Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 16-й де́нь.
Отъ Еде́са пренесе́ніе въ Константи́нь гра́дъ Нерукотворе́ннаго Образа Го́спода на́шего Іису́са Христа́, ре́кше свята́го Убру́са.

[НА ВЕЧЕРНИ,]
На Го́споди воззва́хъ, стихи́ры на 6: Успе́нія 3 и о́браза 3.
Стихи́ры Успе́нія, гла́съ 2. Подо́бенъ: Кíими похва́льными.

Кíими недосто́йными устна́ми ублажи́мъ Богоро́дицу? Честнѣ́йшую тва́ри и святѣ́йшую су́щу херуви́мъ и всѣ́хъ а́нгелъ, престо́лъ ца́рскій недви́жимый, до́мъ, въ не́мже всели́ся Превы́шній, спасе́ніе мíра, Бо́жіе свяще́ніе, подаю́щую вѣ́рнымъ въ боже́ственнѣй па́мяти Ея́ бога́тно ве́лію ми́лость.

Ка́я стра́шная пѣ́нія, я́же принесо́ша Ти́ тогда́, Дѣ́во, о́крестъ Твоего́ одра́ стоя́щіи, вси́ и́же Сло́ва апо́столи? И ужа́снѣ вопію́ще: отхо́дитъ Царе́ва пала́та, возвыша́ется киво́тъ свяще́нія; две́ри, возми́теся, я́ко да Бо́жія две́рь вни́детъ въ ра́дость, мíру непреста́нно прося́щи ве́лія ми́лости!

Ка́я духо́вная пѣ́нія ны́нѣ принесе́мъ Тебѣ́, Всесвята́я? Безсме́ртнымъ бо успе́ніемъ Твои́мъ ве́сь мíръ освяти́ла еси́, и ко премíрнымъ прешла́ еси́, добро́ту разумѣва́ти Вседержи́теля, и Сему́ я́коже Ма́ти сра́доватися, а́нгельскимъ Тя́ чино́мъ доринося́щимъ, Чи́стая, и душа́мъ пра́ведныхъ, съ ни́миже проси́ на́мъ ми́ра и ве́лія ми́лости.

Ины стихи́ры о́браза, гла́съ и подо́бенъ то́йже:

Кíима, земноро́дніи, очи́ма воззри́мъ на о́бразъ Тво́й, его́же а́нгельская во́инства зрѣ́ти удо́бь не мо́гутъ, свѣ́томъ Боже́ственнымъ блиста́ющаго? Отхо́дитъ бо отъ земли́ невѣ́рныхъ дне́сь, и къ гра́ду Ца́рствующему и благочести́вымъ лю́демъ прихо́дитъ Боже́ственнымъ ма́ніемъ, на его́же восхожде́ніе явля́ются ца́ріе, припа́дающе сему́ со стра́хомъ, Христе́, и вѣ́рою.

Кíими, земнíи, ося́жемъ о́бразъ Тво́й, Сло́ве, дла́ньми, оскверне́ны грѣхми́, безгрѣ́шнаго Бо́га на́шего, Иже во оскверне́ныхъ непристу́пнаго? Покрыва́ютъ херуви́ми очеса́, трепе́щуще, не терпя́тъ серафи́ми зрѣ́ти сла́вы Твоея́, стра́хомъ Тебѣ́ рабо́таетъ тва́рь. Да не у́бо осу́диши на́съ, недосто́йнѣ Тво́й зра́къ, Христе́, съ тре́петомъ цѣлу́ющихъ вѣ́рно.

Па́ки Влады́чняго торжества́ наста́ боже́ственный де́нь: се́ бо въ вы́шнихъ Сѣдя́й, ны́нѣ я́вѣ на́съ посѣти́, честны́я ра́ди Его́ ико́ны. Иже въ Вы́шнихъ херуви́мы Сы́й Неви́димый, зри́тся пи́саннѣ, и́мже уподо́бися, пе́рстомъ пречи́стымъ Отчимъ изображе́нъ неизрече́нно, по подо́бію Того́. Ейже вѣ́рою и любо́вію покланя́ющеся, освяща́емся.

Сла́ва, гла́съ 8:

Человѣколю́бче Влады́ко, вели́ка Твоего́ смотре́нія бе́здна: въ ро́ды бо родо́въ Твое́ благодѣ́тельствуя созда́ніе, пречи́стаго Твоего́ лица́ зра́къ изобрази́въ, Авгарю вѣ́рному посла́лъ еси́, возжела́вшу Тя́ ви́дѣти, по Божеству́ херуви́мы неви́димаго, я́ко да Тво́й о́бразъ зря́ще, на́съ ра́ди вопло́щшагося и пострада́вшаго во́лею. Къ Твое́й любви́ распала́емся, ю́же на на́съ излія́ вели́кія ра́ди Твоея́ ми́лости.

И ны́нѣ, гла́съ то́йже:

Дѣви́честіи ли́цы дне́сь та́йно одру́ Дѣ́вы и Ма́тере о́крестъ предстоя́тъ, и ду́ши пра́ведныхъ, обступи́вше, Цари́цу сла́вятъ. Ови у́бо я́ко да́ръ дѣ́вство вмѣ́сто мѵ́ра прино́сятъ, о́ви же невеще́ственное пѣ́ніе съ добродѣ́телію прино́сятъ, подоба́етъ бо Ма́тери Бо́жіи я́ко Цари́цѣ ца́рскими добродѣ́тельми свѣтлосія́ющими дориноси́тися. Съ ни́миже и мы́, житіе́ чи́стое совне́сше, изы́демъ къ погребе́нію су́щія Ма́тере Бо́га на́шего, пѣ́ньми и пѣ́сньми духо́вными согла́сно Ю ублажа́юще.

На стихо́внѣ стихи́ры Успе́нія, гла́съ 4. Подо́бенъ: Да́лъ еси́ зна́меніе.

Не колесни́ца огнезра́чная* отъ земны́хъ Тя́ преста́ви,* я́коже Илію́ пра́веднаго,* но са́мое Со́лнце Пра́вды,* на руку́ Свое́ю пресвяту́ю Твою́ ду́шу,* я́ко непоро́чную пріе́мъ,* въ Себѣ́ упоко́и,* и пресла́вно Тя́, Чи́стая, преста́вивъ, почте́,* въ ра́дости па́че ума́.

Сти́хъ: Воскресни́ Го́споди въ поко́й Тво́й,* Ты́ и Киво́тъ святы́ни Твоея́.

Пріиди́те, о празднолю́бцы!* Бо́жія Ма́тере дне́сь* свято́е преставле́ніе свѣ́тло соверши́мъ:* въ ру́цѣ бо и́стинно* отъ нетлѣ́нна Отца́ возсія́вшаго пе́рвѣе* и напослѣ́докъ изъ утро́бы Ея́,* Боже́ственную и пречи́стую ду́шу предаде́, ра́дующися,* Іису́са Бо́га на́шего, и мо́литъ спасти́ся на́мъ.

Сти́хъ: Кля́тся Госпо́дь Дави́ду и́стиною,* и не отве́ржется eя́.

Чу́до преужа́сно:* Яже во утро́бѣ невмѣсти́маго Царя́ носи́вшая* во гро́бѣ полага́ется,* и а́нгельстіи собо́ри со апо́столы* со стра́хомъ погреба́ютъ* Тоя́ богопрія́тное тѣ́ло и честно́е,* и сіе́ возвы́сивъ, на небеса́ возведе́* Іису́съ, Сы́нъ Ея́* и Спа́съ ду́шъ на́шихъ.

Сла́ва, гла́съ 6:

Го́споди, воплоти́лся еси́, я́коже восхотѣ́лъ, изво́лилъ еси́ воспрія́ти нищету́ на́шу и бога́тство благосе́рдія показа́лъ еси́, и́мже мя́, пе́рсть, обожи́лъ еси́. Сла́вимъ Тя́, Человѣколю́бче, смотре́нія о́бразъ ви́дяще зра́ка Твоего́, си́мъ невозбра́нно во Еде́мъ вхо́дъ, Спа́се, да́руй рабо́мъ Твои́мъ, презира́я вся́ прегреше́нія.

И ны́нѣ, гла́съ 8. Лео́нта деспо́та:

Увѣря́я Іису́съ, Сы́нъ Тво́й, Богоро́дице, и Бо́гъ на́шъ, два́ естества́ Своя́, я́ко у́бо человѣ́къ умира́етъ и я́коже Бо́гъ востае́тъ. И Тя́, Богома́ти, зако́номъ естества́ умре́ти благоизво́ли, да не невѣ́рнымъ привидѣ́ніе мни́тся смотре́ніе. Прешла́ бо еси́ къ небе́снѣй странѣ́, небе́сная Невѣ́сто, я́ко отъ черто́га селе́нія Твоего́ отъ земли́ взята́. Освяти́ся возду́хъ восхожде́ніемъ Твои́мъ, я́ко просвѣти́ся земля́ рождество́мъ Твои́мъ, предпосыла́ютъ апо́столи, и а́нгели подъе́млютъ. Тѣ́мже, погре́бше пречи́стое тѣ́ло Твое́ и надгро́бное пѣ́ніе воспѣ́вше, ужа́сно зря́ху и со стра́хомъ глаго́лаху: сія́ измѣ́на десни́цы Вы́шняго, То́й бо посреди́ Тебе́, и не подви́жешися. Но, о Многопѣ́тая Ма́ти, не отступа́й, на́съ назира́ющи: мы́ бо лю́діе Твои́ и о́вцы па́жити Твоея́, и и́мя Твое́ призыва́емъ, прося́ще Тебе́ ра́ди спасе́нія и ве́лія ми́лости.

Тропа́рь, гла́съ 2:

Пречи́стому Твоему́ о́бразу покланя́емся, Благíй, прося́ще проще́нія прегрѣше́ній на́шихъ, Христе́ Бо́же: во́лею бо благоволи́лъ еси́ пло́тію взы́ти на Кре́стъ, да изба́виши, я́же созда́лъ еси́, отъ рабо́ты вра́жія. Тѣ́мъ благода́рственно вопіе́мъ Ти́: ра́дости испо́лнилъ еси́ вся́, Спа́се на́шъ, прише́дый спасти́ мíръ.

Сла́ва, и ны́нѣ, пра́здника, гла́съ 1:

Въ рождествѣ́ дѣ́вство сохрани́ла eси́, во успе́ніи мíра не оста́вила eси́, Богоро́дице, преста́вилася eси́ къ животу́, Ма́ти су́щи Живота́, и моли́твами Твои́ми избавля́еши отъ сме́рти ду́ши на́ша.


НА УТРЕНИ,
На Бо́гъ Госпо́дь: тропа́рь о́браза, два́жды. Сла́ва, и ны́нѣ, пра́здника Богоро́дицы.

По 1-й каѳи́смѣ сѣда́ленъ, гла́съ 1. Подо́бенъ: Гро́бъ Тво́й.

Благода́ть Твоя́, Спа́се, на на́съ излія́ся, ви́диму бы́вшу Тебѣ́, Непостижи́ме, и пре́лести тма́ угасе́, тѣ́мъ во свѣ́тѣ лица́ Твоего́ стопы́ на́ша напра́ви, да въ за́повѣдехъ Твои́хъ ходя́ще, Тебе́ сподо́бимся узрѣ́ти, Свѣ́те Непристу́пный. [Два́жды]

Сла́ва, и ны́нѣ, [пра́здника,] гла́съ 4. Подо́бенъ: Удиви́ся Іо́сифъ.

Зря́ще вои́стинну а́нгельская во́инства преставле́ніе Твое́, Пресвята́я Влады́чице Чи́стая, Благослове́нная Всепѣ́тая Богоро́дице, иму́ще во́лею рожде́нна изъ Тебе́, ли́къ учени́къ собра́вшеся, съ весе́ліемъ ноша́ху честно́е въ ра́й тѣ́ло Твое́, Христа́ пою́ще, Живода́вца су́ща во вѣ́ки.

По 2-й каѳи́смѣ сѣда́ленъ, гла́съ 5. Подо́бенъ: Собезнача́льное Сло́во.

Собезнача́льный Сы́нъ Отцу́, и превѣ́чный, и неви́димый существо́мъ, и неосяза́емый, подъ лѣ́томъ бы́въ за ми́лость неизрече́нную, опи́санныя пло́ти Твоея́, Влады́ко, на́мъ оста́ви сла́дкое изображе́ніе, на спасе́ніе душа́мъ на́шимъ. [Два́жды]

Сла́ва, и ны́нѣ, пра́здника, гла́съ 4. Подо́бенъ: Удиви́ся Іо́сифъ.

Въ ру́цѣ на́съ ра́ди вочеловѣ́чшагося изъ Тебе́ преда́вши ду́шу, я́ко Зижди́телю Твоему́ и Бо́гу, къ жи́зни нетлѣ́ннѣй преста́вилася еси́. Тѣ́мже Тя́ че́стно ублажа́емъ, еди́ну Чи́стую и Нескве́рную, и Богоро́дицу вси́ и́стинно исповѣ́дающе, взыва́емъ: Христа́ моли́, къ Нему́же преста́вилася еси́, спасти́ ду́ши на́ша.

Кано́нъ пра́здника Богоро́дицы со ирмосо́мъ на 6 и о́браза на 6.

Кано́нъ Богоро́дицы, ки́ръ Космы́, гла́съ 1.
Пѣ́снь 1.

Ирмо́съ: Преукраше́нная Боже́ственною сла́вою, свяще́нная и сла́вная, Дѣ́во, па́мять Твоя́, вся́ собра́ къ весе́лію вѣ́рныя, начина́ющей Маріа́мѣ, съ ли́ки и тимпа́ны, Твоему́ пою́ще Единоро́дному: сла́вно я́ко просла́вися.

Да провожда́ютъ невеще́ственніи чи́нове, небоше́ственное въ Сіо́нъ Боже́ственное тѣ́ло Твое́, внеза́пу же сте́кшеся апо́столъ мно́жество отъ коне́цъ, Богоро́дице, Тебѣ́ предста́ша а́біе, съ ни́миже, Чи́стая, Твою́ честну́ю, Дѣ́во, па́мять сла́вимъ.

Побѣ́дныя по́чести взяла́ еси́ на естество́, Чи́стая, Бо́га ро́ждши, оба́че же, подо́бящися Творцу́ Твоему́ и Сы́ну, па́че естества́ повину́ешися есте́ственнымъ зако́номъ. Тѣ́мже уме́рши, съ Сы́номъ востае́ши вѣ́чнующи.

Кано́нъ о́браза, его́же краегране́сіе: Напеча́таннаго Твоего́, Спа́се, зрѣ́нія почита́ю. Творе́ніе Ге́рмана патріа́рха, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Пло́тски изобрази́тися по на́мъ, Иже пре́жде Безпло́тный, благоволе́ніемъ Отчимъ, не отвергíйся зра́ка, дарова́ на́мъ Боже́ственное изображе́ніе.

Неизмѣ́нное естество́, Отчій предѣ́лъ извѣ́стнѣйшій, въ человѣ́ческую пло́ть прише́дый, сво́йства на земли́ оста́вилъ е́сть на́мъ, возше́дый на небеса́.

Коле́блемое ле́стію сопроти́вныхъ достоя́ніе Твое́ оправда́лъ еси́, Христе́, честны́ми Твои́ми сію́ утверди́въ страстьми́ и зра́ка изображе́ніемъ.

Подоба́ше принести́ся къ Ца́рствующему всѣ́ми гра́ды небесе́ и земли́ гра́дъ, о́браза начерта́ніе, е́же о́нъ, воплоще́йся самодѣ́тельно, омочи́лъ е́сть, царя́, и христолюби́выхъ поспѣше́ньми.

Богоро́диченъ: Отъ чи́стыхъ Твои́хъ ложе́снъ преесте́ственнѣ пло́ть заи́мствовавый, Иже всѣ́мъ подая́й е́же бы́ти человѣ́комъ, Пренепоро́чная, ви́дяшеся, не отсту́пль, идѣ́же бѣ́ пе́рвѣе.

Катава́сія пра́здника: Преукраше́нная...

Пѣ́снь 3.

Ирмо́съ: Содѣ́тельная и содержи́тельная всѣ́хъ, Бо́жія Му́дросте и Си́ло, непрекло́нну, недви́жиму Це́рковь утверди́, Христе́, еди́нъ бо еси́ Свя́тъ, во святы́хъ почива́яй.

Жену́ Тя́ ме́ртвенну, но па́че естества́ и Ма́терь Бо́жію, ви́дѣвше, Всенепоро́чная, сла́вніи апо́столи, ужа́сно прикаса́хуся рука́ми сла́вою облиста́ющей, я́ко богопрія́тное Селе́ніе ви́дяще.

Пости́же ру́цѣ досади́тельныя де́рзаго, усѣче́ніемъ су́дъ нане́съ, Бо́гу сохра́ншу че́сть одушевле́нному Киво́ту, сла́вою Божества́, въ Не́мже Сло́во пло́ть бы́сть.

Инъ.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Оде́ждею добродѣ́телей одѣ́ялъ еси́, Спа́се, честну́ю Це́рковь, подви́гнувъ царе́во се́рдце защище́ніе взыска́ти Твоего́ подо́бія.

Обнажи́ти хотя́ до́брая и вре́менемъ ума́лити, и́же за́висти роди́тель рука́мъ скве́рнымъ сія́ предаде́ безсту́днѣ, но обличи́вся, всу́е помышля́я.

Свѣ́тло ра́довашеся иногда́ Дави́дъ, лику́я предъ киво́томъ святы́мъ, и ны́нѣ ски́птры пріе́мъ управля́ти ца́рскія, мно́жае ра́дуется Боже́ственному изображе́нію.

Тебѣ́, созда́вшему человѣ́ка по о́бразу пе́рвѣе, во е́же вообрази́лся еси́ а́біе за милосе́рдіе. Тѣ́мъ пріе́мша Тя́ вои́стинну подо́біе неизмѣ́нное, со а́нгелы, Христе́, сла́вимъ.

Богоро́диченъ: Изъ ко́рене вся́ко отсѣщи́ пра́отца хотя́й, Тво́й Сы́нъ, Дѣ́во, прозя́бшее преслуша́ніе, изъ чре́ва Твоего́, Чи́стая, пріе́млетъ все́ человѣ́ческое.

Конда́къ пра́здника Богоро́дицы, гла́съ 2:

Въ моли́твахъ неусыпа́ющую Богоро́дицу и въ предста́тельствахъ непрело́жное упова́ніе, гро́бъ и умерщвле́ніе не удержа́ста: я́коже бо Живота́ Ма́терь, къ животу́ преста́ви, во утро́бу Всели́выйся приснодѣ́вственную.

Икосъ:

Огради́ моя́ помышле́нія, Христе́ мо́й, и́бо Стѣ́ну мíра воспѣ́ти дерза́ю, Чи́стую Ма́терь Твою́, на столпѣ́ глаго́лъ укрѣпи́ мя, и въ тя́жкихъ мы́слехъ заступи́ мя, Ты́ бо взыва́ющимъ и прося́щимъ вѣ́рою моле́нія исполня́еши. Ты́ мнѣ́ у́бо да́руй язы́къ прино́сенъ и по́мыслъ непосты́денъ: вся́кое бо дая́ніе сія́нія отъ Тебе́ низпосыла́ется, Свѣтопода́телю, во утро́бу всели́выйся приснодѣ́вственную.

Сѣда́ленъ о́браза, гла́съ 1. Подо́бенъ: Гро́бъ Тво́й, Спа́се.

Еде́сскій ца́рь всѣ́хъ Царя́, не ски́птры, ниже́ во́и, но мно́жества чуде́съ сло́вомъ износя́щаго, позна́въ Тя́, моля́ше: богочеловѣ́чное къ себѣ́ получи́ти, во о́бразѣ же, я́ко узрѣ́ Тя, взыва́ше: Бо́гъ Ты́ и Госпо́дь. [Два́жды.]

Сла́ва, и ны́нѣ, пра́здника, гла́съ то́йже. Подо́бенъ: Ка́мени запеча́тану.

Ли́къ боже́ственныхъ апо́столъ собра́ся погребсти́ Тя прече́стно, Богоро́дице Всечи́стая, съ ни́миже и а́нгельстіи чи́ни воспѣва́ху преставле́ніе Твое́, взыва́юще прехва́льно. Съ ни́миже и мы́, любо́вію игра́юще, Чи́стая, хвалу́ Тебѣ́ прино́симъ, гла́сы пѣ́сненными, вѣ́рніи, и вопіе́мъ: ра́дуйся, Предста́тельнице присночту́щихъ Тя́.

Пѣ́снь 4.

Ирмо́съ: Рѣ́чи проро́ковъ и гада́нія, воплоще́ніе прояви́ша отъ Дѣ́вы Твое́, Христе́: сія́ніе блиста́нія Твоего́ во свѣ́тъ язы́ковъ изы́детъ, и возгласи́тъ Тебѣ́ бе́здна съ весе́ліемъ: си́лѣ Твое́й сла́ва, Человѣколю́бче.

Ви́дите лю́діе и чуди́теся: Гора́ бо свята́я и я́вственная Бо́гу въ небе́сныя оби́тели превы́шше взе́млется, Не́бо земно́е въ небе́сное и нетлѣ́нное селе́ніе вселя́емо.

Жи́зни присносу́щныя и лу́чшія, сме́рть Твоя́ бы́сть прехожде́ніе, Чи́стая, отъ привре́менныя къ Боже́ственнѣй вои́стинну и непреходи́мѣй, преставля́я Тя́, Чи́стая, въ весе́ліи Сы́на зрѣ́ти Твоего́ и Го́спода.

Взя́шася две́ри небе́сныя, и Ангели воспѣ́ша, и прія́тъ Христо́съ дѣ́вства Своея́ Ма́тере сосу́дъ; Херуви́ми подъя́ша Тя́ съ весе́ліемъ, Серафи́ми же сла́вятъ, ра́дующеся.

Инъ.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Сла́дкое у́бо со́лнце, озаря́ющее очеса́, сладча́йшее же зрѣ́ніе Твоего́, Христе́, подо́бія, я́ко то́ у́бо чу́вственная, сіе́ же у́мная свѣтозаря́етъ.

Крѣ́пость оскудѣ́ исма́ильтеская: десни́цы бо ору́жія кре́стнаго все́ огражде́ніе державному́дренный ца́рь въ свое́й земли́ положи́.

Кня́зи вси́ и судіи́ земли́, благослови́те Христа́, съ первосвяще́нники, и святи́тели дне́сь, и всѣ́ми людьми́, Того́ зрѣ́нія сподо́бльшіися.

Богоро́диченъ: Соблюде́нну бы́ти Твоему́ гра́ду, Пречи́стая, невреди́мо отъ наше́ствія ва́рварскаго, моли́ся, мо́лимся, се́ бо коли́ко на́нь навѣ́тницы созида́ютъ.

Пѣ́снь 5.

Ирмо́съ: Бо́жію и неизрече́нную добро́ту, добродѣ́телей Твои́хъ, Христе́ исповѣ́мъ: отъ Присносу́щныя бо Сла́вы, Соприсносу́щное и Ѵпоста́сное возсія́вый Сія́ніе, изъ дѣ́вственныя утро́бы, су́щимъ во тмѣ́ и сѣ́ни, вопло́щся, возсія́лъ еси́ Со́лнце.

Яко на о́блацѣ Дѣ́во, апо́стольскій ли́къ носи́мь, къ Сіо́ну отъ коне́цъ, служи́ти Тебѣ́, Облаку ле́гкому, собира́шеся: отъ Нея́же Вы́шній Бо́гъ, су́щимъ во тьмѣ́ и сѣ́ни, Пра́ведное возсія́ Со́лнце.

Тру́бъ, богопрія́тніи язы́цы богосло́вныхъ муже́й благогла́снѣйше Богоро́дицѣ вопія́ху, исхо́дную возглаша́юще пѣ́снь Ду́хомъ: ра́дуйся нетлѣ́нный Исто́чниче, Бо́жія живонача́льнаго и спаси́тельнаго всѣ́мъ воплоще́нія.

Инъ.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Ма́лъ Тебѣ́ гра́дъ прія́телище дре́вле предугото́ва, Христе́, его́же Ѳадде́я прише́ствіе неду́гъ премѣня́етъ, и руки́ Твоея́ писа́ніе, и Боже́ственное напеча́таніе лица́ Твоего́.

Благода́тей Твои́хъ дарова́нія, Христе́, преумно́жишася: я́же бо пе́рвѣе Еде́са нѣ́дрствовавши хваля́шеся, но́вый же пріе́мши Ри́мъ ра́дуется.

Очи Госпо́дни на пра́ведныя цари́, и у́ши на моли́тву царе́й благочестивному́дрствующихъ, чту́щимъ Его́ подо́біе благолѣ́пно самопи́санное.

Богоро́диченъ: Уста́ви, Дѣ́во, враго́въ настоя́нія ча́стая, разруши́ совѣ́ты и́хъ, достоя́нію Твоему́ помози́: зри́ши бо, я́ко отча́яхомся, озло́бленніи.

Пѣ́снь 6.

Ирмо́съ: Морскíй пучиноро́дный ки́товъ вну́тренній о́гнь — тридне́внаго Твоего́ погребе́нія проображе́ніе, его́же Іо́на проро́къ показа́ся. Спасе́нъ бо, я́ко и предпосла́ся, неврежде́нъ, вопія́ше: пожру́ Ти́ со гла́сомъ хвале́нія, Го́споди.

Дае́тъ Тебѣ́, я́же превы́ше естества́, Ца́рь всѣ́хъ Бо́гъ: въ рождествѣ́ бо Дѣ́ву я́коже сохрани́, та́ко во гро́бѣ тѣ́ло соблю́дъ нетлѣ́нно и спросла́ви Боже́ственнымъ преставле́ніемъ, че́сть Тебѣ́, я́ко Сы́нъ Ма́тери, да́руя.

Вои́стинну Тя́, я́ко свѣ́телъ свѣ́щникъ, невеще́ственнаго Свѣ́та, кади́льницу злату́ю Боже́ственнаго Угля, во Свята́я святы́хъ всели́, ру́чку и же́злъ, скрижа́ль богопи́санную, ковче́гъ святы́й, трапе́зу Сло́ва жи́зни, Дѣ́во, Рождество́ Твое́.

Инъ.

Ирмо́съ: Ятъ бы́сть, но не удержа́нъ въ пе́рсехъ ки́товыхъ Іо́на: Тво́й бо о́бразъ нося́, страда́вшаго и погребе́нію да́вшагося, я́ко отъ черто́га, отъ звѣ́ря изы́де. Приглаша́ше же кустодíи: храня́щіи су́етная и ло́жная, ми́лость сію́ оста́вили есте́.

Краснѣ́йшій добро́тою, Спа́се, па́че всѣ́хъ сыно́въ человѣ́ческихъ: а́ще бо ни видѣ́нія имя́ше, ниже́ добро́ты во вре́мя стра́сти, но су́щимъ вся́ просвѣща́ше и явля́ше Твоего́ зра́ка видѣ́ніе. Его́же подо́бія на обетша́вшемъ ру́бѣ изображе́ніе, я́коже сокро́вище, на́мъ дарова́ся.

Крѣ́пости, нанесе́нныя отъ ага́рянскаго мно́жества, я́коже отъ иноплеме́нныхъ киво́тъ Изра́илю но́вому, лица́ Твоего́ ны́нѣ къ сему́ даде́ изображе́ніе Твое́, Христе́, и сла́ву, ю́же стяжа́: ниже́ бо подоба́ше лжѣ́, свята́я псо́мъ предпомета́ти.

Невѣ́дущу о Ца́рствіи Твое́мъ небе́снѣмъ, къ нему́же на́съ, Благíй, изъ тлѣ́нныхъ и до́лу лежа́щихъ возве́лъ еси́, Иже невеще́ственными херуви́мы непристу́пенъ, снизше́лъ еси́ да́же до а́да, Твоего́ апо́стола ко Авгарю, Христе́, посла́лъ еси́, та́инство умудря́юща.

Богоро́диченъ: Отъ крѣ́пости руки́ Твоея́, Спа́се, ны́нѣ оста́хъ а́зъ: но ра́ны Твоя́ удали́лъ еси́ отъ мене́ моли́твами неискусобра́чно Ро́ждшія Тя́, Сло́ве, да не оста́виши мене́ бу́рею грѣхо́вною погружа́тися и лю́тѣ пла́вати, Еди́не Изба́вителю.

Конда́къ, гла́съ 2. Подо́бенъ: Въ моли́твахъ.

Неизрече́ннаго и Боже́ственнаго Твоего́ къ человѣ́комъ смотре́нія, неопи́санное Сло́во Отчее, и о́бразъ непи́санный, и богопи́санный побѣди́теленъ, вѣ́дуще нело́жнаго Твоего́ воплоще́нія, почита́емъ, того́ лобыза́юще.

Икосъ:

Увѣря́я человѣ́комъ Госпо́дь вочеловѣ́ченія Своего́ та́йну ужа́сную, самопису́етъ богому́жный Сво́й о́бразъ на убру́сѣ, и первообра́зное у́бо возне́съ отъ горы́ Елео́нскія, на престо́лѣ споражда́етъ Отчи, покланя́тися отъ безтѣле́сныхъ а́нгелъ. Подо́бію же первообра́знаго на́мъ дарова́ покланя́тися: Его́же объе́млюще душе́ю же и се́рдцемъ, почита́емъ, того́ лобыза́юще.

Пѣ́снь 7.

Ирмо́съ: Безсту́днѣй я́рости же и огню́ Боже́ственное жела́ніе сопротивля́яся, о́гнь у́бо ороша́ше, я́рости же смѣя́шеся, богодохнове́нною слове́сною преподо́бныхъ тривѣща́нною цѣвни́цею, противовѣща́я мусикíйскимъ орга́номъ посреди́ пла́мене: препросла́вленный отце́въ и на́шъ Бо́же, благослове́нъ еси́.

Богодѣ́ланныя скрижа́ли Моисе́й, пи́санныя Боже́ственнымъ Ду́хомъ, я́ростію сокру́шъ, но сего́ Влады́ка, Ро́ждшую неврежде́нну въ небе́сныя сохра́нь до́мы, ны́нѣ вну́трь всели́. Съ Не́ю игра́юще, вопіе́мъ Христу́: препросла́вленный отце́въ и на́шъ Бо́же, благослове́нъ еси́.

Въ кимва́лѣхъ — усты́ чи́стыми, мусикíйски же — се́рдцемъ свѣ́тлымъ, доброгла́сною трубо́ю — высо́кою мы́слію, Дѣ́вы и Чи́стыя въ наро́читый избра́нный де́нь преставле́нія, дѣ́тельными пле́щуще рука́ми, вопіе́мъ: препросла́вленный отце́въ и на́шъ Бо́же, благослове́нъ еси́.

Богому́дріи, собери́теся, лю́діе: Бо́жія бо сла́вы Селе́ніе, отъ Сіо́на преставля́ется къ небе́сному жили́щу, идѣ́же гла́съ чи́стъ пра́зднующихъ, гла́съ несказа́ннаго ра́дованія, и въ весе́ліи вопію́щихъ Христу́: препросла́вленный отце́въ и на́шъ Бо́же, благослове́нъ еси́.

Инъ.

Ирмо́съ: Отроцы въ Вавило́нѣ пе́щнаго пла́мене не убоя́шася, но, посредѣ́ пла́мене вве́ржени, ороша́еми, поя́ху: благослове́нъ еси́, Го́споди Бо́же оте́цъ на́шихъ.

Глаго́ломъ у́бо вся́ку болѣ́знь, Сло́ве Бо́жій, отгна́лъ еси́, по земли́ ходя́й, но, ко Оте́ческому престо́лу восходя́й, изображе́ніемъ исцѣля́еши на́шу болѣ́знь.

Сло́вомъ вся́ческая созда́вый и вообра́жся въ чужде́е, зра́ка Своего́ оста́вилъ е́сть на́мъ сво́йственная, я́же подъе́млюще, въ ра́дости весели́мся.

Отъ всея́ души́ поиска́въ сво́йства Твоего́ напеча́таніе вѣ́рный ца́рь, я́коже иска́ше, та́ко и получи́, Го́споди, взаи́мъ обрѣ́тъ боже́ственнаго жела́нія исполне́ніе.

Къ боговидѣ́нію о́чи угото́вимъ и досто́йно потщи́мся ви́дѣти о́бразъ Христо́въ всечестны́й, во спасе́ніе на́ше.

Богоро́диченъ: Осужде́нія дре́вняго разрѣши́ся человѣ́чество Рождество́мъ Твои́мъ: Тя́ бо, еди́ну небе́съ ши́ршую, обрѣ́тъ, Всенепоро́чная, Бо́гъ въ Тя́ всели́ся.

Пѣ́снь 8.

Ирмо́съ: Пла́мень, ороша́ющь преподо́бныя, злочести́выя же попаля́ющь, Ангелъ Бо́жій всемо́щный показа́ отроко́мъ, живонача́льный же исто́чникъ содѣ́ла Богоро́дицу, тлю́ сме́рти и живо́тъ точа́щу пою́щимъ: Содѣ́теля еди́наго пои́мъ, изба́вленніи, и превозно́симъ во вся́ вѣ́ки.

Глаго́лы послѣ́доваху Боже́ственному Ковче́гу свяще́нному, все́ мно́жество богосло́вовъ въ Сіо́нѣ: ка́мо и́деши ны́нѣ, Ски́ніе, — зову́ще, — Бо́га Жива́го? Не преста́й призира́ющи вѣ́рою пою́щія: Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

Якоже, воздѣ́вши ру́цѣ, исхо́диши Всенепоро́чная, ру́цѣ, и́миже Бо́га носи́ла еси́ пло́тію, со дерзнове́ніемъ, я́ко Ма́ти, рекла́ еси́ къ Рожде́нному: я́же Ми́ да́лъ еси́, во вѣ́ки сохрани́, вопію́щія Тебѣ́: Содѣ́теля еди́наго пое́мъ, изба́вленніи, и превозно́симъ во вся́ вѣ́ки.

Инъ.

Ирмо́съ: За зако́ны оте́ческія блаже́нніи въ Вавило́нѣ ю́ноши, предбѣ́дствующе, царю́ющаго оплева́ша повелѣ́ніе безу́мное, и совоку́плени, и́мже, не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте, дѣла́, и превозноси́те во вся́ вѣ́ки.

Якоже у́бо лице́мъ къ лицу́ надѣ́ющеся Тя́, Го́спода, пріити́, вси́ гра́да избра́ннѣйшіи лю́діе срѣ́теніе чуде́сно Ти́ сотворя́ютъ, архіере́овъ боже́ственный предводя́й ли́къ. На и́хже ра́мѣхъ носи́мый и къ достоя́нію Твоему́ влага́емь, Ще́дрый, почи́лъ еси́ въ хра́мѣ Ма́тере Твоея́.

Уста́ незло́бивыхъ дѣте́й къ пророкоубíйственному Тя́ дре́вле ше́ствующа гра́ду пѣсносло́вяху, но со́нмъ собо́рища евре́йскаго беззако́нный убíйственную ру́ку вооружа́ше, свирѣ́пѣющую на Тя́. Ны́нѣ же зако́нный гра́дъ, вси́, ку́пно предте́кшіи, я́ко Содѣ́теля Тя́ зря́, ра́дуется, пріе́мля о́бразъ зра́ка Твоего́.

Па́че Моисе́я Богови́дца, богопи́санныя скрижа́ли пріе́мшаго, возвели́чился еси́, честны́й мѣстонача́льниче, пріе́мъ честно́е посла́ніе Бо́жія Сло́ва, блажа́щее Тя́, благоче́стію вѣ́ровавшаго, и́же ника́коже ви́дѣ чудодѣ́йствія.

Богоро́диченъ: Пло́ть произво́ливый носи́ти, Вели́каго Совѣ́та Отча Ангелъ, во утро́бѣ Твое́й, Пречи́стая, соверше́нно дѣ́йствовася, и Тя́, Ма́терь, до́лѣ описа́, Чи́стая, и истлѣ́вшее обнови́ человѣ́ческое естество́. Его́же благослови́мъ вси́, я́ко Зижди́теля, и превозно́симъ во вся́ вѣ́ки.

Пѣ́снь 9.

Ирмо́съ: Побѣжда́ются естества́ уста́вы въ Тебѣ́, Дѣ́во Чи́стая: дѣ́вствуетъ бо рождество́ и живо́тъ предобруча́етъ сме́рть; по рождествѣ́ Дѣ́ва и по сме́рти жива́, спаса́еши при́сно, Богоро́дице, наслѣ́діе Твое́.

Дивля́хуся Ангельскія си́лы, въ Сіо́нѣ смотря́юще своего́ Влады́ку, же́нскую ду́шу рука́ми нося́щаго, пречи́сто бо Ро́ждшей, сынолѣ́пно провозглаша́ше: гряди́, Чи́стая, съ Сы́номъ и Бо́гомъ просла́вленна бу́ди.

Опря́та ли́къ апо́стольскій богопрія́тное тѣ́ло Твое́, со стра́хомъ зря́ще и гла́сомъ ве́ліимъ вѣща́юще: въ небе́сныя до́мы къ Сы́ну восходя́щи, спаса́еши при́сно, Богоро́дице, наслѣ́діе Твое́.

Инъ.

Ирмо́съ: Стра́нствія Влады́чня и безсме́ртныя трапе́зы на го́рнѣмъ мѣ́стѣ высо́кими умы́, вѣ́рніи, пріиди́те наслади́мся, возше́дша Сло́ва, отъ Сло́ва научи́вшеся, Его́же велича́емъ.

Изблева́ на Тя́ наро́дъ неразу́мный, Спа́се, и вмѣ́сто благодѣ́тельства безмѣ́стная де́рзостнѣ Ти́ протяже́, но мы́, и́же дале́че отстоя́щіи, страстьми́ Твои́ми сыноположи́хомся.

По́мощь на враги́ благочести́вымъ и вѣ́рнымъ пода́ждь царе́мъ, я́ко зна́меніе пло́ти Твоея́, я́коже необори́мое, Влады́ко, стяжа́вше огражде́ніе, си́ми да ви́дятъ спасе́ніе свое́.

Образе неизмѣ́нный Оте́чь, Сія́ніе сла́вы Присносу́щнаго Свѣ́та, печа́ть Вы́шняго, Сло́ве, Си́ло и Му́дросте, Тя́ богосло́вящимъ Благопремѣни́тель бу́ди.

Богоро́диченъ: Ви́дѣно бы́сть на земли́ плотоно́сное Сло́во, сугу́бо естество́мъ изъ Тебе́, Всенепоро́чная, возда́ніемъ Божества́, въ еди́ной ѵпоста́си, несмѣ́снѣ соедини́вся смѣше́нію, Его́же сла́вимъ.

Свѣти́ленъ о́браза. Подо́бенъ: Жены́, услы́шите.

Свѣ́тъ невече́рній, Христе́, просвѣти́ на́съ лица́ Твоего́ зра́комъ, и свѣ́тлости святы́хъ сподо́би, егда́ ся́деши возда́ти кому́ждо по дѣло́мъ его́, моли́твами ро́ждшія Тя́ Богоро́дицы. [Два́жды.]

Сла́ва, и ны́нѣ, пра́здника, подо́бенъ то́йже:

О, коли́ка вели́чія Тебѣ́ Си́льный сотвори́! Отъ непло́дныя бо родила́ся еси́, родила́ же еси́ Дѣ́ва, и Дѣ́ва па́ки пребы́вши, пребыва́еши же по сме́рти, сме́рти вы́шши, Чи́стая, и не оставля́ющи мíра, о мíрѣ мо́лишися.

На хвали́техъ стихи́ры о́браза на 4, гла́съ 4. Подо́бенъ: Зва́нный свы́ше.

Иже во зра́цѣ Бо́жіи Бо́гъ Сы́й,* я́ко сла́вы сія́ніе* и изображе́ніе Отчее,* за милосе́рдіе безмѣ́рное* хотѣ́ніемъ Боже́ственнымъ о́бразъ ви́дѣнъ бы́сть,* раба́ носи́въ зра́къ.* Сего́ подо́біе еди́нъ,* я́коже вѣ́сть Са́мъ,* извѣ́стно вообрази́ богоначерта́нно* въ подо́біи лица́ Своего́,* Его́же прише́ствіемъ* совокупи́ съ человѣ́ки а́нгелъ мно́жество* и просвѣти́ мíръ ви́димый и неви́димый. [Два́жды.]

Иже боговидѣ́ніемъ иногда́ за́днихъ,* Моисе́ово лице́ просла́вивый Бо́гъ,* и тѣ́мъ богоначерта́нный зако́нъ посла́въ* невѣ́рующимъ изра́ильтескимъ лю́демъ,* се́ пріи́де, я́ко отъ Еги́пта,* отъ земли́ иноро́дныя прише́дъ,* во христоимени́тый гра́дъ но́выхъ люде́й,* Боже́ственнымъ начерта́ніемъ* первообра́знаго Его́ стра́шнаго о́браза.* Его́же, лице́мъ къ лицу́* ви́дѣти сподобля́еміи, сла́вимъ.

Иже ца́рствуяй тва́рію все́ю,* нищету́ во́льную пріе́мь,* обогаща́етъ Божество́мъ* позна́вшихъ Его́ госпо́дство,* тѣ́мже и ко Авгарю* богоначерта́нна пи́смена посла́въ,* прося́щему спасе́нія и здра́вія сему́,* е́же отъ подо́бія Твоего́ зра́ка Боже́ственнаго.* Его́же прише́ствіе ра́достно пра́зднующе ны́нѣ,* возвесели́мся вѣ́рою,* просвѣще́ніе почерпа́юще.

Сла́ва, гла́съ то́йже:

Да ка́плютъ о́блацы сла́дость и го́ры да взыгра́ются ра́достно о пресла́вныхъ вели́чіихъ Христа́ Бо́га на́шего: вчера́ бо на Ѳаво́рстѣй горѣ́ свѣ́тъ облиста́ Божества́, увѣря́я ученико́въ верхо́вныя, Моисе́я же и Илію́ со сла́вою предста́ви, Того́ свидѣ́тельствующихъ, зако́номъ облада́юща и живы́ми и ме́ртвыми владя́ща. Дне́сь посреди́ вселе́нныя свѣтоза́рное воображе́ніе возсія́, увѣря́я вся́ческая, я́ко То́й е́сть вочеловѣ́чивыйся Бо́гъ на́шъ, Ему́же вопіе́мъ: сла́ва, Христе́, человѣколю́бію Твоему́.

И ны́нѣ, гла́съ 1:

Подоба́ше самови́дцамъ Сло́ва и слуга́мъ, и е́же по пло́ти Ма́тере Его́ успе́ніе ви́дѣти, коне́чное ели́ко на Не́й та́инство, я́ко да не то́кмо е́же отъ земли́ Спа́сово восхожде́ніе у́зрятъ, но и Ро́ждшія Его́ преставле́нію свидѣ́тельствуютъ. Тѣ́мже, отвсю́ду Боже́ственною си́лою собра́вшеся, Сіо́на достиго́ша, и на не́бо иду́щую предсыла́ху, вы́шшую Херуви́мъ, Ейже и мы́ съ ни́ми покланя́емся, я́ко моля́щейся о душа́хъ на́шихъ.

Славосло́віе вели́кое.
По трисвято́мъ, тропа́рь о́браза. Сла́ва, и ны́нѣ, пра́здника Богоро́дицы.



НА ЛИТУРГІИ,

Блаже́нна пра́здника, пѣ́снь 1-я, на 4, и о́браза, пѣ́снь 6-я, на 4. Проки́менъ, гла́съ 4: Воспо́йте Го́сподеви пѣ́снь но́ву,* я́ко ди́вна сотвори́ Госпо́дь. Сти́хъ: Ви́дѣша вси́ концы́ земли́ спасе́ніе Бо́га на́шего. [И пра́здника Богоро́дицы, гла́съ 3: Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ.] Апо́столъ къ Колосса́емъ, зача́ло 250 или́ къ Кори́нѳяномъ, зача́ло 173. Та́же рядовы́й Апо́столъ. Аллилу́ія, гла́съ 4: Го́споди, во свѣ́тѣ лица́ Твоего́ по́йдемъ, и о и́мени Твое́мъ возра́дуемся во вѣ́ки. [Сти́хъ: Ви́дѣша вси́ концы́ земли́ спасе́ніе Бо́га на́шего. И Богоро́дицы, гла́съ 2: Воскресни́, Го́споди, въ поко́й Тво́й, Ты́ и Киво́тъ святы́ни Твоея́.] Ева́нгеліе Луки́, зача́ло 48 отъ полу́. [И рядово́е.] Прича́стенъ: Го́споди, во свѣ́тѣ лица́ Твоего́ по́йдемъ и о и́мени Твое́мъ возра́дуемся во вѣ́ки. [И Богоро́дицы: Ча́шу спасе́нія пріиму́, и и́мя Госпо́дне призову́.]

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 151 – 159 об.

/ Къ оглавленію раздѣла /


Наверхъ / Къ титульной страницѣ

0