Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 26 сентября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 16-й де́нь.
Па́мять преподо́бнаго отца́ на́шего Рома́на Дюни́скаго, чудотво́рца.

НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ.] На Го́споди воззва́хъ.., стихи́ры на 6: Образа 3 и преподо́бнаго 3.
Стихи́ры преподо́бнаго, гла́съ 1. Творе́ніе Никола́я, епи́скопа Охридскаго.

Отче Рома́не чудотво́рче, побѣди́телю ко́зней де́монскихъ, тѣ́снымъ путе́мъ ше́ствовалъ еси́ отъ земли́ къ небеси́, угожда́я Бо́гу посто́мъ, бдѣ́ніемъ и моли́твами непреста́нными, сего́ ра́ди дарова́ся тебѣ́ вла́сть изгоня́ти бѣ́сы и ду́хи тмы́ изъ люде́й Бо́жіихъ, тѣ́мже моли́ся о душа́хъ на́шихъ.

Отче Рома́не чудотво́рче, въ де́брѣхъ Мора́вскихъ и пеще́рахъ подвиза́лся еси́, въ безмо́лвіи очища́я се́рдце свое́ отъ по́мысловъ и навѣ́товъ де́монскихъ, и очище́ннымъ се́рдцемъ ви́дѣлъ еси́ Бо́га неви́димаго. Ви́дя же Бо́га, разгорѣ́лся еси́ любо́вію къ Нему́, отъ искони́ лю́бящему тя́, Его́же ны́нѣ моли́ о душа́хъ на́шихъ.

Сла́ва, гла́съ 6. Никола́ево.

Пріиди́те, лю́діе, пріиди́те ста́рцы и младе́нцы, и дѣ́вы съ ю́ношами, и кня́зи и раби́, пріиди́те и припаде́мъ къ ра́цѣ преподо́бнаго отца́ на́шего Рома́на, земна́го а́нгела и небе́снаго человѣ́ка, мно́га бо чудеса́ содѣ́ла: больны́я исцѣли́, бѣсны́я очи́сти, разсла́бленныя укрѣпи́, невѣ́рныя въ вѣ́ру обрати́, и ны́нѣ непреста́нно чудодѣ́йствуетъ и помога́етъ, источа́я си́лу и здра́віе отъ моще́й свои́хъ, изъ гро́ба, я́ко отъ исто́чника непресу́шнаго. Сего́ ра́ди пріиди́те и поклони́теся Бо́гу Еди́ному и Живо́му, дарова́вшему ва́мъ такова́го помо́щника и исцѣли́теля Рома́на свята́го.

И ны́нѣ, пра́здника Успе́нія, гла́съ 8:

Дѣви́честіи ли́цы дне́сь та́йно одру́ Дѣ́вы и Ма́тере о́крестъ предстоя́тъ, и ду́ши пра́ведныхъ, обступи́вше, Цари́цу сла́вятъ. Ови у́бо я́ко да́ръ дѣ́вство вмѣ́сто мѵ́ра прино́сятъ, о́ви же невеще́ственное пѣ́ніе съ добродѣ́телію прино́сятъ, подоба́етъ бо Ма́тери Бо́жіи я́ко Цари́цѣ ца́рскими добродѣ́тельми свѣтлосія́ющими дориноси́тися. Съ ни́миже и мы́, житіе́ чи́стое совне́сше, изы́демъ къ погребе́нію су́щія Ма́тере Бо́га на́шего, пѣ́ньми и пѣ́сньми духо́вными согла́сно Ю ублажа́юще.

Вхо́дъ. Проки́менъ дне́. Париміи́ три́, преподо́бническія.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры преподо́бнаго, самогла́сны, гла́съ 1. Никола́ево.

Весели́ся, земле́ Се́рбская, и́бо се́ звѣзда́ свѣ́тлая возсія́ въ тебѣ́, и ча́да твоя́, свѣ́томъ вѣ́чнымъ Христа́, С́олнца пра́вды, озари́. Да весели́тся и ли́къ мона́ховъ, по́стниковъ и богомо́льцевъ, и́бо изъ ни́хъ избра́ Госпо́дь свѣти́льникъ Сво́й и сосу́дъ благода́ти, Рома́на духоно́снаго, болѣ́зней исцѣли́теля, и де́моновъ прогони́теля, его́же дне́сь прославля́емъ и мо́лимъ: о́тче святы́й Рома́не, всѣ́мъ на́мъ ми́лость испроси́ отъ Христа́, ми́лостиваго Спа́са и Бо́га на́шего.

Гла́съ 4:

Имя твое́ побѣжда́етъ вре́мя и времена́, и хра́мъ тво́й одолѣва́етъ всѣ́мъ бу́рямъ жите́йскимъ, ра́ка же твоя́ чудото́чная оставля́етъ за собо́ю разруше́нная ца́рствія земна́я и престо́лы. О, сла́во неземна́я и си́ло неизмѣ́римая, человѣ́ка свята́го, уго́дника Бо́жія, вѣнча́ннаго съ безсме́ртіемъ! Рома́не безсме́ртне, вся́ ны́, сла́вящія тя́ дне́сь, помяни́ предъ престо́ломъ Бо́га Жива́го.

Погиба́етъ сла́ва земна́я, твоя́ же стои́тъ; погиба́етъ и́мя безбо́жниковъ, твое́ же сла́вится; мечи́ наси́льниковъ ло́мятся, красота́ тѣле́сная увяда́етъ, ме́чь же тво́й духо́вный и ны́нѣ посѣка́етъ де́моны и красота́ твоя́ лучеза́рная немѣня́ется. Сего́ ра́ди съ весе́ліемъ прославля́емъ тя́, Рома́не всеблаже́нне.

Сла́ва, гла́съ 5:

Воскли́кните, вѣ́рніи, съ ра́достію Бо́гу на́шему, глаго́лющу иногда́: поста́влю я́ кня́зи по все́й земли́. — И се́, вои́стину, поста́вилъ е́сть по все́й вселе́ннѣй кня́зи духо́вныя: апо́столы и му́ченики, преподо́бныя отцы́ на́ша, па́стыри и учи́тели, и отъ ро́да на́шего: Нау́ма и Кли́мента во Охридѣ, Некта́рія въ Би́толи, Дави́да преподо́бнаго въ Солу́нѣ, и Іоаса́фа отъ ца́рскаго ро́да въ Метео́рахъ Ѳессалíйскихъ, обана́десяте му́чениковъ въ Струми́цѣ, и ю́наго зла́таря Гео́ргія въ Кра́товѣ, Пе́тку сла́вную въ Бѣлгра́дѣ, Са́вву и Стефа́на въ Жи́чи, Симео́на въ Студени́цѣ, Григо́рія богому́драго въ Го́рняцѣ, Зоси́ма въ Тума́нѣ, Роми́ла въ Равани́цѣ, и Не́стора въ Дюни́сѣ, Евге́нію цари́цу и мона́хиню въ Любосты́ни, и мно́жество ины́хъ въ гора́хъ Овча́рскихъ, Пи́ротскихъ, Черного́рскихъ, Пе́кскихъ и Сике́вачкихъ. И се́й преподо́бный и святы́й Рома́нъ чудотво́рецъ, вои́стинну е́сть равноче́стенъ съ ни́ми, я́ко кня́зь духо́вный всего́ Помора́вія, наказу́я непра́ведныя и ублажа́я пра́ведныя, его́же дне́сь восхваля́емъ и сла́вимъ, [яко] уго́дника Бо́жія и чудотво́рца.

И ны́нѣ, пра́здника Успе́нія, гла́съ 3:

Пріиди́те, вси́ концы́ земнíи, честно́е преставле́ніе Богома́тере восхва́лимъ: въ ру́цѣ бо Сы́на ду́шу непоро́чную положи́. Тѣ́мже святы́мъ успе́ніемъ Ея́ мíръ оживотвори́ся, во псалмѣ́хъ, и пѣ́ніихъ и пѣ́снехъ духо́вныхъ, со безпло́тными и апо́столы пра́зднуетъ свѣ́тло.

На стихо́внѣ стихи́ры Успе́нія, гла́съ 4. [Подо́бенъ: Да́лъ еси́ зна́меніе.]

Не колесни́ца огнезра́чная отъ земны́хъ Тя́ преста́ви, я́коже Илію́ пра́веднаго, но са́мое Со́лнце Пра́вды, на руку́ Свое́ю пресвяту́ю Твою́ ду́шу, я́ко непоро́чную пріе́мъ, въ Себѣ́ упоко́и, и пресла́вно Тя́, Чи́стая, преста́вивъ, почте́, въ ра́дости па́че ума́.

Сти́хъ: Воскресни́ Го́споди въ поко́й Тво́й, Ты́ и Киво́тъ святы́ни Твоея́.

Пріиди́те, о празднолю́бцы! Бо́жія Ма́тере дне́сь свято́е преставле́ніе свѣ́тло соверши́мъ: въ ру́цѣ бо и́стинно отъ нетлѣ́нна Отца́ возсія́вшаго пе́рвѣе и напослѣ́докъ изъ утро́бы Ея́, Боже́ственную и пречи́стую ду́шу предаде́, ра́дующися, Іису́са Бо́га на́шего, и мо́литъ спасти́ся на́мъ.

Сти́хъ: Кля́тся Госпо́дь Дави́ду и́стиною, и не отве́ржется eя́.

Чу́до преужа́сно: Яже во утро́бѣ невмѣсти́маго Царя́ носи́вшая во гро́бѣ полага́ется, и а́нгельстіи собо́ри со апо́столы со стра́хомъ погреба́ютъ Тоя́ богопрія́тное тѣ́ло и честно́е, и сіе́ возвы́сивъ, на небеса́ возведе́ Іису́съ, Сы́нъ Ея́ и Спа́съ ду́шъ на́шихъ.

Сла́ва, преподо́бнаго, гласъ 1:

Отче Рома́не чудотво́рче, ду́хомъ бо́дрствуя, ду́хъ укрѣпи́лъ еси́, пло́ть же ни во что́ вмѣня́я. Упова́ніе твое́ бѣ́ Оте́цъ, Прибѣ́жище — Сы́нъ, Ду́хъ же Святы́й — Покро́въ тво́й, отъ нача́ла до конца́. Тѣ́мже просла́ви Госпо́дь, и ду́хъ тво́й на небеси́, и пло́ть твою́ на земли́, и се́ ра́ка твоя́ то́читъ исцѣле́ніе всѣ́мъ больны́мъ и неду́жнымъ, прибѣга́ющимъ къ тебѣ́ съ вѣ́рою и любо́вію.

И ны́нѣ, Образа, гла́съ 6:

Го́споди, воплоти́лся еси́, я́коже восхотѣ́лъ, изво́лилъ еси́ воспрія́ти нищету́ на́шу и бога́тство благосе́рдія показа́лъ еси́, и́мже мя́, пе́рсть, обожи́лъ еси́. Сла́вимъ Тя́, Человѣколю́бче, смотре́нія о́бразъ ви́дяще зра́ка Твоего́, си́мъ невозбра́нно во Еде́мъ вхо́дъ, Спа́се, да́руй рабо́мъ Твои́мъ, презира́я вся́ прегреше́нія.

Тропа́рь Образа, гла́съ 2:

Пречи́стому Твоему́ о́бразу [покланя́емся, Благíй, прося́ще проще́нія прегрѣше́ній на́шихъ, Христе́ Бо́же: во́лею бо благоволи́лъ еси́ пло́тію взы́ти на Кре́стъ, да изба́виши, я́же созда́лъ еси́, отъ рабо́ты вра́жія. Тѣ́мъ благода́рственно вопіе́мъ Ти́: ра́дости испо́лнилъ еси́ вся́, Спа́се на́шъ, прише́дый спасти́ мíръ].

Сла́ва, преподо́бнаго, гла́съ 1:

Пусты́нный жи́тель, и въ тѣлеси́ а́нгелъ, и чудотво́рецъ яви́лся еси́, богоно́се о́тче на́шъ Рома́не: посто́мъ, бдѣ́ніемъ, моли́твою небе́сная дарова́нія пріи́мъ, исцѣля́еши неду́жныя и ду́ши вѣ́рою притека́ющимъ ти́. Сла́ва Да́вшему ти́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.

И ны́нѣ, Успе́нія, гла́съ то́йже:

Въ рождествѣ́ дѣ́вство сохрани́ла eси́, [во успе́ніи мíра не оста́вила eси́, Богоро́дице, преста́вилася eси́ къ животу́, Ма́ти су́щи Живота́, и моли́твами Твои́ми избавля́еши отъ сме́рти ду́ши на́ша].


НА УТРЕНИ,
На Бо́гъ Госпо́дь: Тропа́рь Образа, два́жды. Сла́ва, преподо́бнаго. И ны́нѣ, Успе́нія.

По 1-мъ стихосло́віи сѣда́ленъ, гла́съ 4:

Убѣжа́лъ еси́ жите́йскаго зла́го волне́нія, въ тишину́ доше́дъ Бо́жія поко́я и наслажде́нія, возше́лъ еси́ на высоту́ добродѣ́телей, и во о́стровъ дости́глъ еси́ небе́сный, о́тче Рома́не досточу́дне. [Два́жды.]

Сла́ва, и ны́нѣ, [пра́здника,] гла́съ то́йже. [Подо́бенъ: Удиви́ся Іо́сифъ.]

Зря́ще вои́стинну а́нгельская во́инства преставле́ніе Твое́, Пресвята́я Влады́чице Чи́стая, Благослове́нная Всепѣ́тая Богоро́дице, иму́ще во́лею рожде́нна изъ Тебе́, ли́къ учени́къ собра́вшеся, съ весе́ліемъ ноша́ху честно́е въ ра́й тѣ́ло Твое́, Христа́ пою́ще, Живода́вца су́ща во вѣ́ки.

По 2-мъ стихосло́віи сѣда́ленъ, гла́съ 4:

Одѣ́явся крѣ́постію Влады́чнею, стяжа́лъ еси́ терпѣ́ніе мно́гое, воздержа́ніе, вѣ́ру и любо́вь и́стинну, тѣ́мъ и яви́лся еси́ чуде́съ исто́чникъ, источа́я струи́ присноживо́тны, и́миже омыва́ются ду́шъ же и тѣле́съ неду́зи, о́тче Рома́не приснопа́мятне. [Два́жды.]

Сла́ва, и ны́нѣ, Успе́нія, гла́съ то́йже. [Подо́бенъ: Удиви́ся Іо́сифъ.]

Въ ру́цѣ на́съ ра́ди вочеловѣ́чшагося изъ Тебе́ преда́вши ду́шу, я́ко Зижди́телю Твоему́ и Бо́гу, къ жи́зни нетлѣ́ннѣй преста́вилася еси́. Тѣ́мже Тя́ че́стно ублажа́емъ, еди́ну Чи́стую и Нескве́рную, и Богоро́дицу вси́ и́стинно исповѣ́дающе, взыва́емъ: Христа́ моли́, къ Нему́же преста́вилася еси́, спасти́ ду́ши на́ша.

[Поліеле́й.]

Ублажа́емъ тя́, преподо́бне о́тче Рома́не, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода...

По поліеле́и сѣда́ленъ, гла́съ 4:

Вси́ вѣ́рніи, и́же къ честнѣ́й ра́цѣ твое́й притека́ютъ, почерпа́ютъ отъ сея́ исцѣле́нія и чуде́съ пучи́ну. Сего́ ра́ди велича́емъ честну́ю па́мять твою́, преподо́бне о́тче Рома́не, вѣ́рою тя́ и любо́вію ублажа́юще. [Два́жды.]

Сла́ва, и ны́нѣ, [пра́здника,] гла́съ то́йже. [Подо́бенъ: Удиви́ся Іо́сифъ.]

Возопíй, Дави́де, что́ се́й пра́здникъ, его́же воспѣ́лъ еси́ дре́вле въ кни́зѣ псало́мстѣй? Яко Дще́рь, Богоотрокови́цу и Дѣ́ву, преложи́ Ю на о́ны оби́тели Христо́съ, Иже изъ Нея́ безъ сѣ́мене ро́ждся. И сего́ ра́ди ра́дуются ма́тери, и дще́ри, и невѣ́сты Христо́вы, вопію́ще: ра́дуйся Преста́вившаяся къ вы́шнему Ца́рствію.

Степе́нна, антифо́нъ 1-й 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? [Вся́кое дыха́ніе...] Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Страсте́й неду́ги, благода́тію духо́вною, отъе́млеши, ду́хи же лука́выя отго́ниши, и неисцѣ́льныя болѣ́зни исцѣля́еши, и вѣ́рныя просвѣща́еши блиста́ніи чуде́съ твои́хъ, богоблаже́нне о́тче Рома́не. Тѣ́мже и мы́ дне́сь ра́достно воспѣва́емъ свѣтоно́сную па́мять твою́.

Кано́нъ Успе́нія, творе́ніе ки́ръ Космы́, со ирмосо́мъ на 6, гла́съ 1. И Образа, творе́ніе Ге́рмана патріа́рха, на 4, гла́съ 6. [Ви́ждь въ мине́и дне́ сего́.] И преподо́бнаго, творе́ніе Никола́я, епи́скопа Охридскаго, на 4, гла́съ 6:

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Спа́са Христа́ возлюби́въ, въ пусты́нную го́ру всели́лся еси́, хотя́ очи́стити и украси́ти ду́шу свою́, и удосто́ити ю́ ко бра́ку вѣ́чному съ Сы́номъ Царя́ Бо́га. [Два́жды.]

Велича́йшимъ терпѣ́ніемъ вооружи́вся, на бра́нь вступи́лъ еси́ съ по́лчищи де́моновъ, и вся́ я́ побѣди́лъ еси́, си́лою Креста́ Христо́ва.

Богоро́диченъ: Ева согрѣши́вши, роди́ Ка́ина братоубíйцу, Ты́ же, Пречи́стая, не согрѣши́вши, родила́ еси́ Спа́са ро́ду человѣ́ческому, хода́тайствомъ Твои́мъ спаса́емся.

Катава́сія: Преукраше́нная...

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Тма́ де́моновъ ополча́шеся на тя́, преподо́бне, ты́ же, во́племъ и воздыха́ніемъ мно́гимъ, вопія́ше ко Христу́ Побѣди́телю, Иже изба́ви тя́ и просла́ви. [Два́жды.]

Имя Іису́са Сладча́йшаго непреста́нно имѣ́лъ еси́ въ се́рдцы и на язы́цѣ, я́коже ме́дъ въ го́рести жи́зни свое́й, до́ндеже всю́ го́ресть изгна́лъ еси́, и подо́бно Па́влу глаго́лати возмо́же: а́зъ же не живу́, но Христо́съ во мнѣ́.

Богоро́диченъ: Раю́ стреми́лася еси́, Ра́й во утро́бѣ Свое́й носи́ла еси́, въ Раи́ всели́лася еси́, о Пречи́стая Дѣ́во, моли́ Сы́на Свое́го Ра́й и на́мъ дарова́ти.

Конда́къ Успе́нія, гла́съ 2:

[Въ моли́твахъ неусыпа́ющую Богоро́дицу и въ предста́тельствахъ непрело́жное упова́ніе, гро́бъ и умерщвле́ніе не удержа́ста: я́коже бо Живота́ Ма́терь, къ животу́ преста́ви, во утро́бу Всели́выйся приснодѣ́вственную].

Икосъ:

[Огради́ моя́ помышле́нія, Христе́ мо́й, и́бо Стѣ́ну мíра воспѣ́ти дерза́ю, Чи́стую Ма́терь Твою́, на столпѣ́ глаго́лъ укрѣпи́ мя, и въ тя́жкихъ мы́слехъ заступи́ мя, Ты́ бо взыва́ющимъ и прося́щимъ вѣ́рою моле́нія исполня́еши. Ты́ мнѣ́ у́бо да́руй язы́къ прино́сенъ и по́мыслъ непосты́денъ: вся́кое бо дая́ніе сія́нія отъ Тебе́ низпосыла́ется, Свѣтопода́телю, во утро́бу всели́выйся приснодѣ́вственную].

Конда́къ преподо́бнаго, гла́съ 8:

Кре́стъ Христо́въ возлюби́въ, о́тче преподо́бне, кре́стъ сво́й на ся́ взя́лъ еси́, кре́стнымъ зна́меніемъ вся́ си́лы сопроти́вныя побѣди́въ, вѣне́цъ отъ Христа́ прія́лъ еси́, крестоно́сный Рома́не.

Сѣда́ленъ Образа, гла́съ 1. [Подо́бенъ: Гро́бъ Тво́й, Спа́се].

Еде́сскій ца́рь [всѣ́хъ Царя́, не ски́птры, ниже́ во́и, но мно́жества чуде́съ сло́вомъ износя́щаго, позна́въ Тя́, моля́ше: богочеловѣ́чное къ себѣ́ получи́ти, во о́бразѣ же, я́ко узрѣ́ Тя, взыва́ше: Бо́гъ Ты́ и Госпо́дь].

Сла́ва, и ны́нѣ, пра́здника, гла́съ то́йже. [Подо́бенъ: Ка́мени запеча́тану].

Ли́къ боже́ственныхъ апо́столъ [собра́ся погребсти́ Тя прече́стно, Богоро́дице Всечи́стая, съ ни́миже и а́нгельстіи чи́ни воспѣва́ху преставле́ніе Твое́, взыва́юще прехва́льно. Съ ни́миже и мы́, любо́вію игра́юще, Чи́стая, хвалу́ Тебѣ́ прино́симъ, гла́сы пѣ́сненными, вѣ́рніи, и вопіе́мъ: ра́дуйся, Предста́тельнице присночту́щихъ Тя́].

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Освяти́въ ду́шу и пло́ть свою́ Ду́хомъ Святы́мъ, Рома́не преподо́бне, ты́ ны́нѣ освяща́еши и на́съ моли́твами твои́ми. [Два́жды.]

Му́ки безчи́сленныя отгоня́еши отъ люде́й твои́хъ: слѣпíи ви́дятъ, глусíи слы́шатъ, хро́міи хо́дятъ, бѣснíи очища́ются, моли́твами твои́ми, Рома́не преподо́бне.

Богоро́диченъ: Анну пра́ведную, ма́терь Свою́, свободи́ла еси́ отъ кля́твы безча́дія и, я́коже Ма́ти Бо́га на́шего, свободи́ла еси́ на́съ отъ прокля́тія грѣха́.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Ни гла́дъ, ни нагота́, ни нападе́ніе бѣсо́въ не возмого́ша тя́ разлучи́ти отъ любве́ Христо́вы, ны́нѣ же соедине́нъ со Христо́мъ вѣ́чно на небеси́, моли́ся о на́съ, мо́лимъ тя́. [Два́жды.]

Егда Ла́зарь, кня́зь пресла́вный, позна́ си́лу чудодѣ́ющую отъ моще́й твои́хъ, созда́ хра́мъ надъ гро́бомъ твои́мъ, идѣ́же вси́ собира́емся, воспѣва́ти чудеса́ твоя́, Рома́не свя́те.

Богоро́диченъ: Сы́на безъ отца́ родила́ еси́, рожде́ннаго отъ Отца́ безъ ма́тере, духоно́сная Дѣ́во, честнѣ́йшая небе́сныхъ си́лъ; покры́й на́съ покро́вомъ Твои́мъ.

Пѣ́снь 6.

Ирмо́съ: Ятъ бы́сть, но не удержа́нъ въ пе́рсехъ ки́товыхъ Іо́на: Тво́й бо о́бразъ нося́, Страда́вшаго и погребе́нію Да́вшагося, я́ко отъ черто́га, отъ звѣ́ря изы́де. Приглаша́ше же кустодíи: храня́щіи су́етная и ло́жная, ми́лость сію́ оста́вили есте́.

Послу́шалъ еси́ Повелѣ́вшаго: а́ще кто́ хо́щетъ по Мнѣ́ ити́, —ты́ оста́вилъ еси́ ро́дъ сво́й и до́мъ отца́ своего́, и презрѣ́въ вся́ мірска́я, послѣ́довалъ еси́ Христу́. [Два́жды.]

Адскія си́лы устраша́ются до ны́нѣ, отъ хра́ма твоего́ и отъ и́мене твоего́, и бѣ́гаютъ, Рома́не чудотво́рче.

Богоро́диченъ: Свѣ́тъ отъ Свѣ́та, Бо́га Истинна отъ Бо́га Истинна, вмѣсти́ла еси́ въ Себѣ́, Дѣ́во, ши́ршая небе́съ, я́коже и́стинную Свидѣ́тельницу Его́ рожде́нія, и страда́нія, и воскресе́нія, мо́лимъ, спаси́ ро́дъ христіа́нскій.

Конда́къ Образа, гла́съ 2. [Подо́бенъ: Въ моли́твахъ].

Неизрече́ннаго и Боже́ственнаго Твоего́ къ человѣ́комъ смотре́нія, неопи́санное Сло́во Отчее, и о́бразъ непи́санный, и богопи́санный побѣди́теленъ, вѣ́дуще нело́жнаго Твоего́ воплоще́нія, почита́емъ, того́ лобыза́юще.

Икосъ:

Увѣря́я человѣ́комъ Госпо́дь вочеловѣ́ченія Своего́ та́йну ужа́сную, самопису́етъ богому́жный Сво́й о́бразъ на убру́сѣ, и первообра́зное у́бо возне́съ отъ горы́ Елео́нскія, на престо́лѣ споражда́етъ Отчи, покланя́тися отъ безтѣле́сныхъ а́нгелъ. Подо́бію же первообра́знаго на́мъ дарова́ покланя́тися: Его́же объе́млюще душе́ю же и се́рдцемъ, почита́емъ, того́ лобыза́юще.

Пѣ́снь 7.

Ирмо́съ: Отроцы въ Вавило́нѣ пе́щнаго пла́мене не убоя́шася, но, посредѣ́ пла́мене вве́ржени, ороша́еми, поя́ху: благослове́нъ еси́, Го́споди Бо́же оте́цъ на́шихъ.

Исцѣли́теля тя́ почита́емъ и учи́теля мона́ховъ прославля́емъ, Рома́не всеблаже́нне, не преста́й исцѣля́ти на́съ отъ страсте́й и похоте́й, и учи́ти на́съ стра́ху Госпо́дню. [Два́жды.]

Но́вый по́двигъ совокупи́лъ еси́ дре́внему о́пыту отце́въ, и та́ко подтверди́лъ еси́ и́стинный пу́ть спасе́нія, и вѣне́цъ вели́кихъ отце́въ Це́ркве получи́лъ еси́, Рома́не о́тче на́шъ.

Богоро́диченъ: Ада́мъ но́вый изъ Тебе́ яви́ся, Пречи́стая, Ада́ма ста́раго и ро́дъ его́ искупля́я отъ грѣха́ и сме́рти, сего́ ра́ди Ты́ еси́ Хода́таица спасе́нія на́шего.

Пѣ́снь 8.

Ирмо́съ: За зако́ны оте́ческія блаже́нніи въ Вавило́нѣ ю́ноши, предбѣ́дствующе, царю́ющаго оплева́ша повелѣ́ніе безу́мное, и совоку́плени, и́мже, не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте, дѣла́, и превозноси́те во вся́ вѣ́ки.

Ра́ны мно́гія отъ де́моновъ прія́лъ еси́, Бо́гъ же дарова́ ти́ си́лу благода́тную, ра́ны исцѣля́ти неду́жныхъ и де́моны му́чимыхъ, Рома́не благода́тный. [Два́жды.]

Огнь страсте́й погаси́лъ еси́ стра́хомъ Госпо́днимъ, бдѣ́ніемъ и воздержа́ніемъ и, я́ко безстра́стенъ а́нгелъ, жи́лъ еси́ между́ людьми́, всѣ́мъ помога́яй и вся́ къ покая́нію призыва́яй, преди́вный Бо́жій святи́телю Рома́не.

Богоро́диченъ: Дарода́тельнице Богоро́дице, испроси́ на́мъ отъ Сы́на Твоего́ и Бо́га да́ры сія́: смире́ніе ума́, чи́стое се́рдце, ми́лостивую ру́ку, да удосто́имся любве́ Христо́вы и Ца́рствія Его́ Небе́снаго.

Пѣ́снь 9.

Ирмо́съ: Стра́нствія Влады́чня и безсме́ртныя трапе́зы на го́рнѣмъ мѣ́стѣ высо́кими умы́, вѣ́рніи, пріиди́те наслади́мся, возше́дша Сло́ва, отъ Сло́ва научи́вшеся, Его́же велича́емъ.

Наказу́яй та́ти и разбо́йники въ святѣ́й оби́тели твое́й, ты́ устраши́лъ еси́ грѣ́шники, исцѣля́я же и помога́я вѣ́рующимъ, ты́ яви́лъ еси́ Бо́га пра́вды и ми́лости, ревни́телю Бо́жій подо́бенъ Иліи́, Рома́не, о́тче на́шъ. [Два́жды.]

Авва Отче! — Вопія́лъ еси́ къ Бо́гу въ тѣснота́хъ и ско́рбехъ свои́хъ, и Оте́цъ Небе́сный вчисли́ тя́ въ сы́ны не́ба, явля́я мíру тобо́ю си́лу и сла́ву Свою́, боже́ственный Рома́не.

Богоро́диченъ: Ши́ршая небе́съ показа́лася еси́, Дѣ́во Избра́нная, егда́ Бо́гъ Сло́во хотя́ше роди́тися я́ко человѣ́къ, да спасе́тъ ро́дъ человѣ́ческій. Сего́ ра́ди прославля́емъ Тя́, я́ко лѣ́ствицу небе́сную и устраше́ніе де́моновъ, и ра́дованіе ду́шъ на́шихъ.

Свѣти́ленъ о́браза. [Подо́бенъ: Жены́, услы́шите.]

Свѣ́тъ невече́рній, Христе́, просвѣти́ на́съ лица́ Твоего́ зра́комъ, и свѣ́тлости святы́хъ сподо́би, егда́ ся́деши возда́ти кому́ждо по дѣло́мъ его́, моли́твами ро́ждшія Тя́ Богоро́дицы.

Сла́ва, преподо́бнаго. [Творе́ніе] Никола́я:

Земно́е тече́ніе соверши́лъ еси́ въ трудѣ́хъ и по́двизѣхъ, исполня́я за́повѣди Спа́совы, да́лъ еси́ земно́е за небе́сное, и плотско́е за духо́вное, сего́ ра́ди прославля́емъ тя́ вси́.

И ны́нѣ, пра́здника. [Подо́бенъ: Жены́, услы́шите.]

О, коли́ка вели́чія Тебѣ́ Си́льный сотвори́! Отъ непло́дныя бо родила́ся еси́, родила́ же еси́ Дѣ́ва, и Дѣ́ва па́ки пребы́вши, пребыва́еши же по сме́рти, сме́рти вы́шши, Чи́стая, и не оставля́ющи мíра, о мíрѣ мо́лишися.

На хвали́техъ стихи́ры на 6: Образа 3, гла́съ 4, и преподо́бнаго 3, [творе́ніе] Никола́я, гла́съ то́йже.

Пріиди́те, вси́ вѣ́рніи, притецы́те ко хра́му и киво́ту свята́го Рома́на, исто́чникъ бо е́сть чуде́съ безчи́сленныхъ: я́коже Мора́ва рѣка́ напая́етъ суху́ю зе́млю, та́кожде и се́й чудотво́рецъ напая́етъ ду́ши на́ша струя́ми благода́тными отъ Христа́, Спа́са на́шего; Тому́ ны́нѣ предстоя́ въ Ца́рствіи безпло́тныхъ, мо́лится о душа́хъ на́шихъ.

Пріиди́те, вси́ вѣ́рніи, ко трапе́зѣ духо́внѣй, ю́же угото́ва на́мъ Рома́нъ преподо́бный, вкуси́те я́стія и питія́ отъ трапе́зы сея́, бога́та бо е́сть зѣло́ оби́ліемъ вѣ́ры, и наде́жды и любве́ боже́ственныя, и цѣлому́дрія, му́жества, смире́нія и кро́тости, свѣ́та небе́снаго и ра́дости а́нгельскія, насы́тите ду́ши ва́ша и восхвали́те Бо́га, дарова́вшаго мíру таково́е свѣти́ло.

Да возра́дуется земля́ Се́рбская и епископíя Ни́шская, ми́лость бо Бо́жія на не́й излія́ся тобо́ю, о́тче богови́дче, сокро́вище бы́лъ еси́ духо́вныя си́лы и прему́дрости отъ ро́да въ ро́дъ; слѣпы́мъ прозрѣ́ніе и глухи́мъ слы́шаніе, разсла́бленнымъ оздравле́ніе, малоду́шнымъ утвержде́ніе, и всѣ́мъ вся́ да́руя. Сего́ ради́ веселя́тся вси́, творя́щіи па́мять твою́, свя́те Рома́не.

Сла́ва, преподо́бнаго, гла́съ 4. Никола́я.

Ангельстіи ли́цы дне́сь согла́сно съ на́ми ра́дуются, а́нгельскаго бо человѣ́ка па́мять пра́зднуемъ, иму́щаго внѣ́ и вну́трь о́бразъ а́нгельскій, мона́шества сто́лпъ и удобре́ніе, Це́ркве Правосла́вныя свѣти́ло небосвѣ́тлое, земли́ же Се́рбскія сокро́вище си́лы и святы́ни, Рома́на побѣдоно́снаго; тебѣ́ же, о́тче преподо́бне, воздвиза́емъ сердца́ на́ша съ любо́вію и весе́ліемъ, и съ труба́ми и а́рфами мы́сленными восхваля́емъ дѣла́ твоя́ чуде́сная и па́мять твою́ святу́ю.

И ны́нѣ, пра́здника, гла́съ 1:

Подоба́ше самови́дцамъ Сло́ва и слуга́мъ, и е́же по пло́ти Ма́тере Его́ успе́ніе ви́дѣти, коне́чное ели́ко на Не́й та́инство, я́ко да не то́кмо е́же отъ земли́ Спа́сово восхожде́ніе у́зрятъ, но и Ро́ждшія Его́ преставле́нію свидѣ́тельствуютъ. Тѣ́мже, отвсю́ду Боже́ственною си́лою собра́вшеся, Сіо́на достиго́ша, и на не́бо иду́щую предсыла́ху, вы́шшую Херуви́мъ, Ейже и мы́ съ ни́ми покланя́емся, я́ко моля́щейся о душа́хъ на́шихъ.

Славосло́віе вели́кое.
Тропа́рь Образа. Сла́ва, преподо́бнаго. И ны́нѣ, Успе́нія.
Ектеніи́ и отпу́стъ.



НА ЛИТУРГІИ,

Блаже́нна отъ кано́на пра́здника [Успе́нія], пѣ́снь 1-я, на 4, и Образа, пѣ́снь 3-я, на 4, и преподо́бнаго 6-я, на 4. Проки́менъ, гла́съ 4: Воспо́йте Го́сподеви пѣ́снь но́ву, я́ко ди́вна сотвори́ Госпо́дь. Сти́хъ: Ви́дѣша вси́ концы́ земли́ спасе́ніе Бо́га на́шего. И преподо́бнаго, гла́съ 7: Честна́ предъ Го́сподемъ сме́рть преподо́бныхъ Его́. Апо́столъ къ Колосса́емъ, зача́ло 250. И преподо́бнаго, къ Гала́томъ, зача́ло 213. Аллилу́ія, гла́съ 4: Го́споди, во свѣ́тѣ лица́ Твоего́ по́йдемъ, и о и́мени Твое́мъ возра́дуемся во вѣ́ки. [Сти́хъ: Ви́дѣша вси́ концы́ земли́ спасе́ніе Бо́га на́шего. И преподо́бнаго, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.] Ева́нгеліе отъ Луки́, зача́ло 48 отъ полу́. [И преподо́бнаго,] отъ Луки́, зача́ло 24. Прича́стенъ: Го́споди, во свѣ́тѣ лица́ Твоего́ по́йдемъ и о и́мени Твое́мъ возра́дуемся во вѣ́ки. [И преподо́бнаго: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Србљак. — Београд: Издаjе Свети Архиjереjски Синод Српске Православне Цркве, 1986. — С. 493-502.

Благодаримъ достопочтеннаго Зорана (Сербія) за помощь въ подготовкѣ текста къ публикаціи.

/ Къ оглавленію раздѣла /


Наверхъ / Къ титульной страницѣ

0