христо́ву же Святу́ю Це́рковь благово́нствуя при́сно, вѣ́рно тя́ и любо́вію я́вѣ блажа́щую.

Богоро́диченъ: О на́съ изъ Тебе́ Воплоще́ннаго неизглаго́ланнымъ сло́вомъ, Пречи́стая, моли́, Благослове́нная, я́ко да изба́вимся ви́димыхъ всѣ́хъ и неви́димыхъ вра́гъ, Всенепоро́чная, Тя́, Богоро́дицу, при́сно исповѣ́дающіи.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Изъ Тебе́ Жи́знь возсія́, ключи́ дѣ́вства не руши́вши; ка́ко у́бо пречи́стое и живонача́льное Твое́ тѣ́ло искуше́нія сме́рти бы́сть прича́стно?

Жи́зни бы́вши хра́мъ, жи́знь присносу́щную улучи́ла еси́: сме́ртію бо къ животу́ премину́ла еси́, Яже Жи́знь ро́ждши воѵпоста́сную.

Инъ.

Ирмо́съ: Ко Го́споду отъ ки́та Іо́на возопи́: Ты́ мя возведи́ изъ глубины́ а́да, молю́ся, да я́ко Изба́вителю, во гла́сѣ хвале́нія, и́стины же ду́хомъ пожру́ Тебѣ́.

Кропле́ніемъ твои́хъ крове́й свяще́нныхъ потопи́лъ еси́ де́монскія полки́, во́ине до́блій, и, вѣне́цъ нося́, къ Бо́гу восте́клъ еси́, побѣдоно́сецъ бы́въ изря́денъ.

Ви́дѣвше твое́ лице́, просвѣти́вшееся, мучи́тели, боже́ственными свѣтлостьми́, страстоте́рпче, удиви́шася, не позна́вше же Бо́га, тму́ прія́ша, въ вѣ́чную му́ку отсыла́еми.

Повелѣ́ніемъ суро́ваго мучи́теля терпѣ́лъ еси́ ко́жи отъя́тіе, па́че естества́, достохва́льне, показа́въ е́же къ Бо́гу чи́стое твое́ жела́ніе и при́сное, всеблаже́нне, воззрѣ́ніе.

Богоро́диченъ: Зако́ны въ Тебѣ́ обновля́ются, Дѣ́во, естества́: па́че бо естества́ естество́мъ непостижи́маго, Бо́га Емману́ила пресла́вно родила́ еси́ въ на́ше вѣ́рныхъ порожде́ніе.

Конда́къ пра́здника, гла́съ 2:

Въ моли́твахъ неусыпа́ющую Богоро́дицу и въ предста́тельствахъ непрело́жное упова́ніе, гро́бъ и умерщвле́ніе не удержа́ста: я́коже бо Живота́ Ма́терь, къ животу́ преста́ви, во утро́бу Всели́выйся приснодѣ́вственную.

Икосъ:

Огради́ моя́ помышле́нія, Христе́ мо́й, и́бо Стѣ́ну мíра воспѣ́ти дерза́ю, Чи́стую Ма́терь Твою́, на столпѣ́ глаго́лъ укрѣпи́ мя, и въ тя́жкихъ мы́слехъ заступи́ мя, Ты́ бо взыва́ющимъ и прося́щимъ вѣ́рою моле́нія исполня́еши. Ты́ мнѣ́ у́бо да́руй язы́къ доброрѣ́чивъ и по́мыслъ непосты́денъ: вся́кое бо дая́ніе сія́нія отъ Тебе́ низпосыла́ется, Свѣтопода́телю, во утро́бу всели́выйся приснодѣ́вственную.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Юноши и дѣ́вы, Дѣ́выя же и Богома́тере па́мять чту́ще, ста́рцы и кня́зи, ца́ріе и судіи́, по́йте: оте́цъ на́шихъ Го́споди и Бо́же, благослове́нъ еси́.

Да востру́бятъ трубо́ю духо́вною го́ры небе́сныя, да ра́дуются хо́лми, и да игра́ютъ боже́ственніи апо́столи: Цари́ца къ Сы́ну преставля́ется, съ Ни́мъ ца́рствующи.

Всесвяще́нное преставле́ніе боже́ственныя Твоея́ и нетлѣ́нныя Ма́тере, премíрныя вы́шнихъ си́лъ совокупи́ чи́ны, весели́тися съ су́щими на земли́, Тебѣ́ пою́щими: Бо́же, благослове́нъ еси́.

Инъ.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Умъ тво́й, свѣ́тло распаля́емь, му́дре, боже́ственнымъ жела́ніемъ, ра́довашеся и веселя́шеся, посреди́ пла́мене стоя́щу тебѣ́, я́коже тріе́мъ ю́ношамъ, съ ни́миже вѣ́рно взыва́лъ еси́: благослове́нъ еси́, Бо́же оте́цъ на́шихъ.

Зря́ще въ пла́мени стоя́ща тя́, му́дре, посреди́ а́нгелъ, зра́комъ неизглаго́ланнымъ блиста́юща, зри́тели удиви́шася и, къ пѣ́нію прело́жшеся, Влады́цѣ взыва́ху: благослове́нъ еси́, Бо́же оте́цъ на́шихъ.

Умо́мъ чи́стымъ стоя́, со у́мными пое́ши а́нгелы, посреди́ пе́щи ра́дуяся, Преблага́го Го́спода, я́коже обузда́юща пла́мень, и пою́ща тя́ спаса́юща: благослове́нъ еси́, Бо́же оте́цъ на́шихъ.

Богоро́диченъ: Вмѣсти́лище Бо́жіе, и пала́та красна́, и боже́ственный престо́лъ, на не́мже сѣ́де, угото́ва всѣ́мъ сѣдѣ́ніе небе́сное, яви́лася еси́, Пречи́стая Дѣ́во. Сего́ ра́ди взыва́емъ: Благослове́нная, Яже Бо́га пло́тію ро́ждшая.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Па́мять Твою́, Чи́стая Дѣ́во, Нача́ла же, и Вла́сти, и Си́лы, Ангели, Арха́нгели, Престо́ли, Госпо́дства, Херуви́ми сла́вятъ и стра́шніи Серафи́ми; человѣ́ческій же ро́дъ — пое́мъ и превозно́симъ во вся́ вѣ́ки.

Иже стра́нно всели́выйся, Богоро́дице, въ чи́стое чре́во Твое́, воплоща́емь, Се́й, всесвяще́нный ду́хъ Тво́й пріе́мъ, у Себе́ упоко́и, я́ко должни́къ Сы́нъ. Тѣ́мже Тя́ пое́мъ, Дѣ́во, и превозно́симъ во вся́ вѣ́ки.

О, вы́ше ума́ чуде́съ Приснодѣ́вы же и Богома́тере! Во гро́бъ бо все́льшися, показа́ ра́й, ему́же предстоя́ще дне́сь, ра́дующеся, пое́мъ: Го́спода по́йте, дѣла́, и превозноси́те Его́ во вся́ вѣ́ки.

Инъ.

Ирмо́съ: Въ пещи́ о́трочестѣй прообрази́лъ еси́ иногда́ Твою́ Ма́терь, Го́споди, о́бразъ же Сія́ изъ огня́ изыма́ше, неопа́льно входя́щія. Юже пое́мъ, я́вльшуюся Тобо́ю конце́мъ дне́сь, и превозно́симъ во вся́ вѣ́ки.

Непобѣди́ма зря́ безу́мный мучи́тель, тя́, доблему́дренне, егда́ реме́ніе кроя́ще да́же до са́мыхъ косте́й, приложи́ ногтьми́ терза́ти тя́, я́звами нестерпи́мыми уязви́вся неисцѣ́льно.

Глаго́лъ Бо́жій съ небесе́ во услы́шаніе всего́ наро́да, му́чениче, принесе́ся тебѣ́, Ми́роне, ко о́нѣмъ тя́ призы́вающь, неизрече́ннымъ поко́ищемъ, сла́вне, и а́нгельскимъ кра́снымъ ликостоя́ніемъ.

Стоя́лъ еси́, я́коже Даніи́лъ, посреди́ звѣре́й, стыдя́щихся блаже́нныя стра́сти и подвиго́въ твои́хъ, преблаже́нне, неизче́тнаго вели́чества, живы́мъ же гла́сомъ твои́мъ заступа́емыхъ.

Богоро́диченъ: Устрѣле́нъ стрѣло́ю врага́, ду́шу до конца́ уязви́хъ, и неисцѣ́льно стражду́: Яже Спа́са Христа́ неизрече́нно ро́ждши, Пренепоро́чная, исцѣли́ мя и спаси́, упова́ніе ненаде́жныхъ.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное преставле́ніе Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Пріиди́те въ Сіо́нъ, на Боже́ственную и ту́чную Го́ру жива́го Бо́га, возра́дуемся, Богоро́дицу зря́ще: къ зѣло́ бо лу́чшей и Боже́ственнѣй сѣ́ни, я́ко Ма́терь, Сію́ во Свята́я святы́хъ Христо́съ преста́ви.

Пріиди́те, вѣ́рніи, ко гро́бу присту́пимъ Бо́жія Ма́тере, и объи́мемъ сердцы́ и устна́ми, очесы́ и лице́мъ чи́сто прикаса́ющеся и почерпа́юще исцѣле́ній незави́стныя да́ры от исто́чника приснотеку́щаго.

Пріими́ отъ на́съ пѣ́снь исхо́дную, Ма́ти жива́го Бо́га, и свѣтоно́сною Твое́ю и Боже́ственною осени́ благода́тію, Императору — побѣдительная, христолюби́вымъ лю́демъ — ми́ръ, оставле́ніе — пою́щимъ и душа́мъ спасе́ніе подаю́щи.

Инъ.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Да бу́дущую сла́ву и несказа́нную добро́ту Христа́ Подвигополо́жника ви́дѣти сподо́бишися, до́блественнѣ, прекланя́еши вы́ю, и пріе́млеши ме́чное усѣче́ніе, и ра́дости му́ченикъ исполня́еши боже́ственныя полки́.

Якоже сладкодохнове́нное мѵ́ро, достохва́льне Ми́роне, благово́нствующее сердца́ вѣ́рныхъ, достохва́льная па́мять твоя́ жела́ющимъ наста́, въ не́йже торжеству́ющихъ на́съ благово́нія боже́ственнаго твои́ми моли́твами испо́лни.

Твои́ми Аха́ія хва́лится пелена́ми и страда́ніи, до́блій Госпо́день страда́льче, мно́жае же кра́сится Ки́зикъ, многострада́льное тѣ́ло держа́, я́ко бога́тство и́стинное, и исто́чникъ исцѣле́ній, и неду́говъ очисти́лище.

Святы́хъ всѣ́хъ избра́нный въ вы́шнихъ, ма́ти градо́въ Сіо́нъ мы́сленный, пе́рвенецъ, я́коже пи́шетъ, кра́сная Це́рковь, я́ко му́ченика, о на́съ моля́щася, тя́ и́мать му́чениковъ ве́рхъ.

Богоро́диченъ: Гла́съ вопіе́мъ Ти́ вси́ а́нгеловъ, Дѣ́во, пала́то и престо́ле Бо́жій: ра́дуйся! Еюже сподо́бихомся небе́снаго Ца́рствія, дре́вле отринове́нніи тлѣ́ніемъ и добро́ту пе́рвую несмы́сленно погуби́вшіи.

Свѣти́ленъ пра́здника. Подо́бенъ: Ученико́мъ зря́щимъ.

Отъ земли́ на небеса́ преста́вльшися, Твоего́ наслѣ́дія, Чи́стая, не оста́ви: ски́птры ца́рствія утверди́, язы́ки укроти́, и проле́й ми́ръ въ концы́ мíра.

Сла́ва, и ны́нѣ, то́йже.

На стихо́внѣ стихи́ры, гла́съ 6. Подо́бенъ: Тридне́венъ.

Глаго́ломъ боже́ственнаго Гавріи́ла послѣ́дующе,* ра́дуйся, Тебѣ́ зове́мъ, Чи́стая.* Ты́ у́бо Пресвята́я и Ма́ти Госпо́дня,* къ Сему́ преста́вльшися,* помина́й о воспѣва́ющихъ Тя́.

Сти́хъ: Воскресни́, Го́споди, въ поко́й Тво́й,* Ты́ и Киво́тъ святы́ни Твоея́.

Неизмѣ́рная Прему́дрость Бо́жія,* хра́мъ Себѣ́ па́че ума́, Богоро́дице, созда́* изъ Тебе́ Ду́хомъ Святы́мъ,* и ны́нѣ Тя́ къ невеще́ственнымъ селе́ніемъ* преста́ви, Всепѣ́тая.

Сти́хъ: Кля́тся Госпо́дь Дави́ду и́стиною,* и не отве́ржется ея́.

Ра́бъ, ны́нѣ прихожду́ къ Тебѣ́,* Ма́тери всѣ́хъ Бо́га,* отъ вся́ческихъ изба́витися напа́стей моля́ся.* Но, о Богороди́тельнице,* ца́рствующи съ Сы́номъ Твои́мъ,* христіа́нскій ро́дъ сохраня́й.

Сла́ва, и ны́нѣ, гла́съ 3:

Пріиди́те, вси́ концы́ земнíи, честно́е преставле́ніе Богома́тере восхва́лимъ, въ ру́цѣ бо Сы́на ду́шу непоро́чную положи́. Тѣ́мже святы́мъ успе́ніемъ Ея́ мíръ оживотвори́ся, во псалмѣ́хъ, и пѣ́ніихъ, и пѣ́снехъ духо́вныхъ, со безпло́тными и апо́столы пра́зднуетъ свѣ́тло.


НА ЛИТУРГІИ,

Блаже́нна пра́здника, пѣ́снь 3-я, обою́ кано́новъ со ирмосо́мъ на 6.

Источникъ: Минíа, мѣ́сяцъ Аѵгустъ . — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 175 – 181 об.

/ Къ оглавленію раздѣла /


Наверхъ / Къ титульной страницѣ

0