Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 16-й де́нь.
Свята́го му́ченика Діоми́да.

Зри́. Слу́жба свята́го Діоми́да пое́тся на повече́ріи.

Кано́нъ свята́го Діоми́да, гла́съ 4.
Пѣ́снь 1.

Ирмо́съ: Отве́рзу уста́ моя́ и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Свѣ́томъ озаря́емь трисо́лнечнымъ, разрѣши́ мра́къ, блаже́нне, неразу́мія моего́, я́ко да воспою́ свѣтоно́сную твою́ па́мять и исправле́ніе житія́ твоего́.

Страсте́й непрія́тенъ по́мыслъ содѣ́лавъ, прія́телище, сла́вне, яви́лся еси́ Ду́ха, и источи́лъ еси́ исцѣле́ній пучи́ну, всю́ потопля́ющую неду́говъ скве́рну.

Жи́зни жела́я безконе́чныя, ча́шу сме́ртную, прехва́льне, испи́ти потща́лся еси́, ю́же и получи́лъ еси́, я́коже вѣ́сть Зва́вый тя́ къ вѣнцу́ неувяда́ющему, му́чениче непобѣди́мый.

Богоро́диченъ: Гра́де одушевле́нный Царя́, Всенепоро́чная, стра́нное рождество́ и боже́ственное успе́ніе показа́вшая, гра́дъ Тво́й отъ вся́каго тру́са и паде́нія покажи́ невреди́мь.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный исто́чниче, ли́къ себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Неизглаго́ланнымъ и Боже́ственнымъ рукодѣ́йствомъ очища́я стра́сти человѣ́ковъ, отъ Бо́га дарова́лся еси́ вѣ́рнымъ вра́чь изря́денъ и моли́твенникъ те́плъ, тя́ чту́щимъ, пребога́те.

Въ пу́ть свидѣ́ній Твои́хъ теку́ и Твое́й подо́бяся стра́сти во́льнѣй, — му́ченикъ взыва́ше, на заколе́ніе влеко́мь, — къ Тебѣ́, еди́ному Бо́гу на́шему.

Сла́вный му́ченикъ Діоми́дъ, на́съ созва́въ та́йно на трапе́зу дне́сь, предлага́етъ страда́нія своя́, я́коже бра́шно невеще́ственное, вѣ́рніи, пріиди́те, наслади́мся.

Богоро́диченъ: Гра́дъ Тво́й се́й, отъ вся́каго тру́са и паде́нія, Чи́стая, я́ко на Тя́, Богоблагода́тная, возложе́нъ е́сть, изба́ви и въ ми́рѣ сохрани́ и единомы́сліи, Богоневѣ́сто.

Сѣда́ленъ свята́го, гла́съ 4. Подо́бенъ: Вознесы́йся.

Даро́въ Боже́ственныхъ испо́лненъ, ду́шъ показа́лся еси́ вра́чь и тѣле́съ, и му́ченическимъ благосла́віемъ обогати́вся я́вѣ, ра́дуяся, прише́лъ еси́ ко оби́телемъ присноживо́тнымъ. Тѣ́мже, святу́ю твою́ пра́зднующе па́мять, взыва́емъ: помяни́ на́съ, тя́ чту́щихъ, богому́дре и пребога́те.

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы, воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Сло́во Боже́ственнаго ра́зума, я́ко рѣку́, нося́ въ се́рдцы, потопи́ пре́лести пото́ки и и́дольскую крѣ́пость до конца́ погрузи́ му́ченикъ Діоми́дъ сла́вный.

Возсія́, я́ко со́лнце на земли́, заре́ю добродѣ́телей и чуде́съ бога́тствомъ и просвѣти́ вѣ́рныхъ правосла́вныя собо́ры му́ченикъ Діоми́дъ всему́дрый.

Врачевство́ безме́здно тво́й хра́мъ всѣ́мъ, вѣ́рою притека́ющимъ, яви́ся, преблаже́нне, и забра́ло тве́рдо Ца́рскому гра́ду, упражня́я наше́ствія иноплеме́нныхъ вра́гъ.

Богоро́диченъ: Стра́нно Твое́ рождество́, я́ко и честно́е успе́ніе, показа́ся, Пренепоро́чная Благослове́нная, е́же гра́дъ Тво́й почита́етъ, иноплеме́нныхъ избѣга́я вре́довъ те́плымъ Твои́мъ предста́тельствомъ.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й, Ты́ бо, Неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га и родила́ еси́ Безлѣ́тнаго Сы́на, всѣ́мъ воспѣва́ющимъ Тя́ ми́ръ подава́ющая.

Яви́лся еси́ безъ кро́ве му́ченикъ досточу́денъ, безъ болѣ́зней вѣне́чникъ, безъ я́звъ побѣди́тель изря́денъ, полки́ враго́въ низлага́я твои́ми по́двиги, Діоми́де блаже́нне.

Свѣ́тъ тебѣ́ возсія́, су́щу пра́ведну, неугаси́мый, сего́ же супру́гъ, богому́дре, тебѣ́ весе́ліе послѣ́дова, я́ко пра́ву иму́щу ду́шу, всѣ́мъ послѣ́дующу Спа́са повелѣ́ніемъ.

Свѣ́та лиша́ются у́бо тѣле́снаго мучи́тели, твою́ главу́ по кончи́нѣ отсѣ́кшіи, но душе́вніи свѣтоза́рно зѣ́ницы отверза́ются, Христу́ вѣ́рою присту́пльше, Діоми́де чу́дный.

Богоро́диченъ: Забра́ло имѣ́я Ца́рскій гра́дъ, Тя́, Цари́цу и Госпожу́, побѣжда́етъ ва́рваровъ звѣри́на стремле́нія, избавля́ется вся́кихъ напа́стей, расте́тъ и утвержда́ется, Богома́ти Всенепоро́чная.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те рука́ми воспле́щимъ, отъ Нея́ ро́ждшагося Бо́га сла́вимъ.

Твои́хъ по́двигъ тече́ніемъ погрузи́лъ еси́ врага́ безпло́тнаго и чуде́съ твои́хъ источе́ніемъ омыва́еши страсте́й многови́дныя скве́рны, досточу́дне.

Боже́ственными дыха́ніи дви́жимь, Вы́шнимъ манове́ніемъ окормля́емь, къ ти́хому приста́нищу пра́вѣ дости́глъ еси́, о на́съ моли́ся, му́чениче прехва́льне.

Страсте́й па́жити потребля́ются неизглаго́ланнымъ рукодѣ́йствіемъ твои́мъ, сла́вне, и отгоня́ется по́лкъ де́монскій боже́ственнымъ твои́мъ предста́тельствомъ, му́чениче присноблаже́нне.

Богоро́диченъ: О Тебѣ́, Дѣ́во, хва́лимся, Тобо́ю отъ вра́гъ избавля́емся, надѣ́яніемъ Твои́мъ наше́ствія не убои́мся вра́гъ иноплеме́нныхъ, воспѣва́ющіи Тя́.

Конда́къ, гла́съ 2. Подо́бенъ: Вы́шнихъ ища́.

Истинный и непобѣди́мый страстоте́рпецъ, благоче́стія и благода́ти небе́сный таи́нникъ я́влься, Діоми́де пресла́вне, побѣди́въ мучи́теля и побѣдоно́сецъ бы́въ, вѣнцы́ побѣ́дными просла́вися.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Отсѣ́чена бы́вши, глава́ твоя́, свѣ́тъ облиста́ суему́дрымъ, ю́же, я́ко жи́ву, ви́дѣвъ, устыдѣ́ся мучи́тель, умерщвле́нъ умо́мъ, не разумѣ́ же вопи́ти, пресла́вне: Бо́же, благослове́нъ еси́.

Совле́клся еси́ умерщвле́нія, сла́вне, ри́зы злообра́зныя, въ безсме́ртія оде́жду красну́ благода́тію обле́клся. Тѣ́мже Влады́цѣ твоему́ вопіе́ши, ра́дуяся: Бо́же, благослове́нъ еси́.

Огне́мъ терпѣ́нія попали́лъ еси́ ве́щную ле́сть враго́въ, богосія́нна же звѣзда́ яви́лся еси́ исцѣле́ній, му́чениче, облиста́я лучи́ зову́щимъ: оте́цъ на́шихъ Бо́же, благослове́нъ еси́.

Богоро́диченъ: Цари́ца мíра, ро́ждшая Царя́ Христа́, изба́ви тли́ и тру́са, и язы́къ наи́тія, Ца́рствующій гра́дъ, Влады́чице, благослове́нъ, — по́ющій, — Пло́дъ чре́ва Твоего́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте дѣла́ и превозноси́те Его́ во вся́ вѣ́ки.

Но́ги честны́я твоя́, страстоте́рпче, ко стезя́мъ муче́нія напра́вишася, хо́дятъ же ны́нѣ, ра́дующеся, во странѣ́ живу́щихъ, прему́дре, въ ра́йстѣй пи́щи. Тѣ́мже и, соше́дшеся, чти́мъ, воспѣва́юще Христа́ во вѣ́ки.

Исплете́ся тебѣ́ вѣне́цъ нетлѣ́нія, тве́рдо подви́гшуся и побѣди́вшу змíя злонача́льнаго, му́чениче достохва́льне, и страда́льческій ли́къ тя́ прія́тъ, Го́спода по́йте, — вопію́ща, — и превозноси́те Его́ во вѣ́ки.

Чуде́съ испуща́еши лучи́, Боже́ственною одѣ́янъ, му́чениче, си́лою, уставля́еши болѣ́зни, рѣши́ши неду́ги, отгоня́еши ду́хи лука́выя, вопія́: Го́спода по́йте, дѣла́, и превозноси́те Его́ во вѣ́ки.

Богоро́диченъ: Мно́гими прило́ги грѣхо́вными преклоне́ни, къ Твоему́ непрекло́нному покро́ву прибѣга́емъ: утверди́ рабы́ Твоя́, на стра́сти укрѣпи́ и отъ тру́са, и гла́да, и язы́къ наше́ствія, Дѣ́во, изба́ви Твое́ ста́до, я́ко на Тя́ возложе́но е́сть.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Обрѣ́лъ еси́ возме́здіе трудо́въ, горѣ́ тебѣ́ угото́вльшуюся пи́щу, идѣ́же водворя́яся, укра́шенъ му́ченическими добро́тами, наслажда́ешися Зижди́теля твоего́ красоты́, прося́, му́чениче, чту́щимъ тя́ очище́нія и зо́лъ избавле́нія.

Сто́лпъ добродѣ́телей и вѣ́ры утвержде́ніе, забра́ло недви́жимо, и стѣна́ непреклони́ма показа́лся еси́, му́чениче, Це́ркви Христо́вѣ, и рѣка́ исцѣле́ній, источа́я то́ки врачева́нія безме́здна любо́вію творя́щимъ твою́ па́мять, пресла́вне.

Отгна́лъ еси́ отъ земли́ и́дольское безбо́жіе, потреби́лъ еси́ мглу́ и къ невече́рнѣй зари́ приложи́лся еси́ свѣтонача́льныя жи́зни, ея́же явле́нія, сла́вне, пе́рвѣе стяжа́лъ еси́, отону́дными сія́ніи озаря́емь и ра́дости присносу́щныя исполня́яся.

Богоро́диченъ: Гра́де Бо́жій, въ о́ньже Са́мъ всели́ся, вои́стинну непоколеби́мый, изба́ви ста́до Твое́ тру́са, Дѣ́во, и паде́нія, ва́рварскаго плѣне́нія, огня́ и меча́ враго́въ, отъ вся́каго, Пречи́стая, озлобле́нія, те́плымъ ко Христу́ предста́тельствомъ Твои́мъ.

Стихи́ры свята́го Діоми́да, гла́съ 4. Подо́бенъ: Яко до́бля.

Исцѣли́ти стра́сти, отгони́ти неду́ги, прогна́ти ду́хи лука́выя дѣ́йствомъ Свята́го Ду́ха, преблаже́нне, сподо́бился еси́, потреби́въ му́жески е́ллинскія слу́жбы противле́ніемъ страда́нія, му́чениче вѣнцено́сче, сограждани́не а́нгеломъ, страстоте́рпцемъ единосе́льниче.

По́двигомъ подвиза́лся еси́, и тече́ніе сконча́лъ еси́, и вѣ́ру, сла́вне, соблю́лъ еси́, и къ Бо́гу отше́лъ еси́, дарова́ніе чуде́съ отъ Него́ пріе́мъ, и побѣ́ды вѣне́цъ неувяда́емый, я́ко непобѣди́мь му́ченикъ, я́ко Вы́шняго Ца́рствія наслѣ́дникъ, о мíрѣ моли́ся.

Сла́ва:

Въ пути́ муче́нія Твоего́, я́ко въ бога́тствѣ, красу́яся, Діоми́дъ, Го́споди, во́лею Твое́ю сво́й ду́хъ въ ру́цѣ Твои́, Христе́, предаде́, усѣ́ченъ въ главу́, и по кончи́нѣ блаже́ннѣй бы́въ наста́вникъ и́стинный безбо́жнымъ, ослѣ́пшимъ, и пресла́вно вѣ́рою прозрѣ́вшимъ.

И ны́нѣ, вмѣ́сто богоро́дична или́ крестобогоро́дична, пое́мъ: Досто́йно е́сть...

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 159 об. – 162 об.

/ Къ оглавленію раздѣла /


Наверхъ / Къ титульной страницѣ

0