Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 25.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Служба составлена Вологодскаго каѳедральнаго собора протоіереемъ В. И. Нордовымъ († 1883 г.).       

Мѣ́сяца Августа въ 16-й де́нь.
Слу́жба Ѵпоста́сной Прему́дрости Бо́жіей, Спаси́телю на́шему Го́споду Іису́су Христу́.

НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры [на 8], гла́съ 2:

Кíя свяще́нныя пѣ́сни* воспое́мъ Тебѣ́, Собезнача́льное Сло́во Отчее,* Его́же херуви́ми обстоя́тъ, и серафи́ми слу́жатъ,* и вся́ небе́сныя си́лы трепе́щутъ,* вся́ка же тва́рь послу́шаетъ, и бе́здны боя́тся.* Имже тма́ отгна́на бы́сть, и діа́волъ упраздни́ся,* и свободи́ся Ада́мъ отъ грѣхо́вныхъ у́зъ,* Евины утоли́шася сле́зы;* да́руй на́мъ единомы́сліе,* ми́ръ и ве́лію ми́лость.

Ко́е благодаре́ніе воздади́мъ Тебѣ́,* Ѵпоста́сная Прему́дросте Бо́жія,* Сладча́йшій Іису́се, Тво́рче и Изба́вителю на́шъ,* вели́кія ра́ди ми́лости Твоея́* пло́тію человѣ́комъ я́влься,* и заблу́ждшее горохи́щное овча́, взыска́въ* и на ра́мо взе́мъ, Отцу́ прине́сшій,* кресто́мъ и кро́вію очище́но;* да́руй вселе́ннѣй единомы́сліе,* ми́ръ и ве́лію ми́лость.

Та́же стихи́ры Успе́нія 3, гла́съ то́йже:

Кíими недосто́йными устна́ми ублажи́мъ Богоро́дицу? [Честнѣ́йшую тва́ри и святѣ́йшую су́щу херуви́мъ и всѣ́хъ а́нгелъ, престо́лъ ца́рскій недви́жимый, до́мъ, въ не́мже всели́ся Превы́шній, спасе́ніе мíра, Бо́жіе свяще́ніе, подаю́щую вѣ́рнымъ въ боже́ственнѣй па́мяти Ея́ бога́тно ве́лію ми́лость. [Два́жды.]

Ка́я стра́шная пѣ́нія, я́же принесо́ша Ти́ тогда́, Дѣ́во, о́крестъ Твоего́ одра́ стоя́щіи, вси́ и́же Сло́ва апо́столи? И ужа́снѣ вопію́ще: отхо́дитъ Царе́ва пала́та, возвыша́ется киво́тъ свяще́нія; две́ри, возми́теся, я́ко да Бо́жія две́рь вни́детъ въ ра́дость, мíру непреста́нно прося́щи ве́лія ми́лости!

Ка́я духо́вная пѣ́нія ны́нѣ принесе́мъ Тебѣ́, Всесвята́я? Безсме́ртнымъ бо успе́ніемъ Твои́мъ ве́сь мíръ освяти́ла еси́, и ко премíрнымъ прешла́ еси́, добро́ту разумѣва́ти Вседержи́теля, и Сему́ я́коже Ма́ти сра́доватися, а́нгельскимъ Тя́ чино́мъ доринося́щимъ, Чи́стая, и душа́мъ пра́ведныхъ, съ ни́миже проси́ на́мъ ми́ра и ве́лія ми́лости].

Сла́ва, [Прему́дрости,] гла́съ 6:

Нѣ́дръ Оте́ческихъ не разлу́чся, Единоро́дный Сы́не Бо́жій, яви́лся еси́ на земли́ и съ человѣ́ки пожи́лъ еси́, исполня́я та́йну Боже́ственнаго смотре́нія Твоего́, отъ вѣ́къ и отъ родо́въ сокрове́нную и ны́нѣ на́мъ явле́нную въ спаси́тельномъ прише́ствіи Твое́мъ. Тѣ́мже, безмѣ́рное Твое́ человѣколю́біе велича́юще, воспѣва́емъ Тя́, я́ко Творца́ и Изба́вителя и Бо́га на́шего.

И ны́нѣ, Успе́нія, гла́съ 8:

Увѣря́я Іису́съ, Сы́нъ Тво́й, Богоро́дице, и Бо́гъ на́шъ, [два́ естества́ Своя́, я́ко у́бо человѣ́къ умира́етъ и я́коже Бо́гъ востае́тъ. И Тя́, Богома́ти, зако́номъ естества́ умре́ти благоизво́ли, да не невѣ́рнымъ привидѣ́ніе мни́тся смотре́ніе. Прешла́ бо еси́ къ небе́снѣй странѣ́, небе́сная Невѣ́сто, я́ко отъ черто́га селе́нія Твоего́ отъ земли́ взята́. Освяти́ся возду́хъ восхожде́ніемъ Твои́мъ, я́ко просвѣти́ся земля́ рождество́мъ Твои́мъ, предпосыла́ютъ апо́столи, и а́нгели подъе́млютъ. Тѣ́мже, погре́бше пречи́стое тѣ́ло Твое́ и надгро́бное пѣ́ніе воспѣ́вше, ужа́сно зря́ху и со стра́хомъ глаго́лаху: сія́ измѣ́на десни́цы Вы́шняго, То́й бо посреди́ Тебе́, и не подви́жешися. Но, о Многопѣ́тая Ма́ти, не отступа́й, на́съ назира́ющи: мы́ бо лю́діе Твои́ и о́вцы па́жити Твоея́, и и́мя Твое́ призыва́емъ, прося́ще Тебе́ ра́ди спасе́нія и ве́лія ми́лости].

[Та́же вхо́дъ. Проки́менъ дне́.] Чте́нія три́.

При́тчей чте́ніе. [Глава́ 8.]

Госпо́дь созда́ Мя́ нача́ло путе́й Свои́хъ въ дѣла́ Своя́, пре́жде вѣ́къ основа́ Мя́; въ нача́лѣ, пре́жде не́же зе́млю сотвори́ти и пре́жде не́же бе́здны содѣ́лати, пре́жде не́же произы́ти исто́чникомъ во́дъ, пре́жде не́же гора́мъ водрузи́тися, пре́жде же всѣ́хъ холмо́въ ражда́етъ Мя́. Госпо́дь сотвори́ страны́ и ненаселе́нныя, и концы́ населе́нныя поднебе́сныя. Егда́ гото́вяше не́бо, съ Ни́мъ бѣ́хъ, и егда́ отлуча́ше престо́лъ Сво́й на вѣ́трѣхъ, егда́ крѣ́пки творя́ше вы́шнія о́блаки; и я́ко тве́рды полага́ше исто́чники поднебе́сныя, внегда́ полага́ти мо́рю предѣ́лъ его́, да во́ды не ми́мо и́дутъ у́стъ Его́, и крѣ́пка творя́ше основа́нія земли́, бѣ́хъ при Не́мъ устроя́я. Азъ бѣ́хъ, о не́йже ра́довашеся, на вся́къ же де́нь веселя́хся предъ лице́мъ Его́ на вся́ко вре́мя.

Прему́дрости Соломо́ни чте́ніе. [Глава́ 7.]

Всѣ́хъ Худо́жница научи́ мя, Прему́дрость; е́сть бо въ то́й Ду́хъ ра́зума свя́тъ, единоро́дный, многоча́стный, то́нкій, благодви́жный, свѣ́тлый, нескве́рный, я́сный, невреди́тельный, благолюби́вый, о́стръ, невозбра́ненъ, благодѣ́лателенъ, человѣколюби́въ, извѣ́стный, крѣ́пкій, безпеча́льный, всеси́льный, всеви́дяй и сквозѣ́ вся́ проходя́й ду́хи разуми́чныя, чи́стыя, тонча́йшія. Вся́каго бо движе́нія подви́жнѣйша е́сть Прему́дрость: достиза́етъ же и проница́етъ сквозѣ́ вся́ческая ра́ди Своея́ чистоты́. Па́ра бо е́сть си́лы Бо́жія и излія́ніе Вседержи́теля сла́вы чи́стое: сего́ ра́ди ничто́же оскверне́но на ню́ напа́даетъ. Сія́ніе бо е́сть Свѣ́та Присносу́щнаго, и зерца́ло непоро́чно Бо́жія дѣ́йствія, и о́бразъ благосты́ни Его́.

Проро́чества Иса́іина чте́ніе. [Глава́ 25.]

Го́споди, Бо́же мо́й, просла́влю Тя́, воспою́ и́мя Твое́, я́ко сотвори́лъ еси́ чу́дная дѣла́, совѣ́тъ дре́вній и́стинный: да бу́детъ, Го́споди. Яко положи́лъ еси́ гра́ды въ пе́рсть, гра́ды тве́рдыя, е́же па́сти основа́ніемъ и́хъ, нечести́выхъ гра́дъ да не сози́ждется въ вѣ́къ. Сего́ ра́ди благословя́тъ Тя́ лю́діе ни́щіи, и гра́ди человѣ́ковъ оби́димыхъ возблагословя́тъ Тя́. Бы́лъ бо еси́ вся́кому гра́ду смире́нному Помо́щникъ, и изнемога́ющимъ за оскудѣ́ніе покро́въ, отъ человѣ́къ злы́хъ изба́виши и́хъ: покро́въ жа́ждущихъ и ду́хъ человѣ́ковъ оби́димыхъ. Аки человѣ́цы малоду́шніи, жа́ждущіи въ Сіо́нѣ, я́ко изба́виши и́хъ отъ человѣ́къ нечести́выхъ, и́мже на́съ пре́далъ еси́. И сотвори́тъ Госпо́дь Савао́ѳъ всѣ́мъ язы́комъ: на горѣ́ се́й испію́тъ ра́дость, испію́тъ вино́. Пома́жутся мѵ́ромъ на горѣ́ се́й; преда́ждь сія́ вся́ язы́комъ: то́й бо совѣ́тъ на вся́ язы́ки. Поже́рта бу́детъ сме́рть возмо́гши, и па́ки отъя́тъ Госпо́дь Бо́гъ вся́ку сле́зу отъ вся́каго лица́; поноше́ніе люде́й отъя́тъ отъ всея́ земли́, уста́ бо Госпо́дня глаго́лаша сія́. И реку́тъ въ де́нь о́ный: се́ Бо́гъ на́шъ, На́ньже упова́хомъ, и спасе́тъ на́съ; Се́й Госпо́дь, потерпѣ́хомъ Его́, и возра́довахомся, и возвесели́хомся о спасе́ніи на́шемъ.

На литíи стихи́ры пра́здника [Успе́нія, самогла́сны, гла́съ 1.]

Подоба́ше самови́дцамъ Сло́ва и слуга́мъ, [и е́же по пло́ти Ма́тере Его́ успе́ніе ви́дѣти, коне́чное ели́ко на Не́й та́инство, я́ко да не то́кмо е́же отъ земли́ Спа́сово восхожде́ніе у́зрятъ, но и Ро́ждшія Его́ преставле́нію свидѣ́тельствуютъ. Тѣ́мже, отвсю́ду Боже́ственною си́лою собра́вшеся, Сіо́на достиго́ша, и на не́бо иду́щую предсыла́ху, вы́шшую Херуви́мъ, Ейже и мы́ съ ни́ми покланя́емся, я́ко моля́щейся о душа́хъ на́шихъ.

Гла́съ 2. Іоа́нново:]

Всенепоро́чная Невѣ́ста [и Ма́ти Благоволе́нія Отча, Яже Бо́гу пронарече́нная, во Свое́ Ему́ жили́ще, несли́тнаго соедине́нія, дне́сь пречи́стую ду́шу Творцу́ и Бо́гу предае́тъ, Юже безпло́тныхъ си́лы боголѣ́пно подъе́млютъ, и къ животу́ преставля́ется, су́щая Ма́ти Живота́, Свѣща́ непристу́пнаго Свѣ́та, спасе́ніе вѣ́рныхъ, и упова́ніе ду́шъ на́шихъ].

Сла́ва, и ны́нѣ, [гла́съ 3. Ге́рманово]:

Пріиди́те, вси́ концы́ земнíи, [честно́е преставле́ніе Богома́тере восхва́лимъ: въ ру́цѣ бо Сы́на ду́шу непоро́чную положи́. Тѣ́мже святы́мъ успе́ніемъ Ея́ мíръ оживотвори́ся, во псалмѣ́хъ, и пѣ́ніихъ и пѣ́снехъ духо́вныхъ, со безпло́тными и апо́столы пра́зднуетъ свѣ́тло].

На стихо́внѣ стихи́ры пра́здника [Успе́нія, самогла́сны, гла́съ 4.]

Пріиди́те, воспое́мъ, лю́діе, [Пресвяту́ю Дѣ́ву Чи́стую, изъ Нея́же неизрече́нно про́йде, вопло́щся, Сло́во Отчее, зову́ще и глаго́люще: благослове́нна Ты́ въ жена́хъ, блаже́нное чре́во, вмѣсти́вшее Христа́. Того́ святы́мъ рука́мъ ду́шу преда́вши, моли́ся, Пречи́стая, спасти́ся душа́мъ на́шимъ.

Сти́хъ: Воскресни́, Го́споди, въ поко́й Тво́й, Ты́ и Киво́тъ святы́ни Твоея́.

Дави́дскую пѣ́снь дне́сь, лю́діе, воспое́мъ Христу́ Бо́гу: приведу́тся, рече́, Царю́ дѣ́вы въ слѣ́дъ Ея́, и и́скренняя Ея́ приведу́тся въ весе́ліи и ра́дованіи. Ибо отъ сѣ́мене Дави́дова, Ея́же ра́ди мы́ обожи́хомся, въ ру́цѣ Своего́ Сы́на и Влады́ки, сла́вно и па́че сло́ва прелага́ется, Юже, я́ко Ма́терь Бо́жію, воспѣва́юще, вопіе́мъ и глаго́лемъ: спаси́ на́съ, исповѣ́дающихъ Тя́, Богоро́дицу, отъ вся́каго обстоя́нія, и изба́ви отъ бѣ́дъ ду́ши на́ша.

Сти́хъ: Кля́тся Госпо́дь Дави́ду и́стиною, и не отве́ржется eя́.

Всечестно́е Твое́ успе́ніе, Пресвята́я Дѣ́ва Чи́стая, Ангелъ мно́жества на небеси́, и человѣ́ческій ро́дъ на земли́, ублажа́емъ, я́ко Ма́ти была́ еси́ Творца́ всѣ́хъ, Христа́ Бо́га, Того́ моля́щи не преста́й о на́съ, мо́лимся, и́же на Тя́ съ Бо́гомъ упова́ніе поло́жшихъ, Богоро́дице Всепѣ́тая и Неискусобра́чная].

Сла́ва, Прему́дрости, гла́съ 6:

Го́споди, воплоти́лся еси́, я́коже восхотѣ́лъ еси́, изво́лилъ еси́ воспрія́ти нищету́ на́шу и бога́тство благосе́рдія показа́лъ еси́. Сла́вимъ Тя́, Человѣколю́бче, смотре́нія Твоего́ та́инство почита́юще и моля́щеся дарова́ти на́мъ оставле́ніе прегрѣше́ній на́шихъ, ми́ръ и ве́лію ми́лость.

И ны́нѣ, пра́здника [Успе́нія], гла́съ 4:

Егда́ изшла́ еси́, Богоро́дице Дѣ́во, [ко изъ Тебе́ Ро́ждшемуся неизрече́нно, бя́ше Іа́ковъ, бра́тъ Бо́жій и пе́рвый священнонача́льникъ, Пе́тръ же, честнѣ́йшій верхо́вникъ, богосло́вовъ нача́льникъ, и ве́сь боже́ственный апо́стольскій ли́къ, явле́ннымъ богосло́віемъ пѣсносло́вяще, Боже́ственное и стра́шное Христа́ Бо́га смотре́нія та́инство, и живонача́льное и богопрія́тное Твое́ тѣ́ло погре́бше, ра́довахуся, Всепѣ́тая. Превы́ше же пресвяты́я и старѣ́йшія а́нгельскія си́лы, чудеси́ дивя́щеся, прини́кше дру́гъ ко дру́гу глаго́лаху: возми́те ваша́ врата́, и воспріими́те Ро́ждшую небесе́ и земли́ Творца́, славословле́нми же воспое́мъ честно́е и свято́е тѣ́ло, вмѣсти́вшее на́ми Неви́димаго и Го́спода. Тѣ́мже и мы́, па́мять Твою́ пра́зднующе, вопіе́мъ Ти́, Препѣ́тая: христіа́нскій ро́гъ вознеси́, и спаси́ ду́ши на́ша].

[На благослове́ніи хлѣ́бовъ: Тропа́рь Прему́дрости, два́жды. И пра́здника Успе́нія, еди́ножды.]

Тропа́рь Прему́дрости, гласъ 1:

На престо́лѣ огнезра́чнѣмъ въ вы́шнихъ сѣдя́й со Отце́мъ Безнача́льнымъ и Боже́ственнымъ Твои́мъ Ду́хомъ, благоволи́лъ еси́ яви́тися на земли́, я́ко человѣ́къ, исполня́я предвѣ́чный о на́съ совѣ́тъ Святы́я Тро́ицы, Христе́ Іису́се; сего́ ра́ди и пострада́лъ еси́ пло́тію, да спасе́ши мíръ и вознесе́ши избра́нныя Твоя́, идѣ́же при́сно, я́ко Бо́гъ, во сла́вѣ ца́рствуеши. Сла́ва всеблаго́му Твоему́ совѣ́ту, сла́ва прему́дрому смотре́нію Твоему́, сла́ва неизрече́нному снизхожде́нію Твоему́, Еди́не Человѣколю́бче.


[НА УТРЕНИ,
На Бо́гъ Госпо́дь: тропа́рь Прему́дрости, два́жды. Сла́ва, и ны́нѣ, Успе́нія.

По 1-й стихоло́гіи сѣда́ленъ пра́здника Успе́нія, гла́съ 1. Подо́бенъ: Гро́бъ Тво́й Спа́се.

Всечестны́й ли́къ прему́дрыхъ апо́столъ собра́ся чу́дно, погребсти́ сла́вно тѣ́ло Твое́ пречи́стое, Богоро́дице Всепѣ́тая. Съ ни́миже воспѣ́ша и Ангелъ мно́жество, преставле́ніе Твое́ че́стно хва́ляще, е́же вѣ́рою пра́зднуемъ.

Сла́ва, и ны́нѣ, то́йже.

По 2-й стихоло́гіи сѣда́ленъ пра́здника Успе́нія, гла́съ 3. Подо́бенъ: Красотѣ́ дѣ́вства.

Въ рождествѣ́ Твое́мъ зача́тіе безсѣ́менное, во успе́ніи Твое́мъ ме́ртвость нетлѣ́нная, чу́до въ чудеси́ сугу́бо стече́ся Богоро́дице: ка́ко бо Неискусому́жная, Младопита́тельница чиста́ су́щи? Ка́ко же Ма́ти Бо́гу мертвоно́сна мѵроуха́ющи? Тѣ́мже со Ангеломъ вопіе́мъ Ти́: ра́дуйся, Благода́тная.

Сла́ва, и ны́нѣ, то́йже.]

Велича́ніе:

Велича́емъ Тя́, Единоро́дный Сы́не Бо́жій, Іису́се Христе́, вся́ прему́дростію Твое́ю въ нача́лѣ сотво́ршаго и человѣ́ческій па́дшій ро́дъ отъ вѣ́чныя сме́рти всеми́лостивно искупи́вшаго.

[По поліеле́и сѣда́ленъ, гла́съ 4. Подо́бенъ: Удиви́ся Іо́сифъ.

Возопíй, Дави́де, что́ се́й пра́здникъ, его́же воспѣ́лъ еси́ дре́вле въ кни́зѣ псало́мстѣй? Яко Дще́рь, Богоотрокови́цу и Дѣ́ву, преложи́ Ю на о́ны оби́тели Христо́съ, Иже изъ Нея́ безъ сѣ́мене ро́ждся. И сего́ ра́ди ра́дуются ма́тери, и дще́ри, и невѣ́сты Христо́вы, вопію́ще: ра́дуйся Преста́вившаяся къ вы́шнему Ца́рствію.

Сла́ва, и ны́нѣ, то́йже.

Степе́нна, 1-й антифо́нъ 4-го гла́са.] Проки́менъ, [гла́съ 4]: Пріиди́те, возра́дуемся Го́сподеви,* воскли́кнемъ Бо́гу, Спаси́телю на́шему. Сти́хъ: Избавле́ніе посла́ лю́демъ Свои́мъ, заповѣ́да въ вѣ́къ завѣ́тъ Сво́й. [Вся́кое дыха́ніе...] Ева́нгеліе Іоа́нна [глава́ 3, ст. 13-17]: Рече́ Госпо́дь: никто́же взы́де на не́бо... Коне́цъ: но да спасе́тся Имъ мíръ.

По 50-мъ псалмѣ́:

Сла́ва: Вся́ческая дне́сь ра́дости испо́лнишася, Бо́гъ Госпо́дь, и яви́ся на́мъ.

И ны́нѣ, то́йже. [Та́же стихи́ра, гла́съ 6:

Го́споди, воплоти́лся еси́, я́коже восхотѣ́лъ еси́, изво́лилъ еси́ воспрія́ти нищету́ на́шу и бога́тство благосе́рдія показа́лъ еси́. Сла́вимъ Тя́, Человѣколю́бче, смотре́нія Твоего́ та́инство почита́юще и моля́щеся дарова́ти на́мъ оставле́ніе прегрѣше́ній на́шихъ, ми́ръ и ве́лію ми́лость.

Кано́нъ Успе́нія 1-го гла́са со ирмосо́мъ на 6 и Іису́су Сладча́йшему, гла́съ 2 на 8.

Кано́нъ Успе́нія, ки́ръ Космы́, его́же краестро́чіе: Да торжеству́ютъ богому́дріи. Гла́съ 1.
Пѣ́снь 1.

Ирмо́съ: Преукраше́нная Боже́ственною сла́вою, свяще́нная и сла́вная, Дѣ́во, па́мять Твоя́, вся́ собра́ къ весе́лію вѣ́рныя, начина́ющей Маріа́мѣ, съ ли́ки и тимпа́ны, Твоему́ пою́ще Единоро́дному: сла́вно я́ко просла́вися.

Да провожда́ютъ невеще́ственніи чи́нове, небоше́ственное въ Сіо́нъ Боже́ственное тѣ́ло Твое́, внеза́пу же сте́кшеся апо́столъ мно́жество отъ коне́цъ, Богоро́дице, Тебѣ́ предста́ша а́біе, съ ни́миже, Чи́стая, Твою́ честну́ю, Дѣ́во, па́мять сла́вимъ.

Побѣ́дныя по́чести взяла́ еси́ на естество́, Чи́стая, Бо́га ро́ждши, оба́че же, подо́бящися Творцу́ Твоему́ и Сы́ну, па́че естества́ повину́ешися есте́ственнымъ зако́номъ. Тѣ́мже уме́рши, съ Сы́номъ востае́ши вѣ́чнующи.]

Кано́нъ Іису́су Сладча́йшему, гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Іису́се Сладча́йшій Христе́, Іису́се Долготерпѣли́ве, души́ моея́ я́звы исцѣли́, Іису́се, и услади́ се́рдце мое́, Многоми́лостиве, молю́ся, Іису́се, Спа́се мо́й, да велича́ю Тя́, спаса́емый.

Іису́се Сладча́йшій Христе́, Іису́се, отве́рзи покая́нія ми́ две́рь, Человѣколю́бче Іису́се, и пріими́ мя, Тебѣ́ припа́дающа и те́плѣ прося́ща, Іису́се, Спа́се мо́й, согрѣше́ній проще́нія.

Іису́се Сладча́йшій Христе́, Іису́се, исхити́ мя изъ руки́ льсти́ваго веліа́ра, Іису́се, и сотвори́ десна́го предстоя́теля сла́вы Твоея́, Іису́се, Спа́се мо́й, ча́сти шу́ія мя́ избавля́яй.

Богоро́диченъ: Іису́са ро́ждшая Бо́га, Влады́чице, моли́ о непотре́бныхъ рабѣ́хъ, Пречи́стая, я́ко да му́ки моли́твами Твои́ми изба́вимся, Нескве́рная, оскверне́нніи, сла́вы присносу́щныя наслажда́ющеся.

Катава́сія: Преукраше́нная...

Пѣ́снь 3.

Ирмо́съ: Содѣ́тельная и содержи́тельная всѣ́хъ, Бо́жія Му́дросте и Си́ло, непрекло́нну, недви́жиму Це́рковь утверди́, Христе́, еди́нъ бо еси́ Свя́тъ, во святы́хъ почива́яй.

Жену́ Тя́ ме́ртвенну, но па́че естества́ и Ма́терь Бо́жію, ви́дѣвше, Всенепоро́чная, сла́вніи апо́столи, ужа́сно прикаса́хуся рука́ми сла́вою облиста́ющей, я́ко богопрія́тное Селе́ніе ви́дяще.

Пости́же ру́цѣ досади́тельныя де́рзаго, усѣче́ніемъ су́дъ нане́съ, Бо́гу сохра́ншу че́сть одушевле́нному Киво́ту, сла́вою Божества́, въ Не́мже Сло́во пло́ть бы́сть.

Инъ.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Услы́ши, Человѣколю́бче Іису́се мо́й, раба́ Твоего́, вопію́ща во умиле́ніи, и изба́ви мя́, Іису́се, осужде́нія и му́ки, Еди́не Долготерпѣли́ве, Іису́се Сладча́йшій Многоми́лостиве.

Подыми́ раба́ Твоего́, Іису́се мо́й, припа́дающа со слеза́ми, Іису́се мо́й, и спаси́, Іису́се мо́й, ка́ющагося мя́ и гее́нны, Влады́ко, изба́ви, Іису́се Сладча́йшій Многоми́лостиве.

Вре́мя, Іису́се мо́й, е́же да́лъ ми́ еси́, во стра́сти ижди́хъ, Іису́се мо́й. Тѣ́мже, Іису́се мо́й, не отве́ржи мя́, но воззови́, молю́ся, Влады́ко, Іису́се Сладча́йшій, и спаси́.

Богоро́диченъ: Дѣ́во, ро́ждшая Іису́са моего́, моли́ изба́вити мя́ гее́нны, еди́но предста́тельство оскорбля́емыхъ, Богоблагода́тная, и сподо́би мя́ жи́зни, Всенепоро́чная, нестарѣ́ющіяся.

Конда́къ Успе́нія, гла́съ 2:

Въ моли́твахъ неусыпа́ющую Богоро́дицу и въ предста́тельствахъ непрело́жное упова́ніе, гро́бъ и умерщвле́ніе не удержа́ста: я́коже бо Живота́ Ма́терь, къ животу́ преста́ви, во утро́бу Всели́выйся приснодѣ́вственную.

Икосъ:

Огради́ моя́ помышле́нія, Христе́ мо́й, и́бо Стѣ́ну мíра воспѣ́ти дерза́ю, Чи́стую Ма́терь Твою́, на столпѣ́ глаго́лъ укрѣпи́ мя, и въ тя́жкихъ мы́слехъ заступи́ мя, Ты́ бо взыва́ющимъ и прося́щимъ вѣ́рою моле́нія исполня́еши. Ты́ мнѣ́ у́бо да́руй язы́къ прино́сенъ и по́мыслъ непосты́денъ: вся́кое бо дая́ніе сія́нія отъ Тебе́ низпосыла́ется, Свѣтопода́телю, во утро́бу всели́выйся приснодѣ́вственную.

Сла́ва, и ны́нѣ, ипакои́, гла́съ 8:

Блажи́мъ Тя́, вси́ ро́ди, Богоро́дице Дѣ́во, въ Тя́ бо Невмѣсти́мый Христо́съ Бо́гъ на́шъ, вмѣсти́тися благоволи́. Блаже́ни есмы́ и мы́, предста́тельство Тя́ иму́ще: де́нь бо и но́щь мо́лишися о на́съ, и ски́птры ца́рствія Твои́ми моли́твами утвержда́ются. Тѣ́мъ, воспѣва́юще, вопіе́мъ Ти́: ра́дуйся, Благода́тная, Госпо́дь съ Тобо́ю.

Пѣ́снь 4.

Ирмо́съ: Рѣ́чи проро́ковъ и гада́нія, воплоще́ніе прояви́ша отъ Дѣ́вы Твое́, Христе́: сія́ніе блиста́нія Твоего́ во свѣ́тъ язы́ковъ изы́детъ, и возгласи́тъ Тебѣ́ бе́здна съ весе́ліемъ: си́лѣ Твое́й сла́ва, Человѣколю́бче.

Ви́дите лю́діе и чуди́теся: Гора́ бо свята́я и я́вственная Бо́гу въ небе́сныя оби́тели превы́шше взе́млется, Не́бо земно́е въ небе́сное и нетлѣ́нное селе́ніе вселя́емо.

Жи́зни присносу́щныя и лу́чшія, сме́рть Твоя́ бы́сть прехожде́ніе, Чи́стая, отъ привре́менныя къ Боже́ственнѣй вои́стинну и непреходи́мѣй, преставля́я Тя́, Чи́стая, въ весе́ліи Сы́на зрѣ́ти Твоего́ и Го́спода.

Взя́шася две́ри небе́сныя, и Ангели воспѣ́ша, и прія́тъ Христо́съ дѣ́вства Своея́ Ма́тере сосу́дъ; Херуви́ми подъя́ша Тя́ съ весе́ліемъ, Серафи́ми же сла́вятъ, ра́дующеся.

Инъ.

Ирмо́съ: Прише́лъ еси́ отъ Дѣ́вы, не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя человѣ́ка. Тѣ́мъ зову́ Ти́: сла́ва си́лѣ Твое́й, Го́споди.

Исцѣли́, Іису́се мо́й, души́ моея́ я́звы, Іису́се мо́й, молю́ся и руки́ мя́ исхити́, Іису́се мо́й Благоутро́бне, душетлѣ́ннаго веліа́ра и спаси́.

Согрѣши́хъ, Іису́се мо́й Сладча́йшій, Благоутро́бне, Іису́се мо́й, спаси́ мя́, прибѣга́ющаго къ покро́ву Твоему́, Іису́се Долготерпѣли́ве, и Ца́рствія Твоего́ мя́ сподо́би.

Никто́же согрѣши́, Іису́се мо́й, я́коже согрѣши́хъ а́зъ, окая́нный, но припа́даю, моля́ся: Іису́се мо́й, спаси́ мя и жи́зни, Іису́се мо́й, наслѣ́діе ми́ да́руй.

Богоро́диченъ: Всепѣ́тая, Іису́са ро́ждшая Го́спода, Того́ моли́ изба́вити му́ки вся́, пою́щія Тя́, и Богоро́дицу вои́стинну имену́ющія.

Пѣ́снь 5.

Ирмо́съ: Бо́жію и неизрече́нную добро́ту, добродѣ́телей Твои́хъ, Христе́ исповѣ́мъ: отъ Присносу́щныя бо Сла́вы, Соприсносу́щное и Ѵпоста́сное возсія́вый Сія́ніе, изъ дѣ́вственныя утро́бы, су́щимъ во тмѣ́ и сѣ́ни, вопло́щся, возсія́лъ еси́ Со́лнце.

Яко на о́блацѣ Дѣ́во, апо́стольскій ли́къ носи́мь, къ Сіо́ну отъ коне́цъ, служи́ти Тебѣ́, Облаку ле́гкому, собира́шеся: отъ Нея́же Вы́шній Бо́гъ, су́щимъ во тьмѣ́ и сѣ́ни, Пра́ведное возсія́ Со́лнце.

Тру́бъ, богопрія́тніи язы́цы богосло́вныхъ муже́й благогла́снѣйше Богоро́дицѣ вопія́ху, исхо́дную возглаша́юще пѣ́снь Ду́хомъ: ра́дуйся нетлѣ́нный Исто́чниче, Бо́жія живонача́льнаго и спаси́тельнаго всѣ́мъ воплоще́нія.

Инъ.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Ты́ просвѣще́ніе, Іису́се мо́й, ума́ моего́, Ты́ спасе́ніе отча́янныя души́ моея́, Спа́се, Ты́, Іису́се мо́й, му́ки изба́ви и гее́нны мя́, зову́ща: спаси́, Іису́се мо́й, Христе́, мя́, окая́ннаго.

Всеконе́чно, Іису́се мо́й, ко стра́сти безче́стія низве́рженъ, ны́нѣ зову́: Ты́, Іису́се мо́й, по́мощи ми́ ру́ку низпосла́въ, исто́ргни зову́ща: спаси́, Іису́се мо́й Христе́, мя́, окая́ннаго.

Оскверне́нъ у́мъ, Іису́се мо́й, обнося́, взыва́ю Ти́: очи́сти мя́ отъ скве́рны прегрѣше́ній и изба́ви мя́ во глубины́ зло́бы отъ невѣ́дѣнія низпопо́лзшагося, Спа́се Іису́се мо́й, и спаси́ мя́, молю́ся.

Богоро́диченъ: Іису́са ро́ждшая, Отрокови́це Богороди́тельнице, Того́ умоли́ спасти́ вся́ правосла́вныя, мона́хи и мірскíя и гее́нны изба́вити зову́щія: ра́звѣ Тебе́ предста́тельства тве́рдаго не зна́емъ.

Пѣ́снь 6.

Ирмо́съ: Морскíй пучиноро́дный ки́товъ вну́тренній о́гнь — тридне́внаго Твоего́ погребе́нія проображе́ніе, его́же Іо́на проро́къ показа́ся. Спасе́нъ бо, я́ко и предпосла́ся, неврежде́нъ, вопія́ше: пожру́ Ти́ со гла́сомъ хвале́нія, Го́споди.

Дае́тъ Тебѣ́, я́же превы́ше естества́, Ца́рь всѣ́хъ Бо́гъ: въ рождествѣ́ бо Дѣ́ву я́коже сохрани́, та́ко во гро́бѣ тѣ́ло соблю́дъ нетлѣ́нно и спросла́ви Боже́ственнымъ преставле́ніемъ, че́сть Тебѣ́, я́ко Сы́нъ Ма́тери, да́руя.

Вои́стинну Тя́, я́ко свѣ́телъ свѣ́щникъ, невеще́ственнаго Свѣ́та, кади́льницу злату́ю Боже́ственнаго Угля, во Свята́я святы́хъ всели́, ру́чку и же́злъ, скрижа́ль богопи́санную, ковче́гъ святы́й, трапе́зу Сло́ва жи́зни, Дѣ́во, Рождество́ Твое́.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Іису́се мо́й, Христе́ Многоми́лостиве, исповѣ́дающася пріими́ мя, Влады́ко, о Іису́се! И спаси́ мя, и отъ тли́, Іису́се, мя́ исхити́.

Іису́се мо́й, никто́же бы́сть и́нъ блудни́къ, я́коже а́зъ, стра́стный, о Іису́се Человѣколю́бче, но Ты́, Іису́се, мя́ спаси́.

Іису́се мо́й, блудни́цу, и блу́днаго, и Манассíю, и мытаря́ преидо́хъ, о Іису́се мо́й, страстьми́, и разбо́йника, Іису́се, и ниневи́тяны.

Богоро́диченъ: Іису́са Христа́ моего́ ро́ждшая, Пречи́стая Дѣ́во, еди́на нескве́рная, оскверне́на су́ща мя́ моли́твъ Твои́хъ иссо́помъ ны́нѣ очи́сти].

Конда́къ Прему́дрости, гла́съ 8:

Избра́нному пре́жде вѣ́къ содѣ́лати спасе́ніе мíра, Вели́каго Совѣ́та Ангелу, Сы́ну Бо́жію, Іису́су Христу́, пріиди́те, вѣ́рніи, поклони́мся и припаде́мъ Ему́, сла́вяще неизрече́нное о на́съ Боже́ственное смотрѣ́ніе, и, я́ко изба́вленніи отъ вѣ́чныя сме́рти, вознесе́мъ Ему́, Спаси́телю на́шему и Бо́гу, благода́рственную пѣ́снь, душа́ми чи́стыми и нескве́рными устна́ми взыва́юще: сла́ва Тебѣ́, Го́споди, сла́ва Тебѣ́.

Икосъ:

Ангеловъ и всѣ́хъ небе́сныхъ си́лъ ликостоя́нію подража́юще, превы́шнему престо́лу Вседержи́теля Бо́га предстоя́щихъ и трисвяты́мъ гла́сомъ немо́лчно славосло́вящихъ всечестно́е и великолѣ́ное и́мя Его́, иску́пленніи раби́ Твои́, Христе́ Царю́, дерза́емъ, а́ще и недосто́йно, восхвали́ти Тя́, Спа́са и Изба́вателя на́шего Бо́га: Ты́ же, я́ко Всеблагíй и Милосе́рдый, обы́чнымъ Твои́мъ призрѣ́въ на на́съ благоутро́біемъ, пріими́ отъ на́съ возноси́мую Тебѣ́ хвалу́, боголѣ́пно и всече́стно Тебѣ́ вопію́щихъ: сла́ва Тебѣ́, Го́споди, Сы́не Бо́жій Единоро́дный; сла́ва Тебѣ́, Го́споди, Всемогу́щая тво́рческая Си́ло; сла́ва Тебѣ́, Го́споди, великоимени́тая Ѵпоста́сная Прему́дросте; сла́ва Тебѣ́, Го́споди, всесвятѣ́йшая боже́ственная Пра́вдо; сла́ва Тебѣ́, Го́споди, Сы́не нетлѣ́нно рожде́нный отъ Отца́ пре́жде всѣ́хъ вѣ́къ; сла́ва Тебѣ́, Го́споди, Сія́ніе сла́вы Отчей и Образе Ѵпоста́си Его́; сла́ва Тебѣ́, Го́споди, Еди́ный Свѣ́те отъ трисо́лнечнаго Свѣ́та; сла́ва Тебѣ́, Го́споди, и́стинный Бо́же отъ и́стиннаго Бо́га; сла́ва Тебѣ́, Го́споди, Безнача́льному Отцу́ и Присносу́щному Ду́ху, Собезнача́льный и Соприсносу́щный; сла́ва Тебѣ́, Го́споди, во еди́номъ со Отце́мъ и Ду́хомъ Божествѣ́, ца́рствѣ, си́лѣ и вла́сти исповѣ́дуемый; сла́ва Тебѣ́, Го́споди, еди́ною со Отце́мъ и Ду́хомъ боже́ственною сла́вою отъ всѣ́хъ небе́сныхъ си́лъ воспѣва́емый и превозпоси́мый; сла́ва Тебѣ́, Го́споди, отъ всѣ́хъ земноро́дныхъ, я́ко Еди́ный отъ Тро́ицы, боголѣ́пно покланя́емый и сла́вимый. Сла́ва Тебѣ́, Го́споди, сла́ва Тебѣ́.

[Пѣ́снь 7.

Ирмо́съ: Безсту́днѣй я́рости же и огню́ Боже́ственное жела́ніе сопротивля́яся, о́гнь у́бо ороша́ше, я́рости же смѣя́шеся, богодохнове́нною слове́сною преподо́бныхъ тривѣща́нною цѣвни́цею, противовѣща́я мусикíйскимъ орга́номъ посреди́ пла́мене: препросла́вленный отце́въ и на́шъ Бо́же, благослове́нъ еси́.

Богодѣ́ланныя скрижа́ли Моисе́й, пи́санныя Боже́ственнымъ Ду́хомъ, я́ростію сокру́шъ, но сего́ Влады́ка, Ро́ждшую неврежде́нну въ небе́сныя сохра́нь до́мы, ны́нѣ вну́трь всели́. Съ Не́ю игра́юще, вопіе́мъ Христу́: препросла́вленный отце́въ и на́шъ Бо́же, благослове́нъ еси́.

Въ кимва́лѣхъ — усты́ чи́стыми, мусикíйски же — се́рдцемъ свѣ́тлымъ, доброгла́сною трубо́ю — высо́кою мы́слію, Дѣ́вы и Чи́стыя въ наро́читый избра́нный де́нь преставле́нія, дѣ́тельными пле́щуще рука́ми, вопіе́мъ: препросла́вленный отце́въ и на́шъ Бо́же, благослове́нъ еси́.

Богому́дріи, собери́теся, лю́діе: Бо́жія бо сла́вы Селе́ніе, отъ Сіо́на преставля́ется къ небе́сному жили́щу, идѣ́же гла́съ чи́стъ пра́зднующихъ, гла́съ несказа́ннаго ра́дованія, и въ весе́ліи вопію́щихъ Христу́: препросла́вленный отце́въ и на́шъ Бо́же, благослове́нъ еси́.

Инъ.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Христе́ Іису́се, никто́же согрѣши́ на земли́ отъ вѣ́ка, о Іису́се мо́й, я́коже согрѣши́хъ а́зъ, окая́нный и блу́дный. Тѣ́мже, Іису́се мо́й, вопію́ Ти́: пою́ща мя́ уще́дри, благослове́нъ еси́, Бо́же оте́цъ на́шихъ.

Христе́ Іису́се, ко стра́ху Твоему́, вопію́, пригвозди́ мя, о Іису́се мо́й, и окорми́ ны́нѣ ко приста́нищу благоотишному, яко да, Іису́се мо́й Ще́дре, пою́ Ти спаса́емый: благослове́нъ еси́, Бо́же оте́цъ на́шихъ.

Христе́ Іису́се, тма́ми обѣща́хъ Тебѣ́ стра́стный, о Іису́се мо́й, покая́ніе, но солга́хъ, окая́нный. Тѣ́мже, Іису́се мо́й, вопію́ Ти: нечу́вственнѣ пребыва́ющую ду́шу мою́ просвѣти́, Христе́, отце́въ Бо́же благослове́нъ еси́.

Богоро́диченъ: Христа́ Іису́са ро́ждшая стра́нно и па́че естества́, Того́ моли́, Всенепоро́чная, я́же чрезъ естество́ моя́ прегрѣше́нія вся́ прости́ти ми́, Отрокови́це, да зову́, спаса́емь: благослове́нна еси́ Бо́га пло́тію ро́ждшая.

Пѣ́снь 8.

Ирмо́съ: Пла́мень, ороша́ющь преподо́бныя, злочести́выя же попаля́ющь, Ангелъ Бо́жій всемо́щный показа́ отроко́мъ, живонача́льный же исто́чникъ содѣ́ла Богоро́дицу, тлю́ сме́рти и живо́тъ точа́щу пою́щимъ: Содѣ́теля еди́наго пои́мъ, изба́вленніи, и превозно́симъ во вся́ вѣ́ки.

Глаго́лы послѣ́доваху Боже́ственному Ковче́гу свяще́нному, все́ мно́жество богосло́вовъ въ Сіо́нѣ: ка́мо и́деши ны́нѣ, Ски́ніе, — зову́ще, — Бо́га Жива́го? Не преста́й призира́ющи вѣ́рою пою́щія: Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

Якоже, воздѣ́вши ру́цѣ, исхо́диши Всенепоро́чная, ру́цѣ, и́миже Бо́га носи́ла еси́ пло́тію, со дерзнове́ніемъ, я́ко Ма́ти, рекла́ еси́ къ Рожде́нному: я́же Ми́ да́лъ еси́, во вѣ́ки сохрани́, вопію́щія Тебѣ́: Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

Инъ.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Тя́, Іису́се мо́й, молю́, я́коже блудни́цу, Іису́се мо́й, изба́вилъ еси́ мно́гихъ согрѣше́ній, та́ко и мене́, Іису́се, Христе́ мо́й, изба́ви, и очи́сти оскверне́нную ду́шу мою́, Іису́се мо́й.

Преклони́вся, Іису́се, безслове́сными сластьми́, безслове́сенъ яви́хся и ското́мъ вои́стинну, о Іису́се мо́й, стра́стно окая́нный уподо́бихся, Спа́се: тѣ́мже, Іису́се, безслове́сія мя́ изба́ви.

Впа́дъ, о Іису́се, въ душетлѣ́нныя разбо́йники, обнажи́хся оде́жды, Іису́се мо́й, боготка́нныя ны́нѣ и лежу́, ра́нами уя́звленъ; еле́й, Христе́ мо́й, возле́й на мя́ и вино́.

Богоро́диченъ: Іису́са моего́ и Бо́га носи́вшая Христа́ несказа́нно, Богоро́дице Марíе, Того́ моли́ при́сно отъ бѣ́дъ спасти́ся рабо́мъ Твои́мъ и пѣвце́мъ Твои́мъ, Неискусому́жная Дѣ́во].

По 8-й пѣ́сни кано́на Честнѣ́йшую... не пое́мъ, но пое́мъ припѣ́въ Прему́дрости: Велича́й, душе́ моя́,* содѣ́лавшаго спасе́ніе посредѣ́ земли́ Христа́ Жизнода́вца.

[Пѣ́снь 9.

Ирмо́съ: Побѣжда́ются естества́ уста́вы въ Тебѣ́, Дѣ́во Чи́стая: дѣ́вствуетъ бо рождество́ и живо́тъ предобруча́етъ сме́рть; по рождествѣ́ Дѣ́ва и по сме́рти жива́, спаса́еши при́сно, Богоро́дице, наслѣ́діе Твое́.

Дивля́хуся Ангельскія си́лы, въ Сіо́нѣ смотря́юще своего́ Влады́ку, же́нскую ду́шу рука́ми нося́щаго, пречи́сто бо Ро́ждшей, сынолѣ́пно провозглаша́ше: гряди́, Чи́стая, съ Сы́номъ и Бо́гомъ просла́вленна бу́ди.

Опря́та ли́къ апо́стольскій богопрія́тное тѣ́ло Твое́, со стра́хомъ зря́ще и гла́сомъ ве́ліимъ вѣща́юще: въ небе́сныя до́мы къ Сы́ну восходя́щи, спаса́еши при́сно, Богоро́дице, наслѣ́діе Твое́.

Инъ.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Манассíю, Іису́се мо́й, мытаря́, блудни́цу, блу́днаго, Ще́дре Іису́се, и разбо́йника преидо́хъ, Іису́се мо́й, въ дѣ́лѣхъ сту́дныхъ и безмѣ́стныхъ, Іису́се, но Ты́, Іису́се мо́й, предвари́въ, мя́ спаси́.

Отъ Ада́ма, Іису́се мо́й, согрѣши́вшія вся́ пре́жде зако́на и въ зако́нѣ, Іису́се, и по зако́нѣ, окая́нный, и благода́ти, Іису́се мо́й, побѣди́хъ страстьми́ окая́нно; но Ты́, Іису́се мо́й, судьба́ми Твои́ми спаси́ мя.

Да не отлуче́нъ бу́ду, Іису́се мо́й, неизрече́нныя Твоея́ сла́вы, да не улучу́ ча́сти, Іису́се, шу́ія, Сладча́йшій Іису́се, но Ты́ мя десны́мъ овца́мъ Твои́мъ, Христе́ Іису́се мо́й, сочета́въ, упоко́й, я́ко Благоутро́бенъ.

Богоро́диченъ: Іису́са, Богоро́дице, Его́же носи́ла еси́, Еди́на Неискусому́жная Дѣ́во Марíе, Того́, Чи́стая, уми́лостиви, я́ко Сы́на Твоего́ и Зижди́теля, изба́вити притека́ющія къ Тебѣ́ искуше́ній, и бѣ́дъ, и огня́ бу́дущаго].

Свѣти́ленъ Успе́нія. Подо́бенъ: Не́бо звѣзда́ми.

Апо́столи отъ коне́цъ совоку́пльшеся здѣ́, въ Геѳсиманíйстѣй ве́си погреби́те тѣ́ло Мое́, и Ты́, Сы́не и Бо́же Мо́й, пріими́ ду́хъ Мо́й. [Три́жды.]

На хвали́техъ [стихи́ры Успе́нія на 4, гла́съ 4. Подо́бенъ: Яко до́бля.

Въ сла́вномъ успе́ніи Твое́мъ* небеса́ ра́дуются,* и а́нгельская возра́довашася во́инства,* вся́ же земля́ весели́тся,* пѣ́снь Тебѣ́ исхо́дную провозглаша́ющи,* Ма́тери всѣ́ми Влады́чествующаго,* Неискусобра́чная Пресвята́я Дѣ́во,* Яже ро́дъ человѣ́ческій изба́вльшая* прароди́тельнаго осужде́нія. [Два́жды.]

Отъ коне́цъ стеко́шася* апо́столовъ лу́чшіи,* богонача́льнымъ манове́ніемъ, погребсти́ Тя́,* и отъ земли́ взе́млему Тя́* къ высотѣ́ зря́ще,* гла́съ Гавріи́ловъ ра́достію вопія́ху Тебѣ́:* ра́дуйся, Носи́ло Божества́ всего́.* Ра́дуйся, Еди́на, земна́я съ вы́шними,* Рождество́мъ Твои́мъ совоку́пльшая.

Яже Живо́тъ ро́ждшая,* къ жи́зни премину́ла еси́,* честны́мъ успе́ніемъ Твои́мъ, безсме́ртнѣй,* доринося́щимъ Тя́ Ангеломъ,* Нача́ломъ и Си́ламъ,* апо́столомъ и проро́комъ, и все́й тва́ри,* пріе́мшу же нетлѣ́нными дла́ньми Сы́ну Твоему́,* непоро́чную ду́шу Твою́,* Дѣ́во Ма́ти Богоневѣ́сто].

Сла́ва, [Спаси́телю,] гла́съ 6:

Преклони́лъ еси́ небеса́, непостижи́ме Го́споди, сше́лъ еси́ во чре́во Дѣ́выя, неопи́санне, бы́въ изъ Нея́ Человѣ́къ существо́мъ же и естество́мъ, да спасе́ши человѣ́чество кра́йнія ра́ди Твоея́ ми́лости.

И ны́нѣ, [Успенія,] гла́съ 1:

Подоба́ше самови́дцамъ [Сло́ва и слуга́мъ, и е́же по пло́ти Ма́тере Его́ успе́ніе ви́дѣти, коне́чное ели́ко на Не́й та́инство, я́ко да не то́кмо е́же отъ земли́ Спа́сово восхожде́ніе у́зрятъ, но и Ро́ждшія Его́ преставле́нію свидѣ́тельствуютъ. Тѣ́мже, отвсю́ду Боже́ственною си́лою собра́вшеся, Сіо́на достиго́ша, и на не́бо иду́щую предсыла́ху, вы́шшую Херуви́мъ, Ейже и мы́ съ ни́ми покланя́емся, я́ко моля́щейся о душа́хъ на́шихъ].

[Славосло́віе вели́кое. Ектеніи́ и отпу́стъ.]



НА ЛИТУРГІИ,

[Блаже́нна отъ кано́на Успе́нія, пѣ́снь 1-я на 4 и Прему́дрости, пѣ́снь 6-я на 4.] По вхо́дѣ пое́мъ: Спаси́ ны, Сы́не Бо́жій, прише́дый спасти́ мíръ, пою́щія Ти́: аллилу́ія. Проки́менъ, [гла́съ 4]: Яко возвели́чишася дѣла́ Твоя́, Го́споди, вся́ прему́дростію сотвори́лъ еси́. Сти́хъ: Благослови́, душе́ моя́, Го́спода, Го́споди Бо́же мо́й, возвели́чился еси́ зѣло́. Апо́столъ, Пе́рваго Іоа́ннова посла́нія [гл. 4, ст. 9-14]: Возлю́бленніи, о се́мъ яви́ся любы́ Бо́жія въ на́съ... Коне́цъ: Яко Оте́цъ посла́ Сы́на Спаси́теля мíру. Аллилу́ія, [гла́съ 3]: Воспо́йте Го́сподеви пѣ́снь но́ву, воспо́йте Го́сподеви, вся́ земля́. Сти́хъ: Возвѣсти́те во язы́цѣхъ сла́ву Его́, во всѣ́хъ лю́дехъ чудеса́ Его́. Ева́нгеліе Луки́ [гл. 4, ст. 16-22]: Во вре́мя о́но, пріи́де Іису́съ въ Назаре́тъ... Коне́цъ: О словесѣ́хъ благода́ти, исходя́щихъ изъ у́стъ Его́. Прича́стенъ: Избавле́ніе посла́ Госпо́дь лю́демъ Свои́мъ.


НА МОЛЕБНѢ:

Проки́менъ у́тренній. Ева́нгеліе Іоа́нна [гл. 12, ст. 46-50]: Рече́ Госпо́дь ко прише́дшимъ къ Нему́ іуде́омъ: Азъ свѣ́тъ въ мíръ пріидо́хъ... Коне́цъ: Якоже рече́ Мнѣ́ Оте́цъ, та́ко глаго́лю.

Источникъ: Слу́жба Ѵпоста́сной Прему́дрости Бо́жіей, Спаси́телю на́шему Го́споду Іису́су Христу́. // Прибавленія къ Вологодскимъ Епархіальнымъ вѣдомостямъ. — №№ 17 и 18. — 1 и 15 Сентября 1868 года. — Вологда: Въ типографіи Губернскаго Правленія, 1868. — С. 460-467.

Свѣрено съ изданіемъ: Мине́я Августъ. Ча́сть втора́я. — М.: Издательскій совѣтъ Русской Православной Церкви, 2002. — С. 144-153.

/ Къ оглавленію раздѣла /


Наверхъ / Къ титульной страницѣ

0