Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 30 апрѣля 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 16-й де́нь.
Ина слу́жба Нерукотворе́нному о́бразу Го́спода на́шего Іису́са Христа́, ре́кше свята́го Убру́са.

Зри́: Аще храмъ Нерукотворе́ннаго о́браза, или́ настоя́тель изво́литъ, твори́мъ бдѣ́ніе.


НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 1. Подо́бенъ: Небе́сныхъ чино́въ.

Почита́я Спа́съ человѣ́ческій о́бразъ,* вообрази́ся по на́мъ,* непрело́жный человѣ́чествомъ,* и я́ко са́мую и́стину Своего́ пречи́стаго о́браза* дале́че су́щимъ посла́,* приложе́ніемъ убру́са. [Два́жды.]

Возводя́ на первообра́зное Спа́съ* о́бразъ Ада́мовъ* попо́лзшійся,* на земли́ съ человѣ́ки поживе́,* зри́мь же, и осяза́емь,* и опису́емь Неопи́санный существо́мъ.

Обновля́етъ тва́рь* обетша́вшую Спа́съ,* въ ра́бій о́бразъ облече́ся* и́стиною, а не привидѣ́ніемъ* и самообра́зное начерта́ніе* лю́бящимъ предаде́ на поклоне́ніе.

Сла́ва, и ны́нѣ, гла́съ 6:

Преклони́лъ еси́ небеса́, непостижи́ме Го́споди, сше́лъ еси́ во чре́во Дѣ́выя, неопи́санне, бы́въ изъ Нея́ Человѣ́къ существо́мъ же и естество́мъ, да спасе́ши человѣ́чество кра́йнія ра́ди Твоея́ ми́лости.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Псало́мски торжеству́емъ,* духо́вно веселя́щеся,* съ Дави́домъ вопію́ще:* зна́менася дне́сь на на́съ* свѣ́тъ лица́ Твоего́, Го́споди.

Сти́хъ: Зна́менася на на́съ* свѣ́тъ лица́ Твоего́, Го́споди.

Въ кимва́лѣхъ духо́вныхъ* воспле́щемъ, ра́дующеся,* и че́стно предусря́щемъ* Влады́чняго о́браза* свято́е изображе́ніе.

Сти́хъ: Го́споди, во свѣ́тѣ лица́ Твоего́ по́йдемъ,* и о и́мени Твое́мъ возра́дуемся во вѣ́ки.

Отъ восто́ка къ за́паду* со сла́вою прино́сится* спаси́тельнаго зра́ка* тождеобра́зная печа́ть,* сія́я, я́ко со́лнце, незаходи́мо.

Сла́ва, и ны́нѣ, богоро́диченъ:

Пода́ждь пѣвце́мъ о́браза* пречи́стаго Твоего́, о Го́споди,* крѣ́пость на бори́теля* и грѣхо́въ оставле́ніе* моли́твами чи́стыя Богома́тере.

Тропа́рь, гла́съ 2:

Пречи́стому Твоему́ о́бразу покланя́емся, Благíй, прося́ще проще́нія прегрѣше́ній на́шихъ, Христе́ Бо́же: во́лею бо благоволи́лъ еси́ пло́тію взы́ти на Кре́стъ, да изба́виши, я́же созда́лъ еси́, отъ рабо́ты вра́жія. Тѣ́мъ благода́рственно вопіе́мъ Ти́: ра́дости испо́лнилъ еси́ вся́, Спа́се на́шъ, прише́дый спасти́ мíръ.

[Сла́ва, и ны́нѣ, пра́здника, гла́съ 1:

Въ рождествѣ́ дѣ́вство сохрани́ла eси́, во успе́ніи мíра не оста́вила eси́, Богоро́дице, преста́вилася eси́ къ животу́, Ма́ти су́щи Живота́, и моли́твами Твои́ми избавля́еши отъ сме́рти ду́ши на́ша.]


НА ВЕЛИЦѢЙ ВЕЧЕРНИ,
На Го́споди воззва́хъ: стихи́ры на 8, гла́съ 4. Подо́бенъ: Зва́нный свы́ше.

Иже во зра́цѣ Бо́жіи Бо́гъ Сы́й,* я́ко сла́вы сія́ніе* и изображе́ніе Отчее,* за милосе́рдіе безмѣ́рное* хотѣ́ніемъ Боже́ственнымъ о́бразъ ви́дѣнъ бы́сть,* раба́ носи́въ зра́къ.* Сего́ подо́біе еди́нъ,* я́коже вѣ́сть Са́мъ,* извѣ́стно вообрази́ богоначерта́нно* въ подо́біи лица́ Своего́.* Его́же прише́ствіемъ* совокупи́ съ человѣ́ки а́нгелъ мно́жество* и просвѣти́ мíръ ви́димый и неви́димый. [Два́жды.]

Иже боговидѣ́ніемъ иногда́ за́днихъ* Моисе́ово лице́ просла́вивый Бо́гъ* и тѣ́мъ богоначерта́нный зако́нъ посла́лъ* невѣ́рующимъ изра́ильтескимъ лю́демъ,* се́ пріи́де, я́ко отъ Еги́пта,* отъ земли́ иноро́дныя прише́дъ,* во христоимени́тый гра́дъ но́выхъ люде́й* Боже́ственнымъ начерта́ніемъ* первообра́знаго Его́ стра́шнаго о́браза.* Его́же, лице́мъ къ лицу́ ви́дѣти сподобля́еміи, сла́вимъ.

Иже ца́рствуяй тва́рію все́ю,* нищету́ во́льную пріе́мь,* обогаща́етъ Божество́мъ* позна́вшихъ Его́ госпо́дство,* тѣ́мже и ко Авгарю* богоначерта́нна пи́смена посла́въ,* прося́щему спасе́нія и здра́вія сему́,* е́же отъ подо́бія Твоего́ зра́ка Боже́ственнаго.* Его́же прише́ствіе* ра́достно пра́зднующе ны́нѣ,* возвесели́мся вѣ́рою,* просвѣще́ніе почерпа́юще.

Ины стихи́ры, гла́съ 6:

Господи, Иже Божество́мъ вся́ исполня́яй, бла́гостію къ человѣ́комъ уедини́вся, еди́нъ отъ двою́ проше́дъ отъ Чи́стыя, неви́димь Сы́й, ви́дѣнъ бы́лъ еси́, зра́ка же плотска́го сотворя́еши о́бразъ, Его́же пріи́мше, на не́мъ покланя́емся Тебѣ́, я́ко Влады́цѣ, Содѣ́теля позна́вше. [Два́жды.]

Го́споди, непостижи́мое смотре́ніе, е́же отъ вѣ́ка пронарече́нное, прише́дъ, назна́менуеши, и то́ увѣря́я писа́нія ра́ди, е́же ко Авгарю, Тво́й показа́лъ еси́ мíрови о́бразъ, испо́лнилъ еси́ вся́ческая ра́дости. И ны́нѣ украша́еши вѣне́цъ ца́рски, и устроя́еши, и обновля́еши па́ки на́мъ о́бразъ; благослове́нъ еси́, Спа́се, поми́луй на́съ.

Го́споди, просла́влена непостижи́маго соше́ствія Твоего́ дѣла́, въ Вы́шнихъ и земны́хъ ви́дѣвше, вознесе́ни бы́хомъ. Тя́, Иже въ нѣ́дрѣхъ Отчихъ, зра́ка обрѣто́хомъ о́бразъ Тво́й, избавля́емся отъ страсте́й его́ ра́ди, оживля́емся, Спа́се, змíя сопроти́внаго умерщвля́емъ, чту́щіи Тя́ на не́мъ, Влады́ку; благослове́нъ еси́, Спа́се, поми́луй на́съ.

Сла́ва, гла́съ 8:

Человѣколю́бче Влады́ко, вели́ка Твоего́ смотре́нія бе́здна: въ ро́ды бо родо́въ Твое́ благодѣ́тельствуя созда́ніе, пречи́стаго Твоего́ лица́ зра́къ изобрази́въ, Авгарю вѣ́рному посла́лъ еси́, возжела́вшу Тя́ ви́дѣти, по Божеству́ херуви́мы неви́димаго, я́ко да Тво́й о́бразъ зря́ще, на́съ ра́ди вопло́щшагося и пострада́вшаго во́лею. Къ Твое́й любви́ распала́емся, ю́же на на́съ излія́ вели́кія ра́ди Твоея́ ми́лости.

И ны́нѣ, гла́съ то́йже:

Дѣви́честіи ли́цы дне́сь та́йно одру́ Дѣ́вы и Ма́тере о́крестъ предстоя́тъ, и ду́ши пра́ведныхъ, обступи́вше, Цари́цу сла́вятъ. Ови у́бо я́ко да́ръ дѣ́вство вмѣ́сто мѵ́ра прино́сятъ, о́ви же невеще́ственное пѣ́ніе съ добродѣ́телію прино́сятъ, подоба́етъ бо Ма́тери Бо́жіи я́ко Цари́цѣ ца́рскими добродѣ́тельми свѣтлосія́ющими дориноси́тися. Съ ни́миже и мы́, житіе́ чи́стое совне́сше, изы́демъ къ погребе́нію су́щія Ма́тере Бо́га на́шего, пѣ́ньми и пѣ́сньми духо́вными согла́сно Ю ублажа́юще.

Вхо́дъ. Проки́менъ дне́. Чте́нія три́.

Втора́го зако́на чте́ніе. [Глава́ 4.]

Рече́ Моисе́й къ лю́демъ: ны́нѣ слы́ши Изра́илю оправда́нія и судьбы́, ели́ка а́зъ научу́ ва́съ дне́сь твори́ти, да жи́ви бу́дете, и сохрани́те, и сотвори́те, я́ко сія́ прему́дрость ва́ша и ра́зумъ предъ всѣ́ми язы́ки, ели́цы а́ще услы́шатъ оправда́нія сія́ и реку́тъ: сíи лю́діе му́дри и худо́жни, и язы́къ вели́кій се́й. Яко Госпо́дь Бо́гъ на́шъ е́сть во всѣ́хъ, и́же а́ще Того́ призове́мъ. И ны́нѣ внемли́те себѣ́ ве́сь до́мъ Изра́илевъ, и сохрани́те ду́ши своя́ зѣло́, и не забу́дите вся́ словеса́, я́же ви́дѣша о́чи ва́ши, и да не отсту́пятъ отъ серде́цъ ва́шихъ во вся́ дни́ живота́ ва́шего. И приведо́сте сы́ны ва́ша и сы́ны сыно́въ ва́шихъ въ де́нь, въ о́ньже ста́сте предъ Го́сподемъ Бо́гомъ въ Хори́вѣ, въ де́нь, въ о́ньже рече́ Госпо́дь ко мнѣ́: собери́ въ це́рковь лю́ди, и да услы́шатъ глаго́лы Моя́, я́ко да навы́кнутъ боя́тися Мене́ во вся́ дни́, ели́ки поживу́тъ они́ на земли́, и сы́ны своя́ да науча́тъ. И приступи́сте, и ста́сте подъ горо́ю, и гора́ горя́ше огне́мъ да́же до небесе́, тма́, су́мракъ и ды́мъ. И глаго́ла Госпо́дь Бо́гъ къ ва́мъ на горѣ́ отъ среды́ огня́. Гла́съ слове́съ Его́ вы́ слы́шасте и подо́бія не ви́дѣсте, но гла́съ. И возвѣсти́ ва́мъ завѣ́тъ Сво́й, и́же завѣща́ ва́мъ твори́ти. И мнѣ́ завѣща́ Госпо́дь во вре́мя о́но научи́ти ва́съ оправда́ніемъ и судьба́мъ, твори́ти ва́мъ та́ на земли́. Глаго́ла Госпо́дь къ ва́мъ на горѣ́ въ Хори́вѣ отъ среды́ огня́.

Втора́го зако́на чте́ніе. [Глава́ 5.]

Собра́ Моисе́й вся́ лю́ди изра́ильтескія и рече́ къ ни́мъ: слы́ши, Изра́илю, всѣ́хъ оправда́ній мои́хъ и суде́бъ мои́хъ, ели́ко а́зъ глаго́лю во у́ши ва́ша, во дни́ ты́я научи́теся и́мъ, и сохрани́ти я́, и сотвори́ти. Госпо́дь Бо́гъ завѣща́ ва́мъ завѣ́тъ въ Хори́вѣ, не еди́нымъ отце́мъ ва́шимъ завѣща́ Госпо́дь завѣ́тъ се́й, но и ва́мъ. Лице́мъ къ лицу́ глаго́ла Госпо́дь въ Хори́вѣ изъ среды́ огня́ на горѣ́. Азъ же стоя́хъ между́ Го́сподемъ и ва́ми во вре́мя о́но, возвѣсти́ти ва́мъ глаго́лы Госпо́дни, глаго́ля: Азъ е́смь Бо́гъ тво́й, изведы́й тя́ изъ земли́ Еги́петскія, изъ до́му рабо́ты, не су́ть бо́зи и́ни, ра́звѣ Мене́. Азъ бо е́смь Госпо́дь Бо́гъ тво́й, Ревни́тель, творя́ ми́лость ты́сящами лю́бящимъ Мя́ и храня́щимъ за́повѣди Моя́. И бы́сть я́ко услы́шасте гла́съ посреди́ огня́, и гора́ горя́ше огне́мъ, и приступи́сте ко мнѣ́ вси́, и реко́сте: се́ показа́ Госпо́дь Бо́гъ на́шъ на́мъ сла́ву Свою́, и гла́съ слы́шахомъ посреди́ огня́, въ де́нь о́нъ ви́дѣхомъ, я́ко возглаго́летъ Госпо́дь Бо́гъ къ человѣ́ку, и жи́въ бу́детъ, и ны́нѣ не у́мретъ. Яко погуби́тъ ны́ о́гнь вели́кій се́й, а́ще приложи́мъ послу́шати гла́съ Го́спода Бо́га на́шего, и еще́ у́мремъ: ка́я бо пло́ть, или́ кто́ слы́ша гла́съ Бо́га, глаго́люща посреди́ огня́, и жи́въ бу́детъ? И слы́ша Госпо́дь Бо́гъ гла́съ слове́съ, глаго́лющихъ ко мнѣ́, и рѣ́хъ къ ни́мъ за́повѣди, оправда́нія и суды́, ели́ко заповѣ́да ва́мъ Госпо́дь Бо́гъ: да убоите́ся всѣ́хъ оправда́ній Его́, да ми́лостивъ бу́детъ, и умно́житеся на земли́. Слы́ши, Изра́илю, Госпо́дь Бо́гъ ва́шъ — Госпо́дь еди́нъ е́сть. И возлю́биши Го́спода Бо́га Твоего́ отъ всего́ помышле́нія твоего́, и отъ всего́ се́рдца твоего́, и отъ всея́ души́ твоея́, и отъ всея́ крѣ́пости твоея́. И Того́ убои́шися, и Тому́ еди́ному послу́жиши, и къ Нему́ прилѣпи́шися, и и́менемъ Его́ клене́шися, и уго́дная Ему́ сотвори́ши: да добро́ тебѣ́ бу́детъ.

Ца́рствъ тре́тіихъ чте́ніе. [Глава́ 8.]

Ста́ Соломо́нъ предъ лице́мъ же́ртвенника Госпо́дня, предъ всѣ́мъ собо́ромъ Изра́илевымъ, и воздѣ́въ ру́цѣ свои́ на не́бо, и рече́: Го́споди Бо́же Изра́илевъ, нѣ́сть бо́гъ, я́коже Ты́ на небеси́ горѣ́ и на земли́ до́лѣ. Аще бо не́бо и не́бо небесе́ не довлѣ́ютъ Тебѣ́, ка́ко до́мъ се́й, его́же созда́хъ и́мени Твоему́? Оба́че и при́зриши на моли́тву мою́, Го́споди Бо́же Изра́илевъ, услы́шати моле́нія и моли́тву, е́юже ра́бъ Тво́й мо́лится предъ Тобо́ю къ Тебѣ́ дне́сь. Да бу́дутъ о́чи Твои́ отве́рсты на до́мъ се́й де́нь и но́щь, на мѣ́сто сіе́, о не́мже глаго́лалъ еси́: бу́детъ и́мя Мое́ та́мо, е́же услы́шати моли́тву, е́юже мо́лится ра́бъ Тво́й на мѣ́стѣ се́мъ во дни́ и но́щи. И послу́шати мольбы́ раба́ Твоего́ и люде́й Твои́хъ Изра́иля. И ели́ка а́ще помо́лятся къ Тебѣ́ на мѣ́стѣ се́мъ, и Ты́ услы́шиши на мѣ́стѣ жили́ща Твоего́ на небеси́, и сотвори́ши, и ми́лостивъ бу́деши и́мъ.

На литíи стихи́ры, гла́съ 1:

Пріиди́те, вѣ́рныхъ совокупле́ніе, пріиди́те, ли́къ соста́вимъ въ наро́читомъ пра́здницѣ сла́внаго пренесе́нія богому́жнаго о́браза Спа́сова и возопіи́мъ: благослове́нъ гряды́й во и́мя Госпо́дне, о́бразъ и начерта́ніе Первообра́знаго. Благослови́ на́съ Твои́мъ явле́ніемъ и Це́рковь соблюди́ отъ е́реси, въ не́йже вѣ́рно покланя́емтися.

Мона́шеская мно́жества, дне́сь усе́рдно собери́теся на срѣ́теніе о́браза, рука́ми человѣ́ки Созда́вшаго, добродѣ́тели Тому́ вмѣ́сто даро́въ принося́ще, пою́ще и глаго́люще: да зна́менается на на́съ свѣ́тъ лица́ Твоего́, Го́споди. Того́ си́лою сохрани́ ста́до Твое́, во́лки тя́жкія отгоня́, умире́ніе подая́ вселе́ннѣй и душа́мъ на́шимъ ве́лію ми́лость.

Ра́дуйся, Ца́рствующій гра́де, сла́ва бо Госпо́дня на тебѣ́ возсія́, прише́ствіемъ убру́са, небе́съ простра́ннѣйшаго: Еде́са бо не оста́вль, къ тебѣ́ принесе́ся, дѣ́йствуя чудеса́ пресла́вная и прогоня́ ду́хи лука́вствія. Импера́тору Благочести́вому на ва́рвары подая́ крѣ́пость, стѣна́ же и забра́ло быва́етъ, вѣ́рою Тому́ покланя́ющимся.

Сла́ва, и ны́нѣ, гла́съ 5:

Нѣ́дръ не отлучи́вся Оте́ческихъ, Многоми́лостиве Го́споди, съ человѣ́ки пожи́лъ еси́, я́коже подоба́ше, исполня́я Твоего́ человѣколю́бія отъ вѣко́въ та́йну сокрове́нную, и не́мощь поне́съ человѣ́ческую, непрело́жно, въ ню́ обле́кся, отъ Приснодѣ́вы Богоро́дицы, и пречи́стаго Твоего́ зра́ка воображе́ніе на́мъ на освяще́ніе оста́вилъ еси́, уже́ къ стра́сти во́льнѣй гото́вяся. Сла́ва мно́гому Твоему́ о на́съ милосе́рдію.

На стихо́внѣ стихи́ры, гла́съ 4. Подо́бенъ: Да́лъ еси́ зна́меніе.

На го́ру вчера́ Влады́ка* возведе́ я́же о Петрѣ́,* предъ ни́ми преобрази́ся,* явля́я Божества́ свѣ́тлость и зари́ несозда́нныя,* и дне́сь на́мъ показа́ Свое́ воображе́ніе.* Ему́же покланя́емся* и любо́вію цѣлу́емъ,* сла́вяще смотре́ніе Іису́са Человѣколю́бца* и Спа́са ду́шъ на́шихъ.

Сти́хъ: Зна́менася на на́съ* свѣ́тъ лица́ Твоего́, Го́споди.

Па́дше, поклони́шася* на горѣ́ святѣ́й верхо́вніи,* Влады́ку я́ко узрѣ́ша,* зарю́ обнажи́вша Боже́ственныя свѣ́тлости,* и ны́нѣ мы́ припа́даемъ Нерукотворе́нному о́бразу,* па́че со́лнца сія́ющу,* сла́вяще дарова́вшаго на́мъ сего́ на утѣше́ніе* Іису́са Человѣколю́бца* и Спа́са ду́шъ на́шихъ.

Сти́хъ: Го́споди, во свѣ́тѣ лица́ Твоего́ по́йдемъ,* и о и́мени Твое́мъ возра́дуемся во вѣ́ки.

Убѣли́въ очернѣ́вшій человѣ́чь о́бразъ, Созда́телю,* на Ѳаво́рѣ показа́лъ еси́* Петру́ и сыно́мъ Гро́мовымъ,* отъе́мля сомнѣ́ніе е́же о Крестѣ́ и стра́сти* и свѣ́тлости наказу́я* втора́го Твоего́ прише́ствія.* И ны́нѣ на́съ, Человѣколю́бче, благослови́* и освяти́ озаре́ніемъ, Го́споди,* пречи́стаго Твоего́ о́браза.

Сла́ва, гла́съ 6:

Го́споди, воплоти́лся еси́, я́коже восхотѣ́лъ, изво́лилъ еси́ воспрія́ти нищету́ на́шу и бога́тство благосе́рдія показа́лъ еси́, и́мже мя́, пе́рсть, обожи́лъ еси́. Сла́вимъ Тя́, Человѣколю́бче, смотре́нія о́бразъ ви́дяще зра́ка Твоего́, си́мъ невозбра́нно во Еде́мъ вхо́дъ, Спа́се, да́руй рабо́мъ Твои́мъ, презира́я вся́ прегреше́нія.

И ны́нѣ, гла́съ 8. Лео́нта деспо́та:

Увѣря́я Іису́съ, Сы́нъ Тво́й, Богоро́дице, и Бо́гъ на́шъ, два́ естества́ Своя́, я́ко у́бо человѣ́къ умира́етъ и я́коже Бо́гъ востае́тъ. И Тя́, Богома́ти, зако́номъ естества́ умре́ти благоизво́ли, да не невѣ́рнымъ привидѣ́ніе мни́тся смотре́ніе. Прешла́ бо еси́ къ небе́снѣй странѣ́, небе́сная Невѣ́сто, я́ко отъ черто́га селе́нія Твоего́ отъ земли́ взята́. Освяти́ся возду́хъ восхожде́ніемъ Твои́мъ, я́ко просвѣти́ся земля́ рождество́мъ Твои́мъ, предпосыла́ютъ апо́столи, и а́нгели подъе́млютъ. Тѣ́мже, погре́бше пречи́стое тѣ́ло Твое́ и надгро́бное пѣ́ніе воспѣ́вше, ужа́сно зря́ху и со стра́хомъ глаго́лаху: сія́ измѣ́на десни́цы Вы́шняго, То́й бо посреди́ Тебе́, и не подви́жешися. Но, о Многопѣ́тая Ма́ти, не отступа́й, на́съ назира́ющи: мы́ бо лю́діе Твои́ и о́вцы па́жити Твоея́, и и́мя Твое́ призыва́емъ, прося́ще Тебе́ ра́ди спасе́нія и ве́лія ми́лости.

На благослове́ніи хлѣ́бовъ, тропа́рь, гла́съ 2: Пречи́стому Твоему́ о́бразу.., два́жды.
Пи́санъ на ма́лѣй вече́рни. И Успе́нія, [гла́съ 1,] еди́ножды.

[Въ рождествѣ́ дѣ́вство сохрани́ла eси́, во успе́ніи мíра не оста́вила eси́, Богоро́дице, преста́вилася eси́ къ животу́, Ма́ти су́щи Живота́, и моли́твами Твои́ми избавля́еши отъ сме́рти ду́ши на́ша.]


НА УТРЕНИ,
[На Бо́гъ Госпо́дь: тропа́рь о́браза, два́жды. Сла́ва, и ны́нѣ, пра́здника Богоро́дицы.]

По 1-й стихоло́гіи сѣда́ленъ, гла́съ 1. Подо́бенъ: Гро́бъ Тво́й, Спа́се.

Благода́ть Твоя́, Спа́се, на на́съ излія́ся, ви́диму бы́вшу Тебѣ́, Непостижи́ме, и пре́лести тма́ угасе́, тѣ́мъ во свѣ́тѣ лица́ Твоего́ стопы́ на́ша напра́ви, да въ за́повѣдехъ Твои́хъ ходя́ще, Тебе́ сподо́бимся узрѣ́ти, Свѣ́те Непристу́пный. [Два́жды.]

Сла́ва, и ны́нѣ, гла́съ то́йже. Подо́бенъ: Ка́мени запеча́тану.

Ли́къ боже́ственныхъ апо́столъ собра́ся погребсти́ Тя прече́стно, Богоро́дице Всечи́стая, съ ни́миже и а́нгельстіи чи́ни воспѣва́ху преставле́ніе Твое́, взыва́юще прехва́льно. Съ ни́миже и мы́, любо́вію игра́юще, Чи́стая, хвалу́ Тебѣ́ прино́симъ, гла́сы пѣ́сненными, вѣ́рніи, и вопіе́мъ: ра́дуйся, Предста́тельнице присночту́щихъ Тя́.

По 2-й стихоло́гіи сѣда́ленъ, гла́съ 5. Подо́бенъ: Собезнача́льное Сло́во.

Собезнача́льный Сы́нъ Отцу́, и превѣ́чный, и неви́димый Существо́мъ, и неосяза́емый, подъ лѣ́томъ бы́въ за ми́лость неизрече́нную, опи́санныя пло́ти Твоея́, Влады́ко, на́мъ оста́ви сла́дкое изображе́ніе, на спасе́ніе ду́шъ на́шихъ. [Два́жды.]

Сла́ва, и ны́нѣ, гла́съ 4. Подо́бенъ: Удиви́ся Іо́сифъ.

Зря́ще вои́стинну а́нгельская во́инства преставле́ніе Твое́, Пресвята́я Влады́чице Чи́стая, Благослове́нная Всепѣ́тая Богоро́дице, иму́ще во́лею рожде́нна изъ Тебе́, ли́къ учени́къ собра́вшеся, съ весе́ліемъ ноша́ху честно́е въ ра́й тѣ́ло Твое́, Христа́ пою́ще, Живода́вца су́ща во вѣ́ки.

Припѣ́въ:

Велича́емъ Тя́, Живода́вче Христе́, и почита́емъ пречи́стаго лица́ Твоего́ пресла́вное воображе́ніе.

Ино велича́ніе:

Велича́емъ Тя́, Живода́вче Христе́, и чти́мъ о́бразъ Тво́й святы́й, и́мже на́съ спа́слъ еси́ отъ рабо́ты вра́жія.

Псало́мъ избра́нный: Ве́лій Госпо́дь и хва́ленъ зѣло́... Пи́санъ Преображе́нію.

По поліеле́и сѣда́ленъ, гла́съ 4. Подо́бенъ: Удиви́ся Іо́сифъ.

Не ктому́ сѣ́тованіе на лицѣ́ Ада́мовѣ, во Ада́ма обле́кшуся того́ Созда́вшему, и лица́ подо́біемъ Себе́ всѣ́мъ явля́ющу, и къ любви́ подви́жущу благочести́выхъ составле́нія, единогла́сно вопи́ти: сла́ва, Человѣколю́бче, кра́йнему Твоему́ схожде́нію. [Два́жды.]

Сла́ва, и ны́нѣ, гла́съ и подо́бенъ то́йже:

Возопíй, Дави́де, что́ се́й пра́здникъ, его́же воспѣ́лъ еси́ дре́вле въ кни́зѣ псало́мстѣй? Яко Дще́рь, Богоотрокови́цу и Дѣ́ву, преложи́ Ю на о́ны оби́тели Христо́съ, Иже изъ Нея́ безъ сѣ́мене ро́ждся. И сего́ ра́ди ра́дуются ма́тери, и дще́ри, и невѣ́сты Христо́вы, вопію́ще: ра́дуйся Преста́вившаяся къ вы́шнему Ца́рствію.

Степе́нна, 1-й антифо́нъ 4-го гла́са. Проки́менъ, [гласъ 4]: Го́споди, во свѣ́тѣ лица́ Твоего́ по́йдемъ,* и о и́мени Твое́мъ возра́дуемся во вѣ́ки. Сти́хъ: Ви́дѣша вси́ концы́ земли́ спасе́ніе Бо́га на́шего. Ева́нгеліе Луки́, зача́ло 48 отъ полу́.

По 50-мъ псалмѣ́ стихи́ра, гла́съ 6:

Го́споди, воплоти́лся еси́, я́коже восхотѣ́лъ, [изво́лилъ еси́ воспрія́ти нищету́ на́шу и бога́тство благосе́рдія показа́лъ еси́, и́мже мя́, пе́рсть, обожи́лъ еси́. Сла́вимъ Тя́, Человѣколю́бче, смотре́нія о́бразъ ви́дяще зра́ка Твоего́, си́мъ невозбра́нно во Еде́мъ вхо́дъ, Спа́се, да́руй рабо́мъ Твои́мъ, презира́я вся́ прегреше́нія.]

Кано́нъ Успе́нія 1-го гла́са со ирмосо́мъ на 6 и о́браза два́ кано́на на 8.

[Кано́нъ Богоро́дицы, ки́ръ Космы́, гла́съ 1.
Пѣ́снь 1.

Ирмо́съ: Преукраше́нная Боже́ственною сла́вою, свяще́нная и сла́вная, Дѣ́во, па́мять Твоя́, вся́ собра́ къ весе́лію вѣ́рныя, начина́ющей Маріа́мѣ, съ ли́ки и тимпа́ны, Твоему́ пою́ще Единоро́дному: сла́вно я́ко просла́вися.

Да провожда́ютъ невеще́ственніи чи́нове, небоше́ственное въ Сіо́нъ Боже́ственное тѣ́ло Твое́, внеза́пу же сте́кшеся апо́столъ мно́жество отъ коне́цъ, Богоро́дице, Тебѣ́ предста́ша а́біе, съ ни́миже, Чи́стая, Твою́ честну́ю, Дѣ́во, па́мять сла́вимъ.

Побѣ́дныя по́чести взяла́ еси́ на естество́, Чи́стая, Бо́га ро́ждши, оба́че же, подо́бящися Творцу́ Твоему́ и Сы́ну, па́че естества́ повину́ешися есте́ственнымъ зако́номъ. Тѣ́мже уме́рши, съ Сы́номъ востае́ши вѣ́чнующи.]

Кано́нъ [о́браза], гла́съ 4.
Пѣ́снь 1.

Ирмо́съ: Отве́рзу уста́ моя́ и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Отве́рземъ уста́, человѣ́цы, и язы́къ уясни́мъ въ наро́читый де́нь пра́здника на́шего, явле́ніе Боже́ственнаго о́браза Христа́ Бо́га на́шего свѣ́тло сла́вяще.

Свѣ́тъ Превѣ́чный, Отча исполня́я словеса́, образноподо́біемъ пло́ти пре́жде ви́дѣнъ бы́сть Человѣ́комъ, ны́нѣ же яви́ся о́бразомъ нерукотворе́ннымъ, Боже́ственнаго воплоще́нія свѣ́тъ облиста́я на́мъ.

Сказа́ти хотя́ Свою́ благода́ть, Вы́шній прія́тъ ра́бій о́бразъ на́съ ра́ди, и на увѣре́ніе естества́ человѣ́ческаго, зра́ка подо́біе вѣ́рнымъ дне́сь дарова́.

Богоро́диченъ: Сказа́ніе дне́сь вои́стинну богочеловѣ́чнаго Твоего́ рождества́ позна́хомъ, Тя́ чту́ще, Всечи́стая, сподо́блени бы́вше ви́дѣти зра́ка о́бразъ нерукотворе́нный Ро́ждшагося изъ Тебе́.

Другíй кано́нъ, гла́съ 6.
Пѣ́снь 1.

Ирмо́съ: Волно́ю морско́ю, Скры́вшаго дре́вле гони́теля мучи́теля — подъ земле́ю скры́ша, спасе́нныхъ о́троцы; но мы́, я́ко отрокови́цы, Го́сподеви пои́мъ, сла́вно бо просла́вися.

Свы́ше благода́ть Боже́ственная, мíръ ны́нѣ земны́й озаря́ющи, свои́ми дарова́ніи наполня́етъ воспѣва́ющія: Го́сподеви пои́мъ, сла́вно бо просла́вися.

Подоба́ше принести́ся къ Ца́рствующему всѣ́ми гра́ды, небесе́ и земли́ Царя́, о́браза начерта́нію, е́же о́нъ, вопло́щся самодѣ́льно, омочи́, царе́й христолюби́выхъ поспѣше́ньми.

Богоза́рныя лучи́ исполня́ху, все́ уясня́юще и украша́юще человѣ́ческое существо́, отъ о́браза исходя́ще, его́же покрыва́ютъ серафи́ми сла́вою Христо́вою.

Богоро́диченъ: Возвраща́ема къ земли́ и́же отъ земли́, Богоблагода́тная, пре́лестію врага́, на Тя́ бо соше́дшаго вопло́щши Бо́га па́че ума́, отъ земли́ взе́мши, къ небеси́ вознесла́ еси́.

Катава́сія: Преукраше́нная...

Пѣ́снь 3.

[Ирмо́съ: Содѣ́тельная и содержи́тельная всѣ́хъ, Бо́жія Му́дросте и Си́ло, непрекло́нну, недви́жиму Це́рковь утверди́, Христе́, еди́нъ бо еси́ Свя́тъ, во святы́хъ почива́яй.

Жену́ Тя́ ме́ртвенну, но па́че естества́ и Ма́терь Бо́жію, ви́дѣвше, Всенепоро́чная, сла́вніи апо́столи, ужа́сно прикаса́хуся рука́ми сла́вою облиста́ющей, я́ко богопрія́тное Селе́ніе ви́дяще.

Пости́же ру́цѣ досади́тельныя де́рзаго, усѣче́ніемъ су́дъ нане́съ, Бо́гу сохра́ншу че́сть одушевле́нному Киво́ту, сла́вою Божества́, въ Не́мже Сло́во пло́ть бы́сть.

Инъ.]

Ирмо́съ: Твоя́ пѣсносло́вцы, Богоро́дице, живы́й и незави́стный исто́чниче, ли́къ себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Влады́ка сы́й по существу́, соедини́вся съ рабы́ пло́тію, и на́ше дѣ́тельствуя разли́чно спасе́ніе, Христе́, е́же и ны́нѣ промышля́я, Свои́мъ о́бразомъ ви́дѣнъ бы́лъ еси́ на́ми.

Еде́съ честнѣ́йшій гра́дъ честны́й Боже́ственный о́бразъ Тво́й, и́же тве́рдый зало́гъ вѣ́ры ра́ди прія́тъ, Ца́рскій же Тво́й гра́дъ да́ръ я́ко лу́чшій пріе́млетъ ны́нѣ.

Живо́тъ ѵпоста́сный ны́нѣ вкуси́ сме́рти плотскíя, е́юже живо́тъ источи́лъ еси́ ме́ртвымъ, воста́ніемъ Твои́мъ, Христе́, ны́нѣ же, я́ко живота́ хода́тая, зра́ка о́бразъ Тво́й по́далъ еси́ на́мъ.

Богоро́диченъ: Изъ Тебе́ Спасе́ніе, и́же су́ть въ мíрѣ, возсія́ пре́жде пло́тію, ны́нѣ же живо́тъ яви́ся въ мíрѣ вѣ́рнымъ, хода́тайствомъ Твои́мъ, свѣтоно́сное прише́ствіе пре́жде обра́знаго подо́бія Христо́ва.

Инъ.

Ирмо́съ: Тебе́, на вода́хъ повѣ́сившаго всю́ зе́млю неодержи́мо, тва́рь, ви́дѣвши на Ло́бнѣмъ ви́сима, у́жасомъ мно́гимъ содрога́шеся, нѣ́сть свя́тъ, ра́звѣ Тебе́, Го́споди, взыва́ющи.

Тебе́ сотво́ршаго человѣ́ка по о́бразу пе́рвѣе, въ о́ньже вообрази́ся а́біе за милосе́рдіе, пріе́мша вои́стинну подо́біе неизмѣ́нное, со а́нгелы, Христе́, сла́вимъ.

Ты́ жела́ющимъ благопристу́пенъ, и́щущимъ же всѣ́мъ благопослушли́въ, Ще́дре, за мно́гую благосты́ню, ея́же ра́ди приближе́ніемъ, Влады́ко, красотѣ́ Твоего́ раче́нія чуди́мся.

Уста́вилъ еси́ мѣ́стному кня́зю жела́нія, е́же къ Тебѣ́ любо́вь, вку́пѣ же и неду́гъ, ти́химъ Тво́имъ пода́ніемъ, вседѣ́тельною держа́вою Твое́ю, ви́дѣвшу Тя́, Спа́се, во изображе́ніи.

Богоро́диченъ: Мѣ́сто Тя́ Госпо́дне, Всепѣ́тая, Дави́дъ преднаписа́, хотя́щее яви́тися, Иже бо ника́коже вмѣсти́мый во Твое́ чре́во вмѣсти́ся и облага́ется пло́тію ве́щною Невеще́ственный.

Конда́къ Успе́нія, гла́съ 2:

[Въ моли́твахъ неусыпа́ющую Богоро́дицу и въ предста́тельствахъ непрело́жное упова́ніе, гро́бъ и умерщвле́ніе не удержа́ста: я́коже бо Живота́ Ма́терь, къ животу́ преста́ви, во утро́бу Всели́выйся приснодѣ́вственную.]

Икосъ:

[Огради́ моя́ помышле́нія, Христе́ мо́й, и́бо Стѣ́ну мíра воспѣ́ти дерза́ю, Чи́стую Ма́терь Твою́, на столпѣ́ глаго́лъ укрѣпи́ мя, и въ тя́жкихъ мы́слехъ заступи́ мя, Ты́ бо взыва́ющимъ и прося́щимъ вѣ́рою моле́нія исполня́еши. Ты́ мнѣ́ у́бо да́руй язы́къ прино́сенъ и по́мыслъ непосты́денъ: вся́кое бо дая́ніе сія́нія отъ Тебе́ низпосыла́ется, Свѣтопода́телю, во утро́бу всели́выйся приснодѣ́вственную.]

Сѣда́ленъ, гла́съ 4. Подо́бенъ: Вознесы́йся.

Сше́дый съ небесе́ за милосе́рдіе ми́лости, Благоутро́бне Спа́се, пло́ти Твоея́ пресвяты́я дне́сь пречи́стый зра́къ гра́ду чту́щему Тя́, и лю́демъ христоимени́тымъ сокро́вище по́далъ еси́, я́ко тве́рдо всеору́жіе, отъ него́же почерпа́юще освяще́ніе, сего́ вѣ́рою те́плѣ пріи́мемъ. [Два́жды.]

Сла́ва, и ны́нѣ, подо́бенъ то́йже:

Въ ру́цѣ Сы́на Твоего́ и Бо́га ны́нѣ преда́вши ду́шу святу́ю, ни тѣ́ло же оста́вила еси́ во гро́бѣ: я́коже бо прія́тъ Жи́знь всѣ́хъ, си́це по сме́рти къ Животу́ преста́вльшися, Богоро́дицу Тя́ и́стинную вѣ́дущимъ источа́еши живо́тъ вѣ́чный.

Пѣ́снь 4.

[Ирмо́съ: Рѣ́чи проро́ковъ и гада́нія, воплоще́ніе прояви́ша отъ Дѣ́вы Твое́, Христе́: сія́ніе блиста́нія Твоего́ во свѣ́тъ язы́ковъ изы́детъ, и возгласи́тъ Тебѣ́ бе́здна съ весе́ліемъ: си́лѣ Твое́й сла́ва, Человѣколю́бче.

Ви́дите лю́діе и чуди́теся: Гора́ бо свята́я и я́вственная Бо́гу въ небе́сныя оби́тели превы́шше взе́млется, Не́бо земно́е въ небе́сное и нетлѣ́нное селе́ніе вселя́емо.

Жи́зни присносу́щныя и лу́чшія, сме́рть Твоя́ бы́сть прехожде́ніе, Чи́стая, отъ привре́менныя къ Боже́ственнѣй вои́стинну и непреходи́мѣй, преставля́я Тя́, Чи́стая, въ весе́ліи Сы́на зрѣ́ти Твоего́ и Го́спода.

Взя́шася две́ри небе́сныя, и Ангели воспѣ́ша, и прія́тъ Христо́съ дѣ́вства Своея́ Ма́тере сосу́дъ; Херуви́ми подъя́ша Тя́ съ весе́ліемъ, Серафи́ми же сла́вятъ, ра́дующеся.

Инъ.]

Ирмо́съ: Неизслѣ́дный Бо́жій совѣ́тъ, е́же отъ Дѣ́вы, воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Плотоподо́бный Боже́ственный о́бразъ, пло́тію Прибли́жшагося человѣ́комъ, пріи́де къ новоизбра́нному Изра́илю, я́ко изъ Еги́пта дне́сь, и просвѣща́етъ концы́.

Боговидѣ́нія сла́вы дре́вле, те́мно Твои́хъ за́днихъ сподо́бися Моисе́й, проси́въ; но́вый же Изра́иль лице́мъ ны́нѣ въ лице́ Тя́, Изба́вителя, ви́дитъ я́сно.

Ви́дите, чу́дная вси́, лю́діе, и духо́вно ны́нѣ возвесели́теся, Христа́ пою́ще, дарова́вшего на́мъ, я́ко многоцѣ́нное бога́тство, Своего́ зра́ка воображе́ніе.

Богоро́диченъ: Яко на о́блацѣ, у́бо дре́вле Христо́съ яви́ся на земли́ су́щимъ, сѣдя́ на Твое́ю руку́, ны́нѣ же напослѣ́докъ лю́демъ, чту́щимъ Тя́, Всечи́стая, Боже́ственнымъ о́бразомъ яви́ся.

Инъ.

Ирмо́съ: На Крестѣ́ Твое́ Боже́ственное истоща́ніе прови́дя Авваку́мъ, ужа́сся, вопія́ше: Ты́ си́льныхъ пресѣ́клъ еси́ держа́ву, Бла́же, приобща́яся су́щимъ во а́дѣ, я́ко Всеси́ленъ.

Иже ца́рскимъ благолѣ́піемъ обложе́ни ны́нѣ, и́же отъ Него́же ца́рствовати учини́шася, сла́вяще, благолѣ́пное отъ подо́бія видѣ́ніе Его́ пріе́млютъ.

Иже проро́комъ жада́емый пе́рвѣе Спа́совъ зра́къ, ца́ріе зря́тъ, всѣ́ми ублажа́емый, въ самодѣ́йствіи нерукотво́рнѣ воображе́нный.

Кня́зи вси́ и судіи́ земли́, благослови́те Христа́, съ первосвяще́нники и святи́тели дне́сь и со всѣ́ми людьми́, и́же Того́ зрѣ́нія сподо́бленніи.

Богоро́диченъ: Присносу́щнаго Тя́ Ма́терь Христа́ человѣ́комъ позна́вшимъ блаже́нство небе́сное испроси́, и́же Твое́ неизрече́нное рождество́ вѣ́рно пѣсносло́вятъ.

Пѣ́снь 5.

[Ирмо́съ: Бо́жію и неизрече́нную добро́ту, добродѣ́телей Твои́хъ, Христе́ исповѣ́мъ: отъ Присносу́щныя бо Сла́вы, Соприсносу́щное и Ѵпоста́сное возсія́вый Сія́ніе, изъ дѣ́вственныя утро́бы, су́щимъ во тмѣ́ и сѣ́ни, вопло́щся, возсія́лъ еси́ Со́лнце.

Яко на о́блацѣ Дѣ́во, апо́стольскій ли́къ носи́мь, къ Сіо́ну отъ коне́цъ, служи́ти Тебѣ́, Облаку ле́гкому, собира́шеся: отъ Нея́же Вы́шній Бо́гъ, су́щимъ во тьмѣ́ и сѣ́ни, Пра́ведное возсія́ Со́лнце.

Тру́бъ, богопрія́тніи язы́цы богосло́вныхъ муже́й благогла́снѣйше Богоро́дицѣ вопія́ху, исхо́дную возглаша́юще пѣ́снь Ду́хомъ: ра́дуйся нетлѣ́нный Исто́чниче, Бо́жія живонача́льнаго и спаси́тельнаго всѣ́мъ воплоще́нія.

Инъ.]

Ирмо́съ: Ужасо́шася вся́ческая о Боже́ственнѣй сла́вѣ Твое́й, Ты́ бо, Неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га и родила́ еси́ Безлѣ́тнаго Сы́на, всѣ́мъ воспѣва́ющимъ Тя́ ми́ръ подава́ющая.

Воспле́щемъ дне́сь рука́ми, и воскли́кнемъ хвале́нія Го́сподеви: се́ бо вои́стинну пріи́де, и яви́ся вся́ озаря́я вѣ́рныя, Боже́ственнымъ подо́біемъ чи́стыя пло́ти Его́.

Просвѣти́ся дне́сь правосла́вныхъ со́нмище, ерети́ческій же по́лкъ да посрами́тся, покланя́емь ви́дя нерукотворе́нный о́бразъ, пло́тію на́мъ Изба́вителя предло́жшійся.

Та́йна вели́ка прише́дшее торжество́: свѣ́тъ бо лица́ Госпо́дня мíрови провозсія́ благоустро́еннымъ о́бразомъ, и богочерта́нными Самаго́ руки́ Боже́ственными писа́ніи, и́миже укрѣпи́ся пре́жде Авгарь.

Богоро́диченъ: Да ка́плютъ ны́нѣ свы́ше о́блацы земны́мъ сла́дость, хода́тайствомъ Твои́мъ, Дѣ́во: мíръ бо уще́дри Тво́й Сы́нъ и Бо́гъ, ро́гъ вѣ́рнымъ спасе́нія дне́сь дарова́, Сво́й Боже́ственный о́бразъ.

Инъ.

Ирмо́съ: Къ Тебѣ́ у́тренюю, милосе́рдія ра́ди Себе́ истощи́вшему непрело́жно и до страсте́й безстра́стно прекло́ншемуся, Сло́ве Бо́жій: ми́ръ пода́ждь ми́, па́дшему, Человѣколю́бче.

Не въ багряни́цѣ, ни въ червлени́цѣ, ни въ вѣнцѣ́ че́стнѣ, боже́ственніи вѣнцено́сцы, но о Го́сподѣ Бо́зѣ крася́щеся, ра́дуются. Его́же добро́ту зря́ще, украша́ются.

На пра́ведныя лю́ди о́чи Госпо́дни царя́, и у́ши на моли́тву царе́й благоче́стно му́дрствующихъ, чту́щимъ Его́ подо́біе благолѣ́пія самопи́санное.

Ны́нѣ зря́ще неизмѣ́ннаго Бо́га и Спа́са и неизчерта́емаго зра́ка ви́дъ, человѣ́ческое ви́дѣти предстоя́тъ, я́ко одушевле́ну притека́ти и просвѣти́тися.

Богоро́диченъ: Ни чистоту́ поколеба́вши чи́стымъ Твои́мъ рождество́мъ, и Ма́ти позна́лася еси́, а́ще и ма́терское не подъя́ла: обоя́ бо на Тебѣ́, Богома́ти, соверша́ше Боже́ственное хотѣ́ніе.

Пѣ́снь 6.

[Ирмо́съ: Морскíй пучиноро́дный ки́товъ вну́тренній о́гнь — тридне́внаго Твоего́ погребе́нія проображе́ніе, его́же Іо́на проро́къ показа́ся. Спасе́нъ бо, я́ко и предпосла́ся, неврежде́нъ, вопія́ше: пожру́ Ти́ со гла́сомъ хвале́нія, Го́споди.

Дае́тъ Тебѣ́, я́же превы́ше естества́, Ца́рь всѣ́хъ Бо́гъ: въ рождествѣ́ бо Дѣ́ву я́коже сохрани́, та́ко во гро́бѣ тѣ́ло соблю́дъ нетлѣ́нно и спросла́ви Боже́ственнымъ преставле́ніемъ, че́сть Тебѣ́, я́ко Сы́нъ Ма́тери, да́руя.

Вои́стинну Тя́, я́ко свѣ́телъ свѣ́щникъ, невеще́ственнаго Свѣ́та, кади́льницу злату́ю Боже́ственнаго Угля, во Свята́я святы́хъ всели́, ру́чку и же́злъ, скрижа́ль богопи́санную, ковче́гъ святы́й, трапе́зу Сло́ва жи́зни, Дѣ́во, Рождество́ Твое́.

Инъ.]

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те рука́ми воспле́щимъ, отъ Нея́ ро́ждшагося Бо́га сла́вимъ.

Ме́ртвымъ живо́тъ возсія́, слѣпы́мъ свѣ́тъ уже́ прише́ствова, немощны́мъ лю́тѣ врачевство́ отве́рзеся, и всѣ́мъ спасе́ніе дне́сь прибли́жися.

Стра́нствуетъ вся́къ ра́зумъ, невеще́ственна зра́ка ви́дя Боже́ственный о́бразъ Христо́въ, воображе́нъ ны́нѣ я́сно, и просвѣще́ніе источа́я покланя́ющимся ему́.

Пу́ть Христо́въ угото́вимъ, и ны́нѣ оса́нна Христу́ зову́ще, благослове́нно Бо́жія сла́вы и́мя, е́же на о́бразѣ Боже́ственнѣ я́вльшееся су́щимъ на земли́.

Богоро́диченъ: Зна́емо яви́ся страна́мъ, Богома́ти Чи́стая, спасе́ніе, воображе́ніе Спа́са на́шего, ро́ждшагося изъ Тебе́, ви́дѣти Твои́мъ хода́тайствомъ ны́нѣ сподо́бихомся.

Инъ.

Ирмо́съ: Ятъ бы́сть, но не удержа́нъ въ пе́рсехъ ки́товыхъ Іо́на: Тво́й бо о́бразъ нося́, Страда́вшаго и погребе́нію Да́вшагося, я́ко отъ черто́га, отъ звѣ́ря изы́де. Приглаша́ше же кустодíи: храня́щіи су́етная и ло́жная, ми́лость сію́ оста́вили есте́.

Содержи́мыя вре́домъ человѣ́ки и подпа́дшія въ тлѣ́ніе, не презрѣ́ стерпѣ́ти, Содѣ́телю и Обнови́телю ро́да, но излія́въ Себе́ Вы́шній и я́влься въ подо́біе мое́ и смире́ніе, назда́ прему́дре, добро́ту пода́въ ми́ первообра́зную.

Невѣ́дущу о Ца́рствіи Твое́мъ небе́снѣмъ, къ нему́же на́съ, Благíй, тлѣ́нныя и до́лу лежа́щія, возведе́, Иже невеще́ственными херуви́мы непристу́пенъ, сни́де же ми́ до а́да, Твоего́ апо́стола Авгарю царю́, Христе́, посла́лъ еси́, та́инство увѣря́юща.

Ви́дѣвъ Твоего́, Сло́ве и Му́дросте Всеси́льнаго Отца́, неви́димаго Бо́га, неотсту́пнѣ пре́жде вѣ́къ, о́браза всечеловѣкозра́чна, дивля́шеся, Бо́га вѣ́дый, пло́ть и кро́вь и ду́шу у́мну пріе́мша Тя́, мѣ́стный нача́льникъ.

Богоро́диченъ: Невѣ́ріемъ о Боже́ственнѣй, сотво́ршимъ его́, Дѣ́во, стра́шней за́повѣди родонача́льника безсме́ртна, всегуби́тель премѣни́лъ е́сть, жи́зни же Пода́теля су́щимъ ро́ждши, нетлѣ́ніемъ на́съ Еди́на си́лою утверди́ла еси́.

Конда́къ, гла́съ 2. Подо́бенъ: Въ моли́твахъ.

Неизрече́ннаго и Боже́ственнаго Твоего́ къ человѣ́комъ смотре́нія, неопи́санное Сло́во Отчее, и о́бразъ непи́санный, и богопи́санный побѣди́теленъ, вѣ́дуще нело́жнаго Твоего́ воплоще́нія, почита́емъ, того́ лобыза́юще.

Икосъ:

Увѣря́я человѣ́комъ Госпо́дь вочеловѣ́ченія Своего́ та́йну ужа́сную, самопису́етъ богому́жный Сво́й о́бразъ на убру́сѣ, и первообра́зное у́бо возне́съ отъ горы́ Елео́нскія, на престо́лѣ споражда́етъ Отчи, покланя́тися отъ безтѣле́сныхъ а́нгелъ. Подо́бію же первообра́знаго на́мъ дарова́ покланя́тися: Его́же объе́млюще душе́ю же и се́рдцемъ, почита́емъ, того́ лобыза́юще.

Пѣ́снь 7.

[Ирмо́съ: Безсту́днѣй я́рости же и огню́ Боже́ственное жела́ніе сопротивля́яся, о́гнь у́бо ороша́ше, я́рости же смѣя́шеся, богодохнове́нною слове́сною преподо́бныхъ тривѣща́нною цѣвни́цею, противовѣща́я мусикíйскимъ орга́номъ посреди́ пла́мене: препросла́вленный отце́въ и на́шъ Бо́же, благослове́нъ еси́.

Богодѣ́ланныя скрижа́ли Моисе́й, пи́санныя Боже́ственнымъ Ду́хомъ, я́ростію сокру́шъ, но сего́ Влады́ка, Ро́ждшую неврежде́нну въ небе́сныя сохра́нь до́мы, ны́нѣ вну́трь всели́. Съ Не́ю игра́юще, вопіе́мъ Христу́: препросла́вленный отце́въ и на́шъ Бо́же, благослове́нъ еси́.

Въ кимва́лѣхъ — усты́ чи́стыми, мусикíйски же — се́рдцемъ свѣ́тлымъ, доброгла́сною трубо́ю — высо́кою мы́слію, Дѣ́вы и Чи́стыя въ наро́читый избра́нный де́нь преставле́нія, дѣ́тельными пле́щуще рука́ми, вопіе́мъ: препросла́вленный отце́въ и на́шъ Бо́же, благослове́нъ еси́.

Богому́дріи, собери́теся, лю́діе: Бо́жія бо сла́вы Селе́ніе, отъ Сіо́на преставля́ется къ небе́сному жили́щу, идѣ́же гла́съ чи́стъ пра́зднующихъ, гла́съ несказа́ннаго ра́дованія, и въ весе́ліи вопію́щихъ Христу́: препросла́вленный отце́въ и на́шъ Бо́же, благослове́нъ еси́.

Инъ.]

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Вся́къ гра́дъ ра́дуется, пра́зднуя вѣ́рно съ но́вымъ Сіо́номъ: Ца́рь бо его́ кро́тко прише́лъ е́сть, не на жребя́ти, я́коже пре́жде, на о́бразѣ же, спаса́я вѣ́рою пою́щія: Бо́же, благослове́нъ еси́.

Рѣ́чь боже́ственная безпло́тныхъ испо́лнися, и́же гла́са Госпо́дня услы́шавше пре́жде, ны́нѣ ви́дѣхомъ обли́чіе Его́, я́сно просвѣща́емы свѣтода́тельными сія́ніи того́ явле́нія.

Веселя́тся съ земны́ми небе́сная, и сра́дуются всѣ́хъ святы́хъ мно́жество, ца́ріе и кня́зи, бога́тіи и убо́зіи пра́зднуютъ, я́вльшуся дне́сь Боже́ственному о́бразу.

Богоро́диченъ: Свяще́нницы, въ пра́вду облецы́теся, и вси́ преподо́бніи, возра́дуйтеся свѣ́тло: се́ у́бо угото́ва свѣти́льникъ на́мъ Христо́съ, е́же о́браза Своего́ богодѣ́льное подо́біе, е́же прія́тъ отъ Дѣ́вы.

Инъ.

Ирмо́съ: Неизрече́нное чу́до: въ пещи́ Изба́вивый преподо́бныя о́троки изъ пла́мене во гро́бѣ ме́ртвъ, бездыха́ненъ полага́ется, во спасе́ніе на́съ, пою́щихъ: Изба́вителю Бо́же, благослове́нъ еси́.

Къ боговидѣ́нію о́чи угото́вимъ и досто́йно потщи́мся о́бразъ ви́дѣти Христо́въ всѣ́мъ честны́й, во спасе́ніе на́мъ, пою́щимъ: Изба́вителю Бо́же, благослове́нъ еси́.

Якоже на Ѳаво́рскую го́ру возноси́ми, восхо́дными очесы́ ума́ зарю́ свѣ́тлу въ боговочеловѣ́ченіи Христо́вѣ ви́дяще, единоѵпоста́снѣ, въ дву́ же естеству́, богосло́вяще Его́ во вѣ́ки.

Пра́зднующихъ и веселя́щихся, усе́рдно же о Го́сподѣ всѣ́хъ гла́съ, пѣ́ніе на́ше да соста́вится и да испо́лнится, согла́сно пою́щихъ: Изба́вителю Бо́же, благослове́нъ еси́.

Богоро́диченъ: Въ дѣ́вства я́ко свѣтла́ еди́на добро́тахъ Содѣ́теля была́ еси́ Пита́тельница, скве́рну на́шу всю́ очи́стила еси́, Богороди́тельнице, су́щую отъ грѣха́, вопію́щихъ: Бо́же, благослове́нъ еси́.

Пѣ́снь 8.

[Ирмо́съ: Пла́мень, ороша́ющь преподо́бныя, злочести́выя же попаля́ющь, Ангелъ Бо́жій всемо́щный показа́ отроко́мъ, живонача́льный же исто́чникъ содѣ́ла Богоро́дицу, тлю́ сме́рти и живо́тъ точа́щу пою́щимъ: Содѣ́теля еди́наго пои́мъ, изба́вленніи, и превозно́симъ во вся́ вѣ́ки.

Глаго́лы послѣ́доваху Боже́ственному Ковче́гу свяще́нному, все́ мно́жество богосло́вовъ въ Сіо́нѣ: ка́мо и́деши ны́нѣ, Ски́ніе, — зову́ще, — Бо́га Жива́го? Не преста́й призира́ющи вѣ́рою пою́щія: Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

Якоже, воздѣ́вши ру́цѣ, исхо́диши Всенепоро́чная, ру́цѣ, и́миже Бо́га носи́ла еси́ пло́тію, со дерзнове́ніемъ, я́ко Ма́ти, рекла́ еси́ къ Рожде́нному: я́же Ми́ да́лъ еси́, во вѣ́ки сохрани́, вопію́щія Тебѣ́: Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

Инъ.]

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте дѣла́ и превозноси́те Его́ во вся́ вѣ́ки.

Соверше́нъ сы́й по существу́, Бо́гъ и Человѣ́къ ви́дѣнъ бы́сть, соверше́нно спаса́я по обоему́, Своя́ вои́стинну сво́йства: я́ко Бо́гъ бо, человѣ́ческій о́бразъ увѣря́я, безпло́тнѣ вообрази́, его́же на́мъ, я́ко стѣ́ну и покро́въ, дарова́лъ е́сть.

Вознеси́ ро́гъ, Бо́жій Сло́ве, исповѣ́дающихъ Тя́, Бо́га и Человѣ́ка, и богоначерта́нному о́бразу покланя́ющихся, и́мже живо́тъ вѣ́чный всѣ́мъ дарова́ся вѣ́рнымъ, и упраздни́ пога́нская шата́нія, Твоея́ невѣ́дущихъ Боже́ственныя си́лы.

Свѣти́тся но́вая Це́рковь, сла́вы бо свѣ́тъ возсія́лъ е́сть, плотоподобозра́чное обли́чіе Бо́га на́шего, безпло́тное же украси́, еди́нъ я́коже вѣ́сть Са́мъ, лице́ Свое́ просвѣти́въ, на спасе́ніе люде́й христоимени́тыхъ.

Богоро́диченъ: Всю́ освяти́лъ е́сть тва́рь, пре́жде отъ свята́го Твоего́ возсія́ чре́ва, Дѣ́во, но превозсія́лъ е́сть того́ па́че дне́сь, я́ко отъ незаходи́мыхъ я́вльшуся, Того́ Боже́ственному о́бразу, отъ земли́ пога́нскія пресла́вно, да́въ на спасе́ніе вѣ́рнымъ лю́демъ и гра́ду.

Инъ.

Ирмо́съ: Сто́лпъ зло́бы богопроти́вныя боже́ственніи о́троцы обличи́ша, на Христа́ же шата́ющееся беззако́нныхъ собо́рище совѣ́туетъ тще́тная, уби́ти поуча́ется живо́тъ Держа́щаго дла́нію. Его́же вся́ тва́рь благослови́тъ, сла́вящи во вѣ́ки.

По Боже́ственному естеству́, Спа́се, сы́й всѣ́мъ неви́димь, по человѣ́ческому же, а́ще и ви́димь Человѣ́къ, пи́санъ безъ шаро́въ, вообрази́въ Себе́ просвѣще́ніемъ Твоего́ лица́ самозри́маго, Твоего́ раба́ не лиши́лъ еси́, пою́ща: благослови́те, вся́ дѣла́ Госпо́дня, Го́спода.

Самоначерта́нное первообра́зное Спа́са изображе́ніе подобозра́чно, богодѣ́льный о́бразъ зря́ще, и́же всѣ́ми владя́щій избра́нный, со благоговѣ́ніемъ и че́стію, я́ко надѣ́ющіися на́нь, покрыва́ются и утвержда́ются.

Па́че Моисе́я Богови́дца, богопи́санныя скрижа́ли пріе́мшаго, возвели́чился еси́, честны́й мѣстонача́льниче, прія́тъ честно́е посла́ніе Бо́жія Сло́ва, блажа́щее тя́, благоче́стію вѣ́ровавша, и́же ника́коже ви́дѣ чудодѣ́йствія.

Богоро́диченъ: Во двою́ естеству́ несмѣ́сно, Богома́ти, еди́ну ѵпоста́сь воплоще́ннаго отъ пречи́стыхъ Твои́хъ крове́й ви́дяще, Бо́га же и Человѣ́ка исповѣ́дуемъ, Того́же отъ Отца́ Безлѣ́тна пре́жде вѣ́къ, безстра́стно и неслія́нно рожде́нна.

Пѣ́снь 9.

[Ирмо́съ: Побѣжда́ются естества́ уста́вы въ Тебѣ́, Дѣ́во Чи́стая: дѣ́вствуетъ бо рождество́ и живо́тъ предобруча́етъ сме́рть; по рождествѣ́ Дѣ́ва и по сме́рти жива́, спаса́еши при́сно, Богоро́дице, наслѣ́діе Твое́.

Дивля́хуся Ангельскія си́лы, въ Сіо́нѣ смотря́юще своего́ Влады́ку, же́нскую ду́шу рука́ми нося́щаго, пречи́сто бо Ро́ждшей, сынолѣ́пно провозглаша́ше: гряди́, Чи́стая, съ Сы́номъ и Бо́гомъ просла́вленна бу́ди.

Опря́та ли́къ апо́стольскій богопрія́тное тѣ́ло Твое́, со стра́хомъ зря́ще и гла́сомъ ве́ліимъ вѣща́юще: въ небе́сныя до́мы къ Сы́ну восходя́щи, спаса́еши при́сно, Богоро́дице, наслѣ́діе Твое́.

Инъ.]

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Ра́дуйся та́йно, Бо́жій христолюби́вый ны́нѣ вели́кій гра́де: къ тебѣ́ бо пріи́де Ца́рствуяй все́ю тва́рію, Боже́ственнаго ра́ди обли́чія первообра́знаго подо́бія, и тебе́ изво́лилъ е́сть избра́ти Себѣ́ въ жили́ще.

Пое́мъ Бо́гу пѣ́снь благода́рную, изво́лившему бога́тство превели́ко на́мъ пода́ти, стѣ́ну необори́му и небла́зненно утвержде́ніе, боговоображе́нный зра́къ Боже́ственныя пло́ти Его́. Его́же чту́ще, вѣ́рніи, велича́емъ.

О, па́че ума́ чуде́съ Твои́хъ, Го́споди, я́же сотвори́лъ еси́ на́мъ, на Тя́ надѣ́ющимся! Якоже бо имѣ́лъ еси́ неизрече́нно рождество́, та́ко и стра́нно всѣ́мъ показа́лъ еси́ воображе́ніе зра́ка Твоего́ недоразумѣва́емое, его́же чту́щія ны́ изба́ви отъ вся́каго гнѣ́ва.

Богоро́диченъ: Высота́ вои́стинну и глубина́ неизрече́нна Твоея́ та́йны, Чи́стая: я́коже бо изы́де несказа́нно изъ Тебе́ Вы́шній, та́ко и ви́дѣнъ бы́сть, дне́сь прише́дъ къ на́мъ безпло́тнымъ свѣ́томъ зра́ка Его́, пло́тію смѣ́шся ве́щи съ земны́ми.

Инъ.

Ирмо́съ: Честнѣ́йшую херуви́мъ и сла́внѣйшую безъ сравне́нія серафи́мъ, безъ истлѣ́нія Бо́га Сло́ва ро́ждшую, су́щую Богоро́дицу, Тя́ велича́емъ.

Добро́та недомы́слима вои́стинну, красо́тъ краснѣ́йши па́че естества́, се́ зри́тся досто́йно жела́ющимъ, притеце́мъ, ли́ца освяща́юще.

Стѣна́ и утвержде́ніе держа́вно, ору́жіе ми́рно, забра́ло необори́мо, невреди́мо всѣ́ми хитростьми́ сопроти́вными, огражде́ніе гра́ду на́шему дарова́ся.

Образе неизмѣ́нный Оте́чь, Сія́ніе сла́вы Присносу́щнаго Свѣ́та, печа́ть Вы́шняго, Сло́ве, Си́ло и Му́дросте, Тя́ богосло́вствующимъ благопремѣни́тель бу́ди.

Богоро́диченъ: Уста́вила еси́ поноше́ніе жена́мъ, взяла́ еси́ отъ человѣ́къ и потреби́ла еси́ кля́тву, источи́ла еси́ всѣ́мъ ра́дость и благослове́ніе, Дѣ́во Пречи́стая Богороди́тельнице.

Свѣти́ленъ. Подо́бенъ: Жены́, услы́шите.

Свѣ́тъ невече́рній, Христе́, просвѣти́ на́съ лица́ Твоего́ зра́комъ, и свѣ́тлости святы́хъ сподо́би, егда́ ся́деши возда́ти кому́ждо по дѣло́мъ его́, моли́твами ро́ждшія Тя́ Богоро́дицы. [Два́жды.]

Сла́ва, и ны́нѣ, Успе́нія. Подо́бенъ: Не́бо звѣзда́ми.

Апо́столи отъ коне́цъ совоку́пльшеся здѣ́, въ Геѳсиманíйстѣй ве́си погреби́те тѣ́ло Мое́, и Ты́, Сы́не и Бо́же Мо́й, пріими́ ду́хъ Мо́й.

На хвали́техъ стихи́ры на 4, гла́съ 5. Подо́бенъ: Ра́дуйся.

Ра́дуйся, пречестны́й о́бразе, а́нгелы покланя́емый и Ада́му созда́тельный, человѣ́комъ возжелѣ́нный и бѣсо́мъ вои́стинну стра́шный, любве́ Бо́жія извѣще́ніе, начерта́ніе сла́дкаго Іису́са, бу́дущихъ бла́гъ обруче́ніе, вели́кое сокро́вище вселе́нныя, никогда́же нищеты́ боя́щееся. Да́руй на́мъ единомы́сліе, ми́ръ и ве́лію ми́лость. [Два́жды.]

Ра́дуйся, Боже́ственный о́бразе, его́же херуви́ми обстоя́тъ, и серафи́ми слу́жатъ, и вся́ небе́сныя си́лы трепе́щутъ, вся́ка же тва́рь послу́шаетъ, и бе́здны боя́тся, и́мже тма́ отгна́на бы́сть, и діа́волъ упраздни́ся, и свободи́ся Ада́мъ отъ грѣхо́вныхъ у́зъ, и Евины утоли́шася сле́зы. Да́руй на́мъ единомы́сліе, ми́ръ и ве́лію ми́лость.

Ра́дуйся, Ца́рскій о́бразе, краснѣ́йшаго добро́тою па́че всѣ́хъ сыно́въ человѣ́ческихъ, Іису́са Изба́вителя, пло́тію покры́вшагося и на взыска́ніе прише́дшаго заблу́ждшаго волкохи́щнаго овча́те, и на ра́му поне́сшаго, и Отцу́ прине́сшего, Кресто́мъ и Кро́вію очище́но. Да́руй вселе́ннѣй единомы́сліе, ми́ръ и ве́лію ми́лость.

Сла́ва, гла́съ 4:

Да ка́плютъ о́блацы сла́дость и го́ры да взыгра́ются ра́достно о пресла́вныхъ вели́чіихъ Христа́ Бо́га на́шего: вчера́ бо на Ѳаво́рстѣй горѣ́ свѣ́тъ облиста́ Божества́, увѣря́я ученико́въ верхо́вныя, Моисе́я же и Илію́ со сла́вою предста́ви, Того́ свидѣ́тельствующихъ, зако́номъ облада́юща и живы́ми и ме́ртвыми владя́ща. Дне́сь посреди́ вселе́нныя свѣтоза́рное воображе́ніе возсія́, увѣря́я вся́ческая, я́ко То́й е́сть вочеловѣ́чивыйся Бо́гъ на́шъ, Ему́же вопіе́мъ: сла́ва, Христе́, человѣколю́бію Твоему́.

И ны́нѣ, гла́съ 1:

Подоба́ше самови́дцамъ Сло́ва и слуга́мъ, и е́же по пло́ти Ма́тере Его́ успе́ніе ви́дѣти, коне́чное ели́ко на Не́й та́инство, я́ко да не то́кмо е́же отъ земли́ Спа́сово восхожде́ніе у́зрятъ, но и Ро́ждшія Его́ преставле́нію свидѣ́тельствуютъ. Тѣ́мже, отвсю́ду Боже́ственною си́лою собра́вшеся, Сіо́на достиго́ша, и на не́бо иду́щую предсыла́ху, вы́шшую Херуви́мъ, Ейже и мы́ съ ни́ми покланя́емся, я́ко моля́щейся о душа́хъ на́шихъ.

Славосло́віе вели́кое, и про́чее, и отпу́стъ.



НА ЛИТУРГІИ,

Блаже́нна Успе́нія отъ кано́на 1-го гла́са, пѣ́снь 1-я, на 4, и Убру́са, отъ кано́на 4-го гла́са, пѣ́снь 6-я, на 4. По вхо́дѣ тропа́рь Убру́са и Успе́нія. Сла́ва: конда́къ Убру́са. И ны́нѣ: конда́къ Успе́нія. Проки́менъ, гла́съ 4: Воспо́йте Го́сподеви пѣ́снь но́ву,* я́ко ди́вна сотвори́ Госпо́дь. Сти́хъ: Ви́дѣша вси́ концы́ земли́ спасе́ніе Бо́га на́шего. Апо́столъ къ Колосса́емъ, зача́ло 250 или́ къ Кори́нѳяномъ, зача́ло 173. Аллилу́ія, гла́съ 4: Го́споди, во свѣ́тѣ лица́ Твоего́ по́йдемъ, [и о и́мени Твое́мъ возра́дуемся во вѣ́ки. Сти́хъ: Ви́дѣша вси́ концы́ земли́ спасе́ніе Бо́га на́шего.] Ева́нгеліе Луки́, зача́ло 48 отъ полу́. Прича́стенъ: Го́споди, во свѣ́тѣ лица́ Твоего́ по́йдемъ и о и́мени Твое́мъ возра́дуемся во вѣ́ки.


(Мрк.) Подоба́етъ вѣ́дати, я́ко а́ще случи́тся попра́зднство Успе́нія Богоро́дицы и Нерукотворе́ннаго о́браза въ недѣ́лю, кромѣ́ хра́ма.

Въ суббо́ту на ма́лѣй вече́рни, стихи́ры воскре́сны и Богоро́дицы, по обы́чаю.

На вели́цѣй вече́рни, по каѳи́смѣ, на Го́споди воззва́хъ: стихи́ры воскре́сны 3, и пра́здника 3, и о́браза 4. Сла́ва, о́браза. И ны́нѣ, богоро́диченъ 1-й, гла́са. Вхо́дъ. На литíи стихи́ры пра́здника, стихо́вна вече́рняя того́ дне́. Сла́ва, о́браза. И ны́нѣ, пра́здника, гла́съ 5: Воспо́йте, лю́діе... На стихо́внѣ стихи́ры воскре́сны. Сла́ва, о́браза. И ны́нѣ, пра́здника. На благослове́ніи хлѣ́бовъ тропа́рь пра́здника, два́жды, и о́браза, еди́ножды. Аще нѣ́сть бдѣ́нія, по Ны́нѣ отпуща́еши... тропа́рь воскре́сенъ. Сла́ва, о́браза. И ны́нѣ, пра́здника.

На повече́ріи по Досто́йнѣ, конда́къ о́браза. Сла́ва, и ны́нѣ пра́здника.

На у́трени, на Бо́гъ Госпо́дь: тропа́рь воскре́сенъ, два́жды. Сла́ва, о́браза. И ны́нѣ, пра́здника. И про́чее пое́мъ и до кано́на воскре́сно. Кано́нъ воскре́сенъ со ирмосо́мъ на 4, и пра́здника на 4, и о́браза на 6. Катава́сія пра́здника: Преукраше́нная... По 3-й пѣ́сни конда́къ и и́косъ пра́здника и сѣда́ленъ о́браза. Сла́ва, и ны́нѣ, пра́здника. По 6-й пѣ́сни конда́къ и и́косъ о́браза. На 9-й пѣ́сни пое́мъ Честнѣ́йшую... Свѣти́ленъ воскре́сенъ. Сла́ва, о́браза. И ны́нѣ, пра́здника. На хвали́техъ стихи́ры воскре́сны 4 и о́браза 4, съ припѣ́вы его́. Сла́ва, стихи́ра ева́нгельская. И ны́нѣ: Преблагослове́нна еси́... И славосло́віе вели́кое. Та́же тропа́рь воскре́сенъ и ектеніи́, и отпу́стъ, и оглаше́ніе, и исхожде́ніе въ притво́ръ, и ча́съ 1-й.

На часѣ́хъ же глаго́лемъ тропа́рь воскре́сенъ. Сла́ва, о́браза. И ны́нѣ, богоро́диченъ часо́въ. По Отче на́шъ... конда́къ воскре́сенъ. На 3-мъ часѣ́ тропа́рь воскре́сенъ. Сла́ва, пра́здника. И ны́нѣ, богоро́диченъ часо́въ. По Отче на́шъ... конда́къ о́браза. Та́кожде глаго́лемъ и на про́чихъ часѣ́хъ тропа́рь воскре́сенъ, о́браза же и пра́здника тропа́рь и конда́къ премѣня́емъ.

На литургíи, Блаже́нна гла́са на 4, и пра́здника пѣ́снь 1-я на 4, и о́браза пѣ́снь 6-я, на 4. По вхо́дѣ тропа́рь воскре́сенъ, и о́браза, и пра́здника. Конда́къ воскре́сенъ. Сла́ва, о́браза. И ны́нѣ, пра́здника. Проки́менъ, Апо́столъ, аллилу́ія, Ева́нгеліе и прича́стенъ — воскре́сенъ и о́браза.


Зри́: Аще случи́тся попра́зднство Успе́нія Богоро́дицы въ суббо́ту.

Глаго́лемъ на Го́споди воззва́хъ: Сла́ва, пра́здника. И ны́нѣ, богоро́диченъ 1-й, настоя́щаго гла́са. На у́трени, кано́нъ пра́здника на 6 и свята́го на 6.


(Мрк.) Аще случи́тся попра́зднство Успе́нія Пресвяты́я Богоро́дицы въ недѣ́лю, кромѣ́ пра́здника Нерукотворе́ннаго о́браза.

Въ суббо́ту на ма́лѣй вече́рни стихи́ры воскре́сны и Богоро́дицы, по обы́чаю.

На вели́цѣй вече́рни, на Го́споди воззва́хъ: стихи́ры воскре́сны 3, и восто́ченъ [Анато́ліевъ], еди́нъ, и пра́здника того́ дне́ на ряду́ 3, и мине́и свята́го 3. Сла́ва, пра́здника или́ свята́го. И ны́нѣ, богоро́диченъ 1-й гла́са. Вхо́дъ, проки́менъ дне́ и ектеніи́. На литíи стихи́ры пра́здника, стихо́вна вече́рняя того́ дне́. Сла́ва, и ны́нѣ, пра́здника. На стихо́внѣ стихи́ры воскре́сны. Сла́ва, свята́го. Аще ли ни́: Сла́ва, и ны́нѣ, пра́здника. На благослове́ніи хлѣ́бовъ тропарь: Богоро́дице Дѣ́во, ра́дуйся.., два́жды, и пра́здника, еди́ножды. И чте́ніе во Апо́стольскихъ Посла́ніяхъ.

На у́трени, тропа́рь воскре́сенъ, два́жды. Сла́ва, свята́го. Аще ли ни́: Сла́ва, и ны́нѣ, пра́здника. По каѳи́смахъ сѣда́льны воскре́сны съ богоро́дичны и́хъ, и чте́ніе во Ева́нгеліи толково́мъ. Та́же непоро́чны и тропари́, Ангельскій собо́ръ... и ипакои́ гла́са, и чте́ніе. Степе́нна и проки́менъ гла́са. Ева́нгеліе воскре́сное. Воскресе́ніе Христо́во... и псало́мъ 50-й, и про́чее воскре́сно. Кано́нъ воскре́сенъ со ирмосо́мъ на 4, и Богоро́дицы на 2, и пра́здника на 4, и свята́го на 4. Катава́сія пра́здника. По 3-й пѣ́сни конда́къ и и́косъ пра́здника или́ свята́го и сѣда́ленъ. Сла́ва, и ны́нѣ, пра́здника. По 6-й пѣ́сни, конда́къ воскре́сенъ и и́косъ. На 9-й пѣ́сни, пое́мъ Честнѣ́йшую... Свѣти́ленъ воскре́сенъ. Сла́ва, свята́го. Аще ли ни́: Сла́ва, и ны́нѣ, пра́здника. На хвали́техъ стихи́ры воскре́сны 4 и пра́здника 4, стихо́вна того́ дне́, со Сла́внымъ, съ припѣ́вы пра́здника. Сла́ва, стихи́ра ева́нгельская, И ны́нѣ: Преблагослове́нна еси́... По славосло́віи тропа́рь воскре́сенъ то́чію, и ектеніи́, и отпу́стъ, и оглаше́ніе, и исхожде́ніе въ притво́ръ, и ча́съ 1-й.

На 1-мъ часѣ́ тропа́рь воскре́сенъ. Сла́ва, пра́здника. И ны́нѣ, богоро́диченъ часо́въ. По Отче на́шъ... конда́къ пра́здника и коне́чный отпу́стъ.

На 3-мъ часѣ́ тропа́рь воскре́сенъ. Сла́ва, свята́го. Аще ли ни́: Сла́ва, пра́здника. По трисвято́мъ конда́къ пра́здника и воскре́сенъ, глаго́лемъ премѣня́юще.

На литургíи, Блаже́нна гла́са на 6 и пра́здника, отъ кано́на пѣ́снь рядову́ю на 4. По вхо́дѣ тропа́рь воскре́сенъ и пра́здника, и хра́ма свята́го, и свята́го, а́ще е́сть. Та́же конда́къ воскре́сенъ и хра́ма свята́го или́ святы́я. Сла́ва, свята́го, а́ще е́сть; а́ще ли ни́: Сла́ва, хра́ма свята́го. И ны́нѣ, пра́здника. Проки́менъ воскре́сенъ гла́са и пра́здника. Апо́столъ, аллилу́ія и Ева́нгеліе дне́. Прича́стенъ: Хвали́те Го́спода съ небе́съ... и пра́здника. Аще и́мать святы́й Апо́столъ и Ева́нгеліе, тогда́ пое́мъ проки́менъ воскре́сенъ гла́са и свята́го. Апо́столъ и Ева́нгеліе дне́, и свята́го. Прича́стенъ: Хвали́те Го́спода съ небе́съ... и свята́го.

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 162 об. – 175.

/ Къ оглавленію раздѣла /


Наверхъ / Къ титульной страницѣ

0