Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 26 сентября 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 16-й де́нь.
Слу́жба преподо́бнаго отца́ на́шего Іоаки́ма Осого́вскаго.

Отъ Еде́са пренесе́ніе въ Константи́нь гра́дъ Нерукотворе́ннаго о́браза Го́спода на́шего Іису́са Христа́, ре́кше свята́го Убру́са. И свята́го му́ченика Діоми́да. И преподо́бнаго отца́ на́шего Іоаки́ма Осого́вскаго, въ Сарандапо́рѣ просія́вшаго.

НА МАЛѢЙ ВЕЧЕРНИ,
Пое́мъ стихи́ры преподо́бному, гла́съ 1. Подо́бенъ: Небе́сныхъ чино́въ.

Яко звѣзда́ отъ восто́ка отъ пусты́ни возсія́, богому́дре о́тче Іоаки́ме. Правовѣ́ріе вельми́ проповѣ́дая, бѣсо́вскихъ преще́ній не убоя́лся еси́, тѣ́мъ тя́ Христо́съ со сла́вою въ вы́шняя селе́нія воспрія́тъ.

На тве́рдѣмъ ка́мени ду́шу свою́ основа́въ, я́ко со́лнце осія́лъ еси́ мíру чудесы́ твои́ми, преподо́бне о́тче Іоаки́ме. Тѣ́мже мо́лимъ тя́: просвѣти́ на́съ, грѣхо́вный мра́къ отгоня́я твои́ми моли́твами.

Сла́ва, гла́съ 6:

Боже́ственная благода́ть осѣня́етъ ра́ку моще́й твои́хъ, свяще́нне Іоаки́ме. И къ благово́нію мѵ́ра твоего́ притека́юще, исцѣле́ніе почерпа́емъ; ны́нѣ, о́тче преподо́бне, Христа́ Бо́га моли́ о душа́хъ на́шихъ.

И ны́нѣ, пра́здника, гла́съ 4. Подо́бенъ: Да́лъ еси́ зна́меніе.

Не колесни́ца огнезра́чная отъ земны́хъ Тя́ преста́ви, я́коже Илію́ пра́веднаго, но Са́мое Со́лнце пра́вды, на руку́ Свою́ пресвяту́ю Твою́ ду́шу, я́ко непоро́чную пріе́мъ, въ Себѣ́ упоко́и, и пресла́вно Тя́, Чи́стая, преста́вивъ, почте́, въ ра́дости па́че ума́.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Сни́демся, ли́цы оте́цъ, и́же въ пусты́няхъ, въ па́мять боже́ственнаго, му́драго Іоаки́ма, сла́вяще его́.

Сти́хъ: Честна́ предъ Го́сподемъ сме́рть преподо́бныхъ Его́.

Всѣ́хъ, и́же душе́ю притека́ютъ къ боже́ственному хра́му твоему́, спаси́ отъ бѣ́дъ, богому́дре, преблаже́нне, Іоаки́ме.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Собо́ръ честны́хъ оте́цъ собра́ ся́ и со ученики́ твои́ми боже́ственнѣй твое́й ра́цѣ вси́ прикаса́емся.

Сла́ва, и ны́нѣ, гла́съ 4:

Пріиди́те, о празднолю́бцы, Бо́жія Ма́тере дне́сь свято́е преставле́ніе свѣ́тло соверши́мъ: въ ру́цѣ бо и́стинно, отъ нетлѣ́нна Отца́ возсія́вшаго пе́рвѣе, и напослѣ́докъ изъ утро́бы Ея́, боже́ственную и пречи́стую ду́шу предаде́, ра́дующися, Іису́са, Бо́га на́шего, и мо́литъ спасти́ся на́мъ.

Тропа́рь, гла́съ 1:

Пусты́нный граждани́нъ, и во пло́ти а́нгелъ, и чудотво́рецъ показа́лся еси́, богоно́се о́тче на́шъ Іоаки́ме; поще́ніемъ, бдѣ́ніемъ и моли́твами, небе́сныя да́ры пріе́мъ, исцѣля́еши неду́жныя и ду́ши приходя́щихъ къ тебѣ́ вѣ́рою. Сла́ва Да́вшему ти́ крѣ́пость, сла́ва Вѣнча́вшему тя́, сла́ва Даю́щему тобо́ю всѣ́мъ исцѣле́нія.

[Сла́ва, и ны́нѣ, тропа́рь] другíй, пра́здника, гла́съ 1:

Въ рождествѣ́ дѣ́вство сохрани́ла eси́, во успе́ніи мíра не оста́вила eси́, Богоро́дице, преста́вилася eси́ къ животу́, Ма́ти су́щи Живота́, и моли́твами Твои́ми избавля́еши отъ сме́рти ду́ши на́ша.


НА ВЕЛИЦѢЙ ВЕЧЕРНИ,
Пое́мъ: Блаже́нъ му́жъ.., 1-й антифо́нъ. На Го́споди воззва́хъ.., ста́вимъ стихо́въ 10, и пое́мъ стихи́ры: Убру́са 3, Богоро́дицы 1 и свята́го отца́ 6. Убру́са, гла́съ 4. Подо́бенъ: Зва́нный свы́ше.

Иже во зра́цѣ Бо́жіи Бо́гъ Сы́й, я́ко сла́вы сія́ніе и изображе́ніе Отчее, за милосе́рдіе безмѣ́рное хотѣ́ніемъ Боже́ственнымъ о́бразъ ви́дѣнъ бы́сть, раба́ носи́въ зра́къ. Сего́ подо́біе еди́нъ, я́коже вѣ́сть Са́мъ, извѣ́стно вообрази́ богоначерта́нно въ подо́біи лица́ Своего́. Его́же прише́ствіемъ совокупи́ съ человѣ́ки а́нгелъ мно́жество и просвѣти́ мíръ ви́димый и неви́димый.

Иже боговидѣ́ніемъ иногда́ за́днихъ Моисе́ово лице́ просла́вивый Бо́гъ и тѣ́мъ богоначерта́нный зако́нъ посла́лъ невѣ́рующимъ изра́ильтескимъ лю́демъ, се́ пріи́де, я́ко отъ Еги́пта, отъ земли́ иноро́дныя прише́дъ, во христоимени́тый гра́дъ но́выхъ люде́й Боже́ственнымъ начерта́ніемъ первообра́знаго Его́ стра́шнаго о́браза. Его́же, лице́мъ къ лицу́ ви́дѣти сподобля́еміи, сла́вимъ.

Иже ца́рствуяй тва́рію все́ю, нищету́ во́льную пріе́мь, обогаща́етъ Божество́мъ позна́вшихъ Его́ госпо́дство, тѣ́мже и ко Авгарю богоначерта́нна пи́смена посла́въ, прося́щему спасе́нія и здра́вія сему́, е́же отъ подо́бія Твоего́ зра́ка Боже́ственнаго. Его́же прише́ствіе ра́достно пра́зднующе ны́нѣ, возвесели́мся вѣ́рою, просвѣще́ніе почерпа́юще.

Ина стихи́ра, Богоро́дицы, гла́съ 4. Подо́бенъ: Да́лъ еси́ зна́меніе.

Чу́до преужа́сно: Яже во утро́бѣ невмѣсти́маго Царя́ носи́вшая во гро́бѣ полага́ется, и а́нгельстіи собо́ри со апо́столы со стра́хомъ погреба́ютъ Тоя́ богопрія́тное тѣ́ло и честно́е, и сіе́ возвы́сивъ, на небеса́ возведе́ Іису́съ, Сы́нъ Ея́ и Спа́съ ду́шъ на́шихъ.

Ины стихи́ры, свято́му отцу́, гла́съ 8. Самогла́сны.

Преподо́бне о́тче Іоаки́ме, ты́ вои́стину яви́лся еси́ по́стникомъ похвала́, правовѣ́рію крѣ́пость, вселе́ннѣй свѣти́ло незаходя́щее, льсти́ваго врага́ не убоя́вся и престраше́нія безбо́жнаго не ужаси́вся, о благода́ти Бо́жіи, блаже́нне, е́юже прему́дренно попра́ ле́сть безбо́жную, отъ нея́ же изба́ви на́съ.

Преподо́бне о́тче Іоаки́ме, ты́ вои́стину взыска́лъ еси́ Бо́га, и Того́ свѣ́та свѣ́тлыхъ сія́ній благоче́стія жела́я, ца́рскія дво́ры оста́вивъ, безсме́ртное наслѣ́діе прія́тъ, со Христо́мъ ны́нѣ водворя́ешися, богоблаже́нне.

Отче богому́дре Іоаки́ме, струя́ми сле́зными у́мъ сво́й просвѣти́лъ еси́ и къ Бо́гу бесѣ́довалъ еси́, пресвѣ́тлыми чистота́ми я́ко сто́лпъ всесвѣ́телъ, благоче́стія свѣ́томъ сія́я, яви́лся еси́, блаже́нне, мона́хомъ похвала́, и ны́нѣ всѣ́хъ на́съ сохраня́й твои́ми моли́твами.

Ины стихи́ры, гла́съ 6. Подо́бенъ: Все́ отло́жше.

Все́ житіе́ жела́нное къ Бо́гу предложи́въ, мíра красоту́ я́ко тлѣ́ющую оста́вилъ еси́, и себе́ Христу́ преда́лся еси́, преподо́бне. Образомъ поще́нія очища́яся, и терпѣ́ніемъ противле́нія, по́двиги смире́нія укроща́я пло́ть, богому́дренно подъя́лся еси́, прія́лъ еси́ вѣне́цъ неувяда́емь.

Преподо́бне о́тче Іоаки́ме, ты́ оте́ческаго видѣ́нія отлучи́вся, пло́ти отве́ргся, къ Бо́гу приближи́лся еси́, та́мо су́щими свѣтя́ся заря́ми, благода́тными луча́ми манове́нія облиста́емь, и къ Нему́ преше́дъ, богоно́се, блаже́нъ еси́ ны́нѣ, со дерзнове́ніемъ Христу́ Бо́гу моли́ся о душа́хъ на́шихъ.

Преподо́бне о́тче Іоаки́ме, свяще́ннымъ Бо́жіимъ путе́мъ вои́стину подвиза́вся, правовѣ́рно Христо́ву Це́рковь до́брѣ устро́илъ еси́, богозна́меньми вся́ къ ра́зуму наставля́я, а́нгельски на земли́ пожи́въ, и преста́влься, прія́лъ еси́ да́ръ Ца́рствія Его́, ны́нѣ со святы́ми моли́ся о душа́хъ на́шихъ.

Сла́ва, гла́съ 6:

Еже по о́бразу соблю́дъ невреди́мо, умо́мъ влады́ки на стра́сти губи́тельныя по́стнически утверди́вся, ко е́же по подо́бію, я́ко мо́щно, пріи́де, му́жески бо естество́ изнури́въ, потща́лся еси́ ху́ждшая покори́ти лу́чшему, и пло́ть поработи́ти ду́ху. Тѣ́мже и мона́шествующимъ показа́лся еси́ ве́рхъ, граждани́нъ пусты́нный, благотеку́щій и поспѣ́шникъ, пра́вило добродѣ́тели. И ны́нѣ на небесѣ́хъ, со у́зъ тѣ́ла разрѣши́вся, богому́дре, чи́сто зри́ши Святу́ю Тро́ицу, моля́ся о на́съ вѣ́рою и любо́вію чту́щихъ тя́.

И ны́нѣ, Богоро́дицы, гла́съ 8:

Дѣви́честіи ли́цы дне́сь та́йно одру́ Дѣ́вы и Ма́тере о́крестъ предстоя́тъ, и ду́ши пра́ведныхъ, обступи́вше, Цари́цу сла́вятъ. Ови у́бо я́ко да́ръ дѣ́вство вмѣ́сто мѵ́ра прино́сятъ, о́ви же невеще́ственное пѣ́ніе съ добродѣ́телію прино́сятъ, подоба́етъ бо Ма́тери Бо́жіи я́ко Цари́цѣ ца́рскими добродѣ́тельми свѣтлосія́ющими дориноси́тися. Съ ни́миже и мы́, житіе́ чи́стое совне́сше, изы́демъ къ погребе́нію су́щія Ма́тере Бо́га на́шего, пѣ́ньми и пѣ́сньми духо́вными согла́сно Ю ублажа́юще.

Вхо́дъ. Проки́менъ дне́. Чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 1:

Кíими похвала́ми, Христе́ Бо́же, возмо́жемъ вѣнча́ти преподо́бнаго отца́ Іоаки́ма? Его́же избра́въ, десни́цею Свое́ю вѣнча́лъ еси́, явля́я его́ свѣти́ло, пусты́ню просвѣща́ющее, рѣ́ки исцѣле́нія неду́жнымъ источа́юща и врачбы́ неоску́дную подаю́ща всѣ́мъ притека́ющимъ къ ра́цѣ моще́й его́.

Свѣти́ла небе́сная, ку́пно же верте́пи, и про́пасти, и звѣ́ріе ди́віи удиви́шася о тебѣ́, преподо́бне, ви́дѣвше твоя́ неизрече́нная чудеса́, блаже́нне, и́миже тя́ просла́ви Христо́съ Бо́гъ, не́мощныя исцѣля́ти и а́лчущія пита́ти. На́мъ же, чту́щимъ святу́ю па́мять твою́, испроси́ ве́лію ми́лость.

Преподо́бне о́тче на́шъ, изъ мла́дости добродѣ́тели прилѣжа́я, це́рковь бы́лъ еси́ Пресвята́го Ду́ха, отъ Него́ крѣ́пость пріе́мъ неду́ги прогоня́ти, человѣ́ки науча́еши о земны́хъ веще́й нерадѣ́ти. Ны́нѣ же, Бо́жія свѣ́та ра́достно наслажда́яся, просвѣти́ на́шу мы́сль, чту́щихъ тя́, блаже́нне Іоаки́ме.

Христо́ва рачи́теля, тезоимени́таго безсме́ртію, и́стиннаго учени́ка Христо́ва, красоту́ и похвалу́, единообра́знаго, всѣ́мъ наста́вника, освяще́ннаго отъ младе́нчества Го́сподемъ, ли́цы оте́цъ, соше́дшеся, восхва́лимъ. Се́й бо жела́ніе боже́ственное въ себѣ́ пріе́мь, мірску́ю у́бо оста́ви пре́лесть, взе́мъ же я́ко яре́мъ Кре́стъ Христо́въ на ра́мо, полки́ бѣсо́въ побѣди́ му́жески, и на́мъ Боже́ственныя любве́ изря́дный пу́ть показа́ дѣ́тельно, и́бо и са́мъ тща́ніемъ дости́же Свѣ́тъ и́стинный, Тро́ицы Вседѣ́тельныя. О, чудесе́ ужа́сному и ве́щи богоподо́бнѣй! Яко зе́мень сы́й естество́мъ, ра́венъ бы́сть мы́сленнымъ существо́мъ, сла́ву и че́сть боже́ственную воспріе́мля, и моли́твенникъ на́мъ быва́етъ, я́ко да улучи́мъ вѣ́чныхъ бла́гъ во де́нь Су́дный.

Сла́ва, гла́съ 6:

Оте́ческую добро́ту, по́стникомъ украше́ніе, исто́чника чуде́съ и къ Бо́гу моли́твенника непосты́дна, сте́кшеся, о празднолю́бцы, пѣ́сньми и похвала́ми воспои́мъ, глаго́люще: ра́дуйся, и́ноческаго житія́ пра́вило, о́бразъ и печа́ть извѣ́стная; ра́дуйся, свѣти́льниче пресвѣ́тлый, озаря́яй вся́ свѣтлостьми́ добродѣ́телей; ра́дуйся, и́же въ бѣда́хъ вели́кій утѣ́шителю и те́плый предста́телю. Ты́ у́бо, о́тче Іоаки́ме, не преста́й моли́тися Христу́ Бо́гу о ста́дѣ свое́мъ се́мъ, и о всѣ́хъ вѣ́рно почита́ющихъ всечестно́е успе́ніе твое́.

И ны́нѣ, пра́здника, гла́съ 8. Лео́нта деспо́та:

Увѣря́я Іису́съ, Сы́нъ Тво́й, Богоро́дице, и Бо́гъ на́шъ, два́ естества́ Своя́, я́ко у́бо человѣ́къ умира́етъ и я́коже Бо́гъ востае́тъ. И Тя́, Богома́ти, зако́номъ естества́ умре́ти благоизво́ли, да не невѣ́рнымъ привидѣ́ніе мни́тся смотре́ніе. Прешла́ бо еси́ къ небе́снѣй странѣ́, небе́сная Невѣ́сто, я́ко отъ черто́га селе́нія Твоего́ отъ земли́ взята́. Освяти́ся возду́хъ восхожде́ніемъ Твои́мъ, я́ко просвѣти́ся земля́ рождество́мъ Твои́мъ, предпосыла́ютъ апо́столи, и а́нгели подъе́млютъ. Тѣ́мже, погре́бше пречи́стое тѣ́ло Твое́ и надгро́бное пѣ́ніе воспѣ́вше, ужа́сно зря́ху и со стра́хомъ глаго́лаху: сія́ измѣ́на десни́цы Вы́шняго, То́й бо посреди́ Тебе́, и не подви́жешися. Но, о Многопѣ́тая Ма́ти, не отступа́й, на́съ назира́ющи: мы́ бо лю́діе Твои́ и о́вцы па́жити Твоея́, и и́мя Твое́ призыва́емъ, прося́ще Тебе́ ра́ди спасе́нія и ве́лія ми́лости.

На стихо́внѣ стихи́ры самогла́сны, гла́съ 2:

Моще́й твои́хъ ра́ка, всехва́льный о́тче, источа́етъ исцѣле́ніе, и свята́я твоя́ душа́, со а́нгелы совоку́пльшися, досто́йно ра́дуется, имѣ́я къ Бо́гу дерзнове́ніе, и со безпло́тными лику́я на небесѣ́хъ, Того́ моли́ спасти́ся душа́мъ на́шимъ.

Сти́хъ: Честна́ предъ Го́сподемъ сме́рть преподо́бныхъ Его́.

Исто́чникъ чуде́съ и рѣ́ку дарова́ній человѣ́комъ, ра́ку твои́хъ моще́й показа́ Госпо́дь, о́тче Іоаки́ме, прему́дре, слѣпы́мъ е́же ви́дѣти сія́ дарова́ся, прокаже́ннымъ же очище́ніе, одержи́мыя же нечи́стыми ду́хи отъ власте́й и́хъ избавля́етъ и цѣлому́дры твори́тъ.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Ра́дуйся, по́стникомъ свѣти́ло, и́ночествующимъ звѣздо́, па́стыремъ похвало́, о́тче Іоаки́ме, преподо́бныхъ собесѣ́дниче; ра́дуйся, Тро́ицы жили́ще; ра́дуйся, любви́ милова́нія исто́чниче; ра́дуйся, пресвѣ́тлый свѣти́льниче разсужде́нія; ра́дуйся, добродѣ́тели пра́вило пра́вое и сто́лпе одушевле́нный.

Сла́ва, гла́съ 8:

Мона́ховъ мно́жества, наста́вника тя́ почита́емъ, о́тче на́шъ Іоаки́ме, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ и вра́жію обличи́лъ еси́ си́лу, а́нгеловъ собесѣ́дниче, преподо́бныхъ и пра́ведныхъ соприча́стниче, съ ни́миже моли́ся Го́сподеви, поми́ловатися душа́мъ на́шимъ.

И нынѣ, праздника, гла́съ 2. Анато́ліево.

Яже небе́съ вы́шшая су́щи, и херуви́мъ сла́внѣйшая, и всея́ тва́ри честнѣ́йшая, я́же премно́гія ра́ди чистоты́, Присносу́щнаго Существа́ прія́телище бы́вши, въ Сыно́внѣ ру́цѣ дне́сь всесвяту́ю предае́тъ ду́шу, и съ Не́ю исполня́ются вся́ческая ра́дости, и на́мъ да́руетъ ве́лію ми́лость.

На благослове́ніи хлѣ́бовъ, [тропа́рь Убру́су], гласъ 2:

Пречи́стому Твоему́ о́бразу покланя́емся, Благíй, прося́ще проще́нія прегрѣше́ній на́шихъ, Христе́ Бо́же: во́лею бо благоволи́лъ еси́ пло́тію взы́ти на Кре́стъ, да изба́виши, я́же созда́лъ еси́, отъ рабо́ты вра́жія. Тѣ́мъ благода́рственно вопіе́мъ Ти́: ра́дости испо́лнилъ еси́ вся́, Спа́се на́шъ, прише́дый спасти́ мíръ.

Сла́ва, преподо́бнаго, гла́съ 1:

Житіе́ свое́ устро́илъ еси́, бога́тствомъ ду́шу свою́ стяжа́лъ еси́, благослове́нне о́тче Іоаки́ме богому́дре, сна́ бо очи́ма твои́ма николи́же да́лъ еси́, безпреста́нныя мольбы́ къ Бо́гу приноси́лъ еси́, мы́ же мо́лимся тебѣ́: непреста́нно моли́ спасти́ся душа́мъ на́шимъ.

И ны́нѣ, пра́здника, гла́съ 1: Въ рождествѣ́ дѣ́вство... [Пи́санъ на ма́лѣй вече́рни.]



НА УТРЕНИ,
[На Бо́гъ Госпо́дь: Тропа́рь Убруса, гла́съ 2, два́жды. Сла́ва, тропа́рь преподо́бному: Пусты́нный жи́тель... И ны́нѣ, тропа́рь пра́здника: Въ рождествѣ́ дѣ́вство...]

По 1-й стихоло́гіи сѣда́ленъ, гла́съ 1. Подо́бенъ: Гро́бъ Тво́й.

Гро́бъ тво́й, о́тче Іоаки́ме, исто́чникъ яви́ся, источа́я благода́ть исцѣле́нія всегда́, вѣ́рно притека́ющимъ къ моще́мъ твои́мъ, блаже́нне. Тѣ́мже и мы́ вопіе́мъ ти́: сподо́би на́съ, моли́твами твои́ми, исцѣле́ніе прія́ти отъ страсте́й на́шихъ. Сла́ва, то́йже.

И ны́нѣ, пра́здника, гла́съ 1. Подо́бенъ: Ка́мени запеча́тану.

Ли́къ боже́ственныхъ апо́столъ собра́ся погребсти́ Тя прече́стно, Богоро́дице Всечи́стая, съ ни́миже и а́нгельстіи чи́ни воспѣва́ху преставле́ніе Твое́, взыва́юще прехва́льно. Съ ни́миже и мы́, любо́вію игра́юще, Чи́стая, хвалу́ Тебѣ́ прино́симъ, гла́сы пѣ́сненными, вѣ́рніи, и вопіе́мъ: ра́дуйся, Предста́тельнице присночту́щихъ Тя́.

По 2-й стихоло́гіи сѣда́ленъ, гла́съ 4.

Многосвѣ́тлая звѣзда́ мона́шествующимъ показа́лся еси́ и степе́нь извѣ́стна, воздержа́нія же предѣ́лъ, пресвѣ́тлое зерца́ло разсужде́нія, преподо́бне, и́хже па́мять твою́ соверша́ющихъ, про́симъ разрѣше́нія грѣхо́въ отъ тебе́, треблаже́нне о́тче, Го́сподеви предстоя́. Сла́ва, то́йже.

И ны́нѣ, пра́здника, гла́съ 4. Подо́бенъ: Удиви́ся Іо́сифъ.

Зря́ще вои́стинну а́нгельская во́инства преставле́ніе Твое́, Пресвята́я Влады́чице Чи́стая, Благослове́нная Всепѣ́тая Богоро́дице, иму́ще во́лею рожде́нна изъ Тебе́, ли́къ учени́къ собра́вшеся, съ весе́ліемъ ноша́ху честно́е въ ра́й тѣ́ло Твое́, Христа́ пою́ще, Живода́вца су́ща во вѣ́ки.

По поліеле́и сѣда́ленъ, гла́съ 8. Подо́бенъ: Прему́дрости.

Видѣ́ніе и дѣя́ніе воспріе́мь, чу́вствія преподо́бно украша́я, житіе́ напра́вилъ еси́ къ Боже́ственнымъ повелѣ́ніемъ, мона́хомъ бо яви́лся еси́ свѣти́льникъ свѣ́телъ, наставля́я и просвѣща́я на́съ къ позна́нію. Тѣ́мже, восхваля́юще, велича́емъ любо́вію исхо́дную па́мять твою́, преподо́бне о́тче на́шъ Іоаки́ме; сего́ ра́ди вопіе́мъ ти́: моли́ Христа́ Бо́га грѣхо́въ оставле́ніе пода́ти, чту́щимъ любо́вію святу́ю па́мять твою́. Сла́ва, то́йже.

И ны́нѣ, гла́съ 3. Подо́бенъ: Красотѣ́ дѣ́вства Твоего́.

Въ рождествѣ́ Твое́мъ зача́тіе безсѣ́менное, во успе́ніи Твое́мъ ме́ртвость нетлѣ́нная, чу́до въ чудеси́ сугу́бо стече́ся Богоро́дице: ка́ко бо Неискусому́жная, Младопита́тельница чиста́ су́щи? Ка́ко же Ма́ти Бо́гу мертвоно́сна мѵроуха́ющи? Тѣ́мже со Ангеломъ вопіе́мъ Ти́: ра́дуйся, Благода́тная.

Та́же степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе Луки́, зача́ло 48, отъ полу́.

По 50-мъ псалмѣ́ стихи́ра, гла́съ 6:

Гора́, небеси́ подобля́шеся, пріе́млющи свѣти́льника пусты́ннаго, отца́ Іоаки́ма, я́ко ма́ти младе́нца, стара́ніемъ оте́ческимъ. Ты́ же, преподо́бне о́тче, я́ко оре́лъ Святы́мъ Ду́хомъ прелета́я го́ры и верте́пы Осого́вскія вы́спренно, красноду́шіемъ просвѣща́я вѣ́рныя, притека́ющія къ честно́му твоему́ гро́бу, [тѣ́мже] весе́ліемъ воспои́мъ: съ Богоро́дицею моли́ спасти́ся душа́мъ на́шимъ.

Кано́нъ Богоро́дицы на 2, Нерукотворе́ннаго о́браза на 4, преподо́бнаго отца́ на 6.

Кано́нъ Богоро́дицы, ки́ръ Космы́, гла́съ 1.
Пѣ́снь 1.

Ирмо́съ: Преукраше́нная Боже́ственною сла́вою, свяще́нная и сла́вная, Дѣ́во, па́мять Твоя́, вся́ собра́ къ весе́лію вѣ́рныя, начина́ющей Маріа́мѣ, съ ли́ки и тимпа́ны, Твоему́ пою́ще Единоро́дному: сла́вно я́ко просла́вися.

Да провожда́ютъ невеще́ственніи чи́нове, небоше́ственное въ Сіо́нъ Боже́ственное тѣ́ло Твое́, внеза́пу же сте́кшеся апо́столъ мно́жество отъ коне́цъ, Богоро́дице, Тебѣ́ предста́ша а́біе, съ ни́миже, Чи́стая, Твою́ честну́ю, Дѣ́во, па́мять сла́вимъ.

Побѣ́дныя по́чести взяла́ еси́ на естество́, Чи́стая, Бо́га ро́ждши, оба́че же, подо́бящися Творцу́ Твоему́ и Сы́ну, па́че естества́ повину́ешися есте́ственнымъ зако́номъ. Тѣ́мже уме́рши, съ Сы́номъ востае́ши вѣ́чнующи.

Другíй кано́нъ Образа, гла́съ 6.
Пѣ́снь 1.

Ирмо́съ: Волно́ю морско́ю, Скры́вшаго дре́вле гони́теля мучи́теля — подъ земле́ю скры́ша, спасе́нныхъ о́троцы; но мы́, я́ко отрокови́цы, Го́сподеви пои́мъ, сла́вно бо просла́вися.

Свы́ше благода́ть Боже́ственная, мíръ ны́нѣ земны́й озаря́ющи, свои́ми дарова́ніи наполня́етъ воспѣва́ющія: Го́сподеви пои́мъ, сла́вно бо просла́вися.

Подоба́ше принести́ся къ Ца́рствующему всѣ́ми гра́ды, небесе́ и земли́ Царя́, о́браза начерта́нію, е́же о́нъ, вопло́щся самодѣ́льно, омочи́, царе́й христолюби́выхъ поспѣше́ньми.

Богоза́рныя лучи́ исполня́ху, все́ уясня́юще и украша́юще человѣ́ческое существо́, отъ о́браза исходя́ще, его́же покрыва́ютъ серафи́ми сла́вою Христо́вою.

Богоро́диченъ: Возвраща́ема къ земли́ и́же отъ земли́, Богоблагода́тная, пре́лестію врага́, на Тя́ бо соше́дшаго вопло́щши Бо́га па́че ума́, отъ земли́ взе́мши, къ небеси́ вознесла́ еси́.

Инъ кано́нъ преподо́бнаго отца́, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Свѣти́ло да́нное пусты́ннымъ, красноблаже́нне о́тче Іоаки́ме, омраче́нное мое́ се́рдце съ душе́ю просвѣти́, молю́тися, твои́ми моли́твами мра́къ отгна́въ и прича́стіе свѣ́та испроси́.

Во чи́стѣй и непоро́чнѣй жи́зни добродѣ́тельми, свя́те, по́стникомъ свѣти́ло бы́сть, богогла́се, я́коже дре́вле Самуи́лъ прозира́я бу́дущая, по обѣтова́нію бы́въ сосу́дъ пречестны́й Ду́ху Пресвято́му.

Яснымъ житіе́мъ, преблаже́нне, сія́я я́ко а́нгелъ, изъ ю́ности у́бо бы́лъ еси́ сосу́дъ пречестны́й, вы́ше житія́ возше́дъ человѣ́ча, богому́дре, добродѣ́тельми ду́шу при́сно вѣнчава́я, о́тче Іоаки́ме.

Отъ ю́ности сиса́въ добродѣ́тель воздержа́нія, болѣ́зньми и по́ты по́стническими му́жества дости́глъ еси́ и въ мѣ́ру духо́внаго приспѣ́лъ еси́ во́зраста Христо́ва, о́тче преподо́бне.

Стра́сти плотскíя покори́въ и пучи́ну грѣхо́въ преше́дъ, къ ти́хому приста́нищу безстра́стія немо́кренно устреми́лся еси́, о́тче преподо́бне.

Богоро́диченъ: Сло́во, е́же безъ ма́тере изъ Отца́, Сего́ напослѣ́докъ богому́жно родила́ еси́ Еди́наго, Богома́ти, я́ко вы́шши всѣ́хъ тва́рей.

Катава́сія: Кре́стъ начерта́въ, Моисе́й впря́мо жезло́мъ Чермно́е пресѣче́, Изра́илю пѣшеходя́щу; то́же обра́тно фарао́новымъ колесни́цамъ, уда́ривъ, совокупи́, вопреки́ написа́въ непобѣди́мое ору́жіе. Тѣ́мъ Христу́ пои́мъ, Бо́гу на́шему, я́ко просла́вися.

Пѣ́снь 3.

Богоро́дицы. Ирмо́съ: Содѣ́тельная и содержи́тельная всѣ́хъ, Бо́жія Му́дросте и Си́ло, непрекло́нну, недви́жиму Це́рковь утверди́, Христе́, еди́нъ бо еси́ Свя́тъ, во святы́хъ почива́яй.

Жену́ Тя́ ме́ртвенну, но па́че естества́ и Ма́терь Бо́жію, ви́дѣвше, Всенепоро́чная, сла́вніи апо́столи, ужа́сно прикаса́хуся рука́ми сла́вою облиста́ющей, я́ко богопрія́тное Селе́ніе ви́дяще.

Пости́же ру́цѣ досади́тельныя де́рзаго, усѣче́ніемъ су́дъ нане́съ, Бо́гу сохра́ншу че́сть одушевле́нному Киво́ту, сла́вою Божества́, въ Не́мже Сло́во пло́ть бы́сть.

Другíй.

Образа. Ирмо́съ: Тебе́, на вода́хъ повѣ́сившаго всю́ зе́млю неодержи́мо, тва́рь, ви́дѣвши на Ло́бнѣмъ ви́сима, у́жасомъ мно́гимъ содрога́шеся, нѣ́сть свя́тъ, ра́звѣ Тебе́, Го́споди, взыва́ющи.

Тебе́ сотво́ршаго человѣ́ка по о́бразу пе́рвѣе, въ о́ньже вообрази́ся а́біе за милосе́рдіе, пріе́мша вои́стинну подо́біе неизмѣ́нное, со а́нгелы, Христе́, сла́вимъ.

Ты́ жела́ющимъ благопристу́пенъ, и́щущимъ же всѣ́мъ благопослушли́въ, Ще́дре, за мно́гую благосты́ню, ея́же ра́ди приближе́ніемъ, Влады́ко, красотѣ́ Твоего́ раче́нія чуди́мся.

Уста́вилъ еси́ мѣ́стному кня́зю жела́нія, е́же къ Тебѣ́ любо́вь, вку́пѣ же и неду́гъ, ти́химъ Тво́имъ пода́ніемъ, вседѣ́тельною держа́вою Твое́ю, ви́дѣвшу Тя́, Спа́се, во изображе́ніи.

Богоро́диченъ: Мѣ́сто Тя́ Госпо́дне, Всепѣ́тая, Дави́дъ преднаписа́, хотя́щее яви́тися, Иже бо ника́коже вмѣсти́мый во Твое́ чре́во вмѣсти́ся и облага́ется пло́тію ве́щною Невеще́ственный.

Инъ.

Преподо́бнаго отца́. Ирмо́съ: Утверже́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, еди́не Человѣколю́бче.

Поще́ніемъ процвѣте́ цвѣ́тъ богоразу́мный, непло́дная ложесна́ разверза́я, я́коже дре́вле Самуи́лъ и Предте́ча, святы́й Крести́тель, съ ни́миже, богогла́се о́тче, ны́нѣ за на́съ моли́ся.

Утвержде́ніе всѣ́мъ яви́ тя́ Влады́ка, цѣлому́дріемъ украси́въ пусты́ннымъ, сла́дости же исто́чникъ и удержа́ніе похоте́й о́бразъ тя́ показа́.

Сла́дости духо́вныя испо́лни пусты́ню Осого́вскую, я́ко исто́чникъ кипя́щій благода́тію сія́я, де́монскія ле́сти вся́ искорени́въ, тѣ́мже воспрія́лъ еси́ вѣне́цъ побѣ́ды, о́тче Іоаки́ме.

Возше́дъ на высоту́ безстра́стія и добродѣ́телей, во мра́къ боговидѣ́нія вше́лъ еси́, преподо́бне о́тче Іоаки́ме, и прія́лъ еси́ въ се́рдцѣ свое́мъ зако́нъ Боже́ственный, и́мже укрѣпле́нъ, мона́шествующимъ свѣти́льникъ пресвѣ́тлъ бы́лъ еси́, о́тче преподо́бне.

Плодови́тая ма́слина въ дому́ Госпо́дни я́вѣ насажде́нъ яви́лся еси́, о́тче, ма́сломъ по́двиговъ свои́хъ умасти́ лица́ на́ша, восхваля́ющихъ твоя́ чудеса́, Іоаки́ме преподо́бне.

Нестяжа́тельное житіе́ пожи́въ, преблаже́нне, пти́цамъ подо́бно кри́лы безстра́стія облегча́емь, ра́дуяся, вы́шнія дости́глъ еси́ оби́тели, сего́ ра́ди вѣ́рою тя́ ублажа́емъ.

Богоро́диченъ: Лѣ́ностію житіе́ мое́ ижди́хъ и грѣхми́ се́рдце оскверни́хъ, приступа́ю къ Тебѣ́, Влады́чице, умиле́ніемъ души́, и молю́ся: уще́дри и спаси́ мя.

Катава́сія: Же́злъ во о́бразъ та́йны пріе́млется, прозябе́ніемъ бо предразсужда́етъ свяще́нника; неплодя́щей же пре́жде Це́ркви, ны́нѣ процвѣте́ Дре́во Креста́, въ держа́ву и утвержде́ніе.

Конда́къ Успе́нія, гла́съ 2:

Въ моли́твахъ неусыпа́ющую Богоро́дицу и въ предста́тельствахъ непрело́жное упова́ніе, гро́бъ и умерщвле́ніе не удержа́ста: я́коже бо Живота́ Ма́терь, къ животу́ преста́ви, во утро́бу Всели́выйся приснодѣ́вственную.

[Икосъ:

Огради́ моя́ помышле́нія, Христе́ мо́й, и́бо Стѣ́ну мíра воспѣ́ти дерза́ю, Чи́стую Ма́терь Твою́, на столпѣ́ глаго́лъ укрѣпи́ мя, и въ тя́жкихъ мы́слехъ заступи́ мя, Ты́ бо взыва́ющимъ и прося́щимъ вѣ́рою моле́нія исполня́еши. Ты́ мнѣ́ у́бо да́руй язы́къ прино́сенъ и по́мыслъ непосты́денъ: вся́кое бо дая́ніе сія́нія отъ Тебе́ низпосыла́ется, Свѣтопода́телю, во утро́бу всели́выйся приснодѣ́вственную].

Сѣда́ленъ преподо́бнаго отца́, гла́съ 8. Подо́бенъ: Прему́дрости.

Страда́нія болѣ́зньми искуша́емь, страда́ньми же утвержда́емь поще́нія, зла́та свѣтлѣ́йшій благоче́стіемъ облиста́лъ еси́, и чи́стое прія́телище бы́лъ еси́ Ду́хови, лука́выхъ ду́хъ тму́ разгна́въ. Тѣ́мъ со́бранному мно́жеству благочести́выхъ бы́лъ еси́ па́стырь и свѣти́льникъ свѣ́телъ, Іоаки́ме блаже́нне, моли́ Христа́ Бо́га, грѣхо́въ оставле́ніе дарова́ти чту́щимъ любо́вію святу́ю па́мять твою́.

Сла́ва, Образа, гла́съ 4. Подо́бенъ: Вознесы́йся.

Сше́дый съ небесе́ за милосе́рдіе ми́лости, Благоутро́бне Спа́се, пло́ти Твоея́ пресвяты́я дне́сь пречи́стый зра́къ, гра́ду чту́щему Тя́, и лю́демъ христоимени́тымъ сокро́вище по́далъ еси́, я́ко тве́рдо всеору́жіе, отъ него́же почерпа́юще освяще́ніе, сего́ вѣ́рою те́плѣ пріи́мемъ.

И ны́нѣ, пра́здника. Подо́бенъ то́йже:

Въ ру́цѣ Сы́на Твоего́ и Бо́га ны́нѣ преда́вши ду́шу святу́ю, ни тѣ́ло же оста́вила еси́ во гро́бѣ: я́коже бо прія́тъ Жи́знь всѣ́хъ, си́це по сме́рти къ Животу́ преста́вльшися, Богоро́дицу Тя́ и́стинную вѣ́дущимъ источа́еши живо́тъ вѣ́чный.

Пѣ́снь 4.

Кано́нъ Богоро́дицы. Ирмо́съ: Рѣ́чи проро́ковъ и гада́нія, воплоще́ніе прояви́ша отъ Дѣ́вы Твое́, Христе́: сія́ніе блиста́нія Твоего́ во свѣ́тъ язы́ковъ изы́детъ, и возгласи́тъ Тебѣ́ бе́здна съ весе́ліемъ: си́лѣ Твое́й сла́ва, Человѣколю́бче.

Ви́дите лю́діе и чуди́теся: Гора́ бо свята́я и я́вственная Бо́гу въ небе́сныя оби́тели превы́шше взе́млется, Не́бо земно́е въ небе́сное и нетлѣ́нное селе́ніе вселя́емо.

Жи́зни присносу́щныя и лу́чшія, сме́рть Твоя́ бы́сть прехожде́ніе, Чи́стая, отъ привре́менныя къ Боже́ственнѣй вои́стинну и непреходи́мѣй, преставля́я Тя́, Чи́стая, въ весе́ліи Сы́на зрѣ́ти Твоего́ и Го́спода.

Другíй.

Образа. Ирмо́съ: На Крестѣ́ Твое́ Боже́ственное истоща́ніе прови́дя Авваку́мъ, ужа́сся, вопія́ше: Ты́ си́льныхъ пресѣ́клъ еси́ держа́ву, Бла́же, приобща́яся су́щимъ во а́дѣ, я́ко Всеси́ленъ.

Иже ца́рскимъ благолѣ́піемъ обложе́ни ны́нѣ, и́же отъ Него́же ца́рствовати учини́шася, сла́вяще, благолѣ́пное отъ подо́бія видѣ́ніе Его́ пріе́млютъ.

Иже проро́комъ жада́емый пе́рвѣе Спа́совъ зра́къ, ца́ріе зря́тъ, всѣ́ми ублажа́емый, въ самодѣ́йствіи нерукотво́рнѣ воображе́нный.

Кня́зи вси́ и судіи́ земли́, благослови́те Христа́, съ первосвяще́нники и святи́тели дне́сь и со всѣ́ми людьми́, и́же Того́ зрѣ́нія сподо́бленніи.

Богоро́диченъ: Присносу́щнаго Тя́ Ма́терь Христа́ человѣ́комъ позна́вшимъ блаже́нство небе́сное испроси́, и́же Твое́ неизрече́нное рождество́ вѣ́рно пѣсносло́вятъ.

Инъ.

Преподо́бнаго отца́. Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Ты́ мíру поруга́вся, о́тче Іоаки́ме, ве́сь Бо́гу себе́ предаде́, чистото́ю же обложи́въ себе́, возше́лъ еси́ на о́ное свято́е житіе́, идѣ́же веселя́ся со а́нгелы, моли́ Христа́ Бо́га, спасти́ся душа́мъ на́шимъ.

Ты́ Исто́чника благосты́ни возлюби́лъ еси́, преподо́бне, жа́ждущія сія́ возвесели́лъ еси́, бѣсо́вскія полки́ разгоня́я, верте́пы и го́ры Осого́вскія богоразу́мія испо́лни. Тѣ́мже, соше́дшеся, па́мять твою́ прославля́емъ, о́тче блаже́нне.

Новора́сль плодоно́сная изъ непло́дна ко́рене прозябе́, посто́мъ и моли́твою возсія́въ, рѣ́ки исцѣле́нія точи́лъ еси́, я́коже Моисе́й дре́влѣ лю́демъ въ пусты́ни, о́тче Іоаки́ме.

Насажде́нъ бы́въ при вода́хъ, воздержа́нія лоза́ богора́сленна яви́лся еси́, о́тче блаже́нне, гро́здіе благоче́стія предлага́я.

На ка́мени вѣ́ры сто́пы се́рдца твоего́ поста́вивъ, непоколеби́мъ бы́лъ еси́, преблаже́нне, прило́ги бѣсо́вскими не ужаса́яся.

Богоро́диченъ: Херуви́мъ превы́шшую и серафи́мъ, Тя́ пое́мъ, Пречи́стая, на ру́ку пло́тію носи́ла еси́ Бо́га на́шего, Его́же бо трепе́щутъ вся́ си́лы небе́сныя.

Катава́сія: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Пѣ́снь 5.

Кано́нъ Богоро́дицы. Ирмо́съ: Бо́жію и неизрече́нную добро́ту, добродѣ́телей Твои́хъ, Христе́ исповѣ́мъ: отъ Присносу́щныя бо Сла́вы, Соприсносу́щное и Ѵпоста́сное возсія́вый Сія́ніе, изъ дѣ́вственныя утро́бы, су́щимъ во тмѣ́ и сѣ́ни, вопло́щся, возсія́лъ еси́ Со́лнце.

Яко на о́блацѣ Дѣ́во, апо́стольскій ли́къ носи́мь, къ Сіо́ну отъ коне́цъ, служи́ти Тебѣ́, Облаку ле́гкому, собира́шеся: отъ Нея́же Вы́шній Бо́гъ, су́щимъ во тьмѣ́ и сѣ́ни, Пра́ведное возсія́ Со́лнце.

Тру́бъ, богопрія́тніи язы́цы богосло́вныхъ муже́й благогла́снѣйше Богоро́дицѣ вопія́ху, исхо́дную возглаша́юще пѣ́снь Ду́хомъ: ра́дуйся нетлѣ́нный Исто́чниче, Бо́жія живонача́льнаго и спаси́тельнаго всѣ́мъ воплоще́нія.

Другíй.

Кано́нъ Образа. Ирмо́съ: Къ Тебѣ́ у́тренюю, милосе́рдія ра́ди Себе́ истощи́вшему непрело́жно и до страсте́й безстра́стно прекло́ншемуся, Сло́ве Бо́жій: ми́ръ пода́ждь ми́, па́дшему, Человѣколю́бче.

Не въ багряни́цѣ, ни въ червлени́цѣ, ни въ вѣнцѣ́ че́стнѣ, боже́ственніи вѣнцено́сцы, но о Го́сподѣ Бо́зѣ крася́щеся, ра́дуются. Его́же добро́ту зря́ще, украша́ются.

На пра́ведныя лю́ди о́чи Госпо́дни царя́, и у́ши на моли́тву царе́й благоче́стно му́дрствующихъ, чту́щимъ Его́ подо́біе благолѣ́пія самопи́санное.

Ны́нѣ зря́ще неизмѣ́ннаго Бо́га и Спа́са и неизчерта́емаго зра́ка ви́дъ, человѣ́ческое ви́дѣти предстоя́тъ, я́ко одушевле́ну притека́ти и просвѣти́тися.

Богоро́диченъ: Ни чистоту́ поколеба́вши чи́стымъ Твои́мъ рождество́мъ, и Ма́ти позна́лася еси́, а́ще и ма́терское не подъя́ла: обоя́ бо на Тебѣ́, Богома́ти, соверша́ше Боже́ственное хотѣ́ніе.

Инъ.

Преподо́бнаго отца́. Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

По́стникомъ на небеса́ пу́ть благовѣ́рно отве́рзлъ еси́, о́тче Іоаки́ме, восхода́я умо́мъ при́сно къ небе́снымъ, на высоту́ вся́ вознося́, я́ко сто́лпъ о́гненный благода́тію о́блаки облиста́я.

Врача́, боля́щимъ стра́сти отгоня́ща, показа́ тя́ Христо́съ, о́тче Іоаки́ме, и пита́теля а́лчущимъ, безу́мнымъ каза́теля цѣлому́дренна, си́рымъ же и ни́щимъ засту́пника.

Луча́ми Боже́ственными вся́ просвѣти́лъ еси́, о́тче Іоаки́ме, вра́жія ополче́нія, богогла́се, разори́лъ еси́, благосты́нею всѣ́хъ упася́, я́коже Христо́съ, сла́вне, возво́диши къ небе́снымъ.

На го́ру истиннодѣ́тельную воздержа́ніемъ восте́клъ еси́, богоно́се, и съ высоты́ пра́вду твою́ показа́въ, вселе́нныя концы́ па́че со́лнца облиста́юща чудесы́.

Не оскудѣ́лъ еси́ добродѣ́тели мно́гимъ по́двигомъ, е́й приближа́яся, но́щи бо и дни́ мно́ги, преподо́бне, пребы́лъ еси́ стоя́, непрекло́ненъ ну́ждами естества́.

Богоро́диченъ: Сло́во Отчее, предочи́стившися, о Чи́стая, Ду́хомъ, слове́снаго естества́ на благодѣя́ніе родила́ еси́.

Катава́сія: О, треблаже́нное Дре́во, на не́мже распя́ся Христо́съ, Ца́рь и Госпо́дь, и́мже паде́ дре́вомъ прельсти́вый, Тобо́ю прельсти́вся, Бо́гу пригвозди́вшуся пло́тію, подаю́щему ми́ръ душа́мъ на́шимъ.

Пѣ́снь 6.

Кано́нъ Богоро́дицы. Ирмо́съ: Морскíй пучиноро́дный ки́товъ вну́тренній о́гнь — тридне́внаго Твоего́ погребе́нія проображе́ніе, его́же Іо́на проро́къ показа́ся. Спасе́нъ бо, я́ко и предпосла́ся, неврежде́нъ, вопія́ше: пожру́ Ти́ со гла́сомъ хвале́нія, Го́споди.

Дае́тъ Тебѣ́, я́же превы́ше естества́, Ца́рь всѣ́хъ Бо́гъ: въ рождествѣ́ бо Дѣ́ву я́коже сохрани́, та́ко во гро́бѣ тѣ́ло соблю́дъ нетлѣ́нно и спросла́ви Боже́ственнымъ преставле́ніемъ, че́сть Тебѣ́, я́ко Сы́нъ Ма́тери, да́руя.

Вои́стинну Тя́, я́ко свѣ́телъ свѣ́щникъ, невеще́ственнаго Свѣ́та, кади́льницу злату́ю Боже́ственнаго Угля, во Свята́я святы́хъ всели́, ру́чку и же́злъ, скрижа́ль богопи́санную, ковче́гъ святы́й, трапе́зу Сло́ва жи́зни, Дѣ́во, Рождество́ Твое́.

Другíй.

Образа. Ирмо́съ: Ятъ бы́сть, но не удержа́нъ въ пе́рсехъ ки́товыхъ Іо́на: Тво́й бо о́бразъ нося́, Страда́вшаго и погребе́нію Да́вшагося, я́ко отъ черто́га, отъ звѣ́ря изы́де. Приглаша́ше же кустодíи: храня́щіи су́етная и ло́жная, ми́лость сію́ оста́вили есте́.

Содержи́мыя вре́домъ человѣ́ки и подпа́дшія въ тлѣ́ніе, не презрѣ́ стерпѣ́ти, Содѣ́телю и Обнови́телю ро́да, но излія́въ Себе́ Вы́шній и я́влься въ подо́біе мое́ и смире́ніе, назда́ прему́дре, добро́ту пода́въ ми́ первообра́зную.

Невѣ́дущу о Ца́рствіи Твое́мъ небе́снѣмъ, къ нему́же на́съ, Благíй, тлѣ́нныя и до́лу лежа́щія, возведе́, Иже невеще́ственными херуви́мы непристу́пенъ, сни́де же ми́ до а́да, Твоего́ апо́стола Авгарю царю́, Христе́, посла́лъ еси́, та́инство увѣря́юща.

Ви́дѣвъ Твоего́, Сло́ве и Му́дросте Всеси́льнаго Отца́, неви́димаго Бо́га, неотсту́пнѣ пре́жде вѣ́къ, о́браза всечеловѣкозра́чна, дивля́шеся, Бо́га вѣ́дый, пло́ть и кро́вь и ду́шу у́мну пріе́мша Тя́, мѣ́стный нача́льникъ.

Богоро́диченъ: Невѣ́ріемъ о Боже́ственнѣй, сотво́ршимъ его́, Дѣ́во, стра́шней за́повѣди родонача́льника безсме́ртна, всегуби́тель премѣни́лъ е́сть, жи́зни же Пода́теля су́щимъ ро́ждши, нетлѣ́ніемъ на́съ Еди́на си́лою утверди́ла еси́.

Инъ.

Преподо́бнаго отца́. Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Вла́сть пріе́мъ отъ Бо́га на бѣ́сы проти́вныя, о́тче Іоаки́ме, посто́мъ побо́рника богоизбра́на тя́ показа́, твои́ми моли́твами неду́ги исцѣля́я и стра́сти отгоня́я, богогла́се о́тче на́шъ.

Блаже́нъ вои́стинну бы́лъ еси́, о́тче Іоаки́ме, вся́ плотска́я уго́дія возненави́дѣвъ, врага́ низложи́лъ еси́, тѣ́мже прія́лъ еси́ вѣне́цъ небе́сный.

Житіе́ твое́ воздержа́ніемъ и рыда́ніемъ при́сно сконча́лъ еси́, преподо́бне о́тче, жела́ніе бо Боже́ственное тя́ распаля́я, ны́нѣ на небесѣ́хъ обрѣ́те утѣше́ніе, съ ли́ки преподо́бныхъ совокупля́яся.

Вели́кому въ добродѣ́телѣхъ поревнова́лъ еси́ Анто́нію, и сему́ ду́хомъ послѣ́дуя, воздержа́ніемъ, преподо́бне, верхо́венъ яви́лся еси́, и ста́ду твоему́ во утвержде́ніе.

Богоро́диченъ: Богоро́дице Дѣ́во нескве́рная, Сы́на Твоего́ моли́ съ го́рними си́лами, проще́ніе прегрѣше́ній пре́жде конца́ дарова́тися, вѣ́рно Тя́ сла́вящимъ.

Катава́сія: Во́днаго звѣ́ря во утро́бѣ дла́ни Іо́на крестови́дно распросте́ръ, спаси́тельную стра́сть прообража́ше я́вѣ; тѣ́мъ, тридне́венъ изше́дъ, премíрное Воскресе́ніе прописа́ше, пло́тію пригвожде́ннаго Христа́ Бо́га, и тридне́внымъ Воскресе́ніемъ мíръ просвѣ́щшаго.

Конда́къ, гла́съ 2. [Подо́бенъ: Въ моли́твахъ.]

Въ моли́твахъ неусыпа́емыхъ, си́лу на проти́внаго врага́ воспрія́лъ еси́, терпѣ́ніемъ бо свои́мъ, о́тче Іоаки́ме, на небеса́ возше́лъ еси́, земна́я, я́ко жи́знь тлѣ́нную оста́вивъ, въ нетлѣ́ніе пресели́лся еси́, тѣ́мже тя́ прославля́емъ.

Икосъ:

Гора́ Осого́вская тебе́ исповѣ́да, о́тче Іоаки́ме, па́стыря душа́мъ на́шимъ, неду́ги исцѣля́юща, помо́щника су́ща и засту́пника мíру. Тѣ́мже и хва́ляще тя́, вопіе́мъ: ра́дуйся, свѣ́тлая мона́шествующихъ сла́во; ра́дуйся, я́сный цѣлому́дрія сто́лпе; ра́дуйся, му́жеству я́вѣ сказа́тельное позна́ніе; ра́дуйся, прему́драго ра́зума явле́ніе; ра́дуйся, пра́вило равностоя́тельное пра́вдѣ извѣ́стно; ра́дуйся, у́ме наслажда́яся неизрече́нныхъ мы́слей; ра́дуйся, и́мже посрами́шася бѣ́си; ра́дуйся, помо́щниче всѣ́мъ и́же вѣ́рно ти́ вопію́щимъ: ра́дуйся, о́тче Іоаки́ме.

Пѣ́снь 7.

Кано́нъ Богоро́дицы. Ирмо́съ: Безсту́днѣй я́рости же и огню́ Боже́ственное жела́ніе сопротивля́яся, о́гнь у́бо ороша́ше, я́рости же смѣя́шеся, богодохнове́нною слове́сною преподо́бныхъ тривѣща́нною цѣвни́цею, противовѣща́я мусикíйскимъ орга́номъ посреди́ пла́мене: препросла́вленный отце́въ и на́шъ Бо́же, благослове́нъ еси́.

Богодѣ́ланныя скрижа́ли Моисе́й, пи́санныя Боже́ственнымъ Ду́хомъ, я́ростію сокру́шъ, но сего́ Влады́ка, Ро́ждшую неврежде́нну въ небе́сныя сохра́нь до́мы, ны́нѣ вну́трь всели́. Съ Не́ю игра́юще, вопіе́мъ Христу́: препросла́вленный отце́въ и на́шъ Бо́же, благослове́нъ еси́.

Въ кимва́лѣхъ — усты́ чи́стыми, мусикíйски же — се́рдцемъ свѣ́тлымъ, доброгла́сною трубо́ю — высо́кою мы́слію, Дѣ́вы и Чи́стыя въ наро́читый избра́нный де́нь преставле́нія, дѣ́тельными пле́щуще рука́ми, вопіе́мъ: препросла́вленный отце́въ и на́шъ Бо́же, благослове́нъ еси́.

Другíй.

Образа. Ирмо́съ: Неизрече́нное чу́до: въ пещи́ Изба́вивый преподо́бныя о́троки изъ пла́мене во гро́бѣ ме́ртвъ, бездыха́ненъ полага́ется, во спасе́ніе на́съ, пою́щихъ: Изба́вителю Бо́же, благослове́нъ еси́.

Къ боговидѣ́нію о́чи угото́вимъ и досто́йно потщи́мся о́бразъ ви́дѣти Христо́въ всѣ́мъ честны́й, во спасе́ніе на́мъ, пою́щимъ: Изба́вителю Бо́же, благослове́нъ еси́.

Якоже на Ѳаво́рскую го́ру возноси́ми, восхо́дными очесы́ ума́ зарю́ свѣ́тлу въ боговочеловѣ́ченіи Христо́вѣ ви́дяще, единоѵпоста́снѣ, въ дву́ же естеству́, богосло́вяще Его́ во вѣ́ки.

Пра́зднующихъ и веселя́щихся, усе́рдно же о Го́сподѣ всѣ́хъ гла́съ, пѣ́ніе на́ше да соста́вится и да испо́лнится, согла́сно пою́щихъ: Изба́вителю Бо́же, благослове́нъ еси́.

Богоро́диченъ: Въ дѣ́вства я́ко свѣтла́ еди́на добро́тахъ Содѣ́теля была́ еси́ Пита́тельница, скве́рну на́шу всю́ очи́стила еси́, Богороди́тельнице, су́щую отъ грѣха́, вопію́щихъ: Бо́же, благослове́нъ еси́.

Инъ.

Преподо́бнаго отца́: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

По́стникомъ красота́ святы́ни прояви́лъ еси́, о́тче, воздержа́ніемъ свои́мъ показа́ житіе́ изря́дно, и ны́нѣ непреста́нно со а́нгелы воспѣва́я: благослове́нъ Бо́гъ оте́цъ на́шихъ.

Ору́жіе обою́ду о́стро тя́ показа́ Христо́съ, блаже́нне, на враги́ проти́вныя, ру́ша ополче́нія безбо́жная и веселя́ ду́ши пою́щія: благослове́нъ Бо́гъ оте́цъ на́шихъ.

Въ свѣ́тѣ неизрече́ннѣмъ со безпло́тными ли́ки предстоя́, богогла́се о́тче Іоаки́ме, не пре́зри мене́ погиба́юща, но твою́ пречестну́ю моли́тву за на́съ сотвори́ Благослове́нному Бо́гу поми́ловати ны́.

Чуде́съ за́ри просте́ръ, озаря́еши коле́блющія мгло́ю стра́сти, и лу́чи крѣ́пости подава́еши въ де́нь наро́читъ взыва́ющимъ: оте́цъ на́шихъ Бо́же, благослове́нъ еси́.

Богоро́диченъ: Пло́дъ чре́ва Твоего́, Пречи́стая, проро́ковъ е́сть и зако́на исполне́ніе, тѣ́мъ Тя́, Богоро́дицу, въ вѣ́дѣніи сла́вяще, благоче́стно велича́емъ.

Катава́сія: Безу́мное велѣ́ніе мучи́теля злочести́ваго лю́ди поколеба́, ды́шущее преще́ніе и злохуле́ніе богоме́рзкое; оба́че три́ о́троки не устраши́ я́рость звѣ́рская, ни о́гнь снѣда́яй, но, противоды́шущу росоно́сному Ду́ху, со огне́мъ су́ще, поя́ху: препѣ́тый отцевъ и на́съ Бо́же, благослове́нъ еси́.

Пѣ́снь 8.

Кано́нъ Богоро́дицы. Ирмо́съ: Пла́мень, ороша́ющь преподо́бныя, злочести́выя же попаля́ющь, Ангелъ Бо́жій всемо́щный показа́ отроко́мъ, живонача́льный же исто́чникъ содѣ́ла Богоро́дицу, тлю́ сме́рти и живо́тъ точа́щу пою́щимъ: Содѣ́теля еди́наго пои́мъ, изба́вленніи, и превозно́симъ во вся́ вѣ́ки.

Глаго́лы послѣ́доваху Боже́ственному Ковче́гу свяще́нному, все́ мно́жество богосло́вовъ въ Сіо́нѣ: ка́мо и́деши ны́нѣ, Ски́ніе, — зову́ще, — Бо́га Жива́го? Не преста́й призира́ющи вѣ́рою пою́щія: Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

Якоже, воздѣ́вши ру́цѣ, исхо́диши Всенепоро́чная, ру́цѣ, и́миже Бо́га носи́ла еси́ пло́тію, со дерзнове́ніемъ, я́ко Ма́ти, рекла́ еси́ къ Рожде́нному: я́же Ми́ да́лъ еси́, во вѣ́ки сохрани́, вопію́щія Тебѣ́: Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

Другíй.

Образа. Ирмо́съ: Сто́лпъ зло́бы богопроти́вныя боже́ственніи о́троцы обличи́ша, на Христа́ же шата́ющееся беззако́нныхъ собо́рище совѣ́туетъ тще́тная, уби́ти поуча́ется живо́тъ Держа́щаго дла́нію. Его́же вся́ тва́рь благослови́тъ, сла́вящи во вѣ́ки.

По Боже́ственному естеству́, Спа́се, сы́й всѣ́мъ неви́димь, по человѣ́ческому же, а́ще и ви́димь Человѣ́къ, пи́санъ безъ шаро́въ, вообрази́въ Себе́ просвѣще́ніемъ Твоего́ лица́ самозри́маго, Твоего́ раба́ не лиши́лъ еси́, пою́ща: благослови́те, вся́ дѣла́ Госпо́дня, Го́спода.

Самоначерта́нное первообра́зное Спа́са изображе́ніе подобозра́чно, богодѣ́льный о́бразъ зря́ще, и́же всѣ́ми владя́щій избра́нный, со благоговѣ́ніемъ и че́стію, я́ко надѣ́ющіися на́нь, покрыва́ются и утвержда́ются.

Па́че Моисе́я Богови́дца, богопи́санныя скрижа́ли пріе́мшаго, возвели́чился еси́, честны́й мѣстонача́льниче, прія́тъ честно́е посла́ніе Бо́жія Сло́ва, блажа́щее тя́, благоче́стію вѣ́ровавша, и́же ника́коже ви́дѣ чудодѣ́йствія.

Богоро́диченъ: Во двою́ естеству́ несмѣ́сно, Богома́ти, еди́ну ѵпоста́сь воплоще́ннаго отъ пречи́стыхъ Твои́хъ крове́й ви́дяще, Бо́га же и Человѣ́ка исповѣ́дуемъ, Того́же отъ Отца́ Безлѣ́тна пре́жде вѣ́къ, безстра́стно и неслія́нно рожде́нна.

Инъ.

Преподо́бнаго отца́. Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богопрія́тенъ пло́дъ изъ непло́дныхъ ложе́снъ пусты́ни Осого́вскія прозябе́ на многопло́дство; верте́пы, го́ры и про́пасти Осого́вскія исполня́еши Бо́жія уче́нія и свѣ́тлости вы́шнія, е́юже озари́ на́съ, о́тче Іоаки́ме, да вопіе́мъ: свяще́нницы, воспо́йте, лю́діе, превозноси́те во вся́ вѣ́ки.

Житіе́ безпло́тное имѣ́, во пло́ти же сы́й, я́ко а́нгелъ пло́ти уго́дія не позна́лъ еси́, свя́те; вы́ше человѣ́къ пожи́въ, полки́ бѣсо́вскія и ле́сть ихъ искорени́лъ еси́, пусты́ню украси́, со а́нгелы вопія́: свяще́нницы, воспо́йте, лю́діе, превозноси́те во вся́ вѣ́ки.

Возвесели́ся пусты́ня Осого́вская, жа́ждущи при́сно прозябе́нія добродѣ́тели, дне́сь поще́нія свѣ́тлый ра́стъ въ тебѣ́ прозябе́, я́коже дре́вле Самуи́лъ и Предте́ча, изъ непло́дна чревасади́теля пра́вдѣ, и́мже процвѣто́ша верте́пы и про́пасти, и свѣ́тло украше́ни бы́ша.

Крѣ́постію ума́ вся́ сѣ́ти вра́жія попра́лъ еси́ и, я́ко пти́ца, благíя юдо́ли, крилѣ́ имѣ́я златы́я, возше́лъ еси́ къ высотѣ́ небе́снѣй, блаже́нне Іоаки́ме, свѣти́льникъ мона́шествующимъ, вопія́: свяще́нницы, воспо́йте, лю́діе, превозноси́те во вся́ вѣ́ки.

Въ моли́твахъ бо́дрое, въ поще́ніихъ благомо́щное, въ напа́стехъ терпѣли́вное на земли́, я́ко а́нгелъ житіе́ показу́я, Іоаки́ме блаже́нне, Бо́гу вопія́лъ еси́: свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Пло́дъ чре́ва Твоего́, Богоневѣ́сто, показа́ся человѣ́комъ спасе́нія хода́тайственный. Тѣ́мъ Тя́, Богоро́дицу, ра́зумомъ и язы́комъ сла́вяще, вѣ́рніи, велича́емъ.

Катава́сія: Благослови́те, о́троцы, Тро́ицы равночи́сленніи, Содѣ́теля Отца́ Бо́га, по́йте снизше́дшее Сло́во, и о́гнь въ ро́су претво́ршее и превозноси́те всѣ́мъ жи́знь подава́ющаго Ду́ха Всесвята́го во вѣ́ки.

Пѣ́снь 9.

Кано́нъ Богоро́дицы. Ирмо́съ: Побѣжда́ются естества́ уста́вы въ Тебѣ́, Дѣ́во Чи́стая: дѣ́вствуетъ бо рождество́ и живо́тъ предобруча́етъ сме́рть; по рождествѣ́ Дѣ́ва и по сме́рти жива́, спаса́еши при́сно, Богоро́дице, наслѣ́діе Твое́.

Дивля́хуся а́нгельскія си́лы, въ Сіо́нѣ смотря́юще своего́ Влады́ку, же́нскую ду́шу рука́ми нося́щаго, пречи́сто бо Ро́ждшей, сынолѣ́пно провозглаша́ше: гряди́, Чи́стая, съ Сы́номъ и Бо́гомъ просла́вленна бу́ди.

Опря́та ли́къ апо́стольскій богопрія́тное тѣ́ло Твое́, со стра́хомъ зря́ще и гла́сомъ ве́ліимъ вѣща́юще: въ небе́сныя до́мы къ Сы́ну восходя́щи, спаса́еши при́сно, Богоро́дице, наслѣ́діе Твое́.

Другíй.

Кано́нъ Образа. Ирмо́съ: Честнѣ́йшую херуви́мъ и сла́внѣйшую безъ сравне́нія серафи́мъ, безъ истлѣ́нія Бо́га Сло́ва ро́ждшую, су́щую Богоро́дицу, Тя́ велича́емъ.

Добро́та недомы́слима вои́стинну, красо́тъ краснѣ́йши па́че естества́, се́ зри́тся досто́йно жела́ющимъ, притеце́мъ, ли́ца освяща́юще.

Стѣна́ и утвержде́ніе держа́вно, ору́жіе ми́рно, забра́ло необори́мо, невреди́мо всѣ́ми хитростьми́ сопроти́вными, огражде́ніе гра́ду на́шему дарова́ся.

Образе неизмѣ́нный Оте́чь, Сія́ніе сла́вы Присносу́щнаго Свѣ́та, печа́ть Вы́шняго, Сло́ве, Си́ло и Му́дросте, Тя́ богосло́вствующимъ благопремѣни́тель бу́ди.

Богоро́диченъ: Уста́вила еси́ поноше́ніе жена́мъ, взяла́ еси́ отъ человѣ́къ и потреби́ла еси́ кля́тву, источи́ла еси́ всѣ́мъ ра́дость и благослове́ніе, Дѣ́во Пречи́стая Богороди́тельнице.

Инъ.

Кано́нъ преподо́бнаго отца́. Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Крило́ма на высоту́ при́сно вы́спрь возлета́я, пусты́ни и го́ры Осого́вскія прелетѣ́лъ еси́, верте́пы же и про́пасти испо́лни свѣ́томъ богоразу́мія, о́тче Іоаки́ме. Тѣ́мже и мы́, творя́ще па́мять твою́ пресвѣ́тлую, мо́лимся, испроси́ на́мъ оставле́ніе грѣхо́въ.

Гора́ златоза́рна бы́лъ еси́, о́тче преблаже́нне, го́ры и верте́пы Осого́вскія испо́лни а́нгельскаго пѣ́нія, и́мже возвесели́ся пусты́ня Осого́вская и я́ко кри́нъ процвѣте́. Тѣ́мже, преподо́бне, со а́нгелы предстоя́ во сла́вѣ, моли́ся непреста́нно о на́съ.

Изря́дными луча́ми я́ко со́лнце просія́въ, треблаже́нне, житіе́мъ твои́мъ святы́мъ пусты́ни Осого́вскія я́ко гра́ды сотвори́лъ еси́. Тѣ́мже ны́нѣ, въ ли́цѣ а́нгельстѣ предстоя́й, со проро́ки, ку́пно и патріа́рси, и апо́столы, блаже́нне, моли́ся о на́съ.

Яви́ся твоя́ ве́лія сла́ва, я́же по Бо́зѣ, просвѣща́ющая всю́ тва́рь свяще́нными уподобле́ніи непоро́чнаго житія́, богому́дре Іоаки́ме, вои́стину бы́лъ еси́ мона́хомъ украше́ніе и отце́мъ верхо́вникъ.

Процвѣ́лъ еси́ я́ко кри́нъ, о́тче Іоаки́ме, благоуха́ньми твои́хъ добродѣ́тель, на́ша благоуха́еши ду́ши. Тѣ́мже соверша́ющимъ па́мять твою́, моли́ изба́витися злосмра́дія согрѣше́ній на́шихъ и вся́каго бѣсо́вскаго озлобле́нія.

Богоро́диченъ: Ты́ еси́, Богоро́дице, ору́жіе на́ше и стѣна́, Ты́ еси́ заступле́ніе къ Тебѣ́ прибѣга́ющихъ, Тя́ и ны́нѣ на моли́тву предлага́емъ, да изба́вимся отъ враго́въ на́шихъ.

Катава́сія: Та́инъ еси́, Богоро́дице, ра́й, невоздѣ́ланно возрасти́вшій Христа́, Имже кре́стное живоно́сное на земли́ насади́ся Дре́во. Тѣ́мъ, ны́нѣ возноси́му, покланя́ющеся Ему́, Тя́ велича́емъ.

Свѣти́ленъ препо́добнаго. Подо́бенъ: Со ученики́.

Ра́дуйся, горо́ пусты́нная, весели́теся вси́ ро́ди земнíи, припа́дающе къ моще́мъ пусты́ннаго отца́ Іоаки́ма, глаго́люще: умоли́, преподо́бне, Влады́ку съ Богоро́дицею, просвѣти́ти на́съ, пою́щихъ тя́.

Сла́ва, Образа. Подо́бенъ: Жены́, услы́шите.

Свѣ́тъ невече́рній, Христе́, просвѣти́ на́съ лица́ Твоего́ зра́комъ, и свѣ́тлости святы́хъ сподо́би, егда́ ся́деши возда́ти кому́ждо по дѣло́мъ его́, моли́твами ро́ждшія Тя́ Богоро́дицы.

И ны́нѣ, пра́здника. Подо́бенъ то́йже:

О, коли́ка вели́чія Тебѣ́ Си́льный сотвори́! Отъ непло́дныя бо родила́ся еси́, родила́ же еси́ Дѣ́ва, и Дѣ́ва па́ки пребы́вши, пребыва́еши же по сме́рти, сме́рти вы́шши, Чи́стая, и не оставля́ющи мíра, о мíрѣ мо́лишися.

На хвали́техъ стихи́ры преподо́бнаго отца́, на 4, гла́съ 3. Самогла́сны:

Вели́кихъ твои́хъ по́двигъ и́стинное вѣща́ніе, многострада́льне о́тче Іоаки́ме, досто́йно на́съ созыва́етъ въ це́рковь велегла́сно; свѣ́тло вси́, вѣ́рніи, стеце́мся на торжество́ и преподо́бнаго отца́ пѣ́сньми воспои́мъ, глаго́люще: о́тче преблаже́нне, испроси́ на́мъ отъ Христа́ Бо́га ве́лію ми́лость.

Преподо́бне о́тче Іоаки́ме, де́нь и но́щь поучи́вся въ зако́нѣ Госпо́дни, досто́инъ бы́лъ еси́ причаща́тися пи́щи дре́ва живо́тнаго: отъ плода́ твои́хъ страда́ній вѣнцы́ цвѣту́тъ; дерзнове́ніе имѣ́я къ Подвигополо́жнику Христу́, проси́ очище́ніе душа́мъ на́шимъ и ве́лію ми́лость.

Болѣ́зньми по́стническими житіе́ ра́вно а́нгеломъ на земли́ пожи́въ, о́тче Іоаки́ме, пло́ть покори́лъ еси́ ду́хови; соверши́тель бы́въ за́повѣдемъ Госпо́днимъ, испе́рва о́бразъ добродѣ́тели сохрани́лъ еси́ подъ небесы́. Тѣ́мже воздая́ніе страда́льныхъ по́двигъ прія́лъ еси́ отъ Христа́ Бо́га, подаю́щаго на́мъ твои́ми моли́твами ве́лію ми́лость.

Съ небе́сными ли́ки водворя́яся, о́тче Іоаки́ме, сподо́бился еси́ пресвѣ́тлою чистото́ю во пло́ти со земны́ми пожи́ти я́ко безпло́тенъ, ны́нѣ наслажда́ешися Боже́ственныя сла́вы. Тѣ́мже моли́ся отъ бѣ́дъ и тмы́ спасти́ на́съ и просвѣти́ти ду́ши на́ша.

Сла́ва, гла́съ 5:

Ра́дуйся, пусты́нная крѣ́посте, о́тче Іоаки́ме! Плотска́я угожде́нія отве́ргъ, бы́лъ еси́ а́нгеломъ сожи́тель; благоуха́нія всю́ го́ру, верте́пы и про́пасти испо́лнивъ, полки́ бѣсо́вскія и тму́ ерети́ческую попра́лъ еси́, вся́кую же ле́сть изко́рени потреби́. Тѣ́мже въ вы́шнія всели́лся еси́ жи́ти, преподо́бне о́тче Іоаки́ме, моли́ся Христу́ Бо́гу дарова́ти душа́мъ на́шимъ ве́лію ми́лость.

И ны́нѣ, пра́здника Богоро́дицы, гла́съ 1:

Подоба́ше самови́дцамъ Сло́ва и слуга́мъ, и е́же по пло́ти Ма́тере Его́ успе́ніе ви́дѣти, коне́чное ели́ко на Не́й та́инство, я́ко да не то́кмо е́же отъ земли́ Спа́сово восхожде́ніе у́зрятъ, но и Ро́ждшія Его́ преставле́нію свидѣ́тельствуютъ. Тѣ́мже, отвсю́ду Боже́ственною си́лою собра́вшеся, Сіо́на достиго́ша, и на не́бо иду́щую предсыла́ху, вы́шшую Херуви́мъ, Ейже и мы́ съ ни́ми покланя́емся, я́ко моля́щейся о душа́хъ на́шихъ.

Славосло́віе вели́кое. По трисвято́мъ: Тропа́рь преподо́бнаго отца́. Сла́ва, Образа. И ны́нѣ, пра́здника Богоро́дицы.



НА ЛИТУРГІИ,

Блаже́нна пра́здника, пѣ́снь 1-я, на 2, и Образа, пѣ́снь 4-я, на 2, и преподо́бнаго отца́, пѣ́снь 6-я, на 4. Проки́менъ, гла́съ 4: Воспо́йте Го́сподеви пѣ́снь но́ву,* я́ко ди́вна сотвори́ Госпо́дь. Сти́хъ: Ви́дѣша вси́ концы́ земли́ спасе́ніе Бо́га на́шего. Апо́столъ къ Гала́томъ, зача́ло 213: Бра́тіе, пло́дъ духо́вный... Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. [Сти́хъ: Си́льно на земли́ бу́детъ сѣ́мя его́.] Ева́нгеліе отъ Матѳе́я, зача́ло 43: Вся́ Мнѣ́ предана́ су́ть... Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Коне́цъ и Бо́гу сла́ва.

Источникъ: Служби на българските светии. — Света Гора, Атон: Славянобългарски манастир «Св. Вмчк Георги Зограф», 2007. — Л. 309-335.

/ Къ оглавленію раздѣла /


Наверхъ / Къ титульной страницѣ

0